ହରିଃ ଓମ୍ । ସ॒ହ ନା॑ ଵଵତୁ । ସ॒ହ ନୌ॑ ଭୁନକ୍ତୁ । ସ॒ହ ଵୀ॒ର୍ଯଂ॑ କରଵାଵହୈ । ତେ॒ଜ॒ସ୍ଵି ନା॒ଵଧୀ॑ତମସ୍ତୁ॒ ମା ଵି॑ଦ୍ଵିଷା॒ଵହୈ᳚ । ଓଂ ଶାଂତିଃ॒ ଶାଂତିଃ॒ ଶାଂତିଃ॑ ।

ଭ୍ରୁଗୁ॒ର୍ଵୈ ଵା॑ରୁ॒ଣିଃ । ଵରୁ॑ଣଂ॒ ପିତ॑ର॒ମୁପ॑ସସାର । ଅଧୀ॑ହି ଭଗଵୋ॒ ବ୍ରହ୍ମେତି॑ । ତସ୍ମା॑ ଏତ॒ତ୍ପ୍ରୋ॑ଵାଚ । ଅନ୍ନଂ॑ ପ୍ରା॒ଣଂ ଚକ୍ଷୁ॒ଶ୍ରୋତ୍ରଂ॒ ମନୋ॒ ଵାଚ॒ମିତି॑ । ତଗ୍-ମ୍ ହୋ॑ଵାଚ । ଯତୋ॒ ଵା ଇ॒ମାନି॒ ଭୁତା॑ନି॒ ଜାଯଂ॑ତେ । ଯେନ॒ ଜାତା॑ନି॒ ଜୀଵଂ॑ତି । ଯତ୍ପ୍ରଯଂ॑ତ୍ଯଭିସଂଵି॑ଶଂତି । ତଦ୍ଵିଜି॑ଜ୍ଞାସସ୍ଵ । ତଦ୍ବ୍ରହ୍ମେତି॑ । ସ ତପୋ॑ଽତପ୍ଯତ । ସ ତପ॑ସ୍ତ॒ପ୍ତ୍ଵା । ॥ 1 ॥

ଅନ୍ନଂ॒ ବ୍ରହ୍ମେତି॒ ଵ୍ଯ॑ଜାନାତ୍ । ଅ॒ନ୍ନାଧ୍ଯେ॑ଵ ଖଲ୍ଵି॒ମାନି॒ ଭୂତା॑ନି॒ ଜାଯଂ॑ତେ । ଅନ୍ନେ॑ନ॒ ଜାତା॑ନି॒ ଜୀଵଂ॑ତି । ଅନ୍ନଂ॒ ପ୍ରଯଂ॑ତ୍ଯ॒ଭିସଂଵି॑ଶଂ॒ତୀତି॑ । ତଦ୍ଵି॒ଜ୍ଞାଯ॑ । ପୁନ॑ରେ॒ଵ ଵରୁ॑ଣଂ॒ ପିତ॑ର॒ମୁପ॑ସସାର । ଅଧୀ॑ହି ଭଗଵୋ॒ ବ୍ରହ୍ମେତି॑ । ତଗ୍-ମ୍ ହୋ॑ଵାଚ । ତପ॑ସା॒ ବ୍ରହ୍ମ॒ ଵିଜି॑ଜ୍ଞାସସ୍ଵ । ତପୋ॒ ବ୍ରହ୍ମେତି॑ । ସ ତପୋ॑ଽତପ୍ଯତ । ସ ତପ॑ସ୍ତ॒ପ୍ତ୍ଵା । ॥ 2 ॥

ପ୍ରା॒ଣୋ ବ୍ର॒ହ୍ମେତି॒ ଵ୍ଯ॑ଜାନାତ୍ । ପ୍ରା॒ଣାଧ୍ଯେ॑ଵ ଖଲ୍ଵି॒ମାନି॒ ଭୂତା॑ନି॒ ଜାଯଂ॑ତେ । ପ୍ରା॒ଣେନ॒ ଜାତା॑ନି॒ ଜୀଵଂ॑ତି । ପ୍ରା॒ଣଂ ପ୍ରଯଂ॑ତ୍ଯ॒ଭି ସଂଵି॑ଶଂ॒ତୀତି॑ । ପୁନ॑ରେ॒ଵ ଵରୁ॑ଣଂ॒ ପିତ॑ର॒ମୁପ॑ସସାର । ଅଧୀ॑ହି ଭଗଵୋ॒ ବ୍ରହ୍ମେତି॑ । ତଗ୍-ମ୍ ହୋ॑ଵାଚ । ତପ॑ସା॒ ବ୍ରହ୍ମ॒ ଵିଜି॑ଜ୍ଞାସସ୍ଵ । ତପୋ॒ ବ୍ରହ୍ମେତି॑ । ସ ତପୋ॑ଽତପ୍ଯତ । ସ ତପ॑ସ୍ତ॒ପ୍ତ୍ଵା । ॥ 3 ॥

ମନୋ॒ ବ୍ରହ୍ମେତି॒ ଵ୍ଯ॑ଜାନାତ୍। ମନ॑ସୋ॒ ହ୍ଯେ॑ଵ ଖଲ୍ଵି॒ମାନି॒ ଭୂତା॑ନି॒ ଜାଯଂ॑ତେ । ମନ॑ସା॒ ଜାତା॑ନି॒ ଜୀଵଂ॑ତି । ମନଃ॒ ପ୍ରଯଂ॑ତ୍ଯ॒ଭି ସଂଵି॑ଶଂ॒ତୀତି॑ । ତଦ୍ଵି॒ଜ୍ଞାଯ॑ । ପୁନ॑ରେ॒ଵ ଵରୁ॑ଣଂ॒ ପିତ॑ର॒ମୁପ॑ସସାର । ଅଧୀ॑ହି ଭଗଵୋ॒ ବ୍ରହ୍ମେତି॑ । ତଗ୍-ମ୍ ହୋ॑ଵାଚ । ତପ॑ସା॒ ବ୍ରହ୍ମ॒ ଵିଜି॑ଜ୍ଞାସସ୍ଵ । ତପୋ॒ ବ୍ରହ୍ମେତି॑ । ସ ତପୋ॑ଽତପ୍ଯତ । ସ ତପ॑ସ୍ତ॒ପ୍ତ୍ଵା । ॥ 4 ॥

ଵି॒ଜ୍ଞାନଂ॒ ବ୍ରହ୍ମେତି॒ ଵ୍ଯ॑ଜାନାତ୍ । ଵି॒ଜ୍ଞାନା॒ଧ୍ଯେ॑ଵ ଖଲ୍ଵି॒ମାନି॒ ଭୂତା॑ନି॒ ଜାଯଂ॑ତେ । ଵି॒ଜ୍ଞାନେ॑ନ॒ ଜାତା॑ନି॒ ଜୀଵଂ॑ତି । ଵି॒ଜ୍ଞାନଂ॒ ପ୍ରଯଂ॑ତ୍ଯ॒ଭିସଂଵି॑ଶଂ॒ତୀତି॑ । ତଦ୍ଵି॒ଜ୍ଞାଯ॑ । ପୁନ॑ରେ॒ଵ ଵରୁ॑ଣଂ॒ ପିତ॑ର॒ମୁପ॑ସସାର । ଅଧୀ॑ହି ଭଗଵୋ॒ ବ୍ରହ୍ମେତି॑ । ତଗ୍-ମ୍ ହୋ॑ଵାଚ । ତପ॑ସା॒ ବ୍ରହ୍ମ॒ ଵିଜି॑ଜ୍ଞାସସ୍ଵ । ତପୋ॒ ବ୍ରହ୍ମେତି॑ । ସ ତପୋ॑ଽତପ୍ଯତ । ସ ତପ॑ସ୍ତ॒ପ୍ତ୍ଵା । ॥ 5 ॥

ଆ॒ନଂ॒ଦୋ ବ୍ର॒ହ୍ମେତି॒ ଵ୍ଯ॑ଜାନାତ୍ । ଆ॒ନଂଦା॒ଧ୍ଯେ॑ଵ ଖଲ୍ଵି॒ମାନି॒ ଭୂତା॑ନି॒ ଜାଯଂ॑ତେ । ଆ॒ନଂ॒ଦେନ॒ ଜାତା॑ନି॒ ଜୀଵଂ॑ତି । ଆ॒ନଂ॒ଦଂ ପ୍ରଯଂ॑ତ୍ଯ॒ଭିସଂଵି॑ଶଂ॒ତୀତି॑ । ସୈଷା ଭା᳚ର୍ଗ॒ଵୀ ଵା॑ରୁ॒ଣୀ ଵି॒ଦ୍ଯା । ପ॒ର॒ମେ ଵ୍ଯୋ॑ମ॒ନ୍ ପ୍ରତି॑ଷ୍ଠିତା । ସ ଯ ଏ॒ଵଂ ଵେଦ॒ ପ୍ରତି॑ତିଷ୍ଠତି । ଅନ୍ନ॑ଵାନନ୍ନା॒ଦୋ ଭ॑ଵତି । ମ॒ହାନ୍ଭ॑ଵତି ପ୍ର॒ଜଯା॑ ପ॒ଶୁଭି॑ର୍ବ୍ରହ୍ମଵର୍ଚ॒ସେନ॑ । ମ॒ହାନ୍ କୀ॒ର୍ତ୍ଯା । ॥ 6 ॥

ଅନ୍ନଂ॒ ନ ନିଂ॑ଦ୍ଯାତ୍ । ତଦ୍-ଵ୍ର॒ତମ୍ । ପ୍ରା॒ଣୋ ଵା ଅନ୍ନମ୍᳚ । ଶରୀ॑ରମନ୍ନା॒ଦମ୍ । ପ୍ରା॒ଣେ ଶରୀ॑ରଂ॒ ପ୍ରତି॑ଷ୍ଠିତମ୍ । ଶରୀ॑ରେ ପ୍ରା॒ଣଃ ପ୍ରତି॑ଷ୍ଠିତଃ । ତଦେ॒ତଦନ୍ନ॒ମନ୍ନେ॒ ପ୍ରତି॑ଷ୍ଟିତମ୍ । ସ ଯ ଏ॒ତଦନ୍ନ॒ମନ୍ନେ॒ ପ୍ରତି॑ଷ୍ଠିତଂ॒ ଵେଦ॒ ପ୍ରତି॑ତିଷ୍ଠତି । ଅନ୍ନ॑ଵାନନ୍ନା॒ଦୋ ଭ॑ଵତି । ମ॒ହାନ୍ଭ॑ଵତି ପ୍ର॒ଜଯା॑ ପ॒ଶୁଭି॑ର୍ବ୍ରହ୍ମଵର୍ଚ॒ସେନ॑ । ମ॒ହାନ୍ କୀ॒ର୍ତ୍ଯା । ॥ 7 ॥

ଅନ୍ନଂ॒ ନ ପରି॑ଚକ୍ଷୀତ । ତଦ୍-ଵ୍ର॒ତମ୍ । ଆପୋ॒ ଵା ଅନ୍ନମ୍᳚ । ଜ୍ଯୋତି॑ରନ୍ନା॒ଦମ୍ । ଅ॒ପ୍ସୁ ଜ୍ଯୋତିଃ॒ ପ୍ରତି॑ଷ୍ଠିତମ୍ । ଜ୍ଯୋତି॒ଷ୍ଯାପଃ॒ ପ୍ରତି॑ଷ୍ଠିତାଃ। ତଦେ॒ତଦନ୍ନ॒ମନ୍ନେ॒ ପ୍ରତି॑ଷ୍ଠିତମ୍ । ସ ଯ ଏ॒ତଦନ୍ନ॒ମନ୍ନେ॒ ପ୍ରତି॑ଷ୍ଠିତଂ॒ ଵେଦ॒ ପ୍ରତି॑ତିଷ୍ଠତି । ଅନ୍ନ॑ଵାନନ୍ନା॒ଦୋ ଭ॑ଵତି । ମ॒ହାନ୍ଭ॑ଵତି ପ୍ର॒ଜଯା॑ ପ॒ଶୁଭି॑ର୍ବ୍ରହ୍ମଵର୍ଚ॒ସେନ॑ । ମ॒ହାନ୍ କୀ॒ର୍ତ୍ଯା । ॥ 8 ॥

ଅନ୍ନଂ॑ ବ॒ହୁ କୁ॑ର୍ଵୀତ । ତଦ୍-ଵ୍ର॒ତମ୍ । ପୃ॒ଥି॒ଵୀ ଵା ଅନ୍ନମ୍᳚ । ଆ॒କା॒ଶୋ᳚ଽନ୍ନା॒ଦଃ । ପୃ॒ଥି॒ଵ୍ଯାମା॑କା॒ଶଃ ପ୍ରତି॑ଷ୍ଠିତଃ । ଆ॒କା॒ଶେ ପୃ॑ଥି॒ଵୀ ପ୍ରତି॑ଷ୍ଠିତା । ତଦେ॒ତଦନ୍ନ॒ମନ୍ନେ॒ ପ୍ରତି॑ଷ୍ଠିତମ୍ । ସ ଯ ଏ॒ତଦନ୍ନ॒ମନ୍ନେ॒ ପ୍ରତି॑ଷ୍ଠିତଂ॒ ଵେଦ॒ ପ୍ରତି॑ତିଷ୍ଠତି । ଅନ୍ନ॑ଵାନନ୍ନା॒ଦୋ ଭ॑ଵତି । ମ॒ହାନ୍ଭ॑ଵତି ପ୍ର॒ଜଯା॑ ପ॒ଶୁଭି॑ର୍ବ୍ରହ୍ମଵର୍ଚ॒ସେନ॑ । ମ॒ହାନ୍ କୀ॒ର୍ତ୍ଯା । ॥ 9 ॥

ନ କଂଚନ ଵସତୌ ପ୍ରତ୍ଯା॑ଚକ୍ଷୀ॒ତ । ତଦ୍-ଵ୍ର॒ତମ୍ । ତସ୍ମାଦ୍ଯଯା କଯା ଚ ଵିଧଯା ବହ୍ଵ॑ନ୍ନଂ ପ୍ରା॒ପ୍ନୁଯାତ୍ । ଅରାଧ୍ଯସ୍ମା ଅନ୍ନମି॑ତ୍ଯାଚ॒କ୍ଷତେ । ଏତଦ୍ଵୈ ମୁଖତୋ᳚ଽନ୍ନଗ୍-ମ୍ ରା॒ଦ୍ଧମ୍ । ମୁଖତୋଽସ୍ମା ଅ॑ନ୍ନଗ୍-ମ୍ ରା॒ଧ୍ଯତେ । ଏତଦ୍ଵୈ ମଧ୍ଯତୋ᳚ଽନ୍ନଗ୍-ମ୍ ରା॒ଦ୍ଧମ୍ । ମଧ୍ଯତୋଽସ୍ମା ଅ॑ନ୍ନଗ୍-ମ୍ ରା॒ଧ୍ଯତେ । ଏତଦ୍ଵା ଅଂତତୋ᳚ଽନ୍ନଗ୍-ମ୍ ରା॒ଦ୍ଧମ୍ । ଅଂତତୋଽସ୍ମା ଅ॑ନ୍ନଗ୍-ମ୍ ରା॒ଧ୍ଯତେ । ଯ ଏ॑ଵଂ ଵେ॒ଦ । କ୍ଷେମ ଇ॑ତି ଵା॒ଚି । ଯୋଗକ୍ଷେମ ଇତି ପ୍ରା॑ଣାପା॒ଣଯୋଃ । କର୍ମେ॑ତି ହ॒ସ୍ତଯୋଃ । ଗତିରି॑ତି ପା॒ଦଯୋଃ । ଵିମୁକ୍ତିରି॑ତି ପା॒ଯୌ । ଇତି ମାନୁଷୀ᳚ସ୍ସମା॒ଜ୍ଞାଃ । ଅଥ ଦୈ॒ଵୀଃ । ତୃପ୍ତିରି॑ତି ଵୃ॒ଷ୍ଟୌ । ବଲମି॑ତି ଵି॒ଦ୍ଯୁତି । ଯଶ ଇ॑ତି ପ॒ଶୁଷୁ । ଜ୍ଯୋତିରିତି ନ॑କ୍ଷତ୍ରେ॒ଷୁ । ପ୍ରଜାତିରମୃତମାନଂଦ ଇ॑ତ୍ଯୁପ॒ସ୍ଥେ । ସର୍ଵମି॑ତ୍ଯାକା॒ଶେ । ତତ୍ପ୍ରତିଷ୍ଠେତ୍ଯୁ॑ପାସୀ॒ତ। ପ୍ରତିଷ୍ଠା॑ଵାନ୍ଭ॒ଵତି । ତନ୍ମହ ଇତ୍ଯୁ॑ପାସୀ॒ତ । ମ॑ହାନ୍ଭ॒ଵତି । ତନ୍ମନ ଇତ୍ଯୁ॑ପାସୀ॒ତ । ମାନ॑ଵାନ୍ଭ॒ଵତି । ତନ୍ନମ ଇତ୍ଯୁ॑ପାସୀ॒ତ । ନମ୍ଯଂତେ᳚ଽସ୍ମୈ କା॒ମାଃ । ତଦ୍ବ୍ରହ୍ମେତ୍ଯୁ॑ପାସୀ॒ତ । ବ୍ରହ୍ମ॑ଵାନ୍ଭ॒ଵତି । ତଦ୍ବ୍ରହ୍ମଣଃ ପରିମର ଇତ୍ଯୁ॑ପାସୀ॒ତ । ପର୍ଯେଣଂ ମ୍ରିଯଂତେ ଦ୍ଵି ଷଂତ॑ସ୍ସପ॒ତ୍ନାଃ । ପରି ଯେ᳚ଽପ୍ରିଯା᳚ ଭ୍ରାତୃ॒ଵ୍ଯାଃ । ସ ଯଶ୍ଚା॑ଯଂ ପୁ॒ରୁଷେ । ଯଶ୍ଚାସା॑ଵାଦି॒ତ୍ଯେ । ସ ଏକଃ॑ । ସ ଯ॑ ଏଵଂ॒ ଵିତ୍ । ଅସ୍ମାଲ୍ଲୋ॑କାତ୍ପ୍ରେ॒ତ୍ଯ । ଏତମନ୍ନମଯମାତ୍ମାନମୁପ॑ ସଂକ୍ର॒ମ୍ଯ ॥ ଏତଂ ପ୍ରାଣମଯମାତ୍ମାନମୁପ॑ ସଂକ୍ର॒ମ୍ଯ । ଏତଂ ମନୋମଯମାତ୍ମାନମୁପ॑ ସଂକ୍ର॒ମ୍ଯ । ଏତଂ ଵିଜ୍ଞାନମଯମାତ୍ମାନମୁପ॑ ସଂକ୍ର॒ମ୍ଯ । ଏତମାନଂଦମଯମାତ୍ମାନମୁପ॑ ସଂକ୍ର॒ମ୍ଯ । ଇମାନ୍ ଲୋକାନ୍ କାମାନ୍ନୀ କାମରୂପ୍ଯ॑ନୁ ସଂ॒ଚରନ୍ନ୍ । ଏତଥ୍ସାମ ଗା॑ଯନ୍ନା॒ସ୍ତେ । ହା(3) ଵୁ॒ ହା(3) ଵୁ॒ ହା(3) ଵୁ॑ । ଅ॒ହମନ୍ନମ॒ହମନ୍ନମ॒ହମନ୍ନମ୍ । ଅ॒ହମନ୍ନା॒ଦୋ(2)ଽ॒ହମନ୍ନା॒ଦୋ(2)ଽ॒ହମନ୍ନା॒ଦଃ । ଅ॒ହଗ୍ଗ୍ ଶ୍ଲୋକ॒କୃଦ॒ହଗ୍ଗ୍ ଶ୍ଲୋକ॒କୃଦ॒ହଗ୍ଗ୍ ଶ୍ଲୋକ॒କୃତ୍ । ଅ॒ହମସ୍ମି ପ୍ରଥମଜା ଋତା(3) ସ୍ଯ॒ । ପୂର୍ଵଂ ଦେଵେଭ୍ଯୋ ଅମୃତସ୍ଯ ନା(3) ଭା॒ଯି॒ । ଯୋ ମା ଦଦାତି ସ ଇଦେଵ ମା(3) ଵାଃ॒ । ଅ॒ହମନ୍ନ॒ମନ୍ନ॑ମ॒ଦଂତ॒ମା(3) ଦ୍ମି॒ । ଅହଂ॒ ଵିଶ୍ଵଂ॒ ଭୁଵ॑ନ॒ମଭ୍ଯ॑ଭ॒ଵାମ୍ । ସୁଵ॒ର୍ନ ଜ୍ଯୋତୀଃ᳚ । ଯ ଏ॒ଵଂ ଵେଦ॑ । ଇତ୍ଯୁ॑ପ॒ନିଷ॑ତ୍ । ॥ 10 ॥

ସ॒ହ ନା॑ ଵଵତୁ । ସ॒ହ ନୌ॑ ଭୁନକ୍ତୁ । ସ॒ହ ଵୀ॒ର୍ଯଂ॑ କରଵାଵହୈ । ତେ॒ଜ॒ସ୍ଵି ନା॒ଵଧୀ॑ତମସ୍ତୁ॒ ମା ଵି॑ଦ୍ଵିଷା॒ଵହୈ᳚ ॥ ଓଂ ଶାଂତିଃ॒ ଶାଂତିଃ॒ ଶାଂତିଃ॑ ॥

॥ ହରିଃ॑ ଓମ୍ ॥
॥ ଶ୍ରୀ କୃଷ୍ଣାର୍ପଣମସ୍ତୁ ॥