॥ అష్టమః సర్గః ॥
॥ విలక్ష్యలక్ష్మీపతిః ॥
అథ కథమపి యామినీం వినీయ స్మరశరజర్జరితాపి సా ప్రభాతే ।
అనునయవచనం వదంతమగ్రే ప్రణతమపి ప్రియమాహ సాభ్యసూయం ॥ 49 ॥
॥ గీతం 17 ॥
రజనిజనితగురుజాగరరాగకషాయితమలసనివేశం ।
వహతి నయనమనురాగమివ స్ఫుటముదితరసాభినివేశం ॥
హరిహరి యాహి మాధవ యాహి కేశవ మా వద కైతవవాదం తామనుసర సరసీరుహలోచన యా తవ హరతి విషాదం ॥ 50 ॥
కజ్జలమలినవిలోచనచుంబనవిరచితనీలిమరూపం ।
దశనవసనమరుణం తవ కృష్ణ తనోతి తనోరనురూపం ॥ 2 ॥
వపురనుహరతి తవ స్మరసంగరఖరనఖరక్షతరేఖం ।
మరకతశకలకలితకలధౌతలిపిరేవ రతిజయలేఖం ॥ 3 ॥
చరణకమలగలదలక్తకసిక్తమిదం తవ హృదయముదారం ।
దర్శయతీవ బహిర్మదనద్రుమనవకిసలయపరివారం ॥ 4 ॥
దశనపదం భవదధరగతం మమ జనయతి చేతసి ఖేదం ।
కథయతి కథమధునాపి మయా సహ తవ వపురేతదభేదం ॥ 5 ॥
బహిరివ మలినతరం తవ కృష్ణ మనోఽపి భవిష్యతి నూనం ।
కథమథ వంచయసే జనమనుగతమసమశరజ్వరదూనం ॥ 6 ॥
భ్రమతి భవానబలాకవలాయ వనేషు కిమత్ర విచిత్రం ।
ప్రథయతి పూతనికైవ వధూవధనిర్దయబాలచరిత్రం ॥ 7 ॥
శ్రీజయదేవభణితరతివంచితఖండితయువతివిలాపం ।
శృణుత సుధామధురం విబుధా విబుధాలయతోఽపి దురాపం ॥ 8 ॥
తదేవం పశ్యంత్యాః ప్రసరదనురాగం బహిరివ ప్రియాపాదాలక్తచ్ఛురితమరుణచ్ఛాయహృదయం ।
మమాద్య ప్రఖ్యాతప్రణయభరభంగేన కితవ త్వదాలోకః శోకాదపి కిమపి లజ్జాం జనయతి ॥ 50 ॥
॥ ఇతి గీతగోవిందే ఖండితావర్ణనే విలక్ష్యలక్ష్మీపతిర్నామ అష్ఠమః సర్గః ॥
Browse Related Categories:
