ମୁଦାକରାତ୍ତ ମୋଦକଂ ସଦା ଵିମୁକ୍ତି ସାଧକମ୍ ।
କଳାଧରାଵତଂସକଂ ଵିଲାସିଲୋକ ରକ୍ଷକମ୍ ।
ଅନାଯକୈକ ନାଯକଂ ଵିନାଶିତେଭ ଦୈତ୍ଯକମ୍ ।
ନତାଶୁଭାଶୁ ନାଶକଂ ନମାମି ତଂ ଵିନାଯକମ୍ ॥ 1 ॥
ନତେତରାତି ଭୀକରଂ ନଵୋଦିତାର୍କ ଭାସ୍ଵରମ୍ ।
ନମତ୍ସୁରାରି ନିର୍ଜରଂ ନତାଧିକାପଦୁଦ୍ଢରମ୍ ।
ସୁରେଶ୍ଵରଂ ନିଧୀଶ୍ଵରଂ ଗଜେଶ୍ଵରଂ ଗଣେଶ୍ଵରମ୍ ।
ମହେଶ୍ଵରଂ ତମାଶ୍ରଯେ ପରାତ୍ପରଂ ନିରଂତରମ୍ ॥ 2 ॥
ସମସ୍ତ ଲୋକ ଶଂକରଂ ନିରସ୍ତ ଦୈତ୍ଯ କୁଂଜରମ୍ ।
ଦରେତରୋଦରଂ ଵରଂ ଵରେଭ ଵକ୍ତ୍ରମକ୍ଷରମ୍ ।
କୃପାକରଂ କ୍ଷମାକରଂ ମୁଦାକରଂ ଯଶସ୍କରମ୍ ।
ମନସ୍କରଂ ନମସ୍କୃତାଂ ନମସ୍କରୋମି ଭାସ୍ଵରମ୍ ॥ 3 ॥
ଅକିଂଚନାର୍ତି ମାର୍ଜନଂ ଚିରଂତନୋକ୍ତି ଭାଜନମ୍ ।
ପୁରାରି ପୂର୍ଵ ନଂଦନଂ ସୁରାରି ଗର୍ଵ ଚର୍ଵଣମ୍ ।
ପ୍ରପଂଚ ନାଶ ଭୀଷଣଂ ଧନଂଜଯାଦି ଭୂଷଣମ୍ ।
କପୋଲ ଦାନଵାରଣଂ ଭଜେ ପୁରାଣ ଵାରଣମ୍ ॥ 4 ॥
ନିତାଂତ କାଂତି ଦଂତ କାଂତି ମଂତ କାଂତି କାତ୍ମଜମ୍ ।
ଅଚିଂତ୍ଯ ରୂପମଂତ ହୀନ ମଂତରାଯ କୃଂତନମ୍ ।
ହୃଦଂତରେ ନିରଂତରଂ ଵସଂତମେଵ ଯୋଗିନାମ୍ ।
ତମେକଦଂତମେଵ ତଂ ଵିଚିଂତଯାମି ସଂତତମ୍ ॥ 5 ॥
ମହାଗଣେଶ ପଂଚରତ୍ନମାଦରେଣ ଯୋଽନ୍ଵହମ୍ ।
ପ୍ରଜଲ୍ପତି ପ୍ରଭାତକେ ହୃଦି ସ୍ମରନ୍ ଗଣେଶ୍ଵରମ୍ ।
ଅରୋଗତାମଦୋଷତାଂ ସୁସାହିତୀଂ ସୁପୁତ୍ରତାମ୍ ।
ସମାହିତାଯୁ ରଷ୍ଟଭୂତି ମଭ୍ଯୁପୈତି ସୋଽଚିରାତ୍ ॥
Browse Related Categories:
