॥ ଷଷ୍ଠଃ ସର୍ଗଃ ॥
॥ କୁଂଠଵୈକୁଂଠଃ ॥
ଅଥ ତାଂ ଗଂତୁମଶକ୍ତାଂ ଚିରମନୁରକ୍ତାଂ ଲତାଗୃହେ ଦୃଷ୍ଟ୍ଵା ।
ତଚ୍ଚରିତଂ ଗୋଵିଂଦେ ମନସିଜମଂଦେ ସଖୀ ପ୍ରାହ ॥ 37 ॥
॥ ଗୀତମ୍ 12 ॥
ପଶ୍ଯତି ଦିଶି ଦିଶି ରହସି ଭଵଂତମ୍ ।
ତଦଧରମଧୁରମଧୂନି ପିବଂତମ୍ ॥
ନାଥ ହରେ ଜଗନ୍ନାଥ ହରେ ସୀଦତି ରାଧା ଵାସଗୃହେ - ଧ୍ରୁଵମ୍ ॥ 1 ॥
ତ୍ଵଦଭିସରଣରଭସେନ ଵଲଂତୀ ।
ପତତି ପଦାନି କିଯଂତି ଚଲଂତୀ ॥ 2 ॥
ଵିହିତଵିଶଦବିସକିସଲଯଵଲଯା ।
ଜୀଵତି ପରମିହ ତଵ ରତିକଲଯା ॥ 3 ॥
ମୁହୁରଵଲୋକିତମଂଡନଲୀଲା ।
ମଧୁରିପୁରହମିତି ଭାଵନଶୀଲା ॥ 4 ॥
ତ୍ଵରିତମୁପୈତି ନ କଥମଭିସାରମ୍ ।
ହରିରିତି ଵଦତି ସଖୀମନୁଵାରମ୍ ॥ 5 ॥
ଶ୍ଲିଷ୍ଯତି ଚୁଂବତି ଜଲଧରକଲ୍ପମ୍ ।
ହରିରୁପଗତ ଇତି ତିମିରମନଲ୍ପମ୍ ॥ 6 ॥
ଭଵତି ଵିଲଂବିନି ଵିଗଲିତଲଜ୍ଜା ।
ଵିଲପତି ରୋଦିତି ଵାସକସଜ୍ଜା ॥ 7 ॥
ଶ୍ରୀଜଯଦେଵକଵେରିଦମୁଦିତମ୍ ।
ରସିକଜନଂ ତନୁତାମତିମୁଦିତମ୍ ॥ 8 ॥
ଵିପୁଲପୁଲକପାଲିଃ ସ୍ଫୀତସୀତ୍କାରମଂତ-ର୍ଜନିତଜଡିମକାକୁଵ୍ଯାକୁଲଂ ଵ୍ଯାହରଂତୀ ।
ତଵ କିତଵ ଵିଧତ୍ତେଽମଂଦକଂଦର୍ପଚିଂତାଂ ରସଜଲଧିନିମଗ୍ନା ଧ୍ଯାନଲଗ୍ନା ମୃଗାକ୍ଷୀ ॥ 38 ॥
ଅଂଗେଷ୍ଵାଭରଣଂ କରୋତି ବହୁଶଃ ପତ୍ରେଽପି ସଂଚାରିଣି ପ୍ରାପ୍ତଂ ତ୍ଵାଂ ପରିଶଂକତେ ଵିତନୁତେ ଶଯ୍ଯାଂ ଚିରଂ ଧ୍ଯାଯତି ।
ଇତ୍ଯାକଲ୍ପଵିକଲ୍ପତଲ୍ପରଚନାସଂକଲ୍ପଲୀଲାଶତ-ଵ୍ଯାସକ୍ତାପି ଵିନା ତ୍ଵଯା ଵରତନୁର୍ନୈଷା ନିଶାଂ ନେଷ୍ଯତି ॥ 39 ॥
କିଂ ଵିଶ୍ରାମ୍ଯସି କୃଷ୍ଣଭୋଗିଭଵନେ ଭାଂଡୀରଭୂମୀରୁହି ଭ୍ରାତ ର୍ଯାହି ନଦୃଷ୍ଟିଗୋଚରମିତସ୍ସାନଂଦନଂଦାସ୍ପଦମ୍।
ରଧାଯାଵଚନମ୍ ତଦଧ୍ଵଗମୁଖାନ୍ନଂଦାଂତିକେଗୋପତୋ ଗୋଵିଂଦସ୍ଯଜଯଂତି ସାଯମତିଥିପ୍ରାଶସ୍ତ୍ଯଗର୍ଭାଗିରଃ॥ 40 ॥
॥ ଇତି ଗୀତଗୋଵିଂଦେ ଵାସକସଜ୍ଜାଵର୍ଣନେ କୁଂଠଵୈକୁଂଠୋ ନାମ ଷଷ୍ଠଃ ସର୍ଗଃ ॥
Browse Related Categories:
