ପାଂଡିତ୍ଯଂ ପରମେଶ୍ଵରି ସ୍ତୁତିଵିଧୌ ନୈଵାଶ୍ରଯଂତେ ଗିରାଂ
ଵୈରିଂଚାନ୍ଯପି ଗୁଂଫନାନି ଵିଗଲଦ୍ଗର୍ଵାଣି ଶର୍ଵାଣି ତେ ।
ସ୍ତୋତୁଂ ତ୍ଵାଂ ପରିଫୁଲ୍ଲନୀଲନଲିନଶ୍ଯାମାକ୍ଷି କାମାକ୍ଷି ମାଂ
ଵାଚାଲୀକୁରୁତେ ତଥାପି ନିତରାଂ ତ୍ଵତ୍ପାଦସେଵାଦରଃ ॥1॥
ତାପିଂଛସ୍ତବକତ୍ଵିଷେ ତନୁଭୃତାଂ ଦାରିଦ୍ର୍ଯମୁଦ୍ରାଦ୍ଵିଷେ
ସଂସାରାଖ୍ଯତମୋମୁଷେ ପୁରରିପୋର୍ଵାମାଂକସୀମାଜୁଷେ ।
କଂପାତୀରମୁପେଯୁଷେ କଵଯତାଂ ଜିହ୍ଵାକୁଟୀଂ ଜଗ୍ମୁଷେ
ଵିଶ୍ଵତ୍ରାଣପୁଷେ ନମୋଽସ୍ତୁ ସତତଂ ତସ୍ମୈ ପରଂଜ୍ଯୋତିଷେ ॥2॥
ଯେ ସଂଧ୍ଯାରୁଣଯଂତି ଶଂକରଜଟାକାଂତାରଚନ୍ରାର୍ଭକଂ
ସିଂଦୂରଂତି ଚ ଯେ ପୁରଂଦରଵଧୂସୀମଂତସୀମାଂତରେ ।
ପୁଣ୍ଯଂ ଯେ ପରିପକ୍କଯଂତି ଭଜତାଂ କାଂଚୀପୁରେ ମାମମୀ
ପାଯାସୁଃ ପରମେଶ୍ଵରପ୍ରଣଯିନୀପାଦୋଦ୍ଭଵାଃ ପାଂସଵଃ ॥3॥
କାମାଡଂବରପୂରଯା ଶଶିରୁଚା କମ୍ରସ୍ମିତାନାଂ ତ୍ଵିଷା
କାମାରେରନୁରାଗସିଂଧୁମଧିକଂ କଲ୍ଲୋଲିତଂ ତନ୍ଵତୀ ।
କାମାକ୍ଷୀତି ସମସ୍ତସଜ୍ଜନନୁତା କଲ୍ଯାଣଦାତ୍ରୀ ନୃଣାଂ
କାରୁଣ୍ଯାକୁଲମାନସା ଭଗଵତୀ କଂପାତଟେ ଜୃଂଭତେ ॥4॥
କାମାକ୍ଷୀଣପରାକ୍ରମପ୍ରକଟନଂ ସଂଭାଵଯଂତୀ ଦୃଶା
ଶ୍ଯାମା କ୍ଷୀରସହୋଦରସ୍ମିତରୁଚିପ୍ରକ୍ଷାଲିତାଶାଂତରା ।
କାମାକ୍ଷୀଜନମୌଲିଭୂଷଣମଣିର୍ଵାଚାଂ ପରା ଦେଵତା
କାମାକ୍ଷୀତି ଵିଭାତି କାପି କରୁଣା କଂପାତଟିନ୍ଯାସ୍ତଟେ ॥5॥
ଶ୍ଯାମା କାଚନ ଚଂଦ୍ରିକା ତ୍ରିଭୁଵନେ ପୁଣ୍ଯାତ୍ମନାମାନନେ
ସୀମାଶୂନ୍ଯକଵିତ୍ଵଵର୍ଷଜନନୀ ଯା କାପି କାଦଂବିନୀ ।
ମାରାରାତିମନୋଵିମୋହନଵିଧୌ କାଚିତତ୍ତମଃକଂଦଲୀ
କାମାକ୍ଷ୍ଯାଃ କରୁଣାକଟାକ୍ଷଲହରୀ କାମାଯ ମେ କଲ୍ପତାମ୍ ॥6॥
ପ୍ରୌଢଧ୍ଵାଂତକଦଂବକେ କୁମୁଦିନୀପୁଣ୍ଯାଂକୁରଂ ଦର୍ଶଯନ୍
ଜ୍ଯୋତ୍ସ୍ନାସଂଗମନେଽପି କୋକମିଥୁନଂ ମିଶ୍ରଂ ସମୁଦ୍ଭାଵଯନ୍ ।
କାଲିଂଦୀଲହରୀଦଶାଂ ପ୍ରକଟଯନ୍କମ୍ରାଂ ନଭସ୍ଯଦ୍ଭୁତାଂ
କଶ୍ଚିନ୍ନେତ୍ରମହୋତ୍ସଵୋ ଵିଜଯତେ କାଂଚୀପୁରେ ଶୂଲିନଃ ॥7॥
ତଂଦ୍ରାହୀନତମାଲନୀଲସୁଷମୈସ୍ତାରୁଣ୍ଯଲୀଲାଗୃହୈଃ
ତାରାନାଥକିଶୋରଲାଂଛିତକଚୈସ୍ତାମ୍ରାରଵିଂଦେକ୍ଷଣୈଃ ।
ମାତଃ ସଂଶ୍ରଯତାଂ ମନୋ ମନସିଜପ୍ରାଗଲ୍ଭ୍ଯନାଡିଂଧମୈଃ
କଂପାତୀରଚରୈର୍ଘନସ୍ତନଭରୈଃ ପୁଣ୍ଯାଂକରୈଃ ଶାଂକରୈଃ ॥8॥
ନିତ୍ଯଂ ନିଶ୍ଚଲତାମୁପେତ୍ଯ ମରୁତାଂ ରକ୍ଷାଵିଧିଂ ପୁଷ୍ଣତୀ
ତେଜସ୍ସଂଚଯପାଟଵେନ କିରଣାନୁଷ୍ଣଦ୍ଯୁତେର୍ମୁଷ୍ଣତୀ ।
କାଂଚୀମଧ୍ଯଗତାପି ଦୀପ୍ତିଜନନୀ ଵିଶ୍ଵାଂତରେ ଜୃଂଭତେ
କାଚିଚ୍ଚିତ୍ରମହୋ ସ୍ମୃତାପି ତମସାଂ ନିର୍ଵାପିକା ଦୀପିକା ॥9॥
କାଂତୈଃ କେଶରୁଚାଂ ଚଯୈର୍ଭ୍ରମରିତଂ ମଂଦସ୍ମିତୈଃ ପୁଷ୍ପିତଂ
କାଂତ୍ଯା ପଲ୍ଲଵିତଂ ପଦାଂବୁରୁହଯୋର୍ନେତ୍ରତ୍ଵିଷା ପତ୍ରିତମ୍ ।
କଂପାତୀରଵନାଂତରଂ ଵିଦଧତୀ କଲ୍ଯାଣଜନ୍ମସ୍ଥଲୀ
କାଂଚୀମଧ୍ଯମହାମଣିର୍ଵିଜଯତେ କାଚିତ୍କୃପାକଂଦଲୀ ॥10॥
ରାକାଚଂଦ୍ରସମାନକାଂତିଵଦନା ନାକାଧିରାଜସ୍ତୁତା
ମୂକାନାମପି କୁର୍ଵତୀ ସୁରଧନୀନୀକାଶଵାଗ୍ଵୈଭଵମ୍ ।
ଶ୍ରୀକାଂଚୀନଗରୀଵିହାରରସିକା ଶୋକାପହଂତ୍ରୀ ସତାମ୍
ଏକା ପୁଣ୍ଯପରଂପରା ପଶୁପତେରାକାରିଣୀ ରାଜତେ ॥11॥
ଜାତା ଶୀତଲଶୈଲତଃ ସୁକୃତିନାଂ ଦୃଶ୍ଯା ପରଂ ଦେହିନାଂ
ଲୋକାନାଂ କ୍ଷଣମାତ୍ରସଂସ୍ମରଣତଃ ସଂତାପଵିଚ୍ଛେଦିନୀ ।
ଆଶ୍ଚର୍ଯଂ ବହୁ ଖେଲନଂ ଵିତନୁତେ ନୈଶ୍ଚଲ୍ଯମାବିଭ୍ରତୀ
କଂପାଯାସ୍ତଟସୀମ୍ନି କାପି ତଟିନୀ କାରୁଣ୍ଯପାଥୋମଯୀ ॥12॥
ଐକ୍ଯଂ ଯେନ ଵିରଚ୍ଯତେ ହରତନୌ ଦଂଭାଵପୁଂଭାଵୁକେ
ରେଖା ଯତ୍କଚସୀମ୍ନି ଶେଖରଦଶାଂ ନୈଶାକରୀ ଗାହତେ ।
ଔନ୍ନତ୍ଯଂ ମୁହୁରେତି ଯେନ ସ ମହାନ୍ମେନାସଖଃ ସାନୁମାନ୍
କଂପାତୀରଵିହାରିଣା ସଶରଣାସ୍ତେନୈଵ ଧାମ୍ନା ଵଯମ୍ ॥13॥
ଅକ୍ଷ୍ଣୋଶ୍ଚ ସ୍ତନଯୋଃ ଶ୍ରିଯା ଶ୍ରଵଣଯୋର୍ବାହ୍ଵୋଶ୍ଚ ମୂଲଂ ସ୍ପୃଶନ୍
ଉତ୍ତଂସେନ ମୁଖେନ ଚ ପ୍ରତିଦିନଂ ଦ୍ରୁହ୍ଯନ୍ପଯୋଜନ୍ମନେ ।
ମାଧୁର୍ଯେଣ ଗିରାଂ ଗତେନ ମୃଦୁନା ହଂସାଂଗନାଂ ହ୍ରେପଯନ୍
କାଂଚୀସୀମ୍ନି ଚକାସ୍ତି କୋଽପି କଵିତାସଂତାନବୀଜାଂକୁରଃ ॥14॥
ଖଂଡଂ ଚାଂଦ୍ରମସଂ ଵତଂସମନିଶଂ କାଂଚୀପୁରେ ଖେଲନଂ
କାଲାଯଶ୍ଛଵିତସ୍କରୀଂ ତନୁରୁଚିଂ କର୍ଣଜପେ ଲୋଚନେ ।
ତାରୁଣ୍ଯୋଷ୍ମନଖଂପଚଂ ସ୍ତନଭରଂ ଜଂଘାସ୍ପୃଶଂ କୁଂତଲଂ
ଭାଗ୍ଯଂ ଦେଶିକସଂଚିତଂ ମମ କଦା ସଂପାଦଯେଦଂବିକେ ॥15॥
ତନ୍ଵାନଂ ନିଜକେଲିସୌଧସରଣିଂ ନୈସର୍ଗିକୀଣାଂ ଗିରାଂ
କେଦାରଂ କଵିମଲ୍ଲସୂକ୍ତିଲହରୀସସ୍ଯଶ୍ରିଯାଂ ଶାଶ୍ଵତମ୍ ।
ଅଂହୋଵଂଚନଚୁଂଚୁ କିଂଚନ ଭଜେ କାଂଚୀପୁରୀମଂଡନଂ
ପର୍ଯାଯଚ୍ଛଵି ପାକଶାସନମଣେଃ ପୌଷ୍ପେଷଵଂ ପୌରୁଷମ୍ ॥16॥
ଆଲୋକେ ମୁଖପଂକଜେ ଚ ଦଧତୀ ସୌଧାକରୀଂ ଚାତୁରୀଂ
ଚୂଡାଲଂକ୍ରିଯମାଣପଂକଜଵନୀଵୈରାଗମପ୍ରକ୍ରିଯା ।
ମୁଗ୍ଧସ୍ମେରମୁଖୀ ଘନ୍ସତନତଟୀମୂର୍ଚ୍ଛାଲମଧ୍ଯାଂଚିତା
କାଂଚୀସୀମନି କାମିନୀ ଵିଜଯତେ କାଚିଜ୍ଜଗନ୍ମୋହିନୀ ॥17॥
ଯସ୍ମିନ୍ନଂବ ଭଵତ୍କଟାକ୍ଷରଜନୀ ମଂଦେଽପି ମଂଦସ୍ମିତ-
ଜ୍ଯୋତ୍ସ୍ନାସଂସ୍ନପିତା ଭଵତ୍ଯଭିମୁଖୀ ତଂ ପ୍ରତ୍ଯହୋ ଦେହିନମ୍ ।
ଦ୍ରକ୍ଷାମାକ୍ଷିକମାଧୁରୀମଦଭରଵ୍ରୀଡାକରୀ ଵୈଖରୀ
କାମାକ୍ଷି ସ୍ଵଯମାତନୋତ୍ଯଭିସୃତିଂ ଵାମେକ୍ଷଣେଵ କ୍ଷଣମ୍ ॥18॥
କାଲିଂଦୀଜଲକାଂତଯଃ ସ୍ମିତରୁଚିସ୍ଵର୍ଵାହିନୀପାଥସି
ପ୍ରୌଢଧ୍ଵାଂତରୁଚଃ ସ୍ଫୁଟାଧରମହୋଲୌହିତ୍ଯସଂଧ୍ଯୋଦଯେ ।
ମଣିକ୍ଯୋପଲକୁଂଡଲାଂଶୁଶିଖିନି ଵ୍ଯାମିଶ୍ରଧୂମଶ୍ରିଯଃ
କଲ୍ଯାଣୈକଭୁଵଃ କଟାକ୍ଷସୁଷମାଃ କାମାକ୍ଷି ରାଜଂତି ତେ ॥19॥
କଲକଲରଣତ୍କାଂଚୀ କାଂଚୀଵିଭୂଷଣମାଲିକା
କଚଭରଲସଚ୍ଚଂଦ୍ରା ଚଂଦ୍ରାଵତଂସସଧର୍ମିଣୀ ।
କଵିକୁଲଗିରଃ ଶ୍ରାଵଂଶ୍ରାଵଂ ମିଲତ୍ପୁଲକାଂକୁରା
ଵିରଚିତଶିରଃକଂପା କଂପାତଟେ ପରିଶୋଭତେ ॥20॥
ସରସଵଚସାଂ ଵୀଚୀ ନୀଚୀଭଵନ୍ମଧୁମାଧୁରୀ
ଭରିତଭୁଵନା କୀର୍ତିର୍ମୂର୍ତିର୍ମନୋଭଵଜିତ୍ଵରୀ ।
ଜନନି ମନସୋ ଯୋଗ୍ଯଂ ଭୋଗ୍ଯଂ ନୃଣାଂ ତଵ ଜାଯତେ
କଥମିଵ ଵିନା କାଂଚୀଭୂଷେ କଟାକ୍ଷତରଂଗିତମ୍ ॥21॥
ଭ୍ରମରିତସରିତ୍କୂଲୋ ନୀଲୋତ୍ପଲପ୍ରଭଯାଽଽଭଯା
ନତଜନତମଃଖଂଡୀ ତୁଂଡୀରସୀମ୍ନି ଵିଜୃଂଭତେ ।
ଅଚଲତପସାମେକଃ ପାକଃ ପ୍ରସୂନଶରାସନ-
ପ୍ରତିଭଟମନୋହାରୀ ନାରୀକୁଲୈକଶିଖାମଣିଃ ॥22॥
ମଧୁରଵଚସୋ ମଂଦସ୍ମେରା ମତଂଗଜଗାମିନଃ
ତରୁଣିମଜୁଷସ୍ତାପିଚ୍ଛାଭାସ୍ତମଃପରିପଂଥିନଃ ।
କୁଚଭରନତାଃ କୁର୍ଯୁର୍ଭଦ୍ରଂ କୁରଂଗଵିଲୋଚନାଃ
କଲିତକରୁଣାଃ କାଂଚୀଭାଜଃ କପାଲିମହୋତ୍ସଵାଃ ॥23॥
କମଲସୁଷମାକ୍ଷ୍ଯାରୋହେ ଵିଚକ୍ଷଣଵୀକ୍ଷଣାଃ
କୁମୁଦସୁକୃତକ୍ରୀଡାଚୂଡାଲକୁଂତଲବଂଧୁରାଃ ।
ରୁଚିରରୁଚିଭିସ୍ତାପିଚ୍ଛଶ୍ରୀପ୍ରପଂଚନଚୁଂଚଵଃ
ପୁରଵିଜଯିନଃ କଂପାତୀରେ ସ୍ଫୁରଂତି ମନୋରଥାଃ ॥24॥
କଲିତରତଯଃ କାଂଚୀଲୀଲାଵିଧୌ କଵିମଂଡଲୀ-
ଵଚନଲହରୀଵାସଂତୀନାଂ ଵସଂତଵିଭୂତଯଃ ।
କୁଶଲଵିଧଯେ ଭୂଯାସୁର୍ମେ କୁରଂଗଵିଲୋଚନାଃ
କୁସୁମଵିଶିଖାରାତେରକ୍ଷ୍ଣାଂ କୁତୂହଲଵିଭ୍ରମାଃ ॥25॥
କବଲିତତମସ୍କାଂଡାସ୍ତୁଂଡୀରମଂଡଲମଂଡନାଃ
ସରସିଜଵନୀସଂତାନାନାମରୁଂତୁଦଶେଖରାଃ ।
ନଯନସରଣେର୍ନେଦୀଯଂସଃ କଦା ନୁ ଭଵଂତି ମେ
ତରୁଣଜଲଦଶ୍ଯାମାଃ ଶଂଭୋସ୍ତପଃଫଲଵିଭ୍ରମାଃ ॥26॥
ଅଚରମମିଷୁଂ ଦୀନଂ ମୀନଧ୍ଵଜସ୍ଯ ମୁଖଶ୍ରିଯା
ସରସିଜଭୁଵୋ ଯାନଂ ମ୍ଲାନଂ ଗତେନ ଚ ମଂଜୁନା ।
ତ୍ରିଦଶସଦସାମନ୍ନଂ ଖିନ୍ନଂ ଗିରା ଚ ଵିତନ୍ଵତୀ
ତିଲକଯତି ସା କଂପାତୀରଂ ତ୍ରିଲୋଚନସୁଂଦରୀ ॥27॥
ଜନନି ଭୁଵନେ ଚଂକ୍ରମ୍ଯେଽହଂ କିଯଂତମନେହସଂ
କୁପୁରୁଷକରଭ୍ରଷ୍ଟୈର୍ଦୁଷ୍ଟୈର୍ଧନୈରୁଦରଂଭରିଃ ।
ତରୁଣକରୁଣେ ତଂଦ୍ରାଶୂନ୍ଯେ ତରଂଗଯ ଲୋଚନେ
ନମତି ମଯି ତେ କିଂଚିତ୍କାଂଚୀପୁରୀମଣିଦୀପିକେ ॥28॥
ମୁନିଜନମନଃପେଟୀରତ୍ନଂ ସ୍ଫୁରତ୍କରୁଣାନଟୀ-
ଵିହରଣକଲାଗେହଂ କାଂଚୀପୁରୀମଣିଭୂଷଣମ୍ ।
ଜଗତି ମହତୋ ମୋହଵ୍ଯାଧେର୍ନୃଣାଂ ପରମୌଷଧଂ
ପୁରହରଦୃଶାଂ ସାଫଲ୍ଯଂ ମେ ପୁରଃ ପରିଜୃଂଭତାମ୍ ॥29॥
ମୁନିଜନମୋଧାମ୍ନେ ଧାମ୍ନେ ଵଚୋମଯଜାହ୍ନଵୀ-
ହିମଗିରିତଟପ୍ରାଗ୍ଭାରାଯାକ୍ଷରାଯ ପରାତ୍ମନେ ।
ଵିହରଣଜୁଷେ କାଂଚୀଦେଶେ ମହେଶ୍ଵରଲୋଚନ-
ତ୍ରିତଯସରସକ୍ରୀଡାସୌଧାଂଗଣାଯ ନମୋ ନମଃ ॥30॥
ମରକତରୁଚାଂ ପ୍ରତ୍ଯାଦେଶଂ ମହେଶ୍ଵରଚକ୍ଷୁଷାମ୍
ଅମୃତଲହରୀପୂରଂ ପାରଂ ଭଵାଖ୍ଯପଯୋନିଧେଃ ।
ସୁଚରିତଫଲଂ କାଂଚୀଭାଜୋ ଜନସ୍ଯ ପଚେଲିମଂ
ହିମଶିଖରିଣୋ ଵଂଶସ୍ଯୈକଂ ଵତଂସମୁପାସ୍ମହେ ॥31॥
ପ୍ରଣମନଦିନାରଂଭେ କଂପାନଦୀସଖି ତାଵକେ
ସରସକଵିତୋନ୍ମେଷଃ ପୂଷା ସତାଂ ସମୁଦଂଚିତଃ ।
ପ୍ରତିଭଟମହାପ୍ରୌଢପ୍ରୋଦ୍ଯତ୍କଵିତ୍ଵକୁମୁଦ୍ଵତୀଂ
ନଯତି ତରସା ନିଦ୍ରାମୁଦ୍ରାଂ ନଗେଶ୍ଵରକନ୍ଯକେ ॥32॥
ଶମିତଜଡିମାରଂଭା କଂପାତଟୀନିକଟେଚରୀ
ନିହତଦୁରିତସ୍ତୋମା ସୋମାର୍ଧମୁଦ୍ରିତକୁଂତଲା ।
ଫଲିତସୁମନୋଵାଂଛା ପାଂଚାଯୁଧୀ ପରଦେଵତା
ସଫଲଯତୁ ମେ ନେତ୍ରେ ଗୋତ୍ରେଶ୍ଵରପ୍ରିଯନଂଦିନୀ ॥33॥
ମମ ତୁ ଧିଷଣା ପୀଡ୍ଯା ଜାଡ୍ଯାତିରେକ କଥଂ ତ୍ଵଯା
କୁମୁଦସୁଷମାମୈତ୍ରୀପାତ୍ରୀଵତଂସିତକୁଂତଲାମ୍ ।
ଜଗତି ଶମିତସ୍ତଂଭାଂ କଂପାନଦୀନିଲଯାମସୌ
ଶ୍ରିଯତି ହି ଗଲତ୍ତଂଦ୍ରା ଚଂଦ୍ରାଵତଂସସଧର୍ମିଣୀମ୍ ॥34॥
ପରିମଲପରୀପାକୋଦ୍ରେକଂ ପଯୋମୁଚି କାଂଚନେ
ଶିଖରିଣି ପୁନର୍ଦ୍ବୈଧୀଭାଵଂ ଶଶିନ୍ଯରୁଣାତପମ୍ ।
ଅପି ଚ ଜନଯନ୍କଂବୋର୍ଲକ୍ଷ୍ମୀମନଂବୁନି କୋଽପ୍ଯସୌ
କୁସୁମଧନୁଷଃ କାଂଚୀଦେଶେ ଚକାସ୍ତି ପରାକ୍ରମଃ ॥35॥
ପୁରଦମଯିତୁର୍ଵାମୋତ୍ସଂଗସ୍ଥଲେନ ରସଜ୍ଞଯା
ସରସକଵିତାଭାଜା କାଂଚୀପୁରୋଦରସୀମଯା ।
ତଟପରିସରୈର୍ନୀହାରାଦ୍ରେର୍ଵଚୋଭିରକୃତ୍ରିମୈଃ
କିମିଵ ନ ତୁଲାମସ୍ମଚ୍ଚେତୋ ମହେଶ୍ଵରି ଗାହତେ ॥36॥
ନଯନଯୁଗଲୀମାସ୍ମାକୀନାଂ କଦା ନୁ ଫଲେଗ୍ରହୀଂ
ଵିଦଧତି ଗତୌ ଵ୍ଯାକୁର୍ଵାଣା ଗଜେଂଦ୍ରଚମତ୍କ୍ରିଯାମ୍ ।
ମରତକରୁଚୋ ମାହେଶାନା ଘନସ୍ତନନମ୍ରିତାଃ
ସୁକୃତଵିଭଵାଃ ପ୍ରାଂଚଃ କାଂଚୀଵତଂସଧୁରଂଧରାଃ ॥37॥
ମନସିଜଯଶଃପାରଂପର୍ଯଂ ମରଂଦଝରୀସୁଵାଂ
କଵିକୁଲଗିରାଂ କଂଦଂ କଂପାନଦୀତଟମଂଡନମ୍ ।
ମଧୁରଲଲିତଂ ମତ୍କଂ ଚକ୍ଷୁର୍ମନୀଷିମନୋହରଂ
ପୁରଵିଜଯିନଃ ସର୍ଵସ୍ଵଂ ତତ୍ପୁରସ୍କୁରୁତେ କଦା ॥38॥
ଶିଥିଲିତତମୋଲୀଲାଂ ନୀଲାରଵିଂଦଵିଲୋଚନାଂ
ଦହନଵିଲସତ୍ଫାଲାଂ ଶ୍ରୀକାମକୋଟିମୁପାସ୍ମହେ ।
କରଧୃତସଚ୍ଛୂଲାଂ କାଲାରିଚିତ୍ତହରାଂ ପରାଂ
ମନସିଜକୃପାଲୀଲାଂ ଲୋଲାଲକାମଲିକେକ୍ଷଣାମ୍ ॥39॥
କଲାଲୀଲାଶାଲା କଵିକୁଲଵଚଃକୈରଵଵନୀ-
ଶରଜ୍ଜ୍ଯୋତ୍ସ୍ନାଧାରା ଶଶଧରଶିଶୁଶ୍ଲାଘ୍ଯମୁକୁଟୀ ।
ପୁନୀତେ ନଃ କଂପାପୁଲିନତଟସୌହାର୍ଦତରଲା
କଦା ଚକ୍ଷୁର୍ମାର୍ଗଂ କନକଗିରିଧାନୁଷ୍କମହିଷୀ ॥40॥
ନମଃ ସ୍ତାନ୍ନମ୍ରେଭ୍ଯଃ ସ୍ତନଗରିମଗର୍ଵେଣ ଗୁରୁଣା
ଦଧାନେଭ୍ଯଶ୍ଚୂଡାଭରଣମମୃତସ୍ଯଂଦି ଶିଶିରମ୍ ।
ସଦା ଵାସ୍ତଵେଭ୍ଯଃ ସୁଵିଧଭୁଵି କଂପାଖ୍ଯସରିତେ
ଯଶୋଵ୍ଯାପାରେଭ୍ଯଃ ସୁକୃତଵିଭଵେଭ୍ଯୋ ରତିପତେଃ ॥41॥
ଅସୂଯଂତୀ କାଚିନ୍ମରକତରୁଚୋ ନାକିମୁକୁଟୀ-
କଦଂବଂ ଚୁଂବଂତୀ ଚରଣନଖଚଂଦ୍ରାଂଶୁପଟଲୈଃ ।
ତମୋମୁଦ୍ରାଂ ଵିଦ୍ରାଵଯତୁ ମମ କାଂଚୀର୍ନିଲଯନା
ହରୋତ୍ସଂଗଶ୍ରୀମନ୍ମଣିଗୃହମହାଦୀପକଲିକା ॥42॥
ଅନାଦ୍ଯଂତା କାଚିତ୍ସୁଜନନଯନାନଂଦଜନନୀ
ନିରୁଂଧାନା କାଂତିଂ ନିଜରୁଚିଵିଲାସୈର୍ଜଲମୁଚାମ୍ ।
ସ୍ମରାରେସ୍ତାରଲ୍ଯଂ ମନସି ଜନଯଂତୀ ସ୍ଵଯମହୋ
ଗଲତ୍କଂପା ଶଂପା ପରିଲସତି କଂପାପରିସରେ ॥43॥
ସୁଧାଡିଂଡୀରଶ୍ରୀଃ ସ୍ମିତରୁଚିଷୁ ତୁଂଡୀରଵିଷଯଂ
ପରିଷ୍କୁର୍ଵାଣାସୌ ପରିହସିତନୀଲୋତ୍ପଲରୁଚିଃ ।
ସ୍ତନାଭ୍ଯାମାନମ୍ରା ସ୍ତବକଯତୁ ମେ କାଂକ୍ଷିତତରୁଂ
ଦୃଶାମୈଶାନୀନାଂ ସୁକୃତଫଲପାଂଡିତ୍ଯଗରିମା ॥44॥
କୃପାଧାରାଦ୍ରୋଣୀ କୃପଣଧିଷଣାନାଂ ପ୍ରଣମତାଂ
ନିହଂତ୍ରୀ ସଂତାପଂ ନିଗମମୁକୁଟୋତ୍ତଂସକଲିକା ।
ପରା କାଂଚୀଲୀଲାପରିଚଯଵତୀ ପର୍ଵତସୁତା
ଗିରାଂ ନୀଵୀ ଦେଵୀ ଗିରିଶପରତଂତ୍ରା ଵିଜଯତେ ॥45॥
କଵିତ୍ଵଶ୍ରୀକଂଦଃ ସୁକୃତପରିପାଟୀ ହିମଗିରେଃ
ଵିଧାତ୍ରୀ ଵିଶ୍ଵେଷାଂ ଵିଷମଶରଵୀରଧ୍ଵଜପଟୀ ।
ସଖୀ କଂପାନଦ୍ଯାଃ ପଦହସିତପାଥୋଜଯୁଗଲୀ
ପୁରାଣୋ ପାଯାନ୍ନଃ ପୁରମଥନସାମ୍ରାଜ୍ଯପଦଵୀ ॥46॥
ଦରିଦ୍ରାଣା ମଧ୍ଯେ ଦରଦଲିତତାପିଚ୍ଛସୁଷମାଃ
ସ୍ତନାଭୋଗକ୍କାଂତାସ୍ତରୁଣହରିଣାଂକାଂକିତକଚାଃ ।
ହରାଧୀନା ନାନାଵିବୁଧମୁକୁଟୀଚୁଂବିତପଦାଃ
କଦା କଂପାତୀରେ କଥଯ ଵିହରାମୋ ଗିରିସୁତେ ॥47॥
ଵରୀଵର୍ତୁ ସ୍ଥେମା ତ୍ଵଯି ମମ ଗିରାଂ ଦେଵି ମନସୋ
ନରୀନର୍ତୁ ପ୍ରୌଢା ଵଦନକମଲେ ଵାକ୍ଯଲହରୀ ।
ଚରୀଚର୍ତୁ ପ୍ରଜ୍ଞାଜନନି ଜଡିମାନଃ ପରଜନେ
ସରୀସର୍ତୁ ସ୍ଵୈରଂ ଜନନି ମଯି କାମାକ୍ଷି କରୁଣା ॥48॥
କ୍ଷଣାତ୍ତେ କାମାକ୍ଷି ଭ୍ରମରସୁଷମାଶିକ୍ଷଣଗୁରୁଃ
କଟାକ୍ଷଵ୍ଯାକ୍ଷେପୋ ମମ ଭଵତୁ ମୋକ୍ଷାଯ ଵିପଦାମ୍ ।
ନରୀନର୍ତୁ ସ୍ଵୈରଂ ଵଚନଲହରୀ ନିର୍ଜରପୁରୀ-
ସରିଦ୍ଵୀଚୀନୀଚୀକରଣପଟୁରାସ୍ଯେ ମମ ସଦା ॥49॥
ପୁରସ୍ତାନ୍ମେ ଭୂଯଃପ୍ରଶମନପରଃ ସ୍ତାନ୍ମମ ରୁଜାଂ
ପ୍ରଚାରସ୍ତେ କଂପାତଟଵିହୃତିସଂପାଦିନି ଦୃଶୋଃ ।
ଇମାଂ ଯାଚ୍ଞାମୂରୀକୁରୁ ସପଦି ଦୂରୀକୁରୁ ତମଃ-
ପରୀପାକଂ ମତ୍କଂ ସପଦି ବୁଧଲୋକଂ ଚ ନଯ ମାମ୍ ॥50॥
ଉଦଂଚଂତୀ କାଂଚୀନଗରନିଲଯେ ତ୍ଵତ୍କରୁଣଯା
ସମୃଦ୍ଧା ଵାଗ୍ଧାଟୀ ପରିହସିତମାଧ୍ଵୀ କଵଯତାମ୍ ।
ଉପାଦତ୍ତେ ମାରପ୍ରତିଭଟଜଟାଜୂଟମୁକୁଟୀ-
କୁଟୀରୋଲ୍ଲାସିନ୍ଯାଃ ଶତମଖତଟିନ୍ଯା ଜଯପଟୀମ୍ ॥51॥
ଶ୍ରିଯଂ ଵିଦ୍ଯାଂ ଦଦ୍ଯାଜ୍ଜନନି ନମତାଂ କୀର୍ତିମମିତାଂ
ସୁପୁତ୍ରାନ୍ ପ୍ରାଦତ୍ତେ ତଵ ଝଟିତି କାମାକ୍ଷି କରୁଣା ।
ତ୍ରିଲୋକ୍ଯାମାଧିକ୍ଯଂ ତ୍ରିପୁରପରିପଂଥିପ୍ରଣଯିନି
ପ୍ରଣାମସ୍ତ୍ଵତ୍ପାଦେ ଶମିତଦୁରିତେ କିଂ ନ କୁରୁତେ ॥52॥
ମନଃସ୍ତଂଭଂ ସ୍ତଂଭଂ ଗମଯଦୁପକଂପଂ ପ୍ରଣମତାଂ
ସଦା ଲୋଲଂ ନୀଲଂ ଚିକୁରଜିତଲୋଲଂବନିକରମ୍ ।
ଗିରାଂ ଦୂରଂ ସ୍ମେରଂ ଧୃତଶଶିକିଶୋରଂ ପଶୁପତେଃ
ଦୃଶାଂ ଯୋଗ୍ଯଂ ଭୋଗ୍ଯଂ ତୁହିନଗିରିଭାଗ୍ଯଂ ଵିଜଯତେ ॥53॥
ଘନଶ୍ଯାମାନ୍କାମାଂତକମହିଷି କାମାକ୍ଷି ମଧୁରାନ୍
ଦୃଶାଂ ପାତାନେତାନମୃତଜଲଶୀତାନନୁପମାନ୍ ।
ଭଵୋତ୍ପାତେ ଭୀତେ ମଯି ଵିତର ନାଥେ ଦୃଢଭଵ-
ନ୍ମନଶ୍ଶୋକେ ମୂକେ ହିମଗିରିପତାକେ କରୁଣଯା ॥54॥
ନତାନାଂ ମଂଦାନାଂ ଭଵନିଗଲବଂଧାକୁଲଧିଯାଂ
ମହାଂଧ୍ଯାଂ ରୁଂଧାନାମଭିଲଷିତସଂତାନଲତିକାମ୍ ।
ଚରଂତୀଂ କଂପାଯାସ୍ତଟଭୁଵି ସଵିତ୍ରୀଂ ତ୍ରିଜଗତାଂ
ସ୍ମରାମସ୍ତାଂ ନିତ୍ଯଂ ସ୍ମରମଥନଜୀଵାତୁକଲିକାମ୍ ॥55॥
ପରା ଵିଦ୍ଯା ହୃଦ୍ଯାଶ୍ରିତମଦନଵିଦ୍ଯା ମରକତ-
ପ୍ରଭାନୀଲା ଲୀଲାପରଵଶିତଶୂଲାଯୁଧମନାଃ ।
ତମଃପୂରଂ ଦୂରଂ ଚରଣନତପୌରଂଦରପୁରୀ-
ମୃଗାକ୍ଷୀ କାମାକ୍ଷୀ କମଲତରଲାକ୍ଷୀ ନଯତୁ ମେ ॥56॥
ଅହଂତାଖ୍ଯା ମତ୍କଂ କବଲଯତି ହା ହଂତ ହରିଣୀ
ହଠାତ୍ସଂଵିଦ୍ରୂପଂ ହରମହିଷି ସସ୍ଯାଂକୁରମସୌ ।
କଟାକ୍ଷଵ୍ଯାକ୍ଷେପପ୍ରକଟହରିପାଷାଣପଟଲୈଃ
ଇମାମୁଚ୍ଚୈରୁଚ୍ଚାଟଯ ଝଟିତି କାମାକ୍ଷି କୃପଯା ॥57॥
ବୁଧେ ଵା ମୂକେ ଵା ତଵ ପତତି ଯସ୍ମିନ୍କ୍ଷଣମସୌ
କଟାକ୍ଷଃ କାମାକ୍ଷି ପ୍ରକଟଜଡିମକ୍ଷୋଦପଟିମା ।
କଥଂକାରଂ ନାସ୍ମୈ କରମୁକୁଲଚୂଡାଲମୁକୁଟା
ନମୋଵାକଂ ବ୍ରୂଯୁର୍ନମୁଚିପରିପଂଥିପ୍ରଭୃତଯଃ ॥58॥
ପ୍ରତୀଚୀଂ ପଶ୍ଯାମଃ ପ୍ରକଟରୁଚିନୀଵାରକମଣି-
ପ୍ରଭାସଧ୍ରୀଚୀନାଂ ପ୍ରଦଲିତଷଡାଧାରକମଲାମ୍ ।
ଚରଂତୀଂ ସୌଷୁମ୍ନେ ପଥି ପରପଦେଂଦୁପ୍ରଵିଗଲ-
ତ୍ସୁଧାର୍ଦ୍ରାଂ କାମାକ୍ଷୀଂ ପରିଣତପରଂଜ୍ଯୋତିରୁଦଯାମ୍ ॥59॥
ଜଂଭାରାତିପ୍ରଭୃତିମୁକୁଟୀଃ ପାଦଯୋଃ ପୀଠଯଂତୀ
ଗୁଂଫାନ୍ଵାଚାଂ କଵିଜନକୃତାନ୍ସ୍ଵୈରମାରାମଯଂତୀ ।
ଶଂପାଲକ୍ଷ୍ମୀଂ ମଣିଗଣରୁଚାପାଟଲୈଃ ପ୍ରାପଯଂତୀ
କଂପାତୀରେ କଵିପରିଷଦାଂ ଜୃଂଭତେ ଭାଗ୍ଯସୀମା ॥60॥
ଚଂଦ୍ରାପୀଡାଂ ଚତୁରଵଦନାଂ ଚଂଚଲାପାଂଗଲୀଲାଂ
କୁଂଦସ୍ମେରାଂ କୁଚଭରନତାଂ କୁଂତଲୋଦ୍ଧୂତଭୃଂଗାମ୍ ।
ମାରାରାତେର୍ମଦନଶିଖିନଂ ମାଂସଲଂ ଦୀପଯଂତୀଂ
କାମାକ୍ଷୀଂ ତାଂ କଵିକୁଲଗିରାଂ କଲ୍ପଵଲ୍ଲୀମୁପାସେ ॥61॥
କାଲାଂଭୋଦପ୍ରକରସୁଷମାଂ କାଂତିଭିସ୍ତିର୍ଜଯଂତୀ
କଲ୍ଯାଣାନାମୁଦଯସରଣିଃ କଲ୍ପଵଲ୍ଲୀ କଵୀନାମ୍ ।
କଂଦର୍ପାରେଃ ପ୍ରିଯସହଚରୀ କଲ୍ମଷାଣାଂ ନିହଂତ୍ରୀ
କାଂଚୀଦେଶଂ ତିଲକଯତି ସା କାପି କାରୁଣ୍ଯସୀମା ॥62॥
ଊରୀକୁର୍ଵନ୍ନୁରସିଜତଟେ ଚାତୁରୀଂ ଭୂଧରାଣାଂ
ପାଥୋଜାନାଂ ନଯନଯୁଗଲେ ପରିପଂଥ୍ଯଂ ଵିତନ୍ଵନ୍ ।
କଂପାତୀରେ ଵିହରତି ରୁଚା ମୋଘଯନ୍ମେଘଶୈଲୀଂ
କୋକଦ୍ଵେଷଂ ଶିରସି କଲଯନ୍କୋଽପି ଵିଦ୍ଯାଵିଶେଷଃ ॥63॥
କାଂଚୀଲୀଲାପରିଚଯଵତୀ କାପି ତାପିଚ୍ଛଲକ୍ଷ୍ମୀଃ
ଜାଡ୍ଯାରଣ୍ଯେ ହୁତଵହଶିଖା ଜନ୍ମଭୂମିଃ କୃପାଯାଃ ।
ମାକଂଦଶ୍ରୀର୍ମଧୁରକଵିତାଚାତୁରୀ କୋକିଲାନାଂ
ମାର୍ଗେ ଭୂଯାନ୍ମମ ନଯନଯୋର୍ମାନ୍ମଥୀ କାପି ଵିଦ୍ଯା ॥64॥
ସେତୁର୍ମାତର୍ମରତକମଯୋ ଭକ୍ତିଭାଜାଂ ଭଵାବ୍ଧୌ
ଲୀଲାଲୋଲା କୁଵଲଯମଯୀ ମାନ୍ମଥୀ ଵୈଜଯଂତୀ ।
କାଂଚୀଭୂଷା ପଶୁପତିଦୃଶାଂ କାପି କାଲାଂଜନାଲୀ
ମତ୍କଂ ଦୁଃଖଂ ଶିଥିଲଯତୁ ତେ ମଂଜୁଲାପାଂଗମାଲା ॥65॥
ଵ୍ଯାଵୃଣ୍ଵାନାଃ କୁଵଲଯଦଲପ୍ରକ୍ରିଯାଵୈରମୁଦ୍ରାଂ
ଵ୍ଯାକୁର୍ଵାଣା ମନସିଜମହାରାଜସାମ୍ରାଜ୍ଯଲକ୍ଷ୍ମୀମ୍ ।
କାଂଚୀଲୀଲାଵିହୃତିରସିକେ କାଂକ୍ଷିତଂ ନଃ କ୍ରିଯାସୁଃ
ବଂଧଚ୍ଛେଦେ ତଵ ନିଯମିନାଂ ବଦ୍ଧଦୀକ୍ଷାଃ କଟାକ୍ଷାଃ ॥66॥
କାଲାଂଭୋଦେ ଶଶିରୁଚି ଦଲଂ କୈତକଂ ଦର୍ଶଯଂତୀ
ମଧ୍ଯେସୌଦାମିନି ମଧୁଲିହାଂ ମାଲିକାଂ ରାଜଯଂତୀ ।
ହଂସାରାଵଂ ଵିକଚକମଲେ ମଂଜୁମୁଲ୍ଲାସଯଂତୀ
କଂପାତୀରେ ଵିଲସତି ନଵା କାପି କାରୁଣ୍ଯଲକ୍ଷ୍ମୀଃ ॥67॥
ଚିତ୍ରଂ ଚିତ୍ରଂ ନିଜମୃଦୁତଯା ଭର୍ତ୍ସଯନ୍ପଲ୍ଲଵାଲୀଂ
ପୁଂସାଂ କାମାନ୍ଭୁଵି ଚ ନିଯତଂ ପୂରଯନ୍ପୁଣ୍ଯଭାଜାମ୍ ।
ଜାତଃ ଶୈଲାନ୍ନ ତୁ ଜଲନିଧେଃ ସ୍ଵୈରସଂଚାରଶୀଲଃ
କାଂଚୀଭୂଷା କଲଯତୁ ଶିଵଂ କୋଽପି ଚିଂତାମଣିର୍ମେ ॥68॥
ତାମ୍ରାଂଭୋଜଂ ଜଲଦନିକଟେ ତତ୍ର ବଂଧୂକପୁଷ୍ପଂ
ତସ୍ମିନ୍ମଲ୍ଲୀକୁସୁମସୁଷମାଂ ତତ୍ର ଵୀଣାନିନାଦମ୍ ।
ଵ୍ଯାଵୃନ୍ଵାନା ସୁକୃତଲହରୀ କାପି କାଂଚିନଗର୍ଯାମ୍
ଐଶାନୀ ସା କଲଯତିତରାମୈଂଦ୍ରଜାଲଂ ଵିଲାସମ୍ ॥69॥
ଆହାରାଂଶଂ ତ୍ରିଦଶସଦସାମାଶ୍ରଯେ ଚାତକାନାମ୍
ଆକାଶୋପର୍ଯପି ଚ କଲଯନ୍ନାଲଯଂ ତୁଂଗମେଷାମ୍ ।
କଂପାତୀରେ ଵିହରତିତରାଂ କାମଧେନୁଃ କଵୀନାଂ
ମଂଦସ୍ମେରୋ ମଦନନିଗମପ୍ରକ୍ରିଯାସଂପ୍ରଦାଯଃ ॥70॥
ଆର୍ଦ୍ରୀଭୂତୈରଵିରଲକୃପୈରାତ୍ତଲୀଲାଵିଲାସୈଃ
ଆସ୍ଥାପୂର୍ଣୈରଧିକଚପଲୈରଂଚିତାଂଭୋଜଶିଲ୍ପୈଃ ।
କାଂତୈର୍ଲକ୍ଷ୍ମୀଲଲିତଭଵନୈଃ କାଂତିକୈଵଲ୍ଯସାରୈଃ
କାଶ୍ମଲ୍ଯଂ ନଃ କବଲଯତୁ ସା କାମକୋଟୀ କଟାକ୍ଷୈଃ ॥71॥
ଆଧୂନ୍ଵଂତ୍ଯୈ ତରଲନଯନୈରାଂଗଜୀଂ ଵୈଜଯଂତୀମ୍
ଆନଂଦିନ୍ଯୈ ନିଜପଦଜୁଷାମାତ୍ତକାଂଚୀପୁରାଯୈ ।
ଆସ୍ମାକୀନଂ ହୃଦଯମଖିଲୈରାଗମାନାଂ ପ୍ରପଂଚୈଃ
ଆରାଧ୍ଯାଯୈ ସ୍ପୃହଯତିତରାମଦିମାଯୈ ଜନନ୍ଯୈ ॥72॥
ଦୂରଂ ଵାଚାଂ ତ୍ରିଦଶସଦସାଂ ଦୁଃଖସିଂଧୋସ୍ତରିତ୍ରଂ
ମୋହକ୍ଷ୍ଵେଲକ୍ଷିତିରୁହଵନେ କ୍ରୂରଧାରଂ କୁଠାରମ୍ ।
କଂପାତୀରପ୍ରଣଯି କଵିଭିର୍ଵର୍ଣିତୋଦ୍ଯଚ୍ଚରିତ୍ରଂ
ଶାଂତ୍ଯୈ ସେଵେ ସକଲଵିପଦାଂ ଶାଂକରଂ ତତ୍କଲତ୍ରମ୍ ॥73॥
ଖଂଡୀକୃତ୍ଯ ପ୍ରକୃତିକୁଟିଲଂ କଲ୍ମଷଂ ପ୍ରାତିଭଶ୍ରୀ-
ଶୁଂଡୀରତ୍ଵଂ ନିଜପଦଜୁଷାଂ ଶୂନ୍ଯତଂଦ୍ରଂ ଦିଶଂତୀ ।
ତୁଂଡୀରାଖ୍ଯୈ ମହତି ଵିଷଯେ ସ୍ଵର୍ଣଵୃଷ୍ଟିପ୍ରଦାତ୍ରୀ
ଚଂଡୀ ଦେଵୀ କଲଯତି ରତିଂ ଚଂଦ୍ରଚୂଡାଲଚୂଡେ ॥74॥
ଯେନ ଖ୍ଯାତୋ ଭଵତି ସ ଗୃହୀ ପୂରୁଷୋ ମେରୁଧନ୍ଵା
ଯଦ୍ଦୃକ୍କୋଣେ ମଦନନିଗମପ୍ରାଭଵଂ ବୋଭଵୀତି ।
ଯତ୍ପ୍ରୀତ୍ଯୈଵ ତ୍ରିଜଗଦଧିପୋ ଜୃଂଭତେ କିଂପଚାନଃ
କଂପାତୀରେ ସ ଜଯତି ମହାନ୍କଶ୍ଚିଦୋଜୋଵିଶେଷଃ ॥75॥
ଧନ୍ଯା ଧନ୍ଯା ଗତିରିହ ଗିରାଂ ଦେଵି କାମାକ୍ଷି ଯନ୍ମେ
ନିଂଦ୍ଯାଂ ଭିଂଦ୍ଯାତ୍ସପଦି ଜଡତାଂ କଲ୍ମଷାଦୁନ୍ମିଷଂତୀମ୍ ।
ସାଧ୍ଵୀ ମାଧ୍ଵୀରସମଧୁରତାଭଂଜିନୀ ମଂଜୁରୀତିଃ
ଵାଣୀଵେଣୀ ଝଟିତି ଵୃଣୁତାତ୍ସ୍ଵର୍ଧୁନୀସ୍ପର୍ଧିନୀ ମାମ୍ ॥76॥
ଯସ୍ଯା ଵାଟୀ ହୃଦଯକମଲଂ କୌସୁମୀ ଯୋଗଭାଜାଂ
ଯସ୍ଯାଃ ପୀଠୀ ସତତଶିଶିରା ଶୀକରୈର୍ମାକରଂଦୈଃ ।
ଯସ୍ଯାଃ ପେଟୀ ଶ୍ରୁତିପରିଚଲନ୍ମୌଲିରତ୍ନସ୍ଯ କାଂଚୀ
ସା ମେ ସୋମାଭରଣମହିଷୀ ସାଧଯେତ୍କାଂକ୍ଷିତାନି ॥77॥
ଏକା ମାତା ସକଲଜଗତାମୀଯୁଷୀ ଧ୍ଯାନମୁଦ୍ରାମ୍
ଏକାମ୍ରାଧୀଶ୍ଵରଚରଣଯୋରେକତାନାଂ ସମିଂଧେ ।
ତାଟଂକୋଦ୍ଯନ୍ମଣିଗଣରୁଚା ତାମ୍ରକର୍ଣପ୍ରଦେଶା
ତାରୁଣ୍ଯଶ୍ରୀସ୍ତବକିତତନୁସ୍ତାପସୀ କାପି ବାଲା ॥78॥
ଦଂତାଦଂତିପ୍ରକଟନକରୀ ଦଂତିଭିର୍ମଂଦଯାନୈଃ
ମଂଦାରାଣାଂ ମଦପରିଣତିଂ ମଥ୍ନତୀ ମଂଦହାସୈଃ ।
ଅଂକୂରାଭ୍ଯାଂ ମନସିଜତରୋରଂକିତୋରାଃ କୁଚାଭ୍ଯା-
ମଂତଃକାଂଚି ସ୍ଫୁରତି ଜଗତାମାଦିମା କାପି ମାତା ॥79॥
ତ୍ରିଯଂବକକୁଟୁଂବିନୀଂ ତ୍ରିପୁରସୁଂଦରୀମିଂଦିରାଂ
ପୁଲିଂଦପତିସୁଂଦରୀଂ ତ୍ରିପୁରଭୈରଵୀଂ ଭାରତୀମ୍ ।
ମତଂଗକୁଲନାଯିକାଂ ମହିଷମର୍ଦନୀଂ ମାତୃକାଂ
ଭଣଂତି ଵିବୁଧୋତ୍ତମା ଵିହୃତିମେଵ କାମାକ୍ଷି ତେ ॥80॥
ମହାମୁନିମନୋନଟୀ ମହିତରମ୍ଯକଂପାତଟୀ-
କୁଟୀରକଵିହାରିଣୀ କୁଟିଲବୋଧସଂହାରିଣୀ ।
ସଦା ଭଵତୁ କାମିନୀ ସକଲଦେହିନାଂ ସ୍ଵାମିନୀ
କୃପାତିଶଯକିଂକରୀ ମମ ଵିଭୂତଯେ ଶାଂକରୀ ॥81॥
ଜଡାଃ ପ୍ରକୃତିନିର୍ଧନା ଜନଵିଲୋଚନାରୁଂତୁଦା
ନରା ଜନନି ଵୀକ୍ଷଣଂ କ୍ଷଣମଵାପ୍ଯ କାମାକ୍ଷି ତେ ।
ଵଚସ୍ସୁ ମଧୁମାଧୁରୀଂ ପ୍ରକଟଯଂତି ପୌରଂଦରୀ-
ଵିଭୂତିଷୁ ଵିଡଂବନାଂ ଵପୁଷି ମାନ୍ମଥୀଂ ପ୍ରକ୍ରିଯାମ୍ ॥82॥
ଘନ୍ସତନତଟସ୍ଫୁଟସ୍ଫୁରିତକଂଚୁଲୀଚଂଚଲୀ-
କୃତତ୍ରିପୁରଶାସନା ସୁଜନଶୀଲିତୋପାସନା ।
ଦୃଶୋଃ ସରଣିମଶ୍ନୁତେ ମମ କଦା ନୁ କାଂଚୀପୁରେ
ପରା ପରମଯୋଗିନାଂ ମନସି ଚିତ୍କୁଲା ପୁଷ୍କଲା ॥83॥
କଵୀଂଦ୍ରହୃଦଯେଚରୀ ପରିଗୃହୀତକାଂଚୀପୁରୀ
ନିରୂଢକରୁଣାଝରୀ ନିଖିଲଲୋକରକ୍ଷାକରୀ ।
ମନଃପଥଦଵୀଯସୀ ମଦନଶାସନପ୍ରେଯସୀ
ମହାଗୁଣଗରୀଯସୀ ମମ ଦୃଶୋଽସ୍ତୁ ନେଦୀଯସୀ ॥84॥
ଧନେନ ନ ରମାମହେ ଖଲଜନାନ୍ନ ସେଵାମହେ
ନ ଚାପଲମଯାମହେ ଭଵଭଯାନ୍ନ ଦୂଯାମହେ ।
ସ୍ଥିରାଂ ତନୁମହେତରାଂ ମନସି କିଂ ଚ କାଂଚୀରତ-
ସ୍ମରାଂତକକୁଟୁଂବିନୀଚରଣପଲ୍ଲଵୋପାସନାମ୍ ॥85॥
ସୁରାଃ ପରିଜନା ଵପୁର୍ମନସିଜାଯ ଵୈରାଯତେ
ତ୍ରିଵିଷ୍ଟପନିତଂବିନୀକୁଚତଟୀ ଚ କେଲୀଗିରିଃ ।
ଗିରଃ ସୁରଭଯୋ ଵଯସ୍ତରୁଣିମା ଦରିଦ୍ରସ୍ଯ ଵା
କଟାକ୍ଷସରଣୌ କ୍ଷଣଂ ନିପତିତସ୍ଯ କାମାକ୍ଷି ତେ ॥86॥
ପଵିତ୍ରଯ ଜଗତ୍ତ୍ରଯୀଵିବୁଧବୋଧଜୀଵାତୁଭିଃ
ପୁରତ୍ରଯଵିମର୍ଦିନଃ ପୁଲକକଂଚୁଲୀଦାଯିଭିଃ ।
ଭଵକ୍ଷଯଵିଚକ୍ଷଣୈର୍ଵ୍ଯସନମୋକ୍ଷଣୈର୍ଵୀକ୍ଷଣୈଃ
ନିରକ୍ଷରଶିରୋମଣିଂ କରୁଣଯୈଵ କାମାକ୍ଷି ମାମ୍ ॥87॥
କଦା କଲିତଖେଲନାଃ କରୁଣଯୈଵ କାଂଚୀପୁରେ
କଲାଯମୁକୁଲତ୍ଵିଷଃ ଶୁଭକଦଂବପୂର୍ଣାଂକୁରାଃ ।
ପଯୋଧରଭରାଲସାଃ କଵିଜନେଷୁ ତେ ବଂଧୁରାଃ
ପଚେଲିମକୃପାରସା ପରିପତଂତି ମାର୍ଗେ ଦୃଶୋଃ ॥88॥
ଅଶୋଧ୍ଯମଚଲୋଦ୍ଭଵଂ ହୃଦଯନଂଦନଂ ଦେହିନାମ୍
ଅନର୍ଘମଧିକାଂଚି ତତ୍କିମପି ରତ୍ନମୁଦ୍ଦ୍ଯୋତତେ ।
ଅନେନ ସମଲଂକୃତା ଜଯତି ଶଂକରାଂକସ୍ଥଲୀ
କଦାସ୍ଯ ମମ ମାନସଂ ଵ୍ରଜତି ପେଟିକାଵିଭ୍ରମମ୍ ॥89॥
ପରାମୃତଝରୀପ୍ଲୁତା ଜଯତି ନିତ୍ଯମଂତଶ୍ଚରୀ
ଭୁଵାମପି ବହିଶ୍ଚରୀ ପରମସଂଵିଦେକାତ୍ମିକା ।
ମହଦ୍ଭିରପରୋକ୍ଷିତା ସତତମେଵ କାଂଚୀପୁରେ
ମମାନ୍ଵହମହଂମତିର୍ମନସି ଭାତୁ ମାହେଶ୍ଵରୀ ॥90॥
ତମୋଵିପିନଧାଵିନଂ ସତତମେଵ କାଂଚୀପୁରେ
ଵିହାରରସିକା ପରା ପରମସଂଵିଦୁର୍ଵୀରୁହେ ।
କଟାକ୍ଷନିଗଲୈର୍ଦୃଢଂ ହୃଦଯଦୁଷ୍ଟଦଂତାଵଲଂ
ଚିରଂ ନଯତୁ ମାମକଂ ତ୍ରିପୁରଵୈରିସୀମଂତିନୀ ॥91॥
ତ୍ଵମେଵ ସତି ଚଂଡିକା ତ୍ଵମସି ଦେଵି ଚାମୁଂଡିକା
ତ୍ଵମେଵ ପରମାତୃକା ତ୍ଵମପି ଯୋଗିନୀରୂପିଣୀ ।
ତ୍ଵମେଵ କିଲ ଶାଂଭଵୀ ତ୍ଵମସି କାମକୋଟୀ ଜଯା
ତ୍ଵମେଵ ଵିଜଯା ତ୍ଵଯି ତ୍ରିଜଗଦଂବ କିଂ ବ୍ରୂମହେ ॥92॥
ପରେ ଜନନି ପାର୍ଵତି ପ୍ରଣତପାଲିନି ପ୍ରାତିଭ-
ପ୍ରଦାତ୍ରି ପରମେଶ୍ଵରି ତ୍ରିଜଗଦାଶ୍ରିତେ ଶାଶ୍ଵତେ ।
ତ୍ରିଯଂବକକୁଟୁଂବିନି ତ୍ରିପଦସଂଗିନି ତ୍ରୀକ୍ଷଣେ
ତ୍ରିଶକ୍ତିମଯି ଵୀକ୍ଷଣଂ ମଯି ନିଧେହି କାମାକ୍ଷି ତେ ॥93॥
ମନୋମଧୁକରୋତ୍ସଵଂ ଵିଦଧତୀ ମନୀଷାଜୁଷାଂ
ସ୍ଵଯଂପ୍ରଭଵଵୈଖରୀଵିପିନଵୀଥିକାଲଂବିନୀ ।
ଅହୋ ଶିଶିରିତା କୃପାମଧୁରସେନ କଂପାତଟେ
ଚରାଚରଵିଧାଯିନୀ ଚଲତି କାପି ଚିନ୍ମଂଜରୀ ॥94॥
କଲାଵତି କଲାଭୃତୋ ମୁକୁଟସୀମ୍ନି ଲୀଲାଵତି
ସ୍ପୃହାଵତି ମହେଶ୍ଵରେ ଭୁଵନମୋହନେ ଭାସ୍ଵତି ।
ପ୍ରଭାଵତି ରମେ ସଦା ମହିତରୂପଶୋଭାଵତି
ତ୍ଵରାଵତି ପରେ ସତାଂ ଗୁରୁକୃପାଂବୁଧାରାଵତି ॥95॥
ତ୍ଵଯୈଵ ଜଗଦଂବଯା ଭୁଵନମଂଡଲଂ ସୂଯତେ
ତ୍ଵଯୈଵ କରୁଣାର୍ଦ୍ରଯା ତଦପି ରକ୍ଷଣଂ ନୀଯତେ ।
ତ୍ଵଯୈଵ ଖରକୋପଯା ନଯନପାଵକେ ହୂଯତେ
ତ୍ଵଯୈଵ କିଲ ନିତ୍ଯଯା ଜଗତି ସଂତତଂ ସ୍ଥୀଯତେ ॥96॥
ଚରାଚରଜଗନ୍ମଯୀଂ ସକଲହୃନ୍ମଯୀଂ ଚିନ୍ମଯୀଂ
ଗୁଣତ୍ରଯମଯୀଂ ଜଗତ୍ତ୍ରଯମଯୀଂ ତ୍ରିଧାମାମଯୀମ୍ ।
ପରାପରମଯୀଂ ସଦା ଦଶଦିଶାଂ ନିଶାହର୍ମଯୀଂ
ପରାଂ ସତତସନ୍ମଯୀଂ ମନସି ଚିନ୍ମଯୀଂ ଶୀଲଯେ ॥97॥
ଜଯ ଜଗଦଂବିକେ ହରକୁଟୁଂବିନି ଵକ୍ତ୍ରରୁଚା
ଜିତଶରଦଂବୁଜେ ଘନଵିଡଂବିନି କେଶରୁଚା ।
ପରମଵଲଂବନଂ କୁରୁ ସଦା ପରରୂପଧରେ
ମମ ଗତସଂଵିଦୋ ଜଡିମଡଂବରତାଂଡଵିନଃ ॥98॥
ଭୁଵନଜନନି ଭୂଷାଭୂତଚଂଦ୍ରେ ନମସ୍ତେ
କଲୁଷଶମନି କଂପାତୀରଗେହେ ନମସ୍ତେ ।
ନିଖିଲନିଗମଵେଦ୍ଯେ ନିତ୍ଯରୂପେ ନମସ୍ତେ
ପରଶିଵମଯି ପାଶଚ୍ଛେଦହସ୍ତେ ନମସ୍ତେ ॥99॥
କ୍ଵଣତ୍କାଂଚୀ କାଂଚୀପୁରମଣିଵିପଂଚୀଲଯଝରୀ-
ଶିରଃକଂପା କଂପାଵସତିରନୁକଂପାଜଲନିଧିଃ ।
ଘନଶ୍ଯାମା ଶ୍ଯାମା କଠିନକୁଚସୀମା ମନସି ମେ
ମୃଗାକ୍ଷୀ କାମାକ୍ଷୀ ହରନଟନସାକ୍ଷୀ ଵିହରତାତ୍ ॥100॥
ସମରଵିଜଯକୋଟୀ ସାଧକାନଂଦଧାଟୀ
ମୃଦୁଗୁଣପରିପେଟୀ ମୁଖ୍ଯକାଦଂବଵାଟୀ ।
ମୁନିନୁତପରିପାଟୀ ମୋହିତାଜାଂଡକୋଟୀ
ପରମଶିଵଵଧୂଟୀ ପାତୁ ମାଂ କାମକୋଟୀ ॥101॥
ଇମଂ ପରଵରପ୍ରଦଂ ପ୍ରକୃତିପେଶଲଂ ପାଵନଂ
ପରାପରଚିଦାକୃତିପ୍ରକଟନପ୍ରଦୀପାଯିତମ୍ ।
ସ୍ତଵଂ ପଠତି ନିତ୍ଯଦା ମନସି ଭାଵଯନ୍ନଂବିକାଂ
ଜପୈରଲମଲଂ ମଖୈରଧିକଦେହସଂଶୋଷଣୈଃ ॥102॥
॥ ଇତି ସ୍ତୁତିଶତକଂ ସଂପୂର୍ଣମ୍ ॥
Browse Related Categories:
