ତ୍ଵତ୍ତୀରେ ମଣିକର୍ଣିକେ ହରିହରୌ ସାଯୁଜ୍ଯମୁକ୍ତିପ୍ରଦୌ
ଵାଦଂତୌ କୁରୁତଃ ପରସ୍ପରମୁଭୌ ଜଂତୋଃ ପ୍ରଯାଣୋତ୍ସଵେ ।
ମଦ୍ରୂପୋ ମନୁଜୋଽଯମସ୍ତୁ ହରିଣା ପ୍ରୋକ୍ତଃ ଶିଵସ୍ତତ୍କ୍ଷଣା-
ତ୍ତନ୍ମଧ୍ଯାଦ୍ଭୃଗୁଲାଂଛନୋ ଗରୁଡଗଃ ପୀତାଂବରୋ ନିର୍ଗତଃ ॥ 1 ॥
ଇଂଦ୍ରାଦ୍ଯାସ୍ତ୍ରିଦଶାଃ ପତଂତି ନିଯତଂ ଭୋଗକ୍ଷଯେ ଯେ ପୁନ-
ର୍ଜାଯଂତେ ମନୁଜାସ୍ତତୋପି ପଶଵଃ କୀଟାଃ ପତଂଗାଦଯଃ ।
ଯେ ମାତର୍ମଣିକର୍ଣିକେ ତଵ ଜଲେ ମଜ୍ଜଂତି ନିଷ୍କଲ୍ମଷାଃ
ସାଯୁଜ୍ଯେଽପି କିରୀଟକୌସ୍ତୁଭଧରା ନାରାଯଣାଃ ସ୍ଯୁର୍ନରାଃ ॥ 2 ॥
କାଶୀ ଧନ୍ଯତମା ଵିମୁକ୍ତନଗରୀ ସାଲଂକୃତା ଗଂଗଯା
ତତ୍ରେଯଂ ମଣିକର୍ଣିକା ସୁଖକରୀ ମୁକ୍ତିର୍ହି ତତ୍କିଂକରୀ ।
ସ୍ଵର୍ଲୋକସ୍ତୁଲିତଃ ସହୈଵ ଵିବୁଧୈଃ କାଶ୍ଯା ସମଂ ବ୍ରହ୍ମଣା
କାଶୀ କ୍ଷୋଣିତଲେ ସ୍ଥିତା ଗୁରୁତରା ସ୍ଵର୍ଗୋ ଲଘୁତ୍ଵଂ ଗତଃ ॥ 3 ॥
ଗଂଗାତୀରମନୁତ୍ତମଂ ହି ସକଲଂ ତତ୍ରାପି କାଶ୍ଯୁତ୍ତମା
ତସ୍ଯାଂ ସା ମଣିକର୍ଣିକୋତ୍ତମତମା ଯେତ୍ରେଶ୍ଵରୋ ମୁକ୍ତିଦଃ ।
ଦେଵାନାମପି ଦୁର୍ଲଭଂ ସ୍ଥଲମିଦଂ ପାପୌଘନାଶକ୍ଷମଂ
ପୂର୍ଵୋପାର୍ଜିତପୁଣ୍ଯପୁଂଜଗମକଂ ପୁଣ୍ଯୈର୍ଜନୈଃ ପ୍ରାପ୍ଯତେ ॥ 4 ॥
ଦୁଃଖାଂଭୋଧିଗତୋ ହି ଜଂତୁନିଵହସ୍ତେଷାଂ କଥଂ ନିଷ୍କୃତିଃ
ଜ୍ଞାତ୍ଵା ତଦ୍ଧି ଵିରିଂଚିନା ଵିରଚିତା ଵାରାଣସୀ ଶର୍ମଦା ।
ଲୋକାଃସ୍ଵର୍ଗସୁଖାସ୍ତତୋଽପି ଲଘଵୋ ଭୋଗାଂତପାତପ୍ରଦାଃ
କାଶୀ ମୁକ୍ତିପୁରୀ ସଦା ଶିଵକରୀ ଧର୍ମାର୍ଥମୋକ୍ଷପ୍ରଦା ॥ 5 ॥
ଏକୋ ଵେଣୁଧରୋ ଧରାଧରଧରଃ ଶ୍ରୀଵତ୍ସଭୂଷାଧରଃ
ଯୋଽପ୍ଯେକଃ କିଲ ଶଂକରୋ ଵିଷଧରୋ ଗଂଗାଧରୋ ମାଧଵଃ ।
ଯେ ମାତର୍ମଣିକର୍ଣିକେ ତଵ ଜଲେ ମଜ୍ଜଂତି ତେ ମାନଵାଃ
ରୁଦ୍ରା ଵା ହରଯୋ ଭଵଂତି ବହଵସ୍ତେଷାଂ ବହୁତ୍ଵଂ କଥମ୍ ॥ 6 ॥
ତ୍ଵତ୍ତୀରେ ମରଣଂ ତୁ ମଂଗଳକରଂ ଦେଵୈରପି ଶ୍ଲାଘ୍ଯତେ
ଶକ୍ରସ୍ତଂ ମନୁଜଂ ସହସ୍ରନଯନୈର୍ଦ୍ରଷ୍ଟୁଂ ସଦା ତତ୍ପରଃ ।
ଆଯାଂତଂ ସଵିତା ସହସ୍ରକିରଣୈଃ ପ୍ରତ୍ଯୁଦ୍ଗତୋଽଭୂତ୍ସଦା
ପୁଣ୍ଯୋଽସୌ ଵୃଷଗୋଽଥଵା ଗରୁଡଗଃ କିଂ ମଂଦିରଂ ଯାସ୍ଯତି ॥ 7 ॥
ମଧ୍ଯାହ୍ନେ ମଣିକର୍ଣିକାସ୍ନପନଜଂ ପୁଣ୍ଯଂ ନ ଵକ୍ତୁଂ କ୍ଷମଃ
ସ୍ଵୀଯୈରବ୍ଧଶତୈଶ୍ଚତୁର୍ମୁଖଧରୋ ଵେଦାର୍ଥଦୀକ୍ଷାଗୁରୁଃ ।
ଯୋଗାଭ୍ଯାସବଲେନ ଚଂଦ୍ରଶିଖରସ୍ତତ୍ପୁଣ୍ଯପାରଂଗତ-
ସ୍ତ୍ଵତ୍ତୀରେ ପ୍ରକରୋତି ସୁପ୍ତପୁରୁଷଂ ନାରାଯଣଂ ଵା ଶିଵମ୍ ॥ 8 ॥
କୃଚ୍ଛ୍ରୈ କୋଟିଶତୈଃ ସ୍ଵପାପନିଧନଂ ଯଚ୍ଚାଶ୍ଵମେଧୈଃ ଫଲଂ
ତତ୍ସର୍ଵେ ମଣିକର୍ଣିକାସ୍ନପନଜେ ପୁଣ୍ଯେ ପ୍ରଵିଷ୍ଟଂ ଭଵେତ୍ ।
ସ୍ନାତ୍ଵା ସ୍ତୋତ୍ରମିଦଂ ନରଃ ପଠତି ଚେତ୍ସଂସାରପାଥୋନିଧିଂ
ତୀର୍ତ୍ଵା ପଲ୍ଵଲଵତ୍ପ୍ରଯାତି ସଦନଂ ତେଜୋମଯଂ ବ୍ରହ୍ମଣଃ ॥ 9 ॥
Browse Related Categories:
