ආදෞ කර්මප්රසංගාත්කලයති කලුෂං මාතෘකුක්ෂෞ ස්ථිතං මාං
විණ්මූත්රාමේධ්යමධ්යේ කථයති නිතරාං ජාඨරෝ ජාතවේදාඃ ।
යද්යද්වෛ තත්ර දුඃඛං ව්යථයති නිතරාං ශක්යතේ කේන වක්තුං
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥1॥
බාල්යේ දුඃඛාතිරේකෝ මලලුලිතවපුඃ ස්තන්යපානේ පිපාසා
නෝ ශක්තශ්චේංද්රියේභ්යෝ භවගුණජනිතාඃ ජංතවෝ මාං තුදංති ।
නානාරෝගාදිදුඃඛාද්රුදනපරවශඃ ශංකරං න ස්මරාමි
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥2॥
ප්රෞඪෝऽහං යෞවනස්ථෝ විෂයවිෂධරෛඃ පංචභිර්මර්මසංධෞ
දෂ්ටෝ නෂ්ටෝऽවිවේකඃ සුතධනයුවතිස්වාදුසෞඛ්යේ නිෂණ්ණඃ ।
ශෛවීචිංතාවිහීනං මම හෘදයමහෝ මානගර්වාධිරූඪං
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥3॥
වාර්ධක්යේ චේංද්රියාණාං විගතගතිමතිශ්චාධිදෛවාදිතාපෛඃ
පාපෛ රෝගෛර්වියෝගෛස්ත්වනවසිතවපුඃ ප්රෞඪහීනං ච දීනම් ।
මිථ්යාමෝහාභිලාෂෛර්භ්රමති මම මනෝ ධූර්ජටේර්ධ්යානශූන්යං
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥4॥
නෝ ශක්යං ස්මාර්තකර්ම ප්රතිපදගහනප්රත්යවායාකුලාඛ්යං
ශ්රෞතේ වාර්තා කථං මේ ද්විජකුලවිහිතේ බ්රහ්මමාර්ගේऽසුසාරේ ।
ජ්ඤාතෝ ධර්මෝ විචාරෛඃ ශ්රවණමනනයෝඃ කිං නිදිධ්යාසිතව්යං
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥5॥
ස්නාත්වා ප්රත්යූෂකාලේ ස්නපනවිධිවිධෞ නාහෘතං ගාංගතෝයං
පූජාර්ථං වා කදාචිද්බහුතරගහනාත්ඛංඩබිල්වීදලානි ।
නානීතා පද්මමාලා සරසි විකසිතා ගංධධූපෛඃ ත්වදර්ථං
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥6॥
දුග්ධෛර්මධ්වාජ්යුතෛර්දධිසිතසහිතෛඃ ස්නාපිතං නෛව ලිංගං
නෝ ලිප්තං චංදනාද්යෛඃ කනකවිරචිතෛඃ පූජිතං න ප්රසූනෛඃ ।
ධූපෛඃ කර්පූරදීපෛර්විවිධරසයුතෛර්නෛව භක්ෂ්යෝපහාරෛඃ
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥7॥
ධ්යාත්වා චිත්තේ ශිවාඛ්යං ප්රචුරතරධනං නෛව දත්තං ද්විජේභ්යෝ
හව්යං තේ ලක්ෂසංඛ්යෛර්හුතවහවදනේ නාර්පිතං බීජමංත්රෛඃ ।
නෝ තප්තං ගාංගාතීරේ ව්රතජනනියමෛඃ රුද්රජාප්යෛර්න වේදෛඃ
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥8॥
ස්ථිත්වා ස්ථානේ සරෝජේ ප්රණවමයමරුත්කුංභකේ (කුංඩලේ)සූක්ෂ්මමාර්ගේ
ශාංතේ ස්වාංතේ ප්රලීනේ ප්රකටිතවිභවේ ජ්යෝතිරූපේऽපරාඛ්යේ ।
ලිංගජ්ඤේ බ්රහ්මවාක්යේ සකලතනුගතං ශංකරං න ස්මරාමි
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥9॥
නග්නෝ නිඃසංගශුද්ධස්ත්රිගුණවිරහිතෝ ධ්වස්තමෝහාංධකාරෝ
නාසාග්රේ න්යස්තදෘෂ්ටිර්විදිතභවගුණෝ නෛව දෘෂ්ටඃ කදාචිත් ।
උන්මන්යාऽවස්ථයා ත්වාං විගතකලිමලං ශංකරං න ස්මරාමි
ක්ෂංතව්යෝ මේऽපරාධඃ ශිව ශිව ශිව භෝ ශ්රී මහාදේව ශංභෝ ॥10॥
චංද්රෝද්භාසිතශේඛරේ ස්මරහරේ ගංගාධරේ ශංකරේ
සර්පෛර්භූෂිතකංඨකර්ණයුගලේ (විවරේ)නේත්රෝත්ථවෛශ්වානරේ ।
දංතිත්වක්කෘතසුංදරාංබරධරේ ත්රෛලෝක්යසාරේ හරේ
මෝක්ෂාර්ථං කුරු චිත්තවෘත්තිමචලාමන්යෛස්තු කිං කර්මභිඃ ॥11॥
කිං වාऽනේන ධනේන වාජිකරිභිඃ ප්රාප්තේන රාජ්යේන කිං
කිං වා පුත්රකලත්රමිත්රපශුභිර්දේහේන ගේහේන කිම් ।
ජ්ඤාත්වෛතත්ක්ෂණභංගුරං සපදි රේ ත්යාජ්යං මනෝ දූරතඃ
ස්වාත්මාර්ථං ගුරුවාක්යතෝ භජ මන ශ්රීපාර්වතීවල්ලභම් ॥12॥
ආයුර්නශ්යති පශ්යතාං ප්රතිදිනං යාති ක්ෂයං යෞවනං
ප්රත්යායාංති ගතාඃ පුනර්න දිවසාඃ කාලෝ ජගද්භක්ෂකඃ ।
ලක්ෂ්මීස්තෝයතරංගභංගචපලා විද්යුච්චලං ජීවිතං
තස්මාත්ත්වාං (මාං)ශරණාගතං ශරණද ත්වං රක්ෂ රක්ෂාධුනා ॥13॥
වංදේ දේවමුමාපතිං සුරගුරුං වංදේ ජගත්කාරණං
වංදේ පන්නගභූෂණං මෘගධරං වංදේ පශූනාං පතිම් ।
වංදේ සූර්යශශාංකවහ්නිනයනං වංදේ මුකුංදප්රියං
වංදේ භක්තජනාශ්රයං ච වරදං වංදේ ශිවං ශංකරම් ॥14॥
ගාත්රං භස්මසිතං ච හසිතං හස්තේ කපාලං සිතං
ඛට්වාංගං ච සිතං සිතශ්ච වෘෂභඃ කර්ණේ සිතේ කුංඩලේ ।
ගංගාඵේනසිතා ජටා පශුපතේශ්චංද්රඃ සිතෝ මූර්ධනි
සෝऽයං සර්වසිතෝ දදාතු විභවං පාපක්ෂයං සර්වදා ॥15॥
කරචරණකෘතං වාක්කායජං කර්මජං වා
ශ්රවණනයනජං වා මානසං වාऽපරාධම් ।
විහිතමවිහිතං වා සර්වමේතත්ක්ෂ්මස්ව
ශිව ශිව කරුණාබ්ධේ ශ්රී මහාදේව ශංභෝ ॥16॥
॥ඉති ශ්රීමද් ශංකරාචාර්යකෘත ශිවාපරාධක්ෂමාපණ ස්තෝත්රං සංපූර්ණම් ॥
Browse Related Categories:
