॥ ଦ୍ଵାଦଶଃ ସର୍ଗଃ ॥
॥ ସୁପ୍ରୀତପୀତାଂବରଃ ॥
ଗତଵତି ସଖୀଵୃଂଦେଽମଂଦତ୍ରପାଭରନିର୍ଭର-ସ୍ମରପରଵଶାକୂତସ୍ଫୀତସ୍ମିତସ୍ନପିତାଧରମ୍ ।
ସରସମନସଂ ଦୃଷ୍ଟ୍ଵା ରାଧାଂ ମୁହୁର୍ନଵପଲ୍ଲଵ-ପ୍ରସଵଶଯନେ ନିକ୍ଷିପ୍ତାକ୍ଷୀମୁଵାଚ ହରଃ ॥ 68 ॥
॥ ଗୀତମ୍ 23 ॥
କିସଲଯଶଯନତଲେ କୁରୁ କାମିନି ଚରଣନଲିନଵିନିଵେଶମ୍ ।
ତଵ ପଦପଲ୍ଲଵଵୈରିପରାଭଵମିଦମନୁଭଵତୁ ସୁଵେଶମ୍ ॥
କ୍ଷଣମଧୁନା ନାରାଯଣମନୁଗତମନୁସର ରାଧିକେ ॥ 1 ॥
କରକମଲେନ କରୋମି ଚରଣମହମାଗମିତାସି ଵିଦୂରମ୍ ।
କ୍ଷଣମୁପକୁରୁ ଶଯନୋପରି ମାମିଵ ନୂପୁରମନୁଗତିଶୂରମ୍ ॥ 2 ॥
ଵଦନସୁଧାନିଧିଗଲିତମମୃତମିଵ ରଚଯ ଵଚନମନୁକୂଲମ୍ ।
ଵିରହମିଵାପନଯାମି ପଯୋଧରରୋଧକମୁରସି ଦୁକୂଲମ୍ ॥ 3 ॥
ପ୍ରିଯପରିରଂଭଣରଭସଵଲିତମିଵ ପୁଲକିତମତିଦୁରଵାପମ୍ ।
ମଦୁରସି କୁଚକଲଶଂ ଵିନିଵେଶଯ ଶୋଷଯ ମନସିଜତାପମ୍ ॥ 4 ॥
ଅଧରସୁଧାରସମୁପନଯ ଭାଵିନି ଜୀଵଯ ମୃତମିଵ ଦାସମ୍ ।
ତ୍ଵଯି ଵିନିହିତମନସଂ ଵିରହାନଲଦଗ୍ଧଵପୁଷମଵିଲାସମ୍ ॥ 5 ॥
ଶଶିମୁଖି ମୁଖରଯ ମଣିରଶନାଗୁଣମନୁଗୁଣକଂଠନିଦାନମ୍ ।
ଶ୍ରୁତିଯୁଗଲେ ପିକରୁତଵିକଲେ ମମ ଶମଯ ଚିରାଦଵସାଦମ୍ ॥ 6 ॥
ମାମତିଵିଫଲରୁଷା ଵିକଲୀକୃତମଵଲୋକିତମଧୁନେଦମ୍ ।
ମୀଲିତଲଜ୍ଜିତମିଵ ନଯନଂ ତଵ ଵିରମ ଵିସୃଜ ରତିଖେଦମ୍ ॥ 7 ॥
ଶ୍ରୀଜଯଦେଵଭଣିତମିଦମନୁପଦନିଗଦିତମଧୁରିପୁମୋଦମ୍ ।
ଜନଯତୁ ରସିକଜନେଷୁ ମନୋରମତିରସଭାଵଵିନୋଦମ୍ ॥ 8 ॥
ମାରଂକେ ରତିକେଲିସଂକୁଲରଣାରଂଭେ ତଯା ସାହସ-ପ୍ରାଯଂ କାଂତଜଯାଯ କିଂଚିଦୁପରି ପ୍ରାରଂଭି ଯତ୍ସଂଭ୍ରମାତ୍ ।
ନିଷ୍ପଂଦା ଜଘନସ୍ଥଲୀ ଶିଥିଲତା ଦୋର୍ଵଲ୍ଲିରୁତ୍କଂପିତଂ ଵକ୍ଷୋ ମୀଲିତମକ୍ଷି ପୌରୁଷରସଃ ସ୍ତ୍ରୀଣାଂ କୁତଃ ସିଧ୍ଯତି ॥ 69 ॥
ଅଥ କାଂତଂ ରତିକ୍ଲାଂତମପି ମଂଡନଵାଂଛଯା ।
ନିଜଗାଦ ନିରାବାଧା ରାଧା ସ୍ଵାଧୀନଭର୍ତୃକା ॥ 70 ॥
॥ ଗୀତମ୍ 24 ॥
କୁରୁ ଯଦୁନଂଦନ ଚଂଦନଶିଶିରତରେଣ କରେଣ ପଯୋଧରେ ।
ମୃଗମଦପତ୍ରକମତ୍ର ମନୋଭଵମଂଗଲକଲଶସହୋଦରେ ।
ନିଜଗାଦ ସା ଯଦୁନଂଦନେ କ୍ରୀଡତି ହୃଦଯାନଂଦନେ ॥ 1 ॥
ଅଲିକୁଲଗଂଜନମଂଜନକଂ ରତିନାଯକସାଯକମୋଚନେ ।
ତ୍ଵଦଧରଚୁଂବନଲଂବିତକଜ୍ଜଲମୁଜ୍ଜ୍ଵଲଯ ପ୍ରିଯ ଲୋଚନେ ॥ 2 ॥
ନଯନକୁରଂଗତରଂଗଵିକାସନିରାସକରେ ଶ୍ରୁତିମଂଡଲେ ।
ମନସିଜପାଶଵିଲାସଧରେ ଶୁଭଵେଶ ନିଵେଶଯ କୁଂଡଲେ ॥ 3 ॥
ଭ୍ରମରଚଯଂ ରଚହଯଂତମୁପରି ରୁଚିରଂ ସୁଚିରଂ ମମ ସଂମୁଖେ ।
ଜିତକମଲେ ଵିମଲେ ପରିକର୍ମଯ ନର୍ମଜନକମଲକଂ ମୁଖେ ॥ 4 ॥
ମୃଗମଦରସଵଲିତଂ ଲଲିତଂ କୁରୁ ତିଲକମଲିକରଜନୀକରେ ।
ଵିହିତକଲଂକକଲଂ କମଲାନନ ଵିଶ୍ରମିତଶ୍ରମଶୀକରେ ॥ 5 ॥
ମମ ରୁଚିରେ ଚିକୁରେ କୁରୁ ମାନଦ ମାନସଜଧ୍ଵଜଚାମରେ ।
ରତିଗଲିତେ ଲଲିତେ କୁସୁମାନି ଶିଖଂଡିଶିଖଂଡକଡାମରେ ॥ 6 ॥
ସରସଘନେ ଜଘନେ ମମ ଶଂବରଦାରଣଵାରଣକଂଦରେ ।
ମଣିରଶନାଵସନାଭରଣାନି ଶୁଭାଶଯ ଵାସଯ ସୁଂଦରେ ॥ 7 ॥
ଶ୍ରୀଜଯଦେଵଵଚସି ରୁଚିରେ ହୃଦଯଂ ସଦଯଂ କୁରୁ ମଂଡନେ ।
ହରିଚରଣସ୍ମରଣାମୃତକୃତକଲିକଲୁଷଭଵଜ୍ଵରଖଂଡନେ ॥ 8 ॥
ରଚଯ କୁଚଯୋଃ ପତ୍ରଂ ଚିତ୍ରଂ କୁରୁଷ୍ଵ କପୋଲଯୋ-ର୍ଘଟଯ ଜଘନେ କାଂଚୀମଂଚ ସ୍ରଜା କବରୀଭରମ୍ ।
କଲଯ ଵଲଯଶ୍ରେଣୀଂ ପାଣୌ ପଦେ କୁରୁ ନୂପୁରା-ଵିତି ନିଗତିତଃ ପ୍ରୀତଃ ପୀତାଂବରୋଽପି ତଥାକରୋତ୍ ॥ 71 ॥
ଯଦ୍ଗାଂଧ୍ଗର୍ଵକଲାସୁ କୌଶଲମନୁଧ୍ଯାନଂ ଚ ଯଦ୍ଵୈଷ୍ଣଵଂ ଯଚ୍ଛୃଂଗାରଵିଵେକତତ୍ଵମପି ଯତ୍କାଵ୍ଯେଷୁ ଲୀଲାଯିତମ୍ ।
ତତ୍ସର୍ଵଂ ଜଯଦେଵପଂଡିତକଵେଃ କୃଷ୍ଣୈକତାନାତ୍ମନଃ ସାନଂଦାଃ ପରିଶୋଧଯଂତୁ ସୁଧିଯଃ ଶ୍ରୀଗୀତଗୋଵିଂଦତଃ ॥ 72 ॥
ଶ୍ରୀଭୋଜଦେଵପ୍ରଭଵସ୍ଯ ରାମାଦେଵୀସୁତଶ୍ରୀଜଯଦେଵକସ୍ଯ ।
ପରାଶରାଦିପ୍ରିଯଵର୍ଗକଂଠେ ଶ୍ରୀଗୀତଗୋଵିଂଦକଵିତ୍ଵମସ୍ତୁ ॥ 73 ॥
॥ ଇତି ଶ୍ରୀଜଯଦେଵକୃତୌ ଗୀତଗୋଵିଂଦେ ସୁପ୍ରୀତପୀତାଂବରୋ ନାମ ଦ୍ଵାଦଶଃ ସର୍ଗଃ ॥
॥ ଇତି ଗୀତଗୋଵିଂଦଂ ସମାପ୍ତମ୍ ॥
Browse Related Categories:
