॥ ତୃତୀଯଃ ସର୍ଗଃ ॥
॥ ମୁଗ୍ଧମଧୁସୂଦନଃ ॥
କଂସାରିରପି ସଂସାରଵାସନାବଂଧଶୃଂଖଲାମ୍ ।
ରାଧାମାଧାଯ ହୃଦଯେ ତତ୍ଯାଜ ଵ୍ରଜସୁଂଦରୀଃ ॥ 18 ॥
ଇତସ୍ତତସ୍ତାମନୁସୃତ୍ଯ ରାଧିକା-ମନଂଗବାଣଵ୍ରଣଖିନ୍ନମାନସଃ ।
କୃତାନୁତାପଃ ସ କଲିଂଦନଂଦିନୀ-ତଟାଂତକୁଂଜେ ଵିଷସାଦ ମାଧଵଃ ॥ 19 ॥
॥ ଗୀତମ୍ 7 ॥
ମାମିଯଂ ଚଲିତା ଵିଲୋକ୍ଯ ଵୃତଂ ଵଧୂନିଚଯେନ ।
ସାପରାଧତଯା ମଯାପି ନ ଵାରିତାତିଭଯେନ ॥
ହରି ହରି ହତାଦରତଯା ଗତା ସା କୁପିତେଵ ॥ 1 ॥
କିଂ କରିଷ୍ଯତି କିଂ ଵଦିଷ୍ଯତି ସା ଚିରଂ ଵିରହେଣ ।
କିଂ ଧନେନ ଜନେନ କିଂ ମମ ଜୀଵନେନ ଗୃହେଣ ॥ 2 ॥
ଚିଂତଯାମି ତଦାନନଂ କୁଟିଲଭ୍ରୁ କୋପଭରେଣ ।
ଶୋଣପଦ୍ମମିଵୋପରି ଭ୍ରମତାକୁଲଂ ଭ୍ରମରେଣ ॥ 3 ॥
ତାମହଂ ହୃଦି ସଂଗତାମନିଶଂ ଭୃଶଂ ରମଯାମି ।
କିଂ ଵନେଽନୁସରାମି ତାମିହ କିଂ ଵୃଥା ଵିଲପାମି ॥ 4 ॥
ତନ୍ଵି ଖିନ୍ନମସୂଯଯା ହୃଦଯଂ ତଵାକଲଯାମି ।
ତନ୍ନ ଵେଦ୍ମି କୁତୋ ଗତାସି ନ ତେନ ତେଽନୁନଯାମି ॥ 5 ॥
ଦୃଶ୍ଯତେ ପୁରତୋ ଗତାଗତମେଵ ମେ ଵିଦଧାସି ।
କିଂ ପୁରେଵ ସସଂଭ୍ରମଂ ପରିରଂଭଣଂ ନ ଦଦାସି ॥ 6 ॥
କ୍ଷମ୍ଯତାମପରଂ କଦାପି ତଵେଦୃଶଂ ନ କରୋମି ।
ଦେହି ସୁଂଦରି ଦର୍ଶନଂ ମମ ମନ୍ମଥେନ ଦୁନୋମି ॥ 7 ॥
ଵର୍ଣିତଂ ଜଯଦେଵକେନ ହରେରିଦଂ ପ୍ରଵଣେନ ।
କିଂଦୁବିଲ୍ଵସମୁଦ୍ରସଂଭଵରୋହିଣୀରମଣେନ ॥ 8 ॥
ହୃଦି ବିସଲତାହାରୋ ନାଯଂ ଭୁଜଂଗମନାଯକଃ କୁଵଲଯଦଲଶ୍ରେଣୀ କଂଠେ ନ ସା ଗରଲଦ୍ଯୁତିଃ ।
ମଲଯଜରଜୋ ନେଦଂ ଭସ୍ମ ପ୍ରିଯାରହିତେ ମଯି ପ୍ରହର ନ ହରଭ୍ରାଂତ୍ଯାନଂଗ କ୍ରୁଧା କିମୁ ଧାଵସି ॥ 20 ॥
ପାଣୌ ମା କୁରୁ ଚୂତସାଯକମମୁଂ ମା ଚାପମାରୋପଯ କ୍ରୀଡାନିର୍ଜିତଵିଶ୍ଵ ମୂର୍ଛିତଜନାଘାତେନ କିଂ ପୌରୁଷମ୍ ।
ତସ୍ଯା ଏଵ ମୃଗୀଦୃଶୋ ମନସିଜପ୍ରେଂଖତ୍କଟାକ୍ଷାଶୁଗ-ଶ୍ରେଣୀଜର୍ଜରିତଂ ମନାଗପି ମନୋ ନାଦ୍ଯାପି ସଂଧୁକ୍ଷତେ ॥ 21 ॥
ଭ୍ରୂଚାପେ ନିହିତଃ କଟାକ୍ଷଵିଶିଖୋ ନିର୍ମାତୁ ମର୍ମଵ୍ଯଥାଂ ଶ୍ଯାମାତ୍ମା କୁଟିଲଃ କରୋତୁ କବରୀଭାରୋଽପି ମାରୋଦ୍ଯମମ୍ ।
ମୋହଂ ତାଵଦଯଂ ଚ ତନ୍ଵି ତନୁତାଂ ବିଂବାଦରୋ ରାଗଵାନ୍ ସଦ୍ଵୃତ୍ତସ୍ତନମଣ୍ଦଲସ୍ତଵ କଥଂ ପ୍ରାଣୈର୍ମମ କ୍ରୀଡତି ॥ 22 ॥
ତାନି ସ୍ପର୍ଶସୁଖାନି ତେ ଚ ତରଲାଃ ସ୍ନିଗ୍ଧା ଦୃଶୋର୍ଵିଭ୍ରମା-ସ୍ତଦ୍ଵକ୍ତ୍ରାଂବୁଜସୌରଭଂ ସ ଚ ସୁଧାସ୍ଯଂଦୀ ଗିରାଂ ଵକ୍ରିମା ।
ସା ବିଂବାଧରମାଧୁରୀତି ଵିଷଯାସଂଗେଽପି ଚେନ୍ମାନସଂ ତସ୍ଯାଂ ଲଗ୍ନସମାଧି ହଂତ ଵିରହଵ୍ଯାଧିଃ କଥଂ ଵର୍ଧତେ ॥ 23 ॥
ଭ୍ରୂପଲ୍ଲଵଂ ଧନୁରପାଂଗତରଂଗିତାନି ବାଣାଃ ଗୁଣଃ ଶ୍ରଵଣପାଲିରିତି ସ୍ମରେଣ ।
ତସ୍ଯାମନଂଗଜଯଜଂଗମଦେଵତାଯାମ୍ ଅସ୍ତ୍ରାଣି ନିର୍ଜିତଜଗଂତି କିମର୍ପିତାନି ॥ 24 ॥
[ଏଷଃ ଶ୍ଲୋକଃ କେଷୁଚନ ସଂସ୍କରଣେଷୁ ଵିଦ୍ଯତେ]
ତିର୍ଯକ୍କଂଠ ଵିଲୋଲ ମୌଲି ତରଲୋତ୍ତଂ ସସ୍ଯ ଵଂଶୋଚ୍ଚରଦ୍-
ଦୀପ୍ତିସ୍ଥାନ କୃତାଵଧାନ ଲଲନା ଲକ୍ଷୈର୍ନ ସଂଲକ୍ଷିତାଃ ।
ସଂମୁଗ୍ଧେ ମଧୁସୂଦନସ୍ଯ ମଧୁରେ ରାଧାମୁଖେଂଦୌ ସୁଧା-
ସାରେ କଂଦଲିତାଶ୍ଚିରଂ ଦଧତୁ ଵଃ କ୍ଷେମଂ କଟାକ୍ଷୋର୍ମ୍ମଯ ॥ (25) ॥
॥ ଇତି ଶ୍ରୀଗୀତଗୋଵିଂଦେ ମୁଗ୍ଧମଧୁସୂଦନୋ ନାମ ତୃତୀଯଃ ସର୍ଗଃ ॥
Browse Related Categories:
