ଦେଵ୍ଯୁଵାଚ
ଦେଵଦେଵ! ମହାଦେଵ! ତ୍ରିକାଲଜ୍ଞ! ମହେଶ୍ଵର!
କରୁଣାକର ଦେଵେଶ! ଭକ୍ତାନୁଗ୍ରହକାରକ! ॥
ଅଷ୍ଟୋତ୍ତର ଶତଂ ଲକ୍ଷ୍ମ୍ଯାଃ ଶ୍ରୋତୁମିଚ୍ଛାମି ତତ୍ତ୍ଵତଃ ॥
ଈଶ୍ଵର ଉଵାଚ
ଦେଵି! ସାଧୁ ମହାଭାଗେ ମହାଭାଗ୍ଯ ପ୍ରଦାଯକମ୍ ।
ସର୍ଵୈଶ୍ଵର୍ଯକରଂ ପୁଣ୍ଯଂ ସର୍ଵପାପ ପ୍ରଣାଶନମ୍ ॥
ସର୍ଵଦାରିଦ୍ର୍ଯ ଶମନଂ ଶ୍ରଵଣାଦ୍ଭୁକ୍ତି ମୁକ୍ତିଦମ୍ ।
ରାଜଵଶ୍ଯକରଂ ଦିଵ୍ଯଂ ଗୁହ୍ଯାଦ୍-ଗୁହ୍ଯତରଂ ପରମ୍ ॥
ଦୁର୍ଲଭଂ ସର୍ଵଦେଵାନାଂ ଚତୁଷ୍ଷଷ୍ଟି କଳାସ୍ପଦମ୍ ।
ପଦ୍ମାଦୀନାଂ ଵରାଂତାନାଂ ନିଧୀନାଂ ନିତ୍ଯଦାଯକମ୍ ॥
ସମସ୍ତ ଦେଵ ସଂସେଵ୍ଯଂ ଅଣିମାଦ୍ଯଷ୍ଟ ସିଦ୍ଧିଦମ୍ ।
କିମତ୍ର ବହୁନୋକ୍ତେନ ଦେଵୀ ପ୍ରତ୍ଯକ୍ଷଦାଯକମ୍ ॥
ତଵ ପ୍ରୀତ୍ଯାଦ୍ଯ ଵକ୍ଷ୍ଯାମି ସମାହିତମନାଶ୍ଶୃଣୁ ।
ଅଷ୍ଟୋତ୍ତର ଶତସ୍ଯାସ୍ଯ ମହାଲକ୍ଷ୍ମିସ୍ତୁ ଦେଵତା ॥
କ୍ଲୀଂ ବୀଜ ପଦମିତ୍ଯୁକ୍ତଂ ଶକ୍ତିସ୍ତୁ ଭୁଵନେଶ୍ଵରୀ ।
ଅଂଗନ୍ଯାସଃ କରନ୍ଯାସଃ ସ ଇତ୍ଯାଦି ପ୍ରକୀର୍ତିତଃ ॥
ଧ୍ଯାନଂ
ଵଂଦେ ପଦ୍ମକରାଂ ପ୍ରସନ୍ନଵଦନାଂ ସୌଭାଗ୍ଯଦାଂ ଭାଗ୍ଯଦାଂ
ହସ୍ତାଭ୍ଯାମଭଯପ୍ରଦାଂ ମଣିଗଣୈଃ ନାନାଵିଧୈଃ ଭୂଷିତାମ୍ ।
ଭକ୍ତାଭୀଷ୍ଟ ଫଲପ୍ରଦାଂ ହରିହର ବ୍ରହ୍ମାଧିଭିସ୍ସେଵିତାଂ
ପାର୍ଶ୍ଵେ ପଂକଜ ଶଂଖପଦ୍ମ ନିଧିଭିଃ ଯୁକ୍ତାଂ ସଦା ଶକ୍ତିଭିଃ ॥
ସରସିଜ ନଯନେ ସରୋଜହସ୍ତେ ଧଵଳ ତରାଂଶୁକ ଗଂଧମାଲ୍ଯ ଶୋଭେ ।
ଭଗଵତି ହରିଵଲ୍ଲଭେ ମନୋଜ୍ଞେ ତ୍ରିଭୁଵନ ଭୂତିକରି ପ୍ରସୀଦମହ୍ଯମ୍ ॥
ଓଂ
ପ୍ରକୃତିଂ ଵିକୃତିଂ ଵିଦ୍ଯାଂ ସର୍ଵଭୂତ-ହିତପ୍ରଦାମ୍ ।
ଶ୍ରଦ୍ଧାଂ ଵିଭୂତିଂ ସୁରଭିଂ ନମାମି ପରମାତ୍ମିକାମ୍ ॥ 1 ॥
ଵାଚଂ ପଦ୍ମାଲଯାଂ ପଦ୍ମାଂ ଶୁଚିଂ ସ୍ଵାହାଂ ସ୍ଵଧାଂ ସୁଧାମ୍ ।
ଧନ୍ଯାଂ ହିରଣ୍ଯଯୀଂ ଲକ୍ଷ୍ମୀଂ ନିତ୍ଯପୁଷ୍ଟାଂ ଵିଭାଵରୀମ୍ ॥ 2 ॥
ଅଦିତିଂ ଚ ଦିତିଂ ଦୀପ୍ତାଂ ଵସୁଧାଂ ଵସୁଧାରିଣୀମ୍ ।
ନମାମି କମଲାଂ କାଂତାଂ କାମ୍ଯାଂ କ୍ଷୀରୋଦସଂଭଵାମ୍ ॥ 3 ॥
ଅନୁଗ୍ରହପ୍ରଦାଂ ବୁଦ୍ଧି-ମନଘାଂ ହରିଵଲ୍ଲଭାମ୍ ।
ଅଶୋକା-ମମୃତାଂ ଦୀପ୍ତାଂ ଲୋକଶୋକଵିନାଶିନୀମ୍ ॥ 4 ॥
ନମାମି ଧର୍ମନିଲଯାଂ କରୁଣାଂ ଲୋକମାତରମ୍ ।
ପଦ୍ମପ୍ରିଯାଂ ପଦ୍ମହସ୍ତାଂ ପଦ୍ମାକ୍ଷୀଂ ପଦ୍ମସୁଂଦରୀମ୍ ॥ 5 ॥
ପଦ୍ମୋଦ୍ଭଵାଂ ପଦ୍ମମୁଖୀଂ ପଦ୍ମନାଭପ୍ରିଯାଂ ରମାମ୍ ।
ପଦ୍ମମାଲାଧରାଂ ଦେଵୀଂ ପଦ୍ମିନୀଂ ପଦ୍ମଗଂଧିନୀମ୍ ॥ 6 ॥
ପୁଣ୍ଯଗଂଧାଂ ସୁପ୍ରସନ୍ନାଂ ପ୍ରସାଦାଭିମୁଖୀଂ ପ୍ରଭାମ୍ ।
ନମାମି ଚଂଦ୍ରଵଦନାଂ ଚଂଦ୍ରାଂ ଚଂଦ୍ରସହୋଦରୀମ୍ ॥ 7 ॥
ଚତୁର୍ଭୁଜାଂ ଚଂଦ୍ରରୂପା-ମିଂଦିରା-ମିଂଦୁଶୀତଲାମ୍ ।
ଆହ୍ଲାଦ ଜନନୀଂ ପୁଷ୍ଟିଂ ଶିଵାଂ ଶିଵକରୀଂ ସତୀମ୍ ॥ 8 ॥
ଵିମଲାଂ ଵିଶ୍ଵଜନନୀଂ ତୁଷ୍ଟିଂ ଦାରିଦ୍ର୍ଯନାଶିନୀମ୍ ।
ପ୍ରୀତିପୁଷ୍କରିଣୀଂ ଶାଂତାଂ ଶୁକ୍ଲମାଲ୍ଯାଂବରାଂ ଶ୍ରିଯମ୍ ॥ 9 ॥
ଭାସ୍କରୀଂ ବିଲ୍ଵନିଲଯାଂ ଵରାରୋହାଂ ଯଶସ୍ଵିନୀମ୍ ।
ଵସୁଂଧରା ମୁଦାରାଂଗାଂ ହରିଣୀଂ ହେମମାଲିନୀମ୍ ॥ 10 ॥
ଧନଧାନ୍ଯକରୀଂ ସିଦ୍ଧିଂ ସଦାସୌମ୍ଯାଂ ଶୁଭପ୍ରଦାମ୍ ।
ନୃପଵେଶ୍ମଗତାଂ ନଂଦାଂ ଵରଲକ୍ଷ୍ମୀଂ ଵସୁପ୍ରଦାମ୍ ॥ 11 ॥
ଶୁଭାଂ ହିରଣ୍ଯପ୍ରାକାରାଂ ସମୁଦ୍ରତନଯାଂ ଜଯାମ୍ ।
ନମାମି ମଂଗଳାଂ ଦେଵୀଂ ଵିଷ୍ଣୁଵକ୍ଷଃସ୍ଥଲସ୍ଥିତାମ୍ ॥ 12 ॥
ଵିଷ୍ଣୁପତ୍ନୀଂ, ପ୍ରସନ୍ନାକ୍ଷୀଂ ନାରାଯଣସମାଶ୍ରିତାମ୍ ।
ଦାରିଦ୍ର୍ଯଧ୍ଵଂସିନୀଂ ଦେଵୀଂ ସର୍ଵୋପଦ୍ରଵଵାରିଣୀମ୍ ॥ 13 ॥
ନଵଦୁର୍ଗାଂ ମହାକାଳୀଂ ବ୍ରହ୍ମଵିଷ୍ଣୁଶିଵାତ୍ମିକାମ୍ ।
ତ୍ରିକାଲଜ୍ଞାନସଂପନ୍ନାଂ ନମାମି ଭୁଵନେଶ୍ଵରୀମ୍ ॥ 14 ॥
ଲକ୍ଷ୍ମୀଂ କ୍ଷୀରସମୁଦ୍ରରାଜ ତନଯାଂ ଶ୍ରୀରଂଗଧାମେଶ୍ଵରୀମ୍ ।
ଦାସୀଭୂତ ସମସ୍ତଦେଵ ଵନିତାଂ ଲୋକୈକ ଦୀପାଂକୁରାମ୍ ॥
ଶ୍ରୀମନ୍ମଂଦ କଟାକ୍ଷ ଲବ୍ଧ ଵିଭଵଦ୍-ବ୍ରହ୍ମେଂଦ୍ର ଗଂଗାଧରାମ୍ ।
ତ୍ଵାଂ ତ୍ରୈଲୋକ୍ଯ କୁଟୁଂବିନୀଂ ସରସିଜାଂ ଵଂଦେ ମୁକୁଂଦପ୍ରିଯାମ୍ ॥ 15 ॥
ମାତର୍ନମାମି! କମଲେ! କମଲାଯତାକ୍ଷି!
ଶ୍ରୀ ଵିଷ୍ଣୁ ହୃତ୍-କମଲଵାସିନି! ଵିଶ୍ଵମାତଃ!
କ୍ଷୀରୋଦଜେ କମଲ କୋମଲ ଗର୍ଭଗୌରି!
ଲକ୍ଷ୍ମୀ! ପ୍ରସୀଦ ସତତଂ ସମତାଂ ଶରଣ୍ଯେ ॥ 16 ॥
ତ୍ରିକାଲଂ ଯୋ ଜପେତ୍ ଵିଦ୍ଵାନ୍ ଷଣ୍ମାସଂ ଵିଜିତେଂଦ୍ରିଯଃ ।
ଦାରିଦ୍ର୍ଯ ଧ୍ଵଂସନଂ କୃତ୍ଵା ସର୍ଵମାପ୍ନୋତ୍-ଯଯତ୍ନତଃ ।
ଦେଵୀନାମ ସହସ୍ରେଷୁ ପୁଣ୍ଯମଷ୍ଟୋତ୍ତରଂ ଶତମ୍ ।
ଯେନ ଶ୍ରିଯ ମଵାପ୍ନୋତି କୋଟିଜନ୍ମ ଦରିଦ୍ରତଃ ॥ 17 ॥
ଭୃଗୁଵାରେ ଶତଂ ଧୀମାନ୍ ପଠେତ୍ ଵତ୍ସରମାତ୍ରକମ୍ ।
ଅଷ୍ଟୈଶ୍ଵର୍ଯ ମଵାପ୍ନୋତି କୁବେର ଇଵ ଭୂତଲେ ॥
ଦାରିଦ୍ର୍ଯ ମୋଚନଂ ନାମ ସ୍ତୋତ୍ରମଂବାପରଂ ଶତମ୍ ।
ଯେନ ଶ୍ରିଯ ମଵାପ୍ନୋତି କୋଟିଜନ୍ମ ଦରିଦ୍ରତଃ ॥ 18 ॥
ଭୁକ୍ତ୍ଵାତୁ ଵିପୁଲାନ୍ ଭୋଗାନ୍ ଅଂତେ ସାଯୁଜ୍ଯମାପ୍ନୁଯାତ୍ ।
ପ୍ରାତଃକାଲେ ପଠେନ୍ନିତ୍ଯଂ ସର୍ଵ ଦୁଃଖୋପ ଶାଂତଯେ ।
ପଠଂତୁ ଚିଂତଯେଦ୍ଦେଵୀଂ ସର୍ଵାଭରଣ ଭୂଷିତାମ୍ ॥ 19 ॥
ଇତି ଶ୍ରୀ ଲକ୍ଷ୍ମ୍ଯଷ୍ଟୋତ୍ତରଶତନାମସ୍ତୋତ୍ରଂ ସଂପୂର୍ଣଂ
Browse Related Categories:
