॥ ନଵମଃ ସର୍ଗଃ ॥
॥ ମଂଦମୁକୁଂଦଃ ॥
ତାମଥ ମନ୍ମଥଖିନ୍ନାଂ ରତିରସଭିନ୍ନାଂ ଵିଷାଦସଂପନ୍ନାମ୍ ।
ଅନୁଚିଂତିତହରିଚରିତାଂ କଲହାଂତରିତମୁଵାଚ ସଖୀ ॥ 51 ॥
॥ ଗୀତମ୍ 18 ॥
ହରିରଭିସରତି ଵହତି ମଧୁପଵନେ ।
କିମପରମଧିକସୁଖଂ ସଖି ଭୁଵନେ ॥
ମାଧଵେ ମା କୁରୁ ମାନିନି ମାନମଯେ ॥ 1 ॥
ତାଲଫଲାଦପି ଗୁରୁମତିସରସମ୍ ।
କିଂ ଵିଫଲୀକୁରୁଷେ କୁଚକଲଶମ୍ ॥ 2 ॥
କତି ନ କଥିତମିଦମନୁପଦମଚିରମ୍ ।
ମା ପରିହର ହରିମତିଶଯରୁଚିରମ୍ ॥ 3 ॥
କିମିତି ଵିଷୀଦସି ରୋଦିଷି ଵିକଲା ।
ଵିହସତି ଯୁଵତିସଭା ତଵ ସକଲା ॥ 4 ॥
ସଜଲନଲିନୀଦଲଶୀତଲଶଯନେ ।
ହରିମଵଲୋକ୍ଯ ସଫଲଯ୍ ନଯନେ ॥ 5 ॥
ଜନଯସି ମନସି କିମିତି ଗୁରୁଖେଦମ୍ ।
ଶୃଣୁ ମମ ଵଚନମନୀହିତଭେଦମ୍ ॥ 6 ॥
ହରିରୁପଯାତୁ ଵଦତୁ ବହୁମଧୁରମ୍ ।
କିମିତି କରୋଷି ହୃଦଯମତିଵିଧୁରମ୍ ॥ 7 ॥
ଶ୍ରୀଜଯଦେଵଭଣିତମତିଲଲିତମ୍ ।
ସୁଖଯତୁ ରସିକଜନଂ ହରିଚରିତମ୍ ॥ 8 ॥
ସ୍ନିଗ୍ଧେ ଯତ୍ପରୁଷାସି ଯତ୍ପ୍ରଣମତି ସ୍ତବ୍ଧାସି ଯଦ୍ରାଗିଣି ଦ୍ଵେଷସ୍ଥାସି ଯଦୁନ୍ମୁଖେ ଵିମୁଖତାଂ ଯାତାସି ତସ୍ମିନ୍ପ୍ରିଯେ ।
ଯୁକ୍ତଂ ତଦ୍ଵିପରୀତକାରିଣି ତଵ ଶ୍ରୀଖଂଡଚର୍ଚା ଵିଷଂ ଶୀତାଂଶୁସ୍ତପନୋ ହିମଂ ହୁତଵହଃ କ୍ରୀଡାମୁଦୋ ଯାତନାଃ ॥ 52 ॥
॥ ଇତି ଗୀତଗୋଵିଂଦେ କଲହାଂତରିତାଵର୍ଣନେ ମଂଦମୁକୁଂଦୋ ନାମ ନଵମଃ ସର୍ଗଃ ॥
Browse Related Categories: