॥ ଏକାଦଶଃ ସର୍ଗଃ ॥
॥ ସାନଂଦଦାମୋଦରଃ ॥
ସୁଚିରମନୁନଯନେ ପ୍ରୀଣଯିତ୍ଵା ମୃଗାକ୍ଷୀଂ ଗତଵତି କୃତଵେଶେ କେଶଵେ କୁଂଜଶଯ୍ଯାମ୍ ।
ରଚିତରୁଚିରଭୂଷାଂ ଦୃଷ୍ଟିମୋଷେ ପ୍ରଦୋଷେ ସ୍ଫୁରତି ନିରଵସାଦାଂ କାପି ରାଧାଂ ଜଗାଦ ॥ 59 ॥
॥ ଗୀତମ୍ 20 ॥
ଵିରଚିତଚାଟୁଵଚନରଚନଂ ଚରଣେ ରଚିତପ୍ରଣିପାତମ୍ ।
ସଂପ୍ରତି ମଂଜୁଲଵଂଜୁଲସୀମନି କେଲିଶଯନମନୁଯାତମ୍ ॥
ମୁଗ୍ଧେ ମଧୁମଥନମନୁଗତମନୁସର ରାଧିକେ ॥ 1 ॥
ଘନଜଘନସ୍ତନଭାରଭରେ ଦରମଂଥରଚରଣଵିହାରମ୍ ।
ମୁଖରିତମଣୀମଂଜୀରମୁପୈହି ଵିଧେହି ମରାଲଵିକାରମ୍ ॥ 2 ॥
ଶୃଣୁ ରମଣୀଯତରଂ ତରୁଣୀଜନମୋହନମଧୁପଵିରାଵମ୍ ।
କୁସୁମଶରାସନଶାସନବଂଦିନି ପିକନିକରେ ଭଜ ଭାଵମ୍ ॥ 3 ॥
ଅନିଲତରଲକିସଲଯନିକରେଣ କରେଣ ଲତାନିକୁରଂବମ୍ ।
ପ୍ରେରଣମିଵ କରଭୋରୁ କରୋତି ଗତିଂ ପ୍ରତିମୁଂଚ ଵିଲଂବମ୍ ॥ 4 ॥
ସ୍ଫୁରିତମନଂଗତରଂଗଵଶାଦିଵ ସୂଚିତହରିପରିରଂଭମ୍ ।
ପୃଚ୍ଛ ମନୋହରହାରଵିମଲଜଲଧାରମମୁଂ କୁଚକୁଂଭମ୍ ॥ 5 ॥
ଅଧିଗତମଖିଲସଖୀଭିରିଦଂ ତଵ ଵପୁରପି ରତିରଣସଜ୍ଜମ୍ ।
ଚଂଡି ରସିତରଶନାରଵଡିଂଡିମମଭିସର ସରସମଲଜ୍ଜମ୍ ॥ 6 ॥
ସ୍ମରଶରସୁଭଗନଖେନ କରେଣ ସଖୀମଵଲଂବ୍ଯ ସଲୀଲମ୍ ।
ଚଲ ଵଲଯକ୍ଵଣୀତୈରଵବୋଧଯ ହରମପି ନିଜଗତିଶୀଲମ୍ ॥ 7 ॥
ଶ୍ରୀଜଯଦେଵଭଣିତମଧରୀକୃତହାରମୁଦାସିତଵାମମ୍ ।
ହରିଵିନିହିତମନସାମଧିତିଷ୍ଠତୁ କଂଠତଟୀମଵିରାମମ୍ ॥ 8 ॥
ସା ମାଂ ଦ୍ରକ୍ଷ୍ଯତି ଵକ୍ଷ୍ଯତି ସ୍ମରକଥାଂ ପ୍ରତ୍ଯଂଗମାଲିଂଗନୈଃ ପ୍ରୀତିଂ ଯାସ୍ଯତି ରମ୍ଯତେ ସଖି ସମାଗତ୍ଯେତି ଚିଂତାକୁଲଃ ।
ସ ତ୍ଵାଂ ପଶ୍ଯତି ଵେପତେ ପୁଲକଯତ୍ଯାନଂଦତି ସ୍ଵିଦ୍ଯତି ପ୍ରତ୍ଯୁଦ୍ଗଚ୍ଛତି ମୂର୍ଚ୍ଛତି ସ୍ଥିରତମଃପୁଂଜେ ନିକୁଂଜେ ପ୍ରିଯଃ ॥ 60 ॥
ଅକ୍ଷ୍ଣୋର୍ନିକ୍ଷିପଦଂଜନଂ ଶ୍ରଵଣଯୋସ୍ତାପିଚ୍ଛଗୁଚ୍ଛାଵଲୀଂ ମୂର୍ଧ୍ନି ଶ୍ଯାମସରୋଜଦାମ କୁଚଯୋଃ କସ୍ତୂରିକାପାତ୍ରକମ୍ ।
ଧୂର୍ତାନାମଭିସାରସତ୍ଵରହୃଦାଂ ଵିଷ୍ଵଙ୍ନିକୁଂଜେ ସଖି ଧ୍ଵାଂତଂ ନୀଲନିଚୋଲଚାରୁ ସଦୃଶାଂ ପ୍ରତ୍ଯଂଗମାଲିଂଗତି ॥ 61 ॥
କାଶ୍ମୀରଗୌରଵପୁଷାମଭିସାରିକାଣାମ୍ ଆବଦ୍ଧରେଖମଭିତୋ ରୁଚିମଂଜରୀଭିଃ ।
ଏତତ୍ତମାଲଦଲନୀଲତମଂ ତମିଶ୍ରଂ ତତ୍ପ୍ରେମହେମନିକଷୋପଲତାଂ ତନୋତି ॥ 62 ॥
ହାରାଵଲୀତରଲକାଂଚନକାଂଚିଦାମ-କେଯୂରକଂକଣମଣିଦ୍ଯୁତିଦୀପିତସ୍ଯ ।
ଦ୍ଵାରେ ନିକୁଂଜନିଲଯସ୍ଯହରିଂ ନିରୀକ୍ଷ୍ଯ ଵ୍ରୀଡାଵତୀମଥ ସଖୀ ନିଜଗାହ ରାଧାମ୍ ॥ 63 ॥
॥ ଗୀତମ୍ 21 ॥
ମଂଜୁତରକୁଂଜତଲକେଲିସଦନେ ।
ଵିଲସ ରତିରଭସହସିତଵଦନେ ॥
ପ୍ରଵିଶ ରାଧେ ମାଧଵସମୀପମିହ ॥ 1 ॥
ନଵଭଵଦଶୋକଦଲଶଯନସାରେ ।
ଵିଲସ କୁଚକଲଶତରଲହାରେ ॥ 2 ॥
କୁସୁମଚଯରଚିତଶୁଚିଵାସଗେହେ ।
ଵିଲସ କୁସୁମସୁକୁମାରଦେହେ ॥ 3 ॥
ଚଲମଲଯଵନପଵନସୁରଭିଶୀତେ ।
ଵିଲସ ରସଵଲିତଲଲିତଗୀତେ ॥ 4 ॥
ମଧୁମୁଦିତମଧୁପକୁଲକଲିତରାଵେ ।
ଵିଲସ ମଦନରସସରସଭାଵେ ॥ 5 ॥
ମଧୁତରଲପିକନିକରନିନଦମୁଖରେ ।
ଵିଲସ ଦଶନରୁଚିରୁଚିରଶିଖରେ ॥ 6 ॥
ଵିତତ ବହୁଵଲ୍ଲିନଵପଲ୍ଲଵଘନେ ।
ଵିଲସ ଚିରମଲସପୀନଜଘନେ ॥ 7 ॥
ଵିହିତପଦ୍ମାଵତୀସୁଖସମାଜେ ।
ଭଣତି ଜଯଦେଵକଵିରାଜେ ॥ 8 ॥
ତ୍ଵାଂ ଚିତ୍ତେନ ଚିରଂ ଵହନ୍ନଯମତିଶ୍ରାଂତୋ ଭୃଶଂ ତାପିତଃ କଂଦର୍ପେଣ ତୁ ପାତୁମିଚ୍ଛତି ସୁଧାସଂବାଧବିଂବାଧରମ୍ ।
ଅସ୍ଯାଂଗଂ ତଦଲଂକୁରୁ କ୍ଷଣମିହ ଭ୍ରୂକ୍ଷେପଲକ୍ଷ୍ମୀଲଵ-କ୍ରୀତେ ଦାସ ଇଵୋପସେଵିତପଦାଂଭୋଜେ କୁତଃ ସଂଭ୍ରମଃ ॥ 64 ॥
ସା ସସାଧ୍ଵସସାନଂଦଂ ଗୋଵିଂଦେ ଲୋଲଲୋଚନା ।
ସିଂଜାନମଂଜୁମଂଜୀରଂ ପ୍ରଵିଵେଶ ନିଵେଶନମ୍ ॥ 65 ॥
॥ ଗୀତମ୍ 22 ॥
ରାଧାଵଦନଵିଲୋକନଵିକସିତଵିଵିଧଵିକାରଵିଭଂଗମ୍ ।
ଜଲନିଧିମିଵ ଵିଧୁମଂଡଲଦର୍ଶନତରଲିତତୁଂଗତରଂଗମ୍ ॥
ହରିମେକରସଂ ଚିରମଭିଲଷିତଵିଲାସଂ ସା ଦଦାର୍ଶ ଗୁରୁହର୍ଷଵଶଂଵଦଵଦନମନଂଗନିଵାସମ୍ ॥ 1 ॥
ହାରମମଲତରତାରମୁରସି ଦଧତଂ ପରିରଭ୍ଯ ଵିଦୂରମ୍ ।
ସ୍ଫୁଟତରଫେନକଦଂବକରଂବିତମିଵ ଯମୁନାଜଲପୂରମ୍ ॥ 2 ॥
ଶ୍ଯାମଲମୃଦୁଲକଲେଵରମଂଡଲମଧିଗତଗୌରଦୁକୂଲମ୍ ।
ନୀଲନଲିନମିଵ ପୀତପରାଗପତଲଭରଵଲଯିତମୂଲମ୍ ॥ 3 ॥
ତରଲଦୃଗଂଚଲଚଲନମନୋହରଵଦନଜନିତରତିରାଗମ୍ ।
ସ୍ଫୁଟକମଲୋଦରଖେଲିତଖଂଜନଯୁଗମିଵ ଶରଦି ତଡାଗମ୍ ॥ 4 ॥
ଵଦନକମଲପରିଶୀଲନମିଲିତମିହିରସମକୁଂଡଲଶୋଭମ୍ ।
ସ୍ମିତରୁଚିରୁଚିରସମୁଲ୍ଲସିତାଧରପଲ୍ଲଵକୃତରତିଲୋଭମ୍ ॥ 5 ॥
ଶଶିକିରଣଚ୍ଛୁରିତୋଦରଜଲଧରସୁଂଦରସକୁସୁମକେଶମ୍ ।
ତିମିରୋଦିତଵିଧୁମଣ୍ଦଲନିର୍ମଲମଲଯଜତିଲକନିଵେଶମ୍ ॥ 6 ॥
ଵିପୁଲପୁଲକଭରଦଂତୁରିତଂ ରତିକେଲିକଲାଭିରଧୀରମ୍ ।
ମଣିଗଣକିରଣସମୂହସମୁଜ୍ଜ୍ଵଲଭୂଷଣସୁଭଗଶରୀରମ୍ ॥ 7 ॥
ଶ୍ରୀଜଯଦେଵଭଣିତଵିଭଵଦ୍ଵିଗୁଣୀକୃତଭୂଷଣଭାରମ୍ ।
ପ୍ରଣମତ ହୃଦି ସୁଚିରଂ ଵିନିଧାଯ ହରିଂ ସୁକୃତୋଦଯସାରମ୍ ॥ 8 ॥
ଅତିକ୍ରମ୍ଯାପାଂଗଂ ଶ୍ରଵଣପଥପର୍ଯଂତଗମନ-ପ୍ରଯାସେନେଵାକ୍ଷ୍ଣୋସ୍ତରଲତରତାରଂ ପତିତଯୋଃ ।
ଇଦାନୀଂ ରାଧାଯାଃ ପ୍ରିଯତମସମାଲୋକସମଯେ ପପାତ ସ୍ଵେଦାଂବୁପ୍ରସର ଇଵ ହର୍ଷାଶ୍ରୁନିକରଃ ॥ 66 ॥
ଭଵଂତ୍ଯାସ୍ତଲ୍ପାଂତଂ କୃତକପଟକଂଡୂତିପିହିତ-ସ୍ମିତଂ ଯାତେ ଗେହାଦ୍ବହିରଵହିତାଲୀପରିଜନେ ।
ପ୍ରିଯାସ୍ଯଂ ପଶ୍ଯଂତ୍ଯାଃ ସ୍ମରଶରସମାକୂଲସୁଭଗଂ ସଲଜ୍ଜା ଲଜ୍ଜାପି ଵ୍ଯଗମଦିଵ ଦୂରଂ ମୃଗଦୃଶଃ ॥ 67 ॥
॥ ଇତି ଶ୍ରୀଗୀତଗୋଵିଂଦେ ରାଧିକାମିଲନେ ସାନଂଦଦାମୋଦରୋ ନାମୈକାଦଶଃ ସର୍ଗଃ ॥
Browse Related Categories:
