॥ ద్వితీయః సర్గః ॥
॥ అక్లేశకేశవః ॥
విహరతి వనే రాధా సాధారణప్రణయే హరౌ విగలితనిజోత్కర్షాదీర్ష్యావశేన గతాన్యతః ।
క్వచిదపి లతాకుంజే గుంజన్మధువ్రతమండలీ-ముఖరశిఖరే లీనా దీనాప్యువాచ రహః సఖీం ॥ 14 ॥
॥ గీతం 5 ॥
సంచరదధరసుధామధురధ్వనిముఖరితమోహనవంశం ।
చలితదృగంచలచంచలమౌలికపోలవిలోలవతంసం ॥
రాసే హరిమిహ విహితవిలాసం స్మరతి మనో మమ కృతపరిహాసం ॥ 1 ॥
చంద్రకచారుమయూరశిఖండకమండలవలయితకేశం ।
ప్రచురపురందరధనురనురంజితమేదురముదిరసువేశం ॥ 2 ॥
గోపకదంబనితంబవతీముఖచుంబనలంభితలోభం ।
బంధుజీవమధురాధరపల్లవముల్లసితస్మితశోభం ॥ 3 ॥
విపులపులకభుజపల్లవవలయితవల్లవయువతిసహస్రం ।
కరచరణోరసి మణిగణభూషణకిరణవిభిన్నతమిస్రం ॥ 4 ॥
జలదపటలవలదిందువినందకచందనతిలకలలాటం ।
పీనపయోధరపరిసరమర్దననిర్దయహృదయకవాటం ॥ 5 ॥
మణిమయమకరమనోహరకుండలమండితగండముదారం ।
పీతవసనమనుగతమునిమనుజసురాసురవరపరివారం ॥ 6 ॥
విశదకదంబతలే మిలితం కలికలుషభయం శమయంతం ।
మామపి కిమపి తరంగదనంగదృశా మనసా రమయంతం ॥ 7 ॥
శ్రీజయదేవభణితమతిసుందరమోహనమధురిపురూపం ।
హరిచరణస్మరణం ప్రతి సంప్రతి పుణ్యవతామనురూపం ॥ 8 ॥
గణయతి గుణగ్రామం భామం భ్రమాదపి నేహతే వహతి చ పరితోషం దోషం విముంచతి దూరతః ।
యువతిషు వలస్తృష్ణే కృష్ణే విహారిణి మాం వినా పునరపి మనో వామం కామం కరోతి కరోమి కిం ॥ 15 ॥
॥ గీతం 6 ॥
నిభృతనికుంజగృహం గతయా నిశి రహసి నిలీయ వసంతం ।
చకితవిలోకితసకలదిశా రతిరభసరసేన హసంతం ॥
సఖి హే కేశిమథనముదారం రమయ మయా సహ మదనమనోరథభావితయా సవికారం ॥ 1 ॥
ప్రథమసమాగమలజ్జితయా పటుచాటుశతైరనుకూలం ।
మృదుమధురస్మితభాషితయా శిథిలీకృతజఘనదుకూలం ॥ 2 ॥
కిసలయశయననివేశితయా చిరమురసి మమైవ శయానం ।
కృతపరిరంభణచుంబనయా పరిరభ్య కృతాధరపానం ॥ 3 ॥
అలసనిమీలితలోచనయా పులకావలిలలితకపోలం ।
శ్రమజలసకలకలేవరయా వరమదనమదాదతిలోలం ॥ 4 ॥
కోకిలకలరవకూజితయా జితమనసిజతంత్రవిచారం ।
శ్లథకుసుమాకులకుంతలయా నఖలిఖితఘనస్తనభారం ॥ 5 ॥
చరణరణితమనినూపురయా పరిపూరితసురతవితానం ।
ముఖరవిశృంఖలమేఖలయా సకచగ్రహచుంబనదానం ॥ 6 ॥
రతిసుఖసమయరసాలసయా దరముకులితనయనసరోజం ।
నిఃసహనిపతితతనులతయా మధుసూదనముదితమనోజం ॥ 7 ॥
శ్రీజయదేవభణితమిదమతిశయమధురిపునిధువనశీలం ।
సుఖముత్కంఠితగోపవధూకథితం వితనోతు సలీలం ॥ 8 ॥
హస్తస్రస్తవిలాసవంశమనృజుభ్రూవల్లిమద్బల్లవీ-వృందోత్సారిదృగంతవీక్షితమతిస్వేదార్ద్రగండస్థలం ।
మాముద్వీక్ష్య విలక్షితం స్మితసుధాముగ్ధాననం కాననే గోవిందం వ్రజసుందరీగణవృతం పశ్యామి హృష్యామి చ ॥ 16 ॥
దురాలోకస్తోకస్తబకనవకాశోకలతికా-వికాసః కాసారోపవనపవనోఽపి వ్యథయతి ।
అపి భ్రామ్యద్భృంగీరణితరమణీయా న ముకుల-ప్రసూతిశ్చూతానాం సఖి శిఖరిణీయం సుఖయతి ॥ 17 ॥
॥ ఇతి గీతగోవిందే అక్లేశకేశవో నామ ద్వితీయః సర్గః ॥
Browse Related Categories:
