హరిః ఓమ్ । స॒హ నా॑ వవతు । స॒హ నౌ॑ భునక్తు । స॒హ వీ॒ర్యం॑ కరవావహై । తే॒జ॒స్వి నా॒వధీ॑తమస్తు॒ మా వి॑ద్విషా॒వహై᳚ । ఓం శాంతిః॒ శాంతిః॒ శాంతిః॑ ।

భ్రుగు॒ర్వై వా॑రు॒ణిః । వరు॑ణం॒ పిత॑ర॒ముప॑ససార । అధీ॑హి భగవో॒ బ్రహ్మేతి॑ । తస్మా॑ ఏత॒త్ప్రో॑వాచ । అన్నం॑ ప్రా॒ణం చక్షు॒శ్రోత్రం॒ మనో॒ వాచ॒మితి॑ । తగ్ం హో॑వాచ । యతో॒ వా ఇ॒మాని॒ భుతా॑ని॒ జాయం॑తే । యేన॒ జాతా॑ని॒ జీవం॑తి । యత్ప్రయం॑త్యభిసంవి॑శంతి । తద్విజి॑జ్ఞాసస్వ । తద్బ్రహ్మేతి॑ । స తపో॑ఽతప్యత । స తప॑స్త॒ప్త్వా । ॥ 1 ॥

అన్నం॒ బ్రహ్మేతి॒ వ్య॑జానాత్ । అ॒న్నాధ్యే॑వ ఖల్వి॒మాని॒ భూతా॑ని॒ జాయం॑తే । అన్నే॑న॒ జాతా॑ని॒ జీవం॑తి । అన్నం॒ ప్రయం॑త్య॒భిసంవి॑శం॒తీతి॑ । తద్వి॒జ్ఞాయ॑ । పున॑రే॒వ వరు॑ణం॒ పిత॑ర॒ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ । తపో॒ బ్రహ్మేతి॑ । స తపో॑ఽతప్యత । స తప॑స్త॒ప్త్వా । ॥ 2 ॥

ప్రా॒ణో బ్ర॒హ్మేతి॒ వ్య॑జానాత్ । ప్రా॒ణాధ్యే॑వ ఖల్వి॒మాని॒ భూతా॑ని॒ జాయం॑తే । ప్రా॒ణేన॒ జాతా॑ని॒ జీవం॑తి । ప్రా॒ణం ప్రయం॑త్య॒భి సంవి॑శం॒తీతి॑ । పున॑రే॒వ వరు॑ణం॒ పిత॑ర॒ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ । తపో॒ బ్రహ్మేతి॑ । స తపో॑ఽతప్యత । స తప॑స్త॒ప్త్వా । ॥ 3 ॥

మనో॒ బ్రహ్మేతి॒ వ్య॑జానాత్। మన॑సో॒ హ్యే॑వ ఖల్వి॒మాని॒ భూతా॑ని॒ జాయం॑తే । మన॑సా॒ జాతా॑ని॒ జీవం॑తి । మనః॒ ప్రయం॑త్య॒భి సంవి॑శం॒తీతి॑ । తద్వి॒జ్ఞాయ॑ । పున॑రే॒వ వరు॑ణం॒ పిత॑ర॒ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ । తపో॒ బ్రహ్మేతి॑ । స తపో॑ఽతప్యత । స తప॑స్త॒ప్త్వా । ॥ 4 ॥

వి॒జ్ఞానం॒ బ్రహ్మేతి॒ వ్య॑జానాత్ । వి॒జ్ఞానా॒ధ్యే॑వ ఖల్వి॒మాని॒ భూతా॑ని॒ జాయం॑తే । వి॒జ్ఞానే॑న॒ జాతా॑ని॒ జీవం॑తి । వి॒జ్ఞానం॒ ప్రయం॑త్య॒భిసంవి॑శం॒తీతి॑ । తద్వి॒జ్ఞాయ॑ । పున॑రే॒వ వరు॑ణం॒ పిత॑ర॒ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ । తపో॒ బ్రహ్మేతి॑ । స తపో॑ఽతప్యత । స తప॑స్త॒ప్త్వా । ॥ 5 ॥

ఆ॒నం॒దో బ్ర॒హ్మేతి॒ వ్య॑జానాత్ । ఆ॒నందా॒ధ్యే॑వ ఖల్వి॒మాని॒ భూతా॑ని॒ జాయం॑తే । ఆ॒నం॒దేన॒ జాతా॑ని॒ జీవం॑తి । ఆ॒నం॒దం ప్రయం॑త్య॒భిసంవి॑శం॒తీతి॑ । సైషా భా᳚ర్గ॒వీ వా॑రు॒ణీ వి॒ద్యా । ప॒ర॒మే వ్యో॑మ॒న్ ప్రతి॑ష్ఠితా । స య ఏ॒వం వేద॒ ప్రతి॑తిష్ఠతి । అన్న॑వానన్నా॒దో భ॑వతి । మ॒హాన్భ॑వతి ప్ర॒జయా॑ ప॒శుభి॑ర్బ్రహ్మవర్చ॒సేన॑ । మ॒హాన్ కీ॒ర్త్యా । ॥ 6 ॥

అన్నం॒ న నిం॑ద్యాత్ । తద్-వ్ర॒తమ్ । ప్రా॒ణో వా అన్నం᳚ । శరీ॑రమన్నా॒దమ్ । ప్రా॒ణే శరీ॑రం॒ ప్రతి॑ష్ఠితమ్ । శరీ॑రే ప్రా॒ణః ప్రతి॑ష్ఠితః । తదే॒తదన్న॒మన్నే॒ ప్రతి॑ష్టితమ్ । స య ఏ॒తదన్న॒మన్నే॒ ప్రతి॑ష్ఠితం॒ వేద॒ ప్రతి॑తిష్ఠతి । అన్న॑వానన్నా॒దో భ॑వతి । మ॒హాన్భ॑వతి ప్ర॒జయా॑ ప॒శుభి॑ర్బ్రహ్మవర్చ॒సేన॑ । మ॒హాన్ కీ॒ర్త్యా । ॥ 7 ॥

అన్నం॒ న పరి॑చక్షీత । తద్-వ్ర॒తమ్ । ఆపో॒ వా అన్నం᳚ । జ్యోతి॑రన్నా॒దమ్ । అ॒ప్సు జ్యోతిః॒ ప్రతి॑ష్ఠితమ్ । జ్యోతి॒ష్యాపః॒ ప్రతి॑ష్ఠితాః। తదే॒తదన్న॒మన్నే॒ ప్రతి॑ష్ఠితమ్ । స య ఏ॒తదన్న॒మన్నే॒ ప్రతి॑ష్ఠితం॒ వేద॒ ప్రతి॑తిష్ఠతి । అన్న॑వానన్నా॒దో భ॑వతి । మ॒హాన్భ॑వతి ప్ర॒జయా॑ ప॒శుభి॑ర్బ్రహ్మవర్చ॒సేన॑ । మ॒హాన్ కీ॒ర్త్యా । ॥ 8 ॥

అన్నం॑ బ॒హు కు॑ర్వీత । తద్-వ్ర॒తమ్ । పృ॒థి॒వీ వా అన్నం᳚ । ఆ॒కా॒శో᳚ఽన్నా॒దః । పృ॒థి॒వ్యామా॑కా॒శః ప్రతి॑ష్ఠితః । ఆ॒కా॒శే పృ॑థి॒వీ ప్రతి॑ష్ఠితా । తదే॒తదన్న॒మన్నే॒ ప్రతి॑ష్ఠితమ్ । స య ఏ॒తదన్న॒మన్నే॒ ప్రతి॑ష్ఠితం॒ వేద॒ ప్రతి॑తిష్ఠతి । అన్న॑వానన్నా॒దో భ॑వతి । మ॒హాన్భ॑వతి ప్ర॒జయా॑ ప॒శుభి॑ర్బ్రహ్మవర్చ॒సేన॑ । మ॒హాన్ కీ॒ర్త్యా । ॥ 9 ॥

న కంచన వసతౌ ప్రత్యా॑చక్షీ॒త । తద్-వ్ర॒తమ్ । తస్మాద్యయా కయా చ విధయా బహ్వ॑న్నం ప్రా॒ప్నుయాత్ । అరాధ్యస్మా అన్నమి॑త్యాచ॒క్షతే । ఏతద్వై ముఖతో᳚ఽన్నగ్ం రా॒ద్ధమ్ । ముఖతోఽస్మా అ॑న్నగ్ం రా॒ధ్యతే । ఏతద్వై మధ్యతో᳚ఽన్నగ్ం రా॒ద్ధమ్ । మధ్యతోఽస్మా అ॑న్నగ్ం రా॒ధ్యతే । ఏతద్వా అంతతో᳚ఽన్నగ్ం రా॒ద్ధమ్ । అంతతోఽస్మా అ॑న్నగ్ం రా॒ధ్యతే । య ఏ॑వం వే॒ద । క్షేమ ఇ॑తి వా॒చి । యోగక్షేమ ఇతి ప్రా॑ణాపా॒ణయోః । కర్మే॑తి హ॒స్తయోః । గతిరి॑తి పా॒దయోః । విముక్తిరి॑తి పా॒యౌ । ఇతి మానుషీ᳚స్సమా॒జ్ఞాః । అథ దై॒వీః । తృప్తిరి॑తి వృ॒ష్టౌ । బలమి॑తి వి॒ద్యుతి । యశ ఇ॑తి ప॒శుషు । జ్యోతిరితి న॑క్షత్రే॒షు । ప్రజాతిరమృతమానంద ఇ॑త్యుప॒స్థే । సర్వమి॑త్యాకా॒శే । తత్ప్రతిష్ఠేత్యు॑పాసీ॒త। ప్రతిష్ఠా॑వాన్భ॒వతి । తన్మహ ఇత్యు॑పాసీ॒త । మ॑హాన్భ॒వతి । తన్మన ఇత్యు॑పాసీ॒త । మాన॑వాన్భ॒వతి । తన్నమ ఇత్యు॑పాసీ॒త । నమ్యంతే᳚ఽస్మై కా॒మాః । తద్బ్రహ్మేత్యు॑పాసీ॒త । బ్రహ్మ॑వాన్భ॒వతి । తద్బ్రహ్మణః పరిమర ఇత్యు॑పాసీ॒త । పర్యేణం మ్రియంతే ద్వి షంత॑స్సప॒త్నాః । పరి యే᳚ఽప్రియా᳚ భ్రాతృ॒వ్యాః । స యశ్చా॑యం పు॒రుషే । యశ్చాసా॑వాది॒త్యే । స ఏకః॑ । స య॑ ఏవం॒ విత్ । అస్మాల్లో॑కాత్ప్రే॒త్య । ఏతమన్నమయమాత్మానముప॑ సంక్ర॒మ్య ॥ ఏతం ప్రాణమయమాత్మానముప॑ సంక్ర॒మ్య । ఏతం మనోమయమాత్మానముప॑ సంక్ర॒మ్య । ఏతం విజ్ఞానమయమాత్మానముప॑ సంక్ర॒మ్య । ఏతమానందమయమాత్మానముప॑ సంక్ర॒మ్య । ఇమాన్ లోకాన్ కామాన్నీ కామరూప్య॑ను సం॒చరన్న్ । ఏతథ్సామ గా॑యన్నా॒స్తే । హా(3) వు॒ హా(3) వు॒ హా(3) వు॑ । అ॒హమన్నమ॒హమన్నమ॒హమన్నమ్ । అ॒హమన్నా॒దో(2)ఽ॒హమన్నా॒దో(2)ఽ॒హమన్నా॒దః । అ॒హగ్గ్ శ్లోక॒కృద॒హగ్గ్ శ్లోక॒కృద॒హగ్గ్ శ్లోక॒కృత్ । అ॒హమస్మి ప్రథమజా ఋతా(3) స్య॒ । పూర్వం దేవేభ్యో అమృతస్య నా(3) భా॒యి॒ । యో మా దదాతి స ఇదేవ మా(3) వాః॒ । అ॒హమన్న॒మన్న॑మ॒దంత॒మా(3) ద్మి॒ । అహం॒ విశ్వం॒ భువ॑న॒మభ్య॑భ॒వామ్ । సువ॒ర్న జ్యోతీః᳚ । య ఏ॒వం వేద॑ । ఇత్యు॑ప॒నిష॑త్ । ॥ 10 ॥

స॒హ నా॑ వవతు । స॒హ నౌ॑ భునక్తు । స॒హ వీ॒ర్యం॑ కరవావహై । తే॒జ॒స్వి నా॒వధీ॑తమస్తు॒ మా వి॑ద్విషా॒వహై᳚ ॥ ఓం శాంతిః॒ శాంతిః॒ శాంతిః॑ ॥

॥ హరిః॑ ఓమ్ ॥
॥ శ్రీ కృష్ణార్పణమస్తు ॥