ହରିଃ ଓମ୍ ॥ ସ॒ହ ନା॑ ଵଵତୁ । ସ॒ହ ନୌ॑ ଭୁନକ୍ତୁ । ସ॒ହ ଵୀ॒ର୍ଯଂ॑ କରଵାଵହୈ । ତେ॒ଜ॒ସ୍ଵି ନା॒ଵଧୀ॑ତମସ୍ତୁ॒ ମା ଵି॑ଦ୍ଵିଷା॒ଵହୈ᳚ । ଓଂ ଶାଂତିଃ॒ ଶାଂତିଃ॒ ଶାଂତିଃ॑ ॥

ବ୍ର॒ହ୍ମ॒ଵିଦା᳚ପ୍ନୋତି॒ ପରମ୍᳚ ॥ ତଦେ॒ଷାଽଭ୍ଯୁ॑କ୍ତା । ସ॒ତ୍ଯଂ ଜ୍ଞା॒ନମ॑ନଂ॒ତଂ ବ୍ରହ୍ମ॑ । ଯୋ ଵେଦ॒ ନିହି॑ତଂ॒ ଗୁହା॑ଯାଂ ପର॒ମେ ଵ୍ଯୋ॑ମନ୍ନ୍ । ସୋ᳚ଽଶ୍ନୁ॒ତେ॒ ସର୍ଵା॒ନ୍କାମାଂ᳚ଥ୍ସ॒ହ । ବ୍ରହ୍ମ॑ଣା ଵିପ॒ଶ୍ଚିତେତି॑ ॥ ତସ୍ମା॒ଦ୍ଵା ଏ॒ତସ୍ମା॑ଦା॒ତ୍ମନ॑ ଆକା॒ଶସ୍ସଂଭୂ॑ତଃ । ଆ॒କା॒ଶାଦ୍ଵା॒ଯୁଃ । ଵା॒ଯୋର॒ଗ୍ନିଃ । ଅ॒ଗ୍ନେରାପଃ॑ । ଅ॒ଦ୍ଭ୍ଯଃ ପୃ॑ଥି॒ଵୀ । ପୃ॒ଥି॒ଵ୍ଯା ଓଷ॑ଧଯଃ । ଓଷ॑ଧୀ॒ଭ୍ଯୋନ୍ନମ୍᳚ । ଅନ୍ନା॒ତ୍ପୁରୁ॑ଷଃ । ସ ଵା ଏଷ ପୁରୁଷୋଽନ୍ନ॑ରସ॒ମଯଃ । ତସ୍ଯେଦ॑ମେଵ॒ ଶିରଃ । ଅଯଂ ଦକ୍ଷି॑ଣଃ ପ॒କ୍ଷଃ । ଅଯମୁତ୍ତ॑ରଃ ପ॒କ୍ଷଃ । ଅଯମାତ୍ମା᳚ । ଇଦଂ ପୁଚ୍ଛମ୍॑ ପ୍ରତି॒ଷ୍ଠା । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 1 ॥

ଅନ୍ନା॒ଦ୍ଵୈ ପ୍ର॒ଜାଃ ପ୍ର॒ଜାଯଂ॑ତେ । ଯାଃ କାଶ୍ଚ॑ ପୃଥି॒ଵୀଗ୍ ଶ୍ରି॒ତାଃ । ଅଥୋ॒ ଅନ୍ନେ॑ନୈ॒ଵ ଜୀ॑ଵଂତି। ଅଥୈ॑ନ॒ଦପି॑ ଯଂତ୍ଯଂତ॒ତଃ । ଅନ୍ନ॒ଗ୍-ମ୍॒ ହି ଭୁ॒ତାନାଂ॒ ଜ୍ଯେଷ୍ଠମ୍᳚ । ତସ୍ମା᳚ଥ୍ସର୍ଵୌଷ॒ଧମୁ॑ଚ୍ଯତେ । ସର୍ଵଂ॒ ଵୈ ତେଽନ୍ନ॑ମାପ୍ନୁଵଂତି । ଯେଽନ୍ନଂ॒ ବ୍ରହ୍ମୋ॒ପାସ॑ତେ । ଅନ୍ନ॒ଗ୍-ମ୍॒ ହି ଭୁ॒ତାନାଂ॒ ଜ୍ଯେଷ୍ଠମ୍᳚ । ତସ୍ମା᳚ଥ୍ସର୍ଵୌଷ॒ଧମୁ॑ଚ୍ଯତେ । ଅନ୍ନା᳚ଦ୍ଭୂ॒ତାନି॒ ଜାଯଂ॑ତେ । ଜାତା॒ନ୍ଯନ୍ନେନ॑ ଵର୍ଧଂତେ । ଅଦ୍ଯତେଽତ୍ତି ଚ॑ ଭୂତା॒ନି । ତସ୍ମାଦନ୍ନଂ ତଦୁଚ୍ଯ॑ତ ଇ॒ତି । ତସ୍ମାଦ୍ଵା ଏତସ୍ମାଦନ୍ନ॑ରସ॒ମଯାତ୍ । ଅନ୍ଯୋଂତର ଆତ୍ମା᳚ ପ୍ରାଣ॒ମଯଃ । ତେନୈ॑ଷ ପୂ॒ର୍ଣଃ । ସ ଵା ଏଷ ପୁରୁଷଵି॑ଧ ଏ॒ଵ । ତସ୍ଯ ପୁରୁ॑ଷଵି॒ଧତାମ୍ । ଅନ୍ଵଯଂ॑ ପୁରୁଷ॒ଵିଧଃ । ତସ୍ଯ ପ୍ରାଣ॑ ଏଵ॒ ଶିରଃ । ଵ୍ଯାନୋ ଦକ୍ଷି॑ଣଃ ପ॒କ୍ଷଃ । ଅପାନ ଉତ୍ତ॑ରଃ ପ॒କ୍ଷଃ । ଆକା॑ଶ ଆ॒ତ୍ମା । ପୃଥିଵୀ ପୁଚ୍ଛଂ॑ ପ୍ରତି॒ଷ୍ଠା । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 2 ॥

ପ୍ରା॒ଣଂ ଦେ॒ଵା ଅନୁ॒ପ୍ରାଣଂ॑ତି । ମ॒ନୁ॒ଷ୍ଯାଃ᳚ ପ॒ଶଵ॑ଶ୍ଚ॒ ଯେ । ପ୍ରା॒ଣୋ ହି ଭୂ॒ତନା॒ମାଯୁଃ॑ । ତସ୍ମା᳚ଥ୍ସର୍ଵାଯୁ॒ଷମୁ॑ଚ୍ଯତେ । ସର୍ଵ॑ମେ॒ଵ ତ॒ ଆଯୁ॑ର୍ଯଂତି । ଯେ ପ୍ରା॒ଣଂ ବ୍ରହ୍ମୋ॒ପାସ॑ତେ । ପ୍ରାଣୋ ହି ଭୂତା॑ନାମା॒ଯୁଃ । ତସ୍ମାଥ୍ସର୍ଵାଯୁଷମୁଚ୍ଯ॑ତ ଇ॒ତି । ତସ୍ଯୈଷ ଏଵ ଶାରୀ॑ର ଆ॒ତ୍ମା । ଯଃ॑ ପୂର୍ଵ॒ସ୍ଯ । ତସ୍ମାଦ୍ଵା ଏତସ୍ମା᳚ତ୍-ପ୍ରାଣ॒ମଯାତ୍ । ଅନ୍ଯୋଽଂତର ଆତ୍ମା॑ ମନୋ॒ମଯଃ । ତେନୈ॑ଷ ପୂ॒ର୍ଣଃ । ସ ଵା ଏଷ ପୁରୁଷଵି॑ଧ ଏ॒ଵ। ତସ୍ଯ ପୁରୁ॑ଷଵି॒ଧତାମ୍ । ଅନ୍ଵଯଂ॑ ପୁରୁଷ॒ଵିଧଃ । ତସ୍ଯ ଯଜୁ॑ରେଵ॒ ଶିରଃ । ଋଗ୍-ଦକ୍ଷି॑ଣଃ ପ॒କ୍ଷଃ । ସାମୋତ୍ତ॑ରଃ ପ॒କ୍ଷଃ । ଆଦେ॑ଶ ଆ॒ତ୍ମା । ଅଥର୍ଵାଂଗିରସଃ ପୁଚ୍ଛଂ॑ ପ୍ରତି॒ଷ୍ଠା । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 3 ॥

ଯତୋ॒ ଵାଚୋ॒ ନିଵ॑ର୍ତଂତେ । ଅପ୍ରା᳚ପ୍ଯ॒ ମନ॑ସା ସ॒ହ । ଆନଂଦଂ ବ୍ରହ୍ମ॑ଣୋ ଵି॒ଦ୍ଵାନ୍ । ନ ବିଭେତି କଦା॑ଚନେ॒ତି । ତସ୍ଯୈଷ ଏଵ ଶାରୀ॑ର ଆ॒ତ୍ମା । ଯଃ॑ ପୂର୍ଵ॒ସ୍ଯ । ତସ୍ମାଦ୍ଵା ଏତସ୍ମା᳚ନ୍-ମନୋ॒ମଯାତ୍ । ଅନ୍ଯୋଽଂତର ଆତ୍ମା ଵି॑ଜ୍ଞାନ॒ମଯଃ । ତେନୈ॑ଷ ପୂ॒ର୍ଣଃ । ସ ଵା ଏଷ ପୁରୁଷଵି॑ଧ ଏ॒ଵ । ତସ୍ଯ ପୁରୁ॑ଷଵି॒ଧତାମ୍ । ଅନ୍ଵଯଂ॑ ପୁରୁଷ॒ଵିଧଃ । ତସ୍ଯ ଶ୍ର॑ଦ୍ଧୈଵ॒ ଶିରଃ । ଋତଂ ଦକ୍ଷି॑ଣଃ ପ॒କ୍ଷଃ । ସତ୍ଯମୁତ୍ତ॑ରଃ ପ॒କ୍ଷଃ । ଯୋ॑ଗ ଆ॒ତ୍ମା । ମହଃ ପୁଚ୍ଛଂ॑ ପ୍ରତି॒ଷ୍ଠା । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 4 ॥

ଵି॒ଜ୍ଞାନଂ॑ ଯ॒ଜ୍ଞଂ ତ॑ନୁତେ । କର୍ମା॑ଣୀ ତନୁ॒ତେଽପି॑ ଚ । ଵି॒ଜ୍ଞାନଂ॑ ଦେ॒ଵାସ୍ସର୍ଵେ᳚ । ବ୍ରହ୍ମ॒ ଜ୍ଯେଷ୍ଠ॒ମୁପା॑ସତେ । ଵି॒ଜ୍ଞାନଂ॒ ବ୍ରହ୍ମ॒ ଚେଦ୍ଵେଦ॑ । ତସ୍ମା॒ଚ୍ଚେନ୍ନ ପ୍ର॒ମାଦ୍ଯ॑ତି । ଶରୀରେ॑ ପାପ୍ମ॑ନୋ ହି॒ତ୍ଵା । ସର୍ଵାନ୍ କାମାଂଥ୍ସମଶ୍ନୁ॑ତ ଇ॒ତି । ତସ୍ଯୈଷ ଏଵ ଶାରୀ॑ର ଆ॒ତ୍ମା । ଯଃ॑ ପୂର୍ଵ॒ସ୍ଯ । ତସ୍ମାଦ୍ଵା ଏତସ୍ମାଦ୍ଵି॑ଜ୍ଞାନ॒ମଯାତ୍ । ଅନ୍ଯୋଽଂତର ଆତ୍ମା॑ଽଽନଂଦ॒ମଯଃ । ତେନୈ॑ଷ ପୂ॒ର୍ଣଃ । ସ ଵା ଏଷ ପୁରୁଷଵି॑ଧ ଏ॒ଵ । ତସ୍ଯ ପୁରୁ॑ଷଵି॒ଧତାମ୍ । ଅନ୍ଵଯଂ॑ ପୁରୁଷ॒ଵିଧଃ । ତସ୍ଯ ପ୍ରିଯ॑ମେଵ॒ ଶିରଃ । ମୋଦୋ ଦକ୍ଷି॑ଣଃ ପ॒କ୍ଷଃ । ପ୍ରମୋଦ ଉତ୍ତ॑ରଃ ପ॒କ୍ଷଃ । ଆନଂ॑ଦ ଆ॒ତ୍ମା । ବ୍ରହ୍ମ ପୁଚ୍ଛଂ॑ ପ୍ରତି॒ଷ୍ଠା । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 5 ॥

ଅସ॑ନ୍ନେ॒ଵ ସ॑ ଭଵତି । ଅସ॒ଦ୍ବ୍ରହ୍ମେତି॒ ଵେଦ॒ ଚେତ୍ । ଅସ୍ତି ବ୍ରହ୍ମେତି॑ ଚେଦ୍ଵେ॒ଦ । ସଂତମେନଂ ତତୋ ଵି॑ଦୁରି॒ତି । ତସ୍ଯୈଷ ଏଵ ଶାରୀ॑ର ଆ॒ତ୍ମା । ଯଃ॑ ପୂର୍ଵ॒ସ୍ଯ । ଅଥାତୋ॑ଽନୁପ୍ର॒ଶ୍ନାଃ । ଉ॒ତାଵି॒ଦ୍ଵାନ॒ମୁଂ ଲୋ॒କଂ ପ୍ରେତ୍ଯ॑ । କଶ୍ଚ॒ନ ଗ॑ଚ୍ଚ॒ତୀ(3) । ଆହୋ॑ ଵି॒ଦ୍ଵାନ॒ମୁଂ ଲୋ॒କଂ ପ୍ରେତ୍ଯ॑ । କସ୍ଚି॒ଥ୍ସମ॑ଶ୍ନୁ॒ତା(3) ଉ॒ । ସୋ॑ଽକାମଯତ । ବ॒ହୁ ସ୍ଯାଂ॒ ପ୍ରଜା॑ଯେ॒ଯେତି॑ । ସ ତପୋ॑ଽତପ୍ଯତ । ସ ତପ॑ସ୍ତ॒ପ୍ତ୍ଵା । ଇଦଗ୍-ମ୍ ସର୍ଵ॑ମସୃଜତ । ଯଦି॒ଦଂ କିଂଚ॑ । ତଥ୍ସୃ॒ଷ୍ଟ୍ଵା । ତଦେ॒ଵାନୁ॒ପ୍ରାଵି॑ଶତ୍ । ତଦ॑ନୁପ୍ର॒ଵିଶ୍ଯ॑ । ସଚ୍ଚ॒ ତ୍ଯଚ୍ଚା॑ଭଵତ୍ । ନି॒ରୁକ୍ତଂ॒ ଚାନି॑ରୁକ୍ତଂ ଚ । ନି॒ଲଯ॑ନଂ॒ ଚାନି॑ଲଯନଂ ଚ । ଵି॒ଜ୍ଞାନଂ॒ ଚାଵି॑ଜ୍ଞନଂ ଚ । ସତ୍ଯଂ ଚାନୃତଂ ଚ ସ॑ତ୍ଯମ॒ଭଵତ୍ । ଯଦି॑ଦଂ କିଂ॒ଚ । ତଥ୍ସତ୍ଯମି॑ତ୍ଯାଚ॒କ୍ଷତେ । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 6 ॥

ଅସ॒ଦ୍ଵା ଇ॒ଦମଗ୍ର॑ ଆସୀତ୍ । ତତୋ॒ ଵୈ ସଦ॑ଜାଯତ । ତଦାତ୍ମାନଗ୍ଗ୍ ସ୍ଵଯ॑ମକୁ॒ରୁତ । ତସ୍ମାତ୍ତଥ୍ସୁକୃତମୁଚ୍ଯ॑ତ ଇ॒ତି । ଯଦ୍ଵୈ॑ ତଥ୍ସୁ॒କୃତମ୍ । ର॑ସୋ ଵୈ॒ ସଃ । ରସଗ୍ଗ୍ ହ୍ଯେଵାଯଂ ଲବ୍ଧ୍ଵାଽଽନଂ॑ଦୀ ଭ॒ଵତି । କୋ ହ୍ଯେଵାନ୍ଯା᳚ତ୍କଃ ପ୍ରା॒ଣ୍ଯାତ୍ । ଯଦେଷ ଆକାଶ ଆନଂ॑ଦୋ ନ॒ ସ୍ଯାତ୍ । ଏଷ ହ୍ଯେଵାଽଽନଂ॑ଦଯା॒ତି । ଯ॒ଦା ହ୍ଯେ॑ଵୈଷ॒ ଏତସ୍ମିନ୍ନଦୃଶ୍ଯେଽନାତ୍ମ୍ଯେଽନିରୁକ୍ତେଽନିଲଯନେଽଭଯଂ ପ୍ରତି॑ଷ୍ଠାଂ ଵିଂ॒ଦତେ । ଅଥ ସୋଽଭଯଂ ଗ॑ତୋ ଭ॒ଵତି । ଯ॒ଦା ହ୍ଯେ॑ଵୈଷ॒ ଏତସ୍ମିନ୍ନୁଦରମଂତ॑ରଂ କୁ॒ରୁତେ । ଅଥ ତସ୍ଯ ଭ॑ଯଂ ଭ॒ଵତି । ତତ୍ଵେଵ ଭଯଂ ଵିଦୁଷୋଽମ॑ନ୍ଵାନ॒ସ୍ଯ । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 7 ॥

ଭୀ॒ଷାଽସ୍ମା॒ଦ୍ଵାତଃ॑ ପଵତେ । ଭୀ॒ଷୋଦେ॑ତି॒ ସୂର୍ଯଃ॑ । ଭୀ॒ଷାଽସ୍ମାଦଗ୍ନି॑ଶ୍ଚେଂଦ୍ର॒ଶ୍ଚ । ମୃତ୍ଯୁର୍ଧାଵତି ପଂଚ॑ମ ଇ॒ତି । ସୈଷାଽଽନଂଦସ୍ଯ ମୀମାଗ୍-ମ୍॑ସା ଭ॒ଵତି । ଯୁଵା ସ୍ଯାଥ୍ସାଧୁଯୁ॑ଵାଽଧ୍ଯା॒ଯକଃ । ଆଶିଷ୍ଠୋ ଦୃଡିଷ୍ଠୋ॑ ବଲି॒ଷ୍ଠଃ । ତସ୍ଯେଯଂ ପୃଥିଵୀ ସର୍ଵା ଵିତ୍ତସ୍ଯ॑ ପୂର୍ଣା॒ ସ୍ଯାତ୍ । ସ ଏକୋ ମାନୁଷ॑ ଆନଂ॒ଦଃ । ତେ ଯେ ଶତଂ ମାନୁଷା॑ ଆନଂ॒ଦାଃ । ସ ଏକୋ ମନୁଷ୍ଯଗଂଧର୍ଵାଣା॑ମାନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ ଦେଵଗଂଧର୍ଵାଣା॑ମାନଂ॒ଦାଃ । ସ ଏକଃ ପିତୃଣାଂ ଚିରଲୋକଲୋକାନା॑ମାନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ ପିତୃଣାଂ ଚିରଲୋକଲୋକାନା॑ମାନଂ॒ଦାଃ । ସ ଏକ ଆଜାନଜାନାଂ ଦେଵାନା॑ମାନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତମାଜାନଜାନାଂ ଦେଵାନା॑ମାନଂ॒ଦାଃ । ସ ଏକଃ କର୍ମଦେଵାନାଂ ଦେଵାନା॑ମାନଂ॒ଦଃ । ଯେ କର୍ମଣା ଦେଵାନ॑ପି ଯଂ॒ତି । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ କର୍ମଦେଵାନାଂ ଦେଵାନା॑ମାନଂ॒ଦାଃ । ସ ଏକୋ ଦେଵାନା॑ମାନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ ଦେଵାନା॑ମାନଂ॒ଦାଃ । ସ ଏକ ଇଂଦ୍ର॑ସ୍ଯାଽଽନଂଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତମିଂଦ୍ର॑ସ୍ଯାଽଽନଂ॒ଦାଃ । ସ ଏକୋ ବୃହସ୍ପତେ॑ରାନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ ବୃହସ୍ପତେ॑ରାନଂ॒ଦାଃ । ସ ଏକଃ ପ୍ରଜାପତେ॑ରାନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ ପ୍ରଜାପତେ॑ରାନଂ॒ଦାଃ । ସ ଏକୋ ବ୍ରହ୍ମଣ॑ ଆନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ତେ ଯେ ଶତଂ ପଜାପତେ॑ରାନଂ॒ଦାଃ । ସ ଏକୋ ବ୍ରହ୍ମଣ॑ ଆନଂ॒ଦଃ । ଶ୍ରୋତ୍ରିଯସ୍ଯ ଚାକାମ॑ହତ॒ସ୍ଯ । ସ ଯଶ୍ଚା॑ଯଂ ପୁ॒ରୁଷେ । ଯଶ୍ଚାସା॑ଵାଦି॒ତ୍ଯେ । ସ ଏକଃ॑ । ସ ଯ॑ ଏଵଂ॒ ଵିତ୍ । ଅସ୍ମାଲ୍ଲୋ॑କାତ୍ପ୍ରେ॒ତ୍ଯ । ଏତମନ୍ନମଯମାତ୍ମାନମୁପ॑ସଂକ୍ରା॒ମତି । ଏତଂ ପ୍ରାଣମଯମାତ୍ମାନମୁପ॑ସଂକ୍ରା॒ମତି । ଏତଂ ମନୋମଯମାତ୍ମାନମୁପ॑ସଂକ୍ରା॒ମତି। ଏତଂ ଵିଜ୍ଞାନମଯମାତ୍ମାନମୁପ॑ସଂକ୍ରା॒ମତି । ଏତମାନଂଦମଯମାତ୍ମାନମୁପ॑ସଂକ୍ରା॒ମତି । ତଦପ୍ଯେଷ ଶ୍ଲୋ॑କୋ ଭ॒ଵତି ॥ 8 ॥

ଯତୋ॒ ଵାଚୋ॒ ନିଵ॑ର୍ତଂତେ । ଅପ୍ରା᳚ପ୍ଯ॒ ମନ॑ସା ସ॒ହ । ଆନଂଦଂ ବ୍ରହ୍ମ॑ଣୋ ଵି॒ଦ୍ଵାନ୍ । ନ ବିଭେତି କୁତ॑ଶ୍ଚନେ॒ତି । ଏତଗ୍-ମ୍ ହ ଵାଵ॑ ନ ତ॒ପତି । କିମହଗ୍-ମ୍ ସାଧୁ॑ ନାକ॒ରଵମ୍ । କିମହଂ ପାପମକର॑ଵମି॒ତି । ସ ଯ ଏଵଂ ଵିଦ୍ଵାନେତେ ଆତ୍ମା॑ନଗ୍ଗ୍ ସ୍ପୃ॒ଣୁତେ । ଉ॒ଭେ ହ୍ଯେ॑ଵୈଷ॒ ଏତେ ଆତ୍ମା॑ନଗ୍ଗ୍ ସ୍ପୃ॒ଣୁତେ । ଯ ଏ॒ଵଂ ଵେଦ॑ । ଇତ୍ଯୁ॑ପ॒ନିଷ॑ତ୍ ॥ 9 ॥

ସ॒ହ ନା॑ ଵଵତୁ । ସ॒ହ ନୌ॑ ଭୁନକ୍ତୁ । ସ॒ହ ଵୀ॒ର୍ଯଂ॑ କରଵାଵହୈ । ତେ॒ଜ॒ସ୍ଵି ନା॒ଵଧୀ॑ତମସ୍ତୁ॒ ମା ଵି॑ଦ୍ଵିଷା॒ଵହୈ᳚ । ଓଂ ଶାଂତିଃ॒ ଶାଂତିଃ॒ ଶାଂତିଃ॑ ॥

॥ ହରିଃ॑ ଓମ୍ ॥
॥ ଶ୍ରୀ କୃଷ୍ଣାର୍ପଣମସ୍ତୁ ॥