କଦାଚିତ୍-କାଲିଂଦୀ ତଟଵିପିନ ସଂଗୀତକରଵୋ
ମୁଦାଭୀରୀ ନାରୀଵଦନ କମଲାସ୍ଵାଦମଧୁପଃ ।
ରମା ଶଂଭୁ ବ୍ରହ୍ମାମରପତି ଗଣେଶାର୍ଚିତ ପଦୋ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 1 ॥
ଭୁଜେ ସଵ୍ଯେ ଵେଣୁଂ ଶିରସି ଶିଖିପିଂଛଂ କଟିତଟେ
ଦୁକୂଲଂ ନେତ୍ରାଂତେ ସହଚରକଟାକ୍ଷଂ ଵିଦଧତେ ।
ସଦା ଶ୍ରୀମଦ୍ଵୃଂଦାଵନଵସତିଲୀଲାପରିଚଯୋ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ନେ ॥ 2 ॥
ମହାଂଭୋଧେସ୍ତୀରେ କନକରୁଚିରେ ନୀଲଶିଖରେ
ଵସନ୍ ପ୍ରାସାଦାଂତସ୍ସହଜ ବଲଭଦ୍ରେଣ ବଲିନା ।
ସୁଭଦ୍ରା ମଧ୍ଯସ୍ଥସ୍ସକଲସୁର ସେଵାଵସରଦୋ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 3 ॥
କୃପା ପାରାଵାରାସ୍ସଜଲ ଜଲଦ ଶ୍ରେଣିରୁଚିରୋ
ରମାଵାଣୀ ରାମସ୍ଫୁରଦମଲ ପଂକେରୁହମୁଖଃ ।
ସୁରେଂଦ୍ରୈରାରାଧ୍ଯଃ ଶ୍ରୁତିଗଣଶିଖା ଗୀତ ଚରିତୋ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 4 ॥
ରଥାରୂଢୋ ଗଚ୍ଛନ୍ ପଥି ମିଲିତ ଭୂଦେଵପଟଲୈଃ
ସ୍ତୁତି ପ୍ରାଦୁର୍ଭାଵଂ ପ୍ରତିପଦମୁପାକର୍ଣ୍ଯ ସଦଯଃ ।
ଦଯାସିଂଧୁର୍ବଂଧୁସ୍ସକଲ ଜଗତା ସିଂଧୁସୁତଯା
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 5 ॥
ପରବ୍ରହ୍ମାପୀଡଃ କୁଵଲଯ-ଦଲୋତ୍ଫୁଲ୍ଲନଯନୋ
ନିଵାସୀ ନୀଲାଦ୍ରୌ ନିହିତ-ଚରଣୋଽନଂତ-ଶିରସି ।
ରସାନଂଦୋ ରାଧା-ସରସ-ଵପୁରାଲିଂଗନ-ସଖୋ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 6 ॥
ନ ଵୈ ଯାଚେ ରାଜ୍ଯଂ ନ ଚ କନକ ମାଣିକ୍ଯ ଵିଭଵଂ
ନ ଯାଚେଽହଂ ରମ୍ଯାଂ ନିଖିଲଜନ-କାମ୍ଯାଂ ଵରଵଧୂମ୍ ।
ସଦା କାଲେ କାଲେ ପ୍ରମଥ-ପତିନା ଗୀତଚରିତୋ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 7 ॥
ହର ତ୍ଵଂ ସଂସାରଂ ଦ୍ରୁତତରମସାରଂ ସୁରପତେ
ହର ତ୍ଵଂ ପାପାନାଂ ଵିତତିମପରାଂ ଯାଦଵପତେ ।
ଅହୋ ଦୀନୋଽନାଥେ ନିହିତଚରଣୋ ନିଶ୍ଚିତମିଦଂ
ଜଗନ୍ନାଥଃ ସ୍ଵାମୀ ନଯନପଥଗାମୀ ଭଵତୁ ମେ ॥ 8 ॥
ଜଗନ୍ନାଥାଷ୍ଟକଂ ପୁନ୍ଯଂ ଯଃ ପଠେତ୍ ପ୍ରଯତଃ ଶୁଚିଃ ।
ସର୍ଵପାପ ଵିଶୁଦ୍ଧାତ୍ମା ଵିଷ୍ଣୁଲୋକଂ ସ ଗଚ୍ଛତି ॥
ଇତି ଶ୍ରୀମଦ୍ ଶଂକରାଚାର୍ଯଵିରଚିତଂ ଜଗନ୍ନାଥାଷ୍ଟକଂ ସଂପୂର୍ଣଂ॥
Browse Related Categories:
