॥ ସପ୍ତମଃ ସର୍ଗଃ ॥
॥ ନାଗରନାରାଯଣଃ ॥
ଅତ୍ରାଂତରେ ଚ କୁଲଟାକୁଲଵର୍ତ୍ମପାତ-ସଂଜାତପାତକ ଇଵ ସ୍ଫୁଟଲାଂଛନଶ୍ରୀଃ ।
ଵୃଂଦାଵନାଂତରମଦୀପଯଦଂଶୁଜାଲୈ-ର୍ଦିକ୍ସୁଂଦରୀଵଦନଚଂଦନବିଂଦୁରିଂଦୁଃ ॥ 40 ॥
ପ୍ରସରତି ଶଶଧରବିଂବେ ଵିହିତଵିଲଂବେ ଚ ମାଧଵେ ଵିଧୁରା ।
ଵିରଚିତଵିଵିଧଵିଲାପଂ ସା ପରିତାପଂ ଚକାରୋଚ୍ଚୈଃ ॥ 41 ॥
॥ ଗୀତଂ 13 ॥
କଥିତସମଯେଽପି ହରିରହହ ନ ଯଯୌ ଵନମ୍ ।
ମମ ଵିଫଲମିଦମମଲରୂପମପି ଯୌଵନମ୍ ॥
ଯାମି ହେ କମିହ ଶରଣଂ ସଖୀଜନଵଚନଵଂଚିତା ॥ 1 ॥
ଯଦନୁଗମନାଯ ନିଶି ଗହନମପି ଶୀଲିତମ୍ ।
ତେନ ମମ ହୃଦଯମିଦମସମଶରକୀଲିତମ୍ ॥ 2 ॥
ମମ ମରଣମେଵ ଵରମତିଵିତଥକେତନା ।
କିମିହ ଵିଷହାମି ଵିରହାନଲଚେତନା ॥ 3 ॥
ମାମହହ ଵିଧୁରଯତି ମଧୁରମଧୁଯାମିନୀ ।
କାପି ହରିମନୁଭଵତି କୃତସୁକୃତକାମିନୀ ॥ 4 ॥
ଅହହ କଲଯାମି ଵଲଯାଦିମଣୀଭୂଷଣମ୍ ।
ହରିଵିରହଦହନଵହନେନ ବହୁଦୂଷଣମ୍ ॥ 5 ॥
କୁସୁମସୁକୁମାରତନୁମତନୁଶରଲୀଲଯା ।
ସ୍ରଗପି ହୃଦି ହଂତି ମାମତିଵିଷମଶୀଲଯା ॥ 6 ॥
ଅହମିହ ନିଵସାମି ନଗଣିତଵନଵେତସା ।
ସ୍ମରତି ମଧୁସୂଦନୋ ମାମପି ନ ଚେତସା ॥ 7 ॥
ହରିଚରଣଶରଣଜଯଦେଵକଵିଭାରତୀ ।
ଵସତୁ ହୃଦି ଯୁଵତିରିଵ କୋମଲକଲାଵତୀ ॥ 8 ॥
ତତ୍କିଂ କାମପି କାମିନୀମଭିସୃତଃ କିଂ ଵା କଲାକେଲିଭି-ର୍ବଦ୍ଧୋ ବଂଧୁଭିରଂଧକାରିଣି ଵନୋପାଂତେ କିମୁ ଭ୍ରାମ୍ଯତି ।
କାଂତଃ କ୍ଲାଂତମନା ମନାଗପି ପଥି ପ୍ରସ୍ଥାତୁମେଵାକ୍ଷମଃ ସଂକେତୀକୃତମଂଜୁଵଂଜୁଲଲତାକୁଂଜେଽପି ଯନ୍ନାଗତଃ ॥ 42 ॥
ଅଥାଗତାଂ ମାଧଵମଂତରେଣ ସଖୀମିଯଂ ଵୀକ୍ଷ୍ଯ ଵିଷାଦମୂକାମ୍ ।
ଵିଶଂକ୍ମାନା ରମିତଂ କଯାପି ଜନାର୍ଦନଂ ଦୃଷ୍ଟଵଦେତଦାହ ॥ 43 ॥
॥ ଗୀତମ୍ 14 ॥
ସ୍ମରସମରୋଚିତଵିରଚିତଵେଶା ।
ଗଲିତକୁସୁମଦରଵିଲୁଲିତକେଶା ॥
କାପି ମଧୁରିପୁଣା ଵିଲସତି ଯୁଵତିରଧିକଗୁଣା ॥ 1 ॥
ହରିପରିରଂଭଣଵଲିତଵିକାରା ।
କୁଚକଲଶୋପରି ତରଲିତହାରା ॥ 2 ॥
ଵିଚଲଦଲକଲଲିତାନନଚଂଦ୍ରା ।
ତଦଧରପାନରଭସକୃତତଂଦ୍ରା ॥ 3 ॥
ଚଂଚଲକୁଂଡଲଦଲିତକପୋଲା ।
ମୁଖରିତରସନଜଘନଗଲିତଲୋଲା ॥ 4 ॥
ଦଯିତଵିଲୋକିତଲଜ୍ଜିତହସିତା ।
ବହୁଵିଧକୂଜିତରତିରସରସିତା ॥ 5 ॥
ଵିପୁଲପୁଲକପୃଥୁଵେପଥୁଭଂଗା ।
ଶ୍ଵସିତନିମୀଲିତଵିକସଦନଂଗା ॥ 6 ॥
ଶ୍ରମଜଲକଣଭରସୁଭଗଶରୀରା ।
ପରିପତିତୋରସି ରତିରଣଧୀରା ॥ 7 ॥
ଶ୍ରୀଜଯଦେଵଭଣିତହରିରମିତମ୍ ।
କଲିକଲୁଷଂ ଜନଯତୁ ପରିଶମିତମ୍ ॥ 8 ॥
ଵିରହପାଂଡୁମୁରାରିମୁଖାଂବୁଜ-ଦ୍ଯୁତିରିଯଂ ତିରଯନ୍ନପି ଚେତନାମ୍ ।
ଵିଧୁରତୀଵ ତନୋତି ମନୋଭୁଵଃ ସହୃଦଯେ ହୃଦଯେ ମଦନଵ୍ଯଥାମ୍ ॥ 44 ॥
॥ ଗୀତମ୍ 15 ॥
ସମୁଦିତମଦନେ ରମଣୀଵଦନେ ଚୁଂବନଵଲିତାଧରେ ।
ମୃଗମଦତିଲକଂ ଲିଖତି ସପୁଲକଂ ମୃଗମିଵ ରଜନୀକରେ ॥
ରମତେ ଯମୁନାପୁଲିନଵନେ ଵିଜଯୀ ମୁରାରିରଧୁନା ॥ 1 ॥
ଘନଚଯରୁଚିରେ ରଚଯତି ଚିକୁରେ ତରଲିତତରୁଣାନନେ ।
କୁରବକକୁସୁମଂ ଚପଲାସୁଷମଂ ରତିପତିମୃଗକାନନେ ॥ 2 ॥
ଘଟଯତି ସୁଘନେ କୁଚଯୁଗଗଗନେ ମୃଗମଦରୁଚିରୂଷିତେ ।
ମଣିସରମମଲଂ ତାରକପଟଲଂ ନଖପଦଶଶିଭୂଷିତେ ॥ 3 ॥
ଜିତବିସଶକଲେ ମୃଦୁଭୁଜଯୁଗଲେ କରତଲନଲିନୀଦଲେ ।
ମରକତଵଲଯଂ ମଧୁକରନିଚଯଂ ଵିତରତି ହିମଶୀତଲେ ॥ 4 ॥
ରତିଗୃହଜଘନେ ଵିପୁଲାପଘନେ ମନସିଜକନକାସନେ ।
ମଣିମଯରସନଂ ତୋରଣହସନଂ ଵିକିରତି କୃତଵାସନେ ॥ 5 ॥
ଚରଣକିସଲଯେ କମଲାନିଲଯେ ନଖମଣିଗଣପୂଜିତେ ।
ବହିରପଵରଣଂ ଯାଵକଭରଣଂ ଜନଯତି ହୃଦି ଯୋଜିତେ ॥ 6 ॥
ରମଯତି ସଦୃଶଂ କାମପି ସୁଭୃଶଂ ଖଲହଲଧରସୋଦରେ ।
କିମଫଲମଵସଂ ଚିରମିହ ଵିରସଂ ଵଦ ସଖି ଵିଟପୋଦରେ ॥ 7 ॥
ଇହ ରସଭଣନେ କୃତହରିଗୁଣନେ ମଧୁରିପୁପଦସେଵକେ ।
କଲିଯୁଗଚରିତଂ ନ ଵସତୁ ଦୁରିତଂ କଵିନୃପଜଯଦେଵକେ ॥ 8 ॥
ନାଯାତଃ ସଖି ନିର୍ଦଯୋ ଯଦି ଶଠସ୍ତ୍ଵଂ ଦୂତି କିଂ ଦୂଯସେ ସ୍ଵଚ୍ଛଂଦଂ ବହୁଵଲ୍ଲଭଃ ସ ରମତେ କିଂ ତତ୍ର ତେ ଦୂଷଣମ୍ ।
ପଶ୍ଯାଦ୍ଯ ପ୍ରିଯସମ୍ଗମାଯ ଦଯିତସ୍ଯାକୃଷ୍ଯମାଣଂ ଗଣୈ-ରୁତ୍କଂଠାର୍ତିଭରାଦିଵ ସ୍ଫୁଟଦିଦଂ ଚେତଃ ସ୍ଵଯଂ ଯାସ୍ଯତି ॥ 45 ॥
॥ ଗୀତମ୍ 16 ॥
ଅନିଲତରଲକୁଵଲଯନଯନେନ ।
ତପତି ନ ସା କିସଲଯଶଯନେନ ॥
ସଖି ଯା ରମିତା ଵନମାଲିନା ॥ 1 ॥
ଵିକସିତସରସିଜଲଲିତମୁଖେନ ।
ସ୍ଫୁଟତି ନ ସା ମନସିଜଵିଶିଖେନ ॥ 2 ॥
ଅମୃତମଧୁରମୃଦୁତରଵଚନେନ ।
ଜ୍ଵଲତି ନ ସା ମଲଯଜପଵନେନ ॥ 3 ॥
ସ୍ଥଲଜଲରୁହରୁଚିକରଚରଣେନ ।
ଲୁଠତି ନ ସା ହିମକରକିରଣେନ ॥ 4 ॥
ସଜଲଜଲଦସମୁଦଯରୁଚିରେଣ ।
ଦଲତି ନ ସା ହୃଦି ଚିରଵିରହେଣ ॥ 5 ॥
କନକନିକଷରୁଚିଶୁଚିଵସନେନ ।
ଶ୍ଵସତି ନ ସା ପରିଜନହସନେନ ॥ 6 ॥
ସକଲଭୁଵନଜନଵରତରୁଣେନ ।
ଵହତି ନ ସା ରୁଜମତିକରୁଣେନ ॥ 7 ॥
ଶ୍ରୀଜଯଦେଵଭଣିତଵଚନେନ ।
ପ୍ରଵିଶତୁ ହରିରପି ହୃଦଯମନେନ ॥ 8 ॥
ମନୋଭଵାନଂଦନ ଚଂଦନାନିଲ ପ୍ରସୀଦ ରେ ଦକ୍ଷିଣ ମୁଂଚ ଵାମତାମ୍ ।
କ୍ଷଣଂ ଜଗତ୍ପ୍ରାଣ ଵିଧାଯ ମାଧଵଂ ପୁରୋ ମମ ପ୍ରାଣହରୋ ଭଵିଷ୍ଯସି ॥ 46 ॥
ରିପୁରିଵ ସଖୀସଂଵାସୋଽଯଂ ଶିଖୀଵ ହିମାନିଲୋ ଵିଷମିଵ ସୁଧାରଶ୍ମିର୍ଯସ୍ମିଂଦୁନୋତି ମନୋଗତେ ।
ହୃଦଯମଦଯେ ତସ୍ମିନ୍ନେଵଂ ପୁନର୍ଵଲତେ ବଲାତ୍ କୁଵଲଯଦୃଶାଂ ଵାମଃ କାମୋ ନିକାମନିରଂକୁଶଃ ॥ 47 ॥
ବାଧାଂ ଵିଧେହି ମଲଯାନିଲ ପଂଚବାଣ ପ୍ରାଣାନ୍ଗୃହାଣ ନ ଗୃହଂ ପୁନରାଶ୍ରଯିଷ୍ଯେ ।
କିଂ ତେ କୃତାଂତଭଗିନି କ୍ଷମଯା ତରଂଗୈ-ରଂଗାନି ସିଂଚ ମମ ଶାମ୍ଯତୁ ଦେହଦାହଃ ॥ 48 ॥
ପ୍ରାତର୍ନୀଲନିଚୋଲମଚ୍ଯୁତମୁରସ୍ସଂଵୀତପୀତାଂବରମ୍
ରଧାଯାଶ୍କିତଂ ଵିଲୋକ୍ଯ ହସତି ସ୍ଵୈରଂ ସଖୀମଂଡଲେ ।
ଵ୍ରୀଡାଚଂଚଲମଂଚଲଂ ନଯନଯୋରାଧାଯ ରାଧାନନେ
ସ୍ଵାଦୁସ୍ମେରମୁଖୋଽଯମସ୍ତୁ ଜଗଦାନଂଦାଯ ନଂଦାତ୍ମଜଃ॥ (କସ୍ମିଂଶ୍ଚନ ପାଠାଂତରେ ଇଦଂ ପଦ୍ଯଂ ଵିଦ୍ଯତେ)
॥ ଇତି ଗୀତଗୋଵିଂଦେ ଵିପ୍ରଲବ୍ଧାଵର୍ଣନେ ନାଗନାରାଯଣୋ ନାମ ସପ୍ତମଃ ସର୍ଗଃ ॥
Browse Related Categories:
