॥ ଦଶମଃ ସର୍ଗଃ ॥
॥ ଚତୁରଚତୁର୍ଭୁଜଃ ॥
ଅତ୍ରାଂତରେ ମସୃଣରୋଷଵଶାମସୀମ୍-ନିଃଶ୍ଵାସନିଃସହମୁଖୀଂ ସୁମୁଖୀମୁପେତ୍ଯ ।
ସଵ୍ରୀଡମୀକ୍ଷିତସଖୀଵଦନାଂ ଦିନାଂତେ ସାନଂଦଗଦ୍ଗଦପଦଂ ହରିରିତ୍ଯୁଵାଚ ॥ 53 ॥
॥ ଗୀତମ୍ 19 ॥
ଵଦସି ଯଦି କିଂଚିଦପି ଦଂତରୁଚିକୌମୁଦୀ ହରତି ଦରତିମିରମତିଘୋରମ୍ ।
ସ୍ଫୁରଦଧରସୀଧଵେ ତଵ ଵଦନଚଂଦ୍ରମା ରୋଚଯତୁ ଲୋଚନଚକୋରମ୍ ॥
ପ୍ରିଯେ ଚାରୁଶୀଲେ ମୁଂଚ ମଯି ମାନମନିଦାନଂ ସପଦି ମଦନାନଲୋ ଦହତି ମମ ମାନସଂ ଦେହି ମୁଖକମଲମଧୁପାନମ୍ ॥ 1 ॥
ସତ୍ଯମେଵାସି ଯଦି ସୁଦତି ମଯି କୋପିନୀ ଦେହି ଖରନଖଶରଘାତମ୍ ।
ଘଟଯ ଭୁଜବଂଧନଂ ଜନଯ ରଦଖଂଡନଂ ଯେନ ଵା ଭଵତି ସୁଖଜାତମ୍ ॥ 2 ॥
ତ୍ଵମସି ମମ ଭୂଷଣଂ ତ୍ଵମସି ମମ ଜୀଵନଂ ତ୍ଵମସି ଭଵଜଲଧିରତ୍ନମ୍ ।
ଭଵତୁ ଭଵତୀହ ମଯି ସତତମନୋରୋଧିନି ତତ୍ର ମମ ହୃଦଯମତିରତ୍ନମ୍ ॥ 3 ॥
ନୀଲନଲିନାଭମପି ତନ୍ଵି ତଵ ଲୋଚନଂ ଧାରଯତି କୋକନଦରୂପମ୍ ।
କୁସୁମଶରବାଣଭାଵେନ ଯଦି ରଂଜଯସି କୃଷ୍ଣମିଦମେତଦନୁରୂପମ୍ ॥ 4 ॥
ସ୍ଫୁରତୁ କୁଚକୁଂଭଯୋରୁପରି ମଣିମଂଜରୀ ରଂଜଯତୁ ତଵ ହୃଦଯଦେଶମ୍ ।
ରସତୁ ରଶନାପି ତଵ ଘନଜଘନମଂଡଲେ ଘୋଷଯତୁ ମନ୍ମଥନିଦେଶମ୍ ॥ 5 ॥
ସ୍ଥଲକମଲଗଂଜନଂ ମମ ହୃଦଯରଂଜନଂ ଜନିତରତିରଂଗପରଭାଗମ୍ ।
ଭଣ ମସୃଣଵାଣି କରଵାଣି ପଦପଂକଜଂ ସରସଲସଦଲକ୍ତକରାଗମ୍ ॥ 6 ॥
ସ୍ମରଗରଲଖଂଡନଂ ମମ ଶିରସି ମଂଡନଂ ଦେହି ପଦପଲ୍ଲଵମୁଦାରମ୍ ।
ଜ୍ଵଲତି ମଯି ଦାରୁଣୋ ମଦନକଦନାରୁଣୋ ହରତୁ ତଦୁପାହିତଵିକାରମ୍ ॥ 7 ॥
ଇତି ଚଟୁଲଚାଟୁପଟୁଚାରୁ ମୁରଵୈରିଣୋ ରାଧିକାମଧି ଵଚନଜାତମ୍ ।
ଜଯତି ପଦ୍ମାଵତୀରମଣଜଯଦେଵକଵି-ଭାରତୀଭଣିତମତିଶାତମ୍ ॥ 8 ॥
ପରିହର କୃତାତଂକେ ଶଂକାଂ ତ୍ଵଯା ସତତଂ ଘନ-ସ୍ତନଜଘନଯାକ୍ରାଂତେ ସ୍ଵାଂତେ ପରାନଵକାଶିନି ।
ଵିଶତି ଵିତନୋରନ୍ଯୋ ଧନ୍ଯୋ ନ କୋଽପି ମମାଂତରଂ ସ୍ତନଭରପରୀରଂଭାରଂଭେ ଵିଧେହି ଵିଧେଯତାମ୍ ॥ 54 ॥
ମୁଗ୍ଧେ ଵିଧେହି ମଯି ନିର୍ଦଯଦଂତଦଂଶ-ଦୋର୍ଵଲ୍ଲିବଂଧନିବିଡସ୍ତନପୀଡନାନି ।
ଚଂଡି ତ୍ଵମେଵ ମୁଦମଂଚ ନ ପଂଚବାଣ-ଚଂଡାଲକାଂଡଦଲନାଦସଵଃ ପ୍ରଯାଂତୁ ॥ 55 ॥
ଵ୍ଯଥଯତି ଵୃଥା ମୌନଂ ତନ୍ଵି ପ୍ରପଂଚଯ ପଂଚମଂ ତରୁଣୀ ମଧୁରାଲାପୈସ୍ତାପଂ ଵିନୋଦଯ ଦୃଷ୍ଟିଭିଃ ।
ସୁମୁଖି ଵିମୁଖୀଭାଵଂ ତାଵଦ୍ଵିମୁଂଚ ନ ମୁଂଚ ମାଂ ସ୍ଵଯମତିଶଯସ୍ନିଗ୍ଧୋ ମୁଗ୍ଧେ ପ୍ରିଯିଽହମୁପସ୍ଥିତଃ ॥ 56 ॥
ବଂଧୂକଦ୍ଯୁତିବାଂଧଵୋଽଯମଧରଃ ସ୍ନିଗ୍ଧୋ ମଧୂକଚ୍ଚଵି-ର୍ଗଂଡଶ୍ଚଂଡି ଚକାସ୍ତି ନୀଲନଲିନଶ୍ରୀମୋଚନଂ ଲୋଚନମ୍ ।
ନାସାଭ୍ଯେତି ତିଲପ୍ରସୂନପଦଵୀଂ କୁଂଦାଭଦାଂତି ପ୍ରିଯେ ପ୍ରାଯସ୍ତ୍ଵନ୍ମୁଖସେଵଯା ଵିଜଯତେ ଵିଶ୍ଵଂ ସ ପୁଷ୍ପାଯୁଧଃ ॥ 57 ॥
ଦୃଶୌ ତଵ ମଦାଲସେ ଵଦନମିଂଦୁସଂଦୀପକଂ ଗତିର୍ଜନମନୋରମା ଵିଧୁତରଂଭମୂରୁଦ୍ଵଯମ୍ ।
ରତିସ୍ତଵ କଲାଵତୀ ରୁଚିରଚିତ୍ରଲେଖେ ଭ୍ରୁଵା-ଵହୋ ଵିବୁଧଯୌଵନଂ ଵହସି ତନ୍ଵୀ ପୃଥ୍ଵୀଗତା ॥ 58 ॥
॥ ଇତି ଶ୍ରୀଗୀତଗୋଵିଂଦେ ମାନିନୀଵର୍ଣନେ ଚତୁରଚତୁର୍ଭୁଜୋ ନାମ ଦଶମଃ ସର୍ଗଃ ॥
Browse Related Categories:
