॥ ଗୀତଗୋଵିଂଦମ୍ ॥
॥ ଅଷ୍ଟପଦୀ ॥
॥ ଶ୍ରୀ ଗୋପାଲକ ଧ୍ଯାନମ୍ ॥
ଯଦ୍ଗୋପୀଵଦନେଂଦୁମଂଡନମଭୂତ୍କସ୍ତୂରିକାପତ୍ରକଂ ଯଲ୍ଲକ୍ଷ୍ମୀକୁଚଶାତକୁଂଭ କଲଶେ ଵ୍ଯାଗୋଚମିଂଦୀଵରମ୍ ।
ଯନ୍ନିର୍ଵାଣଵିଧାନସାଧନଵିଧୌ ସିଦ୍ଧାଂଜନଂ ଯୋଗିନାଂ ତନ୍ନଶ୍ଯାମଳମାଵିରସ୍ତୁ ହୃଦଯେ କୃଷ୍ଣାଭିଧାନଂ ମହଃ ॥ 1 ॥
॥ ଶ୍ରୀ ଜଯଦେଵ ଧ୍ଯାନମ୍ ॥
ରାଧାମନୋରମରମାଵରରାସଲୀଲ-ଗାନାମୃତୈକଭଣିତଂ କଵିରାଜରାଜମ୍ ।
ଶ୍ରୀମାଧଵାର୍ଚ୍ଚନଵିଧଵନୁରାଗସଦ୍ମ-ପଦ୍ମାଵତୀପ୍ରିଯତମଂ ପ୍ରଣତୋସ୍ମି ନିତ୍ଯମ୍ ॥ 2 ॥
ଶ୍ରୀଗୋପଲଵିଲାସିନୀ ଵଲଯସଦ୍ରତ୍ନାଦିମୁଗ୍ଧାକୃତି ଶ୍ରୀରାଧାପତିପାଦପଦ୍ମଭଜନାନଂଦାବ୍ଧିମଗ୍ନୋଽନିଶମ୍ ॥
ଲୋକେ ସତ୍କଵିରାଜରାଜ ଇତି ଯଃ ଖ୍ଯାତୋ ଦଯାଂଭୋନିଧିଃ ତଂ ଵଂଦେ ଜଯଦେଵସଦ୍ଗୁରୁମହଂ ପଦ୍ମାଵତୀଵଲ୍ଲଭମ୍ ॥ 3 ॥
॥ ପ୍ରଥମଃ ସର୍ଗଃ ॥
॥ ସାମୋଦଦାମୋଦରଃ ॥
ମେଘୈର୍ମେଦୁରମଂବରଂ ଵନଭୁଵଃ ଶ୍ଯାମାସ୍ତମାଲଦ୍ରୁମୈ-ର୍ନକ୍ତଂ ଭୀରୁରଯଂ ତ୍ଵମେଵ ତଦିମଂ ରାଧେ ଗୃହଂ ପ୍ରାପଯ ।
ଇତ୍ଥଂ ନଂଦନିଦେଶିତଶ୍ଚଲିତଯୋଃ ପ୍ରତ୍ଯଧ୍ଵକୁଂଜଦ୍ରୁମଂ ରାଧାମାଧଵଯୋର୍ଜଯଂତି ଯମୁନାକୂଲେ ରହଃକେଲଯଃ ॥ 1 ॥
ଵାଗ୍ଦେଵତାଚରିତଚିତ୍ରିତଚିତ୍ତସଦ୍ମା ପଦ୍ମାଵତୀଚରଣଚାରଣଚକ୍ରଵର୍ତୀ ।
ଶ୍ରୀଵାସୁଦେଵରତିକେଲିକଥାସମେତଂ ଏତଂ କରୋତି ଜଯଦେଵକଵିଃ ପ୍ରବଂଧମ୍ ॥ 2 ॥
ଯଦି ହରିସ୍ମରଣେ ସରସଂ ମନୋ ଯଦି ଵିଲାସକଲାସୁ କୁତୂହଲମ୍ ।
ମଧୁରକୋମଲକାଂତପଦାଵଲୀଂ ଶୃଣୁ ତଦା ଜଯଦେଵସରସ୍ଵତୀମ୍ ॥ 3 ॥
ଵାଚଃ ପଲ୍ଲଵଯତ୍ଯୁମାପତିଧରଃ ସଂଦର୍ଭଶୁଦ୍ଧିଂ ଗିରାଂ ଜାନୀତେ ଜଯଦେଵ ଏଵ ଶରଣଃ ଶ୍ଲାଘ୍ଯୋ ଦୁରୂହଦ୍ରୁତେ ।
ଶୃଂଗାରୋତ୍ତରସତ୍ପ୍ରମେଯରଚନୈରାଚାର୍ଯଗୋଵର୍ଧନ-ସ୍ପର୍ଧୀ କୋଽପି ନ ଵିଶ୍ରୁତଃ ଶ୍ରୁତିଧରୋ ଧୋଯୀ କଵିକ୍ଷ୍ମାପତିଃ ॥ 4 ॥
॥ ଗୀତମ୍ 1 ॥
ପ୍ରଲଯପଯୋଧିଜଲେ ଧୃତଵାନସି ଵେଦମ୍ ।
ଵିହିତଵହିତ୍ରଚରିତ୍ରମଖେଦମ୍ ॥
କେଶଵ ଧୃତମୀନଶରୀର ଜଯ ଜଗଦୀଶ ହରେ ॥ 1 ॥
କ୍ଷିତିରତିଵିପୁଲତରେ ତଵ ତିଷ୍ଠତି ପୃଷ୍ଠେ ।
ଧରଣିଧରଣକିଣଚକ୍ରଗରିଷ୍ଠେ ॥
କେଶଵ ଧୃତକଚ୍ଛପରୂପ ଜଯ ଜଗଦୀଶ ହରେ ॥ 2 ॥
ଵସତି ଦଶନଶିଖରେ ଧରଣୀ ତଵ ଲଗ୍ନା ।
ଶଶିନି କଲଂକକଲେଵ ନିମଗ୍ନା ॥
କେଶଵ ଧୃତସୂକରରୂପ ଜଯ ଜଗଦୀଶ ହରେ ॥ 3 ॥
ତଵ କରକମଲଵରେ ନଖମଦ୍ଭୁତଶୃଂଗମ୍ ।
ଦଲିତହିରଣ୍ଯକଶିପୁତନୁଭୃଂଗମ୍ ॥
କେଶଵ ଧୃତନରହରିରୂପ ଜଯ ଜଗଦୀଶ ହରେ ॥ 4 ॥
ଛଲଯସି ଵିକ୍ରମଣେ ବଲିମଦ୍ଭୁତଵାମନ ।
ପଦନଖନୀରଜନିତଜନପାଵନ ॥
କେଶଵ ଧୃତଵାମନରୂପ ଜଯ ଜଗଦୀଶ ହରେ ॥ 5 ॥
କ୍ଷତ୍ରିଯରୁଧିରମଯେ ଜଗଦପଗତପାପମ୍ ।
ସ୍ନପଯସି ପଯସି ଶମିତଭଵତାପମ୍ ॥
କେଶଵ ଧୃତଭୃଘୁପତିରୂପ ଜଯ ଜଗଦୀଶ ହରେ ॥ 6 ॥
ଵିତରସି ଦିକ୍ଷୁ ରଣେ ଦିକ୍ପତିକମନୀଯମ୍ ।
ଦଶମୁଖମୌଲିବଲିଂ ରମଣୀଯଂ ॥
କେଶଵ ଧୃତରାମଶରୀର ଜଯ ଜଗଦୀଶ ହରେ ॥ 7 ॥
ଵହସି ଵପୁଷି ଵିଶଦେ ଵସନଂ ଜଲଦାଭମ୍ ।
ହଲହତିଭୀତିମିଲିତଯମୁନାଭମ୍ ॥
କେଶଵ ଧୃତହଲଧରରୂପ ଜଯ ଜଗଦୀଶ ହରେ ॥ 8 ॥
ନିଂଦସି ଯଜ୍ଞଵିଧେରହହ ଶ୍ରୁତିଜାତମ୍ ।
ସଦଯହୃଦଯଦର୍ଶିତପଶୁଘାତମ୍ ॥
କେଶଵ ଧୃତବୁଦ୍ଧଶରୀର ଜଯ ଜଗଦୀଶ ହରେ ॥ 9 ॥
ମ୍ଲେଚ୍ଛନିଵହନିଧନେ କଲଯସି କରଵାଲମ୍ ।
ଧୂମକେତୁମିଵ କିମପି କରାଲମ୍ ॥
କେଶଵ ଧୃତକଲ୍କିଶରୀର ଜଯ ଜଗଦୀଶ ହରେ ॥ 10 ॥
ଶ୍ରୀଜଯଦେଵକଵେରିଦମୁଦିତମୁଦାରମ୍ ।
ଶୃଣୁ ସୁଖଦଂ ଶୁଭଦଂ ଭଵସାରମ୍ ॥
କେଶଵ ଧୃତଦଶଵିଧରୂପ ଜଯ ଜଗଦୀଶ ହରେ ॥ 11 ॥
ଵେଦାନୁଦ୍ଧରତେ ଜଗନ୍ନିଵହତେ ଭୂଗୋଲମୁଦ୍ବିଭ୍ରତେ ଦୈତ୍ଯଂ ଦାରଯତେ ବଲିଂ ଛଲଯତେ କ୍ଷତ୍ରକ୍ଷଯଂ କୁର୍ଵତେ ।
ପୌଲସ୍ତ୍ଯଂ ଜଯତେ ହଲଂ କଲଯତେ କାରୁଣ୍ଯମାତନ୍ଵତେ ମ୍ଲେଚ୍ଛାନ୍ମୂର୍ଚ୍ଛଯତେ ଦଶାକୃତିକୃତେ କୃଷ୍ଣାଯ ତୁଭ୍ଯଂ ନମଃ ॥ 5 ॥
॥ ଗୀତମ୍ 2 ॥
ଶ୍ରିତକମଲାକୁଚମଂଡଲ! ଧୃତକୁଂଡଲ! ।
କଲିତଲଲିତଵନମାଲ! ଜଯ, ଜଯ, ଦେଵ! ହରେ! ॥ 1 ॥
ଦିନମଣୀମଂଡଲମଂଡନ! ଭଵଖଂଡନ! ।
ମୁନିଜନମାନସହଂସ! ଜଯ, ଜଯ, ଦେଵ! ହରେ! ॥ 2 ॥
କାଲିଯଵିଷଧରଗଂଜନ! ଜନରଂଜନ! ।
ଯଦୁକୁଲନଲିନଦିନେଶ! ଜଯ, ଜଯ, ଦେଵ! ହରେ! ॥ 3 ॥
ମଧୁମୁରନରକଵିନାଶନ! ଗରୁଡାସନ! ।
ସୁରକୁଲକେଲିନିଦାନ! ଜଯ, ଜଯ, ଦେଵ! ହରେ! ॥ 4 ॥
ଅମଲକମଲଦଲଲୋଚନ! ଭଵମୋଚନ୍! ।
ତ୍ରିଭୁଵନଭଵନନିଧାନ! ଜଯ, ଜଯ, ଦେଵ! ହରେ! ॥ 5 ॥
ଜନକସୁତାକୃତଭୂଷଣ! ଜିତଦୂଷଣ! ।
ସମରଶମିତଦଶଖଂଠ! ଜଯ, ଜଯ, ଦେଵ! ହରେ! ॥ 6 ॥
ଅଭିନଵଜଲଧରସୁଂଦର! ଧୃତମଂଦର! ।
ଶ୍ରୀମୁଖଚଂଦ୍ରଚକୋର! ଜଯ, ଜଯ, ଦେଵ! ହରେ! ॥ 7 ॥
ଶ୍ରୀଜଯଦେଵକଵେରିଦଂ କୁରୁତେ ମୁଦମ୍ ।
ମଂଗଲମୁଜ୍ଜ୍ଵଲଗୀତଂ; ଜଯ, ଜଯ, ଦେଵ! ହରେ! ॥ 8 ॥
ପଦ୍ମାପଯୋଧରତଟୀପରିରଂଭଲଗ୍ନ-କାଶ୍ମୀରମୁଦ୍ରିତମୁରୋ ମଧୁସୂଦନସ୍ଯ ।
ଵ୍ଯକ୍ତାନୁରାଗମିଵ ଖେଲଦନଂଗଖେଦ-ସ୍ଵେଦାଂବୁପୂରମନୁପୂରଯତୁ ପ୍ରିଯଂ ଵଃ ॥ 6 ॥
ଵସଂତେ ଵାସଂତୀକୁସୁମସୁକୁମାରୈରଵଯଵୈ-ର୍ଭ୍ରମଂତୀଂ କାଂତାରେ ବହୁଵିହିତକୃଷ୍ଣାନୁସରଣାମ୍ ।
ଅମଂଦଂ କଂଦର୍ପଜ୍ଵରଜନିତଚିଂତାକୁଲତଯା ଵଲଦ୍ବାଧାଂ ରାଧାଂ ସରସମିଦମୁଚେ ସହଚରୀ ॥ 7 ॥
॥ ଗୀତମ୍ 3 ॥
ଲଲିତଲଵଂଗଲତାପରିଶୀଲନକୋମଲମଲଯସମୀରେ ।
ମଧୁକରନିକରକରଂବିତକୋକିଲକୂଜିତକୁଂଜକୁଟୀରେ ॥
ଵିହରତି ହରିରିହ ସରସଵସଂତେ ନୃତ୍ଯତି ଯୁଵତିଜନେନ ସମଂ ସଖି ଵିରହିଜନସ୍ଯ ଦୁରଂତେ ॥ 1 ॥
ଉନ୍ମଦମଦନମନୋରଥପଥିକଵଧୂଜନଜନିତଵିଲାପେ ।
ଅଲିକୁଲସଂକୁଲକୁସୁମସମୂହନିରାକୁଲବକୁଲକଲାପେ ॥ 2 ॥
ମୃଗମଦସୌରଭରଭସଵଶଂଵଦନଵଦଲମାଲତମାଲେ ।
ଯୁଵଜନହୃଦଯଵିଦାରଣମନସିଜନଖରୁଚିକିଂଶୁକଜାଲେ ॥ 3 ॥
ମଦନମହୀପତିକନକଦଂଡରୁଚିକେଶରକୁସୁମଵିକାସେ ।
ମିଲିତଶିଲୀମୁଖପାଟଲିପଟଲକୃତସ୍ମରତୂଣଵିଲାସେ ॥ 4 ॥
ଵିଗଲିତଲଜ୍ଜିତଜଗଦଵଲୋକନତରୁଣକରୁଣକୃତହାସେ ।
ଵିରହିନିକୃଂତନକୁଂତମୁଖାକୃତିକେତକଦଂତୁରିତାଶେ ॥ 5 ॥
ମାଧଵିକାପରିମଲଲଲିତେ ନଵମାଲିକଜାତିସୁଗଂଧୌ ।
ମୁନିମନସାମପି ମୋହନକାରିଣି ତରୁଣାକାରଣବଂଧୌ ॥ 6 ॥
ସ୍ଫୁରଦତିମୁକ୍ତଲତାପରିରଂଭଣମୁକୁଲିତପୁଲକିତଚୂତେ ।
ବୃଂଦାଵନଵିପିନେ ପରିସରପରିଗତଯମୁନାଜଲପୂତେ ॥ 7 ॥
ଶ୍ରୀଜଯଦେଵଭଣିତମିଦମୁଦଯତି ହରିଚରଣସ୍ମୃତିସାରମ୍ ।
ସରସଵସଂତସମଯଵନଵର୍ଣନମନୁଗତମଦନଵିକାରମ୍ ॥ 8 ॥
ଦରଵିଦଲିତମଲ୍ଲୀଵଲ୍ଲିଚଂଚତ୍ପରାଗ-ପ୍ରକଟିତପଟଵାସୈର୍ଵାସଯନ୍ କାନନାନି ।
ଇହ ହି ଦହତି ଚେତଃ କେତକୀଗଂଧବଂଧୁଃ ପ୍ରସରଦସମବାଣପ୍ରାଣଵଦ୍ଗଂଧଵାହଃ ॥ 8 ॥
ଉନ୍ମୀଲନ୍ମଧୁଗଂଧଲୁବ୍ଧମଧୁପଵ୍ଯାଧୂତଚୂତାଂକୁର-କ୍ରୀଡତ୍କୋକିଲକାକଲୀକଲକଲୈରୁଦ୍ଗୀର୍ଣକର୍ଣଜ୍ଵରାଃ ।
ନୀଯଂତେ ପଥିକୈଃ କଥଂକଥମପି ଧ୍ଯାନାଵଧାନକ୍ଷଣ-ପ୍ରାପ୍ତପ୍ରାଣସମାସମାଗମରସୋଲ୍ଲାସୈରମୀ ଵାସରାଃ ॥ 9 ॥
ଅନେକନାରୀପରିରଂଭସଂଭ୍ରମ-ସ୍ଫୁରନ୍ମନୋହାରିଵିଲାସଲାଲସମ୍ ।
ମୁରାରିମାରାଦୁପଦର୍ଶଯଂତ୍ଯସୌ ସଖୀ ସମକ୍ଷଂ ପୁନରାହ ରାଧିକାମ୍ ॥ 10 ॥
॥ ଗୀତମ୍ 4 ॥
ଚଂଦନଚର୍ଚିତନୀଲକଲେବରପୀତଵସନଵନମାଲୀ ।
କେଲିଚଲନ୍ମଣିକୁଂଡଲମଂଡିତଗଂଡଯୁଗସ୍ମିତଶାଲୀ ॥
ହରିରିହମୁଗ୍ଧଵଧୂନିକରେ ଵିଲାସିନି ଵିଲସତି କେଲିପରେ ॥ 1 ॥
ପୀନପଯୋଧରଭାରଭରେଣ ହରିଂ ପରିରମ୍ଯ ସରାଗମ୍ ।
ଗୋପଵଧୂରନୁଗାଯତି କାଚିଦୁଦଂଚିତପଂଚମରାଗମ୍ ॥ 2 ॥
କାପି ଵିଲାସଵିଲୋଲଵିଲୋଚନଖେଲନଜନିତମନୋଜମ୍ ।
ଧ୍ଯାଯତି ମୁଗ୍ଧଵଧୂରଧିକଂ ମଧୁସୂଦନଵଦନସରୋଜମ୍ ॥ 3 ॥
କାପି କପୋଲତଲେ ମିଲିତା ଲପିତୁଂ କିମପି ଶ୍ରୁତିମୂଲେ ।
ଚାରୁ ଚୁଚୁଂବ ନିତଂବଵତୀ ଦଯିତଂ ପୁଲକୈରନୁକୂଲେ ॥ 4 ॥
କେଲିକଲାକୁତୁକେନ ଚ କାଚିଦମୁଂ ଯମୁନାଜଲକୂଲେ ।
ମଂଜୁଲଵଂଜୁଲକୁଂଜଗତଂ ଵିଚକର୍ଷ କରେଣ ଦୁକୂଲେ ॥ 5 ॥
କରତଲତାଲତରଲଵଲଯାଵଲିକଲିତକଲସ୍ଵନଵଂଶେ ।
ରାସରସେ ସହନୃତ୍ଯପରା ହରିଣା ଯୁଵତିଃ ପ୍ରଶଶଂସେ ॥ 6 ॥
ଶ୍ଲିଷ୍ଯତି କାମପି ଚୁଂବତି କାମପି କାମପି ରମଯତି ରାମାମ୍ ।
ପଶ୍ଯତି ସସ୍ମିତଚାରୁପରାମପରାମନୁଗଚ୍ଛତି ଵାମାମ୍ ॥ 7 ॥
ଶ୍ରୀଜଯଦେଵକଵେରିଦମଦ୍ଭୁତକେଶଵକେଲିରହସ୍ଯମ୍ ।
ଵୃଂଦାଵନଵିପିନେ ଲଲିତଂ ଵିତନୋତୁ ଶୁଭାନି ଯଶସ୍ଯମ୍ ॥ 8 ॥
ଵିଶ୍ଵେଷାମନୁରଂଜନେନ ଜନଯନ୍ନାନଂଦମିଂଦୀଵର-ଶ୍ରେଣୀଶ୍ଯାମଲକୋମଲୈରୁପନଯନ୍ନଂଗୈରନଂଗୋତ୍ସଵମ୍ ।
ସ୍ଵଚ୍ଛଂଦଂ ଵ୍ରଜସୁଂଦରୀଭିରଭିତଃ ପ୍ରତ୍ଯଂଗମାଲିଂକିତଃ ଶୃଂଗାରଃ ସଖି ମୂର୍ତିମାନିଵ ମଧୌ ମୁଗ୍ଧୋ ହରିଃ କ୍ରୀଡତି ॥ 11 ॥
ଅଦ୍ଯୋତ୍ସଂଗଵସଦ୍ଭୁଜଂଗକଵଲକ୍ଲେଶାଦିଵେଶାଚଲଂ ପ୍ରାଲେଯପ୍ଲଵନେଚ୍ଛଯାନୁସରତି ଶ୍ରୀଖଂଡଶୈଲାନିଲଃ ।
କିଂ ଚ ସ୍ନିଗ୍ଧରସାଲମୌଲିମୁକୁଲାନ୍ଯାଲୋକ୍ଯ ହର୍ଷୋଦଯା-ଦୁନ୍ମୀଲଂତି କୁହୂଃ କୁହୂରିତି କଲୋତ୍ତାଲାଃ ପିକାନାଂ ଗିରଃ ॥ 12 ॥
ରାସୋଲ୍ଲାସଭରେଣଵିଭ୍ରମଭୃତାମାଭୀରଵାମଭ୍ରୁଵା-ମଭ୍ଯର୍ଣଂ ପରିରମ୍ଯନିର୍ଭରମୁରଃ ପ୍ରେମାଂଧଯା ରାଧଯା ।
ସାଧୁ ତ୍ଵଦ୍ଵଦନଂ ସୁଧାମଯମିତି ଵ୍ଯାହୃତ୍ଯ ଗୀତସ୍ତୁତି-ଵ୍ଯାଜାଦୁଦ୍ଭଟଚୁଂବିତସ୍ମିତମନୋହରୀ ହରିଃ ପାତୁ ଵଃ ॥ 13 ॥
॥ ଇତି ଶ୍ରୀଗୀତଗୋଵିଂଦେ ସାମୋଦଦାମୋଦରୋ ନାମ ପ୍ରଥମଃ ସର୍ଗଃ ॥
Browse Related Categories:
