ଅଥ ଦ୍ଵିତୀଯୋଽଧ୍ଯାଯଃ ॥

ଧ୍ଯାନଂ ଶ୍ରୁଣୁ ମହାଦେଵି ସର୍ଵାନଂଦପ୍ରଦାଯକମ୍ ।
ସର୍ଵସୌଖ୍ଯକରଂ ଚୈଵ ଭୁକ୍ତିମୁକ୍ତିପ୍ରଦାଯକମ୍ ॥ 109 ॥

ଶ୍ରୀମତ୍ପରଂ ବ୍ରହ୍ମ ଗୁରୁଂ ସ୍ମରାମି
ଶ୍ରୀମତ୍ପରଂ ବ୍ରହ୍ମ ଗୁରୁଂ ଭଜାମି ।
ଶ୍ରୀମତ୍ପରଂ ବ୍ରହ୍ମ ଗୁରୁଂ ଵଦାମି
ଶ୍ରୀମତ୍ପରଂ ବ୍ରହ୍ମ ଗୁରୁଂ ନମାମି ॥ 110 ॥

ବ୍ରହ୍ମାନଂଦଂ ପରମସୁଖଦଂ କେଵଲଂ ଜ୍ଞାନମୂର୍ତିଂ
ଦ୍ଵଂଦ୍ଵାତୀତଂ ଗଗନସଦୃଶଂ ତତ୍ତ୍ଵମସ୍ଯାଦିଲକ୍ଷ୍ଯମ୍ ।
ଏକଂ ନିତ୍ଯଂ ଵିମଲମଚଲଂ ସର୍ଵଧୀସାକ୍ଷିଭୂତଂ
ଭାଵାତୀତଂ ତ୍ରିଗୁଣରହିତଂ ସଦ୍ଗୁରୁଂ ତଂ ନମାମି ॥ 111 ॥

ହୃଦଂବୁଜେ କର୍ଣିକମଧ୍ଯସଂସ୍ଥେ
ସିଂହାସନେ ସଂସ୍ଥିତଦିଵ୍ଯମୂର୍ତିମ୍ ।
ଧ୍ଯାଯେଦ୍ଗୁରୁଂ ଚଂଦ୍ରକଲାପ୍ରକାଶଂ
ସଚ୍ଚିତ୍ସୁଖାଭୀଷ୍ଟଵରଂ ଦଧାନମ୍ ॥ 112 ॥

ଶ୍ଵେତାଂବରଂ ଶ୍ଵେତଵିଲେପପୁଷ୍ପଂ
ମୁକ୍ତାଵିଭୂଷଂ ମୁଦିତଂ ଦ୍ଵିନେତ୍ରମ୍ ।
ଵାମାଂକପୀଠସ୍ଥିତଦିଵ୍ଯଶକ୍ତିଂ
ମଂଦସ୍ମିତଂ ପୂର୍ଣକୃପାନିଧାନମ୍ ॥ 113 ॥

ଆନଂଦମାନଂଦକରଂ ପ୍ରସନ୍ନଂ
ଜ୍ଞାନସ୍ଵରୂପଂ ନିଜଭାଵଯୁକ୍ତମ୍ ।
ଯୋଗୀଂଦ୍ରମୀଡ୍ଯଂ ଭଵରୋଗଵୈଦ୍ଯଂ
ଶ୍ରୀମଦ୍ଗୁରୁଂ ନିତ୍ଯମହଂ ନମାମି ॥ 114 ॥

ଵଂଦେ ଗୁରୂଣାଂ ଚରଣାରଵିଂଦଂ
ସଂଦର୍ଶିତସ୍ଵାତ୍ମସୁଖାଵବୋଧେ ।
ଜନସ୍ଯ ଯେ ଜାଂଗଲିକାଯମାନେ
ସଂସାରହାଲାହଲମୋହଶାଂତ୍ଯୈ ॥ 115 ॥

ଯସ୍ମିନ୍ ସୃଷ୍ଟିସ୍ଥିତିଧ୍ଵଂସନିଗ୍ରହାନୁଗ୍ରହାତ୍ମକଂ ।
କୃତ୍ଯଂ ପଂଚଵିଧଂ ଶଶ୍ଵତ୍ ଭାସତେ ତଂ ଗୁରୁଂ ଭଜେତ୍ ॥ 116 ॥

ପାଦାବ୍ଜେ ସର୍ଵସଂସାରଦାଵକାଲାନଲଂ ସ୍ଵକେ ।
ବ୍ରହ୍ମରଂଧ୍ରେ ସ୍ଥିତାଂଭୋଜମଧ୍ଯସ୍ଥଂ ଚଂଦ୍ରମଂଡଲମ୍ ॥ 117 ॥

ଅକଥାଦିତ୍ରିରେଖାବ୍ଜେ ସହସ୍ରଦଳମଂଡଲେ ।
ହଂସପାର୍ଶ୍ଵତ୍ରିକୋଣେ ଚ ସ୍ମରେତ୍ତନ୍ମଧ୍ଯଗଂ ଗୁରୁମ୍ ॥ 118 ॥

ନିତ୍ଯଂ ଶୁଦ୍ଧଂ ନିରାଭାସଂ ନିରାକାରଂ ନିରଂଜନମ୍ ।
ନିତ୍ଯବୋଧଂ ଚିଦାନଂଦଂ ଗୁରୁଂ ବ୍ରହ୍ମ ନମାମ୍ଯହମ୍ ॥ 119 ॥

ସକଲଭୁଵନସୃଷ୍ଟିଃ କଲ୍ପିତାଶେଷସୃଷ୍ଟିଃ
ନିଖିଲନିଗମଦୃଷ୍ଟିଃ ସତ୍ପଦାର୍ଥୈକସୃଷ୍ଟିଃ ।
ଅତଦ୍ଗଣପରମେଷ୍ଟିଃ ସତ୍ପଦାର୍ଥୈକଦୃଷ୍ଟିଃ
ଭଵଗୁଣପରମେଷ୍ଟିର୍ମୋକ୍ଷମାର୍ଗୈକଦୃଷ୍ଟିଃ ॥ 120 ॥

ସକଲଭୁଵନରଂଗସ୍ଥାପନାସ୍ତଂଭଯଷ୍ଟିଃ
ସକରୁଣରସଵୃଷ୍ଟିସ୍ତତ୍ତ୍ଵମାଲାସମଷ୍ଟିଃ ।
ସକଲସମଯସୃଷ୍ଟିସ୍ସଚ୍ଚିଦାନଂଦଦୃଷ୍ଟିଃ
ନିଵସତୁ ମଯି ନିତ୍ଯଂ ଶ୍ରୀଗୁରୋର୍ଦିଵ୍ଯଦୃଷ୍ଟିଃ ॥ 121 ॥

ନ ଗୁରୋରଧିକଂ ନ ଗୁରୋରଧିକଂ
ନ ଗୁରୋରଧିକଂ ନ ଗୁରୋରଧିକମ୍ ।
ଶିଵଶାସନତଃ ଶିଵଶାସନତଃ
ଶିଵଶାସନତଃ ଶିଵଶାସନତଃ ॥ 122 ॥

ଇଦମେଵ ଶିଵଂ ଇଦମେଵ ଶିଵଂ
ଇଦମେଵ ଶିଵଂ ଇଦମେଵ ଶିଵମ୍ ।
ହରିଶାସନତୋ ହରିଶାସନତୋ
ହରିଶାସନତୋ ହରିଶାସନତଃ ॥ 123 ॥

ଵିଦିତଂ ଵିଦିତଂ ଵିଦିତଂ ଵିଦିତଂ
ଵିଜନଂ ଵିଜନଂ ଵିଜନଂ ଵିଜନମ୍ ।
ଵିଧିଶାସନତୋ ଵିଧିଶାସନତୋ
ଵିଧିଶାସନତୋ ଵିଧିଶାସନତଃ ॥ 124 ॥

ଏଵଂଵିଧଂ ଗୁରୁଂ ଧ୍ଯାତ୍ଵା ଜ୍ଞାନମୁତ୍ପଦ୍ଯତେ ସ୍ଵଯମ୍ ।
ତଦା ଗୁରୂପଦେଶେନ ମୁକ୍ତୋଽହମିତି ଭାଵଯେତ୍ ॥ 125 ॥

ଗୁରୂପଦିଷ୍ଟମାର୍ଗେଣ ମନଶ୍ଶୁଦ୍ଧିଂ ତୁ କାରଯେତ୍ ।
ଅନିତ୍ଯଂ ଖଂଡଯେତ୍ସର୍ଵଂ ଯତ୍କିଂଚିଦାତ୍ମଗୋଚରମ୍ ॥ 126 ॥

ଜ୍ଞେଯଂ ସର୍ଵଂ ପ୍ରତୀତଂ ଚ ଜ୍ଞାନଂ ଚ ମନ ଉଚ୍ଯତେ ।
ଜ୍ଞାନଂ ଜ୍ଞେଯଂ ସମଂ କୁର୍ଯାନ୍ନାନ୍ଯଃ ପଂଥା ଦ୍ଵିତୀଯକଃ ॥ 127 ॥

କିମତ୍ର ବହୁନୋକ୍ତେନ ଶାସ୍ତ୍ରକୋଟିଶତୈରପି ।
ଦୁର୍ଲଭା ଚିତ୍ତଵିଶ୍ରାଂତିଃ ଵିନା ଗୁରୁକୃପାଂ ପରାମ୍ ॥ 128 ॥

କରୁଣାଖଡ୍ଗପାତେନ ଛିତ୍ଵା ପାଶାଷ୍ଟକଂ ଶିଶୋଃ ।
ସମ୍ଯଗାନଂଦଜନକଃ ସଦ୍ଗୁରୁଃ ସୋଽଭିଧୀଯତେ ॥ 129 ॥

ଏଵଂ ଶ୍ରୁତ୍ଵା ମହାଦେଵି ଗୁରୁନିଂଦାଂ କରୋତି ଯଃ ।
ସ ଯାତି ନରକାନ୍ ଘୋରାନ୍ ଯାଵଚ୍ଚଂଦ୍ରଦିଵାକରୌ ॥ 130 ॥

ଯାଵତ୍କଲ୍ପାଂତକୋ ଦେହସ୍ତାଵଦ୍ଦେଵି ଗୁରୁଂ ସ୍ମରେତ୍ ।
ଗୁରୁଲୋପୋ ନ କର୍ତଵ୍ଯଃ ସ୍ଵଚ୍ଛଂଦୋ ଯଦି ଵା ଭଵେତ୍ ॥ 131 ॥

ହୁଂକାରେଣ ନ ଵକ୍ତଵ୍ଯଂ ପ୍ରାଜ୍ଞଶିଷ୍ଯୈଃ କଦାଚନ ।
ଗୁରୋରଗ୍ର ନ ଵକ୍ତଵ୍ଯମସତ୍ଯଂ ତୁ କଦାଚନ ॥ 132 ॥

ଗୁରୁଂ ତ୍ଵଂକୃତ୍ଯ ହୁଂକୃତ୍ଯ ଗୁରୁସାନ୍ନିଧ୍ଯଭାଷଣଃ ।
ଅରଣ୍ଯେ ନିର୍ଜଲେ ଦେଶେ ସଂଭଵେଦ୍ ବ୍ରହ୍ମରାକ୍ଷସଃ ॥ 133 ॥

ଅଦ୍ଵୈତଂ ଭାଵଯେନ୍ନିତ୍ଯଂ ସର୍ଵାଵସ୍ଥାସୁ ସର୍ଵଦା ।
କଦାଚିଦପି ନୋ କୁର୍ଯାଦଦ୍ଵୈତଂ ଗୁରୁସନ୍ନିଧୌ ॥ 134 ॥

ଦୃଶ୍ଯଵିସ୍ମୃତିପର୍ଯଂତଂ କୁର୍ଯାଦ୍ ଗୁରୁପଦାର୍ଚନମ୍ ।
ତାଦୃଶସ୍ଯୈଵ କୈଵଲ୍ଯଂ ନ ଚ ତଦ୍ଵ୍ଯତିରେକିଣଃ ॥ 135 ॥

ଅପି ସଂପୂର୍ଣତତ୍ତ୍ଵଜ୍ଞୋ ଗୁରୁତ୍ଯାଗୀ ଭଵେଦ୍ଯଦା ।
ଭଵତ୍ଯେଵ ହି ତସ୍ଯାଂତକାଲେ ଵିକ୍ଷେପମୁତ୍କଟମ୍ ॥ 136 ॥

ଗୁରୁକାର୍ଯଂ ନ ଲଂଘେତ ନାପୃଷ୍ଟ୍ଵା କାର୍ଯମାଚରେତ୍ ।
ନ ହ୍ଯୁତ୍ତିଷ୍ଠେଦ୍ଦିଶେଽନତ୍ଵା ଗୁରୁସଦ୍ଭାଵଶୋଭିତଃ ॥ 137 ॥

ଗୁରୌ ସତି ସ୍ଵଯଂ ଦେଵି ପରେଷାଂ ତୁ କଦାଚନ ।
ଉପଦେଶଂ ନ ଵୈ କୁର୍ଯାତ୍ ତଥା ଚେଦ୍ରାକ୍ଷସୋ ଭଵେତ୍ ॥ 138 ॥

ନ ଗୁରୋରାଶ୍ରମେ କୁର୍ଯାତ୍ ଦୁଷ୍ପାନଂ ପରିସର୍ପଣମ୍ ।
ଦୀକ୍ଷା ଵ୍ଯାଖ୍ଯା ପ୍ରଭୁତ୍ଵାଦି ଗୁରୋରାଜ୍ଞାଂ ନ କାରଯେତ୍ ॥ 139 ॥

ନୋପାଶ୍ରଯଂ ଚ ପର୍ଯକଂ ନ ଚ ପାଦପ୍ରସାରଣମ୍ ।
ନାଂଗଭୋଗାଦିକଂ କୁର୍ଯାନ୍ନ ଲୀଲାମପରାମପି ॥ 140 ॥

ଗୁରୂଣାଂ ସଦସଦ୍ଵାଽପି ଯଦୁକ୍ତଂ ତନ୍ନ ଲଂଘଯେତ୍ ।
କୁର୍ଵନ୍ନାଜ୍ଞାଂ ଦିଵା ରାତ୍ରୌ ଦାସଵନ୍ନିଵସେଦ୍ଗୁରୋ ॥ 141 ॥

ଅଦତ୍ତଂ ନ ଗୁରୋର୍ଦ୍ରଵ୍ଯମୁପଭୁଂଜୀତ କର୍ହିଚିତ୍ ।
ଦତ୍ତେ ଚ ରଂକଵଦ୍ଗ୍ରାହ୍ଯଂ ପ୍ରାଣୋଽପ୍ଯେତେନ ଲଭ୍ଯତେ ॥ 142 ॥

ପାଦୁକାସନଶଯ୍ଯାଦି ଗୁରୁଣା ଯଦଭୀଷ୍ଟିତମ୍ ।
ନମସ୍କୁର୍ଵୀତ ତତ୍ସର୍ଵଂ ପାଦାଭ୍ଯାଂ ନ ସ୍ପୃଶେତ୍ କ୍ଵଚିତ୍ ॥ 143 ॥

ଗଚ୍ଛତଃ ପୃଷ୍ଠତୋ ଗଚ୍ଛେତ୍ ଗୁରୁଚ୍ଛାଯାଂ ନ ଲଂଘଯେତ୍ ।
ନୋଲ୍ବଣଂ ଧାରଯେଦ୍ଵେଷଂ ନାଲଂକାରାଂସ୍ତତୋଲ୍ବଣାନ୍ ॥ 144 ॥

ଗୁରୁନିଂଦାକରଂ ଦୃଷ୍ଟ୍ଵା ଧାଵଯେଦଥ ଵାସଯେତ୍ ।
ସ୍ଥାନଂ ଵା ତତ୍ପରିତ୍ଯାଜ୍ଯଂ ଜିହ୍ଵାଚ୍ଛେଦାକ୍ଷମୋ ଯଦି ॥ 145 ॥

ନୋଚ୍ଛିଷ୍ଟଂ କସ୍ଯଚିଦ୍ଦେଯଂ ଗୁରୋରାଜ୍ଞାଂ ନ ଚ ତ୍ଯଜେତ୍ ।
କୃତ୍ସ୍ନମୁଚ୍ଛିଷ୍ଟମାଦାଯ ହଵିରିଵ ଭକ୍ଷଯେତ୍ସ୍ଵଯମ୍ ॥ 146 ॥

ନାଽନୃତଂ ନାଽପ୍ରିଯଂ ଚୈଵ ନ ଗର୍ଵଂ ନାଽପି ଵା ବହୁ ।
ନ ନିଯୋଗପରଂ ବ୍ରୂଯାତ୍ ଗୁରୋରାଜ୍ଞାଂ ଵିଭାଵଯେତ୍ ॥ 147 ॥

ପ୍ରଭୋ ଦେଵକୁଲେଶାନାଂ ସ୍ଵାମିନ୍ ରାଜନ୍ କୁଲେଶ୍ଵର ।
ଇତି ସଂବୋଧନୈର୍ଭୀତୋ ଗୁରୁଭାଵେନ ସର୍ଵଦା ॥ 148 ॥

ମୁନିଭିଃ ପନ୍ନଗୈର୍ଵାପି ସୁରୈର୍ଵା ଶାପିତୋ ଯଦି ।
କାଲମୃତ୍ଯୁଭଯାଦ୍ଵାପି ଗୁରୁଃ ସଂତ୍ରାତି ପାର୍ଵତି ॥ 149 ॥

ଅଶକ୍ତା ହି ସୁରାଦ୍ଯାଶ୍ଚ ହ୍ଯଶକ୍ତାଃ ମୁନଯସ୍ତଥା ।
ଗୁରୁଶାପୋପପନ୍ନସ୍ଯ ରକ୍ଷଣାଯ ଚ କୁତ୍ରଚିତ୍ ॥ 150 ॥

ମଂତ୍ରରାଜମିଦଂ ଦେଵି ଗୁରୁରିତ୍ଯକ୍ଷରଦ୍ଵଯମ୍ ।
ସ୍ମୃତିଵେଦପୁରାଣାନାଂ ସାରମେଵ ନ ସଂଶଯଃ ॥ 151 ॥

ସତ୍କାରମାନପୂଜାର୍ଥଂ ଦଂଡକାଷଯଧାରଣଃ ।
ସ ସନ୍ନ୍ଯାସୀ ନ ଵକ୍ତଵ୍ଯଃ ସନ୍ନ୍ଯାସୀ ଜ୍ଞାନତତ୍ପରଃ ॥ 152 ॥

ଵିଜାନଂତି ମହାଵାକ୍ଯଂ ଗୁରୋଶ୍ଚରଣ ସେଵଯା ।
ତେ ଵୈ ସନ୍ନ୍ଯାସିନଃ ପ୍ରୋକ୍ତା ଇତରେ ଵେଷଧାରିଣଃ ॥ 153 ॥

[ ପାଠଭେଦଃ –
ନିତ୍ଯଂ ବ୍ରହ୍ମ ନିରାକାରଂ ନିର୍ଗୁଣଂ ବୋଧଯେତ୍ପରମ୍ ।
ଭାସଯନ୍ ବ୍ରହ୍ମଭାଵଂ ଚ ଦୀପୋ ଦୀପାଂତରଂ ଯଥା ॥
]
ନିତ୍ଯଂ ବ୍ରହ୍ମ ନିରାକାରଂ ନିର୍ଗୁଣଂ ସତ୍ଯଚିଦ୍ଧନମ୍ ।
ଯଃ ସାକ୍ଷାତ୍କୁରୁତେ ଲୋକେ ଗୁରୁତ୍ଵଂ ତସ୍ଯ ଶୋଭତେ ॥ 154 ॥

ଗୁରୁପ୍ରସାଦତଃ ସ୍ଵାତ୍ମନ୍ଯାତ୍ମାରାମନିରୀକ୍ଷଣାତ୍ ।
ସମତା ମୁକ୍ତିମାର୍ଗେଣ ସ୍ଵାତ୍ମଜ୍ଞାନଂ ପ୍ରଵର୍ତତେ ॥ 155 ॥

ଆବ୍ରହ୍ମସ୍ତଂବପର୍ଯଂତଂ ପରମାତ୍ମସ୍ଵରୂପକମ୍ ।
ସ୍ଥାଵରଂ ଜଂଗମଂ ଚୈଵ ପ୍ରଣମାମି ଜଗନ୍ମଯମ୍ ॥ 156 ॥

ଵଂଦେଽହଂ ସଚ୍ଚିଦାନଂଦଂ ଭାଵାତୀତଂ ଜଗଦ୍ଗୁରୁମ୍ ।
ନିତ୍ଯଂ ପୂର୍ଣଂ ନିରାକାରଂ ନିର୍ଗୁଣଂ ସ୍ଵାତ୍ମସଂସ୍ଥିତମ୍ ॥ 157 ॥

ପରାତ୍ପରତରଂ ଧ୍ଯାଯେନ୍ନିତ୍ଯମାନଂଦକାରକମ୍ ।
ହୃଦଯାକାଶମଧ୍ଯସ୍ଥଂ ଶୁଦ୍ଧସ୍ଫଟିକସନ୍ନିଭମ୍ ॥ 158 ॥

ସ୍ଫାଟିକେ ସ୍ଫାଟିକଂ ରୂପଂ ଦର୍ପଣେ ଦର୍ପଣୋ ଯଥା ।
ତଥାଽଽତ୍ମନି ଚିଦାକାରମାନଂଦଂ ସୋଽହମିତ୍ଯୁତ ॥ 159 ॥

ଅଂଗୁଷ୍ଠମାତ୍ରଂ ପୁରୁଷଂ ଧ୍ଯାଯେଚ୍ଚ ଚିନ୍ମଯଂ ହୃଦି ।
ତତ୍ର ସ୍ଫୁରତି ଯୋ ଭାଵଃ ଶୃଣୁ ତତ୍କଥଯାମି ତେ ॥ 160 ॥

ଅଜୋଽହମମରୋଽହଂ ଚ ଅନାଦିନିଧନୋ ହ୍ଯହମ୍ ।
ଅଵିକାରଶ୍ଚିଦାନଂଦୋ ହ୍ଯଣୀଯାନ୍ମହତୋ ମହାନ୍ ॥ 161 ॥

ଅପୂର୍ଵମପରଂ ନିତ୍ଯଂ ସ୍ଵଯଂଜ୍ଯୋତିର୍ନିରାମଯମ୍ ।
ଵିରଜଂ ପରମାକାଶଂ ଧ୍ରୁଵମାନଂଦମଵ୍ଯଯମ୍ ॥ 162 ॥

ଅଗୋଚରଂ ତଥାଽଗମ୍ଯଂ ନାମରୂପଵିଵର୍ଜିତମ୍ ।
ନିଶ୍ଶବ୍ଦଂ ତୁ ଵିଜାନୀଯାତ୍ସ୍ଵଭାଵାଦ୍ବ୍ରହ୍ମ ପାର୍ଵତି ॥ 163 ॥

ଯଥା ଗଂଧସ୍ଵଭାଵତ୍ଵଂ କର୍ପୂରକୁସୁମାଦିଷୁ ।
ଶୀତୋଷ୍ଣତ୍ଵସ୍ଵଭାଵତ୍ଵଂ ତଥା ବ୍ରହ୍ମଣି ଶାଶ୍ଵତମ୍ ॥ 164 ॥

ଯଥା ନିଜସ୍ଵଭାଵେନ କୁଂଡଲେ କଟକାଦଯଃ ।
ସୁଵର୍ଣତ୍ଵେନ ତିଷ୍ଠଂତି ତଥାଽହଂ ବ୍ରହ୍ମ ଶାଶ୍ଵତମ୍ ॥ 165 ॥

ସ୍ଵଯଂ ତଥାଵିଧୋ ଭୂତ୍ଵା ସ୍ଥାତଵ୍ଯଂ ଯତ୍ର କୁତ୍ର ଚିତ୍ ।
କୀଟୋ ଭୃଂଗ ଇଵ ଧ୍ଯାନାଦ୍ଯଥା ଭଵତି ତାଦୃଶଃ ॥ 166 ॥

ଗୁରୁଧ୍ଯାନଂ ତଥା କୃତ୍ଵା ସ୍ଵଯଂ ବ୍ରହ୍ମମଯୋ ଭଵେତ୍ ।
ପିଂଡେ ପଦେ ତଥା ରୂପେ ମୁକ୍ତାସ୍ତେ ନାତ୍ର ସଂଶଯଃ ॥ 167 ॥

ଶ୍ରୀପାର୍ଵତୀ ଉଵାଚ ।
ପିଂଡଂ କିଂ ତୁ ମହାଦେଵ ପଦଂ କିଂ ସମୁଦାହୃତମ୍ ।
ରୂପାତୀତଂ ଚ ରୂପଂ କିଂ ଏତଦାଖ୍ଯାହି ଶଂକର ॥ 168 ॥

ଶ୍ରୀମହାଦେଵ ଉଵାଚ ।
ପିଂଡଂ କୁଂଡଲିନୀ ଶକ୍ତିଃ ପଦଂ ହଂସମୁଦାହୃତମ୍ ।
ରୂପଂ ବିଂଦୁରିତି ଜ୍ଞେଯଂ ରୂପାତୀତଂ ନିରଂଜନମ୍ ॥ 169 ॥

ପିଂଡେ ମୁକ୍ତାଃ ପଦେ ମୁକ୍ତା ରୂପେ ମୁକ୍ତା ଵରାନନେ ।
ରୂପାତୀତେ ତୁ ଯେ ମୁକ୍ତାସ୍ତେ ମୁକ୍ତା ନାଽତ୍ର ସଂଶଯଃ ॥ 170 ॥

ଗୁରୁର୍ଧ୍ଯାନେନୈଵ ନିତ୍ଯଂ ଦେହୀ ବ୍ରହ୍ମମଯୋ ଭଵେତ୍ ।
ସ୍ଥିତଶ୍ଚ ଯତ୍ର କୁତ୍ରାଽପି ମୁକ୍ତୋଽସୌ ନାଽତ୍ର ସଂଶଯଃ ॥ 171 ॥

ଜ୍ଞାନଂ ଵୈରାଗ୍ଯମୈଶ୍ଵର୍ଯଂ ଯଶଶ୍ରୀଃ ସ୍ଵମୁଦାହୃତମ୍ ।
ଷଡ୍ଗୁଣୈଶ୍ଵର୍ଯଯୁକ୍ତୋ ହି ଭଗଵାନ୍ ଶ୍ରୀଗୁରୁଃ ପ୍ରିଯେ ॥ 172 ॥

ଗୁରୁଶ୍ଶିଵୋ ଗୁରୁର୍ଦେଵୋ ଗୁରୁର୍ବଂଧୁଃ ଶରୀରିଣାମ୍ ।
ଗୁରୁରାତ୍ମା ଗୁରୁର୍ଜୀଵୋ ଗୁରୋରନ୍ଯନ୍ନ ଵିଦ୍ଯତେ ॥ 173 ॥

ଏକାକୀ ନିସ୍ସ୍ପୃହଃ ଶାଂତଶ୍ଚିଂତାଽସୂଯାଦିଵର୍ଜିତଃ ।
ବାଲ୍ଯଭାଵେନ ଯୋ ଭାତି ବ୍ରହ୍ମଜ୍ଞାନୀ ସ ଉଚ୍ଯତେ ॥ 174 ॥

ନ ସୁଖଂ ଵେଦଶାସ୍ତ୍ରେଷୁ ନ ସୁଖଂ ମଂତ୍ରଯଂତ୍ରକେ ।
ଗୁରୋଃ ପ୍ରସାଦାଦନ୍ଯତ୍ର ସୁଖଂ ନାସ୍ତି ମହୀତଲେ ॥ 175 ॥

ଚାର୍ଵାକଵୈଷ୍ଣଵମତେ ସୁଖଂ ପ୍ରାଭାକରେ ନ ହି ।
ଗୁରୋଃ ପାଦାଂତିକେ ଯଦ୍ଵତ୍ସୁଖଂ ଵେଦାଂତସମ୍ମତମ୍ ॥ 176 ॥

ନ ତତ୍ସୁଖଂ ସୁରେଂଦ୍ରସ୍ଯ ନ ସୁଖଂ ଚକ୍ରଵର୍ତିନାମ୍ ।
ଯତ୍ସୁଖଂ ଵୀତରାଗସ୍ଯ ମୁନେରେକାଂତଵାସିନଃ ॥ 177 ॥

ନିତ୍ଯଂ ବ୍ରହ୍ମରସଂ ପୀତ୍ଵା ତୃପ୍ତୋ ଯଃ ପରମାତ୍ମନି ।
ଇଂଦ୍ରଂ ଚ ମନ୍ଯତେ ତୁଚ୍ଛଂ ନୃପାଣାଂ ତତ୍ର କା କଥା ॥ 178 ॥

ଯତଃ ପରମକୈଵଲ୍ଯଂ ଗୁରୁମାର୍ଗେଣ ଵୈ ଭଵେତ୍ ।
ଗୁରୁଭକ୍ତିରତଃ କାର୍ଯା ସର୍ଵଦା ମୋକ୍ଷକାଂକ୍ଷିଭିଃ ॥ 179 ॥

ଏକ ଏଵାଽଦ୍ଵିତୀଯୋଽହଂ ଗୁରୁଵାକ୍ଯେନ ନିଶ୍ଚିତଃ ।
ଏଵମଭ୍ଯସ୍ଯତା ନିତ୍ଯଂ ନ ସେଵ୍ଯଂ ଵୈ ଵନାଂତରମ୍ ॥ 180 ॥

ଅଭ୍ଯାସାନ୍ନିମିଷେଣୈଵ ସମାଧିମଧିଗଚ୍ଛତି ।
ଆଜନ୍ମଜନିତଂ ପାପଂ ତତ୍^କ୍ଷଣାଦେଵ ନଶ୍ଯତି ॥ 181 ॥

କିମାଵାହନମଵ୍ଯକ୍ତେ ଵ୍ଯାପକେ କିଂ ଵିସର୍ଜନମ୍ ।
ଅମୂର୍ତେ ଚ କଥଂ ପୂଜା କଥଂ ଧ୍ଯାନଂ ନିରାମଯେ ॥ 182 ॥

ଗୁରୁର୍ଵିଷ୍ଣୁଃ ସତ୍ତ୍ଵମଯୋ ରାଜସଶ୍ଚତୁରାନନଃ ।
ତାମସୋ ରୁଦ୍ରରୂପେଣ ସୃଜତ୍ଯଵତି ହଂତି ଚ ॥ 183 ॥

ସ୍ଵଯଂ ବ୍ରହ୍ମମଯୋ ଭୂତ୍ଵା ତତ୍ପରଂ ଚାଵଲୋକଯେତ୍ ।
ପରାତ୍ପରତରଂ ନାନ୍ଯତ୍ ସର୍ଵଗଂ ତନ୍ନିରାମଯମ୍ ॥ 184 ॥

ତସ୍ଯାଵଲୋକନଂ ପ୍ରାପ୍ଯ ସର୍ଵସଂଗଵିଵର୍ଜିତଃ ।
ଏକାକୀ ନିସ୍ସ୍ପୃହଃ ଶାଂତଃ ସ୍ଥାତଵ୍ଯଂ ତତ୍ପ୍ରସାଦତଃ ॥ 185 ॥

ଲବ୍ଧଂ ଵାଽଥ ନ ଲବ୍ଧଂ ଵା ସ୍ଵଲ୍ପଂ ଵା ବହୁଳଂ ତଥା ।
ନିଷ୍କାମେନୈଵ ଭୋକ୍ତଵ୍ଯଂ ସଦା ସଂତୁଷ୍ଟମାନସଃ ॥ 186 ॥

ସର୍ଵଜ୍ଞପଦମିତ୍ଯାହୁର୍ଦେହୀ ସର୍ଵମଯୋ ଭୁଵି ।
ସଦାଽଽନଂଦଃ ସଦା ଶାଂତୋ ରମତେ ଯତ୍ର କୁତ୍ର ଚିତ୍ ॥ 187 ॥

ଯତ୍ରୈଵ ତିଷ୍ଠତେ ସୋଽପି ସ ଦେଶଃ ପୁଣ୍ଯଭାଜନଃ ।
ମୁକ୍ତସ୍ଯ ଲକ୍ଷଣଂ ଦେଵି ତଵାଽଗ୍ରେ କଥିତଂ ମଯା ॥ 188 ॥

ଉପଦେଶସ୍ତ୍ଵଯଂ ଦେଵି ଗୁରୁମାର୍ଗେଣ ମୁକ୍ତିଦଃ ।
ଗୁରୁଭକ୍ତିଃ ତଥାଽତ୍ଯଂତା କର୍ତଵ୍ଯା ଵୈ ମନୀଷିଭିଃ ॥ 189 ॥

ନିତ୍ଯଯୁକ୍ତାଶ୍ରଯଃ ସର୍ଵଵେଦକୃତ୍ସର୍ଵଵେଦକୃତ୍ ।
ସ୍ଵପରଜ୍ଞାନଦାତା ଚ ତଂ ଵଂଦେ ଗୁରୁମୀଶ୍ଵରମ୍ ॥ 190 ॥

ଯଦ୍ଯପ୍ଯଧୀତା ନିଗମାଃ ଷଡଂଗା ଆଗମାଃ ପ୍ରିଯେ ।
ଅଧ୍ଯାତ୍ମାଦୀନି ଶାସ୍ତ୍ରାଣି ଜ୍ଞାନଂ ନାସ୍ତି ଗୁରୁଂ ଵିନା ॥ 191 ॥

ଶିଵପୂଜାରତୋ ଵାଽପି ଵିଷ୍ଣୁପୂଜାରତୋଽଥଵା ।
ଗୁରୁତତ୍ତ୍ଵଵିହୀନଶ୍ଚେତ୍ତତ୍ସର୍ଵଂ ଵ୍ଯର୍ଥମେଵ ହି ॥ 192 ॥

ଶିଵସ୍ଵରୂପମଜ୍ଞାତ୍ଵା ଶିଵପୂଜା କୃତା ଯଦି ।
ସା ପୂଜା ନାମମାତ୍ରଂ ସ୍ଯାଚ୍ଚିତ୍ରଦୀପ ଇଵ ପ୍ରିଯେ ॥ 193 ॥

ସର୍ଵଂ ସ୍ଯାତ୍ସଫଲଂ କର୍ମ ଗୁରୁଦୀକ୍ଷାପ୍ରଭାଵତଃ ।
ଗୁରୁଲାଭାତ୍ସର୍ଵଲାଭୋ ଗୁରୁହୀନସ୍ତୁ ବାଲିଶଃ ॥ 194 ॥

ଗୁରୁହୀନଃ ପଶୁଃ କୀଟଃ ପତଂଗୋ ଵକ୍ତୁମର୍ହତି ।
ଶିଵରୂପଂ ସ୍ଵରୂପଂ ଚ ନ ଜାନାତି ଯତସ୍ସ୍ଵଯମ୍ ॥ 195 ॥

ତସ୍ମାତ୍ସର୍ଵପ୍ରଯତ୍ନେନ ସର୍ଵସଂଗଵିଵର୍ଜିତଃ ।
ଵିହାଯ ଶାସ୍ତ୍ରଜାଲାନି ଗୁରୁମେଵ ସମାଶ୍ରଯେତ୍ ॥ 196 ॥

ନିରସ୍ତସର୍ଵସଂଦେହୋ ଏକୀକୃତ୍ଯ ସୁଦର୍ଶନମ୍ ।
ରହସ୍ଯଂ ଯୋ ଦର୍ଶଯତି ଭଜାମି ଗୁରୁମୀଶ୍ଵରମ୍ ॥ 197 ॥

ଜ୍ଞାନହୀନୋ ଗୁରୁସ୍ତ୍ଯାଜ୍ଯୋ ମିଥ୍ଯାଵାଦୀ ଵିଡଂବକଃ ।
ସ୍ଵଵିଶ୍ରାଂତିଂ ନ ଜାନାତି ପରଶାଂତିଂ କରୋତି କିମ୍ ॥ 198 ॥

ଶିଲାଯାଃ କିଂ ପରଂ ଜ୍ଞାନଂ ଶିଲାସଂଘପ୍ରତାରଣେ ।
ସ୍ଵଯଂ ତର୍ତୁଂ ନ ଜାନାତି ପରଂ ନିସ୍ତାରଯେତ୍ କଥମ୍ ॥ 199 ॥

ନ ଵଂଦନୀଯାସ୍ତେ କଷ୍ଟଂ ଦର୍ଶନାଦ୍ଭ୍ରାଂତିକାରକାଃ ।
ଵର୍ଜଯେତ୍ତାନ୍ ଗୁରୂନ୍ ଦୂରେ ଧୀରସ୍ଯ ତୁ ସମାଶ୍ରଯେତ୍ ॥ 200 ॥

ପାଷଂଡିନଃ ପାପରତାଃ ନାସ୍ତିକା ଭେଦବୁଦ୍ଧଯଃ ।
ସ୍ତ୍ରୀଲଂପଟା ଦୁରାଚାରାଃ କୃତଘ୍ନା ବକଵୃତ୍ତଯଃ ॥ 201 ॥

କର୍ମଭ୍ରଷ୍ଟାଃ କ୍ଷମାନଷ୍ଟା ନିଂଦ୍ଯତର୍କୈଶ୍ଚ ଵାଦିନଃ ।
କାମିନଃ କ୍ରୋଧିନଶ୍ଚୈଵ ହିଂସ୍ରାଶ୍ଚଂଡାଃ ଶଠାସ୍ତଥା ॥ 202 ॥

ଜ୍ଞାନଲୁପ୍ତା ନ କର୍ତଵ୍ଯା ମହାପାପାସ୍ତଥା ପ୍ରିଯେ ।
ଏଭ୍ଯୋ ଭିନ୍ନୋ ଗୁରୁଃ ସେଵ୍ଯଃ ଏକଭକ୍ତ୍ଯା ଵିଚାର୍ଯ ଚ ॥ 203 ॥

ଶିଷ୍ଯାଦନ୍ଯତ୍ର ଦେଵେଶି ନ ଵଦେଦ୍ଯସ୍ଯ କସ୍ଯଚିତ୍ ।
ନରାଣାଂ ଚ ଫଲପ୍ରାପ୍ତୌ ଭକ୍ତିରେଵ ହି କାରଣମ୍ ॥ 204 ॥

ଗୂଢୋ ଦୃଢଶ୍ଚ ପ୍ରୀତଶ୍ଚ ମୌନେନ ସୁସମାହିତଃ ।
ସକୃତ୍କାମଗତୋ ଵାଽପି ପଂଚଧା ଗୁରୁରୀରିତଃ ॥ 205 ॥

ସର୍ଵଂ ଗୁରୁମୁଖାଲ୍ଲବ୍ଧଂ ସଫଲଂ ପାପନାଶନମ୍ ।
ଯଦ୍ଯଦାତ୍ମହିତଂ ଵସ୍ତୁ ତତ୍ତଦ୍ଦ୍ରଵ୍ଯଂ ନ ଵଂଚଯେତ୍ ॥ 206 ॥

ଗୁରୁଦେଵାର୍ପଣଂ ଵସ୍ତୁ ତେନ ତୁଷ୍ଟୋଽସ୍ମି ସୁଵ୍ରତେ ।
ଶ୍ରୀଗୁରୋଃ ପାଦୁକାଂ ମୁଦ୍ରାଂ ମୂଲମଂତ୍ରଂ ଚ ଗୋପଯେତ୍ ॥ 207 ॥

ନତାଽସ୍ମି ତେ ନାଥ ପଦାରଵିଂଦଂ
ବୁଦ୍ଧୀଂଦ୍ରିଯପ୍ରାଣମନୋଵଚୋଭିଃ ।
ଯଚ୍ଚିଂତ୍ଯତେ ଭାଵିତ ଆତ୍ମଯୁକ୍ତୌ
ମୁମୁକ୍ଷିଭିଃ କର୍ମମଯୋପଶାଂତଯେ ॥ 208 ॥

ଅନେନ ଯଦ୍ଭଵେତ୍କାର୍ଯଂ ତଦ୍ଵଦାମି ତଵ ପ୍ରିଯେ ।
ଲୋକୋପକାରକଂ ଦେଵି ଲୌକିକଂ ତୁ ଵିଵର୍ଜଯେତ୍ ॥ 209 ॥

ଲୌକିକାଦ୍ଧର୍ମତୋ ଯାତି ଜ୍ଞାନହୀନୋ ଭଵାର୍ଣଵେ ।
ଜ୍ଞାନଭାଵେ ଚ ଯତ୍ସର୍ଵଂ କର୍ମ ନିଷ୍କର୍ମ ଶାମ୍ଯତି ॥ 210 ॥

ଇମାଂ ତୁ ଭକ୍ତିଭାଵେନ ପଠେଦ୍ଵୈ ଶୃଣୁଯାଦପି ।
ଲିଖିତ୍ଵା ଯତ୍ପ୍ରଦାନେନ ତତ୍ସର୍ଵଂ ଫଲମଶ୍ନୁତେ ॥ 211 ॥

ଗୁରୁଗୀତାମିମାଂ ଦେଵି ହୃଦି ନିତ୍ଯଂ ଵିଭାଵଯ ।
ମହାଵ୍ଯାଧିଗତୈର୍ଦୁଃଖୈଃ ସର୍ଵଦା ପ୍ରଜପେନ୍ମୁଦା ॥ 212 ॥

ଗୁରୁଗୀତାକ୍ଷରୈକୈକଂ ମଂତ୍ରରାଜମିଦଂ ପ୍ରିଯେ ।
ଅନ୍ଯେ ଚ ଵିଵିଧାଃ ମଂତ୍ରାଃ କଲାଂ ନାର୍ହଂତି ଷୋଡଶୀମ୍ ॥ 213 ॥

ଅନଂତ ଫଲମାପ୍ନୋତି ଗୁରୁଗୀତା ଜପେନ ତୁ ।
ସର୍ଵପାପହରା ଦେଵି ସର୍ଵଦାରିଦ୍ର୍ଯନାଶିନୀ ॥ 214 ॥

ଅକାଲମୃତ୍ଯୁହରା ଚୈଵ ସର୍ଵସଂକଟନାଶିନୀ ।
ଯକ୍ଷରାକ୍ଷସଭୂତାଦିଚୋରଵ୍ଯାଘ୍ରଵିଘାତିନୀ ॥ 215 ॥

ସର୍ଵୋପଦ୍ରଵକୁଷ୍ଠାଦିଦୁଷ୍ଟଦୋଷନିଵାରିଣୀ ।
ଯତ୍ଫଲଂ ଗୁରୁସାନ୍ନିଧ୍ଯାତ୍ତତ୍ଫଲଂ ପଠନାଦ୍ଭଵେତ୍ ॥ 216 ॥

ମହାଵ୍ଯାଧିହରା ସର୍ଵଵିଭୂତେଃ ସିଦ୍ଧିଦା ଭଵେତ୍ ।
ଅଥଵା ମୋହନେ ଵଶ୍ଯେ ସ୍ଵଯମେଵ ଜପେତ୍ସଦା ॥ 217 ॥

କୁଶଦୂର୍ଵାସନେ ଦେଵି ହ୍ଯାସନେ ଶୁଭ୍ରକଂବଲେ ।
ଉପଵିଶ୍ଯ ତତୋ ଦେଵି ଜପେଦେକାଗ୍ରମାନସଃ ॥ 218 ॥

ଶୁକ୍ଲଂ ସର୍ଵତ୍ର ଵୈ ପ୍ରୋକ୍ତଂ ଵଶ୍ଯେ ରକ୍ତାସନଂ ପ୍ରିଯେ ।
ପଦ୍ମାସନେ ଜପେନ୍ନିତ୍ଯଂ ଶାଂତିଵଶ୍ଯକରଂ ପରମ୍ ॥ 219 ॥

ଵସ୍ତ୍ରାସନେ ଚ ଦାରିଦ୍ର୍ଯଂ ପାଷାଣେ ରୋଗସଂଭଵଃ ।
ମେଦିନ୍ଯାଂ ଦୁଃଖମାପ୍ନୋତି କାଷ୍ଠେ ଭଵତି ନିଷ୍ଫଲମ୍ ॥ 220 ॥

କୃଷ୍ଣାଜିନେ ଜ୍ଞାନସିଦ୍ଧିଃ ମୋକ୍ଷଶ୍ରୀର୍ଵ୍ଯାଘ୍ରଚର୍ମଣି ।
କୁଶାସନେ ଜ୍ଞାନସିଦ୍ଧିଃ ସର୍ଵସିଦ୍ଧିସ୍ତୁ କଂବଲେ ॥ 221 ॥

ଆଗ୍ନେଯ୍ଯାଂ କର୍ଷଣଂ ଚୈଵ ଵାଯଵ୍ଯାଂ ଶତ୍ରୁନାଶନମ୍ ।
ନୈରୃତ୍ଯାଂ ଦର୍ଶନଂ ଚୈଵ ଈଶାନ୍ଯାଂ ଜ୍ଞାନମେଵ ଚ ॥ 222 ॥

ଉଦଙ୍ମୁଖଃ ଶାଂତିଜାପ୍ଯେ ଵଶ୍ଯେ ପୂର୍ଵମୁଖସ୍ତଥା ।
ଯାମ୍ଯେ ତୁ ମାରଣଂ ପ୍ରୋକ୍ତଂ ପଶ୍ଚିମେ ଚ ଧନାଗମଃ ॥ 223 ॥

ମୋହନଂ ସର୍ଵଭୂତାନାଂ ବଂଧମୋକ୍ଷକରଂ ପରମ୍ ।
ଦେଵରାଜପ୍ରିଯକରଂ ରାଜାନଂ ଵଶମାନଯେତ୍ ॥ 224 ॥

ମୁଖସ୍ତଂଭକରଂ ଚୈଵ ଗୁଣାନାଂ ଚ ଵିଵର୍ଧନମ୍ ।
ଦୁଷ୍କର୍ମନାଶନଂ ଚୈଵ ତଥା ସତ୍କର୍ମସିଦ୍ଧିଦମ୍ ॥ 225 ॥

ଅସିଦ୍ଧଂ ସାଧଯେତ୍କାର୍ଯଂ ନଵଗ୍ରହଭଯାପହମ୍ ।
ଦୁଃସ୍ଵପ୍ନନାଶନଂ ଚୈଵ ସୁସ୍ଵପ୍ନଫଲଦାଯକମ୍ ॥ 226 ॥

ମୋହଶାଂତିକରଂ ଚୈଵ ବଂଧମୋକ୍ଷକରଂ ପରମ୍ ।
ସ୍ଵରୂପଜ୍ଞାନନିଲଯଂ ଗୀତାଶାସ୍ତ୍ରମିଦଂ ଶିଵେ ॥ 227 ॥

ଯଂ ଯଂ ଚିଂତଯତେ କାମଂ ତଂ ତଂ ପ୍ରାପ୍ନୋତି ନିଶ୍ଚଯମ୍ ।
ନିତ୍ଯଂ ସୌଭାଗ୍ଯଦଂ ପୁଣ୍ଯଂ ତାପତ୍ରଯକୁଲାପହମ୍ ॥ 228 ॥

ସର୍ଵଶାଂତିକରଂ ନିତ୍ଯଂ ତଥା ଵଂଧ୍ଯା ସୁପୁତ୍ରଦମ୍ ।
ଅଵୈଧଵ୍ଯକରଂ ସ୍ତ୍ରୀଣାଂ ସୌଭାଗ୍ଯସ୍ଯ ଵିଵର୍ଧନମ୍ ॥ 229 ॥

ଆଯୁରାରୋଗ୍ଯମୈଶ୍ଵର୍ଯଂ ପୁତ୍ରପୌତ୍ରଵିଵର୍ଧନଂ ।
ନିଷ୍କାମଜାପୀ ଵିଧଵା ପଠେନ୍ମୋକ୍ଷମଵାପ୍ନୁଯାତ୍ ॥ 230 ॥

ଅଵୈଧଵ୍ଯଂ ସକାମା ତୁ ଲଭତେ ଚାନ୍ଯଜନ୍ମନି ।
ସର୍ଵଦୁଃଖମଯଂ ଵିଘ୍ନଂ ନାଶଯେତ୍ତାପହାରକମ୍ ॥ 231 ॥

ସର୍ଵପାପପ୍ରଶମନଂ ଧର୍ମକାମାର୍ଥମୋକ୍ଷଦମ୍ ।
ଯଂ ଯଂ ଚିଂତଯତେ କାମଂ ତଂ ତଂ ପ୍ରାପ୍ନୋତି ନିଶ୍ଚିତମ୍ ॥ 232 ॥

କାମ୍ଯାନାଂ କାମଧେନୁର୍ଵୈ କଲ୍ପତେ କଲ୍ପପାଦପଃ ।
ଚିଂତାମଣିଶ୍ଚିଂତିତସ୍ଯ ସର୍ଵମଂଗଳକାରକମ୍ ॥ 233 ॥

ଲିଖିତ୍ଵା ପୂଜଯେଦ୍ଯସ୍ତୁ ମୋକ୍ଷଶ୍ରିଯମଵାପ୍ନୁଯାତ୍ ।
ଗୁରୂଭକ୍ତିର୍ଵିଶେଷେଣ ଜାଯତେ ହୃଦି ସର୍ଵଦା ॥ 234 ॥

ଜପଂତି ଶାକ୍ତାଃ ସୌରାଶ୍ଚ ଗାଣପତ୍ଯାଶ୍ଚ ଵୈଷ୍ଣଵାଃ ।
ଶୈଵାଃ ପାଶୁପତାଃ ସର୍ଵେ ସତ୍ଯଂ ସତ୍ଯଂ ନ ସଂଶଯଃ ॥ 235 ॥

ଇତି ଶ୍ରୀସ୍କଂଦପୁରାଣେ ଉତ୍ତରଖଂଡେ ଉମାମହେଶ୍ଵର ସଂଵାଦେ
ଶ୍ରୀ ଗୁରୁଗୀତାଯାଂ ଦ୍ଵିତୀଯୋଽଧ୍ଯାଯଃ ॥