ମୋହାଂଧକାରନିଵହଂ ଵିନିହଂତୁମୀଡେ
ମୂକାତ୍ମନାମପି ମହାକଵିତାଵଦାନ୍ଯାନ୍ ।
ଶ୍ରୀକାଂଚିଦେଶଶିଶିରୀକୃତିଜାଗରୂକାନ୍
ଏକାମ୍ରନାଥତରୁଣୀକରୁଣାଵଲୋକାନ୍ ॥1॥
ମାତର୍ଜଯଂତି ମମତାଗ୍ରହମୋକ୍ଷଣାନି
ମାହେଂଦ୍ରନୀଲରୁଚିଶିକ୍ଷଣଦକ୍ଷିଣାନି ।
କାମାକ୍ଷି କଲ୍ପିତଜଗତ୍ତ୍ରଯରକ୍ଷଣାନି
ତ୍ଵଦ୍ଵୀକ୍ଷଣାନି ଵରଦାନଵିଚକ୍ଷଣାନି ॥2॥
ଆନଂଗତଂତ୍ରଵିଧିଦର୍ଶିତକୌଶଲାନାମ୍
ଆନଂଦମଂଦପରିଘୂର୍ଣିତମଂଥରାଣାମ୍ ।
ତାରଲ୍ଯମଂବ ତଵ ତାଡିତକର୍ଣସୀମ୍ନାଂ
କାମାକ୍ଷି ଖେଲତି କଟାକ୍ଷନିରୀକ୍ଷଣାନାମ୍ ॥3॥
କଲ୍ଲୋଲିତେନ କରୁଣାରସଵେଲ୍ଲିତେନ
କଲ୍ମାଷିତେନ କମନୀଯମୃଦୁସ୍ମିତେନ ।
ମାମଂଚିତେନ ତଵ କିଂଚନ କୁଂଚିତେନ
କାମାକ୍ଷି ତେନ ଶିଶିରୀକୁରୁ ଵୀକ୍ଷିତେନ ॥4॥
ସାହାଯ୍ଯକଂ ଗତଵତୀ ମୁହୁରର୍ଜନସ୍ଯ
ମଂଦସ୍ମିତସ୍ଯ ପରିତୋଷିତଭୀମଚେତାଃ ।
କାମାକ୍ଷି ପାଂଡଵଚମୂରିଵ ତାଵକୀନା
କର୍ଣାଂତିକଂ ଚଲତି ହଂତ କଟାକ୍ଷଲକ୍ଷ୍ମୀଃ ॥5॥
ଅସ୍ତଂ କ୍ଷଣାନ୍ନଯତୁ ମେ ପରିତାପସୂର୍ଯମ୍
ଆନଂଦଚଂଦ୍ରମସମାନଯତାଂ ପ୍ରକାଶମ୍ ।
କାଲାଂଧକାରସୁଷୁମାଂ କଲଯଂଦିଗଂତେ
କାମାକ୍ଷି କୋମଲକଟାକ୍ଷନିଶାଗମସ୍ତେ ॥6॥
ତାଟାଂକମୌକ୍ତିକରୁଚାଂକୁରଦଂତକାଂତିଃ
କାରୁଣ୍ଯହସ୍ତିପଶିଖାମଣିନାଧିରୂଢଃ ।
ଉନ୍ମୂଲଯତ୍ଵଶୁଭପାଦପମସ୍ମଦୀଯଂ
କାମାକ୍ଷି ତାଵକକଟାକ୍ଷମତଂଗଜେତଂଦ୍ରଃ ॥7॥
ଛାଯାଭରଣେ ଜଗତାଂ ପରିତାପହାରୀ
ତାଟଂକରତ୍ନମଣିତଲ୍ଲଜପଲ୍ଲଵଶ୍ରୀଃ ।
କାରୁଣ୍ଯନାମ ଵିକିରନ୍ମକରଂଦଜାଲଂ
କାମାକ୍ଷି ରାଜତି କଟାକ୍ଷସୁରଦ୍ରୁମସ୍ତେ ॥8॥
ସୂର୍ଯାଶ୍ରଯପ୍ରଣଯିନୀ ମଣିକୁଂଡଲାଂଶୁ-
ଲୌହିତ୍ଯକୋକନଦକାନନମାନନୀଯା ।
ଯାଂତୀ ତଵ ସ୍ମରହରାନନକାଂତିସିଂଧୁଂ
କାମାକ୍ଷି ରାଜତି କଟାକ୍ଷକଲିଂଦକନ୍ଯା ॥9॥
ପ୍ରାପ୍ନୋତି ଯଂ ସୁକୃତିନଂ ତଵ ପକ୍ଷପାତାତ୍
କାମାକ୍ଷି ଵୀକ୍ଷଣଵିଲାସକଲାପୁରଂଧ୍ରୀ ।
ସଦ୍ଯସ୍ତମେଵ କିଲ ମୁକ୍ତିଵଧୂର୍ଵୃଣୀତେ
ତସ୍ମାନ୍ନିତାଂତମନଯୋରିଦମୈକମତ୍ଯମ୍ ॥10॥
ଯାଂତୀ ସଦୈଵ ମରୁତାମନୁକୂଲଭାଵଂ
ଭ୍ରୂଵଲ୍ଲିଶକ୍ରଧନୁରୁଲ୍ଲସିତା ରସାର୍ଦ୍ରା ।
କାମାକ୍ଷି କୌତୁକତରଂଗିତନୀଲକଂଠା
କାଦଂବିନୀଵ ତଵ ଭାତି କଟାକ୍ଷମାଲା ॥11॥
ଗଂଗାଂଭସି ସ୍ମିତମଯେ ତପନାତ୍ମଜେଵ
ଗଂଗାଧରୋରସି ନଵୋତ୍ପଲମାଲିକେଵ ।
ଵକ୍ତ୍ରପ୍ରଭାସରସି ଶୈଵଲମଂଡଲୀଵ
କାମାକ୍ଷି ରାଜତି କଟାକ୍ଷରୁଚିଚ୍ଛଟା ତେ ॥12॥
ସଂସ୍କାରତଃ କିମପି କଂଦଲିତାନ୍ ରସଜ୍ଞ-
କେଦାରସୀମ୍ନି ସୁଧିଯାମୁପଭୋଗଯୋଗ୍ଯାନ୍ ।
କଲ୍ଯାଣସୂକ୍ତିଲହରୀକଲମାଂକୁରାନ୍ନଃ
କାମାକ୍ଷି ପକ୍ଷ୍ମଲଯତୁ ତ୍ଵଦପାଂଗମେଘଃ ॥13॥
ଚାଂଚଲ୍ଯମେଵ ନିଯତଂ କଲଯନ୍ପ୍ରକୃତ୍ଯା
ମାଲିନ୍ଯଭୂଃ ଶ୍ରତିପଥାକ୍ରମଜାଗରୂକଃ ।
କୈଵଲ୍ଯମେଵ କିମୁ କଲ୍ପଯତେ ନତାନାଂ
କାମାକ୍ଷି ଚିତ୍ରମପି ତେ କରୁଣାକଟାକ୍ଷଃ ॥14॥
ସଂଜୀଵନେ ଜନନି ଚୂତଶିଲୀମୁଖସ୍ଯ
ସଂମୋହନେ ଶଶିକିଶୋରକଶେଖରସ୍ଯ ।
ସଂସ୍ତଂଭନେ ଚ ମମତାଗ୍ରହଚେଷ୍ଟିତସ୍ଯ
କାମାକ୍ଷି ଵୀକ୍ଷଣକଲା ପରମୌଷଧଂ ତେ ॥15॥
ନୀଲୋଽପି ରାଗମଧିକଂ ଜନଯନ୍ପୁରାରେଃ
ଲୋଲୋଽପି ଭକ୍ତିମଧିକାଂ ଦୃଢଯନ୍ନରାଣାମ୍ ।
ଵକ୍ରୋଽପି ଦେଵି ନମତାଂ ସମତାଂ ଵିତନ୍ଵନ୍
କାମାକ୍ଷି ନୃତ୍ଯତୁ ମଯି ତ୍ଵଦପାଂଗପାତଃ ॥16॥
କାମଦ୍ରୁହୋ ହୃଦଯଯଂତ୍ରଣଜାଗରୂକା
କାମାକ୍ଷି ଚଂଚଲଦୃଗଂଚଲମେଖଲା ତେ ।
ଆଶ୍ଚର୍ଯମଂବ ଭଜତାଂ ଝଟିତି ସ୍ଵକୀଯ-
ସଂପର୍କ ଏଵ ଵିଧୁନୋତି ସମସ୍ତବଂଧାନ୍ ॥17॥
କୁଂଠୀକରୋତୁ ଵିପଦଂ ମମ କୁଂଚିତଭ୍ରୂ-
ଚାପାଂଚିତଃ ଶ୍ରିତଵିଦେହଭଵାନୁରାଗଃ ।
ରକ୍ଷୋପକାରମନିଶଂ ଜନଯଂଜଗତ୍ଯାଂ
କାମାକ୍ଷି ରାମ ଇଵ ତେ କରୁଣାକଟାକ୍ଷଃ ॥18॥
ଶ୍ରୀକାମକୋଟି ଶିଵଲୋଚନଶୋଷିତସ୍ଯ
ଶୃଂଗାରବୀଜଵିଭଵସ୍ଯ ପୁନଃପ୍ରରୋହେ ।
ପ୍ରେମାଂଭସାର୍ଦ୍ରମଚିରାତ୍ପ୍ରଚୁରେଣ ଶଂକେ
କେଦାରମଂବ ତଵ କେଵଲଦୃଷ୍ଟିପାତମ୍ ॥19॥
ମାହାତ୍ମ୍ଯଶେଵଧିରସୌ ତଵ ଦୁର୍ଵିଲଂଘ୍ଯ-
ସଂସାରଵିଂଧ୍ଯଗିରିକୁଂଠନକେଲିଚୁଂଚୁଃ ।
ଧୈର୍ଯାଂବୁଧିଂ ପଶୁପତେଶ୍ଚୁଲକୀକରୋତି
କାମାକ୍ଷି ଵୀକ୍ଷଣଵିଜୃଂଭଣକୁଂଭଜନ୍ମା ॥20॥
ପୀଯୂଷଵର୍ଷଵଶିଶିରା ସ୍ଫୁଟଦୁତ୍ପଲଶ୍ରୀ-
ମୈତ୍ରୀ ନିସର୍ଗମଧୁରା କୃତତାରକାପ୍ତିଃ ।
କାମାକ୍ଷି ସଂଶ୍ରିତଵତୀ ଵପୁରଷ୍ଟମୂର୍ତେଃ
ଜ୍ଯୋତ୍ସ୍ନାଯତେ ଭଗଵତି ତ୍ଵଦପାଂଗମାଲା ॥21॥
ଅଂବ ସ୍ମରପ୍ରତିଭଟସ୍ଯ ଵପୁର୍ମନୋଜ୍ଞମ୍
ଅଂଭୋଜକାନନମିଵାଂଚିତକଂଟକାଭମ୍ ।
ଭୃଂଗୀଵ ଚୁଂବତି ସଦୈଵ ସପକ୍ଷପାତା
କାମାକ୍ଷି କୋମଲରୁଚିସ୍ତ୍ଵଦପାଂଗମାଲା ॥22॥
କେଶପ୍ରଭାପଟଲନୀଲଵିତାନଜାଲେ
କାମାକ୍ଷି କୁଂଡଲମଣିଚ୍ଛଵିଦୀପଶୋଭେ ।
ଶଂକେ କଟାକ୍ଷରୁଚିରଂଗତଲେ କୃପାଖ୍ଯା
ଶୈଲୂଷିକା ନଟତି ଶଂକରଵଲ୍ଲଭେ ତେ ॥23॥
ଅତ୍ଯଂତଶୀତଲମତଂଦ୍ରଯତୁ କ୍ଷଣାର୍ଧମ୍
ଅସ୍ତୋକଵିଭ୍ରମମନଂଗଵିଲାସକଂଦମ୍ ।
ଅଲ୍ପସ୍ମିତାଦୃତମପାରକୃପାପ୍ରଵାହମ୍
ଅକ୍ଷିପ୍ରରୋହମଚିରାନ୍ମଯି କାମକୋଟି ॥24॥
ମଂଦାକ୍ଷରାଗତରଲୀକୃତିପାରତଂତ୍ର୍ଯାତ୍
କାମାକ୍ଷି ମଂଥରତରାଂ ତ୍ଵଦପାଂଗଡୋଲାମ୍ ।
ଆରୁହ୍ଯ ମଂଦମତିକୌତୁକଶାଲି ଚକ୍ଷୁଃ
ଆନଂଦମେତି ମୁହୁରର୍ଧଶଶାଂକମୌଲେଃ ॥25॥
ତ୍ରୈଯଂବକଂ ତ୍ରିପୁରସୁଂଦରି ହର୍ମ୍ଯଭୂମି-
ରଂଗଂ ଵିହାରସରସୀ କରୁଣାପ୍ରଵାହଃ ।
ଦାସାଶ୍ଚ ଵାସଵମୁଖାଃ ପରିପାଲନୀଯଂ
କାମାକ୍ଷି ଵିଶ୍ଵମପି ଵୀକ୍ଷଣଭୂଭୃତସ୍ତେ ॥26॥
ଵାଗୀଶ୍ଵରୀ ସହଚରୀ ନିଯମେନ ଲକ୍ଷ୍ମୀଃ
ଭ୍ରୂଵଲ୍ଲରୀଵଶକରୀ ଭୁଵନାନି ଗେହମ୍ ।
ରୂପଂ ତ୍ରିଲୋକନଯନାମୃତମଂବ ତେଷାଂ
କାମାକ୍ଷି ଯେଷୁ ତଵ ଵୀକ୍ଷଣପାରତଂତ୍ରୀ ॥27॥
ମାହେଶ୍ଵରଂ ଝଟିତି ମାନସମୀନମଂବ
କାମାକ୍ଷି ଧୈର୍ଯଜଲଧୌ ନିତରାଂ ନିମଗ୍ନମ୍ ।
ଜାଲେନ ଶୃଂଖଲଯତି ତ୍ଵଦପାଂଗନାମ୍ନା
ଵିସ୍ତାରିତେନ ଵିଷମାଯୁଧଦାଶକୋଽସୌ ॥28॥
ଉନ୍ମଥ୍ଯ ବୋଧକମଲାକାରମଂବ ଜାଡ୍ଯ-
ସ୍ତଂବେରମଂ ମମ ମନୋଵିପିନେ ଭ୍ରମଂତମ୍ ।
କୁଂଠୀକୁରୁଷ୍ଵ ତରସା କୁଟିଲାଗ୍ରସୀମ୍ନା
କାମାକ୍ଷି ତାଵକକଟାକ୍ଷମହାଂକୁଶେନ ॥29॥
ଉଦ୍ଵେଲ୍ଲିତସ୍ତବକିତୈର୍ଲଲିତୈର୍ଵିଲାସୈଃ
ଉତ୍ଥାଯ ଦେଵି ତଵ ଗାଢକଟାକ୍ଷକୁଂଜାତ୍ ।
ଦୂରଂ ପଲାଯଯତୁ ମୋହମୃଗୀକୁଲଂ ମେ
କାମାକ୍ଷି ସ୍ତଵରମନୁଗ୍ରହକେସରୀଂଦ୍ରଃ ॥30॥
ସ୍ନେହାଦୃତାଂ ଵିଦଲିତୋତ୍ପଲକଂତିଚୋରାଂ
ଜେତାରମେଵ ଜଗଦୀଶ୍ଵରି ଜେତୁକାମଃ ।
ମାନୋଦ୍ଧତୋ ମକରକେତୁରସୌ ଧୁନୀତେ
କାମାକ୍ଷି ତାଵକକଟାକ୍ଷକୃପାଣଵଲ୍ଲୀମ୍ ॥31॥
ଶ୍ରୌତୀଂ ଵ୍ରଜନ୍ନପି ସଦା ସରଣିଂ ମୁନୀନାଂ
କାମାକ୍ଷି ସଂତତମପି ସ୍ମୃତିମାର୍ଗଗାମୀ ।
କୌଟିଲ୍ଯମଂବ କଥମସ୍ଥିରତାଂ ଚ ଧତ୍ତେ
ଚୌର୍ଯଂ ଚ ପଂକଜରୁଚାଂ ତ୍ଵଦପାଂଗପାତଃ ॥32॥
ନିତ୍ଯଂ ଶ୍ରେତୁଃ ପରିଚିତୌ ଯତମାନମେଵ
ନୀଲୋତ୍ପଲଂ ନିଜସମୀପନିଵାସଲୋଲମ୍ ।
ପ୍ରୀତ୍ଯୈଵ ପାଠଯତି ଵୀକ୍ଷଣଦେଶିକେଂଦ୍ରଃ
କାମାକ୍ଷୀ କିଂତୁ ତଵ କାଲିମସଂପ୍ରଦାଯମ୍ ॥33॥
ଭ୍ରାଂତ୍ଵା ମୁହୁଃ ସ୍ତବକିତସ୍ମିତଫେନରାଶୌ
କାମାକ୍ଷି ଵକ୍ତ୍ରରୁଚିସଂଚଯଵାରିରାଶୌ ।
ଆନଂଦତି ତ୍ରିପୁରମର୍ଦନନେତ୍ରଲକ୍ଷ୍ମୀଃ
ଆଲଂବ୍ଯ ଦେଵି ତଵ ମଂଦମପାଂଗସେତୁମ୍ ॥34॥
ଶ୍ଯାମା ତଵ ତ୍ରିପୁରସୁଂଦରି ଲୋଚନଶ୍ରୀଃ
କାମାକ୍ଷି କଂଦଲିତମେଦୁରତାରକାଂତିଃ ।
ଜ୍ଯୋତ୍ସ୍ନାଵତୀ ସ୍ମିତରୁଚାପି କଥଂ ତନୋତି
ସ୍ପର୍ଧାମହୋ କୁଵଲଯୈଶ୍ଚ ତଥା ଚକୋରୈଃ ॥35॥
କାଲାଂଜନଂ ଚ ତଵ ଦେଵି ନିରୀକ୍ଷଣଂ ଚ
କାମାକ୍ଷି ସାମ୍ଯସରଣିଂ ସମୁପୈତି କାଂତ୍ଯା ।
ନିଶ୍ଶେଷନେତ୍ରସୁଲଭଂ ଜଗତୀଷୁ ପୂର୍ଵ-
ମନ୍ଯତ୍ତ୍ରିନେତ୍ରସୁଲଭଂ ତୁହିନାଦ୍ରିକନ୍ଯେ ॥36॥
ଧୂମାଂକୁରୋ ମକରକେତନପାଵକସ୍ଯ
କାମାକ୍ଷି ନେତ୍ରରୁଚିନୀଲିମଚାତୁରୀ ତେ ।
ଅତ୍ଯଂତମଦ୍ଭୁତମିଦଂ ନଯନତ୍ରଯସ୍ଯ
ହର୍ଷୋଦଯଂ ଜନଯତେ ହରୁଣାଂକମୌଲେଃ ॥37॥
ଆରଭ୍ଭଲେଶସମଯେ ତଵ ଵୀକ୍ଷଣସ୍ସ
କାମାକ୍ଷି ମୂକମପି ଵୀକ୍ଷଣମାତ୍ରନମ୍ରମ୍ ।
ସର୍ଵଜ୍ଞତା ସକଲଲୋକସମକ୍ଷମେଵ
କୀର୍ତିସ୍ଵଯଂଵରଣମାଲ୍ଯଵତୀ ଵୃଣୀତେ ॥38॥
କାଲାଂବୁଵାହ ଉଵ ତେ ପରିତାପହାରୀ
କାମାକ୍ଷି ପୁଷ୍କରମଧଃକୁରୁତେ କଟାଖ୍କ୍ଷ୍ଷଃ ।
ପୂର୍ଵଃ ପରଂ କ୍ଷଣରୁଚା ସମୁପୈତି ମୈତ୍ରୀ-
ମନ୍ଯସ୍ତୁ ସ.ତତରୁଚିଂ ପ୍ରକଟୀକରୋତି ॥39॥
ସୂକ୍ଷ୍ମେଽପି ଦୁର୍ଗମତରେଽପି ଗୁରୁପ୍ରସାଦ-
ସାହାଯ୍ଯକେନ ଵିଚରନ୍ନପଵର୍ଗମାର୍ଗେ ।
ସଂସାରପଂକନିଚଯେ ନ ପତତ୍ଯମୂଂ ତେ
କାମାକ୍ଷି ଗାଢମଵଲଂବ୍ଯ କଟାକ୍ଷଯଷ୍ଟିମ୍ ॥40॥
କାମାକ୍ଷି ସଂତତମସୌ ହରିନୀଲରତ୍ନ-
ସ୍ତଂଭେ କଟାକ୍ଷରୁଚିପୁଂଜମଯେ ଭଵତ୍ଯାଃ ।
ବଦ୍ଧୋଽପି ଭକ୍ତିନିଗଲୈର୍ମମ ଚିତ୍ତହସ୍ତୀ
ସ୍ତଂଭଂ ଚ ବଂଧମପି ମୁଂଚତି ହଂତ ଚିତ୍ରମ୍ ॥41॥
କାମାକ୍ଷି କାଷ୍ଣର୍ଯମପି ସଂତତମଂଜନଂ ଚ
ବିଭ୍ରନ୍ନିସର୍ଗତରଲୋଽପି ଭଵତ୍କଟାକ୍ଷଃ ।
ଵୈମଲ୍ଯମନ୍ଵହମନଂଜନତା ଚ ଭୂଯଃ
ସ୍ଥୈର୍ଯଂ ଚ ଭକ୍ତହୃଦଯାଯ କଥଂ ଦଦାତି ॥42॥
ମଂଦସ୍ମିତସ୍ତବକିତଂ ମଣିକୁଂଡଲାଂଶୁ-
ସ୍ତୋମପ୍ରଵାଲରୁଚିରଂ ଶିଶିରୀକୃତାଶମ୍ ।
କାମାକ୍ଷି ରାଜତି କଟାକ୍ଷରୁଚେଃ କଦଂବମ୍
ଉଦ୍ଯାନମଂବ କରୁଣାହରିଣେକ୍ଷଣାଯାଃ ॥43॥
କାମାକ୍ଷି ତାଵକକଟାକ୍ଷମହେଂଦ୍ରନୀଲ-
ସିଂହାସନଂ ଶ୍ରିତଵତୋ ମକରଧ୍ଵଜସ୍ଯ ।
ସାମ୍ରାଜ୍ଯମଂଗଲଵିଧୌ ମୁଣିକୁଂଡଲଶ୍ରୀଃ
ନୀରାଜନୋତ୍ସଵତରଂଗିତଦୀପମାଲା ॥44॥
ମାତଃ କ୍ଷଣଂ ସ୍ନପଯ ମାଂ ତଵ ଵୀକ୍ଷିତେନ
ମଂଦାକ୍ଷିତେନ ସୁଜନୈରପରୋକ୍ଷିତେନ ।
କାମାକ୍ଷି କର୍ମତିମିରୋତ୍କରଭାସ୍କରେଣ
ଶ୍ରେଯସ୍କରେଣ ମଧୁପଦ୍ଯୁତିତସ୍କରେଣ ॥45॥
ପ୍ରେମାପଗାପଯସି ମଜ୍ଜନମାରଚଯ୍ଯ
ଯୁକ୍ତଃ ସ୍ମିତାଂଶୁକୃତଭସ୍ମଵିଲେପନେନ ।
କାମାକ୍ଷି କୁଂଡଲମଣିଦ୍ଯୁତିଭିର୍ଜଟାଲଃ
ଶ୍ରୀକଂଠମେଵ ଭଜତେ ତଵ ଦୃଷ୍ଟିପାତଃ ॥46॥
କୈଵଲ୍ଯଦାଯ କରୁଣାରସକିଂକରାଯ
କାମାକ୍ଷି କଂଦଲିତଵିଭ୍ରମଶଂକରାଯ ।
ଆଲୋକନାଯ ତଵ ଭକ୍ତଶିଵଂକରାଯ
ମାତର୍ନମୋଽସ୍ତୁ ପରତଂତ୍ରିତଶଂକରାଯ ॥47॥
ସାମ୍ରାଜ୍ଯମଂଗଲଵିଧୌ ମକରଧ୍ଵଜସ୍ଯ
ଲୋଲାଲକାଲିକୃତତୋରଣମାଲ୍ଯଶୋଭେ ।
କାମେଶ୍ଵରି ପ୍ରଚଲଦୁତ୍ପଲଵୈଜଯଂତୀ-
ଚାତୁର୍ଯମେତି ତଵ ଚଂଚଲଦୃଷ୍ଟିପାତଃ ॥48॥
ମାର୍ଗେଣ ମଂଜୁକଚକାଂତିତମୋଵୃତେନ
ମଂଦାଯମାନଗମନା ମଦନାତୁରାସୌ ।
କାମାକ୍ଷି ଦୃଷ୍ଟିରଯତେ ତଵ ଶଂକରାଯ
ସଂକେତଭୂମିମଚିରାଦଭିସାରିକେଵ ॥49॥
ଵ୍ରୀଡନୁଵୃତ୍ତିରମଣୀକୃତସାହଚର୍ଯା
ଶୈଵାଲିତାଂ ଗଲରୁଚା ଶଶିଶେଖରସ୍ଯ ।
କାମାକ୍ଷି କାଂତିସରସୀଂ ତ୍ଵଦପାଂଗଲକ୍ଷ୍ମୀଃ
ମଂଦଂ ସମାଶ୍ରଯତି ମଜ୍ଜନଖେଲନାଯ ॥50॥
କାଷାଯମଂଶୁକମିଵ ପ୍ରକଟଂ ଦଧାନୋ
ମାଣିକ୍ଯକୁଂଡଲରୁଚିଂ ମମତାଵିରୋଧୀ ।
ଶ୍ରୁତ୍ଯଂତସୀମନି ରତଃ ସୁତରାଂ ଚକାସ୍ତି
କାମାକ୍ଷି ତାଵକକଟାକ୍ଷଯତୀଶ୍ଵରୋଽସୌ ॥51॥
ପାଷାଣ ଏଵ ହରିନୀଲମଣିର୍ଦିନେଷୁ
ପ୍ରମ୍ଲନତାଂ କୁଵଲଯଂ ପ୍ରକଟୀକରୋତି ।
ନୌମିତ୍ତିକୋ ଜଲଦମେଚକିମା ତତସ୍ତେ
କାମାକ୍ଷି ଶୂନ୍ଯମୁପମନମପାଂଗଲକ୍ଷ୍ମ୍ଯାଃ ॥52॥
ଶୃଂଗାରଵିଭ୍ରମଵତୀ ସୁତରାଂ ସଲଜ୍ଜା
ନାସାଗ୍ରମୌକ୍ତିକରୁଚା କୃତମଂଦହାସା ।
ଶ୍ଯାମା କଟାକ୍ଷସୁଷମା ତଵ ଯୁକ୍ତମେତତ୍
କାମାକ୍ଷି ଚୁଂବତି ଦିଗଂବରଵକ୍ତ୍ରବିଂବମ୍ ॥53॥
ନୀଲୋତ୍ପଲେନ ମଧୁପେନ ଚ ଦୃଷ୍ଟିପାତଃ
କାମାକ୍ଷି ତୁଲ୍ଯ ଇତି ତେ କଥମାମନଂତି ।
ଶୈତ୍ଯେନ ନିଂଦଯତି ଯଦନ୍ଵହମିଂଦୁପାଦାନ୍
ପାଥୋରୁହେଣ ଯଦସୌ କଲହାଯତେ ଚ ॥54॥
ଓଷ୍ଠପ୍ରଭାପଟଲଵିଦ୍ରୁମମୁଦ୍ରିତେ ତେ
ଭ୍ରୂଵଲ୍ଲିଵୀଚିସୁଭଗେ ମୁଖକାଂତିସିଂଧୌ ।
କାମାକ୍ଷି ଵାରିଭରପୂରଣଲଂବମାନ-
କାଲାଂବୁଵାହସରଣିଂ ଲଭତେ କଟାକ୍ଷଃ ॥55॥
ମଂଦସ୍ମିତୈର୍ଧଵଲିତା ମଣିକୁଂଡଲାଂଶୁ-
ସଂପର୍କଲୋହିତରୁଚିସ୍ତ୍ଵଦପାଂଗଧାରା ।
କାମାକ୍ଷି ମଲ୍ଲିକୁସୁମୈର୍ନଵପଲ୍ଲଵୈଶ୍ଚ
ନୀଲୋତ୍ପଲୈଶ୍ଚ ରଚିତେଵ ଵିଭାତି ମାଲା ॥56॥
କାମାକ୍ଷି ଶୀତଲକୃପାରସନିର୍ଝରାଂଭଃ-
ସଂପର୍କପକ୍ଷ୍ମଲରୁଚିସ୍ତ୍ଵଦପାଂଗମାଲା ।
ଗୋଭିଃ ସଦା ପୁରରିପୋରଭିଲଷ୍ଯମାଣା
ଦୂର୍ଵାକଦଂବକଵିଡଂବନମାତନୋତି ॥57॥
ହୃତ୍ପଂକଜଂ ମମ ଵିକାସଯତୁ ପ୍ରମୁଷ୍ଣ-
ନ୍ନୁଲ୍ଲାସମୁତ୍ପଲରୁଚେସ୍ତମସାଂ ନିରୋଦ୍ଧା ।
ଦୋଷାନୁଷଂଗଜଡତାଂ ଜଗତାଂ ଧୁନାନଃ
କାମାକ୍ଷି ଵୀକ୍ଷଣଵିଲାସଦିନୋଦଯସ୍ତେ ॥58॥
ଚକ୍ଷୁର୍ଵିମୋହଯତି ଚଂଦ୍ରଵିଭୂଷଣସ୍ଯ
କାମାକ୍ଷି ତାଵକକଟାକ୍ଷତମଃପ୍ରରୋହଃ ।
ପ୍ରତ୍ଯଙ୍ମୁଖଂ ତୁ ନଯନଂ ସ୍ତିମିତଂ ମୁନୀନାଂ
ପ୍ରାକାଶ୍ଯମେଵ ନଯତୀତି ପରଂ ଵିଚିତ୍ରମ୍ ॥59॥
କାମାକ୍ଷି ଵୀକ୍ଷଣରୁଚା ଯୁଧି ନିର୍ଜିତଂ ତେ
ନୀଲୋତ୍ପଲଂ ନିରଵଶେଷଗତାଭିମାନମ୍ ।
ଆଗତ୍ଯ ତତ୍ପରିସରଂ ଶ୍ରଵଣଵତଂସ-
ଵ୍ଯୋଜେନ ନୂନମଭଯାର୍ଥନମାତନୋତି ॥60॥
ଆଶ୍ଚର୍ଯମଂବ ମଦାନାଭ୍ଯୁଦଯାଵଲଂବଃ
କାମାକ୍ଷି ଚଂଚଲନିରୀକ୍ଷଣଵିଭ୍ରମସ୍ତେ ।
ଧୈର୍ଯଂ ଵିଧୂଯ ତନୁତେ ହୃଦି ରାଗବଂଧଂ
ଶଂଭୋସ୍ତଦେଵ ଵିପରୀତତଯା ମୁନୀନାମ୍ ॥61॥
ଜଂତୋଃ ସକୃତ୍ପ୍ରଣମତୋ ଜଗଦୀଡ୍ଯତାଂ ଚ
ତେଜାସ୍ଵିତାଂ ଚ ନିଶିତାଂ ଚ ମତିଂ ସଭାଯାମ୍ ।
କାମାକ୍ଷି ମାକ୍ଷିକଝରୀମିଵ ଵୈଖରୀଂ ଚ
ଲକ୍ଷ୍ମୀଂ ଚ ପକ୍ଷ୍ମଲଯତି କ୍ଷଣଵୀକ୍ଷଣଂ ତେ ॥62॥
କାଦଂବିନୀ କିମଯତେ ନ ଜଲାନୁଷଂଗଂ
ଭୃଂଗାଵଲୀ କିମୁରରୀକୁରୁତେ ନ ପଦ୍ମମ୍ ।
କିଂ ଵା କଲିଂଦତନଯା ସହତେ ନ ଭଂଗଂ
କାମାକ୍ଷି ନିଶ୍ଚଯପଦଂ ନ ତଵାକ୍ଷିଲକ୍ଷ୍ମୀଃ ॥63॥
କାକୋଲପାଵକତୃଣୀକରଣେଽପି ଦକ୍ଷଃ
କାମାକ୍ଷି ବାଲକସୁଧାକରଶେଖରସ୍ଯ ।
ଅତ୍ଯଂତଶୀତଲତମୋଽପ୍ଯନୁପାରତଂ ତେ
ଚିତ୍ତଂ ଵିମୋହଯତି ଚିତ୍ରମଯଂ କଟାକ୍ଷଃ ॥64॥
କାର୍ପଣ୍ଯପୂରପରିଵର୍ଧିତମଂବ ମୋହ-
କଂଦୋଦ୍ଗତଂ ଭଵମଯଂ ଵିଷପାଦପଂ ମେ ।
ତୁଂଗଂ ଛିନତ୍ତୁ ତୁହିନାଦ୍ରିସୁତେ ଭଵତ୍ଯାଃ
କାଂଚୀପୁରେଶ୍ଵରି କଟାକ୍ଷକୁଠାରଧାରା ॥65॥
କାମାକ୍ଷି ଘୋରଭଵରୋଗଚିକିତ୍ସନାର୍ଥ-
ମଭ୍ଯର୍ଥ୍ଯ ଦେଶିକକଟାକ୍ଷଭିଷକ୍ପ୍ରସାଦାତ୍ ।
ତତ୍ରାପି ଦେଵି ଲଭତେ ସୁକୃତୀ କଦାଚି-
ଦନ୍ଯସ୍ଯ ଦୁର୍ଲଭମପାଂଗମହୌଷଧଂ ତେ ॥66॥
କାମାକ୍ଷି ଦେଶିକକୃପାଂକୁରମାଶ୍ରଯଂତୋ
ନାନାତପୋନିଯମନାଶିତପାଶବଂଧାଃ ।
ଵାସାଲଯଂ ତଵ କଟାକ୍ଷମମୁଂ ମହାଂତୋ
ଲବ୍ଧ୍ଵା ସୁଖଂ ସମାଧିଯୋ ଵିଚରଂତି ଲୋକେ ॥67॥
ସାକୂତସଂଲପିତସଂଭୃତମୁଗ୍ଧହାସଂ
ଵ୍ରୀଡାନୁରାଗସହଚାରି ଵିଲୋକନଂ ତେ ।
କାମାକ୍ଷି କାମପରିପଂଥିନି ମାରଵୀର-
ସାମ୍ରାଜ୍ଯଵିଭ୍ରମଦଶାଂ ସଫଲୀକରୋତି ॥68॥
କାମାକ୍ଷି ଵିଭ୍ରମବଲୈକନିଧିର୍ଵିଧାଯ
ଭ୍ରୂଵଲ୍ଲିଚାପକୁଟିଲୀକୃତିମେଵ ଚିତ୍ରମ୍ ।
ସ୍ଵାଧୀନତାଂ ତଵ ନିନାଯ ଶଶାଂକମୌଲେ-
ରଂଗାର୍ଧରାଜ୍ଯସୁଖଲାଭମପାଂଗଵୀରଃ ॥69॥
କାମାଂକୁରୈକନିଲଯସ୍ତଵ ଦୃଷ୍ଟିପାତଃ
କାମାକ୍ଷି ଭକ୍ତମନସାଂ ପ୍ରଦଦାତୁ କାମାନ୍ ।
ରାଗାନ୍ଵିତଃ ସ୍ଵଯମପି ପ୍ରକଟୀକରୋତି
ଵୈରାଗ୍ଯମେଵ କଥମେଷ ମହାମୁନୀନାମ୍ ॥70॥
କାଲାଂବୁଵାହନିଵହୈଃ କଲହାଯତେ ତେ
କାମାକ୍ଷି କାଲିମମଦେନ ସଦା କଟାକ୍ଷଃ ।
ଚିତ୍ରଂ ତଥାପି ନିତରାମମୁମେଵ ଦୃଷ୍ଟ୍ଵା
ସୋତ୍କଂଠ ଏଵ ରମତେ କିଲ ନୀଲକଂଠଃ ॥71॥
କାମାକ୍ଷି ମନ୍ମଥରିପୁଂ ପ୍ରତି ମାରତାପ-
ମୋହାଂଧକାରଜଲଦାଗମନେନ ନୃତ୍ଯନ୍ ।
ଦୁଷ୍କର୍ମକଂଚୁକିକୁଲଂ କବଲୀକରୋତୁ
ଵ୍ଯାମିଶ୍ରମେଚକରୁଚିସ୍ତ୍ଵଦପାଂଗକେକୀ ॥72॥
କାମାକ୍ଷି ମନ୍ମଥରିପୋରଵଲୋକନେଷୁ
କାଂତଂ ପଯୋଜମିଵ ତାଵକମକ୍ଷିପାତମ୍ ।
ପ୍ରେମାଗମୋ ଦିଵସଵଦ୍ଵିକଚୀକରୋତି
ଲଜ୍ଜାଭରୋ ରଜନିଵନ୍ମୁକୁଲୀକରୋତି ॥73॥
ମୂକୋ ଵିରିଂଚତି ପରଂ ପୁରୁଷଃ କୁରୂପଃ
କଂଦର୍ପତି ତ୍ରିଦଶରାଜତି କିଂପଚାନଃ ।
କାମାକ୍ଷି କେଵଲମୁପକ୍ରମକାଲ ଏଵ
ଲୀଲାତରଂଗିତକଟାକ୍ଷରୁଚଃ କ୍ଷଣଂ ତେ ॥74॥
ନୀଲାଲକା ମଧୁକରଂତି ମନୋଜ୍ଞନାସା-
ମୁକ୍ତାରୁଚଃ ପ୍ରକଟକଂଦବିସାଂକୁରଂତି ।
କାରୁଣ୍ଯମଂବ ମକରଂଦତି କାମକୋଟି
ମନ୍ଯେ ତତଃ କମଲମେଵ ଵିଲୋଚନଂ ତେ ॥75॥
ଆକାଂକ୍ଷ୍ଯମାଣଫଲଦାନଵିଚକ୍ଷଣାଯାଃ ।
କାମାକ୍ଷି ତାଵକକଟାକ୍ଷକକାମଧେନୋଃ ।
ସଂପର୍କ ଏଵ କଥମଂବ ଵିମୁକ୍ତପାଶ-
ବଂଧାଃ ସ୍ଫୁଟଂ ତନୁଭୃତଃ ପଶୁତାଂ ତ୍ଯଜଂତି ॥76॥
ସଂସାରଘର୍ମପରିତାପଜୁଷାଂ ନରାଣାଂ
କାମାକ୍ଷି ଶୀତଲତରାଣି ତଵେକ୍ଷିତାନି ।
ଚଂଦ୍ରାତପଂତି ଘନଚଂଦନକର୍ଦମଂତି
ମୁକ୍ତାଗୁଣଂତି ହିମଵାରିନିଷେଚନଂତି ॥77॥
ପ୍ରେମାଂବୁରାଶିସତତସ୍ନପିତାନି ଚିତ୍ରଂ
କାମାକ୍ଷି ତାଵକକଟାକ୍ଷନିରୀକ୍ଷଣାନି ।
ସଂଧୁକ୍ଷଯଂତି ମୁହୁରିଂଧନରାଶିରୀତ୍ଯା
ମାରଦ୍ରୁହୋ ମନସି ମନ୍ମଥଚିତ୍ରଭାନୁମ୍ ॥78॥
କାଲାଂଜନପ୍ରତିଭଟଂ କମନୀଯକାଂତ୍ଯା
କଂଦର୍ପତଂତ୍ରକଲଯା କଲିତାନୁଭାଵମ୍ ।
କାଂଚୀଵିହାରରସିକେ କଲୁଷାର୍ତିଚୋରଂ
କଲ୍ଲୋଲଯସ୍ଵ ମଯି ତେ କରୁଣାକଟାକ୍ଷମ୍ ॥79॥
କ୍ରାଂତେନ ମନ୍ମଥଦେନ ଵିମୋହ୍ଯମାନ-
ସ୍ଵାଂତେନ ଚୂତତରୁମୂଲଗତସ୍ଯ ପୁଂସଃ ।
କାଂତେନ କିଂଚିଦଵଲୋକଯ ଲୋଚନସ୍ଯ
ପ୍ରାଂତେନ ମାଂ ଜନନି କାଂଚିପୁରୀଵିଭୂଷେ ॥80॥
କାମାକ୍ଷି କୋଽପି ସୁଜନାସ୍ତ୍ଵଦପାଂଗସଂଗେ
କଂଠେନ କଂଦଲିତକାଲିମସଂପ୍ରଦାଯାଃ ।
ଉତ୍ତଂସକଲ୍ପିତଚକୋରକୁଟୁଂବପୋଷା
ନକ୍ତଂଦିଵସପ୍ରସଵଭୂନଯନା ଭଵଂତି ॥81॥
ନୀଲୋତ୍ପଲପ୍ରସଵକାଂତିନିର୍ଦଶନେନ
କାରୁଣ୍ଯଵିଭ୍ରମଜୁଷା ତଵ ଵୀକ୍ଷଣେନ ।
କାମାକ୍ଷି କର୍ମଜଲଧେଃ କଲଶୀସୁତେନ
ପାଶତ୍ରଯାଦ୍ଵଯମମୀ ପରିମୋଚନୀଯାଃ ॥82॥
ଅତ୍ଯଂତଚଂଚଲମକୃତ୍ରିମମଂଜନଂ କିଂ
ଝଂକାରଭଂଗିରହିତା କିମୁ ଭୃଂଗମାଲା ।
ଧୂମାଂକୁରଃ କିମୁ ହୁତାଶନସଂଗହୀନଃ
କାମାକ୍ଷି ନେତ୍ରରୁଚିନୀଲିମକଂଦଲୀ ତେ ॥83॥
କାମାକ୍ଷି ନିତ୍ଯମଯମଂଜଲିରସ୍ତୁ ମୁକ୍ତି-
ବୀଜାଯ ଵିଭ୍ରମମଦୋଦଯଘୂର୍ଣିତାଯ ।
କଂଦର୍ପଦର୍ପପୁନରୁଦ୍ଭଵସିଦ୍ଧିଦାଯ
କଲ୍ଯାଣଦାଯ ତଵ ଦେଵି ଦୃଗଂଚଲାଯ ॥84॥
ଦର୍ପାଂକୁରୋ ମକରକେତନଵିଭ୍ରମାଣାଂ
ନିଂଦାଂକୁରୋ ଵିଦଲିତୋତ୍ପଲଚାତୁରୀଣାମ୍ ।
ଦୀପାଂକୁରୋ ଭଵତମିସ୍ରକଦଂବକାନାଂ
କାମାକ୍ଷି ପାଲଯତୁ ମାଂ ତ୍ଵଦପାଂଗପାତଃ ॥85॥
କୈଵଲ୍ଯଦିଵ୍ଯମଣିରୋହଣପର୍ଵତେଭ୍ଯଃ
କାରୁଣ୍ଯନିର୍ଝରପଯଃକୃତମଂଜନେଭ୍ଯଃ ।
କାମାକ୍ଷି କିଂକରିତଶଂକରମାନସେଭ୍ଯ-
ସ୍ତେଭ୍ଯୋ ନମୋଽସ୍ତୁ ତଵ ଵୀକ୍ଷଣଵିଭ୍ରମେଭ୍ଯଃ ॥86॥
ଅଲ୍ପୀଯ ଏଵ ନଵମୁତ୍ପଲମଂବ ହୀନା
ମୀନସ୍ଯ ଵା ସରଣିରଂବୁରୁହାଂ ଚ କିଂ ଵା ।
ଦୂରେ ମୃଗୀଦୃଗସମଂଜସମଂଜନଂ ଚ
କାମାକ୍ଷି ଵୀକ୍ଷଣରୁଚୌ ତଵ ତର୍କଯାମଃ ॥87॥
ମିଶ୍ରୀଭଵଦ୍ଗରଲପଂକିଲଶଂକରୋରସ୍-
ସୀମାଂଗଣେ କିମପି ରିଂଖଣମାଦଧାନଃ ।
ହେଲାଵଧୂତଲଲିତଶ୍ରଵଣୋତ୍ପଲୋଽସୌ
କାମାକ୍ଷି ବାଲ ଇଵ ରାଜତି ତେ କଟାକ୍ଷଃ ॥88॥
ପ୍ରୌଢିକରୋତି ଵିଦୁଷାଂ ନଵସୂକ୍ତିଧାଟୀ-
ଚୂତାଟଵୀଷୁ ବୁଧକୋକିଲଲାଲ୍ଯମାନମ୍ ।
ମାଧ୍ଵୀରସଂ ପରିମଲଂ ଚ ନିରର୍ଗଲଂ ତେ
କାମାକ୍ଷି ଵୀକ୍ଷଣଵିଲାସଵସଂତଲକ୍ଷ୍ମୀଃ ॥89॥
କୂଲଂକଷଂ ଵିତନୁତେ କରୁଣାଂବୁଵର୍ଷୀ
ସାରସ୍ଵତଂ ସୁକୃତିନଃ ସୁଲଭଂ ପ୍ରଵାହମ୍ ।
ତୁଚ୍ଛୀକରୋତି ଯମୁନାଂବୁତରଂଗଭଂଗୀଂ
କାମାକ୍ଷି କିଂ ତଵ କଟାକ୍ଷମହାଂବୁଵାହଃ ॥90॥
ଜଗର୍ତି ଦେଵି କରୁଣାଶୁକସୁଂଦରୀ ତେ
ତାଟଂକରତ୍ନରୁଚିଦାଡିମଖଂଡଶୋଣେ ।
କାମାକ୍ଷି ନିର୍ଭରକଟାକ୍ଷମରୀଚିପୁଂଜ-
ମାହେଂଦ୍ରନୀଲମଣିପଂଜରମଧ୍ଯଭାଗେ ॥91॥
କାମାକ୍ଷି ସତ୍କୁଵଲଯସ୍ଯ ସଗୋତ୍ରଭାଵା-
ଦାକ୍ରାମତି ଶ୍ରୁତିମସୌ ତଵ ଦୃଷ୍ଟିପାତଃ ।
କିଂଚ ସ୍ଫୁଟଂ କୁଟିଲତାଂ ପ୍ରକଟୀକରୋତି
ଭ୍ରୂଵଲ୍ଲରୀପରିଚିତସ୍ଯ ଫଲଂ କିମେତତ୍ ॥92॥
ଏଷା ତଵାକ୍ଷିସୁଷମା ଵିଷମାଯୁଧସ୍ଯ
ନାରାଚଵର୍ଷଲହରୀ ନଗରାଜକନ୍ଯେ ।
ଶଂକେ କରୋତି ଶତଧା ହୃଦି ଧୈର୍ଯମୁଦ୍ରାଂ
ଶ୍ରୀକାମକୋଟି ଯଦସୌ ଶିଶିରାଂଶୁମୌଲେଃ ॥93॥
ବାଣେନ ପୁଷ୍ପଧନୁଷଃ ପରିକଲ୍ପ୍ଯମାନ-
ତ୍ରାଣେନ ଭକ୍ତମନସାଂ କରୁଣାକରେଣ ।
କୋଣେନ କୋମଲଦୃଶସ୍ତଵ କାମକୋଟି
ଶୋଣେନ ଶୋଷଯ ଶିଵେ ମମ ଶୋକସିଂଧୁମ୍ ॥94॥
ମାରଦ୍ରୁହା ମୁକୁଟସୀମନି ଲାଲ୍ଯମାନେ
ମଂଦାକିନୀପଯସି ତେ କୁଟିଲଂ ଚରିଷ୍ଣୁଃ ।
କାମାକ୍ଷି କୋପରଭସାଦ୍ଵଲମାନମୀନ-
ସଂଦେହମଂକୁରଯତି କ୍ଷଣମକ୍ଷିପାତଃ ॥95॥
କାମାକ୍ଷି ସଂଵଲିତମୌକ୍ତିକକୁଂଡଲାଂଶୁ-
ଚଂଚତ୍ସିତଶ୍ରଵଣଚାମରଚାତୁରୀକଃ ।
ସ୍ତଂଭେ ନିରଂତରମପାଂଗମଯେ ଭଵତ୍ଯା
ବଦ୍ଧଶ୍ଚକାସ୍ତି ମକରଧ୍ଵଜମତ୍ତହସ୍ତୀ ॥96॥
ଯାଵତ୍କଟାକ୍ଷରଜନୀସମଯାଗମସ୍ତେ
କାମାକ୍ଷି ତାଵଦଚିରାନ୍ନମତାଂ ନରାଣାମ୍ ।
ଆଵିର୍ଭଵତ୍ଯମୃତଦୀଧିତିବିଂବମଂବ
ସଂଵିନ୍ମଯଂ ହୃଦଯପୂର୍ଵଗିରୀଂଦ୍ରଶୃଂଗେ ॥97॥
କାମାକ୍ଷି କଲ୍ପଵିଟପୀଵ ଭଵତ୍କଟାକ୍ଷୋ
ଦିତ୍ସୁଃ ସମସ୍ତଵିଭଵଂ ନମତାଂ ନରାଣାମ୍ ।
ଭୃଂଗସ୍ଯ ନୀଲନଲିନସ୍ଯ ଚ କାଂତିସଂପ-
ତ୍ସର୍ଵସ୍ଵମେଵ ହରତୀତି ପରଂ ଵିଚିତ୍ରମ୍ ॥98॥
ଅତ୍ଯଂତଶୀତଲମନର୍ଗଲକର୍ମପାକ-
କାକୋଲହାରି ସୁଲଭଂ ସୁମନୋଭିରେତତ୍ ।
ପୀଯୂଷମେଵ ତଵ ଵୀକ୍ଷଣମଂବ କିଂତୁ
କାମାକ୍ଷି ନୀଲମିଦମିତ୍ଯଯମେଵ ଭେଦଃ ॥99॥
ଅଜ୍ଞାତଭକ୍ତିରସମପ୍ରସରଦ୍ଵିଵେକ-
ମତ୍ଯଂତଗର୍ଵମନଧୀତସମସ୍ତଶାସ୍ତ୍ରମ୍ ।
ଅପ୍ରାପ୍ତସତ୍ଯମସମୀପଗତଂ ଚ ମୁକ୍ତେଃ
କାମାକ୍ଷି ନୈଵ ତଵ ସ୍ପୃହଯତି ଦୃଷ୍ଟିପାତଃ ॥100॥
(କାମାକ୍ଷି ମାମଵତୁ ତେ କରୁଣାକଟାକ୍ଷଃ)
ପାତେନ ଲୋଚନରୁଚେସ୍ତଵ କାମକୋଟି
ପୋତେନ ପତକପଯୋଧିଭଯାତୁରାଣାମ୍ ।
ପୂତେନ ତେନ ନଵକାଂଚନକୁଂଡଲାଂଶୁ-
ଵୀତେନ ଶୀତଲଯ ଭୂଧରକନ୍ଯକେ ମାମ୍ ॥101॥
॥ ଇତି କଟାକ୍ଷଶତକଂ ସଂପୂର୍ଣମ୍ ॥
Browse Related Categories:
