॥ ପଂଚମଃ ସର୍ଗଃ ॥
॥ ସାକାଂକ୍ଷପୁଂଡରୀକାକ୍ଷଃ ॥
ଅହମିହ ନିଵସାମି ଯାହି ରାଧାଂ ଅନୁନଯ ମଦ୍ଵଚନେନ ଚାନଯେଥାଃ ।
ଇତି ମଧୁରିପୁଣା ସଖୀ ନିଯୁକ୍ତା ସ୍ଵଯମିଦମେତ୍ଯ ପୁନର୍ଜଗାଦ ରାଧାମ୍ ॥ 31 ॥
॥ ଗୀତମ୍ 10 ॥
ଵହତି ମଲଯସମୀରେ ମଦନମୁପନିଧାଯ ।
ସ୍ଫୁଟତି କୁସୁମନିକରେ ଵିରହିହୃଦଯଦଲନାଯ ॥
ତଵ ଵିରହେ ଵନମାଲୀ ସଖି ସୀଦତି ॥ 1 ॥
ଦହତି ଶିଶିରମଯୂଖେ ମରଣମନୁକରୋତି ।
ପତତି ମଦନଵିଶିଖେ ଵିଲପତି ଵିକଲତରୋଽତି ॥ 2 ॥
ଧ୍ଵନତି ମଧୁପସମୂହେ ଶ୍ରଵଣମପିଦଧାତି ।
ମନସି ଚଲିତଵିରହେ ନିଶି ନିଶି ରୁଜମୁପଯାତି ॥ 3 ॥
ଵସତି ଵିପିନଵିତାନେ ତ୍ଯଜତି ଲଲିତଧାମ ।
ଲୁଠତି ଧରଣିଶଯନେ ବହୁ ଵିଲପତି ତଵ ନାମ ॥ 4 ॥
ରଣତି ପିକସମଵାଯେ ପ୍ରତିଦିଶମନୁଯାତି ।
ହସତି ମନୁଜନିଚଯେ ଵିରହମପଲପତି ନେତି ॥ 5 ॥
ସ୍ଫୁରତି କଲରଵରାଵେ ସ୍ମରତି ମଣିତମେଵ।
ତଵରତିସୁଖଵିଭଵେ ଗଣଯତି ସୁଗୁଣମତୀଵ ॥ 6 ॥
ତ୍ଵଦଭିଧଶୁଭଦମାସଂ ଵଦତି ନରି ଶୃଣୋତି ।
ତମପି ଜପତି ସରସଂ ଯୁଵତିଷୁ ନ ରତିମୁପୈତି ॥ 7 ॥
ଭଣତି କଵିଜଯଦେଵେ ଵିରହଵିଲସିତେନ ।
ମନସି ରଭସଵିଭଵେ ହରିରୁଦଯତୁ ସୁକୃତେନ ॥ 8 ॥
ପୂର୍ଵଂ ଯତ୍ର ସମଂ ତ୍ଵଯା ରତିପତେରାସାଦିତଃ ସିଦ୍ଧଯ-ସ୍ତସ୍ମିନ୍ନେଵ ନିକୁଂଜମନ୍ମଥମହାତୀର୍ଥେ ପୁନର୍ମାଧଵଃ ।
ଧ୍ଯାଯଂସ୍ତ୍ଵାମନିଶଂ ଜପନ୍ନପି ତଵୈଵାଲାପମଂତ୍ରାଵଲୀଂ ଭୂଯସ୍ତ୍ଵତ୍କୁଚକୁଂଭନିର୍ଭରପରୀରଂଭାମୃତଂ ଵାଂଛତି ॥ 32 ॥
॥ ଗୀତମ୍ 11 ॥
ରତିସୁଖସାରେ ଗତମଭିସାରେ ମଦନମନୋହରଵେଶମ୍ ।
ନ କୁରୁ ନିତଂବିନି ଗମନଵିଲଂବନମନୁସର ତଂ ହୃଦଯେଶମ୍ ॥
ଧୀରସମୀରେ ଯମୁନାତୀରେ ଵସତି ଵନେ ଵନମାଲୀ ॥ 1 ॥
ନାମ ସମେତଂ କୃତସଂକେତଂ ଵାଦଯତେ ମୃଦୁଵେଣୁମ୍ ।
ବହୁ ମନୁତେ ନନୁ ତେ ତନୁସଂଗତପଵନଚଲିତମପି ରେଣୁମ୍ ॥ 2 ॥
ପତତି ପତତ୍ରେ ଵିଚଲତି ପତ୍ରେ ଶଂକିତଭଵଦୁପଯାନମ୍ ।
ରଚଯତି ଶଯନଂ ସଚକିତନଯନଂ ପଶ୍ଯତି ତଵ ପଂଥାନମ୍ ॥ 3 ॥
ମୁଖରମଧୀରଂ ତ୍ଯଜ ମଂଜୀରଂ ରିପୁମିଵ କେଲିଷୁଲୋଲମ୍ ।
ଚଲ ସଖି କୁଂଜଂ ସତିମିରପୁଂଜଂ ଶୀଲଯ ନୀଲନିଚୋଲମ୍ ॥ 4 ॥
ଉରସି ମୁରାରେରୁପହିତହାରେ ଘନ ଇଵ ତରଲବଲାକେ ।
ତଟିଦିଵ ପୀତେ ରତିଵିପରୀତେ ରାଜସି ସୁକୃତଵିପାକେ ॥ 5 ॥
ଵିଗଲିତଵସନଂ ପରିହୃତରସନଂ ଘଟଯ ଜଘନମପିଧାନମ୍ ।
କିସଲଯଶଯନେ ପଂକଜନଯନେ ନିଧିମିଵ ହର୍ଷନିଦାନମ୍ ॥ 6 ॥
ହରିରଭିମାନୀ ରଜନିରିଦାନୀମିଯମପି ଯାତି ଵିରାମମ୍ ।
କୁରୁ ମମ ଵଚନଂ ସତ୍ଵରରଚନଂ ପୂରଯ ମଧୁରିପୁକାମମ୍ ॥ 7 ॥
ଶ୍ରୀଜଯଦେଵେ କୃତହରିସେଵେ ଭଣତି ପରମରମଣୀଯମ୍ ।
ପ୍ରମୁଦିତହୃଦଯଂ ହରିମତିସଦଯଂ ନମତ ସୁକୃତକମନୀଯମ୍ ॥ 8 ॥
ଵିକିରତି ମୁହୁଃ ଶ୍ଵାସାଂଦିଶଃ ପୁରୋ ମୁହୁରୀକ୍ଷତେ ପ୍ରଵିଶତି ମୁହୁଃ କୁଂଜଂ ଗୁଂଜନ୍ମୁହୁର୍ବହୁ ତାମ୍ଯତି ।
ରଚଯତି ମୁହୁଃ ଶଯ୍ଯାଂ ପର୍ଯାକୁଲଂ ମୁହୁରୀକ୍ଷତେ ମଦନକଦନକ୍ଲାଂତଃ କାଂତେ ପ୍ରିଯସ୍ତଵ ଵର୍ତତେ ॥ 33 ॥
ତ୍ଵଦ୍ଵାମ୍ଯେନ ସମଂ ସମଗ୍ରମଧୁନା ତିଗ୍ମାଂଶୁରସ୍ତଂ ଗତୋ ଗୋଵିଂଦସ୍ଯ ମନୋରଥେନ ଚ ସମଂ ପ୍ରାପ୍ତଂ ତମଃ ସାଂଦ୍ରତାମ୍ ।
କୋକାନାଂ କରୁଣସ୍ଵନେନ ସଦୃଶୀ ଦୀର୍ଘା ମଦଭ୍ଯର୍ଥନା ତନ୍ମୁଗ୍ଧେ ଵିଫଲଂ ଵିଲଂବନମସୌ ରମ୍ଯୋଽଭିସାରକ୍ଷଣଃ ॥ 34 ॥
ଆଶ୍ଲେଷାଦନୁ ଚୁଂବନାଦନୁ ନଖୋଲ୍ଲେଖାଦନୁ ସ୍ଵାଂତଜ-ପ୍ରୋଦ୍ବୋଧାଦନୁ ସଂଭ୍ରମାଦନୁ ରତାରଂଭାଦନୁ ପ୍ରୀତଯୋଃ ।
ଅନ୍ଯାର୍ଥଂ ଗତଯୋର୍ଭ୍ରମାନ୍ମିଲିତଯୋଃ ସଂଭାଷଣୈର୍ଜାନତୋ-ର୍ଦଂପତ୍ଯୋରିହ କୋ ନ କୋ ନ ତମସି ଵ୍ରୀଡାଵିମିଶ୍ରୋ ରସଃ ॥ 35 ॥
ସଭଯଚକିତଂ ଵିନ୍ଯସ୍ଯଂତୀଂ ଦୃଶୌ ତିମିରେ ପଥି ପ୍ରତିତରୁ ମୁହୁଃ ସ୍ଥିତ୍ଵା ମଂଦଂ ପଦାନି ଵିତନ୍ଵତୀମ୍ ।
କଥମପି ରହଃ ପ୍ରାପ୍ତାମଂଗୈରନଂଗତରଂଗିଭିଃ ସୁମୁଖି ସୁଭଗଃ ପଶ୍ଯନ୍ସ ତ୍ଵାମୁପୈତୁ କୃତାର୍ଥତାମ୍ ॥ 36 ॥
ରାଧାମୁଗ୍ଧମୁଖାରଵିଂଦମଧୁପସ୍ତ୍ରୈଲୋକ୍ଯମୌଲିସ୍ଥଲୀ ନେପଥ୍ଯୋଚିତନୀଲରତ୍ନମଵନୀଭାରାଵତାରାଂତକଃ।
ସ୍ଵଚ୍ଛଂଦଂ ଵ୍ରଜସୁବ୍ଦରୀଜନମନସ୍ତୋଷପ୍ରଦୋଷୋଦଯଃ କଂସଧ୍ଵଂସନଧୂମକେତୁରଵତୁ ତ୍ଵାମ୍ ଦେଵକୀନଂଦନଃ॥ 36 + 1 ॥
॥ ଇତି ଶ୍ରୀଗୀତଗୋଵିଂଦେଽଭିସାରିକଵର୍ଣନେ ସାକାଂକ୍ଷପୁଂଡରୀକାକ୍ଷୋ ନାମ ପଂଚମଃ ସର୍ଗଃ ॥
Browse Related Categories:
