ଶ୍ରୀଗୁରୁଭ୍ଯୋ ନମଃ ।
ହରିଃ ଓଂ ।

ଧ୍ଯାନମ୍
ହଂସାଭ୍ଯାଂ ପରିଵୃତ୍ତପତ୍ରକମଲୈର୍ଦିଵ୍ଯୈର୍ଜଗତ୍କାରଣଂ
ଵିଶ୍ଵୋତ୍କୀର୍ଣମନେକଦେହନିଲଯଂ ସ୍ଵଚ୍ଛଂଦମାନଂଦକମ୍ ।
ଆଦ୍ଯଂତୈକମଖଂଡଚିଦ୍ଘନରସଂ ପୂର୍ଣଂ ହ୍ଯନଂତଂ ଶୁଭଂ
ପ୍ରତ୍ଯକ୍ଷାକ୍ଷରଵିଗ୍ରହଂ ଗୁରୁପଦଂ ଧ୍ଯାଯେଦ୍ଵିଭୁଂ ଶାଶ୍ଵତମ୍ ॥

ଅଥ ପ୍ରଥମୋଽଧ୍ଯାଯଃ ॥

ଅଚିଂତ୍ଯାଵ୍ଯକ୍ତରୂପାଯ ନିର୍ଗୁଣାଯ ଗଣାତ୍ମନେ ।
ସମସ୍ତଜଗଦାଧାରମୂର୍ତଯେ ବ୍ରହ୍ମଣେ ନମଃ ॥ 1 ॥

ଋଷଯ ଊଚୁଃ ।
ସୂତ ସୂତ ମହାପ୍ରାଜ୍ଞ ନିଗମାଗମପାରଗ ।
ଗୁରୁସ୍ଵରୂପମସ୍ମାକଂ ବ୍ରୂହି ସର୍ଵମଲାପହମ୍ ॥ 2 ॥

ଯସ୍ଯ ଶ୍ରଵଣମାତ୍ରେଣ ଦେହୀ ଦୁଃଖାଦ୍ଵିମୁଚ୍ଯତେ ।
ଯେନ ମାର୍ଗେଣ ମୁନଯଃ ସର୍ଵଜ୍ଞତ୍ଵଂ ପ୍ରପେଦିରେ ॥ 3 ॥

ଯତ୍ପ୍ରାପ୍ଯ ନ ପୁନର୍ଯାତି ନରଃ ସଂସାରବଂଧନମ୍ ।
ତଥାଵିଧଂ ପରଂ ତତ୍ତ୍ଵଂ ଵକ୍ତଵ୍ଯମଧୁନା ତ୍ଵଯା ॥ 4 ॥

ଗୁହ୍ଯାଦ୍ଗୁହ୍ଯତମଂ ସାରଂ ଗୁରୁଗୀତା ଵିଶେଷତଃ ।
ତ୍ଵତ୍ପ୍ରସାଦାଚ୍ଚ ଶ୍ରୋତଵ୍ଯା ତତ୍ସର୍ଵଂ ବ୍ରୂହି ସୂତ ନଃ ॥ 5 ॥

ଇତି ସଂପ୍ରାର୍ଥିତଃ ସୂତୋ ମୁନିସଂଘୈର୍ମୁହୁର୍ମୁହୁଃ ॥

କୁତୂହଲେନ ମହତା ପ୍ରୋଵାଚ ମଧୁରଂ ଵଚଃ ॥ 6 ॥

ସୂତ ଉଵାଚ ।
ଶ୍ରୁଣୁଧ୍ଵଂ ମୁନଯଃ ସର୍ଵେ ଶ୍ରଦ୍ଧଯା ପରଯା ମୁଦା ।
ଵଦାମି ଭଵରୋଗଘ୍ନୀଂ ଗୀତାଂ ମାତୃସ୍ଵରୂପିଣୀମ୍ ॥ 7 ॥

ପୁରା କୈଲାସଶିଖରେ ସିଦ୍ଧଗଂଧର୍ଵସେଵିତେ ।
ତତ୍ର କଲ୍ପଲତାପୁଷ୍ପମଂଦିରେଽତ୍ଯଂତସୁଂଦରେ ॥ 8 ॥

ଵ୍ଯାଘ୍ରାଜିନେ ସମାସୀନଂ ଶୁକାଦିମୁନିଵଂଦିତମ୍ ।
ବୋଧଯଂତଂ ପରଂ ତତ୍ତ୍ଵଂ ମଧ୍ଯେ ମୁନିଗଣେ କ୍ଵଚିତ୍ ॥ 9 ॥

ପ୍ରଣମ୍ରଵଦନା ଶଶ୍ଵନ୍ନମସ୍କୁର୍ଵଂତମାଦରାତ୍ ।
ଦୃଷ୍ଟ୍ଵା ଵିସ୍ମଯମାପନ୍ନ ପାର୍ଵତୀ ପରିପୃଚ୍ଛତି ॥ 10 ॥

ପାର୍ଵତ୍ଯୁଵାଚ ।
ଓଂ ନମୋ ଦେଵ ଦେଵେଶ ପରାତ୍ପର ଜଗଦ୍ଗୁରୋ ।
ତ୍ଵାଂ ନମସ୍କୁର୍ଵତେ ଭକ୍ତ୍ଯା ସୁରାସୁରନରାଃ ସଦା ॥ 11 ॥

ଵିଧିଵିଷ୍ଣୁମହେଂଦ୍ରାଦ୍ଯୈର୍ଵଂଦ୍ଯଃ ଖଲୁ ସଦା ଭଵାନ୍ ।
ନମସ୍କରୋଷି କସ୍ମୈ ତ୍ଵଂ ନମସ୍କାରାଶ୍ରଯଃ କିଲ ॥ 12 ॥

ଦୃଷ୍ଟ୍ଵୈତତ୍କର୍ମ ଵିପୁଲମାଶ୍ଚର୍ଯ ପ୍ରତିଭାତି ମେ ।
କିମେତନ୍ନ ଵିଜାନେଽହଂ କୃପଯା ଵଦ ମେ ପ୍ରଭୋ ॥ 13 ॥

ଭଗଵନ୍ ସର୍ଵଧର୍ମଜ୍ଞ ଵ୍ରତାନାଂ ଵ୍ରତନାଯକମ୍ ।
ବ୍ରୂହି ମେ କୃପଯା ଶଂଭୋ ଗୁରୁମାହାତ୍ମ୍ଯମୁତ୍ତମମ୍ ॥ 14 ॥

କେନ ମାର୍ଗେଣ ଭୋ ସ୍ଵାମିନ୍ ଦେହୀ ବ୍ରହ୍ମମଯୋ ଭଵେତ୍ ।
ତତ୍କୃପାଂ କୁରୁ ମେ ସ୍ଵାମିନ୍ ନମାମି ଚରଣୌ ତଵ ॥ 15 ॥

ଇତି ସଂପ୍ରାର୍ଥିତଃ ଶଶ୍ଵନ୍ମହାଦେଵୋ ମହେଶ୍ଵରଃ ।
ଆନଂଦଭରିତଃ ସ୍ଵାଂତେ ପାର୍ଵତୀମିଦମବ୍ରଵୀତ୍ ॥ 16 ॥

ଶ୍ରୀ ମହାଦେଵ ଉଵାଚ ।
ନ ଵକ୍ତଵ୍ଯମିଦଂ ଦେଵି ରହସ୍ଯାତିରହସ୍ଯକମ୍ ।
ନ କସ୍ଯାପି ପୁରା ପ୍ରୋକ୍ତଂ ତ୍ଵଦ୍ଭକ୍ତ୍ଯର୍ଥଂ ଵଦାମି ତତ୍ ॥ 17 ॥

ମମ ରୂପାଽସି ଦେଵି ତ୍ଵମତସ୍ତତ୍କଥଯାମି ତେ ।
ଲୋକୋପକାରକଃ ପ୍ରଶ୍ନୋ ନ କେନାପି କୃତଃ ପୁରା ॥ 18 ॥

ଯସ୍ଯ ଦେଵେ ପରା ଭକ୍ତିର୍ଯଥା ଦେଵେ ତଥା ଗୁରୌ ।
ତସ୍ଯୈତେ କଥିତା ହ୍ଯର୍ଥାଃ ପ୍ରକାଶଂତେ ମହାତ୍ମନଃ ॥ 19 ॥

ଯୋ ଗୁରୁଃ ସ ଶିଵଃ ପ୍ରୋକ୍ତୋ ଯଃ ଶିଵଃ ସ ଗୁରୁଃ ସ୍ମୃତଃ ।
ଵିକଲ୍ପଂ ଯସ୍ତୁ କୁର୍ଵୀତ ସ ନରୋ ଗୁରୁତଲ୍ପଗଃ ॥ 20 ॥

ଦୁର୍ଲଭଂ ତ୍ରିଷୁ ଲୋକେଷୁ ତଚ୍ଛୃଣୁଷ୍ଵ ଵଦାମ୍ଯହମ୍ ।
ଗୁରୁବ୍ରହ୍ମ ଵିନା ନାନ୍ଯଃ ସତ୍ଯଂ ସତ୍ଯଂ ଵରାନନେ ॥ 21 ॥

ଵେଦଶାସ୍ତ୍ରପୁରାଣାନି ଚେତିହାସାଦିକାନି ଚ ।
ମଂତ୍ରଯଂତ୍ରାଦିଵିଦ୍ଯାନାଂ ମୋହନୋଚ୍ଚାଟନାଦିକମ୍ ॥ 22 ॥

ଶୈଵଶାକ୍ତାଗମାଦୀନି ହ୍ଯନ୍ଯେ ଚ ବହଵୋ ମତାଃ ।
ଅପଭ୍ରଂଶାଃ ସମସ୍ତାନାଂ ଜୀଵାନାଂ ଭ୍ରାଂତଚେତସାମ୍ ॥ 23 ॥

ଜପସ୍ତପୋ ଵ୍ରତଂ ତୀର୍ଥଂ ଯଜ୍ଞୋ ଦାନଂ ତଥୈଵ ଚ ।
ଗୁରୁତତ୍ତ୍ଵମଵିଜ୍ଞାଯ ସର୍ଵଂ ଵ୍ଯର୍ଥଂ ଭଵେତ୍ପ୍ରିଯେ ॥ 24 ॥

ଗୁରୁବୁଦ୍ଧ୍ଯାତ୍ମନୋ ନାନ୍ଯତ୍ ସତ୍ଯଂ ସତ୍ଯଂ ଵରାନନେ ।
ତଲ୍ଲାଭାର୍ଥଂ ପ୍ରଯତ୍ନସ୍ତୁ କର୍ତଵ୍ଯଶ୍ଚ ମନୀଷିଭିଃ ॥ 25 ॥

ଗୂଢାଵିଦ୍ଯା ଜଗନ୍ମାଯା ଦେହଶ୍ଚାଜ୍ଞାନସଂଭଵଃ ।
ଵିଜ୍ଞାନଂ ଯତ୍ପ୍ରସାଦେନ ଗୁରୁଶବ୍ଦେନ କଥ୍ଯତେ ॥ 26 ॥

ଯଦଂଘ୍ରିକମଲଦ୍ଵଂଦ୍ଵଂ ଦ୍ଵଂଦ୍ଵତାପନିଵାରକମ୍ ।
ତାରକଂ ଭଵସିଂଧୋଶ୍ଚ ତଂ ଗୁରୁଂ ପ୍ରଣମାମ୍ଯହମ୍ ॥ 27 ॥

ଦେହୀ ବ୍ରହ୍ମ ଭଵେଦ୍ଯସ୍ମାତ୍ ତ୍ଵତ୍କୃପାର୍ଥଂ ଵଦାମି ତତ୍ ।
ସର୍ଵପାପଵିଶୁଦ୍ଧାତ୍ମା ଶ୍ରୀଗୁରୋଃ ପାଦସେଵନାତ୍ ॥ 28 ॥

ସର୍ଵତୀର୍ଥାଵଗାହସ୍ଯ ସଂପ୍ରାପ୍ନୋତି ଫଲଂ ନରଃ ।
ଗୁରୋଃ ପାଦୋଦକଂ ପୀତ୍ଵା ଶେଷଂ ଶିରସି ଧାରଯନ୍ ॥ 29 ॥

ଶୋଷଣଂ ପାପପଂକସ୍ଯ ଦୀପନଂ ଜ୍ଞାନତେଜସଃ ।
ଗୁରୋଃ ପାଦୋଦକଂ ସମ୍ଯକ୍ ସଂସାରାର୍ଣଵତାରକମ୍ ॥ 30 ॥

ଅଜ୍ଞାନମୂଲହରଣଂ ଜନ୍ମକର୍ମନିଵାରକମ୍ ।
ଜ୍ଞାନଵୈରାଗ୍ଯସିଦ୍ଧ୍ଯର୍ଥଂ ଗୁରୋଃ ପାଦୋଦକଂ ପିବେତ୍ ॥ 31 ॥

ଗୁରୁପାଦୋଦକଂ ପାନଂ ଗୁରୋରୁଚ୍ଛିଷ୍ଟଭୋଜନମ୍ ।
ଗୁରୁମୂର୍ତେଃ ସଦା ଧ୍ଯାନଂ ଗୁରୋର୍ନାମ ସଦା ଜପଃ ॥ 32 ॥

ସ୍ଵଦେଶିକସ୍ଯୈଵ ଚ ନାମକୀର୍ତନଂ
ଭଵେଦନଂତସ୍ଯ ଶିଵସ୍ଯ କୀର୍ତନମ୍ ।
ସ୍ଵଦେଶିକସ୍ଯୈଵ ଚ ନାମଚିଂତନଂ
ଭଵେଦନଂତସ୍ଯ ଶିଵସ୍ଯ ଚିଂତନମ୍ ॥ 33 ॥

ଯତ୍ପାଦାଂବୁଜରେଣୁର୍ଵୈ କୋଽପି ସଂସାରଵାରିଧୌ ।
ସେତୁବଂଧାଯତେ ନାଥଂ ଦେଶିକଂ ତମୁପାସ୍ମହେ ॥ 34 ॥

ଯଦନୁଗ୍ରହମାତ୍ରେଣ ଶୋକମୋହୌ ଵିନଶ୍ଯତଃ ।
ତସ୍ମୈ ଶ୍ରୀଦେଶିକେଂଦ୍ରାଯ ନମୋଽସ୍ତୁ ପରମାତ୍ମନେ ॥ 35 ॥

ଯସ୍ମାଦନୁଗ୍ରହଂ ଲବ୍ଧ୍ଵା ମହଦଜ୍ଞାନମୁତ୍ସୃଜେତ୍ ।
ତସ୍ମୈ ଶ୍ରୀଦେଶିକେଂଦ୍ରାଯ ନମଶ୍ଚାଭୀଷ୍ଟସିଦ୍ଧଯେ ॥ 36 ॥

କାଶୀକ୍ଷେତ୍ରଂ ନିଵାସଶ୍ଚ ଜାହ୍ନଵୀ ଚରଣୋଦକମ୍ ।
ଗୁରୁର୍ଵିଶ୍ଵେଶ୍ଵରଃ ସାକ୍ଷାତ୍ ତାରକଂ ବ୍ରହ୍ମନିଶ୍ଚଯଃ ॥ 37 ॥

ଗୁରୁସେଵା ଗଯା ପ୍ରୋକ୍ତା ଦେହଃ ସ୍ଯାଦକ୍ଷଯୋ ଵଟଃ ।
ତତ୍ପାଦଂ ଵିଷ୍ଣୁପାଦଂ ସ୍ଯାତ୍ ତତ୍ର ଦତ୍ତମନସ୍ତତମ୍ ॥ 38 ॥

ଗୁରୁମୂର୍ତିଂ ସ୍ମରେନ୍ନିତ୍ଯଂ ଗୁରୋର୍ନାମ ସଦା ଜପେତ୍ ।
ଗୁରୋରାଜ୍ଞାଂ ପ୍ରକୁର୍ଵୀତ ଗୁରୋରନ୍ଯଂ ନ ଭାଵଯେତ୍ ॥ 39 ॥

ଗୁରୁଵକ୍ତ୍ରେ ସ୍ଥିତଂ ବ୍ରହ୍ମ ପ୍ରାପ୍ଯତେ ତତ୍ପ୍ରସାଦତଃ ।
ଗୁରୋର୍ଧ୍ଯାନଂ ସଦା କୁର୍ଯାତ୍ କୁଲସ୍ତ୍ରୀ ସ୍ଵପତିଂ ଯଥା ॥ 40 ॥

ସ୍ଵାଶ୍ରମଂ ଚ ସ୍ଵଜାତିଂ ଚ ସ୍ଵକୀର୍ତିଂ ପୁଷ୍ଟିଵର୍ଧନମ୍ ।
ଏତତ୍ସର୍ଵଂ ପରିତ୍ଯଜ୍ଯ ଗୁରୁମେଵ ସମାଶ୍ରଯେତ୍ ॥ 41 ॥

ଅନନ୍ଯାଶ୍ଚିଂତଯଂତୋ ଯେ ସୁଲଭଂ ପରମଂ ସୁଖମ୍ ।
ତସ୍ମାତ୍ସର୍ଵପ୍ରଯତ୍ନେନ ଗୁରୋରାରାଧନଂ କୁରୁ ॥ 42 ॥

ଗୁରୁଵକ୍ତ୍ରେ ସ୍ଥିତା ଵିଦ୍ଯା ଗୁରୁଭକ୍ତ୍ଯା ଚ ଲଭ୍ଯତେ ।
ତ୍ରୈଲୋକ୍ଯେ ସ୍ଫୁଟଵକ୍ତାରୋ ଦେଵର୍ଷିପିତୃମାନଵାଃ ॥ 43 ॥

ଗୁକାରଶ୍ଚାଂଧକାରୋ ହି ରୁକାରସ୍ତେଜ ଉଚ୍ଯତେ ।
ଅଜ୍ଞାନଗ୍ରାସକଂ ବ୍ରହ୍ମ ଗୁରୁରେଵ ନ ସଂଶଯଃ ॥ 44 ॥

ଗୁକାରଶ୍ଚାଂଧକାରସ୍ତୁ ରୁକାରସ୍ତନ୍ନିରୋଧକୃତ୍ ।
ଅଂଧକାରଵିନାଶିତ୍ଵାଦ୍ଗୁରୁରିତ୍ଯଭିଧୀଯତେ ॥

ଗୁକାରୋ ଭଵରୋଗଃ ସ୍ଯାତ୍ ରୁକାରସ୍ତନ୍ନିରୋଧକୃତ୍ ।
ଭଵରୋଗହରତ୍ଵାଚ୍ଚ ଗୁରୁରିତ୍ଯଭିଧୀଯତେ ॥ 45 ॥

ଗୁକାରଶ୍ଚ ଗୁଣାତୀତୋ ରୂପାତୀତୋ ରୁକାରକଃ ।
ଗୁଣରୂପଵିହୀନତ୍ଵାତ୍ ଗୁରୁରିତ୍ଯଭିଧୀଯତେ ॥ 46 ॥

ଗୁକାରଃ ପ୍ରଥମୋ ଵର୍ଣୋ ମାଯାଦିଗୁଣଭାସକଃ ।
ରୁକାରୋଽସ୍ତି ପରଂ ବ୍ରହ୍ମ ମାଯାଭ୍ରାଂତିଵିମୋଚକମ୍ ॥ 47 ॥

ଏଵଂ ଗୁରୁପଦଂ ଶ୍ରେଷ୍ଠଂ ଦେଵାନାମପି ଦୁର୍ଲଭମ୍ ।
ହାହାହୂହୂଗଣୈଶ୍ଚୈଵ ଗଂଧର୍ଵାଦ୍ଯୈଶ୍ଚ ପୂଜିତମ୍ ॥ 48 ॥

ଧ୍ରୁଵଂ ତେଷାଂ ଚ ସର୍ଵେଷାଂ ନାସ୍ତି ତତ୍ତ୍ଵଂ ଗୁରୋଃ ପରମ୍ ।
ଗୁରୋରାରାଧନଂ କୁର୍ଯାତ୍ ସ୍ଵଜୀଵତ୍ଵଂ ନିଵେଦଯେତ୍ ॥ 49 ॥

ଆସନଂ ଶଯନଂ ଵସ୍ତ୍ରଂ ଵାହନଂ ଭୂଷଣାଦିକମ୍ ।
ସାଧକେନ ପ୍ରଦାତଵ୍ଯଂ ଗୁରୁସଂତୋଷକାରଣମ୍ ॥ 50 ॥

କର୍ମଣା ମନସା ଵାଚା ସର୍ଵଦାଽଽରାଧଯେଦ୍ଗୁରୁମ୍ ।
ଦୀର୍ଘଦଂଡଂ ନମସ୍କୃତ୍ଯ ନିର୍ଲଜ୍ଜୋ ଗୁରୁସନ୍ନିଧୌ ॥ 51 ॥

ଶରୀରମିଂଦ୍ରିଯଂ ପ୍ରାଣମର୍ଥସ୍ଵଜନବାଂଧଵାନ୍ ।
ଆତ୍ମଦାରାଦିକଂ ସର୍ଵଂ ସଦ୍ଗୁରୁଭ୍ଯୋ ନିଵେଦଯେତ୍ ॥ 52 ॥

ଗୁରୁରେକୋ ଜଗତ୍ସର୍ଵଂ ବ୍ରହ୍ମଵିଷ୍ଣୁଶିଵାତ୍ମକମ୍ ।
ଗୁରୋଃ ପରତରଂ ନାସ୍ତି ତସ୍ମାତ୍ସଂପୂଜଯେଦ୍ଗୁରୁମ୍ ॥ 53 ॥

ସର୍ଵଶ୍ରୁତିଶିରୋରତ୍ନଵିରାଜିତପଦାଂବୁଜମ୍ ।
ଵେଦାଂତାର୍ଥପ୍ରଵକ୍ତାରଂ ତସ୍ମାତ୍ ସଂପୂଜଯେଦ୍ଗୁରୁମ୍ ॥ 54 ॥

ଯସ୍ଯ ସ୍ମରଣମାତ୍ରେଣ ଜ୍ଞାନମୁତ୍ପଦ୍ଯତେ ସ୍ଵଯମ୍ ।
ସ ଏଵ ସର୍ଵସଂପତ୍ତିଃ ତସ୍ମାତ୍ସଂପୂଜଯେଦ୍ଗୁରୁମ୍ ॥ 55 ॥

[ ପାଠଭେଦଃ
କୃମିକୋଟିଭିରାଵିଷ୍ଟଂ ଦୁର୍ଗଂଧମଲମୂତ୍ରକମ୍ ।
ଶ୍ଲେଷ୍ମରକ୍ତତ୍ଵଚାମାଂସୈର୍ନଦ୍ଧଂ ଚୈତଦ୍ଵରାନନେ ॥
]
କୃମିକୋଟିଭିରାଵିଷ୍ଟଂ ଦୁର୍ଗଂଧକୁଲଦୂଷିତମ୍ ।
ଅନିତ୍ଯଂ ଦୁଃଖନିଲଯଂ ଦେହଂ ଵିଦ୍ଧି ଵରାନନେ ॥ 56 ॥

ସଂସାରଵୃକ୍ଷମାରୂଢାଃ ପତଂତି ନରକାର୍ଣଵେ ।
ଯସ୍ତାନୁଦ୍ଧରତେ ସର୍ଵାନ୍ ତସ୍ମୈ ଶ୍ରୀଗୁରଵେ ନମଃ ॥ 57 ॥

ଗୁରୁର୍ବ୍ରହ୍ମା ଗୁରୁର୍ଵିଷ୍ଣୁର୍ଗୁରୁର୍ଦେଵୋ ମହେଶ୍ଵରଃ ।
ଗୁରୁସ୍ସାକ୍ଷାତ୍ ପରବ୍ରହ୍ମ ତସ୍ମୈ ଶ୍ରୀଗୁରଵେ ନମଃ ॥ 58 ॥

ଅଜ୍ଞାନତିମିରାଂଧସ୍ଯ ଜ୍ଞାନାଂଜନଶଲାକଯା ।
ଚକ୍ଷୁରୁନ୍ମୀଲିତଂ ଯେନ ତସ୍ମୈ ଶ୍ରୀଗୁରଵେ ନମଃ ॥ 59 ॥

ଅଖଂଡମଂଡଲାକାରଂ ଵ୍ଯାପ୍ତଂ ଯେନ ଚରାଚରମ୍ ।
ତତ୍ପଦଂ ଦର୍ଶିତଂ ଯେନ ତସ୍ମୈ ଶ୍ରୀଗୁରଵେ ନମଃ ॥ 60 ॥

ସ୍ଥାଵରଂ ଜଂଗମଂ ଵ୍ଯାପ୍ତଂ ଯତ୍କିଂଚିତ୍ସଚରାଚରମ୍ ।
ତ୍ଵଂ ପଦଂ ଦର୍ଶିତଂ ଯେନ ତସ୍ମୈ ଶ୍ରୀଗୁରଵେ ନମଃ ॥ 61 ॥

ଚିନ୍ମଯଵ୍ଯାପିତଂ ସର୍ଵଂ ତ୍ରୈଲୋକ୍ଯଂ ସଚରାଚରମ୍ ।
ଅସିତ୍ଵଂ ଦର୍ଶିତଂ ଯେନ ତସ୍ମୈ ଶ୍ରୀଗୁରଵେ ନମଃ ॥ 62 ॥

ନିମିଷାନ୍ନିମିଷାର୍ଧାଦ୍ଵା ଯଦ୍ଵାକ୍ଯାଦ୍ଵୈ ଵିମୁଚ୍ଯତେ ।
ସ୍ଵାତ୍ମାନଂ ଶିଵମାଲୋକ୍ଯ ତସ୍ମୈ ଶ୍ରୀଗୁରଵେ ନମଃ ॥ 63 ॥

ଚୈତନ୍ଯଂ ଶାଶ୍ଵତଂ ଶାଂତଂ ଵ୍ଯୋମାତୀତଂ ନିରଂଜନମ୍ ।
ନାଦବିଂଦୁକଳାତୀତଂ ତସ୍ମୈ ଶ୍ରୀଗୁରଵେ ନମଃ ॥ 64 ॥

ନିର୍ଗୁଣଂ ନିର୍ମଲଂ ଶାଂତଂ ଜଂଗମଂ ସ୍ଥିରମେଵ ଚ ।
ଵ୍ଯାପ୍ତଂ ଯେନ ଜଗତ୍ସର୍ଵଂ ତସ୍ମୈ ଶ୍ରୀଗୁରଵେ ନମଃ ॥ 65 ॥

ସ ପିତା ସ ଚ ମେ ମାତା ସ ବଂଧୁଃ ସ ଚ ଦେଵତା ।
ସଂସାରମୋହନାଶାଯ ତସ୍ମୈ ଶ୍ରୀଗୁରଵେ ନମଃ ॥ 66 ॥

ଯତ୍ସତ୍ତ୍ଵେନ ଜଗତ୍ସତ୍ତ୍ଵଂ ଯତ୍ପ୍ରକାଶେନ ଭାତି ତତ୍ ।
ଯଦାନଂଦେନ ନଂଦଂତି ତସ୍ମୈ ଶ୍ରୀଗୁରଵେ ନମଃ ॥ 67 ॥

ଯସ୍ମିନ୍ ସ୍ଥିତମିଦଂ ସର୍ଵଂ ଭାତି ଯଦ୍ଭାନରୂପତଃ ।
ପ୍ରିଯଂ ପୁତ୍ରାଦି ଯତ୍ପ୍ରୀତ୍ଯା ତସ୍ମୈ ଶ୍ରୀଗୁରଵେ ନମଃ ॥ 68 ॥

ଯେନେଦଂ ଦର୍ଶିତଂ ତତ୍ତ୍ଵଂ ଚିତ୍ତଚୈତ୍ଯାଦିକଂ ତଥା ।
ଜାଗ୍ରତ୍ସ୍ଵପ୍ନସୁଷୁପ୍ତ୍ଯାଦି ତସ୍ମୈ ଶ୍ରୀଗୁରଵେ ନମଃ ॥ 69 ॥

ଯସ୍ଯ ଜ୍ଞାନମିଦଂ ଵିଶ୍ଵଂ ନ ଦୃଶ୍ଯଂ ଭିନ୍ନଭେଦତଃ ।
ସଦୈକରୂପରୂପାଯ ତସ୍ମୈ ଶ୍ରୀଗୁରଵେ ନମଃ ॥ 70 ॥

ଯସ୍ଯ ଜ୍ଞାତଂ ମତଂ ତସ୍ଯ ମତଂ ଯସ୍ଯ ନ ଵେଦ ସଃ ।
ଅନନ୍ଯଭାଵଭାଵାଯ ତସ୍ମୈ ଶ୍ରୀଗୁରଵେ ନମଃ ॥ 71 ॥

ଯସ୍ମୈ କାରଣରୂପାଯ କାର୍ଯରୂପେଣ ଭାତି ଯତ୍ ।
କାର୍ଯକାରଣରୂପାଯ ତସ୍ମୈ ଶ୍ରୀଗୁରଵେ ନମଃ ॥ 72 ॥

ନାନାରୂପମିଦଂ ଵିଶ୍ଵଂ ନ କେନାପ୍ଯସ୍ତି ଭିନ୍ନତା ।
କାର୍ଯକାରଣରୂପାଯ ତସ୍ମୈ ଶ୍ରୀଗୁରଵେ ନମଃ ॥ 73 ॥

ଜ୍ଞାନଶକ୍ତିସମାରୂଢତତ୍ତ୍ଵମାଲାଵିଭୂଷିଣେ ।
ଭୁକ୍ତିମୁକ୍ତିପ୍ରଦାତ୍ରେ ଚ ତସ୍ମୈ ଶ୍ରୀଗୁରଵେ ନମଃ ॥ 74 ॥

ଅନେକଜନ୍ମସଂପ୍ରାପ୍ତକର୍ମବଂଧଵିଦାହିନେ ।
ଜ୍ଞାନାନଲପ୍ରଭାଵେନ ତସ୍ମୈ ଶ୍ରୀଗୁରଵେ ନମଃ ॥ 75 ॥

ଶୋଷଣଂ ଭଵସିଂଧୋଶ୍ଚ ଦୀପନଂ କ୍ଷରସଂପଦାମ୍ ।
ଗୁରୋଃ ପାଦୋଦକଂ ଯସ୍ଯ ତସ୍ମୈ ଶ୍ରୀଗୁରଵେ ନମଃ ॥ 76 ॥

ନ ଗୁରୋରଧିକଂ ତତ୍ତ୍ଵଂ ନ ଗୁରୋରଧିକଂ ତପଃ ।
ନ ଗୁରୋରଧିକଂ ଜ୍ଞାନଂ ତସ୍ମୈ ଶ୍ରୀଗୁରଵେ ନମଃ ॥ 77 ॥

ମନ୍ନାଥଃ ଶ୍ରୀଜଗନ୍ନାଥୋ ମଦ୍ଗୁରୁଃ ଶ୍ରୀଜଗଦ୍ଗୁରୁଃ ।
ମମାଽଽତ୍ମା ସର୍ଵଭୂତାତ୍ମା ତସ୍ମୈ ଶ୍ରୀଗୁରଵେ ନମଃ ॥ 78 ॥

ଗୁରୁରାଦିରନାଦିଶ୍ଚ ଗୁରୁଃ ପରମଦୈଵତମ୍ ।
ଗୁରୁମଂତ୍ରସମୋ ନାସ୍ତି ତସ୍ମୈ ଶ୍ରୀଗୁରଵେ ନମଃ ॥ 79 ॥

ଏକ ଏଵ ପରୋ ବଂଧୁର୍ଵିଷମେ ସମୁପସ୍ଥିତେ ।
ଗୁରୁଃ ସକଲଧର୍ମାତ୍ମା ତସ୍ମୈ ଶ୍ରୀଗୁରଵେ ନମଃ ॥ 80 ॥

ଗୁରୁମଧ୍ଯେ ସ୍ଥିତଂ ଵିଶ୍ଵଂ ଵିଶ୍ଵମଧ୍ଯେ ସ୍ଥିତୋ ଗୁରୁଃ ।
ଗୁରୁର୍ଵିଶ୍ଵଂ ନ ଚାନ୍ଯୋଽସ୍ତି ତସ୍ମୈ ଶ୍ରୀଗୁରଵେ ନମଃ ॥ 81 ॥

ଭଵାରଣ୍ଯପ୍ରଵିଷ୍ଟସ୍ଯ ଦିଙ୍ମୋହଭ୍ରାଂତଚେତସଃ ।
ଯେନ ସଂଦର୍ଶିତଃ ପଂଥାଃ ତସ୍ମୈ ଶ୍ରୀଗୁରଵେ ନମଃ ॥ 82 ॥

ତାପତ୍ରଯାଗ୍ନିତପ୍ତାନାମଶାଂତପ୍ରାଣିନାଂ ମୁଦେ ।
ଗୁରୁରେଵ ପରା ଗଂଗା ତସ୍ମୈ ଶ୍ରୀଗୁରଵେ ନମଃ ॥ 83 ॥

[ ପାଠଭେଦଃ
ଅଜ୍ଞାନେନାହିନା ଗ୍ରସ୍ତାଃ ପ୍ରାଣିନସ୍ତାନ୍ ଚିକିତ୍ସକଃ ।
ଵିଦ୍ଯାସ୍ଵରୂପୋ ଭଗଵାଂସ୍ତସ୍ମୈ ଶ୍ରୀଗୁରଵେ ନମଃ ॥
]
ଅଜ୍ଞାନସର୍ପଦଷ୍ଟାନାଂ ପ୍ରାଣିନାଂ କଶ୍ଚିକିତ୍ସକଃ ।
ସମ୍ଯଗ୍^ଜ୍ଞାନମହାମଂତ୍ରଵେଦିନଂ ସଦ୍ଗୁରୁ ଵିନା ॥ 84 ॥

ହେତଵେ ଜଗତାମେଵ ସଂସାରାର୍ଣଵସେତଵେ ।
ପ୍ରଭଵେ ସର୍ଵଵିଦ୍ଯାନାଂ ଶଂଭଵେ ଗୁରଵେ ନମଃ ॥ 85 ॥

ଧ୍ଯାନମୂଲଂ ଗୁରୋର୍ମୂର୍ତିଃ ପୂଜାମୂଲଂ ଗୁରୋଃ ପଦମ୍ ।
ମଂତ୍ରମୂଲଂ ଗୁରୋର୍ଵାକ୍ଯଂ ମୁକ୍ତିମୂଲଂ ଗୁରୋଃ କୃପା ॥ 86 ॥

ସପ୍ତସାଗରପର୍ଯଂତତୀର୍ଥସ୍ନାନଫଲଂ ତୁ ଯତ୍ ।
ଗୁରୋଃ ପାଦୋଦବିଂଦୋଶ୍ଚ ସହସ୍ରାଂଶେ ନ ତତ୍ଫଲମ୍ ॥ 87 ॥

ଶିଵେ ରୁଷ୍ଟେ ଗୁରୁସ୍ତ୍ରାତା ଗୁରୌ ରୁଷ୍ଟେ ନ କଶ୍ଚନ ।
ଲବ୍ଧ୍ଵା କୁଲଗୁରୁଂ ସମ୍ଯଗ୍ଗୁରୁମେଵ ସମାଶ୍ରଯେତ୍ ॥ 88 ॥

ମଧୁଲୁବ୍ଧୋ ଯଥା ଭୃଂଗଃ ପୁଷ୍ପାତ୍ପୁଷ୍ପାଂତରଂ ଵ୍ରଜେତ୍ ।
ଜ୍ଞାନଲୁବ୍ଧସ୍ତଥା ଶିଷ୍ଯୋ ଗୁରୋର୍ଗୁର୍ଵଂତରଂ ଵ୍ରଜେତ୍ ॥ 89 ॥

ଵଂଦେ ଗୁରୁପଦଦ୍ଵଂଦ୍ଵଂ ଵାଙ୍ମନାତୀତଗୋଚରମ୍ ।
ଶ୍ଵେତରକ୍ତପ୍ରଭାଭିନ୍ନଂ ଶିଵଶକ୍ତ୍ଯାତ୍ମକଂ ପରମ୍ ॥ 90 ॥

ଗୁକାରଂ ଚ ଗୁଣାତୀତଂ ରୂକାରଂ ରୂପଵର୍ଜିତମ୍ ।
ଗୁଣାତୀତମରୂପଂ ଚ ଯୋ ଦଦ୍ଯାତ୍ସ ଗୁରୁଃ ସ୍ମୃତଃ ॥ 91 ॥

ଅତ୍ରିନେତ୍ରଃ ଶିଵଃ ସାକ୍ଷାତ୍ ଦ୍ଵିବାହୁଶ୍ଚ ହରିଃ ସ୍ମୃତଃ ।
ଯୋଽଚତୁର୍ଵଦନୋ ବ୍ରହ୍ମା ଶ୍ରୀଗୁରୁଃ କଥିତଃ ପ୍ରିଯେ ॥ 92 ॥

ଅଯଂ ମଯାଂଜଲିର୍ବଦ୍ଧୋ ଦଯାସାଗରସିଦ୍ଧଯେ ।
ଯଦନୁଗ୍ରହତୋ ଜଂତୁଶ୍ଚିତ୍ରସଂସାରମୁକ୍ତିଭାକ୍ ॥ 93 ॥

ଶ୍ରୀଗୁରୋଃ ପରମଂ ରୂପଂ ଵିଵେକଚକ୍ଷୁରଗ୍ରତଃ ।
ମଂଦଭାଗ୍ଯା ନ ପଶ୍ଯଂତି ଅଂଧାଃ ସୂର୍ଯୋଦଯଂ ଯଥା ॥ 94 ॥

କୁଲାନାଂ କୁଲକୋଟୀନାଂ ତାରକସ୍ତତ୍ର ତତ୍^କ୍ଷଣାତ୍ ।
ଅତସ୍ତଂ ସଦ୍ଗୁରୁଂ ଜ୍ଞାତ୍ଵା ତ୍ରିକାଲମଭିଵାଦଯେତ୍ ॥ 95 ॥

ଶ୍ରୀନାଥଚରଣଦ୍ଵଂଦ୍ଵଂ ଯସ୍ଯାଂ ଦିଶି ଵିରାଜତେ ।
ତସ୍ଯାଂ ଦିଶି ନମସ୍କୁର୍ଯାତ୍ ଭକ୍ତ୍ଯା ପ୍ରତିଦିନଂ ପ୍ରିଯେ ॥ 96 ॥

