ମହିମ୍ନଃ ପଂଥାନଂ ମଦନପରିପଂଥିପ୍ରଣଯିନି
ପ୍ରଭୁର୍ନିର୍ଣେତୁଂ ତେ ଭଵତି ଯତମାନୋଽପି କତମଃ ।
ତଥାପି ଶ୍ରୀକାଂଚୀଵିହୃତିରସିକେ କୋଽପି ମନସୋ
ଵିପାକସ୍ତ୍ଵତ୍ପାଦସ୍ତୁତିଵିଧିଷୁ ଜଲ୍ପାକଯତି ମାମ୍ ॥1॥
ଗଲଗ୍ରାହୀ ପୌରଂଦରପୁରଵନୀପଲ୍ଲଵରୁଚାଂ
ଧୃତପାଥମ୍ଯାନାମରୁଣମହସାମାଦିମଗୁରୁଃ ।
ସମିଂଧେ ବଂଧୂକସ୍ତବକସହଯୁଧ୍ଵା ଦିଶି ଦିଶି
ପ୍ରସର୍ପନ୍କାମାକ୍ଷ୍ଯାଶ୍ଚରଣକିରଣାନାମରୁଣିମା ॥2॥
ମରାଲୀନାଂ ଯାନାଭ୍ଯସନକଲନାମୂଲଗୁରଵେ
ଦରିଦ୍ରାଣାଂ ତ୍ରାଣଵ୍ଯତିକରସୁରୋଦ୍ଯାନତରଵେ ।
ତମସ୍କାଂଡପ୍ରୌଢିପ୍ରକଟନତିରସ୍କାରପଟଵେ
ଜନୋଽଯଂ କାମାକ୍ଷ୍ଯାଶ୍ଚରଣନଲିନାଯ ସ୍ପୃହଯତେ ॥3॥
ଵହଂତୀ ସୈଂଦୂରୀଂ ସରଣିମଵନମ୍ରାମରପୁୀ-
ପୁରଂଧ୍ରୀସୀମଂତେ କଵିକମଲବାଲାର୍କସୁଷମା ।
ତ୍ରଯୀସୀମଂତିନ୍ଯାଃ ସ୍ତନତଟନିଚୋଲାରୁଣପଟୀ
ଵିଭାଂତୀ କାମାକ୍ଷ୍ଯାଃ ପଦନଲିନକାଂତିର୍ଵିଜଯତେ ॥4॥
ପ୍ରଣମ୍ରୀଭୂତସ୍ଯ ପ୍ରଣଯକଲହତ୍ରସ୍ତମନସଃ
ସ୍ମରାରାତେଶ୍ଚୂଡାଵିଯତି ଗୃହମେଧୀ ହିମକରଃ ।
ଯଯୋଃ ସାଂଧ୍ଯାଂ କାଂତିଂ ଵହତି ସୁଷମାଭିଶ୍ଚରଣଯୋଃ
ତଯୋର୍ମେ କାମାକ୍ଷ୍ଯା ହୃଦଯମପତଂଦ୍ରଂ ଵିହରତାମ୍ ॥5॥
ଯଯୋଃ ପୀଠାଯଂତେ ଵିବୁଧମୁକୁଟୀନାଂ ପଟଲିକା
ଯଯୋଃ ସୌଧାଯଂତେ ସ୍ଵଯମୁଦଯଭାଜୋ ଭଣିତଯଃ ।
ଯଯୋଃ ଦାସାଯଂତେ ସରସିଜଭଵାଦ୍ଯାଶ୍ଚରଣଯୋଃ
ତଯୋର୍ମେ କାମାକ୍ଷ୍ଯା ଦିନମନୁ ଵରୀଵର୍ତୁ ହୃଦଯମ୍ ॥6॥
ନଯଂତୀ ସଂକୋଚଂ ସରସିଜରୁଚଂ ଦିକ୍ପରିସରେ
ସୃଜଂତୀ ଲୌହିତ୍ଯଂ ନଖକିରଣଚଂଦ୍ରାର୍ଧଖଚିତା ।
କଵୀଂଦ୍ରାଣାଂ ହୃତ୍କୈରଵଵିକସନୋଦ୍ଯୋଗଜନନୀ
ସ୍ଫୁରଂତୀ କାମାକ୍ଷ୍ଯାଃ ଚରଣରୁଚିସଂଧ୍ଯା ଵିଜଯତେ ॥7॥
ଵିରାଵୈର୍ମାଂଜୀରୈଃ କିମପି କଥଯଂତୀଵ ମଧୁରଂ
ପୁରସ୍ତାଦାନମ୍ରେ ପୁରଵିଜଯିନି ସ୍ମେରଵଦନେ ।
ଵଯସ୍ଯେଵ ପ୍ରୌଢା ଶିଥିଲଯତି ଯା ପ୍ରେମକଲହ-
ପ୍ରରୋହଂ କାମାକ୍ଷ୍ଯାଃ ଚରଣଯୁଗଲୀ ସା ଵିଜଯତେ ॥8॥
ସୁପର୍ଵସ୍ତ୍ରୀଲୋଲାଲକପରିଚିତଂ ଷଟ୍ପଦକୁଲୈଃ
ସ୍ଫୁରଲ୍ଲାକ୍ଷାରାଗଂ ତରୁଣତରଣିଜ୍ଯୋତିରରୁଣୈଃ ।
ଭୃତଂ କାଂତ୍ଯଂଭୋଭିଃ ଵିସୃମରମରଂଦୈଃ ସରସିଜୈଃ
ଵିଧତ୍ତେ କାମାକ୍ଷ୍ଯାଃ ଚରଣଯୁଗଲଂ ବଂଧୁପଦଵୀମ୍ ॥9॥
ରଜଃସଂସର୍ଗେଽପି ସ୍ଥିତମରଜସାମେଵ ହୃଦଯେ
ପରଂ ରକ୍ତତ୍ଵେନ ସ୍ଥିତମପି ଵିରକ୍ତୈକଶରଣମ୍ ।
ଅଲଭ୍ଯଂ ମଂଦାନାଂ ଦଧଦପି ସଦା ମଂଦଗତିତାଂ
ଵିଧତ୍ତେ କାମାକ୍ଷ୍ଯାଃ ଚରଣଯୁଗମାଶ୍ଚର୍ଯଲହରୀମ୍ ॥10॥
ଜଟାଲା ମଂଜୀରସ୍ଫୁରଦରୁଣରତ୍ନାଂଶୁନିକରୈଃ
ନିଷିଦଂତୀ ମଧ୍ଯେ ନଖରୁଚିଝରୀଗାଂଗପଯସାମ୍ ।
ଜଗତ୍ତ୍ରାଣଂ କର୍ତୁଂ ଜନନି ମମ କାମାକ୍ଷି ନିଯତଂ
ତପଶ୍ଚର୍ଯାଂ ଧତ୍ତେ ତଵ ଚରଣପାଥୋଜଯୁଗଲୀ ॥11॥
ତୁଲାକୋଟିଦ୍ଵଂଦ୍ଵକ୍କଣିତଭଣିତାଭୀତିଵଚସୋଃ
ଵିନମ୍ରଂ କାମାକ୍ଷୀ ଵିସୃମରମହଃପାଟଲିତଯୋଃ ।
କ୍ଷଣଂ ଵିନ୍ଯାସେନ କ୍ଷପିତତମସୋର୍ମେ ଲଲିତଯୋଃ
ପୁନୀଯାନ୍ମୂର୍ଧାନଂ ପୁରହରପୁରଂଧ୍ରୀ ଚରଣଯୋଃ ॥12॥
ଭଵାନି ଦ୍ରୁହ୍ଯେତାଂ ଭଵନିବିଡିତେଭ୍ଯୋ ମମ ମୁହୁ-
ସ୍ତମୋଵ୍ଯାମୋହେଭ୍ଯସ୍ତଵ ଜନନି କାମାକ୍ଷି ଚରଣୌ ।
ଯଯୋର୍ଲାକ୍ଷାବିଂଦୁସ୍ଫୁରଣଧରଣାଦ୍ଧ୍ଵର୍ଜଟିଜଟା-
କୁଟୀରା ଶୋଣାଂକଂ ଵହତି ଵପୁରେଣାଂକକଲିକା ॥13॥
ପଵିତ୍ରୀକୁର୍ଯୁର୍ନୁଃ ପଦତଲଭୁଵଃ ପାଟଲରୁଚଃ
ପରାଗାସ୍ତେ ପାପପ୍ରଶମନଧୁରୀଣାଃ ପରଶିଵେ ।
କଣଂ ଲବ୍ଧୁଂ ଯେଷାଂ ନିଜଶିରସି କାମାକ୍ଷି ଵିଵଶା
ଵଲଂତୋ ଵ୍ଯାତନ୍ଵଂତ୍ଯହମହମିକାଂ ମାଧଵମୁଖାଃ ॥14॥
ବଲାକାମାଲାଭିର୍ନଖରୁଚିମଯୀଭିଃ ପରିଵୃତେ
ଵିନମ୍ରସ୍ଵର୍ନାରୀଵିକଚକଚକାଲାଂବୁଦକୁଲେ ।
ସ୍ଫୁରଂତଃ କାମାକ୍ଷି ସ୍ଫୁଟଦଲିତବଂଧୂକସୁହୃଦ-
ସ୍ତଟିଲ୍ଲେଖାଯଂତେ ତଵ ଚରଣପାଥୋଜକିରଣାଃ ॥15॥
ସରାଗଃ ସଦ୍ଵେଷଃ ପ୍ରସୃମରସରୋଜେ ପ୍ରତିଦିନଂ
ନିସର୍ଗାଦାକ୍ରାମନ୍ଵିବୁଧଜନମୂର୍ଧାନମଧିକମ୍ ।
କଥଂକାରଂ ମାତଃ କଥଯ ପଦପଦ୍ମସ୍ତଵ ସତାଂ
ନତାନାଂ କାମାକ୍ଷି ପ୍ରକଟଯତି କୈଵଲ୍ଯସରଣିମ୍ ॥16॥
ଜପାଲକ୍ଷ୍ମୀଶୋଣୋ ଜନିତପରମଜ୍ଞାନନଲିନୀ-
ଵିକାସଵ୍ଯାସଂଗୋ ଵିଫଲିତଜଗଜ୍ଜାଡ୍ଯଗରିମା ।
ମନଃପୂର୍ଵାଦ୍ରିଂ ମେ ତିଲକଯତୁ କାମାକ୍ଷି ତରସା
ତମସ୍କାଂଡଦ୍ରୋହୀ ତଵ ଚରଣପାଥୋଜରମଣଃ ॥17॥
ନମସ୍କୁର୍ମଃ ପ୍ରେଂଖନ୍ମଣିକଟକନୀଲୋତ୍ପଲମହଃ-
ପଯୋଧୌ ରିଂଖଦ୍ଭିର୍ନଖକିରଣଫେନୈର୍ଧଵଲିତେ ।
ସ୍ଫୁଟଂ କୁର୍ଵାଣାଯ ପ୍ରବଲଚଲଦୌର୍ଵାନଲଶିଖା-
ଵିତର୍କଂ କାମାକ୍ଷ୍ଯାଃ ସତତମରୁଣିମ୍ନେ ଚରଣଯୋଃ ॥18॥
ଶିଵେ ପାଶାଯେତାମଲଘୁନି ତମଃକୂପକୁହରେ
ଦିନାଧୀଶାଯେତାଂ ମମ ହୃଦଯପାଥୋଜଵିପିନେ ।
ନଭୋମାସାଯେତାଂ ସରସକଵିତାରୀତିସରିତି
ତ୍ଵଦୀଯୌ କାମାକ୍ଷି ପ୍ରସୃତକିରଣୌ ଦେଵି ଚରଣୌ ॥19॥
ନିଷକ୍ତଂ ଶ୍ରୁତ୍ଯଂତେ ନଯନମିଵ ସଦ୍ଵୃତ୍ତରୁଚିରୈଃ
ସମୈର୍ଜୁଷ୍ଟଂ ଶୁଦ୍ଧୈରଧରମିଵ ରମ୍ଯୈର୍ଦ୍ଵିଜଗଣୈଃ ।
ଶିଵେ ଵକ୍ଷୋଜନ୍ମଦ୍ଵିତଯମିଵ ମୁକ୍ତାଶ୍ରିତମୁମେ
ତ୍ଵଦୀଯଂ କାମାକ୍ଷି ପ୍ରଣତଶରଣଂ ନୌମି ଚରଣମ୍ ॥20॥
ନମସ୍ଯାସଂସଜ୍ଜନ୍ନମୁଚିପରିପଂଥିପ୍ରଣଯିନୀ-
ନିସର୍ଗପ୍ରେଂଖୋଲତ୍କୁରଲକୁଲକାଲାହିଶବଲେ ।
ନଖଚ୍ଛାଯାଦୁଗ୍ଧୋଦଧିପଯସି ତେ ଵୈଦ୍ରୁମରୁଚାଂ
ପ୍ରଚାରଂ କାମାକ୍ଷି ପ୍ରଚୁରଯତି ପାଦାବ୍ଜସୁଷମା ॥21॥
କଦା ଦୂରୀକର୍ତୁଂ କଟୁଦୁରିତକାକୋଲଜନିତଂ
ମହାଂତଂ ସଂତାପଂ ମଦନପରିପଂଥିପ୍ରିଯତମେ ।
କ୍ଷଣାତ୍ତେ କାମାକ୍ଷି ତ୍ରିଭୁଵନପରୀତାପହରଣେ
ପଟୀଯାଂସଂ ଲପ୍ସ୍ଯେ ପଦକମଲସେଵାମୃତରସମ୍ ॥22॥
ଯଯୋଃ ସାଂଧ୍ଯଂ ରୋଚିଃ ସତତମରୁଣିମ୍ନେ ସ୍ପୃହଯତେ
ଯଯୋଶ୍ଚାଂଦ୍ରୀ କାଂତିଃ ପରିପତତି ଦୃଷ୍ଟ୍ଵା ନଖରୁଚିମ୍ ।
ଯଯୋଃ ପାକୋଦ୍ରେକଂ ପିପଠିଷତି ଭକ୍ତ୍ଯା କିସଲଯଂ
ମ୍ରଦିମ୍ନଃ କାମାକ୍ଷ୍ଯା ମନସି ଚରଣୌ ତୌ ତନୁମହେ ॥23॥
ଜଗନ୍ନେଦଂ ନେଦଂ ପରମିତି ପରିତ୍ଯଜ୍ଯ ଯତିଭିଃ
କୁଶାଗ୍ରୀଯସ୍ଵାଂତୈଃ କୁଶଲଧିଷଣୈଃ ଶାସ୍ତ୍ରସରଣୌ ।
ଗଵେଷ୍ଯଂ କାମାକ୍ଷି ଧ୍ରୁଵମକୃତକାନାଂ ଗିରିସୁତେ
ଗିରାମୈଦଂପର୍ଯଂ ତଵ ଚରଣପଦ୍ମଂ ଵିଜଯତେ ॥24॥
କୃତସ୍ନାନଂ ଶାସ୍ତ୍ରାମୃତସରସି କାମାକ୍ଷି ନିତରାଂ
ଦଧାନଂ ଵୈଶଦ୍ଯଂ କଲିତରସମାନଂଦସୁଧଯା ।
ଅଲଂକାରଂ ଭୂମେର୍ମୁନିଜନମନଶ୍ଚିନ୍ମଯମହା-
ପଯୋଧେରଂତସ୍ସ୍ଥଂ ତଵ ଚରଣରତ୍ନଂ ମୃଗଯତେ ॥25॥
ମନୋଗେହେ ମୋହୋଦ୍ଭଵତିମିରପୂର୍ଣେ ମମ ମୁହୁଃ
ଦରିଦ୍ରାଣୀକୁର୍ଵଂଦିନକରସହସ୍ରାଣି କିରଣୈଃ ।
ଵିଧତ୍ତାଂ କାମାକ୍ଷି ପ୍ରସୃମରତମୋଵଂଚନଚଣଃ
କ୍ଷଣାର୍ଧଂ ସାନ୍ନିଧ୍ଯଂ ଚରଣମଣିଦୀପୋ ଜନନି ତେ ॥26॥
କଵୀନାଂ ଚେତୋଵନ୍ନଖରରୁଚିସଂପର୍କି ଵିବୁଧ-
ସ୍ରଵଂତୀସ୍ରୋତୋଵତ୍ପଟୁମୁଖରିତଂ ହଂସକରଵୈଃ ।
ଦିନାରଂଭଶ୍ରୀଵନ୍ନିଯତମରୁଣଚ୍ଛାଯସୁଭଗଂ
ମଦଂତଃ କାମାକ୍ଷ୍ଯାଃ ସ୍ଫୁରତୁ ପଦପଂକେରୁହଯୁଗମ୍ ॥27॥
ସଦା କିଂ ସଂପର୍କାତ୍ପ୍ରକୃତିକଠିନୈର୍ନାକିମୁକୁଟୈଃ
ତଟୈର୍ନୀହାରାଦ୍ରେରଧିକମଣୁନା ଯୋଗିମନସା ।
ଵିଭିଂତେ ସଂମୋହଂ ଶିଶିରଯତି ଭକ୍ତାନପି ଦୃଶାମ୍
ଅଦୃଶ୍ଯଂ କାମାକ୍ଷି ପ୍ରକଟଯତି ତେ ପାଦଯୁଗଲମ୍ ॥28॥
ପଵିତ୍ରାଭ୍ଯାମଂବ ପ୍ରକୃତିମୃଦୁଲାଭ୍ଯାଂ ତଵ ଶିଵେ
ପଦାଭ୍ଯାଂ କାମାକ୍ଷି ପ୍ରସଭମଭିଭୂତୈଃ ସଚକିତୈଃ ।
ପ୍ରଵାଲୈରଂଭୋଜୈରପି ଚ ଵନଵାସଵ୍ରତଦଶାଃ
ସଦୈଵାରଭ୍ଯଂତେ ପରିଚରିତନାନାଦ୍ଵିଜଗଣୈଃ ॥29॥
ଚିରାଦ୍ଦୃଶ୍ଯା ହଂସୈଃ କଥମପି ସଦା ହଂସସୁଲଭଂ
ନିରସ୍ଯଂତୀ ଜାଡ୍ଯଂ ନିଯତଜଡମଧ୍ଯୈକଶରଣମ୍ ।
ଅଦୋଷଵ୍ଯାସଂଗା ସତତମପି ଦୋଷାପ୍ତିମଲିନଂ
ପଯୋଜଂ କାମାକ୍ଷ୍ଯାଃ ପରିହସତି ପାଦାବ୍ଜଯୁଗଲୀ ॥30॥
ସୁରାଣାମାନଂଦପ୍ରବଲନତଯା ମଂଡନତଯା
ନଖେଂଦୁଜ୍ଯୋତ୍ସ୍ନାଭିର୍ଵିସୃମରତମଃଖଂଡନତଯା ।
ପଯୋଜଶ୍ରୀଦ୍ଵେଷଵ୍ରତରତତଯା ତ୍ଵଚ୍ଚରଣଯୋଃ
ଵିଲାସଃ କାମାକ୍ଷି ପ୍ରକଟଯତି ନୈଶାକରଦଶାମ୍ ॥31॥
ସିତିମ୍ନା କାଂତୀନାଂ ନଖରଜନୁଷାଂ ପାଦନଲିନ-
ଚ୍ଛଵୀନାଂ ଶୋଣିମ୍ନା ତଵ ଜନନି କାମାକ୍ଷି ନମନେ ।
ଲଭଂତେ ମଂଦାରଗ୍ରଥିତନଵବଂଧୂକକୁସୁମ-
ସ୍ରଜାଂ ସାମୀଚୀନ୍ଯଂ ସୁରପୁରପୁରଂଧ୍ରୀକଚଭରାଃ ॥32॥
ସ୍ଫୁରନ୍ମଧ୍ଯେ ଶୁଦ୍ଧେ ନଖକିରଣଦୁଗ୍ଧାବ୍ଧିପଯସାଂ
ଵହନ୍ନବ୍ଜଂ ଚକ୍ରଂ ଦରମପି ଚ ଲେଖାତ୍ମକତଯା ।
ଶ୍ରିତୋ ମାତ୍ସ୍ଯଂ ରୂପଂ ଶ୍ରିଯମପି ଦଧାନୋ ନିରୁପମାଂ
ତ୍ରିଧାମା କାମାକ୍ଷ୍ଯାଃ ପଦନଲିନନାମା ଵିଜଯତେ ॥33॥
ନଖଶ୍ରୀସନ୍ନଦ୍ଧସ୍ତବକନିଚିତଃ ସ୍ଵୈଶ୍ଚ କିରଣୈଃ
ପିଶଂଗୈଃ କାମାକ୍ଷି ପ୍ରକଟିତଲସତ୍ପଲ୍ଲଵରୁଚିଃ ।
ସତାଂ ଗମ୍ଯଃ ଶଂକେ ସକଲଫଲଦାତା ସୁରତରୁଃ
ତ୍ଵଦୀଯଃ ପାଦୋଽଯଂ ତୁହିନଗିରିରାଜନ୍ଯତନଯେ ॥34॥
ଵଷଟ୍କୁର୍ଵନ୍ମାଂଜୀରକଲକଲୈଃ କର୍ମଲହରୀ-
ହଵୀଂଷି ପ୍ରୌଦ୍ଦଂଡଂ ଜ୍ଵଲତି ପରମଜ୍ଞାନଦହନେ ।
ମହୀଯାନ୍କାମାକ୍ଷି ସ୍ଫୁଟମହସି ଜୋହୋତି ସୁଧିଯାଂ
ମନୋଵେଦ୍ଯାଂ ମାତସ୍ତଵ ଚରଣଯଜ୍ଵା ଗିରିସୁତେ ॥35॥
ମହାମଂତ୍ରଂ କିଂଚିନ୍ମଣିକଟକନାଦୈର୍ମୃଦୁ ଜପନ୍
କ୍ଷିପଂଦିକ୍ଷୁ ସ୍ଵଚ୍ଛଂ ନଖରୁଚିମଯଂ ଭାସ୍ମନରଜଃ ।
ନତାନାଂ କାମାକ୍ଷି ପ୍ରକୃତିପଟୁରଚ୍ଚାଟ୍ଯ ମମତା-
ପିଶାଚୀଂ ପାଦୋଽଯଂ ପ୍ରକଟଯତି ତେ ମାଂତ୍ରିକଦଶାମ୍ ॥36॥
ଉଦୀତେ ବୋଧେଂଦୌ ତମସି ନିତରାଂ ଜଗ୍ମୁଷି ଦଶାଂ
ଦରିଦ୍ରାଂ କାମାକ୍ଷି ପ୍ରକଟମନୁରାଗଂ ଵିଦଧତୀ ।
ସିତେନାଚ୍ଛାଦ୍ଯାଂଗଂ ନଖରୁଚିପଟେନାଂଘ୍ରିଯୁଗଲୀ-
ପୁରଂଧ୍ରୀ ତେ ମାତଃ ସ୍ଵଯମଭିସରତ୍ଯେଵ ହୃଦଯମ୍ ॥37॥
ଦିନାରଂଭଃ ସଂପନ୍ନଲିନଵିପିନାନାମଭିନଵୋ
ଵିକାସୋ ଵାସଂତଃ ସୁକଵିପିକଲୋକସ୍ଯ ନିଯତଃ ।
ପ୍ରଦୋଷଃ କାମାକ୍ଷି ପ୍ରକଟପରମଜ୍ଞାନଶଶିନ-
ଶ୍ଚକାସ୍ତି ତ୍ଵତ୍ପାଦସ୍ମରଣମହିମା ଶୈଲତନଯେ ॥38॥
ଧୃତଚ୍ଛାଯଂ ନିତ୍ଯଂ ସରସିରୁହମୈତ୍ରୀପରିଚିତଂ
ନିଧାନଂ ଦୀପ୍ତୀନାଂ ନିଖିଲଜଗତାଂ ବୋଧଜନକମ୍ ।
ମୁମୁକ୍ଷୂଣାଂ ମାର୍ଗପ୍ରଥନପଟୁ କାମାକ୍ଷି ପଦଵୀଂ
ପଦଂ ତେ ପାତଂଗୀଂ ପରିକଲଯତେ ପର୍ଵତସୁତେ ॥39॥
ଶନୈସ୍ତୀର୍ତ୍ଵା ମୋହାଂବୁଧିମଥ ସମାରୋଢୁମନସଃ
କ୍ରମାତ୍କୈଵଲ୍ଯାଖ୍ଯାଂ ସୁକୃତିସୁଲଭାଂ ସୌଧଵଲଭୀମ୍ ।
ଲଭଂତେ ନିଃଶ୍ରେଣୀମିଵ ଝଟିତି କାମାକ୍ଷି ଚରଣଂ
ପୁରଶ୍ଚର୍ଯାଭିସ୍ତେ ପୁରମଥନସୀମଂତିନି ଜନାଃ ॥40॥
ପ୍ରଚଂଡାର୍ତିକ୍ଷୋଭପ୍ରମଥନକୃତେ ପ୍ରାତିଭସରି-
ତ୍ପ୍ରଵାହପ୍ରୋଦ୍ଦଂଡୀକରଣଜଲଦାଯ ପ୍ରଣମତାମ୍ ।
ପ୍ରଦୀପାଯ ପ୍ରୌଢେ ଭଵତମସି କାମାକ୍ଷି ଚରଣ-
ପ୍ରସାଦୌନ୍ମୁଖ୍ଯାଯ ସ୍ପୃହଯତି ଜନୋଽଯଂ ଜନନି ତେ ॥41॥
ମରୁଦ୍ଭିଃ ସଂସେଵ୍ଯା ସତତମପି ଚାଂଚଲ୍ଯରହିତା
ସଦାରୁଣ୍ଯଂ ଯାଂତୀ ପରିଣତିଦରିଦ୍ରାଣସୁଷମା ।
ଗୁଣୋତ୍କର୍ଷାନ୍ମାଂଜୀରକକଲକଲୈସ୍ତର୍ଜନପଟୁଃ
ପ୍ରଵାଲଂ କାମାକ୍ଷ୍ଯାଃ ପରିହସତି ପାଦାବ୍ଜଯୁଗଲୀ ॥42॥
ଜଗଦ୍ରକ୍ଷାଦକ୍ଷା ଜଲଜରୁଚିଶିକ୍ଷାପଟୁତରା
ସମୈର୍ନମ୍ଯା ରମ୍ଯା ସତତମଭିଗମ୍ଯା ବୁଧଜନୈଃ ।
ଦ୍ଵଯୀ ଲୀଲାଲୋଲା ଶ୍ରୁତିଷୁ ସୁରପାଲାଦିମୁକୁଟୀ-
ତଟୀସୀମାଧାମା ତଵ ଜନନି କାମାକ୍ଷି ପଦଯୋଃ ॥43॥
ଗିରାଂ ଦୂରୌ ଚୋରୌ ଜଡିମତିମିରାଣାଂ କୃତଜଗ-
ତ୍ପରିତ୍ରାଣୌ ଶୋଣୌ ମୁନିହୃଦଯଲୀଲୈକନିପୁଣୌ ।
ନଖୈଃ ସ୍ମେରୌ ସାରୌ ନିଗମଵଚସାଂ ଖଂଡିତଭଵ-
ଗ୍ରହୋନ୍ମାଦୌ ପାଦୌ ତଵ ଜନନି କାମାକ୍ଷି କଲଯେ ॥44॥
ଅଵିଶ୍ରାଂତଂ ପଂକଂ ଯଦପି କଲଯନ୍ଯାଵକମଯଂ
ନିରସ୍ଯନ୍କାମାକ୍ଷି ପ୍ରଣମନଜୁଷାଂ ପଂକମଖିଲମ୍ ।
ତୁଲାକୋଟିଦ୍ଵଂଦଂ ଦଧଦପି ଚ ଗଚ୍ଛନ୍ନତୁଲତାଂ
ଗିରାଂ ମାର୍ଗଂ ପାଦୋ ଗିରିଵରସୁତେ ଲଂଘଯତି ତେ ॥45॥
ପ୍ରଵାଲଂ ସଵ୍ରୀଲଂ ଵିପିନଵିଵରେ ଵେପଯତି ଯା
ସ୍ଫୁରଲ୍ଲୀଲଂ ବାଲାତପମଧିକବାଲଂ ଵଦତି ଯା ।
ରୁଚିଂ ସାଂଧ୍ଯାଂ ଵଂଧ୍ଯାଂ ଵିରଚଯତି ଯା ଵର୍ଧଯତୁ ସା
ଶିଵଂ ମେ କାମାକ୍ଷ୍ଯାଃ ପଦନଲିନପାଟଲ୍ଯଲହରୀ ॥46॥
କିରଂଜ୍ଯୋତ୍ସ୍ନାରୀତିଂ ନଖମୁଖରୁଚା ହଂସମନସାଂ
ଵିତନ୍ଵାନଃ ପ୍ରୀତିଂ ଵିକଚତରୁଣାଂଭୋରୁହରୁଚିଃ ।
ପ୍ରକାଶଃ ଶ୍ରୀପାଦସ୍ତଵ ଜନନି କାମାକ୍ଷି ତନୁତେ
ଶରତ୍କାଲପ୍ରୌଢିଂ ଶଶିଶକଲଚୂଡପ୍ରିଯତମେ ॥47॥
ନଖାଂକୂରସ୍ମେରଦ୍ଯୁତିଵିମଲଗଂଗାଂଭସି ସୁଖଂ
କୃତସ୍ନାନଂ ଜ୍ଞାନାମୃତମମଲମାସ୍ଵାଦ୍ଯ ନିଯତମ୍ ।
ଉଦଂଚନ୍ମଂଜୀରସ୍ଫୁରଣମଣିଦୀପେ ମମ ମନୋ
ମନୋଜ୍ଞେ କାମାକ୍ଷ୍ଯାଶ୍ଚରଣମଣିହର୍ମ୍ଯେ ଵିହରତାମ୍ ॥48॥
ଭଵାଂଭୋଧୌ ନୌକାଂ ଜଡିମଵିପିନେ ପାଵକଶିଖା-
ମମର୍ତ୍ଯେଂଦ୍ରାଦୀନାମଧିମୁକୁଟମୁତ୍ତଂସକଲିକାମ୍ ।
ଜଗତ୍ତାପେ ଜ୍ଯୋତ୍ସ୍ନାମକୃତକଵଚଃପଂଜରପୁଟେ
ଶୁକସ୍ତ୍ରୀଂ କାମାକ୍ଷ୍ଯା ମନସି କଲଯେ ପାଦଯୁଗଲୀମ୍ ॥49॥
ପରତ୍ମପ୍ରାକାଶ୍ଯପ୍ରତିଫଲନଚୁଂଚୁଃ ପ୍ରଣମତାଂ
ମନୋଜ୍ଞସ୍ତ୍ଵତ୍ପାଦୋ ମଣିମୁକୁରମୁଦ୍ରାଂ କଲଯତେ ।
ଯଦୀଯାଂ କାମାକ୍ଷି ପ୍ରକୃତିମସୃଣାଃ ଶୋଧକଦଶାଂ
ଵିଧାତୁଂ ଚେଷ୍ଠଂତେ ବଲରିପୁଵଧୂଟୀକଚଭରାଃ ॥50॥
ଅଵିଶ୍ରାଂତଂ ତିଷ୍ଠନ୍ନକୃତକଵଚଃକଂଦରପୁଟୀ-
କୁଟୀରାଂତଃ ପ୍ରୌଢଂ ନଖରୁଚିସଟାଲୀଂ ପ୍ରକଟଯନ୍ ।
ପ୍ରଚଂଡଂ ଖଂଡତ୍ଵଂ ନଯତୁ ମମ କାମାକ୍ଷି ତରସା
ତମୋଵେତଂଡେଂଦ୍ରଂ ତଵ ଚରଣକଂଠୀରଵପତିଃ ॥51॥
ପୁରସ୍ତାତ୍କାମାକ୍ଷି ପ୍ରଚୁରରସମାଖଂଡଲପୁରୀ-
ପୁରଂଧ୍ରୀଣାଂ ଲାସ୍ଯଂ ତଵ ଲଲିତମାଲୋକ୍ଯ ଶନକୈଃ ।
ନଖଶ୍ରୀଭିଃ ସ୍ମେରା ବହୁ ଵିତନୁତେ ନୂପୁରରଵୈ-
ଶ୍ଚମତ୍କୃତ୍ଯା ଶଂକେ ଚରଣଯୁଗଲୀ ଚାଟୁରଚନାଃ ॥52॥
ସରୋଜଂ ନିଂଦଂତୀ ନଖକିରଣକର୍ପୂରଶିଶିରା
ନିଷିକ୍ତା ମାରାରେର୍ମୁକୁଟଶଶିରେଖାହିମଜଲୈଃ ।
ସ୍ଫୁରଂତୀ କାମାକ୍ଷି ସ୍ଫୁଟରୁଚିମଯେ ପଲ୍ଲଵଚଯେ
ତଵାଧତ୍ତେ ମୈତ୍ରୀଂ ପଥିକସୁଦୃଶା ପାଦଯୁଗଲୀ ॥53॥
ନତାନାଂ ସଂପତ୍ତେରନଵରତମାକର୍ଷଣଜପଃ
ପ୍ରରୋହତ୍ସଂସାରପ୍ରସରଗରିମସ୍ତଂଭନଜପଃ ।
ତ୍ଵଦୀଯଃ କାମାକ୍ଷି ସ୍ମରହରମନୋମୋହନଜପଃ
ପଟୀଯାନ୍ନଃ ପାଯାତ୍ପଦନଲିନମଂଜୀରନିନଦଃ ॥54॥
ଵିତନ୍ଵୀଥା ନାଥେ ମମ ଶିରସି କାମାକ୍ଷି କୃପଯା
ପଦାଂଭୋଜନ୍ଯାସଂ ପଶୁପରିବୃଢପ୍ରାଣଦଯିତେ ।
ପିବଂତୋ ଯନ୍ମୁଦ୍ରାଂ ପ୍ରକଟମୁପକଂପାପରିସରଂ
ଦୃଶା ନାନଂଦ୍ଯଂତେ ନଲିନଭଵନାରାଯଣମୁଖାଃ ॥55॥
ପ୍ରଣାମୋଦ୍ଯଦ୍ବୃଂଦାରମୁକୁଟମଂଦାରକଲିକା-
ଵିଲୋଲଲ୍ଲୋଲଂବପ୍ରକରମଯଧୂମପ୍ରଚୁରିମା ।
ପ୍ରଦୀପ୍ତଃ ପାଦାବ୍ଜଦ୍ଯୁତିଵିତତିପାଟଲ୍ଯଲହରୀ-
କୃଶାନୁଃ କାମାକ୍ଷ୍ଯା ମମ ଦହତୁ ସଂସାରଵିପିନମ୍ ॥56॥
ଵଲକ୍ଷଶ୍ରୀରୃକ୍ଷାଧିପଶିଶୁସଦୃକ୍ଷୈସ୍ତଵ ନଖୈଃ
ଜିଘୃକ୍ଷୁର୍ଦକ୍ଷତ୍ଵଂ ସରସିରୁହଭିକ୍ଷୁତ୍ଵକରଣେ ।
କ୍ଷଣାନ୍ମେ କାମାକ୍ଷି କ୍ଷପିତଭଵସଂକ୍ଷୋଭଗରିମା
ଵଚୋଵୈଚକ୍ଷନ୍ଯଂ ଚରଣଯୁଗଲୀ ପକ୍ଷ୍ମଲଯତାତ୍ ॥57॥
ସମଂତାତ୍କାମାକ୍ଷି କ୍ଷତତିମିରସଂତାନସୁଭଗାନ୍
ଅନଂତାଭିର୍ଭାଭିର୍ଦିନମନୁ ଦିଗଂତାନ୍ଵିରଚଯନ୍ ।
ଅହଂତାଯା ହଂତା ମମ ଜଡିମଦଂତାଵଲହରିଃ
ଵିଭିଂତାଂ ସଂତାପଂ ତଵ ଚରଣଚିଂତାମଣିରସୌ ॥58॥
ଦଧାନୋ ଭାସ୍ଵତ୍ତାମମୃତନିଲଯୋ ଲୋହିତଵପୁଃ
ଵିନମ୍ରାଣାଂ ସୌମ୍ଯୋ ଗୁରୁରପି କଵିତ୍ଵଂ ଚ କଲଯନ୍ ।
ଗତୌ ମଂଦୋ ଗଂଗାଧରମହିଷି କାମାକ୍ଷି ଭଜତାଂ
ତମଃକେତୁର୍ମାତସ୍ତଵ ଚରଣପଦ୍ମୋ ଵିଜଯତେ ॥59॥
ନଯଂତୀଂ ଦାସତ୍ଵଂ ନଲିନଭଵମୁଖ୍ଯାନସୁଲଭ-
ପ୍ରଦାନାଦ୍ଦୀନାନାମମରତରୁଦୌର୍ଭାଗ୍ଯଜନନୀମ୍ ।
ଜଗଜ୍ଜନ୍ମକ୍ଷେମକ୍ଷଯଵିଧିଷୁ କାମାକ୍ଷି ପଦଯୋ-
ର୍ଧୁରୀଣାମୀଷ୍ଟେ କରସ୍ତଵ ଭଣିତୁମାହୋପୁରୁଷିକାମ୍ ॥60॥
ଜନୋଽଯଂ ସଂତପ୍ତୋ ଜନନି ଭଵଚଂଡାଂଶୁକିରଣୈଃ
ଅଲବ୍ଧଵୈକଂ ଶୀତଂ କଣମପି ପରଜ୍ଞାନପଯସଃ ।
ତମୋମାର୍ଗେ ପାଂଥସ୍ତଵ ଝଟିତି କାମାକ୍ଷି ଶିଶିରାଂ
ପଦାଂଭୋଜଚ୍ଛାଯାଂ ପରମଶିଵଜାଯେ ମୃଗଯତେ ॥61॥
ଜଯତ୍ଯଂବ ଶ୍ରୀମନ୍ନଖକିରଣଚୀନାଂଶୁକମଯଂ
ଵିତାନଂ ବିଭ୍ରାଣେ ସୁରମୁକୁଟସଂଘଟ୍ଟମସୃଣେ ।
ନିଜାରୁଣ୍ଯକ୍ଷୌମାସ୍ତରଣଵତି କାମାକ୍ଷି ସୁଲଭା
ବୁଧୈଃ ସଂଵିନ୍ନାରୀ ତଵ ଚରଣମାଣିକ୍ଯଭଵନେ ॥62॥
ପ୍ରତୀମଃ କାମାକ୍ଷି ସ୍ଫୁରିତତରୁଣାଦିତ୍ଯକିରଣ-
ଶ୍ରିଯୋ ମୂଲଦ୍ରଵ୍ଯଂ ତଵ ଚରଣମଦ୍ରୀଂଦ୍ରତନଯେ ।
ସୁରେଂଦ୍ରାଶାମାପୂରଯତି ଯଦସୌ ଧ୍ଵାଂତମଖିଲଂ
ଧୁନୀତେ ଦିଗ୍ଭାଗାନପି ଚ ମହସା ପାଟଲଯତେ ॥63॥
ମହାଭାଷ୍ଯଵ୍ଯାଖ୍ଯାପଟୁଶଯନମାରୋପଯତି ଵା
ସ୍ମରଵ୍ଯାପାରେର୍ଷ୍ଯାପିଶୁନନିଟିଲଂ କାରଯତି ଵା ।
ଦ୍ଵିରେଫାଣାମଧ୍ଯାସଯତି ସତତଂ ଵାଧିଵସତିଂ
ପ୍ରଣମ୍ରାନ୍କାମାକ୍ଷ୍ଯାଃ ପଦନଲିନମାହାତ୍ମ୍ଯଗରିମା ॥64॥
ଵିଵେକାଂଭସ୍ସ୍ରୋତସ୍ସ୍ନପନପରିପାଟୀଶିଶିରିତେ
ସମୀଭୂତେ ଶାସ୍ତ୍ରସ୍ମରଣହଲସଂକର୍ଷଣଵଶାତ୍ ।
ସତାଂ ଚେତଃକ୍ଷେତ୍ରେ ଵପତି ତଵ କାମାକ୍ଷି ଚରଣୋ
ମହାସଂଵିତ୍ସସ୍ଯପ୍ରକରଵରବୀଜଂ ଗିରିସୁତେ ॥65॥
ଦଧାନୋ ମଂଦାରସ୍ତବକପରିପାଟୀଂ ନଖରୁଚା
ଵହଂଦୀପ୍ତାଂ ଶୋଣାଂଗୁଲିପଟଲଚାଂପେଯକଲିକାମ୍ ।
ଅଶୋକୋଲ୍ଲାସଂ ନଃ ପ୍ରଚୁରଯତୁ କାମାକ୍ଷି ଚରଣୋ
ଵିକାସୀ ଵାସଂତଃ ସମଯ ଇଵ ତେ ଶର୍ଵଦଯିତେ ॥66॥
ନଖାଂଶୁପ୍ରାଚୁର୍ଯପ୍ରସୃମରମରାଲାଲିଧଵଲଃ
ସ୍ଫୁରନ୍ମଂଜୀରୋଦ୍ଯନ୍ମରକତମହଶ୍ଶୈଵଲଯୁତଃ ।
ଭଵତ୍ଯାଃ କାମାକ୍ଷି ସ୍ଫୁଟଚରଣପାଟଲ୍ଯକପଟୋ
ନଦଃ ଶୋଣାଭିଖ୍ଯୋ ନଗପତିତନୂଜେ ଵିଜଯତେ ॥67॥
ଧୁନାନଂ ପଂକୌଘଂ ପରମସୁଲଭଂ କଂଟକକୁଲୈଃ
ଵିକାସଵ୍ଯାସଂଗଂ ଵିଦଧଦପରାଧୀନମନିଶମ୍ ।
ନଖେଂଦୁଜ୍ଯୋତ୍ସ୍ନାଭିର୍ଵିଶଦରୁଚି କାମାକ୍ଷି ନିତରାମ୍
ଅସାମାନ୍ଯଂ ମନ୍ଯେ ସରସିଜମିଦଂ ତେ ପଦଯୁଗମ୍ ॥68॥
କରୀଂଦ୍ରାଯ ଦ୍ରୁହ୍ଯତ୍ଯଲସଗତିଲୀଲାସୁ ଵିମଲୈଃ
ପଯୋଜୈର୍ମାତ୍ସର୍ଯଂ ପ୍ରକଟଯତି କାମଂ କଲଯତେ ।
ପଦାଂଭୋଜଦ୍ଵଂଦ୍ଵଂ ତଵ ତଦପି କାମାକ୍ଷି ହୃଦଯଂ
ମୁନୀନାଂ ଶାଂତାନାଂ କଥମନିଶମସ୍ମୈ ସ୍ପୃହଯତେ ॥69॥
ନିରସ୍ତା ଶୋଣିମ୍ନା ଚରଣକିରଣାନାଂ ତଵ ଶିଵେ
ସମିଂଧାନା ସଂଧ୍ଯାରୁଚିରଚଲରାଜନ୍ଯତନଯେ ।
ଅସାମର୍ଥ୍ଯାଦେନଂ ପରିଭଵିତୁମେତତ୍ସମରୁଚାଂ
ସରୋଜାନାଂ ଜାନେ ମୁକୁଲଯତି ଶୋଭାଂ ପ୍ରତିଦିନମ୍ ॥70॥
ଉପାଦିକ୍ଷଦ୍ଦାକ୍ଷ୍ଯଂ ତଵ ଚରଣନାମା ଗୁରୁରସୌ
ମରାଲାନାଂ ଶଂକେ ମସୃଣଗତିଲାଲିତ୍ଯସରଣୌ ।
ଅତସ୍ତେ ନିସ୍ତଂଦ୍ରଂ ନିଯତମମୁନା ସଖ୍ଯପଦଵୀଂ
ପ୍ରପନ୍ନଂ ପାଥୋଜଂ ପ୍ରତି ଦଧତି କାମାକ୍ଷି କୁତୁକମ୍ ॥71॥
ଦଧାନୈଃ ସଂସର୍ଗଂ ପ୍ରକୃତିମଲିନୈଃ ଷଟ୍ପଦକୁଲୈଃ
ଦ୍ଵିଜାଧୀଶଶ୍ଲାଘାଵିଧିଷୁ ଵିଦଧଦ୍ଭିର୍ମୁକୁଲତାମ୍ ।
ରଜୋମିଶ୍ରୈଃ ପଦ୍ମୈର୍ନିଯତମପି କାମାକ୍ଷି ପଦଯୋଃ
ଵିରୋଧସ୍ତେ ଯୁକ୍ତୋ ଵିଷମଶରଵୈରିପ୍ରିଯତମେ ॥72॥
କଵିତ୍ଵଶ୍ରୀମିଶ୍ରୀକରଣନିପୁଣୌ ରକ୍ଷଣଚଣୌ
ଵିପନ୍ନାନାଂ ଶ୍ରୀମନ୍ନଲିନମସୃଣୌ ଶୋଣକିରଣୌ ।
ମୁନୀଂଦ୍ରାଣାମଂତଃକରଣଶରଣୌ ମଂଦସରଣୌ
ମନୋଜ୍ଞୌ କାମାକ୍ଷ୍ଯା ଦୁରିତହରଣୌ ନୌମି ଚରଣୌ ॥73॥
ପରସ୍ମାତ୍ସର୍ଵସ୍ମାଦପି ଚ ପରଯୋର୍ମୁକ୍ତିକରଯୋଃ
ନଖଶ୍ରୀଭିର୍ଜ୍ଯୋତ୍ସ୍ନାକଲିତତୁଲଯୋସ୍ତାମ୍ରତଲଯୋଃ ।
ନିଲୀଯେ କାମାକ୍ଷ୍ଯା ନିଗମନୁତଯୋର୍ନାକିନତଯୋଃ
ନିରସ୍ତପ୍ରୋନ୍ମୀଲନ୍ନଲିନମଦଯୋରେଵ ପଦଯୋଃ ॥74॥
ସ୍ଵଭାଵାଦନ୍ଯୋନ୍ଯଂ କିସଲଯମପୀଦଂ ତଵ ପଦଂ
ମ୍ରଦିମ୍ନା ଶୋଣିମ୍ନା ଭଗଵତି ଦଧାତେ ସଦୃଶତାମ୍ ।
ଵନେ ପୂର୍ଵସ୍ଯେଚ୍ଛା ସତତମଵନେ କିଂ ତୁ ଜଗତାଂ
ପରସ୍ଯେତ୍ଥଂ ଭେଦଃ ସ୍ଫୁରତି ହୃଦି କାମାକ୍ଷି ସୁଧିଯାମ୍ ॥75॥
କଥଂ ଵାଚାଲୋଽପି ପ୍ରକଟମଣିମଂଜୀରନିନଦୈଃ
ସଦୈଵାନଂଦାର୍ଦ୍ରାନ୍ଵିରଚଯତି ଵାଚଂଯମଜନାନ୍ ।
ପ୍ରକୃତ୍ଯା ତେ ଶୋଣଚ୍ଛଵିରପି ଚ କାମାକ୍ଷି ଚରଣୋ
ମନୀଷାନୈର୍ମଲ୍ଯଂ କଥମିଵ ନୃଣାଂ ମାଂସଲଯତେ ॥76॥
ଚଲତ୍ତୃଷ୍ଣାଵୀଚୀପରିଚଲନପର୍ଯାକୁଲତଯା
ମୁହୁର୍ଭ୍ରାଂତସ୍ତାଂତଃ ପରମଶିଵଵାମାକ୍ଷି ପରଵାନ୍ ।
ତିତୀର୍ଷୁଃ କାମାକ୍ଷି ପ୍ରଚୁରତରକର୍ମାଂବୁଧିମମୁଂ
କଦାହଂ ଲପ୍ସ୍ଯେ ତେ ଚରଣମଣିସେତୁଂ ଗିରିସୁତେ ॥77॥
ଵିଶୁଷ୍ଯଂତ୍ଯାଂ ପ୍ରଜ୍ଞାସରିତି ଦୁରିତଗ୍ରୀଷ୍ମସମଯ-
ପ୍ରଭାଵେଣ କ୍ଷୀଣେ ସତି ମମ ମନଃକେକିନି ଶୁଚା ।
ତ୍ଵଦୀଯଃ କାମାକ୍ଷି ସ୍ଫୁରିତଚରଣାଂଭୋଦମହିମା
ନଭୋମାସାଟୋପଂ ନଗପତିସୁତେ କିଂ ନ କୁରୁତେ ॥78॥
ଵିନମ୍ରାଣାଂ ଚେତୋଭଵନଵଲଭୀସୀମ୍ନି ଚରଣ-
ପ୍ରଦୀପେ ପ୍ରାକାଶ୍ଯଂ ଦଧତି ତଵ ନିର୍ଧୂତତମସି ।
ଅସୀମା କାମାକ୍ଷି ସ୍ଵଯମଲଘୁଦୁଷ୍କର୍ମଲହରୀ
ଵିଘୂର୍ଣଂତୀ ଶାଂତିଂ ଶଲଭପରିପାଟୀଵ ଭଜତେ ॥79॥
ଵିରାଜଂତୀ ଶୁକ୍ତିର୍ନଖକିରଣମୁକ୍ତାମଣିତତେଃ
ଵିପତ୍ପାଥୋରାଶୌ ତରିରପି ନରାଣାଂ ପ୍ରଣମତାମ୍ ।
ତ୍ଵଦୀଯଃ କାମାକ୍ଷି ଧ୍ରୁଵମଲଘୁଵହ୍ନିର୍ଭଵଵନେ
ମୁନୀନାଂ ଜ୍ଞାନାଗ୍ନେରରଣିରଯମଂଘିର୍ଵିଜଯତେ ॥80॥
ସମସ୍ତୈଃ ସଂସେଵ୍ଯଃ ସତତମପି କାମାକ୍ଷି ଵିବୁଧୈଃ
ସ୍ତୁତୋ ଗଂଧର୍ଵସ୍ତ୍ରୀସୁଲଲିତଵିପଂଚୀକଲରଵୈଃ ।
ଭଵତ୍ଯା ଭିଂଦାନୋ ଭଵଗିରିକୁଲଂ ଜୃଂଭିତତମୋ-
ବଲଦ୍ରୋହୀ ମାତଶ୍ଚରଣପୁରୁହୂତୋ ଵିଜଯତେ ॥81॥
ଵସଂତଂ ଭକ୍ତାନାମପି ମନସି ନିତ୍ଯଂ ପରିଲସଦ୍-
ଘନଚ୍ଛାଯାପୂର୍ଣଂ ଶୁଚିମପି ନୃଣାଂ ତାପଶମନମ୍ ।
ନଖେଂଦୁଜ୍ଯୋତ୍ସ୍ନାଭିଃ ଶିଶିରମପି ପଦ୍ମୋଦଯକରଂ
ନମାମଃ କାମାକ୍ଷ୍ଯାଶ୍ଚରଣମଧିକାଶ୍ଚର୍ଯକରଣମ୍ ॥82॥
କଵୀଂଦ୍ରାଣାଂ ନାନାଭଣିତିଗୁଣଚିତ୍ରୀକୃତଵଚଃ-
ପ୍ରପଂଚଵ୍ଯାପାରପ୍ରକଟନକଲାକୌଶଲନିଧିଃ ।
ଅଧଃକୁର୍ଵନ୍ନବ୍ଜଂ ସନକଭୃଗୁମୁଖ୍ଯୈର୍ମୁନିଜନୈଃ
ନମସ୍ଯଃ କାମାକ୍ଷ୍ଯାଶ୍ଚରଣପରମେଷ୍ଠୀ ଵିଜଯତେ ॥83॥
ଭଵତ୍ଯାଃ କାମାକ୍ଷି ସ୍ଫୁରିତପଦପଂକେରୁହଭୁଵାଂ
ପରାଗାଣାଂ ପୂରୈଃ ପରିହୃତକଲଂକଵ୍ଯତିକରୈଃ ।
ନତାନାମାମୃଷ୍ଟେ ହୃଦଯମୁକୁରେ ନିର୍ମଲରୁଚି
ପ୍ରସନ୍ନେ ନିଶ୍ଶେଷଂ ପ୍ରତିଫଲତି ଵିଶ୍ଵଂ ଗିରିସୁତେ ॥84॥
ତଵ ତ୍ରସ୍ତଂ ପାଦାତ୍କିସଲଯମରଣ୍ଯାଂତରମଗାତ୍
ପରଂ ରେଖାରୂପଂ କମଲମମୁମେଵାଶ୍ରିତମଭୂତ୍ ।
ଜିତାନାଂ କାମାକ୍ଷି ଦ୍ଵିତଯମପି ଯୁକ୍ତଂ ପରିଭଵେ
ଵିଦେଶେ ଵାସୋ ଵା ଶରଣଗମନଂ ଵା ନିଜରିପୋଃ ॥85॥
ଗୃହୀତ୍ଵା ଯାଥାର୍ଥ୍ଯଂ ନିଗମଵଚସାଂ ଦେଶିକକୃପା-
କଟାକ୍ଷର୍କଜ୍ଯୋତିଶ୍ଶମିତମମତାବଂଧତମସଃ ।
ଯତଂତେ କାମାକ୍ଷି ପ୍ରତିଦିଵସମଂତର୍ଦ୍ରଢଯିତୁଂ
ତ୍ଵଦୀଯଂ ପାଦାବ୍ଜଂ ସୁକୃତପରିପାକେନ ସୁଜନାଃ ॥86॥
ଜଡାନାମପ୍ଯଂବ ସ୍ମରଣସମଯେ ତଵଚ୍ଚରଣଯୋଃ
ଭ୍ରମନ୍ମଂଥକ୍ଷ୍ମାଭୃଦ୍ଧୁମୁଘୁମିତସିଂଧୁପ୍ରତିଭଟାଃ ।
ପ୍ରସନ୍ନାଃ କାମାକ୍ଷି ପ୍ରସଭମଧରସ୍ପଂଦନକରା
ଭଵଂତି ସ୍ଵଚ୍ଛଂଦଂ ପ୍ରକୃତିପରିପକ୍କା ଭଣିତଯଃ ॥87॥
ଵହନ୍ନପ୍ଯଶ୍ରାଂତଂ ମଧୁରନିନଦଂ ହଂସକମସୌ
ତମେଵାଧଃ କର୍ତୁଂ କିମିଵ ଯତତେ କେଲିଗମନେ ।
ଭଵସ୍ଯୈଵାନଂଦଂ ଵିଦଧଦପି କାମାକ୍ଷି ଚରଣୋ
ଭଵତ୍ଯାସ୍ତଦ୍ଦ୍ରୋହଂ ଭଗଵତି କିମେଵଂ ଵିତନୁତେ ॥88॥
ଯଦତ୍ଯଂତଂ ତାମ୍ଯତ୍ଯଲସଗତିଵାର୍ତାସ୍ଵପି ଶିଵେ
ତଦେତତ୍କାମାକ୍ଷି ପ୍ରକୃତିମୃଦୁଲଂ ତେ ପଦଯୁଗମ୍ ।
କିରୀଟୈଃ ସଂଘଟ୍ଟଂ କଥମିଵ ସୁରୌଘସ୍ଯ ସହତେ
ମୁନୀଂଦ୍ରାଣାମାସ୍ତେ ମନସି ଚ କଥଂ ସୂଚିନିଶିତେ ॥89॥
ମନୋରଂଗେ ମତ୍କେ ଵିବୁଧଜନସଂମୋଦଜନନୀ
ସରାଗଵ୍ଯାସଂଗଂ ସରସମୃଦୁସଂଚାରସୁଭଗା ।
ମନୋଜ୍ଞା କାମାକ୍ଷି ପ୍ରକଟଯତୁ ଲାସ୍ଯପ୍ରକରଣଂ
ରଣନ୍ମଂଜୀରା ତେ ଚରଣଯୁଗଲୀନର୍ତକଵଧୂଃ ॥90॥
ପରିଷ୍କୁର୍ଵନ୍ମାତଃ ପଶୁପତିକପର୍ଦଂ ଚରଣରାଟ୍
ପରାଚାଂ ହୃତ୍ପଦ୍ମଂ ପରମଭଣିତୀନାଂ ଚ ମକୁଟମ୍ ।
ଭଵାଖ୍ଯେ ପାଥୋଧୌ ପରିହରତୁ କାମାକ୍ଷି ମମତା-
ପରାଧୀନତ୍ଵଂ ମେ ପରିମୁଷିତପାଥୋଜମହିମା ॥91॥
ପ୍ରସୂନୈଃ ସଂପର୍କାଦମରତରୁଣୀକୁଂତଲଭଵୈଃ
ଅଭୀଷ୍ଟାନାଂ ଦାନାଦନିଶମପି କାମାକ୍ଷି ନମତାମ୍ ।
ସ୍ଵସଂଗାତ୍କଂକେଲିପ୍ରସଵଜନକତ୍ଵେନ ଚ ଶିଵେ
ତ୍ରିଧା ଧତ୍ତେ ଵାର୍ତାଂ ସୁରଭିରିତି ପାଦୋ ଗିରିସୁତେ ॥92॥
ମହାମୋହସ୍ତେନଵ୍ଯତିକରଭଯାତ୍ପାଲଯତି ଯୋ
ଵିନିକ୍ଷିପ୍ତଂ ସ୍ଵସ୍ମିନ୍ନିଜଜନମନୋରତ୍ନମନିଶମ୍ ।
ସ ରାଗସ୍ଯୋଦ୍ରେକାତ୍ସତତମପି କାମାକ୍ଷି ତରସା
କିମେଵଂ ପାଦୋଽସୌ କିସଲଯରୁଚିଂ ଚୋରଯତି ତେ ॥93॥
ସଦା ସ୍ଵାଦୁଂକାରଂ ଵିଷଯଲହରୀଶାଲିକଣିକାଂ
ସମାସ୍ଵାଦ୍ଯ ଶ୍ରାଂତଂ ହୃଦଯଶୁକପୋତଂ ଜନନି ମେ ।
କୃପାଜାଲେ ଫାଲେକ୍ଷଣମହିଷି କାମାକ୍ଷି ରଭସାତ୍
ଗୃହୀତ୍ଵା ରୁଂଧୀଥାରସ୍ତଵ ପଦଯୁଗୀପଂଜରପୁଟେ ॥94॥
ଧୁନାନଂ କାମାକ୍ଷି ସ୍ମରଣଲଵମାତ୍ରେଣ ଜଡିମ-
ଜ୍ଵରପ୍ରୌଢିଂ ଗୂଢସ୍ଥିତି ନିଗମନୈକୁଂଜକୁହରେ ।
ଅଲଭ୍ଯଂ ସର୍ଵେଷାଂ କତିଚନ ଲଭଂତେ ସୁକୃତିନଃ
ଚିରାଦନ୍ଵିଷ୍ଯଂତସ୍ତଵ ଚରଣସିଦ୍ଧୌଷଧମିଦମ୍ ॥95॥
ରଣନ୍ମଂଜୀରାଭ୍ଯାଂ ଲଲିତଗମନାଭ୍ଯାଂ ସୁକୃତିନାଂ
ମନୋଵାସ୍ତଵ୍ଯାଭ୍ଯାଂ ମଥିତତିମିରାଭ୍ଯାଂ ନଖରୁଚା ।
ନିଧେଯାଭ୍ଯାଂ ପତ୍ଯା ନିଜଶିରସି କାମାକ୍ଷି ସତତଂ
ନମସ୍ତେ ପାଦାଭ୍ଯାଂ ନଲିନମୃଦୁଲାଭ୍ଯାଂ ଗିରିସୁତେ ॥96॥
ସୁରାଗେ ରାକେଂଦୁପ୍ରତିନିଧିମୁଖେ ପର୍ଵତସୁତେ
ଚିରାଲ୍ଲଭ୍ଯେ ଭକ୍ତ୍ଯା ଶମଧନଜନାନାଂ ପରିଷଦା ।
ମନୋଭୃଂଗୋ ମତ୍କଃ ପଦକମଲଯୁଗ୍ମେ ଜନନି ତେ
ପ୍ରକାମଂ କାମାକ୍ଷି ତ୍ରିପୁରହରଵାମାକ୍ଷି ରମତାମ୍ ॥97॥
ଶିଵେ ସଂଵିଦ୍ରୂପେ ଶଶିଶକଲଚୂଡପ୍ରିଯତମେ
ଶନୈର୍ଗତ୍ଯାଗତ୍ଯା ଜିତସୁରଵରେଭେ ଗିରିସୁତେ ।
ଯତଂତେ ସଂତସ୍ତେ ଚରଣନଲିନାଲାନଯୁଗଲେ
ସଦା ବଦ୍ଧଂ ଚିତ୍ତପ୍ରମଦକରିଯୂଥଂ ଦୃଢତରମ୍ ॥98॥
ଯଶଃ ସୂତେ ମାତର୍ମଧୁରକଵିତାଂ ପକ୍ଷ୍ମଲଯତେ
ଶ୍ରିଯଂ ଦତ୍ତେ ଚିତ୍ତେ କମପି ପରିପାକଂ ପ୍ରଥଯତେ ।
ସତାଂ ପାଶଗ୍ରଂଥିଂ ଶିଥିଲଯତି କିଂ କିଂ ନ କୁରୁତେ
ପ୍ରପନ୍ନେ କାମାକ୍ଷ୍ଯାଃ ପ୍ରଣତିପରିପାଟୀ ଚରଣଯୋଃ ॥99॥
ମନୀଷାଂ ମାହେଂଦ୍ରୀଂ କକୁଭମିଵ ତେ କାମପି ଦଶାଂ
ପ୍ରଧତ୍ତେ କାମାକ୍ଷ୍ଯାଶ୍ଚରଣତରୁଣାଦିତ୍ଯକିରଣଃ ।
ଯଦୀଯେ ସଂପର୍କେ ଧୃତରସମରଂଦା କଵଯତାଂ
ପରୀପାକଂ ଧତ୍ତେ ପରିମଲଵତୀ ସୂକ୍ତିନଲିନୀ ॥100॥
ପୁରା ମାରାରାତିଃ ପୁରମଜଯଦଂବ ସ୍ତଵଶତୈଃ
ପ୍ରସନ୍ନାଯାଂ ସତ୍ଯାଂ ତ୍ଵଯି ତୁହିନଶୈଲେଂଦ୍ରତନଯେ ।
ଅତସ୍ତେ କାମାକ୍ଷି ସ୍ଫୁରତୁ ତରସା କାଲସମଯେ
ସମାଯାତେ ମାତର୍ମମ ମନସି ପାଦାବ୍ଜଯୁଗଲମ୍ ॥101॥
ପଦଦ୍ଵଂଦ୍ଵଂ ମଂଦଂ ଗତିଷୁ ନିଵସଂତଂ ହୃଦି ସତାଂ
ଗିରାମଂତେ ଭ୍ରାଂତଂ କୃତକରହିତାନାଂ ପରିବୃଢେ ।
ଜନାନାମାନଂଦଂ ଜନନି ଜନଯଂତଂ ପ୍ରଣମତାଂ
ତ୍ଵଦୀଯଂ କାମାକ୍ଷି ପ୍ରତିଦିନମହଂ ନୌମି ଵିମଲମ୍ ॥102॥
ଇଦଂ ଯଃ କାମାକ୍ଷ୍ଯାଶ୍ଚରଣନଲିନସ୍ତୋତ୍ରଶତକଂ
ଜପେନ୍ନିତ୍ଯଂ ଭକ୍ତ୍ଯା ନିଖିଲଜଗଦାହ୍ଲାଦଜନକମ୍ ।
ସ ଵିଶ୍ଵେଷାଂ ଵଂଦ୍ଯଃ ସକଲକଵିଲୋକୈକତିଲକଃ
ଚିରଂ ଭୁକ୍ତ୍ଵା ଭୋଗାନ୍ପରିଣମତି ଚିଦ୍ରୂପକଲଯା ॥103॥
॥ ଇତି ପାଦାରଵିଂଦଶତକଂ ସଂପୂର୍ଣମ୍ ॥
Browse Related Categories:
