॥ ଦ୍ଵିତୀଯଃ ସର୍ଗଃ ॥
॥ ଅକ୍ଲେଶକେଶଵଃ ॥
ଵିହରତି ଵନେ ରାଧା ସାଧାରଣପ୍ରଣଯେ ହରୌ ଵିଗଲିତନିଜୋତ୍କର୍ଷାଦୀର୍ଷ୍ଯାଵଶେନ ଗତାନ୍ଯତଃ ।
କ୍ଵଚିଦପି ଲତାକୁଂଜେ ଗୁଂଜନ୍ମଧୁଵ୍ରତମଂଡଲୀ-ମୁଖରଶିଖରେ ଲୀନା ଦୀନାପ୍ଯୁଵାଚ ରହଃ ସଖୀମ୍ ॥ 14 ॥
॥ ଗୀତମ୍ 5 ॥
ସଂଚରଦଧରସୁଧାମଧୁରଧ୍ଵନିମୁଖରିତମୋହନଵଂଶମ୍ ।
ଚଲିତଦୃଗଂଚଲଚଂଚଲମୌଲିକପୋଲଵିଲୋଲଵତଂସମ୍ ॥
ରାସେ ହରିମିହ ଵିହିତଵିଲାସଂ ସ୍ମରତି ମନୋ ମମ କୃତପରିହାସମ୍ ॥ 1 ॥
ଚଂଦ୍ରକଚାରୁମଯୂରଶିଖଂଡକମଂଡଲଵଲଯିତକେଶମ୍ ।
ପ୍ରଚୁରପୁରଂଦରଧନୁରନୁରଂଜିତମେଦୁରମୁଦିରସୁଵେଶମ୍ ॥ 2 ॥
ଗୋପକଦଂବନିତଂବଵତୀମୁଖଚୁଂବନଲଂଭିତଲୋଭମ୍ ।
ବଂଧୁଜୀଵମଧୁରାଧରପଲ୍ଲଵମୁଲ୍ଲସିତସ୍ମିତଶୋଭମ୍ ॥ 3 ॥
ଵିପୁଲପୁଲକଭୁଜପଲ୍ଲଵଵଲଯିତଵଲ୍ଲଵଯୁଵତିସହସ୍ରମ୍ ।
କରଚରଣୋରସି ମଣିଗଣଭୂଷଣକିରଣଵିଭିନ୍ନତମିସ୍ରମ୍ ॥ 4 ॥
ଜଲଦପଟଲଵଲଦିଂଦୁଵିନଂଦକଚଂଦନତିଲକଲଲାଟମ୍ ।
ପୀନପଯୋଧରପରିସରମର୍ଦନନିର୍ଦଯହୃଦଯକଵାଟମ୍ ॥ 5 ॥
ମଣିମଯମକରମନୋହରକୁଂଡଲମଂଡିତଗଂଡମୁଦାରମ୍ ।
ପୀତଵସନମନୁଗତମୁନିମନୁଜସୁରାସୁରଵରପରିଵାରମ୍ ॥ 6 ॥
ଵିଶଦକଦଂବତଲେ ମିଲିତଂ କଲିକଲୁଷଭଯଂ ଶମଯଂତମ୍ ।
ମାମପି କିମପି ତରଂଗଦନଂଗଦୃଶା ମନସା ରମଯଂତମ୍ ॥ 7 ॥
ଶ୍ରୀଜଯଦେଵଭଣିତମତିସୁଂଦରମୋହନମଧୁରିପୁରୂପମ୍ ।
ହରିଚରଣସ୍ମରଣଂ ପ୍ରତି ସଂପ୍ରତି ପୁଣ୍ଯଵତାମନୁରୂପମ୍ ॥ 8 ॥
ଗଣଯତି ଗୁଣଗ୍ରାମଂ ଭାମଂ ଭ୍ରମାଦପି ନେହତେ ଵହତି ଚ ପରିତୋଷଂ ଦୋଷଂ ଵିମୁଂଚତି ଦୂରତଃ ।
ଯୁଵତିଷୁ ଵଲସ୍ତୃଷ୍ଣେ କୃଷ୍ଣେ ଵିହାରିଣି ମାଂ ଵିନା ପୁନରପି ମନୋ ଵାମଂ କାମଂ କରୋତି କରୋମି କିମ୍ ॥ 15 ॥
॥ ଗୀତମ୍ 6 ॥
ନିଭୃତନିକୁଂଜଗୃହଂ ଗତଯା ନିଶି ରହସି ନିଲୀଯ ଵସଂତମ୍ ।
ଚକିତଵିଲୋକିତସକଲଦିଶା ରତିରଭସରସେନ ହସଂତମ୍ ॥
ସଖି ହେ କେଶିମଥନମୁଦାରମ୍ ରମଯ ମଯା ସହ ମଦନମନୋରଥଭାଵିତଯା ସଵିକାରମ୍ ॥ 1 ॥
ପ୍ରଥମସମାଗମଲଜ୍ଜିତଯା ପଟୁଚାଟୁଶତୈରନୁକୂଲମ୍ ।
ମୃଦୁମଧୁରସ୍ମିତଭାଷିତଯା ଶିଥିଲୀକୃତଜଘନଦୁକୂଲମ୍ ॥ 2 ॥
କିସଲଯଶଯନନିଵେଶିତଯା ଚିରମୁରସି ମମୈଵ ଶଯାନମ୍ ।
କୃତପରିରଂଭଣଚୁଂବନଯା ପରିରଭ୍ଯ କୃତାଧରପାନମ୍ ॥ 3 ॥
ଅଲସନିମୀଲିତଲୋଚନଯା ପୁଲକାଵଲିଲଲିତକପୋଲମ୍ ।
ଶ୍ରମଜଲସକଲକଲେଵରଯା ଵରମଦନମଦାଦତିଲୋଲମ୍ ॥ 4 ॥
କୋକିଲକଲରଵକୂଜିତଯା ଜିତମନସିଜତଂତ୍ରଵିଚାରମ୍ ।
ଶ୍ଲଥକୁସୁମାକୁଲକୁଂତଲଯା ନଖଲିଖିତଘନସ୍ତନଭାରମ୍ ॥ 5 ॥
ଚରଣରଣିତମନିନୂପୁରଯା ପରିପୂରିତସୁରତଵିତାନମ୍ ।
ମୁଖରଵିଶୃଂଖଲମେଖଲଯା ସକଚଗ୍ରହଚୁଂବନଦାନମ୍ ॥ 6 ॥
ରତିସୁଖସମଯରସାଲସଯା ଦରମୁକୁଲିତନଯନସରୋଜମ୍ ।
ନିଃସହନିପତିତତନୁଲତଯା ମଧୁସୂଦନମୁଦିତମନୋଜମ୍ ॥ 7 ॥
ଶ୍ରୀଜଯଦେଵଭଣିତମିଦମତିଶଯମଧୁରିପୁନିଧୁଵନଶୀଲମ୍ ।
ସୁଖମୁତ୍କଂଠିତଗୋପଵଧୂକଥିତଂ ଵିତନୋତୁ ସଲୀଲମ୍ ॥ 8 ॥
ହସ୍ତସ୍ରସ୍ତଵିଲାସଵଂଶମନୃଜୁଭ୍ରୂଵଲ୍ଲିମଦ୍ବଲ୍ଲଵୀ-ଵୃଂଦୋତ୍ସାରିଦୃଗଂତଵୀକ୍ଷିତମତିସ୍ଵେଦାର୍ଦ୍ରଗଂଡସ୍ଥଲମ୍ ।
ମାମୁଦ୍ଵୀକ୍ଷ୍ଯ ଵିଲକ୍ଷିତଂ ସ୍ମିତସୁଧାମୁଗ୍ଧାନନଂ କାନନେ ଗୋଵିଂଦଂ ଵ୍ରଜସୁଂଦରୀଗଣଵୃତଂ ପଶ୍ଯାମି ହୃଷ୍ଯାମି ଚ ॥ 16 ॥
ଦୁରାଲୋକସ୍ତୋକସ୍ତବକନଵକାଶୋକଲତିକା-ଵିକାସଃ କାସାରୋପଵନପଵନୋଽପି ଵ୍ଯଥଯତି ।
ଅପି ଭ୍ରାମ୍ଯଦ୍ଭୃଂଗୀରଣିତରମଣୀଯା ନ ମୁକୁଲ-ପ୍ରସୂତିଶ୍ଚୂତାନାଂ ସଖି ଶିଖରିଣୀଯଂ ସୁଖଯତି ॥ 17 ॥
॥ ଇତି ଗୀତଗୋଵିଂଦେ ଅକ୍ଲେଶକେଶଵୋ ନାମ ଦ୍ଵିତୀଯଃ ସର୍ଗଃ ॥
Browse Related Categories:
