ଅଥ ତୃତୀଯୋଽଧ୍ଯାଯଃ ॥

ଅଥ କାମ୍ଯଜପସ୍ଥାନଂ କଥଯାମି ଵରାନନେ ।
ସାଗରାଂତେ ସରିତ୍ତୀରେ ତୀର୍ଥେ ହରିହରାଲଯେ ॥ 236 ॥

ଶକ୍ତିଦେଵାଲଯେ ଗୋଷ୍ଠେ ସର୍ଵଦେଵାଲଯେ ଶୁଭେ ।
ଵଟସ୍ଯ ଧାତ୍ର୍ଯା ମୂଲେ ଵା ମଠେ ବୃଂଦାଵନେ ତଥା ॥ 237 ॥

ପଵିତ୍ରେ ନିର୍ମଲେ ଦେଶେ ନିତ୍ଯାନୁଷ୍ଠାନତୋଽପି ଵା ।
ନିର୍ଵେଦନେନ ମୌନେନ ଜପମେତତ୍ ସମାରଭେତ୍ ॥ 238 ॥

ଜାପ୍ଯେନ ଜଯମାପ୍ନୋତି ଜପସିଦ୍ଧିଂ ଫଲଂ ତଥା ।
ହୀନଂ କର୍ମ ତ୍ଯଜେତ୍ସର୍ଵଂ ଗର୍ହିତସ୍ଥାନମେଵ ଚ ॥ 239 ॥

ଶ୍ମଶାନେ ବିଲ୍ଵମୂଲେ ଵା ଵଟମୂଲାଂତିକେ ତଥା ।
ସିଦ୍ଧ୍ଯଂତି କାନକେ ମୂଲେ ଚୂତଵୃକ୍ଷସ୍ଯ ସନ୍ନିଧୌ ॥ 240 ॥

ପୀତାସନଂ ମୋହନେ ତୁ ହ୍ଯସିତଂ ଚାଭିଚାରିକେ ।
ଜ୍ଞେଯଂ ଶୁକ୍ଲଂ ଚ ଶାଂତ୍ଯର୍ଥଂ ଵଶ୍ଯେ ରକ୍ତଂ ପ୍ରକୀର୍ତିତମ୍ ॥ 241 ॥

ଜପଂ ହୀନାସନଂ କୁର୍ଵନ୍ ହୀନକର୍ମଫଲପ୍ରଦମ୍ ।
ଗୁରୁଗୀତାଂ ପ୍ରଯାଣେ ଵା ସଂଗ୍ରାମେ ରିପୁସଂକଟେ ॥ 242 ॥

ଜପନ୍ ଜଯମଵାପ୍ନୋତି ମରଣେ ମୁକ୍ତିଦାଯିକା ।
ସର୍ଵକର୍ମାଣି ସିଦ୍ଧ୍ଯଂତି ଗୁରୁପୁତ୍ରେ ନ ସଂଶଯଃ ॥ 243 ॥

ଗୁରୁମଂତ୍ରୋ ମୁଖେ ଯସ୍ଯ ତସ୍ଯ ସିଦ୍ଧ୍ଯଂତି ନାଽନ୍ଯଥା ।
ଦୀକ୍ଷଯା ସର୍ଵକର୍ମାଣି ସିଦ୍ଧ୍ଯଂତି ଗୁରୁପୁତ୍ରକେ ॥ 244 ॥

ଭଵମୂଲଵିନାଶାଯ ଚାଷ୍ଟପାଶନିଵୃତ୍ତଯେ ।
ଗୁରୁଗୀତାଂଭସି ସ୍ନାନଂ ତତ୍ତ୍ଵଜ୍ଞଃ କୁରୁତେ ସଦା ॥ 245 ॥

ସ ଏଵଂ ସଦ୍ଗୁରୁଃ ସାକ୍ଷାତ୍ ସଦସଦ୍ବ୍ରହ୍ମଵିତ୍ତମଃ ।
ତସ୍ଯ ସ୍ଥାନାନି ସର୍ଵାଣି ପଵିତ୍ରାଣି ନ ସଂଶଯଃ ॥ 246 ॥

ସର୍ଵଶୁଦ୍ଧଃ ପଵିତ୍ରୋଽସୌ ସ୍ଵଭାଵାଦ୍ଯତ୍ର ତିଷ୍ଠତି ।
ତତ୍ର ଦେଵଗଣାଃ ସର୍ଵେ କ୍ଷେତ୍ରପୀଠେ ଚରଂତି ଚ ॥ 247 ॥

ଆସନସ୍ଥାଃ ଶଯାନା ଵା ଗଚ୍ଛଂତସ୍ତିଷ୍ଠତୋଽପି ଵା ।
ଅଶ୍ଵାରୂଢା ଗଜାରୂଢାଃ ସୁଷୁପ୍ତା ଜାଗ୍ରତୋଽପି ଵା ॥ 248 ॥

ଶୁଚିର୍ଭୂତା ଜ୍ଞାନଵଂତୋ ଗୁରୁଗୀତାଂ ଜପଂତି ଯେ ।
ତେଷାଂ ଦର୍ଶନସଂସ୍ପର୍ଶାତ୍ ଦିଵ୍ଯଜ୍ଞାନଂ ପ୍ରଜାଯତେ ॥ 249 ॥

ସମୁଦ୍ରେ ଵୈ ଯଥା ତୋଯଂ କ୍ଷୀରେ କ୍ଷୀରଂ ଜଲେ ଜଲମ୍ ।
ଭିନ୍ନେ କୁଂଭେ ଯଥାଽଽକାଶଂ ତଥାଽଽତ୍ମା ପରମାତ୍ମନି ॥ 250 ॥

ତଥୈଵ ଜ୍ଞାନଵାନ୍ ଜୀଵଃ ପରମାତ୍ମନି ସର୍ଵଦା ।
ଐକ୍ଯେନ ରମତେ ଜ୍ଞାନୀ ଯତ୍ର କୁତ୍ର ଦିଵାନିଶମ୍ ॥ 251 ॥

ଏଵଂଵିଧୋ ମହାଯୁକ୍ତଃ ସର୍ଵତ୍ର ଵର୍ତତେ ସଦା ।
ତସ୍ମାତ୍ସର୍ଵପ୍ରକାରେଣ ଗୁରୁଭକ୍ତିଂ ସମାଚରେତ୍ ॥ 252 ॥

ଗୁରୁସଂତୋଷଣାଦେଵ ମୁକ୍ତୋ ଭଵତି ପାର୍ଵତି ।
ଅଣିମାଦିଷୁ ଭୋକ୍ତୃତ୍ଵଂ କୃପଯା ଦେଵି ଜାଯତେ ॥ 253 ॥

ସାମ୍ଯେନ ରମତେ ଜ୍ଞାନୀ ଦିଵା ଵା ଯଦି ଵା ନିଶି ।
ଏଵଂଵିଧୋ ମହାମୌନୀ ତ୍ରୈଲୋକ୍ଯସମତାଂ ଵ୍ରଜେତ୍ ॥ 254 ॥

ଅଥ ସଂସାରିଣଃ ସର୍ଵେ ଗୁରୁଗୀତା ଜପେନ ତୁ ।
ସର୍ଵାନ୍ କାମାଂସ୍ତୁ ଭୁଂଜଂତି ତ୍ରିସତ୍ଯଂ ମମ ଭାଷିତମ୍ ॥ 255 ॥

ସତ୍ଯଂ ସତ୍ଯଂ ପୁନଃ ସତ୍ଯଂ ଧର୍ମସାରଂ ମଯୋଦିତଂ ।
ଗୁରୁଗୀତାସମଂ ସ୍ତୋତ୍ରଂ ନାସ୍ତି ତତ୍ତ୍ଵଂ ଗୁରୋଃ ପରମ୍ ॥ 256 ॥

ଗୁରୁର୍ଦେଵୋ ଗୁରୁର୍ଧର୍ମୋ ଗୁରୌ ନିଷ୍ଠା ପରଂ ତପଃ ।
ଗୁରୋଃ ପରତରଂ ନାସ୍ତି ତ୍ରିଵାରଂ କଥଯାମି ତେ ॥ 257 ॥

ଧନ୍ଯା ମାତା ପିତା ଧନ୍ଯୋ ଗୋତ୍ରଂ ଧନ୍ଯଂ କୁଲୋଦ୍ଭଵଃ ।
ଧନ୍ଯା ଚ ଵସୁଧା ଦେଵି ଯତ୍ର ସ୍ଯାଦ୍ଗୁରୁଭକ୍ତତା ॥ 258 ॥

ଆକଲ୍ପଜନ୍ମ କୋଟୀନାଂ ଯଜ୍ଞଵ୍ରତତପଃ କ୍ରିଯାଃ ।
ତାଃ ସର୍ଵାଃ ସଫଲା ଦେଵି ଗୁରୂସଂତୋଷମାତ୍ରତଃ ॥ 259 ॥

ଶରୀରମିଂଦ୍ରିଯଂ ପ୍ରାଣମର୍ଥଂ ସ୍ଵଜନବଂଧୁତା ।
ମାତୃକୁଲଂ ପିତୃକୁଲଂ ଗୁରୁରେଵ ନ ସଂଶଯଃ ॥ 260 ॥

ମଂଦଭାଗ୍ଯା ହ୍ଯଶକ୍ତାଶ୍ଚ ଯେ ଜନା ନାନୁମନ୍ଵତେ ।
ଗୁରୁସେଵାସୁ ଵିମୁଖାଃ ପଚ୍ଯଂତେ ନରକେଽଶୁଚୌ ॥ 261 ॥

ଵିଦ୍ଯା ଧନଂ ବଲଂ ଚୈଵ ତେଷାଂ ଭାଗ୍ଯଂ ନିରର୍ଥକମ୍ ।
ଯେଷାଂ ଗୁରୂକୃପା ନାସ୍ତି ଅଧୋ ଗଚ୍ଛଂତି ପାର୍ଵତି ॥ 262 ॥

ବ୍ରହ୍ମା ଵିଷ୍ଣୁଶ୍ଚ ରୁଦ୍ରଶ୍ଚ ଦେଵାଶ୍ଚ ପିତୃକିନ୍ନରାଃ ।
ସିଦ୍ଧଚାରଣଯକ୍ଷାଶ୍ଚ ଅନ୍ଯେ ଚ ମୁନଯୋ ଜନାଃ ॥ 263 ॥

ଗୁରୁଭାଵଃ ପରଂ ତୀର୍ଥମନ୍ଯତୀର୍ଥଂ ନିରର୍ଥକମ୍ ।
ସର୍ଵତୀର୍ଥମଯଂ ଦେଵି ଶ୍ରୀଗୁରୋଶ୍ଚରଣାଂବୁଜମ୍ ॥ 264 ॥

କନ୍ଯାଭୋଗରତା ମଂଦାଃ ସ୍ଵକାଂତାଯାଃ ପରାଙ୍ମୁଖାଃ ।
ଅତଃ ପରଂ ମଯା ଦେଵି କଥିତଂ ନ ମମ ପ୍ରିଯେ ॥ 265 ॥

ଇଦଂ ରହସ୍ଯମସ୍ପଷ୍ଟଂ ଵକ୍ତଵ୍ଯଂ ଚ ଵରାନନେ ।
ସୁଗୋପ୍ଯଂ ଚ ତଵାଗ୍ରେ ତୁ ମମାତ୍ମପ୍ରୀତଯେ ସତି ॥ 266 ॥

ସ୍ଵାମିମୁଖ୍ଯଗଣେଶାଦ୍ଯାନ୍ ଵୈଷ୍ଣଵାଦୀଂଶ୍ଚ ପାର୍ଵତି ।
ନ ଵକ୍ତଵ୍ଯଂ ମହାମାଯେ ପାଦସ୍ପର୍ଶଂ କୁରୁଷ୍ଵ ମେ ॥ 267 ॥

ଅଭକ୍ତେ ଵଂଚକେ ଧୂର୍ତେ ପାଷଂଡେ ନାସ୍ତିକାଦିଷୁ ।
ମନସାଽପି ନ ଵକ୍ତଵ୍ଯା ଗୁରୁଗୀତା କଦାଚନ ॥ 268 ॥

ଗୁରଵୋ ବହଵଃ ସଂତି ଶିଷ୍ଯଵିତ୍ତାପହାରକାଃ ।
ତମେକଂ ଦୁର୍ଲଭଂ ମନ୍ଯେ ଶିଷ୍ଯହୃତ୍ତାପହାରକମ୍ ॥ 269 ॥

ଚାତୁର୍ଯଵାନ୍ ଵିଵେକୀ ଚ ଅଧ୍ଯାତ୍ମଜ୍ଞାନଵାନ୍ ଶୁଚିଃ ।
ମାନସଂ ନିର୍ମଲଂ ଯସ୍ଯ ଗୁରୁତ୍ଵଂ ତସ୍ଯ ଶୋଭତେ ॥ 270 ॥

ଗୁରଵୋ ନିର୍ମଲାଃ ଶାଂତାଃ ସାଧଵୋ ମିତଭାଷିଣଃ ।
କାମକ୍ରୋଧଵିନିର୍ମୁକ୍ତାଃ ସଦାଚାରାଃ ଜିତେଂଦ୍ରିଯାଃ ॥ 271 ॥

ସୂଚକାଦିପ୍ରଭେଦେନ ଗୁରଵୋ ବହୁଧା ସ୍ମୃତାଃ ।
ସ୍ଵଯଂ ସମ୍ଯକ୍ ପରୀକ୍ଷ୍ଯାଥ ତତ୍ତ୍ଵନିଷ୍ଠଂ ଭଜେତ୍ସୁଧୀଃ ॥ 272 ॥

ଵର୍ଣଜାଲମିଦଂ ତଦ୍ଵଦ୍ବାହ୍ଯଶାସ୍ତ୍ରଂ ତୁ ଲୌକିକମ୍ ।
ଯସ୍ମିନ୍ ଦେଵି ସମଭ୍ଯସ୍ତଂ ସ ଗୁରୁଃ ସୁଚକଃ ସ୍ମୃତଃ ॥ 273 ॥

ଵର୍ଣାଶ୍ରମୋଚିତାଂ ଵିଦ୍ଯାଂ ଧର୍ମାଧର୍ମଵିଧାଯିନୀଂ ।
ପ୍ରଵକ୍ତାରଂ ଗୁରୁଂ ଵିଦ୍ଧି ଵାଚକଂ ତ୍ଵିତି ପାର୍ଵତି ॥ 274 ॥

ପଂଚାକ୍ଷର୍ଯାଦିମଂତ୍ରାଣାମୁପଦେଷ୍ଟା ତୁ ପାର୍ଵତି ।
ସ ଗୁରୁର୍ବୋଧକୋ ଭୂଯାଦୁଭଯୋରଯମୁତ୍ତମଃ ॥ 275 ॥

ମୋହମାରଣଵଶ୍ଯାଦିତୁଚ୍ଛମଂତ୍ରୋପଦେଶିନମ୍ ।
ନିଷିଦ୍ଧଗୁରୁରିତ୍ଯାହୁଃ ପଂଡିତାସ୍ତତ୍ତ୍ଵଦର୍ଶିନଃ ॥ 276 ॥

ଅନିତ୍ଯମିତି ନିର୍ଦିଶ୍ଯ ସଂସାରଂ ସଂକଟାଲଯମ୍ ।
ଵୈରାଗ୍ଯପଥଦର୍ଶୀ ଯଃ ସ ଗୁରୁର୍ଵିହିତଃ ପ୍ରିଯେ ॥ 277 ॥

ତତ୍ତ୍ଵମସ୍ଯାଦିଵାକ୍ଯାନାମୁପଦେଷ୍ଟା ତୁ ପାର୍ଵତି ।
କାରଣାଖ୍ଯୋ ଗୁରୁଃ ପ୍ରୋକ୍ତୋ ଭଵରୋଗନିଵାରକଃ ॥ 278 ॥

ସର୍ଵସଂଦେହସଂଦୋହନିର୍ମୂଲନଵିଚକ୍ଷଣଃ ।
ଜନ୍ମମୃତ୍ଯୁଭଯଘ୍ନୋ ଯଃ ସ ଗୁରୁଃ ପରମୋ ମତଃ ॥ 279 ॥

ବହୁଜନ୍ମକୃତାତ୍ ପୁଣ୍ଯାଲ୍ଲଭ୍ଯତେଽସୌ ମହାଗୁରୁଃ ।
ଲବ୍ଧ୍ଵାଽମୁଂ ନ ପୁନର୍ଯାତି ଶିଷ୍ଯଃ ସଂସାରବଂଧନମ୍ ॥ 280 ॥

ଏଵଂ ବହୁଵିଧା ଲୋକେ ଗୁରଵଃ ସଂତି ପାର୍ଵତି ।
ତେଷୁ ସର୍ଵପ୍ରଯତ୍ନେନ ସେଵ୍ଯୋ ହି ପରମୋ ଗୁରୁଃ ॥ 281 ॥

ନିଷିଦ୍ଧଗୁରୁଶିଷ୍ଯସ୍ତୁ ଦୁଷ୍ଟସଂକଲ୍ପଦୂଷିତଃ ।
ବ୍ରହ୍ମପ୍ରଳଯପର୍ଯଂତଂ ନ ପୁନର୍ଯାତି ମର୍ତ୍ଯତାମ୍ ॥ 282 ॥

ଏଵଂ ଶ୍ରୁତ୍ଵା ମହାଦେଵୀ ମହାଦେଵଵଚସ୍ତଥା ।
ଅତ୍ଯଂତଵିହ୍ଵଲମନାଃ ଶଂକରଂ ପରିପୃଚ୍ଛତି ॥ 283 ॥

ପାର୍ଵତ୍ଯୁଵାଚ ।
ନମସ୍ତେ ଦେଵଦେଵାତ୍ର ଶ୍ରୋତଵ୍ଯଂ କିଂଚିଦସ୍ତି ମେ ।
ଶ୍ରୁତ୍ଵା ତ୍ଵଦ୍ଵାକ୍ଯମଧୁନା ଭୃଶଂ ସ୍ଯାଦ୍ଵିହ୍ଵଲଂ ମନଃ ॥ 284 ॥

ସ୍ଵଯଂ ମୂଢା ମୃତ୍ଯୁଭୀତାଃ ସୁକୃତାଦ୍ଵିରତିଂ ଗତାଃ ।
ଦୈଵାନ୍ନିଷିଦ୍ଧଗୁରୁଗା ଯଦି ତେଷାଂ ତୁ କା ଗତିଃ ॥ 285 ॥

ଶ୍ରୀ ମହାଦେଵ ଉଵାଚ ।
ଶୃଣୁ ତତ୍ତ୍ଵମିଦଂ ଦେଵି ଯଦା ସ୍ଯାଦ୍ଵିରତୋ ନରଃ ।
ତଦାଽସାଵଧିକାରୀତି ପ୍ରୋଚ୍ଯତେ ଶ୍ରୁତିମସ୍ତକୈଃ ॥ 286 ॥

ଅଖଂଡୈକରସଂ ବ୍ରହ୍ମ ନିତ୍ଯମୁକ୍ତଂ ନିରାମଯମ୍ ।
ସ୍ଵସ୍ମିନ୍ ସଂଦର୍ଶିତଂ ଯେନ ସ ଭଵେଦସ୍ଯଂ ଦେଶିକଃ ॥ 287 ॥

ଜଲାନାଂ ସାଗରୋ ରାଜା ଯଥା ଭଵତି ପାର୍ଵତି ।
ଗୁରୂଣାଂ ତତ୍ର ସର୍ଵେଷାଂ ରାଜାଽଯଂ ପରମୋ ଗୁରୁଃ ॥ 288 ॥

ମୋହାଦିରହିତଃ ଶାଂତୋ ନିତ୍ଯତୃପ୍ତୋ ନିରାଶ୍ରଯଃ ।
ତୃଣୀକୃତବ୍ରହ୍ମଵିଷ୍ଣୁଵୈଭଵଃ ପରମୋ ଗୁରୁଃ ॥ 289 ॥

ସର୍ଵକାଲଵିଦେଶେଷୁ ସ୍ଵତଂତ୍ରୋ ନିଶ୍ଚଲସ୍ସୁଖୀ ।
ଅଖଂଡୈକରସାସ୍ଵାଦତୃପ୍ତୋ ହି ପରମୋ ଗୁରୁଃ ॥ 290 ॥

ଦ୍ଵୈତାଦ୍ଵୈତଵିନିର୍ମୁକ୍ତଃ ସ୍ଵାନୁଭୂତିପ୍ରକାଶଵାନ୍ ।
ଅଜ୍ଞାନାଂଧତମଶ୍ଛେତ୍ତା ସର୍ଵଜ୍ଞଃ ପରମୋ ଗୁରୁଃ ॥ 291 ॥

ଯସ୍ଯ ଦର୍ଶନମାତ୍ରେଣ ମନସଃ ସ୍ଯାତ୍ ପ୍ରସନ୍ନତା ।
ସ୍ଵଯଂ ଭୂଯାତ୍ ଧୃତିଶ୍ଶାଂତିଃ ସ ଭଵେତ୍ ପରମୋ ଗୁରୁଃ ॥ 292 ॥

ସିଦ୍ଧିଜାଲଂ ସମାଲୋକ୍ଯ ଯୋଗିନାଂ ମଂତ୍ରଵାଦିନାମ୍ ।
ତୁଚ୍ଛାକାରମନୋଵୃତ୍ତିଃ ଯସ୍ଯାସୌ ପରମୋ ଗୁରୁଃ ॥ 293 ॥

ସ୍ଵଶରୀରଂ ଶଵଂ ପଶ୍ଯନ୍ ତଥା ସ୍ଵାତ୍ମାନମଦ୍ଵଯମ୍ ।
ଯଃ ସ୍ତ୍ରୀକନକମୋହଘ୍ନଃ ସ ଭଵେତ୍ ପରମୋ ଗୁରୁଃ ॥ 294 ॥

ମୌନୀ ଵାଗ୍ମୀତି ତତ୍ତ୍ଵଜ୍ଞୋ ଦ୍ଵିଧାଽଭୂଚ୍ଛୃଣୁ ପାର୍ଵତି ।
ନ କଶ୍ଚିନ୍ମୌନିନାଂ ଲୋଭୋ ଲୋକେଽସ୍ମିନ୍ଭଵତି ପ୍ରିଯେ ॥ 295 ॥

ଵାଗ୍ମୀ ତୂତ୍କଟସଂସାରସାଗରୋତ୍ତାରଣକ୍ଷମଃ ।
ଯତୋଽସୌ ସଂଶଯଚ୍ଛେତ୍ତା ଶାସ୍ତ୍ରଯୁକ୍ତ୍ଯନୁଭୂତିଭିଃ ॥ 296 ॥

ଗୁରୁନାମଜପାଦ୍ଦେଵି ବହୁଜନ୍ମାର୍ଜିତାନ୍ଯପି ।
ପାପାନି ଵିଲଯଂ ଯାଂତି ନାସ୍ତି ସଂଦେହମଣ୍ଵପି ॥ 297 ॥

ଶ୍ରୀଗୁରୋସ୍ସଦୃଶଂ ଦୈଵଂ ଶ୍ରୀଗୁରୋସଦୃଶଃ ପିତା ।
ଗୁରୁଧ୍ଯାନସମଂ କର୍ମ ନାସ୍ତି ନାସ୍ତି ମହୀତଲେ ॥ 298 ॥

କୁଲଂ ଧନଂ ବଲଂ ଶାସ୍ତ୍ରଂ ବାଂଧଵାସ୍ସୋଦରା ଇମେ ।
ମରଣେ ନୋପଯୁଜ୍ଯଂତେ ଗୁରୁରେକୋ ହି ତାରକଃ ॥ 299 ॥

କୁଲମେଵ ପଵିତ୍ରଂ ସ୍ଯାତ୍ ସତ୍ଯଂ ସ୍ଵଗୁରୁସେଵଯା ।
ତୃପ୍ତାଃ ସ୍ଯୁସ୍ସକଲା ଦେଵା ବ୍ରହ୍ମାଦ୍ଯା ଗୁରୁତର୍ପଣାତ୍ ॥ 300 ॥

ଗୁରୁରେକୋ ହି ଜାନାତି ସ୍ଵରୂପଂ ଦେଵମଵ୍ଯଯମ୍ ।
ତଦ୍^ଜ୍ଞାନଂ ଯତ୍ପ୍ରସାଦେନ ନାନ୍ଯଥା ଶାସ୍ତ୍ରକୋଟିଭିଃ ॥ 301 ॥

ସ୍ଵରୂପଜ୍ଞାନଶୂନ୍ଯେନ କୃତମପ୍ଯକୃତଂ ଭଵେତ୍ ।
ତପୋଜପାଦିକଂ ଦେଵି ସକଲଂ ବାଲଜଲ୍ପଵତ୍ ॥ 302 ॥

ଶିଵଂ କେଚିଦ୍ଧରିଂ କେଚିଦ୍ଵିଧିଂ କେଚିତ୍ତୁ କେଚନ ।
ଶକ୍ତିଂ ଦୈଵମିତି ଜ୍ଞାତ୍ଵା ଵିଵଦଂତି ଵୃଥା ନରାଃ ॥ 303 ॥

ନ ଜାନଂତି ପରଂ ତତ୍ତ୍ଵଂ ଗୁରୁଦୀକ୍ଷାପରାଙ୍ମୁଖାଃ ।
ଭ୍ରାଂତାଃ ପଶୁସମା ହ୍ଯେତେ ସ୍ଵପରିଜ୍ଞାନଵର୍ଜିତାଃ ॥ 304 ॥

ତସ୍ମାତ୍କୈଵଲ୍ଯସିଦ୍ଧ୍ଯର୍ଥଂ ଗୁରୁମେଵ ଭଜେତ୍ପ୍ରିଯେ ।
ଗୁରୁଂ ଵିନା ନ ଜାନଂତି ମୂଢାସ୍ତତ୍ପରମଂ ପଦମ୍ ॥ 305 ॥

ଭିଦ୍ଯତେ ହୃଦଯଗ୍ରଂଥିଶ୍ଛିଦ୍ଯଂତେ ସର୍ଵସଂଶଯାଃ ।
କ୍ଷୀଯଂତେ ସର୍ଵକର୍ମାଣି ଗୁରୋଃ କରୁଣଯା ଶିଵେ ॥ 306 ॥

କୃତାଯା ଗୁରୁଭକ୍ତେସ୍ତୁ ଵେଦଶାସ୍ତ୍ରାନୁସାରତଃ ।
ମୁଚ୍ଯତେ ପାତକାଦ୍ଘୋରାତ୍ ଗୁରୁଭକ୍ତୋ ଵିଶେଷତଃ ॥ 307 ॥

ଦୁସ୍ସଂଗଂ ଚ ପରିତ୍ଯଜ୍ଯ ପାପକର୍ମ ପରିତ୍ଯଜେତ୍ ।
ଚିତ୍ତଚିହ୍ନମିଦଂ ଯସ୍ଯ ତସ୍ଯ ଦୀକ୍ଷା ଵିଧୀଯତେ ॥ 308 ॥

ଚିତ୍ତତ୍ଯାଗନିଯୁକ୍ତଶ୍ଚ କ୍ରୋଧଗର୍ଵଵିଵର୍ଜିତଃ ।
ଦ୍ଵୈତଭାଵପରିତ୍ଯାଗୀ ତସ୍ଯ ଦୀକ୍ଷା ଵିଧୀଯତେ ॥ 309 ॥

ଏତଲ୍ଲକ୍ଷଣଯୁକ୍ତତ୍ଵଂ ସର୍ଵଭୂତହିତେ ରତମ୍ ।
ନିର୍ମଲଂ ଜୀଵିତଂ ଯସ୍ଯ ତସ୍ଯ ଦୀକ୍ଷା ଵିଧୀଯତେ ॥ 310 ॥

କ୍ରିଯଯା ଚାନ୍ଵିତଂ ପୂର୍ଵଂ ଦୀକ୍ଷାଜାଲଂ ନିରୂପିତମ୍ ।
ମଂତ୍ରଦୀକ୍ଷାଭିଧଂ ସାଂଗୋପାଂଗଂ ସର୍ଵଂ ଶିଵୋଦିତମ୍ ॥ 311 ॥

କ୍ରିଯଯା ସ୍ଯାଦ୍ଵିରହିତାଂ ଗୁରୁସାଯୁଜ୍ଯଦାଯିନୀମ୍ ।
ଗୁରୁଦୀକ୍ଷାଂ ଵିନା କୋ ଵା ଗୁରୁତ୍ଵାଚାରପାଲକଃ ॥ 312 ॥

ଶକ୍ତୋ ନ ଚାପି ଶକ୍ତୋ ଵା ଦୈଶିକାଂଘ୍ରି ସମାଶ୍ରଯେତ୍ ।
ତସ୍ଯ ଜନ୍ମାସ୍ତି ସଫଲଂ ଭୋଗମୋକ୍ଷଫଲପ୍ରଦମ୍ ॥ 313 ॥

ଅତ୍ଯଂତଚିତ୍ତପକ୍ଵସ୍ଯ ଶ୍ରଦ୍ଧାଭକ୍ତିଯୁତସ୍ଯ ଚ ।
ପ୍ରଵକ୍ତଵ୍ଯମିଦଂ ଦେଵି ମମାତ୍ମପ୍ରୀତଯେ ସଦା ॥ 314 ॥

ରହସ୍ଯଂ ସର୍ଵଶାସ୍ତ୍ରେଷୁ ଗୀତାଶାସ୍ତ୍ରମିଦଂ ଶିଵେ ।
ସମ୍ଯକ୍ପରୀକ୍ଷ୍ଯ ଵକ୍ତଵ୍ଯଂ ସାଧକସ୍ଯ ମହାତ୍ମନଃ ॥ 315 ॥

ସତ୍କର୍ମପରିପାକାଚ୍ଚ ଚିତ୍ତଶୁଦ୍ଧିଶ୍ଚ ଧୀମତଃ ।
ସାଧକସ୍ଯୈଵ ଵକ୍ତଵ୍ଯା ଗୁରୁଗୀତା ପ୍ରଯତ୍ନତଃ ॥ 316 ॥

ନାସ୍ତିକାଯ କୃତଘ୍ନାଯ ଦାଂଭିକାଯ ଶଠାଯ ଚ ।
ଅଭକ୍ତାଯ ଵିଭକ୍ତାଯ ନ ଵାଚ୍ଯେଯଂ କଦାଚନ ॥ 317 ॥

ସ୍ତ୍ରୀଲୋଲୁପାଯ ମୂର୍ଖାଯ କାମୋପହତଚେତସେ ।
ନିଂଦକାଯ ନ ଵକ୍ତଵ୍ଯା ଗୁରୁଗୀତା ସ୍ଵଭାଵତଃ ॥ 318 ॥

ସର୍ଵପାପପ୍ରଶମନଂ ସର୍ଵୋପଦ୍ରଵଵାରକମ୍ ।
ଜନ୍ମମୃତ୍ଯୁହରଂ ଦେଵି ଗୀତାଶାସ୍ତ୍ରମିଦଂ ଶିଵେ ॥ 319 ॥

ଶ୍ରୁତିସାରମିଦଂ ଦେଵି ସର୍ଵମୁକ୍ତଂ ସମାସତଃ ।
ନାନ୍ଯଥା ସଦ୍ଗତିଃ ପୁଂସାଂ ଵିନା ଗୁରୁପଦଂ ଶିଵେ ॥ 320 ॥

ବହୁଜନ୍ମକୃତାତ୍ପାପାଦଯମର୍ଥୋ ନ ରୋଚତେ ।
ଜନ୍ମବଂଧନିଵୃତ୍ତ୍ଯର୍ଥଂ ଗୁରୁମେଵ ଭଜେତ୍ସଦା ॥ 321 ॥

ଅହମେଵ ଜଗତ୍ସର୍ଵମହମେଵ ପରଂ ପଦମ୍ ।
ଏତଦ୍^ଜ୍ଞାନଂ ଯତୋ ଭୂଯାତ୍ତଂ ଗୁରୁଂ ପ୍ରଣମାମ୍ଯହମ୍ ॥ 322 ॥

ଅଲଂ ଵିକଲ୍ପୈରହମେଵ କେଵଲଂ
ମଯି ସ୍ଥିତଂ ଵିଶ୍ଵମିଦଂ ଚରାଚରମ୍ ।
ଇଦଂ ରହସ୍ଯଂ ମମ ଯେନ ଦର୍ଶିତଂ
ସ ଵଂଦନୀଯୋ ଗୁରୁରେଵ କେଵଲମ୍ ॥ 323 ॥

ଯସ୍ଯାଂତଂ ନାଦିମଧ୍ଯଂ ନ ହି କରଚରଣଂ ନାମଗୋତ୍ରଂ ନ ସୂତ୍ରଂ ।
ନୋ ଜାତିର୍ନୈଵ ଵର୍ଣୋ ନ ଭଵତି ପୁରୁଷୋ ନୋ ନପୁଂସୋ ନ ଚ ସ୍ତ୍ରୀ ॥ 324 ॥

ନାକାରଂ ନୋ ଵିକାରଂ ନ ହି ଜନିମରଣଂ ନାସ୍ତି ପୁଣ୍ଯଂ ନ ପାପଂ ।
ନୋଽତତ୍ତ୍ଵଂ ତତ୍ତ୍ଵମେକଂ ସହଜସମରସଂ ସଦ୍ଗୁରୁଂ ତଂ ନମାମି ॥ 325 ॥

ନିତ୍ଯାଯ ସତ୍ଯାଯ ଚିଦାତ୍ମକାଯ
ନଵ୍ଯାଯ ଭଵ୍ଯାଯ ପରାତ୍ପରାଯ ।
ଶୁଦ୍ଧାଯ ବୁଦ୍ଧାଯ ନିରଂଜନାଯ
ନମୋଽସ୍ତୁ ନିତ୍ଯଂ ଗୁରୁଶେଖରାଯ ॥ 326 ॥

ସଚ୍ଚିଦାନଂଦରୂପାଯ ଵ୍ଯାପିନେ ପରମାତ୍ମନେ ।
ନମଃ ଶ୍ରୀଗୁରୁନାଥାଯ ପ୍ରକାଶାନଂଦମୂର୍ତଯେ ॥ 327 ॥

ସତ୍ଯାନଂଦସ୍ଵରୂପାଯ ବୋଧୈକସୁଖକାରିଣେ ।
ନମୋ ଵେଦାଂତଵେଦ୍ଯାଯ ଗୁରଵେ ବୁଦ୍ଧିସାକ୍ଷିଣେ ॥ 328 ॥

ନମସ୍ତେ ନାଥ ଭଗଵନ୍ ଶିଵାଯ ଗୁରୁରୂପିଣେ ।
ଵିଦ୍ଯାଵତାରସଂସିଦ୍ଧ୍ଯୈ ସ୍ଵୀକୃତାନେକଵିଗ୍ରହ ॥ 329 ॥

ନଵାଯ ନଵରୂପାଯ ପରମାର୍ଥୈକରୂପିଣେ ।
ସର୍ଵାଜ୍ଞାନତମୋଭେଦଭାନଵେ ଚିଦ୍ଘନାଯ ତେ ॥ 330 ॥

ସ୍ଵତଂତ୍ରାଯ ଦଯାକ୍ଲୁପ୍ତଵିଗ୍ରହାଯ ଶିଵାତ୍ମନେ ।
ପରତଂତ୍ରାଯ ଭକ୍ତାନାଂ ଭଵ୍ଯାନାଂ ଭଵ୍ଯରୂପିଣେ ॥ 331 ॥

ଵିଵେକିନାଂ ଵିଵେକାଯ ଵିମର୍ଶାଯ ଵିମର୍ଶିନାମ୍ ।
ପ୍ରକାଶିନାଂ ପ୍ରକାଶାଯ ଜ୍ଞାନିନାଂ ଜ୍ଞାନରୂପିଣେ ॥ 332 ॥

ପୁରସ୍ତାତ୍ପାର୍ଶ୍ଵଯୋଃ ପୃଷ୍ଠେ ନମସ୍କୁର୍ଯାଦୁପର୍ଯଧଃ ।
ସଦା ମଚ୍ଚିତ୍ତରୂପେଣ ଵିଧେହି ଭଵଦାସନମ୍ ॥ 333 ॥

ଶ୍ରୀଗୁରୁଂ ପରମାନଂଦଂ ଵଂଦେ ହ୍ଯାନଂଦଵିଗ୍ରହମ୍ ।
ଯସ୍ଯ ସନ୍ନିଧିମାତ୍ରେଣ ଚିଦାନଂଦାଯ ତେ ମନଃ ॥ 334 ॥

ନମୋଽସ୍ତୁ ଗୁରଵେ ତୁଭ୍ଯଂ ସହଜାନଂଦରୂପିଣେ ।
ଯସ୍ଯ ଵାଗମୃତଂ ହଂତି ଵିଷଂ ସଂସାରସଂଜ୍ଞକମ୍ ॥ 335 ॥

ନାନାଯୁକ୍ତୋପଦେଶେନ ତାରିତା ଶିଷ୍ଯସଂତତିଃ ।
ତତ୍କୃପାସାରଵେଦେନ ଗୁରୁଚିତ୍ପଦମଚ୍ଯୁତମ୍ ॥ 336 ॥

[ପାଠଭେଦଃ
ଅଚ୍ଯୁତାଯ ନମସ୍ତୁଭ୍ଯଂ ଗୁରଵେ ପରମାତ୍ମନେ ।
ସ୍ଵାରାମୋକ୍ତପଦେଚ୍ଛୂନାଂ ଦତ୍ତଂ ଯେନାଚ୍ଯୁତଂ ପଦମ୍ ॥
]
ଅଚ୍ଯୁତାଯ ନମସ୍ତୁଭ୍ଯଂ ଗୁରଵେ ପରମାତ୍ମନେ ।
ସର୍ଵତଂତ୍ରସ୍ଵତଂତ୍ରାଯ ଚିଦ୍ଘନାନଂଦମୂର୍ତଯେ ॥ 337 ॥

ନମୋଽଚ୍ଯୁତାଯ ଗୁରଵେଽଜ୍ଞାନଧ୍ଵାଂତୈକଭାନଵେ ।
ଶିଷ୍ଯସନ୍ମାର୍ଗପଟଵେ କୃପାପୀଯୂଷସିଂଧଵେ ॥ 338 ॥

ଓମଚ୍ଯୁତାଯ ଗୁରଵେ ଶିଷ୍ଯସଂସାରସେତଵେ ।
ଭକ୍ତକାର୍ଯୈକସିଂହାଯ ନମସ୍ତେ ଚିତ୍ସୁଖାତ୍ମନେ ॥ 339 ॥

ଗୁରୁନାମସମଂ ଦୈଵଂ ନ ପିତା ନ ଚ ବାଂଧଵାଃ ।
ଗୁରୁନାମସମଃ ସ୍ଵାମୀ ନେଦୃଶଂ ପରମଂ ପଦମ୍ ॥ 340 ॥

ଏକାକ୍ଷରପ୍ରଦାତାରଂ ଯୋ ଗୁରୁଂ ନୈଵ ମନ୍ଯତେ ।
ଶ୍ଵାନଯୋନିଶତଂ ଗତ୍ଵା ଚାଂଡାଲେଷ୍ଵପି ଜାଯତେ ॥ 341 ॥

ଗୁରୁତ୍ଯାଗାଦ୍ଭଵେନ୍ମୃତ୍ଯୁଃ ମଂତ୍ରତ୍ଯାଗାଦ୍ଦରିଦ୍ରତା ।
ଗୁରୁମଂତ୍ରପରିତ୍ଯାଗୀ ରୌରଵଂ ନରକଂ ଵ୍ରଜେତ୍ ॥ 342 ॥

ଶିଵକ୍ରୋଧାଦ୍ଗୁରୁସ୍ତ୍ରାତା ଗୁରୁକ୍ରୋଧାଚ୍ଛିଵୋ ନ ହି ।
ତସ୍ମାତ୍ସର୍ଵପ୍ରଯତ୍ନେନ ଗୁରୋରାଜ୍ଞାଂ ନ ଲଂଘଯେତ୍ ॥ 343 ॥

ସଂସାରସାଗରସମୁଦ୍ଧରଣୈକମଂତ୍ରଂ
ବ୍ରହ୍ମାଦିଦେଵମୁନିପୂଜିତସିଦ୍ଧମଂତ୍ରମ୍ ।
ଦାରିଦ୍ର୍ଯଦୁଃଖଭଵରୋଗଵିନାଶମଂତ୍ରଂ
ଵଂଦେ ମହାଭଯହରଂ ଗୁରୁରାଜମଂତ୍ରମ୍ ॥ 344 ॥

ସପ୍ତକୋଟିମହାମଂତ୍ରାଶ୍ଚିତ୍ତଵିଭ୍ରମକାରକାଃ ।
ଏକ ଏଵ ମହାମଂତ୍ରୋ ଗୁରୁରିତ୍ଯକ୍ଷରଦ୍ଵଯମ୍ ॥ 345 ॥

ଏଵମୁକ୍ତ୍ଵା ମହାଦେଵଃ ପାର୍ଵତୀଂ ପୁନରବ୍ରଵୀତ୍ ।
ଇଦମେଵ ପରଂ ତତ୍ତ୍ଵଂ ଶୃଣୁ ଦେଵି ସୁଖାଵହମ୍ ॥ 346 ॥

ଗୁରୁତତ୍ତ୍ଵମିଦଂ ଦେଵି ସର୍ଵମୁକ୍ତଂ ସମାସତଃ ।
ରହସ୍ଯମିଦମଵ୍ଯକ୍ତଂ ନ ଵଦେଦ୍ଯସ୍ଯ କସ୍ଯଚିତ୍ ॥ 347 ॥

ନ ମୃଷା ସ୍ଯାଦିଯଂ ଦେଵି ମଦୁକ୍ତିଃ ସତ୍ଯରୂପିଣୀ ।
ଗୁରୁଗୀତାସମଂ ସ୍ତୋତ୍ରଂ ନାସ୍ତି ନାସ୍ତି ମହୀତଲେ ॥ 348 ॥

ଗୁରୁଗୀତାମିମାଂ ଦେଵି ଭଵଦୁଃଖଵିନାଶିନୀମ୍ ।
ଗୁରୁଦୀକ୍ଷାଵିହୀନସ୍ଯ ପୁରତୋ ନ ପଠେତ୍ କ୍ଵଚିତ୍ ॥ 349 ॥

ରହସ୍ଯମତ୍ଯଂତରହସ୍ଯମେତନ୍ନ ପାପିନା ଲଭ୍ଯମିଦଂ ମହେଶ୍ଵରି ।
ଅନେକଜନ୍ମାର୍ଜିତପୁଣ୍ଯପାକାଦ୍ଗୁରୋସ୍ତୁ ତତ୍ତ୍ଵଂ ଲଭତେ ମନୁଷ୍ଯଃ ॥ 350 ॥

ଯସ୍ଯ ପ୍ରସାଦାଦହମେଵ ସର୍ଵଂ
ମଯ୍ଯେଵ ସର୍ଵଂ ପରିକଲ୍ପିତଂ ଚ ।
ଇତ୍ଥଂ ଵିଜାନାମି ସଦାତ୍ମରୂପଂ
ତସ୍ଯାଂଘ୍ରିପଦ୍ମଂ ପ୍ରଣତୋଽସ୍ମି ନିତ୍ଯମ୍ ॥ 351 ॥

ଅଜ୍ଞାନତିମିରାଂଧସ୍ଯ ଵିଷଯାକ୍ରାଂତଚେତସଃ ।
ଜ୍ଞାନପ୍ରଭାପ୍ରଦାନେନ ପ୍ରସାଦଂ କୁରୁ ମେ ପ୍ରଭୋ ॥ 352 ॥

ଇତି ଶ୍ରୀସ୍କଂଦପୁରାଣେ ଉତ୍ତରଖଂଡେ ଉମାମହେଶ୍ଵର ସଂଵାଦେ ଶ୍ରୀ ଗୁରୁଗୀତା ସମାପ୍ତ ॥

ମଂଗଳଂ
ମଂଗଳଂ ଗୁରୁଦେଵାଯ ମହନୀଯଗୁଣାତ୍ମନେ ।
ସର୍ଵଲୋକଶରଣ୍ଯାଯ ସାଧୁରୂପାଯ ମଂଗଳମ୍ ॥