॥ ଅଷ୍ଟମଃ ସର୍ଗଃ ॥
॥ ଵିଲକ୍ଷ୍ଯଲକ୍ଷ୍ମୀପତିଃ ॥
ଅଥ କଥମପି ଯାମିନୀଂ ଵିନୀଯ ସ୍ମରଶରଜର୍ଜରିତାପି ସା ପ୍ରଭାତେ ।
ଅନୁନଯଵଚନଂ ଵଦଂତମଗ୍ରେ ପ୍ରଣତମପି ପ୍ରିଯମାହ ସାଭ୍ଯସୂଯମ୍ ॥ 49 ॥
॥ ଗୀତମ୍ 17 ॥
ରଜନିଜନିତଗୁରୁଜାଗରରାଗକଷାଯିତମଲସନିଵେଶମ୍ ।
ଵହତି ନଯନମନୁରାଗମିଵ ସ୍ଫୁଟମୁଦିତରସାଭିନିଵେଶମ୍ ॥
ହରିହରି ଯାହି ମାଧଵ ଯାହି କେଶଵ ମା ଵଦ କୈତଵଵାଦଂ ତାମନୁସର ସରସୀରୁହଲୋଚନ ଯା ତଵ ହରତି ଵିଷାଦମ୍ ॥ 50 ॥
କଜ୍ଜଲମଲିନଵିଲୋଚନଚୁଂବନଵିରଚିତନୀଲିମରୂପମ୍ ।
ଦଶନଵସନମରୁଣଂ ତଵ କୃଷ୍ଣ ତନୋତି ତନୋରନୁରୂପମ୍ ॥ 2 ॥
ଵପୁରନୁହରତି ତଵ ସ୍ମରସଂଗରଖରନଖରକ୍ଷତରେଖମ୍ ।
ମରକତଶକଲକଲିତକଲଧୌତଲିପିରେଵ ରତିଜଯଲେଖମ୍ ॥ 3 ॥
ଚରଣକମଲଗଲଦଲକ୍ତକସିକ୍ତମିଦଂ ତଵ ହୃଦଯମୁଦାରମ୍ ।
ଦର୍ଶଯତୀଵ ବହିର୍ମଦନଦ୍ରୁମନଵକିସଲଯପରିଵାରମ୍ ॥ 4 ॥
ଦଶନପଦଂ ଭଵଦଧରଗତଂ ମମ ଜନଯତି ଚେତସି ଖେଦମ୍ ।
କଥଯତି କଥମଧୁନାପି ମଯା ସହ ତଵ ଵପୁରେତଦଭେଦମ୍ ॥ 5 ॥
ବହିରିଵ ମଲିନତରଂ ତଵ କୃଷ୍ଣ ମନୋଽପି ଭଵିଷ୍ଯତି ନୂନମ୍ ।
କଥମଥ ଵଂଚଯସେ ଜନମନୁଗତମସମଶରଜ୍ଵରଦୂନମ୍ ॥ 6 ॥
ଭ୍ରମତି ଭଵାନବଲାକଵଲାଯ ଵନେଷୁ କିମତ୍ର ଵିଚିତ୍ରମ୍ ।
ପ୍ରଥଯତି ପୂତନିକୈଵ ଵଧୂଵଧନିର୍ଦଯବାଲଚରିତ୍ରମ୍ ॥ 7 ॥
ଶ୍ରୀଜଯଦେଵଭଣିତରତିଵଂଚିତଖଂଡିତଯୁଵତିଵିଲାପମ୍ ।
ଶୃଣୁତ ସୁଧାମଧୁରଂ ଵିବୁଧା ଵିବୁଧାଲଯତୋଽପି ଦୁରାପମ୍ ॥ 8 ॥
ତଦେଵଂ ପଶ୍ଯଂତ୍ଯାଃ ପ୍ରସରଦନୁରାଗଂ ବହିରିଵ ପ୍ରିଯାପାଦାଲକ୍ତଚ୍ଛୁରିତମରୁଣଚ୍ଛାଯହୃଦଯମ୍ ।
ମମାଦ୍ଯ ପ୍ରଖ୍ଯାତପ୍ରଣଯଭରଭଂଗେନ କିତଵ ତ୍ଵଦାଲୋକଃ ଶୋକାଦପି କିମପି ଲଜ୍ଜାଂ ଜନଯତି ॥ 50 ॥
॥ ଇତି ଗୀତଗୋଵିଂଦେ ଖଂଡିତାଵର୍ଣନେ ଵିଲକ୍ଷ୍ଯଲକ୍ଷ୍ମୀପତିର୍ନାମ ଅଷ୍ଠମଃ ସର୍ଗଃ ॥
Browse Related Categories:
