ඕං තච්ඡං॒ යෝරාවෘ॑ණීමහේ । ගා॒තුං ය॒ජ්ඤාය॑ । ගා॒තුං ය॒ජ්ඤප॑තයේ । දෛවී᳚ ස්ව॒ස්තිර॑ස්තු නඃ । ස්ව॒ස්තිර්මානු॑ෂේභ්යඃ । ඌ॒ර්ධ්වං ජි॑ගාතු භේෂ॒ජම් । ශං නෝ॑ අස්තු ද්වි॒පදේ᳚ । ශං චතු॑ෂ්පදේ ।

ඕං ශාංතිඃ॒ ශාංතිඃ॒ ශාංතිඃ॑ ॥

ස॒හස්ර॑ශීර්-ෂා॒ පුරු॑ෂඃ । ස॒හ॒ස්රා॒ක්ෂඃ ස॒හස්ර॑පාත් ।
ස භූමිං॑ වි॒ශ්වතෝ॑ වෘ॒ත්වා । අත්ය॑තිෂ්ඨද්දශාංගු॒ලම් ॥

පුරු॑ෂ ඒ॒වේදග්-ම් සර්වම්᳚ । යද්භූ॒තං යච්ච॒ භව්යම්᳚ ।
උ॒තාමෘ॑ත॒ත්ව ස්යේශා॑නඃ । ය॒දන්නේ॑නාති॒රෝහ॑ති ॥

ඒ॒තාවා॑නස්ය මහි॒මා । අතෝ॒ ජ්යායාග්॑ශ්ච॒ පූරු॑ෂඃ ।
පාදෝ᳚ऽස්ය॒ විශ්වා॑ භූ॒තානි॑ । ත්රි॒පාද॑ස්යා॒මෘතං॑ දි॒වි ॥

ත්රි॒පාදූ॒ර්ධ්ව උදෛ॒ත්පුරු॑ෂඃ । පාදෝ᳚ऽස්යේ॒හාऽऽභ॑වා॒ත්පුනඃ॑ ।
තතෝ॒ විෂ්ව॒ඞ්ව්ය॑ක්රාමත් । සා॒ශ॒නා॒න॒ශ॒නේ අ॒භි ॥

තස්මා᳚ද්වි॒රාඩ॑ජායත । වි॒රාජෝ॒ අධි॒ පූරු॑ෂඃ ।
ස ජා॒තෝ අත්ය॑රිච්යත । ප॒ශ්චාද්-භූමි॒මථෝ॑ පු॒රඃ ॥

යත්පුරු॑ෂේණ හ॒විෂා᳚ । දේ॒වා ය॒ජ්ඤමත॑න්වත ।
ව॒සං॒තෝ අ॑ස්යාසී॒දාජ්යම්᳚ । ග්රී॒ෂ්ම ඉ॒ධ්මශ්ශ॒රධ්ධ॒විඃ ॥

ස॒ප්තාස්යා॑සන්-පරි॒ධයඃ॑ । ත්රිඃ ස॒ප්ත ස॒මිධඃ॑ කෘ॒තාඃ ।
දේ॒වා යද්ය॒ජ්ඤං ත॑න්වා॒නාඃ । අබ॑ධ්න॒න්-පුරු॑ෂං ප॒ශුම් ॥

තං ය॒ජ්ඤං බ॒ර්॒හිෂි॒ ප්රෞක්ෂන්॑ । පුරු॑ෂං ජා॒තම॑ග්ර॒තඃ ।
තේන॑ දේ॒වා අය॑ජංත । සා॒ධ්යා ඍෂ॑යශ්ච॒ යේ ॥

තස්මා᳚ද්ය॒ජ්ඤාථ්ස॑ර්ව॒හුතඃ॑ । සංභෘ॑තං පෘෂදා॒ජ්යම් ।
ප॒ශූග්-ස්තාග්-ශ්ච॑ක්රේ වාය॒ව්යාන්॑ । ආ॒ර॒ණ්යාන්-ග්රා॒ම්යාශ්ච॒ යේ ॥

තස්මා᳚ද්ය॒ජ්ඤාථ්ස॑ර්ව॒හුතඃ॑ । ඍචඃ॒ සාමා॑නි ජජ්ඤිරේ ।
ඡංදාග්-ම්॑සි ජජ්ඤිරේ॒ තස්මා᳚ත් । යජු॒ස්තස්මා॑දජායත ॥

තස්මා॒දශ්වා॑ අජායංත । යේ කේ චෝ॑භ॒යාද॑තඃ ।
ගාවෝ॑ හ ජජ්ඤිරේ॒ තස්මා᳚ත් । තස්මා᳚ජ්ජා॒තා අ॑ජා॒වයඃ॑ ॥

යත්පුරු॑ෂං॒ ව්ය॑දධුඃ । ක॒ති॒ථා ව්ය॑කල්පයන් ।
මුඛං॒ කිම॑ස්ය॒ කෞ බා॒හූ । කාවූ॒රූ පාදා॑වුච්යේතේ ॥

බ්රා॒හ්ම॒ණෝ᳚ऽස්ය॒ මුඛ॑මාසීත් । බා॒හූ රා॑ජ॒න්යඃ॑ කෘ॒තඃ ।
ඌ॒රූ තද॑ස්ය॒ යද්වෛශ්යඃ॑ । ප॒ද්භ්යාග්-ම් ශූ॒ද්රෝ අ॑ජායතඃ ॥

චං॒ද්රමා॒ මන॑සෝ ජා॒තඃ । චක්ෂෝඃ॒ සූර්යෝ॑ අජායත ।
මුඛා॒දිංද්ර॑ශ්චා॒ග්නිශ්ච॑ । ප්රා॒ණාද්වා॒යුර॑ජායත ॥

නාභ්යා॑ ආසීදං॒තරි॑ක්ෂම් । ශී॒ර්ෂ්ණෝ ද්යෞඃ සම॑වර්තත ।
ප॒ද්භ්යාං භූමි॒ර්දිශඃ॒ ශ්රෝත්රා᳚ත් । තථා॑ ලෝ॒කාග්-ම් අ॑කල්පයන් ॥

වේදා॒හමේ॒තං පුරු॑ෂං ම॒හාංතම්᳚ । ආ॒දි॒ත්යව॑ර්ණං॒ තම॑ස॒ස්තු පා॒රේ ।
සර්වා॑ණි රූ॒පාණි॑ වි॒චිත්ය॒ ධීරඃ॑ । නාමා॑නි කෘ॒ත්වාऽභි॒වද॒න්॒, යදාऽऽස්තේ᳚ ॥

ධා॒තා පු॒රස්තා॒ද්යමු॑දාජ॒හාර॑ । ශ॒ක්රඃ ප්රවි॒ද්වාන්-ප්ර॒දිශ॒ශ්චත॑ස්රඃ ।
තමේ॒වං වි॒ද්වාන॒මෘත॑ ඉ॒හ භ॑වති । නාන්යඃ පංථා॒ අය॑නාය විද්යතේ ॥

ය॒ජ්ඤේන॑ ය॒ජ්ඤම॑යජංත දේ॒වාඃ । තානි॒ ධර්මා॑ණි ප්රථ॒මාන්යා॑සන් ।
තේ හ॒ නාකං॑ මහි॒මානඃ॑ සචංතේ । යත්ර॒ පූර්වේ॑ සා॒ධ්යාස්සංති॑ දේ॒වාඃ ॥

අ॒ද්භ්යඃ සංභූ॑තඃ පෘථි॒ව්යෛ රසා᳚ච්ච । වි॒ශ්වක॑ර්මණඃ॒ සම॑වර්ත॒තාධි॑ ।
තස්ය॒ ත්වෂ්ටා॑ වි॒දධ॑ද්රූ॒පමේ॑ති । තත්පුරු॑ෂස්ය॒ විශ්ව॒මාජා॑න॒මග්රේ᳚ ॥

වේදා॒හමේ॒තං පුරු॑ෂං ම॒හාංතම්᳚ । ආ॒දි॒ත්යව॑ර්ණං॒ තම॑සඃ॒ පර॑ස්තාත් ।
තමේ॒වං වි॒ද්වාන॒මෘත॑ ඉ॒හ භ॑වති । නාන්යඃ පංථා॑ විද්ය॒තේऽය॑නාය ॥

ප්ර॒ජාප॑තිශ්චරති॒ ගර්භේ॑ අං॒තඃ । අ॒ජාය॑මානෝ බහු॒ධා විජා॑යතේ ।
තස්ය॒ ධීරාඃ॒ පරි॑ජානංති॒ යෝනිම්᳚ । මරී॑චීනාං ප॒දමි॑ච්ඡංති වේ॒ධසඃ॑ ॥

යෝ දේ॒වේභ්ය॒ ආත॑පති । යෝ දේ॒වානාං᳚ පු॒රෝහි॑තඃ ।
පූර්වෝ॒ යෝ දේ॒වේභ්යෝ॑ ජා॒තඃ । නමෝ॑ රු॒චාය॒ බ්රාහ්ම॑යේ ॥

රුචං॑ බ්රා॒හ්මං ජ॒නයං॑තඃ । දේ॒වා අග්රේ॒ තද॑බ්රුවන් ।
යස්ත්වෛ॒වං බ්රා᳚හ්ම॒ණෝ වි॒ද්යාත් । තස්ය॑ දේ॒වා අස॒න් වශේ᳚ ॥

හ්රීශ්ච॑ තේ ල॒ක්ෂ්මීශ්ච॒ පත්න්යෞ᳚ । අ॒හෝ॒රා॒ත්රේ පා॒ර්ශ්වේ ।
නක්ෂ॑ත්රාණි රූ॒පම් । අ॒ශ්විනෞ॒ ව්යාත්තම්᳚ ।
ඉ॒ෂ්ටං ම॑නිෂාණ । අ॒මුං ම॑නිෂාණ । සර්වං॑ මනිෂාණ ॥

තච්ඡං॒ යෝරාවෘ॑ණීමහේ । ගා॒තුං ය॒ජ්ඤාය॑ । ගා॒තුං ය॒ජ්ඤප॑තයේ । දෛවී᳚ ස්ව॒ස්තිර॑ස්තු නඃ । ස්ව॒ස්තිර්මානු॑ෂේභ්යඃ । ඌ॒ර්ධ්වං ජි॑ගාතු භේෂ॒ජම් । ශං නෝ॑ අස්තු ද්වි॒පදේ᳚ । ශං චතු॑ෂ්පදේ ।

ඕං ශාංතිඃ॒ ශාංතිඃ॒ ශාංතිඃ॑ ॥