॥ ఏకాదశః సర్గః ॥
॥ సానందదామోదరః ॥
సుచిరమనునయనే ప్రీణయిత్వా మృగాక్షీం గతవతి కృతవేశే కేశవే కుంజశయ్యాం ।
రచితరుచిరభూషాం దృష్టిమోషే ప్రదోషే స్ఫురతి నిరవసాదాం కాపి రాధాం జగాద ॥ 59 ॥
॥ గీతం 20 ॥
విరచితచాటువచనరచనం చరణే రచితప్రణిపాతం ।
సంప్రతి మంజులవంజులసీమని కేలిశయనమనుయాతం ॥
ముగ్ధే మధుమథనమనుగతమనుసర రాధికే ॥ 1 ॥
ఘనజఘనస్తనభారభరే దరమంథరచరణవిహారం ।
ముఖరితమణీమంజీరముపైహి విధేహి మరాలవికారం ॥ 2 ॥
శృణు రమణీయతరం తరుణీజనమోహనమధుపవిరావం ।
కుసుమశరాసనశాసనబందిని పికనికరే భజ భావం ॥ 3 ॥
అనిలతరలకిసలయనికరేణ కరేణ లతానికురంబం ।
ప్రేరణమివ కరభోరు కరోతి గతిం ప్రతిముంచ విలంబం ॥ 4 ॥
స్ఫురితమనంగతరంగవశాదివ సూచితహరిపరిరంభం ।
పృచ్ఛ మనోహరహారవిమలజలధారమముం కుచకుంభం ॥ 5 ॥
అధిగతమఖిలసఖీభిరిదం తవ వపురపి రతిరణసజ్జం ।
చండి రసితరశనారవడిండిమమభిసర సరసమలజ్జం ॥ 6 ॥
స్మరశరసుభగనఖేన కరేణ సఖీమవలంబ్య సలీలం ।
చల వలయక్వణీతైరవబోధయ హరమపి నిజగతిశీలం ॥ 7 ॥
శ్రీజయదేవభణితమధరీకృతహారముదాసితవామం ।
హరివినిహితమనసామధితిష్ఠతు కంఠతటీమవిరామం ॥ 8 ॥
సా మాం ద్రక్ష్యతి వక్ష్యతి స్మరకథాం ప్రత్యంగమాలింగనైః ప్రీతిం యాస్యతి రమ్యతే సఖి సమాగత్యేతి చింతాకులః ।
స త్వాం పశ్యతి వేపతే పులకయత్యానందతి స్విద్యతి ప్రత్యుద్గచ్ఛతి మూర్చ్ఛతి స్థిరతమఃపుంజే నికుంజే ప్రియః ॥ 60 ॥
అక్ష్ణోర్నిక్షిపదంజనం శ్రవణయోస్తాపిచ్ఛగుచ్ఛావలీం మూర్ధ్ని శ్యామసరోజదామ కుచయోః కస్తూరికాపాత్రకం ।
ధూర్తానామభిసారసత్వరహృదాం విష్వఙ్నికుంజే సఖి ధ్వాంతం నీలనిచోలచారు సదృశాం ప్రత్యంగమాలింగతి ॥ 61 ॥
కాశ్మీరగౌరవపుషామభిసారికాణాం ఆబద్ధరేఖమభితో రుచిమంజరీభిః ।
ఏతత్తమాలదలనీలతమం తమిశ్రం తత్ప్రేమహేమనికషోపలతాం తనోతి ॥ 62 ॥
హారావలీతరలకాంచనకాంచిదామ-కేయూరకంకణమణిద్యుతిదీపితస్య ।
ద్వారే నికుంజనిలయస్యహరిం నిరీక్ష్య వ్రీడావతీమథ సఖీ నిజగాహ రాధాం ॥ 63 ॥
॥ గీతం 21 ॥
మంజుతరకుంజతలకేలిసదనే ।
విలస రతిరభసహసితవదనే ॥
ప్రవిశ రాధే మాధవసమీపమిహ ॥ 1 ॥
నవభవదశోకదలశయనసారే ।
విలస కుచకలశతరలహారే ॥ 2 ॥
కుసుమచయరచితశుచివాసగేహే ।
విలస కుసుమసుకుమారదేహే ॥ 3 ॥
చలమలయవనపవనసురభిశీతే ।
విలస రసవలితలలితగీతే ॥ 4 ॥
మధుముదితమధుపకులకలితరావే ।
విలస మదనరససరసభావే ॥ 5 ॥
మధుతరలపికనికరనినదముఖరే ।
విలస దశనరుచిరుచిరశిఖరే ॥ 6 ॥
వితత బహువల్లినవపల్లవఘనే ।
విలస చిరమలసపీనజఘనే ॥ 7 ॥
విహితపద్మావతీసుఖసమాజే ।
భణతి జయదేవకవిరాజే ॥ 8 ॥
త్వాం చిత్తేన చిరం వహన్నయమతిశ్రాంతో భృశం తాపితః కందర్పేణ తు పాతుమిచ్ఛతి సుధాసంబాధబింబాధరం ।
అస్యాంగం తదలంకురు క్షణమిహ భ్రూక్షేపలక్ష్మీలవ-క్రీతే దాస ఇవోపసేవితపదాంభోజే కుతః సంభ్రమః ॥ 64 ॥
సా ససాధ్వససానందం గోవిందే లోలలోచనా ।
సింజానమంజుమంజీరం ప్రవివేశ నివేశనం ॥ 65 ॥
॥ గీతం 22 ॥
రాధావదనవిలోకనవికసితవివిధవికారవిభంగం ।
జలనిధిమివ విధుమండలదర్శనతరలితతుంగతరంగం ॥
హరిమేకరసం చిరమభిలషితవిలాసం సా దదార్శ గురుహర్షవశంవదవదనమనంగనివాసం ॥ 1 ॥
హారమమలతరతారమురసి దధతం పరిరభ్య విదూరం ।
స్ఫుటతరఫేనకదంబకరంబితమివ యమునాజలపూరం ॥ 2 ॥
శ్యామలమృదులకలేవరమండలమధిగతగౌరదుకూలం ।
నీలనలినమివ పీతపరాగపతలభరవలయితమూలం ॥ 3 ॥
తరలదృగంచలచలనమనోహరవదనజనితరతిరాగం ।
స్ఫుటకమలోదరఖేలితఖంజనయుగమివ శరది తడాగం ॥ 4 ॥
వదనకమలపరిశీలనమిలితమిహిరసమకుండలశోభం ।
స్మితరుచిరుచిరసముల్లసితాధరపల్లవకృతరతిలోభం ॥ 5 ॥
శశికిరణచ్ఛురితోదరజలధరసుందరసకుసుమకేశం ।
తిమిరోదితవిధుమణ్దలనిర్మలమలయజతిలకనివేశం ॥ 6 ॥
విపులపులకభరదంతురితం రతికేలికలాభిరధీరం ।
మణిగణకిరణసమూహసముజ్జ్వలభూషణసుభగశరీరం ॥ 7 ॥
శ్రీజయదేవభణితవిభవద్విగుణీకృతభూషణభారం ।
ప్రణమత హృది సుచిరం వినిధాయ హరిం సుకృతోదయసారం ॥ 8 ॥
అతిక్రమ్యాపాంగం శ్రవణపథపర్యంతగమన-ప్రయాసేనేవాక్ష్ణోస్తరలతరతారం పతితయోః ।
ఇదానీం రాధాయాః ప్రియతమసమాలోకసమయే పపాత స్వేదాంబుప్రసర ఇవ హర్షాశ్రునికరః ॥ 66 ॥
భవంత్యాస్తల్పాంతం కృతకపటకండూతిపిహిత-స్మితం యాతే గేహాద్బహిరవహితాలీపరిజనే ।
ప్రియాస్యం పశ్యంత్యాః స్మరశరసమాకూలసుభగం సలజ్జా లజ్జాపి వ్యగమదివ దూరం మృగదృశః ॥ 67 ॥
॥ ఇతి శ్రీగీతగోవిందే రాధికామిలనే సానందదామోదరో నామైకాదశః సర్గః ॥
Browse Related Categories:
