(ଶ୍ରୀଦେଵୀଭାଗଵତଂ, ଦ୍ଵାଦଶ ସ୍କଂଧଂ, ଏକାଦଶୋଽଧ୍ଯାଯଃ, ମଣିଦ୍ଵୀପ ଵର୍ଣନ - 2)
ଵ୍ଯାସ ଉଵାଚ ।
ପୁଷ୍ପରାଗମଯାଦଗ୍ରେ କୁଂକୁମାରୁଣଵିଗ୍ରହଃ ।
ପଦ୍ମରାଗମଯଃ ସାଲୋ ମଧ୍ଯେ ଭୂଶ୍ଚୈଵତାଦୃଶୀ ॥ 1 ॥
ଦଶଯୋଜନଵାଂଦୈର୍ଘ୍ଯେ ଗୋପୁରଦ୍ଵାରସଂଯୁତଃ ।
ତନ୍ମଣିସ୍ତଂଭସଂଯୁକ୍ତା ମଂଡପାଃ ଶତଶୋ ନୃପ ॥ 2 ॥
ମଧ୍ଯେ ଭୁଵିସମାସୀନାଶ୍ଚତୁଃଷଷ୍ଟିମିତାଃ କଲାଃ ।
ନାନାଯୁଧଧରାଵୀରା ରତ୍ନଭୂଷଣଭୂଷିତାଃ ॥ 3 ॥
ପ୍ରତ୍ଯେକଲୋକସ୍ତାସାଂ ତୁ ତତ୍ତଲ୍ଲୋକସ୍ଯନାଯକାଃ ।
ସମଂତାତ୍ପଦ୍ମରାଗସ୍ଯ ପରିଵାର୍ଯସ୍ଥିତାଃ ସଦା ॥ 4 ॥
ସ୍ଵସ୍ଵଲୋକଜନୈର୍ଜୁଷ୍ଟାଃ ସ୍ଵସ୍ଵଵାହନହେତିଭିଃ ।
ତାସାଂ ନାମାନି ଵକ୍ଷ୍ଯାମି ଶୃଣୁ ତ୍ଵଂ ଜନମେଜଯ ॥ 5 ॥
ପିଂଗଳାକ୍ଷୀ ଵିଶାଲାକ୍ଷୀ ସମୃଦ୍ଧି ଵୃଦ୍ଧିରେଵ ଚ ।
ଶ୍ରଦ୍ଧା ସ୍ଵାହା ସ୍ଵଧାଭିଖ୍ଯା ମାଯା ସଂଜ୍ଞା ଵସୁଂଧରା ॥ 6 ॥
ତ୍ରିଲୋକଧାତ୍ରୀ ସାଵିତ୍ରୀ ଗାଯତ୍ରୀ ତ୍ରିଦଶେଶ୍ଵରୀ ।
ସୁରୂପା ବହୁରୂପା ଚ ସ୍କଂଦମାତାଽଚ୍ଯୁତପ୍ରିଯା ॥ 7 ॥
ଵିମଲା ଚାମଲା ତଦ୍ଵଦରୁଣୀ ପୁନରାରୁଣୀ ।
ପ୍ରକୃତିର୍ଵିକୃତିଃ ସୃଷ୍ଟିଃ ସ୍ଥିତିଃ ସଂହୃତିରେଵ ଚ ॥ 8 ॥
ସଂଧ୍ଯାମାତା ସତୀ ହଂସୀ ମର୍ଦିକା ଵଜ୍ରିକା ପରା ।
ଦେଵମାତା ଭଗଵତୀ ଦେଵକୀ କମଲାସନା ॥ 9 ॥
ତ୍ରିମୁଖୀ ସପ୍ତମୁଖ୍ଯନ୍ଯା ସୁରାସୁରଵିମର୍ଦିନୀ ।
ଲଂବୋଷ୍ଟୀ ଚୋର୍ଧ୍ଵକେଶୀ ଚ ବହୁଶୀର୍ଷା ଵୃକୋଦରୀ ॥ 10 ॥
ରଥରେଖାହ୍ଵଯା ପଶ୍ଚାଚ୍ଛଶିରେଖା ତଥା ପରା ।
ଗଗନଵେଗା ପଵନଵେଗା ଚୈଵ ତତଃ ପରମ୍ ॥ 11 ॥
ଅଗ୍ରେ ଭୁଵନପାଲା ସ୍ଯାତ୍ତତ୍ପଶ୍ଚାନ୍ମଦନାତୁରା ।
ଅନଂଗାନଂଗମଥନା ତଥୈଵାନଂଗମେଖଲା ॥ 12 ॥
ଅନଂଗକୁସୁମା ପଶ୍ଚାଦ୍ଵିଶ୍ଵରୂପା ସୁରାଦିକା ।
କ୍ଷଯଂକରୀ ଭଵେଚ୍ଛକ୍ତି ରକ୍ଷୋଭ୍ଯା ଚ ତତଃ ପରମ୍ ॥ 13 ॥
ସତ୍ଯଵାଦିନ୍ଯଥ ପ୍ରୋକ୍ତା ବହୁରୂପା ଶୁଚିଵ୍ରତା ।
ଉଦାରାଖ୍ଯା ଚ ଵାଗୀଶୀ ଚତୁଷ୍ଷଷ୍ଟିମିତାଃ ସ୍ମୃତାଃ ॥ 14 ॥
ଜ୍ଵଲଜ୍ଜିହ୍ଵାନନାଃ ସର୍ଵାଵମଂତ୍ଯୋ ଵହ୍ନିମୁଲ୍ବଣମ୍ ।
ଜଲଂ ପିବାମଃ ସକଲଂ ସଂହରାମୋଵିଭାଵସୁମ୍ ॥ 15 ॥
ପଵନଂ ସ୍ତଂଭଯାମୋଦ୍ଯ ଭକ୍ଷଯାମୋଽଖିଲଂ ଜଗତ୍ ।
ଇତି ଵାଚଂ ସଂଗିରତେ କ୍ରୋଧ ସଂରକ୍ତଲୋଚନାଃ ॥ 16 ॥
ଚାପବାଣଧରାଃ ସର୍ଵାଯୁଦ୍ଧାଯୈଵୋତ୍ସୁକାଃ ସଦା ।
ଦଂଷ୍ଟ୍ରା କଟକଟାରାଵୈର୍ବଧିରୀକୃତ ଦିଙ୍ମୁଖାଃ ॥ 17 ॥
ପିଂଗୋର୍ଧ୍ଵକେଶ୍ଯଃ ସଂପ୍ରୋକ୍ତାଶ୍ଚାପବାଣକରାଃ ସଦା ।
ଶତାକ୍ଷୌହିଣିକା ସେନାପ୍ଯେକୈକସ୍ଯାଃ ପ୍ରକୀର୍ତିତା ॥ 18 ॥
ଏକୈକ ଶକ୍ତେଃ ସାମର୍ଥ୍ଯଂ ଲକ୍ଷବ୍ରହ୍ମାଂଡନାଶନେ ।
ଶତାକ୍ଷୌହିଣିକାସେନା ତାଦୃଶୀ ନୃପ ସତ୍ତମ ॥ 19 ॥
କିଂ ନ କୁର୍ଯାଜ୍ଜଗତ୍ଯସ୍ମିନ୍ନଶକ୍ଯଂ ଵକ୍ତୁମେଵ ତତ୍ ।
ସର୍ଵାପି ଯୁଦ୍ଧସାମଗ୍ରୀ ତସ୍ମିନ୍ସାଲେ ସ୍ଥିତା ମୁନେ ॥ 20 ॥
ରଥାନାଂ ଗଣନା ନାସ୍ତି ହଯାନାଂ କରିଣାଂ ତଥା ॥
ଶସ୍ତ୍ରାଣାଂ ଗଣନା ତଦ୍ଵଦ୍ଗଣାନାଂ ଗଣନା ତଥା ॥ 21 ॥
ପଦ୍ମରାଗମଯାଦଗ୍ରେ ଗୋମେଦମଣିନିର୍ମିତଃ ।
ଦଶଯୋଜନଦୈର୍ଘ୍ଯେଣ ପ୍ରାକାରୋ ଵର୍ତତେ ମହାନ୍ ॥ 22 ॥
ଭାସ୍ଵଜ୍ଜପାପ୍ରସୂନାଭୋ ମଧ୍ଯଭୂସ୍ତସ୍ଯ ତାଦୃଶୀ ।
ଗୋମେଦକଲ୍ପିତାନ୍ଯେଵ ତଦ୍ଵାସି ସଦନାନି ଚ ॥ 23 ॥
ପକ୍ଷିଣଃ ସ୍ତଂଭଵର୍ଯାଶ୍ଚ ଵୃକ୍ଷାଵାପ୍ଯଃ ସରାଂସି ଚ ।
ଗୋମେଦକଲ୍ପିତା ଏଵ କୁଂକୁମାରୁଣଵିଗ୍ରହାଃ ॥ 24 ॥
ତନ୍ମଧ୍ଯସ୍ଥା ମହାଦେଵ୍ଯୋ ଦ୍ଵାତ୍ରିଂଶଚ୍ଛକ୍ତଯଃ ସ୍ମୃତାଃ ।
ନାନା ଶସ୍ତ୍ରପ୍ରହରଣା ଗୋମେଦମଣିଭୂଷିତାଃ ॥ 25 ॥
ପ୍ରତ୍ଯେକ ଲୋକ ଵାସିନ୍ଯଃ ପରିଵାର୍ଯ ସମଂତତଃ ।
ଗୋମେଦସାଲେ ସନ୍ନଦ୍ଧା ପିଶାଚଵଦନା ନୃପ ॥ 26 ॥
ସ୍ଵର୍ଲୋକଵାସିଭିର୍ନିତ୍ଯଂ ପୂଜିତାଶ୍ଚକ୍ରବାହଵଃ ।
କ୍ରୋଧରକ୍ତେକ୍ଷଣା ଭିଂଧି ପଚ ଚ୍ଛିଂଧି ଦହେତି ଚ ॥ 27 ॥
ଵଦଂତି ସତତଂ ଵାଚଂ ଯୁଦ୍ଧୋତ୍ସୁକହୃଦଂତରାଃ ।
ଏକୈକସ୍ଯା ମହାଶକ୍ତେର୍ଦଶାକ୍ଷୌହିଣିକା ମତା ॥ 28 ॥
ସେନା ତତ୍ରାପ୍ଯେକଶକ୍ତିର୍ଲକ୍ଷବ୍ରହ୍ମାଂଡନାଶିନୀ ।
ତାଦୃଶୀନାଂ ମହାସେନା ଵର୍ଣନୀଯା କଥଂ ନୃପ ॥ 29 ॥
ରଥାନାଂ ନୈଵ ଗଣାନା ଵାହନାନାଂ ତଥୈଵ ଚ ।
ସର୍ଵଯୁଦ୍ଧସମାରଂଭସ୍ତତ୍ର ଦେଵ୍ଯା ଵିରାଜତେ ॥ 30 ॥
ତାସାଂ ନାମାନି ଵକ୍ଷ୍ଯାମି ପାପନାଶକରାଣି ଚ ।
ଵିଦ୍ଯା ହ୍ରୀ ପୁଷ୍ଟ ଯଃ ପ୍ରଜ୍ଞା ସିନୀଵାଲୀ କୁହୂସ୍ତଥା ॥ 31 ॥
ରୁଦ୍ରାଵୀର୍ଯା ପ୍ରଭାନଂଦା ପୋଷିଣୀ ଋଦ୍ଧିଦା ଶୁଭା ।
କାଲରାତ୍ରିର୍ମହାରାତ୍ରିର୍ଭଦ୍ରକାଲୀ କପର୍ଦିନୀ ॥ 32 ॥
ଵିକୃତିର୍ଦଂଡିମୁଂଡିନ୍ଯୌ ସେଂଦୁଖଂଡା ଶିଖଂଡିନୀ ।
ନିଶୁଂଭଶୁଂଭମଥିନୀ ମହିଷାସୁରମର୍ଦିନୀ ॥ 33 ॥
ଇଂଦ୍ରାଣୀ ଚୈଵ ରୁଦ୍ରାଣୀ ଶଂକରାର୍ଧଶରୀରିଣୀ ।
ନାରୀ ନାରାଯଣୀ ଚୈଵ ତ୍ରିଶୂଲିନ୍ଯପି ପାଲିନୀ ॥ 34 ॥
ଅଂବିକାହ୍ଲାଦିନୀ ପଶ୍ଚାଦିତ୍ଯେଵଂ ଶକ୍ତଯଃ ସ୍ମୃତାଃ ।
ଯଦ୍ଯେତାଃ କୁପିତା ଦେଵ୍ଯସ୍ତଦା ବ୍ରହ୍ମାଂଡନାଶନମ୍ ॥ 35 ॥
ପରାଜଯୋ ନ ଚୈତାସାଂ କଦାଚିତ୍କ୍ଵଚିଦସ୍ତି ହି ।
ଗୋମେଦକମଯାଦଗ୍ରେ ସଦ୍ଵଜ୍ରମଣିନିର୍ମିତଃ ॥ 36 ॥
ଦଶଯୋଜନ ତୁଂଗୋଽସୌ ଗୋପୁରଦ୍ଵାରସଂଯୁତଃ ।
କପାଟଶୃଂଖଲାବଦ୍ଧୋ ନଵଵୃକ୍ଷ ସମୁଜ୍ଜ୍ଵଲଃ ॥ 37 ॥
ସାଲସ୍ତନ୍ମଧ୍ଯଭୂମ୍ଯାଦି ସର୍ଵଂ ହୀରମଯଂ ସ୍ମୃତମ୍ ।
ଗୃହାଣିଵୀଥଯୋ ରଥ୍ଯା ମହାମାର୍ଗାଂ ଗଣାନି ଚ ॥ 38 ॥
ଵୃକ୍ଷାଲଵାଲ ତରଵଃ ସାରଂଗା ଅପି ତାଦୃଶାଃ ।
ଦୀର୍ଘିକାଶ୍ରେଣଯୋଵାପ୍ଯସ୍ତଡାଗାଃ କୂପ ସଂଯୁତାଃ ॥ 39 ॥
ତତ୍ର ଶ୍ରୀଭୁଵନେଶ୍ଵର୍ଯା ଵସଂତି ପରିଚାରିକାଃ ।
ଏକୈକା ଲକ୍ଷଦାସୀଭିଃ ସେଵିତା ମଦଗର୍ଵିତାଃ ॥ 40 ॥
ତାଲଵୃଂତଧରାଃ କାଶ୍ଚିଚ୍ଚଷକାଢ୍ଯ କରାଂବୁଜାଃ ।
କାଶ୍ଚିତ୍ତାଂବୂଲପାତ୍ରାଣି ଧାରଯଂତ୍ଯୋଽତିଗର୍ଵିତାଃ ॥ 41 ॥
କାଶ୍ଚିତ୍ତଚ୍ଛତ୍ରଧାରିଣ୍ଯଶ୍ଚାମରାଣାଂ ଵିଧାରିକାଃ ।
ନାନା ଵସ୍ତ୍ରଧରାଃ କାଶ୍ଚିତ୍କାଶ୍ଚିତ୍ପୁଷ୍ପ କରାଂବୁଜାଃ ॥ 42 ॥
ନାନାଦର୍ଶକରାଃ କାଶ୍ଚିତ୍କାଶ୍ଚିତ୍କୁଂକୁମଲେପନମ୍ ।
ଧାରଯଂତ୍ଯଃ କଜ୍ଜଲଂ ଚ ସିଂଦୂର ଚଷକଂ ପରାଃ ॥ 43 ॥
କାଶ୍ଚିଚ୍ଚିତ୍ରକ ନିର୍ମାତ୍ର୍ଯଃ ପାଦ ସଂଵାହନେ ରତାଃ ।
କାଶ୍ଚିତ୍ତୁ ଭୂଷାକାରିଣ୍ଯୋ ନାନା ଭୂଷାଧରାଃ ପରାଃ ॥ 44 ॥
ପୁଷ୍ପଭୂଷଣ ନିର୍ମାତ୍ର୍ଯଃ ପୁଷ୍ପଶୃଂଗାରକାରିକାଃ ।
ନାନା ଵିଲାସଚତୁରା ବହ୍ଵ୍ଯ ଏଵଂ ଵିଧାଃ ପରାଃ ॥ 45 ॥
ନିବଦ୍ଧ ପରିଧାନୀଯା ଯୁଵତ୍ଯଃ ସକଲା ଅପି ।
ଦେଵୀ କୃପା ଲେଶଵଶାତ୍ତୁଚ୍ଛୀକୃତ ଜଗତ୍ତ୍ରଯାଃ ॥ 46 ॥
ଏତା ଦୂତ୍ଯଃ ସ୍ମୃତା ଦେଵ୍ଯଃ ଶୃଂଗାରମଦଗର୍ଵିତାଃ ।
ତାସାଂ ନାମାନି ଵକ୍ଷ୍ଯାମି ଶୃଣୁ ମେ ନୃପସତ୍ତମ ॥ 47 ॥
ଅନଂଗରୂପା ପ୍ରଥମାପ୍ଯନଂଗମଦନା ପରା ।
ତୃତୀଯାତୁ ତତଃ ପ୍ରୋକ୍ତା ସୁଂଦରୀ ମଦନାତୁରା ॥ 48 ॥
ତତୋ ଭୁଵନଵେଗାସ୍ଯାତ୍ତଥା ଭୁଵନପାଲିକା ।
ସ୍ଯାତ୍ସର୍ଵଶିଶିରାନଂଗଵେଦନାନଂଗମେଖଲା ॥ 49 ॥
ଵିଦ୍ଯୁଦ୍ଦାମସମାନାଂଗ୍ଯଃ କ୍ଵଣତ୍କାଂଚୀଗୁଣାନ୍ଵିତାଃ ।
ରଣନ୍ମଂଜୀରଚରଣା ବହିରଂତରିତସ୍ତତଃ ॥ 50 ॥
ଧାଵମାନାସ୍ତୁ ଶୋଭଂତେ ସର୍ଵା ଵିଦ୍ଯୁଲ୍ଲତୋପମାଃ ।
କୁଶଲାଃ ସର୍ଵକାର୍ଯେଷୁ ଵେତ୍ରହସ୍ତାଃ ସମଂତତଃ ॥ 51 ॥
ଅଷ୍ଟଦିକ୍ଷୁତଥୈତାସାଂ ପ୍ରାକାରାଦ୍ବହିରେଵ ଚ ।
ସଦନାନି ଵିରାଜଂତେ ନାନା ଵାହନହେତିଭିଃ ॥ 52 ॥
ଵଜ୍ରସାଲାଦଗ୍ରଭାଗେ ସାଲୋ ଵୈଦୂର୍ଯନିର୍ମିତଃ ।
ଦଶଯୋଜନତୁଂଗୋଽସୌ ଗୋପୁରଦ୍ଵାରଭୂଷିତଃ ॥ 53 ॥
ଵୈଦୂର୍ଯଭୂମିଃ ସର୍ଵାପିଗୃହାଣି ଵିଵିଧାନି ଚ ।
ଵୀଥ୍ଯୋ ରଥ୍ଯା ମହାମାର୍ଗାଃ ସର୍ଵେ ଵେଦୂର୍ଯନିର୍ମିତାଃ ॥ 54 ॥
ଵାପୀ କୂପ ତଡାଗାଶ୍ଚ ସ୍ରଵଂତୀନାଂ ତଟାନି ଚ ।
ଵାଲୁକା ଚୈଵ ସର୍ଵାଽପି ଵୈଦୂର୍ଯମଣିନିର୍ମିତା ॥ 55 ॥
ତତ୍ରାଷ୍ଟଦିକ୍ଷୁପରିତୋ ବ୍ରାହ୍ମ୍ଯାଦୀନାଂ ଚ ମଂଡଲମ୍ ।
ନିଜୈର୍ଗଣୈଃ ପରିଵୃତଂ ଭ୍ରାଜତେ ନୃପସତ୍ତମ ॥ 56 ॥
ପ୍ରତିବ୍ରହ୍ମାଂଡମାତୃଣାଂ ତାଃ ସମଷ୍ଟଯ ଈରିତାଃ ।
ବ୍ରାହ୍ମୀ ମାହେଶ୍ଵରୀ ଚୈଵ କୌମାରୀ ଵୈଷ୍ଣଵୀ ତଥା ॥57 ॥
ଵାରାହୀ ଚ ତଥେଂଦ୍ରାଣୀ ଚାମୁଂଡାଃ ସପ୍ତମାତରଃ ।
ଅଷ୍ଟମୀ ତୁ ମହାଲକ୍ଷ୍ମୀର୍ନାମ୍ନା ପ୍ରୋକ୍ତାସ୍ତୁ ମାତରଃ ॥ 58 ॥
ବ୍ରହ୍ମରୁଦ୍ରାଦିଦେଵାନାଂ ସମାକାରା ସ୍ତୁତାଃ ସ୍ମୃତାଃ ।
ଜଗତ୍କଳ୍ଯାଣକାରିଣ୍ଯଃ ସ୍ଵସ୍ଵସେନାସମାଵୃତାଃ ॥ 59 ॥
ତତ୍ସାଲସ୍ଯ ଚତୁର୍ଦ୍ଵାର୍ଷୁ ଵାହନାନି ମହେଶିତୁଃ ।
ସଜ୍ଜାନି ନୃପତେ ସଂତି ସାଲଂକାରାଣି ନିତ୍ଯଶଃ ॥ 60 ॥
ଦଂତିନଃ କୋଟିଶୋ ଵାହାଃ କୋଟିଶଃ ଶିବିକାସ୍ତଥା ।
ହଂସାଃ ସିଂହାଶ୍ଚ ଗରୁଡା ମଯୂରା ଵୃଷଭାସ୍ତଥା ॥ 61 ॥
ତୈର୍ଯୁକ୍ତାଃ ସ୍ଯଂଦନାସ୍ତଦ୍ଵତ୍କୋଟିଶୋ ନୃପନଂଦନ ।
ପାର୍ଷ୍ଣିଗ୍ରାହସମାଯୁକ୍ତା ଧ୍ଵଜୈରାକାଶଚୁଂବିନଃ ॥ 62 ॥
କୋଟିଶସ୍ତୁ ଵିମାନାନି ନାନା ଚିହ୍ନାନ୍ଵିତାନି ଚ ।
ନାନା ଵାଦିତ୍ରଯୁକ୍ତାନି ମହାଧ୍ଵଜଯୁତାନି ଚ ॥ 63 ॥
ଵୈଦୂର୍ଯମଣି ସାଲସ୍ଯାପ୍ଯଗ୍ରେ ସାଲଃ ପରଃ ସ୍ମୃତଃ ।
ଦଶଯୋଜନ ତୁଂଗୋଽସାଵିଂଦ୍ରନୀଲାଶ୍ମନିର୍ମିତଃ ॥ 64 ॥
ତନ୍ମଧ୍ଯ ଭୂସ୍ତଥା ଵୀଥ୍ଯୋ ମହାମାର୍ଗା ଗୃହାଣି ଚ ।
ଵାପୀ କୂପ ତଡାଗାଶ୍ଚ ସର୍ଵେ ତନ୍ମଣିନିର୍ମିତାଃ ॥ 65 ॥
ତତ୍ର ପଦ୍ମ ତୁ ସଂପ୍ରୋକ୍ତଂ ବହୁଯୋଜନ ଵିସ୍ତୃତମ୍ ।
ଷୋଡଶାରଂ ଦୀପ୍ଯମାନଂ ସୁଦର୍ଶନମିଵାପରମ୍ ॥ 66 ॥
ତତ୍ର ଷୋଡଶଶକ୍ତୀନାଂ ସ୍ଥାନାନି ଵିଵିଧାନି ଚ ।
ସର୍ଵୋପସ୍କରଯୁକ୍ତାନି ସମୃଦ୍ଧାନି ଵସଂତି ହି ॥ 67 ॥
ତାସାଂ ନାମାନି ଵକ୍ଷ୍ଯାମି ଶୃଣୁ ମେ ନୃପସତ୍ତମ ।
କରାଳୀ ଵିକରାଳୀ ଚ ତଥୋମା ଚ ସରସ୍ଵତୀ ॥ 68 ॥
ଶ୍ରୀ ଦୁର୍ଗୋଷା ତଥା ଲକ୍ଷ୍ମୀଃ ଶ୍ରୁତିଶ୍ଚୈଵ ସ୍ମୃତିର୍ଧୃତିଃ ।
ଶ୍ରଦ୍ଧା ମେଧା ମତିଃ କାଂତିରାର୍ଯା ଷୋଡଶଶକ୍ତଯଃ ॥ 69 ॥
ନୀଲଜୀମୂତସଂକାଶାଃ କରଵାଲ କରାଂବୁଜାଃ ।
ସମାଃ ଖେଟକଧାରିଣ୍ଯୋ ଯୁଦ୍ଧୋପକ୍ରାଂତ ମାନସାଃ ॥ 70 ॥
ସେନାନ୍ଯଃ ସକଲା ଏତାଃ ଶ୍ରୀଦେଵ୍ଯା ଜଗଦୀଶିତୁଃ ।
ପ୍ରତିବ୍ରହ୍ମାଂଡସଂସ୍ଥାନାଂ ଶକ୍ତୀନାଂ ନାଯିକାଃ ସ୍ମୃତାଃ ॥ 71 ॥
ବ୍ରହ୍ମାଂଡକ୍ଷୋଭକାରିଣ୍ଯୋ ଦେଵୀ ଶକ୍ତ୍ଯୁପବୃଂହିତାଃ ।
ନାନା ରଥସମାରୂଢା ନାନା ଶକ୍ତିଭିରନ୍ଵିତାଃ ॥ 72 ॥
ଏତତ୍ପରାକ୍ରମଂ ଵକ୍ତୁଂ ସହସ୍ରାସ୍ଯୋଽପି ନ କ୍ଷମଃ ।
ଇଂଦ୍ରନୀଲମହାସାଲାଦଗ୍ରେ ତୁ ବହୁଵିସ୍ତୃତଃ ॥ 73 ॥
ମୁକ୍ତାପ୍ରାକାର ଉଦିତୋ ଦଶଯୋଜନ ଦୈର୍ଘ୍ଯଵାନ୍ ।
ମଧ୍ଯଭୂଃ ପୂର୍ଵଵତ୍ପ୍ରୋକ୍ତା ତନ୍ମଧ୍ଯେଽଷ୍ଟଦଳାଂବୁଜମ୍ ॥ 74 ॥
ମୁକ୍ତାମଣିଗଣାକୀର୍ଣଂ ଵିସ୍ତୃତଂ ତୁ ସକେସରମ୍ ।
ତତ୍ର ଦେଵୀସମାକାରା ଦେଵ୍ଯାଯୁଧଧରାଃ ସଦା ॥ 75 ॥
ସଂପ୍ରୋକ୍ତା ଅଷ୍ଟମଂତ୍ରିଣ୍ଯୋ ଜଗଦ୍ଵାର୍ତାପ୍ରବୋଧିକାଃ ।
ଦେଵୀସମାନଭୋଗାସ୍ତା ଇଂଗିତଜ୍ଞାସ୍ତୁପଂଡିତାଃ ॥ 76 ॥
କୁଶଲାଃ ସର୍ଵକାର୍ଯେଷୁ ସ୍ଵାମିକାର୍ଯପରାଯଣାଃ ।
ଦେଵ୍ଯଭିପ୍ରାଯ ବୋଧ୍ଯସ୍ତାଶ୍ଚତୁରା ଅତିସୁଂଦରାଃ ॥ 77 ॥
ନାନା ଶକ୍ତିସମାଯୁକ୍ତାଃ ପ୍ରତିବ୍ରହ୍ମାଂଡଵର୍ତିନାମ୍ ।
ପ୍ରାଣିନାଂ ତାଃ ସମାଚାରଂ ଜ୍ଞାନଶକ୍ତ୍ଯାଵିଦଂତି ଚ ॥ 78 ॥
ତାସାଂ ନାମାନି ଵକ୍ଷ୍ଯାମି ମତ୍ତଃ ଶୃଣୁ ନୃପୋତ୍ତମ ।
ଅନଂଗକୁସୁମା ପ୍ରୋକ୍ତାପ୍ଯନଂଗକୁସୁମାତୁରା ॥ 79 ॥
ଅନଂଗମଦନା ତଦ୍ଵଦନଂଗମଦନାତୁରା ।
ଭୁଵନପାଲା ଗଗନଵେଗା ଚୈଵ ତତଃ ପରମ୍ ॥ 80 ॥
ଶଶିରେଖା ଚ ଗଗନରେଖା ଚୈଵ ତତଃ ପରମ୍ ।
ପାଶାଂକୁଶଵରାଭୀତିଧରା ଅରୁଣଵିଗ୍ରହାଃ ॥ 81 ॥
ଵିଶ୍ଵସଂବଂଧିନୀଂ ଵାର୍ତାଂ ବୋଧଯଂତି ପ୍ରତିକ୍ଷଣମ୍ ।
ମୁକ୍ତାସାଲାଦଗ୍ରଭାଗେ ମହାମାରକତୋ ପରଃ ॥ 82 ॥
ସାଲୋତ୍ତମଃ ସମୁଦ୍ଦିଷ୍ଟୋ ଦଶଯୋଜନ ଦୈର୍ଘ୍ଯଵାନ୍ ।
ନାନା ସୌଭାଗ୍ଯସଂଯୁକ୍ତୋ ନାନା ଭୋଗସମନ୍ଵିତଃ ॥ 83 ॥
ମଧ୍ଯଭୂସ୍ତାଦୃଶୀ ପ୍ରୋକ୍ତା ସଦନାନି ତଥୈଵ ଚ ।
ଷଟ୍କୋଣମତ୍ରଵିସ୍ତୀର୍ଣଂ କୋଣସ୍ଥା ଦେଵତାଃ ଶୃଣୁଃ ॥ 84 ॥
ପୂର୍ଵକୋଣେ ଚତୁର୍ଵକ୍ତ୍ରୋ ଗାଯତ୍ରୀ ସହିତୋ ଵିଧିଃ ।
କୁଂଡିକାକ୍ଷଗୁଣାଭୀତି ଦଂଡାଯୁଧଧରଃ ପରଃ ॥ 85 ॥
ତଦାଯୁଧଧରା ଦେଵୀ ଗାଯତ୍ରୀ ପରଦେଵତା ।
ଵେଦାଃ ସର୍ଵେ ମୂର୍ତିମଂତଃ ଶାସ୍ତ୍ରାଣି ଵିଵିଧାନି ଚ ॥ 86 ॥
ସ୍ମୃତଯଶ୍ଚ ପୁରାଣାନି ମୂର୍ତିମଂତି ଵସଂତି ହି ।
ଯେ ବ୍ରହ୍ମଵିଗ୍ରହାଃ ସଂତି ଗାଯତ୍ରୀଵିଗ୍ରହାଶ୍ଚ ଯେ ॥ 87 ॥
ଵ୍ଯାହୃତୀନାଂ ଵିଗ୍ରହାଶ୍ଚ ତେ ନିତ୍ଯଂ ତତ୍ର ସଂତି ହି ।
ରକ୍ଷଃ କୋଣେ ଶଂଖଚକ୍ରଗଦାଂବୁଜ କରାଂବୁଜା ॥ 88 ॥
ସାଵିତ୍ରୀ ଵର୍ତତେ ତତ୍ର ମହାଵିଷ୍ଣୁଶ୍ଚ ତାଦୃଶଃ ।
ଯେ ଵିଷ୍ଣୁଵିଗ୍ରହାଃ ସଂତି ମତ୍ସ୍ଯକୂର୍ମାଦଯୋଖିଲାଃ ॥ 89 ॥
ସାଵିତ୍ରୀ ଵିଗ୍ରହା ଯେ ଚ ତେ ସର୍ଵେ ତତ୍ର ସଂତି ହି ।
ଵାଯୁକୋଣେ ପରଶ୍ଵକ୍ଷମାଲାଭଯଵରାନ୍ଵିତଃ ॥ 90 ॥
ମହାରୁଦ୍ରୋ ଵର୍ତତେଽତ୍ର ସରସ୍ଵତ୍ଯପି ତାଦୃଶୀ ।
ଯେ ଯେ ତୁ ରୁଦ୍ରଭେଦାଃ ସ୍ଯୁର୍ଦକ୍ଷିଣାସ୍ଯାଦଯୋ ନୃପ ॥ 91 ॥
ଗୌରୀ ଭେଦାଶ୍ଚ ଯେ ସର୍ଵେ ତେ ତତ୍ର ନିଵସଂତି ହି ।
ଚତୁଃଷଷ୍ଟ୍ଯାଗମା ଯେ ଚ ଯେ ଚାନ୍ଯେପ୍ଯାଗମାଃ ସ୍ମୃତାଃ ॥ 92 ॥
ତେ ସର୍ଵେ ମୂର୍ତିମଂତଶ୍ଚ ତତ୍ର ଵୈ ନିଵସଂତି ହି ।
ଅଗ୍ନିକୋଣେ ରତ୍ନକୁଂଭଂ ତଥା ମଣିକରଂଡକମ୍ ॥ 93 ॥
ଦଧାନୋ ନିଜହସ୍ତାଭ୍ଯାଂ କୁବେରୋ ଧନଦାଯକଃ ।
ନାନା ଵୀଥୀ ସମାଯୁକ୍ତୋ ମହାଲକ୍ଷ୍ମୀସମନ୍ଵିତଃ ॥ 94 ॥
ଦେଵ୍ଯା ନିଧିପତିସ୍ତ୍ଵାସ୍ତେ ସ୍ଵଗୁଣୈଃ ପରିଵେଷ୍ଟିତଃ ।
ଵାରୁଣେ ତୁ ମହାକୋଣେ ମଦନୋ ରତିସଂଯୁତଃ ॥ 95 ॥
ପାଶାଂକୁଶଧନୁର୍ବାଣଧରୋ ନିତ୍ଯଂ ଵିରାଜତେ ।
ଶୃଂଗାରମୂର୍ତିମଂତସ୍ତୁ ତତ୍ର ସନ୍ନିହିତାଃ ସଦା ॥ 96 ॥
ଈଶାନକୋଣେ ଵିଘ୍ନେଶୋ ନିତ୍ଯଂ ପୁଷ୍ଟିସମନ୍ଵିତଃ ।
ପାଶାଂକୁଶଧରୋ ଵୀରୋ ଵିଘ୍ନହର୍ତା ଵିରାଜତେ ॥ 97 ॥
ଵିଭୂତଯୋ ଗଣେଶସ୍ଯ ଯାଯାଃ ସଂତି ନୃପୋତ୍ତମ ।
ତାଃ ସର୍ଵା ନିଵସଂତ୍ଯତ୍ର ମହୈଶ୍ଵର୍ଯସମନ୍ଵିତାଃ ॥ 98 ॥
ପ୍ରତିବ୍ରହ୍ମାଂଡସଂସ୍ଥାନାଂ ବ୍ରହ୍ମାଦୀନାଂ ସମଷ୍ଟଯଃ ।
ଏତେ ବ୍ରହ୍ମାଦଯଃ ପ୍ରୋକ୍ତାଃ ସେଵଂତେ ଜଗଦୀଶ୍ଵରୀମ୍ ॥ 99 ॥
ମହାମାରକତସ୍ଯାଗ୍ରେ ଶତଯୋଜନ ଦୈର୍ଘ୍ଯଵାନ୍ ।
ପ୍ରଵାଲଶାଲୋସ୍ତ୍ଯପରଃ କୁଂକୁମାରୁଣଵିଗ୍ରହଃ ॥ 100 ॥
ମଧ୍ଯଭୂସ୍ତାଦୃଶୀ ପ୍ରୋକ୍ତା ସଦନାନି ଚ ପୂର୍ଵଵତ୍ ।
ତନ୍ମଧ୍ଯେ ପଂଚଭୂତାନାଂ ସ୍ଵାମିନ୍ଯଃ ପଂଚ ସଂତି ଚ ॥ 101 ॥
ହୃଲ୍ଲେଖା ଗଗନା ରକ୍ତା ଚତୁର୍ଥୀ ତୁ କରାଳିକା ।
ମହୋଚ୍ଛୁଷ୍ମା ପଂଚମୀ ଚ ପଂଚଭୂତସମପ୍ରଭାଃ ॥ 102 ॥
ପାଶାଂକୁଶଵରାଭୀତିଧାରିଣ୍ଯୋମିତଭୂଷଣାଃ ।
ଦେଵୀ ସମାନଵେଷାଢ୍ଯା ନଵଯୌଵନଗର୍ଵିତାଃ ॥ 103 ॥
ପ୍ରଵାଲଶାଲାଦଗ୍ରେ ତୁ ନଵରତ୍ନ ଵିନିର୍ମିତଃ ।
ବହୁଯୋଜନଵିସ୍ତୀର୍ଣୋ ମହାଶାଲୋଽସ୍ତି ଭୂମିପ ॥ 104 ॥
ତତ୍ର ଚାମ୍ନାଯଦେଵୀନାଂ ସଦନାନି ବହୂନ୍ଯପି ।
ନଵରତ୍ନମଯାନ୍ଯେଵ ତଡାଗାଶ୍ଚ ସରାଂସି ଚ ॥ 105 ॥
ଶ୍ରୀଦେଵ୍ଯା ଯେଽଵତାରାଃ ସ୍ଯୁସ୍ତେ ତତ୍ର ନିଵସଂତି ହି ।
ମହାଵିଦ୍ଯା ମହାଭେଦାଃ ସଂତି ତତ୍ରୈଵ ଭୂମିପ ॥ 106 ॥
ନିଜାଵରଣଦେଵୀଭିର୍ନିଜଭୂଷଣଵାହନୈଃ ।
ସର୍ଵଦେଵ୍ଯୋ ଵିରାଜଂତେ କୋଟିସୂର୍ଯସମପ୍ରଭାଃ ॥ 107 ॥
ସପ୍ତକୋଟି ମହାମଂତ୍ରଦେଵତାଃ ସଂତି ତତ୍ର ହି ।
ନଵରତ୍ନମଯାଦଗ୍ରେ ଚିଂତାମଣିଗୃହଂ ମହତ୍ ॥ 108 ॥
ତତ୍ର ତ୍ଯଂ ଵସ୍ତୁ ମାତ୍ରଂ ତୁ ଚିଂତାମଣି ଵିନିର୍ମିତମ୍ ।
ସୂର୍ଯୋଦ୍ଗାରୋପଲୈସ୍ତଦ୍ଵଚ୍ଚଂଦ୍ରୋଦ୍ଗାରୋପଲୈସ୍ତଥା ॥ 109 ॥
ଵିଦ୍ଯୁତ୍ପ୍ରଭୋପଲୈଃ ସ୍ତଂଭାଃ କଲ୍ପିତାସ୍ତୁ ସହସ୍ରଶଃ ।
ଯେଷାଂ ପ୍ରଭାଭିରଂତସ୍ଥଂ ଵସ୍ତୁ କିଂଚିନ୍ନ ଦୃଶ୍ଯତେ ॥ 110 ॥
ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କଂଧେ ଏକାଦଶୋଽଧ୍ଯାଯଃ ।
Browse Related Categories:
