ପ୍ରଥମ ଭାଗଃ - ଆନଂଦ ଲହରି
ଭୁମୌସ୍ଖଲିତ ପାଦାନାମ୍ ଭୂମିରେଵା ଵଲଂବନମ୍ ।
ତ୍ଵଯୀ ଜାତା ପରାଧାନାମ୍ ତ୍ଵମେଵ ଶରଣମ୍ ଶିଵେ ॥
ଶିଵଃ ଶକ୍ତ୍ଯା ଯୁକ୍ତୋ ଯଦି ଭଵତି ଶକ୍ତଃ ପ୍ରଭଵିତୁଂ
ନ ଚେଦେଵଂ ଦେଵୋ ନ ଖଲୁ କୁଶଲଃ ସ୍ପଂଦିତୁମପି ।
ଅତସ୍ତ୍ଵାମାରାଧ୍ଯାଂ ହରିହରଵିରିଂଚାଦିଭିରପି
ପ୍ରଣଂତୁଂ ସ୍ତୋତୁଂ ଵା କଥମକୃତପୁଣ୍ଯଃ ପ୍ରଭଵତି ॥ 1 ॥
ତନୀଯାଂସଂ ପାଂସୁଂ ତଵ ଚରଣପଂକେରୁହଭଵଂ
ଵିରିଂଚିସ୍ସଂଚିନ୍ଵନ୍ ଵିରଚଯତି ଲୋକାନଵିକଲମ୍ ।
ଵହତ୍ଯେନଂ ଶୌରିଃ କଥମପି ସହସ୍ରେଣ ଶିରସାଂ
ହରସ୍ସଂକ୍ଷୁଦ୍ଯୈନଂ ଭଜତି ଭସିତୋଦ୍ଧୂଲନଵିଧିମ୍ ॥ 2 ॥
ଅଵିଦ୍ଯାନାମଂତ-ସ୍ତିମିର-ମିହିରଦ୍ଵୀପନଗରୀ
ଜଡାନାଂ ଚୈତନ୍ଯ-ସ୍ତବକ-ମକରଂଦ-ସ୍ରୁତିଝରୀ ।
ଦରିଦ୍ରାଣାଂ ଚିଂତାମଣିଗୁଣନିକା ଜନ୍ମଜଲଧୌ
ନିମଗ୍ନାନାଂ ଦଂଷ୍ଟ୍ରା ମୁରରିପୁ-ଵରାହସ୍ଯ ଭଵତି ॥ 3 ॥
ତ୍ଵଦନ୍ଯଃ ପାଣିଭ୍ଯାମଭଯଵରଦୋ ଦୈଵତଗଣଃ
ତ୍ଵମେକା ନୈଵାସି ପ୍ରକଟିତଵରାଭୀତ୍ଯଭିନଯା ।
ଭଯାତ୍ ତ୍ରାତୁଂ ଦାତୁଂ ଫଲମପି ଚ ଵାଂଛାସମଧିକଂ
ଶରଣ୍ଯେ ଲୋକାନାଂ ତଵ ହି ଚରଣାଵେଵ ନିପୁଣୌ ॥ 4 ॥
ହରିସ୍ତ୍ଵାମାରାଧ୍ଯ ପ୍ରଣତଜନସୌଭାଗ୍ଯଜନନୀଂ
ପୁରା ନାରୀ ଭୂତ୍ଵା ପୁରରିପୁମପି କ୍ଷୋଭମନଯତ୍ ।
ସ୍ମରୋଽପି ତ୍ଵାଂ ନତ୍ଵା ରତିନଯନଲେହ୍ଯେନ ଵପୁଷା
ମୁନୀନାମପ୍ଯଂତଃ ପ୍ରଭଵତି ହି ମୋହାଯ ମହତାମ୍ ॥ 5 ॥
ଧନୁଃ ପୌଷ୍ପଂ ମୌର୍ଵୀ ମଧୁକରମଯୀ ପଂଚ ଵିଶିଖାଃ
ଵସଂତଃ ସାମଂତୋ ମଲଯମରୁଦାଯୋଧନରଥଃ ।
ତଥାପ୍ଯେକଃ ସର୍ଵଂ ହିମଗିରିସୁତେ କାମପି କୃପାମ୍
ଅପାଂଗାତ୍ତେ ଲବ୍ଧ୍ଵା ଜଗଦିଦ-ମନଂଗୋ ଵିଜଯତେ ॥ 6 ॥
କ୍ଵଣତ୍କାଂଚୀଦାମା କରିକଲଭକୁଂଭସ୍ତନନତା
ପରିକ୍ଷୀଣା ମଧ୍ଯେ ପରିଣତଶରଚ୍ଚଂଦ୍ରଵଦନା ।
ଧନୁର୍ବାଣାନ୍ ପାଶଂ ସୃଣିମପି ଦଧାନା କରତଲୈଃ
ପୁରସ୍ତାଦାସ୍ତାଂ ନଃ ପୁରମଥିତୁରାହୋପୁରୁଷିକା ॥ 7 ॥
ସୁଧାସିଂଧୋର୍ମଧ୍ଯେ ସୁରଵିଟପିଵାଟୀପରିଵୃତେ
ମଣିଦ୍ଵୀପେ ନୀପୋପଵନଵତି ଚିଂତାମଣିଗୃହେ ।
ଶିଵାକାରେ ମଂଚେ ପରମଶିଵପର୍ଯଂକନିଲଯାଂ
ଭଜଂତି ତ୍ଵାଂ ଧନ୍ଯାଃ କତିଚନ ଚିଦାନଂଦଲହରୀମ୍ ॥ 8 ॥
ମହୀଂ ମୂଲାଧାରେ କମପି ମଣିପୂରେ ହୁତଵହଂ
ସ୍ଥିତଂ ସ୍ଵାଧିଷ୍ଠାନେ ହୃଦି ମରୁତମାକାଶମୁପରି ।
ମନୋଽପି ଭ୍ରୂମଧ୍ଯେ ସକଲମପି ଭିତ୍ଵା କୁଲପଥଂ
ସହସ୍ରାରେ ପଦ୍ମେ ସହ ରହସି ପତ୍ଯା ଵିହରସେ ॥ 9 ॥
ସୁଧାଧାରାସାରୈଶ୍ଚରଣଯୁଗଲାଂତର୍ଵିଗଲିତୈଃ
ପ୍ରପଂଚଂ ସିଂଚଂତୀ ପୁନରପି ରସାମ୍ନାଯମହସଃ ।
ଅଵାପ୍ଯ ସ୍ଵାଂ ଭୂମିଂ ଭୁଜଗନିଭମଧ୍ଯୁଷ୍ଟଵଲଯଂ
ସ୍ଵମାତ୍ମାନଂ କୃତ୍ଵା ସ୍ଵପିଷି କୁଲକୁଂଡେ କୁହରିଣି ॥ 10 ॥
ଚତୁର୍ଭିଃ ଶ୍ରୀକଂଠୈଃ ଶିଵଯୁଵତିଭିଃ ପଂଚଭିରପି
ପ୍ରଭିନ୍ନାଭିଃ ଶଂଭୋର୍ନଵଭିରପି ମୂଲପ୍ରକୃତିଭିଃ ।
ଚତୁଶ୍ଚତ୍ଵାରିଂଶଦ୍ଵସୁଦଲକଲାଶ୍ରତ୍ରିଵଲଯ-
ତ୍ରିରେଖାଭିଃ ସାର୍ଧଂ ତଵ ଶରଣକୋଣାଃ ପରିଣତାଃ ॥ 11 ॥
ତ୍ଵଦୀଯଂ ସୌଂଦର୍ଯଂ ତୁହିନଗିରିକନ୍ଯେ ତୁଲଯିତୁଂ
କଵୀଂଦ୍ରାଃ କଲ୍ପଂତେ କଥମପି ଵିରିଂଚିପ୍ରଭୃତଯଃ ।
ଯଦାଲୋକୌତ୍ସୁକ୍ଯାଦମରଲଲନା ଯାଂତି ମନସା
ତପୋଭିର୍ଦୁଷ୍ପ୍ରାପାମପି ଗିରିଶସାଯୁଜ୍ଯପଦଵୀମ୍ ॥ 12 ॥
ନରଂ ଵର୍ଷୀଯାଂସଂ ନଯନଵିରସଂ ନର୍ମସୁ ଜଡଂ
ତଵାପାଂଗାଲୋକେ ପତିତମନୁଧାଵଂତି ଶତଶଃ ।
ଗଲଦ୍ଵେଣୀବଂଧାଃ କୁଚକଲଶଵିସ୍ରସ୍ତସିଚଯା
ହଠାତ୍ ତ୍ରୁଟ୍ଯତ୍କାଂଚ୍ଯୋ ଵିଗଲିତଦୁକୂଲା ଯୁଵତଯଃ ॥ 13 ॥
କ୍ଷିତୌ ଷଟ୍ପଂଚାଶଦ୍ ଦ୍ଵିସମଧିକପଂଚାଶଦୁଦକେ
ହୁତାଶେ ଦ୍ଵାଷଷ୍ଟିଶ୍ଚତୁରଧିକପଂଚାଶଦନିଲେ ।
ଦିଵି ଦ୍ଵିଷ୍ଷଟ୍ତ୍ରିଂଶନ୍ମନସି ଚ ଚତୁଷ୍ଷଷ୍ଟିରିତି ଯେ
ମଯୂଖାସ୍ତେଷାମପ୍ଯୁପରି ତଵ ପାଦାଂବୁଜଯୁଗମ୍ ॥ 14 ॥
ଶରଜ୍ଜ୍ଯୋତ୍ସ୍ନାଶୁଦ୍ଧାଂ ଶଶିଯୁତଜଟାଜୂଟମକୁଟାଂ
ଵରତ୍ରାସତ୍ରାଣସ୍ଫଟିକଘଟିକାପୁସ୍ତକକରାମ୍ ।
ସକୃନ୍ନ ତ୍ଵା ନତ୍ଵା କଥମିଵ ସତାଂ ସଂନ୍ନିଦଧତେ
ମଧୁକ୍ଷୀରଦ୍ରାକ୍ଷାମଧୁରିମଧୁରୀଣାଃ ଭଣିତଯଃ ॥ 15॥ ଵର୍ ଫଣିତଯଃ
କଵୀଂଦ୍ରାଣାଂ ଚେତଃକମଲଵନବାଲାତପରୁଚିଂ
ଭଜଂତେ ଯେ ସଂତଃ କତିଚିଦରୁଣାମେଵ ଭଵତୀମ୍ ।
ଵିରିଂଚିପ୍ରେଯସ୍ଯାସ୍ତରୁଣତରଶଋଂଗାରଲହରୀ-
ଗଭୀରାଭିର୍ଵାଗ୍ଭିର୍ଵିଦଧତି ସତାଂ ରଂଜନମମୀ ॥ 16 ॥
ସଵିତ୍ରୀଭିର୍ଵାଚାଂ ଶଶିମଣିଶିଲାଭଂଗରୁଚିଭିଃ
ଵଶିନ୍ଯାଦ୍ଯାଭିସ୍ତ୍ଵାଂ ସହ ଜନନି ସଂଚିଂତଯତି ଯଃ ।
ସ କର୍ତା କାଵ୍ଯାନାଂ ଭଵତି ମହତାଂ ଭଂଗିରୁଚିଭିଃ
ଵଚୋଭିର୍ଵାଗ୍ଦେଵୀଵଦନକମଲାମୋଦମଧୁରୈଃ ॥ 17 ॥
ତନୁଚ୍ଛାଯାଭିସ୍ତେ ତରୁଣତରଣିଶ୍ରୀସରଣିଭିଃ
ଦିଵଂ ସର୍ଵାମୁର୍ଵୀମରୁଣିମନି ମଗ୍ନାଂ ସ୍ମରତି ଯଃ ।
ଭଵଂତ୍ଯସ୍ଯ ତ୍ରସ୍ଯଦ୍ଵନହରିଣଶାଲୀନନଯନାଃ
ସହୋର୍ଵଶ୍ଯା ଵଶ୍ଯାଃ କତି କତି ନ ଗୀର୍ଵାଣଗଣିକାଃ ॥ 18 ॥
ମୁଖଂ ବିଂଦୁଂ କୃତ୍ଵା କୁଚଯୁଗମଧସ୍ତସ୍ଯ ତଦଧୋ
ହରାର୍ଧଂ ଧ୍ଯାଯେଦ୍ଯୋ ହରମହିଷି ତେ ମନ୍ମଥକଲାମ୍ ।
ସ ସଦ୍ଯଃ ସଂକ୍ଷୋଭଂ ନଯତି ଵନିତା ଇତ୍ଯତିଲଘୁ
ତ୍ରିଲୋକୀମପ୍ଯାଶୁ ଭ୍ରମଯତି ରଵୀଂଦୁସ୍ତନଯୁଗାମ୍ ॥ 19 ॥
କିରଂତୀମଂଗେଭ୍ଯଃ କିରଣନିକୁରଂବାମୃତରସଂ
ହୃଦି ତ୍ଵାମାଧତ୍ତେ ହିମକରଶିଲାମୂର୍ତିମିଵ ଯଃ ।
ସ ସର୍ପାଣାଂ ଦର୍ପଂ ଶମଯତି ଶକୁଂତାଧିପ ଇଵ
ଜ୍ଵରପ୍ଲୁଷ୍ଟାନ୍ ଦୃଷ୍ଟ୍ଯା ସୁଖଯତି ସୁଧାଧାରସିରଯା ॥ 20 ॥
ତଟିଲ୍ଲେଖାତନ୍ଵୀଂ ତପନଶଶିଵୈଶ୍ଵାନରମଯୀଂ
ନିଷଣ୍ଣାଂ ଷଣ୍ଣାମପ୍ଯୁପରି କମଲାନାଂ ତଵ କଲାମ୍ ।
ମହାପଦ୍ମାଟଵ୍ଯାଂ ମୃଦିତମଲମାଯେନ ମନସା
ମହାଂତଃ ପଶ୍ଯଂତୋ ଦଧତି ପରମାହ୍ଲାଦଲହରୀମ୍ ॥ 21 ॥
ଭଵାନି ତ୍ଵଂ ଦାସେ ମଯି ଵିତର ଦୃଷ୍ଟିଂ ସକରୁଣା-
ମିତି ସ୍ତୋତୁଂ ଵାଂଛନ୍ କଥଯତି ଭଵାନି ତ୍ଵମିତି ଯଃ ।
ତଦୈଵ ତ୍ଵଂ ତସ୍ମୈ ଦିଶସି ନିଜସାଯୁଜ୍ଯପଦଵୀଂ
ମୁକୁଂଦବ୍ରହ୍ମେଂଦ୍ରସ୍ଫୁଟମକୁଟନୀରାଜିତପଦାମ୍ ॥ 22 ॥
ତ୍ଵଯା ହୃତ୍ଵା ଵାମଂ ଵପୁରପରିତୃପ୍ତେନ ମନସା
ଶରୀରାର୍ଧଂ ଶଂଭୋରପରମପି ଶଂକେ ହୃତମଭୂତ୍ ।
ଯଦେତତ୍ତ୍ଵଦ୍ରୂପଂ ସକଲମରୁଣାଭଂ ତ୍ରିନଯନଂ
କୁଚାଭ୍ଯାମାନମ୍ରଂ କୁଟିଲଶଶିଚୂଡାଲମକୁଟମ୍ ॥ 23 ॥
ଜଗତ୍ସୂତେ ଧାତା ହରିରଵତି ରୁଦ୍ରଃ କ୍ଷପଯତେ
ତିରସ୍କୁର୍ଵନ୍ନେତତ୍ସ୍ଵମପି ଵପୁରୀଶସ୍ତିରଯତି ।
ସଦାପୂର୍ଵଃ ସର୍ଵଂ ତଦିଦମନୁଗୃହ୍ଣାତି ଚ ଶିଵ-
ସ୍ତଵାଜ୍ଞାମାଲଂବ୍ଯ କ୍ଷଣଚଲିତଯୋର୍ଭ୍ରୂଲତିକଯୋଃ ॥ 24 ॥
ତ୍ରଯାଣାଂ ଦେଵାନାଂ ତ୍ରିଗୁଣଜନିତାନାଂ ତଵ ଶିଵେ
ଭଵେତ୍ ପୂଜା ପୂଜା ତଵ ଚରଣଯୋର୍ଯା ଵିରଚିତା ।
ତଥା ହି ତ୍ଵତ୍ପାଦୋଦ୍ଵହନମଣିପୀଠସ୍ଯ ନିକଟେ
ସ୍ଥିତା ହ୍ଯେତେ ଶଶ୍ଵନ୍ମୁକୁଲିତକରୋତ୍ତଂସମକୁଟାଃ ॥ 25 ॥
ଵିରିଂଚିଃ ପଂଚତ୍ଵଂ ଵ୍ରଜତି ହରିରାପ୍ନୋତି ଵିରତିଂ
ଵିନାଶଂ କୀନାଶୋ ଭଜତି ଧନଦୋ ଯାତି ନିଧନମ୍ ।
ଵିତଂଦ୍ରୀ ମାହେଂଦ୍ରୀ ଵିତତିରପି ସଂମୀଲିତଦୃଶା
ମହାସଂହାରେଽସ୍ମିନ୍ ଵିହରତି ସତି ତ୍ଵତ୍ପତିରସୌ ॥ 26 ॥
ଜପୋ ଜଲ୍ପଃ ଶିଲ୍ପଂ ସକଲମପି ମୁଦ୍ରାଵିରଚନା
ଗତିଃ ପ୍ରାଦକ୍ଷିଣ୍ଯକ୍ରମଣମଶନାଦ୍ଯାହୁତିଵିଧିଃ ।
ପ୍ରଣାମସ୍ସଂଵେଶସ୍ସୁଖମଖିଲମାତ୍ମାର୍ପଣଦୃଶା
ସପର୍ଯାପର୍ଯାଯସ୍ତଵ ଭଵତୁ ଯନ୍ମେ ଵିଲସିତମ୍ ॥ 27 ॥
ସୁଧାମପ୍ଯାସ୍ଵାଦ୍ଯ ପ୍ରତିଭଯଜରାମୃତ୍ଯୁହରିଣୀଂ
ଵିପଦ୍ଯଂତେ ଵିଶ୍ଵେ ଵିଧିଶତମଖାଦ୍ଯା ଦିଵିଷଦଃ ।
କରାଲଂ ଯତ୍କ୍ଷ୍ଵେଲଂ କବଲିତଵତଃ କାଲକଲନା
ନ ଶଂଭୋସ୍ତନ୍ମୂଲଂ ତଵ ଜନନି ତାଟଂକମହିମା ॥ 28 ॥
କିରୀଟଂ ଵୈରିଂଚଂ ପରିହର ପୁରଃ କୈଟଭଭିଦଃ
କଠୋରେ କୋଟୀରେ ସ୍ଖଲସି ଜହି ଜଂଭାରିମୁକୁଟମ୍ ।
ପ୍ରଣମ୍ରେଷ୍ଵେତେଷୁ ପ୍ରସଭମୁପଯାତସ୍ଯ ଭଵନଂ
ଭଵସ୍ଯାଭ୍ଯୁତ୍ଥାନେ ତଵ ପରିଜନୋକ୍ତିର୍ଵିଜଯତେ ॥ 29 ॥
ସ୍ଵଦେହୋଦ୍ଭୂତାଭିର୍ଘୃଣିଭିରଣିମାଦ୍ଯାଭିରଭିତୋ
ନିଷେଵ୍ଯେ ନିତ୍ଯେ ତ୍ଵାମହମିତି ସଦା ଭାଵଯତି ଯଃ ।
କିମାଶ୍ଚର୍ଯଂ ତସ୍ଯ ତ୍ରିନଯନସମୃଦ୍ଧିଂ ତୃଣଯତୋ
ମହାସଂଵର୍ତାଗ୍ନିର୍ଵିରଚଯତି ନିରାଜନଵିଧିମ୍ ॥ 30 ॥
ଚତୁଷ୍ଷଷ୍ଟ୍ଯା ତଂତ୍ରୈଃ ସକଲମତିସଂଧାଯ ଭୁଵନଂ
ସ୍ଥିତସ୍ତତ୍ତତ୍ସିଦ୍ଧିପ୍ରସଵପରତଂତ୍ରୈଃ ପଶୁପତିଃ ।
ପୁନସ୍ତ୍ଵନ୍ନିର୍ବଂଧାଦଖିଲପୁରୁଷାର୍ଥୈକଘଟନା-
ସ୍ଵତଂତ୍ରଂ ତେ ତଂତ୍ରଂ କ୍ଷିତିତଲମଵାତୀତରଦିଦମ୍ ॥ 31 ॥
ଶିଵଃ ଶକ୍ତିଃ କାମଃ କ୍ଷିତିରଥ ରଵିଃ ଶୀତକିରଣଃ
ସ୍ମରୋ ହଂସଃ ଶକ୍ରସ୍ତଦନୁ ଚ ପରାମାରହରଯଃ ।
ଅମୀ ହୃଲ୍ଲେଖାଭିସ୍ତିସୃଭିରଵସାନେଷୁ ଘଟିତା
ଭଜଂତେ ଵର୍ଣାସ୍ତେ ତଵ ଜନନି ନାମାଵଯଵତାମ୍ ॥ 32 ॥
ସ୍ମରଂ ଯୋନିଂ ଲକ୍ଷ୍ମୀଂ ତ୍ରିତଯମିଦମାଦୌ ତଵ ମନୋ-
ର୍ନିଧାଯୈକେ ନିତ୍ଯେ ନିରଵଧିମହାଭୋଗରସିକାଃ ।
ଭଜଂତି ତ୍ଵାଂ ଚିଂତାମଣିଗୁନନିବଦ୍ଧାକ୍ଷଵଲଯାଃ
ଶିଵାଗ୍ନୌ ଜୁହ୍ଵଂତଃ ସୁରଭିଘୃତଧାରାହୁତିଶତୈଃ ॥ 33 ॥
ଶରୀରଂ ତ୍ଵଂ ଶଂଭୋଃ ଶଶିମିହିରଵକ୍ଷୋରୁହଯୁଗଂ
ତଵାତ୍ମାନଂ ମନ୍ଯେ ଭଗଵତି ନଵାତ୍ମାନମନଘମ୍ ।
ଅତଶ୍ଶେଷଶ୍ଶେଷୀତ୍ଯଯମୁଭଯସାଧାରଣତଯା
ସ୍ଥିତଃ ସଂବଂଧୋ ଵାଂ ସମରସପରାନଂଦପରଯୋଃ ॥ 34 ॥
ମନସ୍ତ୍ଵଂ ଵ୍ଯୋମ ତ୍ଵଂ ମରୁଦସି ମରୁତ୍ସାରଥିରସି
ତ୍ଵମାପସ୍ତ୍ଵଂ ଭୂମିସ୍ତ୍ଵଯି ପରିଣତାଯାଂ ନ ହି ପରମ୍ ।
ତ୍ଵମେଵ ସ୍ଵାତ୍ମାନଂ ପରିଣମଯିତୁଂ ଵିଶ୍ଵଵପୁଷା
ଚିଦାନଂଦାକାରଂ ଶିଵଯୁଵତି ଭାଵେନ ବିଭୃଷେ ॥ 35 ॥
ତଵାଜ୍ଞାଚକ୍ରସ୍ଥଂ ତପନଶଶିକୋଟିଦ୍ଯୁତିଧରଂ
ପରଂ ଶଂଭୁଂ ଵଂଦେ ପରିମିଲିତପାର୍ଶ୍ଵଂ ପରଚିତା ।
ଯମାରାଧ୍ଯନ୍ ଭକ୍ତ୍ଯା ରଵିଶଶିଶୁଚୀନାମଵିଷଯେ
ନିରାଲୋକେଽଲୋକେ ନିଵସତି ହି ଭାଲୋକଭୁଵନେ ॥ 36 ॥
ଵିଶୁଦ୍ଧୌ ତେ ଶୁଦ୍ଧସ୍ଫଟିକଵିଶଦଂ ଵ୍ଯୋମଜନକଂ
ଶିଵଂ ସେଵେ ଦେଵୀମପି ଶିଵସମାନଵ୍ଯଵସିତାମ୍ ।
ଯଯୋଃ କାଂତ୍ଯା ଯାଂତ୍ଯାଃ ଶଶିକିରଣସାରୂପ୍ଯସରଣେ-
ଵିଧୂତାଂତର୍ଧ୍ଵାଂତା ଵିଲସତି ଚକୋରୀଵ ଜଗତୀ ॥ 37 ॥
ସମୁନ୍ମୀଲତ୍ ସଂଵିତ୍ କମଲମକରଂଦୈକରସିକଂ
ଭଜେ ହଂସଦ୍ଵଂଦ୍ଵଂ କିମପି ମହତାଂ ମାନସଚରମ୍ ।
ଯଦାଲାପାଦଷ୍ଟାଦଶଗୁଣିତଵିଦ୍ଯାପରିଣତି-
ର୍ଯଦାଦତ୍ତେ ଦୋଷାଦ୍ ଗୁଣମଖିଲମଦ୍ଭ୍ଯଃ ପଯ ଇଵ ॥ 38 ॥
ତଵ ସ୍ଵାଧିଷ୍ଠାନେ ହୁତଵହମଧିଷ୍ଠାଯ ନିରତଂ
ତମୀଡେ ସଂଵର୍ତଂ ଜନନି ମହତୀଂ ତାଂ ଚ ସମଯାମ୍ ।
ଯଦାଲୋକେ ଲୋକାନ୍ ଦହତି ମହତି କ୍ରୋଧକଲିତେ
ଦଯାର୍ଦ୍ରା ଯା ଦୃଷ୍ଟିଃ ଶିଶିରମୁପଚାରଂ ରଚଯତି ॥ 39 ॥
ତଟିତ୍ତ୍ଵଂତଂ ଶକ୍ତ୍ଯା ତିମିରପରିପଂଥିଫୁରଣଯା
ସ୍ଫୁରନ୍ନାନାରତ୍ନାଭରଣପରିଣଦ୍ଧେଂଦ୍ରଧନୁଷମ୍ ।
ତଵ ଶ୍ଯାମଂ ମେଘଂ କମପି ମଣିପୂରୈକଶରଣଂ
ନିଷେଵେ ଵର୍ଷଂତଂ ହରମିହିରତପ୍ତଂ ତ୍ରିଭୁଵନମ୍ ॥ 40 ॥
ତଵାଧାରେ ମୂଲେ ସହ ସମଯଯା ଲାସ୍ଯପରଯା
ନଵାତ୍ମାନଂ ମନ୍ଯେ ନଵରସମହାତାଂଡଵନଟମ୍ ।
ଉଭାଭ୍ଯାମେତାଭ୍ଯାମୁଦଯଵିଧିମୁଦ୍ଦିଶ୍ଯ ଦଯଯା
ସନାଥାଭ୍ଯାଂ ଜଜ୍ଞେ ଜନକଜନନୀମଜ୍ଜଗଦିଦମ୍ ॥ 41 ॥
ଦ୍ଵିତୀଯ ଭାଗଃ - ସୌଂଦର୍ଯ ଲହରୀ
ଗତୈର୍ମାଣିକ୍ଯତ୍ଵଂ ଗଗନମଣିଭିଃ ସାଂଦ୍ରଘଟିତଂ
କିରୀଟଂ ତେ ହୈମଂ ହିମଗିରିସୁତେ କୀର୍ତଯତି ଯଃ ।
ସ ନୀଡେଯଚ୍ଛାଯାଚ୍ଛୁରଣଶବଲଂ ଚଂଦ୍ରଶକଲଂ
ଧନୁଃ ଶୌନାସୀରଂ କିମିତି ନ ନିବଧ୍ନାତି ଧିଷଣାମ୍ ॥ 42 ॥
ଧୁନୋତୁ ଧ୍ଵାଂତଂ ନସ୍ତୁଲିତଦଲିତେଂଦୀଵରଵନଂ
ଘନସ୍ନିଗ୍ଧଶ୍ଲକ୍ଷ୍ଣଂ ଚିକୁରନିକୁରୁଂବଂ ତଵ ଶିଵେ ।
ଯଦୀଯଂ ସୌରଭ୍ଯଂ ସହଜମୁପଲବ୍ଧୁଂ ସୁମନସୋ
ଵସଂତ୍ଯସ୍ମିନ୍ ମନ୍ଯେ ଵଲମଥନଵାଟୀଵିଟପିନାମ୍ ॥ 43 ॥
ତନୋତୁ କ୍ଷେମଂ ନସ୍ତଵ ଵଦନସୌଂଦର୍ଯଲହରୀ-
ପରୀଵାହସ୍ରୋତଃସରଣିରିଵ ସୀମଂତସରଣିଃ ।
ଵହଂତୀ ସିଂଦୂରଂ ପ୍ରବଲକବରୀଭାରତିମିର-
ଦ୍ଵିଷାଂ ବୃଂଦୈର୍ବଂଦୀକୃତମିଵ ନଵୀନାର୍କକିରଣମ୍ ॥ 44 ॥
ଅରାଲୈଃ ସ୍ଵାଭାଵ୍ଯାଦଲିକଲଭସଶ୍ରୀଭିରଲକୈଃ
ପରୀତଂ ତେ ଵକ୍ତ୍ରଂ ପରିହସତି ପଂକେରୁହରୁଚିମ୍ ।
ଦରସ୍ମେରେ ଯସ୍ମିନ୍ ଦଶନରୁଚିକିଂଜଲ୍କରୁଚିରେ
ସୁଗଂଧୌ ମାଦ୍ଯଂତି ସ୍ମରଦହନଚକ୍ଷୁର୍ମଧୁଲିହଃ ॥ 45 ॥
ଲଲାଟଂ ଲାଵଣ୍ଯଦ୍ଯୁତିଵିମଲମାଭାତି ତଵ ଯ-
ଦ୍ଦ୍ଵିତୀଯଂ ତନ୍ମନ୍ଯେ ମକୁଟଘଟିତଂ ଚଂଦ୍ରଶକଲମ୍ ।
ଵିପର୍ଯାସନ୍ଯାସାଦୁଭଯମପି ସଂଭୂଯ ଚ ମିଥଃ
ସୁଧାଲେପସ୍ଯୂତିଃ ପରିଣମତି ରାକାହିମକରଃ ॥ 46 ॥
ଭ୍ରୁଵୌ ଭୁଗ୍ନେ କିଂଚିଦ୍ଭୁଵନଭଯଭଂଗଵ୍ଯସନିନି
ତ୍ଵଦୀଯେ ନେତ୍ରାଭ୍ଯାଂ ମଧୁକରରୁଚିଭ୍ଯାଂ ଧୃତଗୁଣମ୍ ।
ଧନୁର୍ମନ୍ଯେ ସଵ୍ଯେତରକରଗୃହୀତଂ ରତିପତେଃ
ପ୍ରକୋଷ୍ଠେ ମୁଷ୍ଟୌ ଚ ସ୍ଥଗଯତି ନିଗୂଢାଂତରମୁମେ ॥ 47 ॥
ଅହଃ ସୂତେ ସଵ୍ଯଂ ତଵ ନଯନମର୍କାତ୍ମକତଯା
ତ୍ରିଯାମାଂ ଵାମଂ ତେ ସୃଜତି ରଜନୀନାଯକତଯା ।
ତୃତୀଯା ତେ ଦୃଷ୍ଟିର୍ଦରଦଲିତହେମାଂବୁଜରୁଚିଃ
ସମାଧତ୍ତେ ସଂଧ୍ଯାଂ ଦିଵସନିଶଯୋରଂତରଚରୀମ୍ ॥ 48 ॥
ଵିଶାଲା କଲ୍ଯାଣୀ ସ୍ଫୁଟରୁଚିରଯୋଧ୍ଯା କୁଵଲଯୈଃ
କୃପାଧାରାଧାରା କିମପି ମଧୁରାଭୋଗଵତିକା ।
ଅଵଂତୀ ଦୃଷ୍ଟିସ୍ତେ ବହୁନଗରଵିସ୍ତାରଵିଜଯା
ଧ୍ରୁଵଂ ତତ୍ତନ୍ନାମଵ୍ଯଵହରଣଯୋଗ୍ଯା ଵିଜଯତେ ॥ 49 ॥
କଵୀନାଂ ସଂଦର୍ଭସ୍ତବକମକରଂଦୈକରସିକଂ
କଟାକ୍ଷଵ୍ଯାକ୍ଷେପଭ୍ରମରକଲଭୌ କର୍ଣଯୁଗଲମ୍ ।
ଅମୁଂଚଂତୌ ଦୃଷ୍ଟ୍ଵା ତଵ ନଵରସାସ୍ଵାଦତରଲା-
ଵସୂଯାସଂସର୍ଗାଦଲିକନଯନଂ କିଂଚିଦରୁଣମ୍ ॥ 50 ॥
ଶିଵେ ଶଋଂଗାରାର୍ଦ୍ରା ତଦିତରଜନେ କୁତ୍ସନପରା
ସରୋଷା ଗଂଗାଯାଂ ଗିରିଶଚରିତେ ଵିସ୍ମଯଵତୀ ।
ହରାହିଭ୍ଯୋ ଭୀତା ସରସିରୁହସୌଭାଗ୍ଯଜନନୀ (ଜଯିନୀ)
ସଖୀଷୁ ସ୍ମେରା ତେ ମଯି ଜନନୀ ଦୃଷ୍ଟିଃ ସକରୁଣା ॥ 51 ॥
ଗତେ କର୍ଣାଭ୍ଯର୍ଣଂ ଗରୁତ ଇଵ ପକ୍ଷ୍ମାଣି ଦଧତୀ
ପୁରାଂ ଭେତ୍ତୁଶ୍ଚିତ୍ତପ୍ରଶମରସଵିଦ୍ରାଵଣଫଲେ ।
ଇମେ ନେତ୍ରେ ଗୋତ୍ରାଧରପତିକୁଲୋତ୍ତଂସକଲିକେ
ତଵାକର୍ଣାକୃଷ୍ଟସ୍ମରଶରଵିଲାସଂ କଲଯତଃ ॥ 52 ॥
ଵିଭକ୍ତତ୍ରୈଵର୍ଣ୍ଯଂ ଵ୍ଯତିକରିତଲୀଲାଂଜନତଯା
ଵିଭାତି ତ୍ଵନ୍ନେତ୍ରତ୍ରିତଯମିଦମୀଶାନଦଯିତେ ।
ପୁନଃ ସ୍ରଷ୍ଟୁଂ ଦେଵାନ୍ ଦ୍ରୁହିଣହରିରୁଦ୍ରାନୁପରତାନ୍
ରଜଃ ସତ୍ତ୍ଵଂ ବିଭ୍ରତ୍ତମ ଇତି ଗୁଣାନାଂ ତ୍ରଯମିଵ ॥ 53 ॥
ପଵିତ୍ରୀକର୍ତୁଂ ନଃ ପଶୁପତିପରାଧୀନହୃଦଯେ
ଦଯାମିତ୍ରୈର୍ନେତ୍ରୈରରୁଣଧଵଲଶ୍ଯାମରୁଚିଭିଃ ।
ନଦଃ ଶୋଣୋ ଗଂଗା ତପନତନଯେତି ଧ୍ରୁଵମମୁଂ
ତ୍ରଯାଣାଂ ତୀର୍ଥାନାମୁପନଯସି ସଂଭେଦମନଘମ୍ ॥ 54 ॥
ନିମେଷୋନ୍ମେଷାଭ୍ଯାଂ ପ୍ରଲଯମୁଦଯଂ ଯାତି ଜଗତୀ
ତଵେତ୍ଯାହୁଃ ସଂତୋ ଧରଣିଧରରାଜନ୍ଯତନଯେ ।
ତ୍ଵଦୁନ୍ମେଷାଜ୍ଜାତଂ ଜଗଦିଦମଶେଷଂ ପ୍ରଲଯତଃ
ପରିତ୍ରାତୁଂ ଶଂକେ ପରିହୃତନିମେଷାସ୍ତଵ ଦୃଶଃ ॥ 55 ॥
ତଵାପର୍ଣେ କର୍ଣେଜପନଯନପୈଶୁନ୍ଯଚକିତା
ନିଲୀଯଂତେ ତୋଯେ ନିଯତମନିମେଷାଃ ଶଫରିକାଃ ।
ଇଯଂ ଚ ଶ୍ରୀର୍ବଦ୍ଧଚ୍ଛଦପୁଟକଵାଟଂ କୁଵଲଯମ୍
ଜହାତି ପ୍ରତ୍ଯୂଷେ ନିଶି ଚ ଵିଘଟଯ୍ଯ ପ୍ରଵିଶତି ॥ 56 ॥
ଦୃଶା ଦ୍ରାଘୀଯସ୍ଯା ଦରଦଲିତନୀଲୋତ୍ପଲରୁଚା
ଦଵୀଯାଂସଂ ଦୀନଂ ସ୍ନପଯ କୃପଯା ମାମପି ଶିଵେ ।
ଅନେନାଯଂ ଧନ୍ଯୋ ଭଵତି ନ ଚ ତେ ହାନିରିଯତା
ଵନେ ଵା ହର୍ମ୍ଯେ ଵା ସମକରନିପାତୋ ହିମକରଃ ॥ 57 ॥
ଅରାଲଂ ତେ ପାଲୀଯୁଗଲମଗରାଜନ୍ଯତନଯେ
ନ କେଷାମାଧତ୍ତେ କୁସୁମଶରକୋଦଂଡକୁତୁକମ୍ ।
ତିରଶ୍ଚୀନୋ ଯତ୍ର ଶ୍ରଵଣପଥମୁଲ୍ଲଂଘ୍ଯ ଵିଲସ-
ନ୍ନପାଂଗଵ୍ଯାସଂଗୋ ଦିଶତି ଶରସଂଧାନଧିଷଣାମ୍ ॥ 58 ॥
ସ୍ଫୁରଦ୍ଗଂଡାଭୋଗପ୍ରତିଫଲିତତାଟଂକଯୁଗଲଂ
ଚତୁଶ୍ଚକ୍ରଂ ମନ୍ଯେ ତଵ ମୁଖମିଦଂ ମନ୍ମଥରଥମ୍ ।
ଯମାରୁହ୍ଯ ଦ୍ରୁହ୍ଯତ୍ଯଵନିରଥମର୍କେଂଦୁଚରଣଂ
ମହାଵୀରୋ ମାରଃ ପ୍ରମଥପତଯେ ସଜ୍ଜିତଵତେ ॥ 59 ॥
ସରସ୍ଵତ୍ଯାଃ ସୂକ୍ତୀରମୃତଲହରୀକୌଶଲହରୀଃ
ପିବଂତ୍ଯାଃ ଶର୍ଵାଣି ଶ୍ରଵଣଚୁଲୁକାଭ୍ଯାମଵିରଲମ୍ ।
ଚମତ୍କାରଶ୍ଲାଘାଚଲିତଶିରସଃ କୁଂଡଲଗଣୋ
ଝଣତ୍କାରୈସ୍ତାରୈଃ ପ୍ରତିଵଚନମାଚଷ୍ଟ ଇଵ ତେ ॥ 60 ॥
ଅସୌ ନାସାଵଂଶସ୍ତୁହିନଗିରିଵଂଶଧ୍ଵଜପଟି
ତ୍ଵଦୀଯୋ ନେଦୀଯଃ ଫଲତୁ ଫଲମସ୍ମାକମୁଚିତମ୍ ।
ଵହନ୍ନଂତର୍ମୁକ୍ତାଃ ଶିଶିରତରନିଶ୍ଵାସଗଲିତଂ
ସମୃଦ୍ଧ୍ଯା ଯତ୍ତାସାଂ ବହିରପି ଚ ମୁକ୍ତାମଣିଧରଃ ॥ 61 ॥
ପ୍ରକୃତ୍ଯା ରକ୍ତାଯାସ୍ତଵ ସୁଦତି ଦଂତଚ୍ଛଦରୁଚେଃ
ପ୍ରଵକ୍ଷ୍ଯେ ସାଦୃଶ୍ଯଂ ଜନଯତୁ ଫଲଂ ଵିଦ୍ରୁମଲତା ।
ନ ବିଂବଂ ତଦ୍ବିଂବପ୍ରତିଫଲନରାଗାଦରୁଣିତଂ
ତୁଲାମଧ୍ଯାରୋଢୁଂ କଥମିଵ ଵିଲଜ୍ଜେତ କଲଯା ॥ 62 ॥
ସ୍ମିତଜ୍ଯୋତ୍ସ୍ନାଜାଲଂ ତଵ ଵଦନଚଂଦ୍ରସ୍ଯ ପିବତାଂ
ଚକୋରାଣାମାସୀଦତିରସତଯା ଚଂଚୁଜଡିମା ।
ଅତସ୍ତେ ଶୀତାଂଶୋରମୃତଲହରୀମମ୍ଲରୁଚଯଃ
ପିବଂତି ସ୍ଵଚ୍ଛଂଦଂ ନିଶି ନିଶି ଭୃଶଂ କାଂଜିକଧିଯା ॥ 63 ॥
ଅଵିଶ୍ରାଂତଂ ପତ୍ଯୁର୍ଗୁଣଗଣକଥାମ୍ରେଡନଜପା
ଜପାପୁଷ୍ପଚ୍ଛାଯା ତଵ ଜନନି ଜିହ୍ଵା ଜଯତି ସା ।
ଯଦଗ୍ରାସୀନାଯାଃ ସ୍ଫଟିକଦୃଷଦଚ୍ଛଚ୍ଛଵିମଯୀ
ସରସ୍ଵତ୍ଯା ମୂର୍ତିଃ ପରିଣମତି ମାଣିକ୍ଯଵପୁଷା ॥ 64 ॥
ରଣେ ଜିତ୍ଵା ଦୈତ୍ଯାନପହୃତଶିରସ୍ତ୍ରୈଃ କଵଚିଭିର୍-
ନିଵୃତ୍ତୈଶ୍ଚଂଡାଂଶତ୍ରିପୁରହରନିର୍ମାଲ୍ଯଵିମୁଖୈଃ ।
ଵିଶାଖେଂଦ୍ରୋପେଂଦ୍ରୈଃ ଶଶିଵିଶଦକର୍ପୂରଶକଲା
ଵିଲୀଯଂତେ ମାତସ୍ତଵ ଵଦନତାଂବୂଲକବଲାଃ ॥ 65 ॥
ଵିପଂଚ୍ଯା ଗାଯଂତୀ ଵିଵିଧମପଦାନଂ ପଶୁପତେଃ
ତ୍ଵଯାରବ୍ଧେ ଵକ୍ତୁଂ ଚଲିତଶିରସା ସାଧୁଵଚନେ ।
ତଦୀଯୈର୍ମାଧୁର୍ଯୈରପଲପିତତଂତ୍ରୀକଲରଵାଂ
ନିଜାଂ ଵୀଣାଂ ଵାଣୀ ନିଚୁଲଯତି ଚୋଲେନ ନିଭୃତମ୍ ॥ 66 ॥
କରାଗ୍ରେଣ ସ୍ପୃଷ୍ଟଂ ତୁହିନଗିରିଣା ଵତ୍ସଲତଯା
ଗିରୀଶେନୋଦସ୍ତଂ ମୁହୁରଧରପାନାକୁଲତଯା ।
କରଗ୍ରାହ୍ଯଂ ଶଂଭୋର୍ମୁଖମୁକୁରଵୃଂତଂ ଗିରିସୁତେ
କଥଂକାରଂ ବ୍ରୂମସ୍ତଵ ଚିବୁକମୌପମ୍ଯରହିତମ୍ ॥ 67 ॥
ଭୁଜାଶ୍ଲେଷାନ୍ ନିତ୍ଯଂ ପୁରଦମଯିତୁଃ କଂଟକଵତୀ
ତଵ ଗ୍ରୀଵା ଧତ୍ତେ ମୁଖକମଲନାଲଶ୍ରିଯମିଯମ୍ ।
ସ୍ଵତଃ ଶ୍ଵେତା କାଲାଗୁରୁବହୁଲଜଂବାଲମଲିନା
ମୃଣାଲୀଲାଲିତ୍ଯମ୍ ଵହତି ଯଦଧୋ ହାରଲତିକା ॥ 68 ॥
ଗଲେ ରେଖାସ୍ତିସ୍ରୋ ଗତିଗମକଗୀତୈକନିପୁଣେ
ଵିଵାହଵ୍ଯାନଦ୍ଧପ୍ରଗୁଣଗୁଣସଂଖ୍ଯାପ୍ରତିଭୁଵଃ ।
ଵିରାଜଂତେ ନାନାଵିଧମଧୁରରାଗାକରଭୁଵାଂ
ତ୍ରଯାଣାଂ ଗ୍ରାମାଣାଂ ସ୍ଥିତିନିଯମସୀମାନ ଇଵ ତେ ॥ 69 ॥
ମୃଣାଲୀମୃଦ୍ଵୀନାଂ ତଵ ଭୁଜଲତାନାଂ ଚତସୃଣାଂ
ଚତୁର୍ଭିଃ ସୌଂଦର୍ଯଂ ସରସିଜଭଵଃ ସ୍ତୌତି ଵଦନୈଃ ।
ନଖେଭ୍ଯଃ ସଂତ୍ରସ୍ଯନ୍ ପ୍ରଥମମଥନାଦଂଧକରିପୋ-
ଶ୍ଚତୁର୍ଣାଂ ଶୀର୍ଷାଣାଂ ସମମଭଯହସ୍ତାର୍ପଣଧିଯା ॥ 70 ॥
ନଖାନାମୁଦ୍ଦ୍ଯୋତୈର୍ନଵନଲିନରାଗଂ ଵିହସତାଂ
କରାଣାଂ ତେ କାଂତିଂ କଥଯ କଥଯାମଃ କଥମୁମେ ।
କଯାଚିଦ୍ଵା ସାମ୍ଯଂ ଭଜତୁ କଲଯା ହଂତ କମଲଂ
ଯଦି କ୍ରୀଡଲ୍ଲକ୍ଷ୍ମୀଚରଣତଲଲାକ୍ଷାରସଛଣମ୍ ॥ 71 ॥
ସମଂ ଦେଵି ସ୍କଂଦଦ୍ଵିପଵଦନପୀତଂ ସ୍ତନଯୁଗଂ
ତଵେଦଂ ନଃ ଖେଦଂ ହରତୁ ସତତଂ ପ୍ରସ୍ନୁତମୁଖମ୍ ।
ଯଦାଲୋକ୍ଯାଶଂକାକୁଲିତହୃଦଯୋ ହାସଜନକଃ
ସ୍ଵକୁଂଭୌ ହେରଂବଃ ପରିମୃଶତି ହସ୍ତେନ ଝଡିତି ॥ 72 ॥
ଅମୂ ତେ ଵକ୍ଷୋଜାଵମୃତରସମାଣିକ୍ଯକୁତୁପୌ
ନ ସଂଦେହସ୍ପଂଦୋ ନଗପତିପତାକେ ମନସି ନଃ ।
ପିବଂତୌ ତୌ ଯସ୍ମାଦଵିଦିତଵଧୂସଂଗରସିକୌ
କୁମାରାଵଦ୍ଯାପି ଦ୍ଵିରଦଵଦନକ୍ରୌଂଚଦଲନୌ ॥ 73 ॥
ଵହତ୍ଯଂବ ସ୍ତଂବେରମଦନୁଜକୁଂଭପ୍ରକୃତିଭିଃ
ସମାରବ୍ଧାଂ ମୁକ୍ତାମଣିଭିରମଲାଂ ହାରଲତିକାମ୍ ।
କୁଚାଭୋଗୋ ବିଂବାଧରରୁଚିଭିରଂତଃ ଶବଲିତାଂ
ପ୍ରତାପଵ୍ଯାମିଶ୍ରାଂ ପୁରଦମଯିତୁଃ କୀର୍ତିମିଵ ତେ ॥ 74 ॥
ତଵ ସ୍ତନ୍ଯଂ ମନ୍ଯେ ଧରଣିଧରକନ୍ଯେ ହୃଦଯତଃ
ପଯଃପାରାଵାରଃ ପରିଵହତି ସାରସ୍ଵତମିଵ ।
ଦଯାଵତ୍ଯା ଦତ୍ତଂ ଦ୍ରଵିଡଶିଶୁରାସ୍ଵାଦ୍ଯ ତଵ ଯତ୍
କଵୀନାଂ ପ୍ରୌଢାନାମଜନି କମନୀଯଃ କଵଯିତା ॥ 75 ॥
ହରକ୍ରୋଧଜ୍ଵାଲାଵଲିଭିରଵଲୀଢେନ ଵପୁଷା
ଗଭୀରେ ତେ ନାଭୀସରସି କୃତସଂଗୋ ମନସିଜଃ ।
ସମୁତ୍ତସ୍ଥୌ ତସ୍ମାଦଚଲତନଯେ ଧୂମଲତିକା
ଜନସ୍ତାଂ ଜାନୀତେ ତଵ ଜନନି ରୋମାଵଲିରିତି ॥ 76 ॥
ଯଦେତତ୍ କାଲିଂଦୀତନୁତରତରଂଗାକୃତି ଶିଵେ
କୃଶେ ମଧ୍ଯେ କିଂଚିଜ୍ଜନନି ତଵ ଯଦ୍ଭାତି ସୁଧିଯାମ୍ ।
ଵିମର୍ଦାଦନ୍ଯୋଽନ୍ଯଂ କୁଚକଲଶଯୋରଂତରଗତଂ
ତନୂଭୂତଂ ଵ୍ଯୋମ ପ୍ରଵିଶଦିଵ ନାଭିଂ କୁହରିଣୀମ୍ ॥ 77 ॥
ସ୍ଥିରୋ ଗଂଗାଵର୍ତଃ ସ୍ତନମୁକୁଲରୋମାଵଲିଲତା-
କଲାଵାଲଂ କୁଂଡଂ କୁସୁମଶରତେଜୋହୁତଭୁଜଃ ।
ରତେର୍ଲୀଲାଗାରଂ କିମପି ତଵ ନାଭିର୍ଗିରିସୁତେ
ବିଲଦ୍ଵାରଂ ସିଦ୍ଧେର୍ଗିରିଶନଯନାନାଂ ଵିଜଯତେ ॥ 78 ॥
ନିସର୍ଗକ୍ଷୀଣସ୍ଯ ସ୍ତନତଟଭରେଣ କ୍ଲମଜୁଷୋ
ନମନ୍ମୂର୍ତେର୍ନାରୀତିଲକ ଶନକୈସ୍ତ୍ରୁଟ୍ଯତ ଇଵ ।
ଚିରଂ ତେ ମଧ୍ଯସ୍ଯ ତ୍ରୁଟିତତଟିନୀତୀରତରୁଣା
ସମାଵସ୍ଥାସ୍ଥେମ୍ନୋ ଭଵତୁ କୁଶଲଂ ଶୈଲତନଯେ ॥ 79 ॥
କୁଚୌ ସଦ୍ଯଃସ୍ଵିଦ୍ଯତ୍ତଟଘଟିତକୂର୍ପାସଭିଦୁରୌ
କଷଂତୌ ଦୋର୍ମୂଲେ କନକକଲଶାଭୌ କଲଯତା ।
ତଵ ତ୍ରାତୁଂ ଭଂଗାଦଲମିତି ଵଲଗ୍ନଂ ତନୁଭୁଵା
ତ୍ରିଧା ନଦ୍ଧଂ ଦେଵି ତ୍ରିଵଲି ଲଵଲୀଵଲ୍ଲିଭିରିଵ ॥ 80 ॥
ଗୁରୁତ୍ଵଂ ଵିସ୍ତାରଂ କ୍ଷିତିଧରପତିଃ ପାର୍ଵତି ନିଜା-
ନ୍ନିତଂବାଦାଚ୍ଛିଦ୍ଯ ତ୍ଵଯି ହରଣରୂପେଣ ନିଦଧେ ।
ଅତସ୍ତେ ଵିସ୍ତୀର୍ଣୋ ଗୁରୁରଯମଶେଷାଂ ଵସୁମତୀଂ
ନିତଂବପ୍ରାଗ୍ଭାରଃ ସ୍ଥଗଯତି ଲଘୁତ୍ଵଂ ନଯତି ଚ ॥ 81 ॥
କରୀଂଦ୍ରାଣାଂ ଶୁଂଡାନ୍ କନକକଦଲୀକାଂଡପଟଲୀ-
ମୁଭାଭ୍ଯାମୂରୁଭ୍ଯାମୁଭଯମପି ନିର୍ଜିତ୍ଯ ଭଵତୀ ।
ସୁଵୃତ୍ତାଭ୍ଯାଂ ପତ୍ଯୁଃ ପ୍ରଣତିକଠିନାଭ୍ଯାଂ ଗିରିସୁତେ
ଵିଧିଜ୍ଞ୍ଯେ ଜାନୁଭ୍ଯାଂ ଵିବୁଧକରିକୁଂଭଦ୍ଵଯମସି ॥ 82 ॥
ପରାଜେତୁଂ ରୁଦ୍ରଂ ଦ୍ଵିଗୁଣଶରଗର୍ଭୌ ଗିରିସୁତେ
ନିଷଂଗୌ ଜଂଘେ ତେ ଵିଷମଵିଶିଖୋ ବାଢମକୃତ ।
ଯଦଗ୍ରେ ଦୃଶ୍ଯଂତେ ଦଶଶରଫଲାଃ ପାଦଯୁଗଲୀ-
ନଖାଗ୍ରଚ୍ଛଦ୍ମାନଃ ସୁରମକୁଟଶାଣୈକନିଶିତାଃ ॥ 83 ॥
ଶ୍ରୁତୀନାଂ ମୂର୍ଧାନୋ ଦଧତି ତଵ ଯୌ ଶେଖରତଯା
ମମାପ୍ଯେତୌ ମାତଃ ଶିରସି ଦଯଯା ଧେହି ଚରଣୌ ।
ଯଯୋଃ ପାଦ୍ଯଂ ପାଥଃ ପଶୁପତିଜଟାଜୂଟତଟିନୀ
ଯଯୋର୍ଲାକ୍ଷାଲକ୍ଷ୍ମୀରରୁଣହରିଚୂଡାମଣିରୁଚିଃ ॥ 84 ॥
ନମୋଵାକଂ ବ୍ରୂମୋ ନଯନରମଣୀଯାଯ ପଦଯୋ-
ସ୍ତଵାସ୍ମୈ ଦ୍ଵଂଦ୍ଵାଯ ସ୍ଫୁଟରୁଚିରସାଲକ୍ତକଵତେ ।
ଅସୂଯତ୍ଯତ୍ଯଂତଂ ଯଦଭିହନନାଯ ସ୍ପୃହଯତେ
ପଶୂନାମୀଶାନଃ ପ୍ରମଦଵନକଂକେଲିତରଵେ ॥ 85 ॥
ମୃଷା କୃତ୍ଵା ଗୋତ୍ରସ୍ଖଲନମଥ ଵୈଲକ୍ଷ୍ଯନମିତଂ
ଲଲାଟେ ଭର୍ତାରଂ ଚରଣକମଲେ ତାଡଯତି ତେ ।
ଚିରାଦଂତଃଶଲ୍ଯଂ ଦହନକୃତମୁନ୍ମୂଲିତଵତା
ତୁଲାକୋଟିକ୍ଵାଣୈଃ କିଲିକିଲିତମୀଶାନରିପୁଣା ॥ 86 ॥
ହିମାନୀହଂତଵ୍ଯଂ ହିମଗିରିନିଵାସୈକଚତୁରୌ
ନିଶାଯାଂ ନିଦ୍ରାଣଂ ନିଶି ଚରମଭାଗେ ଚ ଵିଶଦୌ ।
ଵରଂ ଲକ୍ଷ୍ମୀପାତ୍ରଂ ଶ୍ରିଯମତିସୃଜଂତୌ ସମଯିନାଂ
ସରୋଜଂ ତ୍ଵତ୍ପାଦୌ ଜନନି ଜଯତଶ୍ଚିତ୍ରମିହ କିମ୍ ॥ 87 ॥
ପଦଂ ତେ କୀର୍ତୀନାଂ ପ୍ରପଦମପଦଂ ଦେଵି ଵିପଦାଂ
କଥଂ ନୀତଂ ସଦ୍ଭିଃ କଠିନକମଠୀକର୍ପରତୁଲାମ୍ ।
କଥଂ ଵା ବାହୁଭ୍ଯାମୁପଯମନକାଲେ ପୁରଭିଦା
ଯଦାଦାଯ ନ୍ଯସ୍ତଂ ଦୃଷଦି ଦଯମାନେନ ମନସା ॥ 88 ॥
ନଖୈର୍ନାକସ୍ତ୍ରୀଣାଂ କରକମଲସଂକୋଚଶଶିଭି-
ସ୍ତରୂଣାଂ ଦିଵ୍ଯାନାଂ ହସତ ଇଵ ତେ ଚଂଡି ଚରଣୌ ।
ଫଲାନି ସ୍ଵଃସ୍ଥେଭ୍ଯଃ କିସଲଯକରାଗ୍ରେଣ ଦଦତାଂ
ଦରିଦ୍ରେଭ୍ଯୋ ଭଦ୍ରାଂ ଶ୍ରିଯମନିଶମହ୍ନାଯ ଦଦତୌ ॥ 89 ॥
ଦଦାନେ ଦୀନେଭ୍ଯଃ ଶ୍ରିଯମନିଶମାଶାନୁସଦୃଶୀ-
ମମଂଦଂ ସୌଂଦର୍ଯପ୍ରକରମକରଂଦମ୍ ଵିକିରତି ।
ତଵାସ୍ମିନ୍ ମଂଦାରସ୍ତବକସୁଭଗେ ଯାତୁ ଚରଣେ
ନିମଜ୍ଜନ୍ମଜ୍ଜୀଵଃ କରଣଚରଣଃ ଷଟ୍ଚରଣତାମ୍ ॥ 90 ॥
ପଦନ୍ଯାସକ୍ରୀଡାପରିଚଯମିଵାରବ୍ଧୁମନସଃ
ସ୍ଖଲଂତସ୍ତେ ଖେଲଂ ଭଵନକଲହଂସା ନ ଜହତି ।
ଅତସ୍ତେଷାଂ ଶିକ୍ଷାଂ ସୁଭଗମଣିମଂଜୀରରଣିତ-
ଚ୍ଛଲାଦାଚକ୍ଷାଣଂ ଚରଣକମଲଂ ଚାରୁଚରିତେ ॥ 91 ॥
ଗତାସ୍ତେ ମଂଚତ୍ଵଂ ଦ୍ରୁହିଣହରିରୁଦ୍ରେଶ୍ଵରଭୃତଃ
ଶିଵଃ ସ୍ଵଚ୍ଛଚ୍ଛାଯାଘଟିତକପଟପ୍ରଚ୍ଛଦପଟଃ ।
ତ୍ଵଦୀଯାନାଂ ଭାସାଂ ପ୍ରତିଫଲନରାଗାରୁଣତଯା
ଶରୀରୀ ଶଋଂଗାରୋ ରସ ଇଵ ଦୃଶାଂ ଦୋଗ୍ଧି କୁତୁକମ୍ ॥ 92 ॥
ଅରାଲା କେଶେଷୁ ପ୍ରକୃତିସରଲା ମଂଦହସିତେ
ଶିରୀଷାଭା ଚିତ୍ତେ ଦୃଷଦୁପଲଶୋଭା କୁଚତଟେ ।
ଭୃଶଂ ତନ୍ଵୀ ମଧ୍ଯେ ପୃଥୁରୁରସିଜାରୋହଵିଷଯେ
ଜଗତ୍ତ୍ରାତୁଂ ଶଂଭୋର୍ଜଯତି କରୁଣା କାଚିଦରୁଣା ॥ 93 ॥
କଲଂକଃ କସ୍ତୂରୀ ରଜନିକରବିଂବଂ ଜଲମଯଂ
କଲାଭିଃ କର୍ପୂରୈର୍ମରକତକରଂଡଂ ନିବିଡିତମ୍ ।
ଅତସ୍ତ୍ଵଦ୍ଭୋଗେନ ପ୍ରତିଦିନମିଦଂ ରିକ୍ତକୁହରଂ
ଵିଧିର୍ଭୂଯୋ ଭୂଯୋ ନିବିଡଯତି ନୂନଂ ତଵ କୃତେ ॥ 94 ॥
ପୁରାରାତେରଂତଃପୁରମସି ତତସ୍ତ୍ଵଚ୍ଚରଣଯୋଃ
ସପର୍ଯାମର୍ଯାଦା ତରଲକରଣାନାମସୁଲଭା ।
ତଥା ହ୍ଯେତେ ନୀତାଃ ଶତମଖମୁଖାଃ ସିଦ୍ଧିମତୁଲାଂ
ତଵ ଦ୍ଵାରୋପାଂତସ୍ଥିତିଭିରଣିମାଦ୍ଯାଭିରମରାଃ ॥ 95 ॥
କଲତ୍ରଂ ଵୈଧାତ୍ରଂ କତିକତି ଭଜଂତେ ନ କଵଯଃ
ଶ୍ରିଯୋ ଦେଵ୍ଯାଃ କୋ ଵା ନ ଭଵତି ପତିଃ କୈରପି ଧନୈଃ ।
ମହାଦେଵଂ ହିତ୍ଵା ତଵ ସତି ସତୀନାମଚରମେ
କୁଚାଭ୍ଯାମାସଂଗଃ କୁରଵକତରୋରପ୍ଯସୁଲଭଃ ॥ 96 ॥
ଗିରାମାହୁର୍ଦେଵୀଂ ଦ୍ରୁହିଣଗୃହିଣୀମାଗମଵିଦୋ
ହରେଃ ପତ୍ନୀଂ ପଦ୍ମାଂ ହରସହଚରୀମଦ୍ରିତନଯାମ୍ ।
ତୁରୀଯା କାପି ତ୍ଵଂ ଦୁରଧିଗମନିଃସୀମମହିମା
ମହାମାଯା ଵିଶ୍ଵଂ ଭ୍ରମଯସି ପରବ୍ରହ୍ମମହିଷି ॥ 97 ॥
କଦା କାଲେ ମାତଃ କଥଯ କଲିତାଲକ୍ତକରସଂ
ପିବେଯଂ ଵିଦ୍ଯାର୍ଥୀ ତଵ ଚରଣନିର୍ଣେଜନଜଲମ୍ ।
ପ୍ରକୃତ୍ଯା ମୂକାନାମପି ଚ କଵିତାକାରଣତଯା
କଦା ଧତ୍ତେ ଵାଣୀମୁଖକମଲତାଂବୂଲରସତାମ୍ ॥ 98 ॥
ସରସ୍ଵତ୍ଯା ଲକ୍ଷ୍ମ୍ଯା ଵିଧିହରିସପତ୍ନୋ ଵିହରତେ
ରତେଃ ପାତିଵ୍ରତ୍ଯଂ ଶିଥିଲଯତି ରମ୍ଯେଣ ଵପୁଷା ।
ଚିରଂ ଜୀଵନ୍ନେଵ କ୍ଷପିତପଶୁପାଶଵ୍ଯତିକରଃ
ପରାନଂଦାଭିଖ୍ଯମ୍ ରସଯତି ରସଂ ତ୍ଵଦ୍ଭଜନଵାନ୍ ॥ 99 ॥
ପ୍ରଦୀପଜ୍ଵାଲାଭିର୍ଦିଵସକରନୀରାଜନଵିଧିଃ
ସୁଧାସୂତେଶ୍ଚଂଦ୍ରୋପଲଜଲଲଵୈରର୍ଘ୍ଯରଚନା ।
ସ୍ଵକୀଯୈରଂଭୋଭିଃ ସଲିଲନିଧିସୌହିତ୍ଯକରଣଂ
ତ୍ଵଦୀଯାଭିର୍ଵାଗ୍ଭିସ୍ତଵ ଜନନି ଵାଚାଂ ସ୍ତୁତିରିଯମ୍ ॥ 100 ॥
ସୌଂଦର୍ଯଲହରି ମୁଖ୍ଯସ୍ତୋତ୍ରଂ ସଂଵାର୍ତଦାଯକମ୍ ।
ଭଗଵଦ୍ପାଦ ସନ୍କ୍ଲୁପ୍ତଂ ପଠେନ୍ ମୁକ୍ତୌ ଭଵେନ୍ନରଃ ॥
॥ ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ଯସ୍ଯ
ଶ୍ରୀଗୋଵିଂଦଭଗଵତ୍ପୂଜ୍ଯପାଦଶିଷ୍ଯସ୍ଯ
ଶ୍ରୀମଚ୍ଛଂକରଭଗଵତଃ କୃତୌ ସୌଂଦର୍ଯଲହରୀ ସଂପୂର୍ଣା ॥
॥ ଓଂ ତତ୍ସତ୍ ॥
(ଅନୁବଂଧଃ)
ସମାନୀତଃ ପଦ୍ଭ୍ଯାଂ ମଣିମୁକୁରତାମଂବରମଣି-
ର୍ଭଯାଦାସ୍ଯାଦଂତଃସ୍ତିମିତକିରଣଶ୍ରେଣିମସୃଣଃ ।
(ପାଠଭେଦଃ - ଭଯାଦାସ୍ଯ ସ୍ନିଗ୍ଧସ୍ତ୍ମିତ, ଭଯାଦାସ୍ଯସ୍ଯାଂତଃସ୍ତ୍ମିତ)
ଦଧାତି ତ୍ଵଦ୍ଵକ୍ତ୍ରଂପ୍ରତିଫଲନମଶ୍ରାଂତଵିକଚଂ
ନିରାତଂକଂ ଚଂଦ୍ରାନ୍ନିଜହୃଦଯପଂକେରୁହମିଵ ॥ 101 ॥
ସମୁଦ୍ଭୂତସ୍ଥୂଲସ୍ତନଭରମୁରଶ୍ଚାରୁ ହସିତଂ
କଟାକ୍ଷେ କଂଦର୍ପଃ କତିଚନ କଦଂବଦ୍ଯୁତି ଵପୁଃ ।
ହରସ୍ଯ ତ୍ଵଦ୍ଭ୍ରାଂତିଂ ମନସି ଜନଯଂତି ସ୍ମ ଵିମଲାଃ
ପାଠଭେଦଃ - ଜନଯାମାସ ମଦନୋ, ଜନଯଂତଃ ସମତୁଲାଂ, ଜନଯଂତା ସୁଵଦନେ
ଭଵତ୍ଯା ଯେ ଭକ୍ତାଃ ପରିଣତିରମୀଷାମିଯମୁମେ ॥ 102 ॥
ନିଧେ ନିତ୍ଯସ୍ମେରେ ନିରଵଧିଗୁଣେ ନୀତିନିପୁଣେ
ନିରାଘାତଜ୍ଞାନେ ନିଯମପରଚିତ୍ତୈକନିଲଯେ ।
ନିଯତ୍ଯା ନିର୍ମୁକ୍ତେ ନିଖିଲନିଗମାଂତସ୍ତୁତିପଦେ
ନିରାତଂକେ ନିତ୍ଯେ ନିଗମଯ ମମାପି ସ୍ତୁତିମିମାମ୍ ॥ 103 ॥
Browse Related Categories:
