॥ ଚତୁର୍ଥଃ ସର୍ଗଃ ॥
॥ ସ୍ନିଗ୍ଧମଧୁସୂଦନଃ ॥
ଯମୁନାତୀରଵାନୀରନିକୁଂଜେ ମଂଦମାସ୍ଥିତମ୍ ।
ପ୍ରାହ ପ୍ରେମଭରୋଦ୍ଭ୍ରାଂତଂ ମାଧଵଂ ରାଧିକାସଖୀ ॥ 25 ॥
॥ ଗୀତମ୍ 8 ॥
ନିଂଦତି ଚଂଦନମିଂଦୁକିରଣମନୁ ଵିଂଦତି ଖେଦମଧୀରମ୍ ।
ଵ୍ଯାଲନିଲଯମିଲନେନ ଗରଲମିଵ କଲଯତି ମଲଯସମୀରମ୍ ॥
ସା ଵିରହେ ତଵ ଦୀନା ମାଧଵ ମନସିଜଵିଶିଖଭଯାଦିଵ ଭାଵନଯା ତ୍ଵଯି ଲୀନା ॥ 1 ॥
ଅଵିରଲନିପତିତମଦନଶରାଦିଵ ଭଵଦଵନାଯ ଵିଶାଲମ୍ ।
ସ୍ଵହୃଦଯର୍ମଣୀ ଵର୍ମ କରୋତି ସଜଲନଲିନୀଦଲଜାଲମ୍ ॥ 2 ॥
କୁସୁମଵିଶିଖଶରତଲ୍ପମନଲ୍ପଵିଲାସକଲାକମନୀଯମ୍ ।
ଵ୍ରତମିଵ ତଵ ପରିରଂଭସୁଖାଯ କରୋତି କୁସୁମଶଯନୀଯମ୍ ॥ 3 ॥
ଵହତି ଚ ଗଲିତଵିଲୋଚନଜଲଭରମାନନକମଲମୁଦାରମ୍ ।
ଵିଧୁମିଵ ଵିକଟଵିଧୁଂତୁଦଦଂତଦଲନଗଲିତାମୃତଧାରମ୍ ॥ 4 ॥
ଵିଲିଖତି ରହସି କୁରଂଗମଦେନ ଭଵଂତମସମଶରଭୂତମ୍ ।
ପ୍ରଣମତି ମକରମଧୋ ଵିନିଧାଯ କରେ ଚ ଶରଂ ନଵଚୂତମ୍ ॥ 5 ॥
ପ୍ରତିପଦମିଦମପି ନିଗତତି ମାଧଵ ତଵ ଚରଣେ ପତିତାହମ୍ ।
ତ୍ଵଯି ଵିମୁଖେ ମଯି ସପଦି ସୁଧାନିଧିରପି ତନୁତେ ତନୁଦାହମ୍ ॥ 6 ॥
ଧ୍ଯାନଲଯେନ ପୁରଃ ପରିକଲ୍ପ୍ଯ ଭଵଂତମତୀଵ ଦୁରାପମ୍ ।
ଵିଲପତି ହସତି ଵିଷୀଦତି ରୋଦିତି ଚଂଚତି ମୁଂଚତି ତାପମ୍ ॥ 7 ॥
ଶ୍ରୀଜଯଦେଵଭଣିତମିଦମଧିକଂ ଯଦି ମନସା ନଟନୀଯମ୍ ।
ହରିଵିରହାକୁଲବଲ୍ଲଵଯୁଵତିସଖୀଵଚନଂ ପଠନୀଯମ୍ ॥ 8 ॥
ଆଵାସୋ ଵିପିନାଯତେ ପ୍ରିଯସଖୀମାଲାପି ଜାଲାଯତେ ତାପୋଽପି ଶ୍ଵସିତେନ ଦାଵଦହନଜ୍ଵାଲାକଲାପାଯତେ ।
ସାପି ତ୍ଵଦ୍ଵିରହେଣ ହଂତ ହରିଣୀରୂପାଯତେ ହା କଥଂ କଂଦର୍ପୋଽପି ଯମାଯତେ ଵିରଚଯଞ୍ଶାର୍ଦୂଲଵିକ୍ରୀଡିତମ୍ ॥ 26 ॥
॥ ଗୀତମ୍ 9 ॥
ସ୍ତନଵିନିହିତମପି ହାରମୁଦାରମ୍ ।
ସା ମନୁତେ କୃଶତନୁରତିଭାରମ୍ ॥
ରାଧିକା ଵିରହେ ତଵ କେଶଵ ॥ 1 ॥
ସରସମସୃଣମପି ମଲଯଜପଂକମ୍ ।
ପଶ୍ଯତି ଵିଷମିଵ ଵପୁଷି ସଶଂକମ୍ ॥ 2 ॥
ଶ୍ଵସିତପଵନମନୁପମପରିଣାହମ୍ ।
ମଦନଦହନମିଵ ଵହତି ସଦାହମ୍ ॥ 3 ॥
ଦିଶି ଦିଶି କିରତି ସଜଲକଣଜାଲମ୍ ।
ନଯନନଲିନମିଵ ଵିଗଲିତନାଲମ୍ ॥ 4 ॥
ନଯନଵିଷଯମପି କିସଲଯତଲ୍ପମ୍ ।
କଲଯତି ଵିହିତହୁତାଶଵିକଲ୍ପମ୍ ॥ 5 ॥
ତ୍ଯଜତି ନ ପାଣିତଲେନ କପୋଲମ୍ ।
ବାଲଶଶିନମିଵ ସାଯମଲୋଲମ୍ ॥ 6 ॥
ହରିରିତି ହରିରିତି ଜପତି ସକାମମ୍ ।
ଵିରହଵିହିତମରଣେନ ନିକାମମ୍ ॥ 7 ॥
ଶ୍ରୀଜଯଦେଵଭଣିତମିତି ଗୀତମ୍ ।
ସୁଖଯତୁ କେଶଵପଦମୁପୁନୀତମ୍ ॥ 8 ॥
ସା ରୋମାଂଚତି ସୀତ୍କରୋତି ଵିଲପତ୍ଯୁତ୍କଂପତେ ତାମ୍ଯତି ଧ୍ଯାଯତ୍ଯୁଦ୍ଭ୍ରମତି ପ୍ରମୀଲତି ପତତ୍ଯୁଦ୍ଯାତି ମୂର୍ଚ୍ଛତ୍ଯପି ।
ଏତାଵତ୍ଯତନୁଜ୍ଵରେ ଵରତନୁର୍ଜୀଵେନ୍ନ କିଂ ତେ ରସାତ୍ ସ୍ଵର୍ଵୈଦ୍ଯପ୍ରତିମ ପ୍ରସୀଦସି ଯଦି ତ୍ଯକ୍ତୋଽନ୍ଯଥା ନାଂତକଃ ॥ 27 ॥
ସ୍ମରାତୁରାଂ ଦୈଵତଵୈଦ୍ଯହୃଦ୍ଯ ତ୍ଵଦଂଗସଂଗାମୃତମାତ୍ରସାଧ୍ଯାମ୍ ।
ଵିମୁକ୍ତବାଧାଂ କୁରୁଷେ ନ ରାଧା-ମୁପେଂଦ୍ର ଵଜ୍ରାଦପି ଦାରୁଣୋଽସି ॥ 28 ॥
କଂଦର୍ପଜ୍ଵରସଂଜ୍ଵରସ୍ତୁରତନୋରାଶ୍ଚର୍ଯମସ୍ଯାଶ୍ଚିରଂ ଚେତଶ୍ଚଂଦନଚଂଦ୍ରମଃକମଲିନୀଚିଂତାସୁ ସଂତାମ୍ଯତି ।
କିଂତୁ କ୍ଲାଂତିଵଶେନ ଶୀତଲତନୁଂ ତ୍ଵାମେକମେଵ ପ୍ରିଯଂ ଧ୍ଯାଯଂତୀ ରହସି ସ୍ଥିତା କଥମପି କ୍ଷୀଣା କ୍ଷଣଂ ପ୍ରାଣିତି ॥ 29 ॥
କ୍ଷଣମପି ଵିରହଃ ପୁରା ନ ସେହେ ନଯନନିମୀଲନଖିନ୍ନଯା ଯଯା ତେ ।
ଶ୍ଵସିତି କଥମସୌ ରସାଲଶାଖାଂ ଚିରଵିରହେଣ ଵିଲୋକ୍ଯ ପୁଷ୍ପିତାଗ୍ରାମ୍ ॥ 30 ॥
॥ ଇତି ଗୀତଗୋଵିଂଦେ ସ୍ନିଗ୍ଧମାଧଵୋ ନାମ ଚତୁର୍ଥଃ ସର୍ଗଃ ॥
Browse Related Categories:
