హరిః ఓమ్ ॥ స॒హ నా॑ వవతు । స॒హ నౌ॑ భునక్తు । స॒హ వీ॒ర్యం॑ కరవావహై । తే॒జ॒స్వి నా॒వధీ॑తమస్తు॒ మా వి॑ద్విషా॒వహై᳚ । ఓం శాంతిః॒ శాంతిః॒ శాంతిః॑ ॥

బ్ర॒హ్మ॒విదా᳚ప్నోతి॒ పరం᳚ ॥ తదే॒షాఽభ్యు॑క్తా । స॒త్యం జ్ఞా॒నమ॑నం॒తం బ్రహ్మ॑ । యో వేద॒ నిహి॑తం॒ గుహా॑యాం పర॒మే వ్యో॑మన్న్ । సో᳚ఽశ్ను॒తే॒ సర్వా॒న్కామాం᳚థ్స॒హ । బ్రహ్మ॑ణా విప॒శ్చితేతి॑ ॥ తస్మా॒ద్వా ఏ॒తస్మా॑దా॒త్మన॑ ఆకా॒శస్సంభూ॑తః । ఆ॒కా॒శాద్వా॒యుః । వా॒యోర॒గ్నిః । అ॒గ్నేరాపః॑ । అ॒ద్భ్యః పృ॑థి॒వీ । పృ॒థి॒వ్యా ఓష॑ధయః । ఓష॑ధీ॒భ్యోన్నం᳚ । అన్నా॒త్పురు॑షః । స వా ఏష పురుషోఽన్న॑రస॒మయః । తస్యేద॑మేవ॒ శిరః । అయం దక్షి॑ణః ప॒క్షః । అయముత్త॑రః ప॒క్షః । అయమాత్మా᳚ । ఇదం పుచ్ఛం॑ ప్రతి॒ష్ఠా । తదప్యేష శ్లో॑కో భ॒వతి ॥ 1 ॥

అన్నా॒ద్వై ప్ర॒జాః ప్ర॒జాయం॑తే । యాః కాశ్చ॑ పృథి॒వీగ్ శ్రి॒తాః । అథో॒ అన్నే॑నై॒వ జీ॑వంతి। అథై॑న॒దపి॑ యంత్యంత॒తః । అన్న॒గ్ం॒ హి భు॒తానాం॒ జ్యేష్ఠం᳚ । తస్మా᳚థ్సర్వౌష॒ధము॑చ్యతే । సర్వం॒ వై తేఽన్న॑మాప్నువంతి । యేఽన్నం॒ బ్రహ్మో॒పాస॑తే । అన్న॒గ్ం॒ హి భు॒తానాం॒ జ్యేష్ఠం᳚ । తస్మా᳚థ్సర్వౌష॒ధము॑చ్యతే । అన్నా᳚ద్భూ॒తాని॒ జాయం॑తే । జాతా॒న్యన్నేన॑ వర్ధంతే । అద్యతేఽత్తి చ॑ భూతా॒ని । తస్మాదన్నం తదుచ్య॑త ఇ॒తి । తస్మాద్వా ఏతస్మాదన్న॑రస॒మయాత్ । అన్యోంతర ఆత్మా᳚ ప్రాణ॒మయః । తేనై॑ష పూ॒ర్ణః । స వా ఏష పురుషవి॑ధ ఏ॒వ । తస్య పురు॑షవి॒ధతామ్ । అన్వయం॑ పురుష॒విధః । తస్య ప్రాణ॑ ఏవ॒ శిరః । వ్యానో దక్షి॑ణః ప॒క్షః । అపాన ఉత్త॑రః ప॒క్షః । ఆకా॑శ ఆ॒త్మా । పృథివీ పుచ్ఛం॑ ప్రతి॒ష్ఠా । తదప్యేష శ్లో॑కో భ॒వతి ॥ 2 ॥

ప్రా॒ణం దే॒వా అను॒ప్రాణం॑తి । మ॒ను॒ష్యాః᳚ ప॒శవ॑శ్చ॒ యే । ప్రా॒ణో హి భూ॒తనా॒మాయుః॑ । తస్మా᳚థ్సర్వాయు॒షము॑చ్యతే । సర్వ॑మే॒వ త॒ ఆయు॑ర్యంతి । యే ప్రా॒ణం బ్రహ్మో॒పాస॑తే । ప్రాణో హి భూతా॑నామా॒యుః । తస్మాథ్సర్వాయుషముచ్య॑త ఇ॒తి । తస్యైష ఏవ శారీ॑ర ఆ॒త్మా । యః॑ పూర్వ॒స్య । తస్మాద్వా ఏతస్మా᳚త్-ప్రాణ॒మయాత్ । అన్యోఽంతర ఆత్మా॑ మనో॒మయః । తేనై॑ష పూ॒ర్ణః । స వా ఏష పురుషవి॑ధ ఏ॒వ। తస్య పురు॑షవి॒ధతామ్ । అన్వయం॑ పురుష॒విధః । తస్య యజు॑రేవ॒ శిరః । ఋగ్-దక్షి॑ణః ప॒క్షః । సామోత్త॑రః ప॒క్షః । ఆదే॑శ ఆ॒త్మా । అథర్వాంగిరసః పుచ్ఛం॑ ప్రతి॒ష్ఠా । తదప్యేష శ్లో॑కో భ॒వతి ॥ 3 ॥

యతో॒ వాచో॒ నివ॑ర్తంతే । అప్రా᳚ప్య॒ మన॑సా స॒హ । ఆనందం బ్రహ్మ॑ణో వి॒ద్వాన్ । న బిభేతి కదా॑చనే॒తి । తస్యైష ఏవ శారీ॑ర ఆ॒త్మా । యః॑ పూర్వ॒స్య । తస్మాద్వా ఏతస్మా᳚న్-మనో॒మయాత్ । అన్యోఽంతర ఆత్మా వి॑జ్ఞాన॒మయః । తేనై॑ష పూ॒ర్ణః । స వా ఏష పురుషవి॑ధ ఏ॒వ । తస్య పురు॑షవి॒ధతామ్ । అన్వయం॑ పురుష॒విధః । తస్య శ్ర॑ద్ధైవ॒ శిరః । ఋతం దక్షి॑ణః ప॒క్షః । సత్యముత్త॑రః ప॒క్షః । యో॑గ ఆ॒త్మా । మహః పుచ్ఛం॑ ప్రతి॒ష్ఠా । తదప్యేష శ్లో॑కో భ॒వతి ॥ 4 ॥

వి॒జ్ఞానం॑ య॒జ్ఞం త॑నుతే । కర్మా॑ణీ తను॒తేఽపి॑ చ । వి॒జ్ఞానం॑ దే॒వాస్సర్వే᳚ । బ్రహ్మ॒ జ్యేష్ఠ॒ముపా॑సతే । వి॒జ్ఞానం॒ బ్రహ్మ॒ చేద్వేద॑ । తస్మా॒చ్చేన్న ప్ర॒మాద్య॑తి । శరీరే॑ పాప్మ॑నో హి॒త్వా । సర్వాన్ కామాంథ్సమశ్ను॑త ఇ॒తి । తస్యైష ఏవ శారీ॑ర ఆ॒త్మా । యః॑ పూర్వ॒స్య । తస్మాద్వా ఏతస్మాద్వి॑జ్ఞాన॒మయాత్ । అన్యోఽంతర ఆత్మా॑ఽఽనంద॒మయః । తేనై॑ష పూ॒ర్ణః । స వా ఏష పురుషవి॑ధ ఏ॒వ । తస్య పురు॑షవి॒ధతామ్ । అన్వయం॑ పురుష॒విధః । తస్య ప్రియ॑మేవ॒ శిరః । మోదో దక్షి॑ణః ప॒క్షః । ప్రమోద ఉత్త॑రః ప॒క్షః । ఆనం॑ద ఆ॒త్మా । బ్రహ్మ పుచ్ఛం॑ ప్రతి॒ష్ఠా । తదప్యేష శ్లో॑కో భ॒వతి ॥ 5 ॥

అస॑న్నే॒వ స॑ భవతి । అస॒ద్బ్రహ్మేతి॒ వేద॒ చేత్ । అస్తి బ్రహ్మేతి॑ చేద్వే॒ద । సంతమేనం తతో వి॑దురి॒తి । తస్యైష ఏవ శారీ॑ర ఆ॒త్మా । యః॑ పూర్వ॒స్య । అథాతో॑ఽనుప్ర॒శ్నాః । ఉ॒తావి॒ద్వాన॒ముం లో॒కం ప్రేత్య॑ । కశ్చ॒న గ॑చ్చ॒తీ(3) । ఆహో॑ వి॒ద్వాన॒ముం లో॒కం ప్రేత్య॑ । కస్చి॒థ్సమ॑శ్ను॒తా(3) ఉ॒ । సో॑ఽకామయత । బ॒హు స్యాం॒ ప్రజా॑యే॒యేతి॑ । స తపో॑ఽతప్యత । స తప॑స్త॒ప్త్వా । ఇదగ్ం సర్వ॑మసృజత । యది॒దం కించ॑ । తథ్సృ॒ష్ట్వా । తదే॒వాను॒ప్రావి॑శత్ । తద॑నుప్ర॒విశ్య॑ । సచ్చ॒ త్యచ్చా॑భవత్ । ని॒రుక్తం॒ చాని॑రుక్తం చ । ని॒లయ॑నం॒ చాని॑లయనం చ । వి॒జ్ఞానం॒ చావి॑జ్ఞనం చ । సత్యం చానృతం చ స॑త్యమ॒భవత్ । యది॑దం కిం॒చ । తథ్సత్యమి॑త్యాచ॒క్షతే । తదప్యేష శ్లో॑కో భ॒వతి ॥ 6 ॥

అస॒ద్వా ఇ॒దమగ్ర॑ ఆసీత్ । తతో॒ వై సద॑జాయత । తదాత్మానగ్గ్ స్వయ॑మకు॒రుత । తస్మాత్తథ్సుకృతముచ్య॑త ఇ॒తి । యద్వై॑ తథ్సు॒కృతమ్ । ర॑సో వై॒ సః । రసగ్గ్ హ్యేవాయం లబ్ధ్వాఽఽనం॑దీ భ॒వతి । కో హ్యేవాన్యా᳚త్కః ప్రా॒ణ్యాత్ । యదేష ఆకాశ ఆనం॑దో న॒ స్యాత్ । ఏష హ్యేవాఽఽనం॑దయా॒తి । య॒దా హ్యే॑వైష॒ ఏతస్మిన్నదృశ్యేఽనాత్మ్యేఽనిరుక్తేఽనిలయనేఽభయం ప్రతి॑ష్ఠాం విం॒దతే । అథ సోఽభయం గ॑తో భ॒వతి । య॒దా హ్యే॑వైష॒ ఏతస్మిన్నుదరమంత॑రం కు॒రుతే । అథ తస్య భ॑యం భ॒వతి । తత్వేవ భయం విదుషోఽమ॑న్వాన॒స్య । తదప్యేష శ్లో॑కో భ॒వతి ॥ 7 ॥

భీ॒షాఽస్మా॒ద్వాతః॑ పవతే । భీ॒షోదే॑తి॒ సూర్యః॑ । భీ॒షాఽస్మాదగ్ని॑శ్చేంద్ర॒శ్చ । మృత్యుర్ధావతి పంచ॑మ ఇ॒తి । సైషాఽఽనందస్య మీమాగ్ం॑సా భ॒వతి । యువా స్యాథ్సాధుయు॑వాఽధ్యా॒యకః । ఆశిష్ఠో దృడిష్ఠో॑ బలి॒ష్ఠః । తస్యేయం పృథివీ సర్వా విత్తస్య॑ పూర్ణా॒ స్యాత్ । స ఏకో మానుష॑ ఆనం॒దః । తే యే శతం మానుషా॑ ఆనం॒దాః । స ఏకో మనుష్యగంధర్వాణా॑మానం॒దః । శ్రోత్రియస్య చాకామ॑హత॒స్య । తే యే శతం దేవగంధర్వాణా॑మానం॒దాః । స ఏకః పితృణాం చిరలోకలోకానా॑మానం॒దః । శ్రోత్రియస్య చాకామ॑హత॒స్య । తే యే శతం పితృణాం చిరలోకలోకానా॑మానం॒దాః । స ఏక ఆజానజానాం దేవానా॑మానం॒దః । శ్రోత్రియస్య చాకామ॑హత॒స్య । తే యే శతమాజానజానాం దేవానా॑మానం॒దాః । స ఏకః కర్మదేవానాం దేవానా॑మానం॒దః । యే కర్మణా దేవాన॑పి యం॒తి । శ్రోత్రియస్య చాకామ॑హత॒స్య । తే యే శతం కర్మదేవానాం దేవానా॑మానం॒దాః । స ఏకో దేవానా॑మానం॒దః । శ్రోత్రియస్య చాకామ॑హత॒స్య । తే యే శతం దేవానా॑మానం॒దాః । స ఏక ఇంద్ర॑స్యాఽఽనంం॒దః । శ్రోత్రియస్య చాకామ॑హత॒స్య । తే యే శతమింద్ర॑స్యాఽఽనం॒దాః । స ఏకో బృహస్పతే॑రానం॒దః । శ్రోత్రియస్య చాకామ॑హత॒స్య । తే యే శతం బృహస్పతే॑రానం॒దాః । స ఏకః ప్రజాపతే॑రానం॒దః । శ్రోత్రియస్య చాకామ॑హత॒స్య । తే యే శతం ప్రజాపతే॑రానం॒దాః । స ఏకో బ్రహ్మణ॑ ఆనం॒దః । శ్రోత్రియస్య చాకామ॑హత॒స్య । తే యే శతం పజాపతే॑రానం॒దాః । స ఏకో బ్రహ్మణ॑ ఆనం॒దః । శ్రోత్రియస్య చాకామ॑హత॒స్య । స యశ్చా॑యం పు॒రుషే । యశ్చాసా॑వాది॒త్యే । స ఏకః॑ । స య॑ ఏవం॒ విత్ । అస్మాల్లో॑కాత్ప్రే॒త్య । ఏతమన్నమయమాత్మానముప॑సంక్రా॒మతి । ఏతం ప్రాణమయమాత్మానముప॑సంక్రా॒మతి । ఏతం మనోమయమాత్మానముప॑సంక్రా॒మతి। ఏతం విజ్ఞానమయమాత్మానముప॑సంక్రా॒మతి । ఏతమానందమయమాత్మానముప॑సంక్రా॒మతి । తదప్యేష శ్లో॑కో భ॒వతి ॥ 8 ॥

యతో॒ వాచో॒ నివ॑ర్తంతే । అప్రా᳚ప్య॒ మన॑సా స॒హ । ఆనందం బ్రహ్మ॑ణో వి॒ద్వాన్ । న బిభేతి కుత॑శ్చనే॒తి । ఏతగ్ం హ వావ॑ న త॒పతి । కిమహగ్ం సాధు॑ నాక॒రవమ్ । కిమహం పాపమకర॑వమి॒తి । స య ఏవం విద్వానేతే ఆత్మా॑నగ్గ్ స్పృ॒ణుతే । ఉ॒భే హ్యే॑వైష॒ ఏతే ఆత్మా॑నగ్గ్ స్పృ॒ణుతే । య ఏ॒వం వేద॑ । ఇత్యు॑ప॒నిష॑త్ ॥ 9 ॥

స॒హ నా॑ వవతు । స॒హ నౌ॑ భునక్తు । స॒హ వీ॒ర్యం॑ కరవావహై । తే॒జ॒స్వి నా॒వధీ॑తమస్తు॒ మా వి॑ద్విషా॒వహై᳚ । ఓం శాంతిః॒ శాంతిః॒ శాంతిః॑ ॥

॥ హరిః॑ ఓమ్ ॥
॥ శ్రీ కృష్ణార్పణమస్తు ॥