ସାଷ୍ଟାଂଗପ୍ରଣିପାତେନ ସ୍ତୁଵନ୍ନିତ୍ଯଂ ଗୁରୁଂ ଭଜେତ୍ ।
ଭଜନାତ୍ ସ୍ଥୈର୍ଯମାପ୍ନୋତି ସ୍ଵସ୍ଵରୂପମଯୋ ଭଵେତ୍ ॥ 97 ॥

ଦୋର୍ଭ୍ଯାଂ ପଦ୍ଭ୍ଯାଂ ଚ ଜାନୁଭ୍ଯାମୁରସା ଶିରସା ଦୃଶା ।
ମନସା ଵଚସା ଚେତି ପ୍ରଣାମୋଽଷ୍ଟାଂଗ ଉଚ୍ଯତେ ॥ 98 ॥

ତସ୍ଯୈ ଦିଶେ ସତତମଂଜଲିରେଷ ନିତ୍ଯଂ
ପ୍ରକ୍ଷିପ୍ଯତାଂ ମୁଖରିତୈର୍ମଧୁରୈଃ ପ୍ରସୂନୈଃ ।
ଜାଗର୍ତି ଯତ୍ର ଭଗଵାନ୍ ଗୁରୁଚକ୍ରଵର୍ତୀ
ଵିଶ୍ଵସ୍ଥିତିପ୍ରଳଯନାଟକନିତ୍ଯସାକ୍ଷୀ ॥ 99 ॥

ଅଭ୍ଯସ୍ତୈଃ କିମୁ ଦୀର୍ଘକାଲଵିମଲୈର୍ଵ୍ଯାଧିପ୍ରଦୈର୍ଦୁଷ୍କରୈଃ
ପ୍ରାଣାଯାମଶତୈରନେକକରଣୈର୍ଦୁଃଖାତ୍ମକୈର୍ଦୁର୍ଜଯୈଃ ।
ଯସ୍ମିନ୍ନଭ୍ଯୁଦିତେ ଵିନଶ୍ଯତି ବଲୀ ଵାଯୁଃ ସ୍ଵଯଂ ତତ୍^କ୍ଷଣାତ୍
ପ୍ରାପ୍ତୁଂ ତତ୍ସହଜସ୍ଵଭାଵମନିଶଂ ସେଵେତ ଚୈକଂ ଗୁରୁମ୍ ॥ 100 ॥

ଜ୍ଞାନଂ ଵିନା ମୁକ୍ତିପଦଂ ଲଭ୍ଯତେ ଗୁରୁଭକ୍ତିତଃ ।
ଗୁରୋସ୍ସମାନତୋ ନାନ୍ଯତ୍ ସାଧନଂ ଗୁରୁମାର୍ଗିଣାମ୍ ॥ 101 ॥

ଯସ୍ମାତ୍ପରତରଂ ନାସ୍ତି ନେତି ନେତୀତି ଵୈ ଶ୍ରୁତିଃ ।
ମନସା ଵଚସା ଚୈଵ ସତ୍ଯମାରାଧଯେଦ୍ଗୁରୁମ୍ ॥ 102 ॥

ଗୁରୋଃ କୃପାପ୍ରସାଦେନ ବ୍ରହ୍ମଵିଷ୍ଣୁମହେଶ୍ଵରାଃ ।
ସାମର୍ଥ୍ଯମଭଜନ୍ ସର୍ଵେ ସୃଷ୍ଟିସ୍ଥିତ୍ଯଂତକର୍ମଣି ॥ 103 ॥

ଦେଵକିନ୍ନରଗଂଧର୍ଵାଃ ପିତୃଯକ୍ଷାସ୍ତୁ ତୁଂବୁରଃ ।
ମୁନଯୋଽପି ନ ଜାନଂତି ଗୁରୁଶୁଶ୍ରୂଷଣେ ଵିଧିମ୍ ॥ 104 ॥

ତାର୍କିକାଶ୍ଛାଂଦସାଶ୍ଚୈଵ ଦୈଵଜ୍ଞାଃ କର୍ମଠାଃ ପ୍ରିଯେ ।
ଲୌକିକାସ୍ତେ ନ ଜାନଂତି ଗୁରୁତତ୍ତ୍ଵଂ ନିରାକୁଲମ୍ ॥ 105 ॥

ମହାହଂକାରଗର୍ଵେଣ ତତୋଵିଦ୍ଯାବଲେନ ଚ ।
ଭ୍ରମଂତି ଚାସ୍ମିନ୍ ସଂସାରେ ଘଟୀଯଂତ୍ରଂ ଯଥା ପୁନଃ ॥ 106 ॥

ଯଜ୍ଞିନୋଽପି ନ ମୁକ୍ତାଃ ସ୍ଯୁଃ ନ ମୁକ୍ତା ଯୋଗିନସ୍ତଥା ।
ତାପସା ଅପି ନୋ ମୁକ୍ତା ଗୁରୁତତ୍ତ୍ଵାତ୍ପରାଙ୍ମୁଖାଃ ॥ 107 ॥

ନ ମୁକ୍ତାସ୍ତୁ ଚ ଗଂଧର୍ଵାଃ ପିତୃଯକ୍ଷାସ୍ତୁ ଚାରଣାଃ ।
ଋଷଯଃ ସିଦ୍ଧଦେଵାଦ୍ଯା ଗୁରୁସେଵାପରାଙ୍ମୁଖାଃ ॥ 108 ॥

ଇତି ଶ୍ରୀସ୍କଂଦପୁରାଣେ ଉତ୍ତରଖଂଡେ ଉମାମହେଶ୍ଵର ସଂଵାଦେ
ଶ୍ରୀ ଗୁରୁଗୀତାଯାଂ ପ୍ରଥମୋଽଧ୍ଯାଯଃ ॥