(ଶ୍ରୀଦେଵୀଭାଗଵତଂ, ଦ୍ଵାଦଶ ସ୍କଂଧଂ, ଦ୍ଵାଦଶୋଽଧ୍ଯାଯଃ, ମଣିଦ୍ଵୀପ ଵର୍ଣନ - 3)
ଵ୍ଯାସ ଉଵାଚ ।
ତଦେଵ ଦେଵୀସଦନଂ ମଧ୍ଯଭାଗେ ଵିରାଜତେ ।
ସହସ୍ର ସ୍ତଂଭସଂଯୁକ୍ତାଶ୍ଚତ୍ଵାରସ୍ତେଷୁ ମଂଡପାଃ ॥ 1 ॥
ଶୃଂଗାରମଂଡପଶ୍ଚୈକୋ ମୁକ୍ତିମଂଡପ ଏଵ ଚ ।
ଜ୍ଞାନମଂଡପ ସଂଜ୍ଞସ୍ତୁ ତୃତୀଯଃ ପରିକୀର୍ତିତଃ ॥ 2 ॥
ଏକାଂତମଂଡପଶ୍ଚୈଵ ଚତୁର୍ଥଃ ପରିକୀର୍ତିତଃ ।
ନାନା ଵିତାନସଂଯୁକ୍ତା ନାନା ଧୂପୈସ୍ତୁ ଧୂପିତାଃ ॥ 3 ॥
କୋଟିସୂର୍ଯସମାଃ କାଂତ୍ଯା ଭ୍ରାଂଜଂତେ ମଂଡପାଃ ଶୁଭାଃ ।
ତନ୍ମଂଡପାନାଂ ପରିତଃ କାଶ୍ମୀରଵନିକା ସ୍ମୃତା ॥ 4 ॥
ମଲ୍ଲିକାକୁଂଦଵନିକା ଯତ୍ର ପୁଷ୍କଲକାଃ ସ୍ଥିତାଃ ।
ଅସଂଖ୍ଯାତା ମୃଗମଦୈଃ ପୂରିତାସ୍ତତ୍ସ୍ରଵା ନୃପ ॥ 5 ॥
ମହାପଦ୍ମାଟଵୀ ତଦ୍ଵଦ୍ରତ୍ନସୋପାନନିର୍ମିତା ।
ସୁଧାରସେନସଂପୂର୍ଣା ଗୁଂଜନ୍ମତ୍ତମଧୁଵ୍ରତା ॥ 6 ॥
ହଂସକାରଂଡଵାକୀର୍ଣା ଗଂଧପୂରିତ ଦିକ୍ତଟା ।
ଵନିକାନାଂ ସୁଗଂଧୈସ୍ତୁ ମଣିଦ୍ଵୀପଂ ସୁଵାସିତମ୍ ॥ 7 ॥
ଶୃଂଗାରମଂଡପେ ଦେଵ୍ଯୋ ଗାଯଂତି ଵିଵିଧୈଃ ସ୍ଵରୈଃ ।
ସଭାସଦୋ ଦେଵଵଶା ମଧ୍ଯେ ଶ୍ରୀଜଗଦଂବିକା ॥ 8 ॥
ମୁକ୍ତିମଂଡପମଧ୍ଯେ ତୁ ମୋଚଯତ୍ଯନିଶଂ ଶିଵା ।
ଜ୍ଞାନୋପଦେଶଂ କୁରୁତେ ତୃତୀଯେ ନୃପ ମଂଡପେ ॥ 9 ॥
ଚତୁର୍ଥମଂଡପେ ଚୈଵ ଜଗଦ୍ରକ୍ଷା ଵିଚିଂତନମ୍ ।
ମଂତ୍ରିଣୀ ସହିତା ନିତ୍ଯଂ କରୋତି ଜଗଦଂବିକା ॥ 10 ॥
ଚିଂତାମଣିଗୃହେ ରାଜଂଛକ୍ତି ତତ୍ତ୍ଵାତ୍ମକୈଃ ପରୈଃ ।
ସୋପାନୈର୍ଦଶଭିର୍ଯୁକ୍ତୋ ମଂଚକୋପ୍ଯଧିରାଜତେ ॥ 11 ॥
ବ୍ରହ୍ମା ଵିଷ୍ଣୁଶ୍ଚ ରୁଦ୍ରଶ୍ଚ ଈଶ୍ଵରଶ୍ଚ ସଦାଶିଵଃ ।
ଏତେ ମଂଚଖୁରାଃ ପ୍ରୋକ୍ତାଃ ଫଲକସ୍ତୁ ସଦାଶିଵଃ ॥ 12 ॥
ତସ୍ଯୋପରି ମହାଦେଵୋ ଭୁଵନେଶୋ ଵିରାଜତେ ।
ଯା ଦେଵୀ ନିଜଲୀଲାର୍ଥଂ ଦ୍ଵିଧାଭୂତା ବଭୂଵହ ॥ 13 ॥
ସୃଷ୍ଟ୍ଯାଦୌ ତୁ ସ ଏଵାଯଂ ତଦର୍ଧାଂଗୋ ମହେଶ୍ଵରଃ ।
କଂଦର୍ପ ଦର୍ପନାଶୋଦ୍ଯତ୍କୋଟି କଂଦର୍ପସୁଂଦରଃ ॥ 14 ॥
ପଂଚଵକ୍ତ୍ରସ୍ତ୍ରିନେତ୍ରଶ୍ଚ ମଣିଭୂଷଣ ଭୂଷିତଃ ।
ହରିଣାଭୀତିପରଶୂନ୍ଵରଂ ଚ ନିଜବାହୁଭିଃ ॥ 15 ॥
ଦଧାନଃ ଷୋଡଶାବ୍ଦୋଽସୌ ଦେଵଃ ସର୍ଵେଶ୍ଵରୋ ମହାନ୍ ।
କୋଟିସୂର୍ଯ ପ୍ରତୀକାଶଶ୍ଚଂଦ୍ରକୋଟି ସୁଶୀତଲଃ ॥ 16 ॥
ଶୁଦ୍ଧସ୍ଫଟିକ ସଂକାଶସ୍ତ୍ରିନେତ୍ରଃ ଶୀତଲ ଦ୍ଯୁତିଃ ।
ଵାମାଂକେ ସନ୍ନିଷଣ୍ଣାଽସ୍ଯ ଦେଵୀ ଶ୍ରୀଭୁଵନେଶ୍ଵରୀ ॥ 17 ॥
ନଵରତ୍ନଗଣାକୀର୍ଣ କାଂଚୀଦାମ ଵିରାଜିତା ।
ତପ୍ତକାଂଚନସନ୍ନଦ୍ଧ ଵୈଦୂର୍ଯାଂଗଦଭୂଷଣା ॥ 18 ॥
କନଚ୍ଛ୍ରୀଚକ୍ରତାଟଂକ ଵିଟଂକ ଵଦନାଂବୁଜା ।
ଲଲାଟକାଂତି ଵିଭଵ ଵିଜିତାର୍ଧସୁଧାକରା ॥ 19 ॥
ବିଂବକାଂତି ତିରସ୍କାରିରଦଚ୍ଛଦ ଵିରାଜିତା ।
ଲସତ୍କୁଂକୁମକସ୍ତୂରୀତିଲକୋଦ୍ଭାସିତାନନା ॥ 20 ॥
ଦିଵ୍ଯ ଚୂଡାମଣି ସ୍ଫାର ଚଂଚଚ୍ଚଂଦ୍ରକସୂର୍ଯକା ।
ଉଦ୍ଯତ୍କଵିସମସ୍ଵଚ୍ଛ ନାସାଭରଣ ଭାସୁରା ॥ 21 ॥
ଚିଂତାକଲଂବିତସ୍ଵଚ୍ଛ ମୁକ୍ତାଗୁଚ୍ଛ ଵିରାଜିତା ।
ପାଟୀର ପଂକ କର୍ପୂର କୁଂକୁମାଲଂକୃତ ସ୍ତନୀ ॥ 22 ॥
ଵିଚିତ୍ର ଵିଵିଧା କଲ୍ପା କଂବୁସଂକାଶ କଂଧରା ।
ଦାଡିମୀଫଲବୀଜାଭ ଦଂତପଂକ୍ତି ଵିରାଜିତା ॥ 23 ॥
ଅନର୍ଘ୍ଯ ରତ୍ନଘଟିତ ମୁକୁଟାଂଚିତ ମସ୍ତକା ।
ମତ୍ତାଲିମାଲାଵିଲସଦଲକାଢ୍ଯ ମୁଖାଂବୁଜା ॥ 24 ॥
କଳଂକକାର୍ଶ୍ଯନିର୍ମୁକ୍ତ ଶରଚ୍ଚଂଦ୍ରନିଭାନନା ।
ଜାହ୍ନଵୀସଲିଲାଵର୍ତ ଶୋଭିନାଭିଵିଭୂଷିତା ॥ 25 ॥
ମାଣିକ୍ଯ ଶକଲାବଦ୍ଧ ମୁଦ୍ରିକାଂଗୁଳିଭୂଷିତା ।
ପୁଂଡରୀକଦଲାକାର ନଯନତ୍ରଯସୁଂଦରୀ ॥ 26 ॥
କଲ୍ପିତାଚ୍ଛ ମହାରାଗ ପଦ୍ମରାଗୋଜ୍ଜ୍ଵଲପ୍ରଭା ।
ରତ୍ନକିଂକିଣିକାଯୁକ୍ତ ରତ୍ନକଂକଣଶୋଭିତା ॥ 27 ॥
ମଣିମୁକ୍ତାସରାପାର ଲସତ୍ପଦକସଂତତିଃ ।
ରତ୍ନାଂଗୁଳିପ୍ରଵିତତ ପ୍ରଭାଜାଲଲସତ୍କରା ॥ 28 ॥
କଂଚୁକୀଗୁଂଫିତାପାର ନାନା ରତ୍ନତତିଦ୍ଯୁତିଃ ।
ମଲ୍ଲିକାମୋଦି ଧମ୍ମିଲ୍ଲ ମଲ୍ଲିକାଲିସରାଵୃତା ॥ 29 ॥
ସୁଵୃତ୍ତନିବିଡୋତ୍ତୁଂଗ କୁଚଭାରାଲସା ଶିଵା ।
ଵରପାଶାଂକୁଶାଭୀତି ଲସଦ୍ବାହୁ ଚତୁଷ୍ଟଯା ॥ 30 ॥
ସର୍ଵଶୃଂଗାରଵେଷାଢ୍ଯା ସୁକୁମାରାଂଗଵଲ୍ଲରୀ ।
ସୌଂଦର୍ଯଧାରାସର୍ଵସ୍ଵା ନିର୍ଵ୍ଯାଜକରୁଣାମଯୀ ॥ 31 ॥
ନିଜସଂଲାପମାଧୁର୍ଯ ଵିନିର୍ଭର୍ତ୍ସିତକଚ୍ଛପୀ ।
କୋଟିକୋଟିରଵୀଂଦୂନାଂ କାଂତିଂ ଯା ବିଭ୍ରତୀ ପରା ॥ 32 ॥
ନାନା ସଖୀଭିର୍ଦାସୀଭିସ୍ତଥା ଦେଵାଂଗନାଦିଭିଃ ।
ସର୍ଵାଭିର୍ଦେଵତାଭିସ୍ତୁ ସମଂତାତ୍ପରିଵେଷ୍ଟିତା ॥ 33 ॥
ଇଚ୍ଛାଶକ୍ତ୍ଯା ଜ୍ଞାନଶକ୍ତ୍ଯା କ୍ରିଯାଶକ୍ତ୍ଯା ସମନ୍ଵିତା ।
ଲଜ୍ଜା ତୁଷ୍ଟିସ୍ତଥା ପୁଷ୍ଟିଃ କୀର୍ତିଃ କାଂତିଃ କ୍ଷମା ଦଯା ॥ 34 ॥
ବୁଦ୍ଧିର୍ମେଧାସ୍ମୃତିର୍ଲକ୍ଷ୍ମୀର୍ମୂର୍ତିମତ୍ଯୋଂଗନାଃ ସ୍ମୃତାଃ ।
ଜଯା ଚ ଵିଜଯା ଚୈଵାପ୍ଯଜିତା ଚାପରାଜିତା ॥ 35 ॥
ନିତ୍ଯା ଵିଲାସିନୀ ଦୋଗ୍ଧ୍ରୀ ତ୍ଵଘୋରା ମଂଗଳା ନଵା ।
ପୀଠଶକ୍ତଯ ଏତାସ୍ତୁ ସେଵଂତେ ଯାଂ ପରାଂବିକାମ୍ ॥ 36 ॥
ଯସ୍ଯାସ୍ତୁ ପାର୍ଶ୍ଵଭାଗେସ୍ତୋନିଧୀତୌ ଶଂଖପଦ୍ମକୌ ।
ନଵରତ୍ନ ଵହାନଦ୍ଯସ୍ତଥା ଵୈ କାଂଚନସ୍ରଵାଃ ॥ 37 ॥
ସପ୍ତଧାତୁଵହାନଦ୍ଯୋ ନିଧିଭ୍ଯାଂ ତୁ ଵିନିର୍ଗତାଃ ।
ସୁଧାସିଂଧ୍ଵଂତଗାମିନ୍ଯସ୍ତାଃ ସର୍ଵା ନୃପସତ୍ତମ ॥ 38 ॥
ସା ଦେଵୀ ଭୁଵନେଶାନୀ ତଦ୍ଵାମାଂକେ ଵିରାଜତେ ।
ସର୍ଵେଶ ତ୍ଵଂ ମହେଶସ୍ଯ ଯତ୍ସଂଗା ଦେଵ ନାନ୍ଯଥା ॥ 39 ॥
ଚିଂତାମଣି ଗୃହସ୍ଯାଽସ୍ଯ ପ୍ରମାଣଂ ଶୃଣୁ ଭୂମିପ ।
ସହସ୍ରଯୋଜନାଯାମଂ ମହାଂତସ୍ତତ୍ପ୍ରଚକ୍ଷତେ ॥ 40 ॥
ତଦୁତ୍ତରେ ମହାଶାଲାଃ ପୂର୍ଵସ୍ମାଦ୍ ଦ୍ଵିଗୁଣାଃ ସ୍ମୃତାଃ ।
ଅଂତରିକ୍ଷଗତଂ ତ୍ଵେତନ୍ନିରାଧାରଂ ଵିରାଜତେ ॥ 41 ॥
ସଂକୋଚଶ୍ଚ ଵିକାଶଶ୍ଚ ଜାଯତେଽସ୍ଯ ନିରଂତରମ୍ ।
ପଟଵତ୍କାର୍ଯଵଶତଃ ପ୍ରଳଯେ ସର୍ଜନେ ତଥା ॥ 42 ॥
ଶାଲାନାଂ ଚୈଵ ସର୍ଵେଷାଂ ସର୍ଵକାଂତିପରାଵଧି ।
ଚିଂତାମଣିଗୃହଂ ପ୍ରୋକ୍ତଂ ଯତ୍ର ଦେଵୀ ମହୋମଯୀ ॥ 43 ॥
ଯେଯେ ଉପାସକାଃ ସଂତି ପ୍ରତିବ୍ରହ୍ମାଂଡଵର୍ତିନଃ ।
ଦେଵେଷୁ ନାଗଲୋକେଷୁ ମନୁଷ୍ଯେଷ୍ଵିତରେଷୁ ଚ ॥ 44 ॥
ଶ୍ରୀଦେଵ୍ଯାସ୍ତେ ଚ ସର୍ଵେପି ଵ୍ରଜଂତ୍ଯତ୍ରୈଵ ଭୂମିପ ।
ଦେଵୀକ୍ଷେତ୍ରେ ଯେ ତ୍ଯଜଂତି ପ୍ରାଣାଂଦେଵ୍ଯର୍ଚନେ ରତାଃ ॥ 45 ॥
ତେ ସର୍ଵେ ଯାଂତି ତତ୍ରୈଵ ଯତ୍ର ଦେଵୀ ମହୋତ୍ସଵା ।
ଘୃତକୁଲ୍ଯା ଦୁଗ୍ଧକୁଲ୍ଯା ଦଧିକୁଲ୍ଯା ମଧୁସ୍ରଵାଃ ॥ 46 ॥
ସ୍ଯଂଦଂତି ସରିତଃ ସର୍ଵାସ୍ତଥାମୃତଵହାଃ ପରାଃ ।
ଦ୍ରାକ୍ଷାରସଵହାଃ କାଶ୍ଚିଜ୍ଜଂବୂରସଵହାଃ ପରାଃ ॥ 47 ॥
ଆମ୍ରେକ୍ଷୁରସଵାହିନ୍ଯୋ ନଦ୍ଯସ୍ତାସ୍ତୁ ସହସ୍ରଶଃ ।
ମନୋରଥଫଲାଵୃକ୍ଷାଵାପ୍ଯଃ କୂପାସ୍ତଥୈଵ ଚ ॥ 48 ॥
ଯଥେଷ୍ଟପାନଫଲଦାନ ନ୍ଯୂନଂ କିଂଚିଦସ୍ତି ହି ।
ନ ରୋଗପଲିତଂ ଵାପି ଜରା ଵାପି କଦାଚନ ॥ 49 ॥
ନ ଚିଂତା ନ ଚ ମାତ୍ସର୍ଯଂ କାମକ୍ରୋଧାଦିକଂ ତଥା ।
ସର୍ଵେ ଯୁଵାନଃ ସସ୍ତ୍ରୀକାଃ ସହସ୍ରାଦିତ୍ଯଵର୍ଚସଃ ॥ 50 ॥
ଭଜଂତି ସତତଂ ଦେଵୀଂ ତତ୍ର ଶ୍ରୀଭୁଵନେଶ୍ଵରୀମ୍ ।
କେଚିତ୍ସଲୋକତାପନ୍ନାଃ କେଚିତ୍ସାମୀପ୍ଯତାଂ ଗତାଃ ॥ 51 ॥
ସରୂପତାଂ ଗତାଃ କେଚିତ୍ସାର୍ଷ୍ଟିତାଂ ଚ ପରେଗତାଃ ।
ଯାଯାସ୍ତୁ ଦେଵତାସ୍ତତ୍ର ପ୍ରତିବ୍ରହ୍ମାଂଡଵର୍ତିନାମ୍ ॥ 52 ॥
ସମଷ୍ଟଯଃ ସ୍ଥିତାସ୍ତାସ୍ତୁ ସେଵଂତେ ଜଗଦୀଶ୍ଵରୀମ୍ ।
ସପ୍ତକୋଟିମହାମଂତ୍ରା ମୂର୍ତିମଂତ ଉପାସତେ ॥ 53 ॥
ମହାଵିଦ୍ଯାଶ୍ଚ ସକଲାଃ ସାମ୍ଯାଵସ୍ଥାତ୍ମିକାଂ ଶିଵାମ୍ ।
କାରଣବ୍ରହ୍ମରୂପାଂ ତାଂ ମାଯା ଶବଲଵିଗ୍ରହାମ୍ ॥ 54 ॥
ଇତ୍ଥଂ ରାଜନ୍ମଯା ପ୍ରୋକ୍ତଂ ମଣିଦ୍ଵୀପଂ ମହତ୍ତରମ୍ ।
ନ ସୂର୍ଯଚଂଦ୍ରୌ ନୋ ଵିଦ୍ଯୁତ୍କୋଟଯୋଗ୍ନିସ୍ତଥୈଵ ଚ ॥ 55 ॥
ଏତସ୍ଯ ଭାସା କୋଟ୍ଯଂଶ କୋଟ୍ଯଂଶୋ ନାପି ତେ ସମାଃ ।
କ୍ଵଚିଦ୍ଵିଦ୍ରୁମସଂକାଶଂ କ୍ଵଚିନ୍ମରକତଚ୍ଛଵି ॥ 56 ॥
ଵିଦ୍ଯୁଦ୍ଭାନୁସମଚ୍ଛାଯଂ ମଧ୍ଯସୂର୍ଯସମଂ କ୍ଵଚିତ୍ ।
ଵିଦ୍ଯୁତ୍କୋଟିମହାଧାରା ସାରକାଂତିତତଂ କ୍ଵଚିତ୍ ॥ 57 ॥
କ୍ଵଚିତ୍ସିଂଦୂର ନୀଲେଂଦ୍ରଂ ମାଣିକ୍ଯ ସଦୃଶଚ୍ଛଵି ।
ହୀରସାର ମହାଗର୍ଭ ଧଗଦ୍ଧଗିତ ଦିକ୍ତଟମ୍ ॥ 58 ॥
କାଂତ୍ଯା ଦାଵାନଲସମଂ ତପ୍ତକାଂଚନ ସନ୍ନିଭମ୍ ।
କ୍ଵଚିଚ୍ଚଂଦ୍ରୋପଲୋଦ୍ଗାରଂ ସୂର୍ଯୋଦ୍ଗାରଂ ଚ କୁତ୍ର ଚିତ୍ ॥ 59 ॥
ରତ୍ନଶୃଂଗି ସମାଯୁକ୍ତଂ ରତ୍ନପ୍ରାକାର ଗୋପୁରମ୍ ।
ରତ୍ନପତ୍ରୈ ରତ୍ନଫଲୈର୍ଵୃକ୍ଷୈଶ୍ଚ ପରିମଂଡିତମ୍ ॥ 60 ॥
ନୃତ୍ଯନ୍ମଯୂରସଂଘୈଶ୍ଚ କପୋତରଣିତୋଜ୍ଜ୍ଵଲମ୍ ।
କୋକିଲାକାକଲୀଲାପୈଃ ଶୁକଲାପୈଶ୍ଚ ଶୋଭିତମ୍ ॥ 61 ॥
ସୁରମ୍ଯ ରମଣୀଯାଂବୁ ଲକ୍ଷାଵଧି ସରୋଵୃତମ୍ ।
ତନ୍ମଧ୍ଯଭାଗ ଵିଲସଦ୍ଵିକଚଦ୍ରତ୍ନ ପଂକଜୈଃ ॥ 62 ॥
ସୁଗଂଧିଭିଃ ସମଂତାତ୍ତୁ ଵାସିତଂ ଶତଯୋଜନମ୍ ।
ମଂଦମାରୁତ ସଂଭିନ୍ନ ଚଲଦ୍ଦ୍ରୁମ ସମାକୁଲମ୍ ॥ 63 ॥
ଚିଂତାମଣି ସମୂହାନାଂ ଜ୍ଯୋତିଷା ଵିତତାଂବରମ୍ ।
ରତ୍ନପ୍ରଭାଭିରଭିତୋ ଧଗଦ୍ଧଗିତ ଦିକ୍ତଟମ୍ ॥ 64 ॥
ଵୃକ୍ଷଵ୍ରାତ ମହାଗଂଧଵାତଵ୍ରାତ ସୁପୂରିତମ୍ ।
ଧୂପଧୂପାଯିତଂ ରାଜନ୍ମଣିଦୀପାଯୁତୋଜ୍ଜ୍ଵଲମ୍ ॥ 65 ॥
ମଣିଜାଲକ ସଚ୍ଛିଦ୍ର ତରଲୋଦରକାଂତିଭିଃ ।
ଦିଙ୍ମୋହଜନକଂ ଚୈତଦ୍ଦର୍ପଣୋଦର ସଂଯୁତମ୍ ॥ 66 ॥
ଐଶ୍ଵର୍ଯସ୍ଯ ସମଗ୍ରସ୍ଯ ଶୃଂଗାରସ୍ଯାଖିଲସ୍ଯ ଚ ।
ସର୍ଵଜ୍ଞତାଯାଃ ସର୍ଵାଯାସ୍ତେଜସଶ୍ଚାଖିଲସ୍ଯ ଚ ॥ 67 ॥
ପରାକ୍ରମସ୍ଯ ସର୍ଵସ୍ଯ ସର୍ଵୋତ୍ତମଗୁଣସ୍ଯ ଚ ।
ସକଲା ଯା ଦଯାଯାଶ୍ଚ ସମାପ୍ତିରିହ ଭୂପତେ ॥ 68 ॥
ରାଜ୍ଞ ଆନଂଦମାରଭ୍ଯ ବ୍ରହ୍ମଲୋକାଂତ ଭୂମିଷୁ ।
ଆନଂଦା ଯେ ସ୍ଥିତାଃ ସର୍ଵେ ତେଽତ୍ରୈଵାଂତର୍ଭଵଂତି ହି ॥ 69 ॥
ଇତି ତେ ଵର୍ଣିତଂ ରାଜନ୍ମଣିଦ୍ଵୀପଂ ମହତ୍ତରମ୍ ।
ମହାଦେଵ୍ଯାଃ ପରଂସ୍ଥାନଂ ସର୍ଵଲୋକୋତ୍ତମୋତ୍ତମମ୍ ॥ 70 ॥
ଏତସ୍ଯ ସ୍ମରଣାତ୍ସଦ୍ଯଃ ସର୍ଵପାପଂ ଵିନଶ୍ଯତି ।
ପ୍ରାଣୋତ୍କ୍ରମଣସଂଧୌ ତୁ ସ୍ମୃତ୍ଵା ତତ୍ରୈଵ ଗଚ୍ଛତି ॥ 71 ॥
ଅଧ୍ଯାଯ ପଂଚକଂ ତ୍ଵେତତ୍ପଠେନ୍ନିତ୍ଯଂ ସମାହିତଃ ।
ଭୂତପ୍ରେତପିଶାଚାଦି ବାଧା ତତ୍ର ଭଵେନ୍ନ ହି ॥ 72 ॥
ନଵୀନ ଗୃହ ନିର୍ମାଣେ ଵାସ୍ତୁଯାଗେ ତଥୈଵ ଚ ।
ପଠିତଵ୍ଯଂ ପ୍ରଯତ୍ନେନ କଲ୍ଯାଣଂ ତେନ ଜାଯତେ ॥ 73 ॥
ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କଂଧେ ଦ୍ଵାଦଶୋଧ୍ଯାଯଃ ॥
Browse Related Categories:
