ଚଂଡମୁଂଡ ଵଧୋ ନାମ ସପ୍ତମୋଧ୍ଯାଯଃ ॥
ଧ୍ଯାନଂ
ଧ୍ଯାଯେଂ ରତ୍ନ ପୀଠେ ଶୁକକଲ ପଠିତଂ ଶ୍ରୁଣ୍ଵତୀଂ ଶ୍ଯାମଲାଂଗୀଂ।
ନ୍ଯସ୍ତୈକାଂଘ୍ରିଂ ସରୋଜେ ଶଶି ଶକଲ ଧରାଂ ଵଲ୍ଲକୀଂ ଵାଦ ଯଂତୀଂ
କହଲାରାବଦ୍ଧ ମାଲାଂ ନିଯମିତ ଵିଲସଚ୍ଚୋଲିକାଂ ରକ୍ତ ଵସ୍ତ୍ରାଂ।
ମାତଂଗୀଂ ଶଂଖ ପାତ୍ରାଂ ମଧୁର ମଧୁମଦାଂ ଚିତ୍ରକୋଦ୍ଭାସି ଭାଲାଂ।
ଋଷିରୁଵାଚ।
ଆଜ୍ଞପ୍ତାସ୍ତେ ତତୋଦୈତ୍ଯା-ଶ୍ଚଂଡମୁଂଡପୁରୋଗମାଃ।
ଚତୁରଂଗବଲୋପେତା ଯଯୁରଭ୍ଯୁଦ୍ଯତାଯୁଧାଃ॥1॥
ଦଦୃଶୁସ୍ତେ ତତୋ ଦେଵୀ-ମୀଷଦ୍ଧାସାଂ ଵ୍ଯଵସ୍ଥିତାମ୍।
ସିଂହସ୍ଯୋପରି ଶୈଲେଂଦ୍ର-ଶୃଂଗେ ମହତିକାଂଚନେ॥2॥
ତେଦୃଷ୍ଟ୍ଵାତାଂସମାଦାତୁ-ମୁଦ୍ଯମଂଂଚକ୍ରୁରୁଦ୍ଯତାଃ
ଆକୃଷ୍ଟଚାପାସିଧରା-ସ୍ତଥାଽନ୍ଯେ ତତ୍ସମୀପଗାଃ॥3॥
ତତଃ କୋପଂ ଚକାରୋଚ୍ଚୈ-ରଂବିକା ତାନରୀନ୍ପ୍ରତି।
କୋପେନ ଚାସ୍ଯା ଵଦନଂ ମଷୀଵର୍ଣମଭୂତ୍ତଦା॥4॥
ଭ୍ରୁକୁଟୀକୁଟିଲାତ୍ତସ୍ଯା ଲଲାଟଫଲକାଦ୍ଦ୍ରୁତମ୍।
କାଳୀ କରାଳ ଵଦନା ଵିନିଷ୍କ୍ରାଂତାଽସିପାଶିନୀ ॥5॥
ଵିଚିତ୍ରଖଟ୍ଵାଂଗଧରା ନରମାଲାଵିଭୂଷଣା।
ଦ୍ଵୀପିଚର୍ମପରୀଧାନା ଶୁଷ୍କମାଂସାଽତିଭୈରଵା॥6॥
ଅତିଵିସ୍ତାରଵଦନା ଜିହ୍ଵାଲଲନଭୀଷଣା।
ନିମଗ୍ନାରକ୍ତନଯନା ନାଦାପୂରିତଦିଙ୍ମୁଖା ॥6॥
ସା ଵେଗେନାଽଭିପତିତା ଘୂତଯଂତୀ ମହାସୁରାନ୍।
ସୈନ୍ଯେ ତତ୍ର ସୁରାରୀଣା-ମଭକ୍ଷଯତ ତଦ୍ବଲମ୍ ॥8॥
ପାର୍ଷ୍ଣିଗ୍ରାହାଂକୁଶଗ୍ରାହି-ଯୋଧଘଂଟାସମନ୍ଵିତାନ୍।
ସମାଦାଯୈକହସ୍ତେନ ମୁଖେ ଚିକ୍ଷେପ ଵାରଣାନ୍ ॥9॥
ତଥୈଵ ଯୋଧଂ ତୁରଗୈ ରଥଂ ସାରଥିନା ସହ।
ନିକ୍ଷିପ୍ଯ ଵକ୍ତ୍ରେ ଦଶନୈଶ୍ଚର୍ଵଯତ୍ଯତିଭୈରଵଂ ॥10॥
ଏକଂ ଜଗ୍ରାହ କେଶେଷୁ ଗ୍ରୀଵାଯାମଥ ଚାପରଂ।
ପାଦେନାକ୍ରମ୍ଯଚୈଵାନ୍ଯମୁରସାନ୍ଯମପୋଥଯତ୍ ॥11॥
ତୈର୍ମୁକ୍ତାନିଚ ଶସ୍ତ୍ରାଣି ମହାସ୍ତ୍ରାଣି ତଥାସୁରୈଃ।
ମୁଖେନ ଜଗ୍ରାହ ରୁଷା ଦଶନୈର୍ମଥିତାନ୍ଯପି ॥12॥
ବଲିନାଂ ତଦ୍ବଲଂ ସର୍ଵମସୁରାଣାଂ ଦୁରାତ୍ମନାଂ
ମମର୍ଦାଭକ୍ଷଯଚ୍ଚାନ୍ଯାନନ୍ଯାଂଶ୍ଚାତାଡଯତ୍ତଥା ॥13॥
ଅସିନା ନିହତାଃ କେଚିତ୍କେଚିତ୍ଖଟ୍ଵାଂଗତାଡିତାଃ।
ଜଗ୍ମୁର୍ଵିନାଶମସୁରା ଦଂତାଗ୍ରାଭିହତାସ୍ତଥା ॥14॥
କ୍ଷଣେନ ତଦ୍ଭଲଂ ସର୍ଵ ମସୁରାଣାଂ ନିପାତିତଂ।
ଦୃଷ୍ଟ୍ଵା ଚଂଡୋଽଭିଦୁଦ୍ରାଵ ତାଂ କାଳୀମତିଭୀଷଣାଂ ॥15॥
ଶରଵର୍ଷୈର୍ମହାଭୀମୈର୍ଭୀମାକ୍ଷୀଂ ତାଂ ମହାସୁରଃ।
ଛାଦଯାମାସ ଚକ୍ରୈଶ୍ଚ ମୁଂଡଃ କ୍ଷିପ୍ତୈଃ ସହସ୍ରଶଃ ॥16॥
ତାନିଚକ୍ରାଣ୍ଯନେକାନି ଵିଶମାନାନି ତନ୍ମୁଖମ୍।
ବଭୁର୍ଯଥାର୍କବିଂବାନି ସୁବହୂନି ଘନୋଦରଂ ॥17॥
ତତୋ ଜହାସାତିରୁଷା ଭୀମଂ ଭୈରଵନାଦିନୀ।
କାଳୀ କରାଳଵଦନା ଦୁର୍ଦର୍ଶଶନୋଜ୍ଜ୍ଵଲା ॥18॥
ଉତ୍ଥାଯ ଚ ମହାସିଂହଂ ଦେଵୀ ଚଂଡମଧାଵତ।
ଗୃହୀତ୍ଵା ଚାସ୍ଯ କେଶେଷୁ ଶିରସ୍ତେନାସିନାଚ୍ଛିନତ୍ ॥19॥
ଅଥ ମୁଂଡୋଽଭ୍ଯଧାଵତ୍ତାଂ ଦୃଷ୍ଟ୍ଵା ଚଂଡଂ ନିପାତିତମ୍।
ତମପ୍ଯପାତ ଯଦ୍ଭମୌ ସା ଖଡ୍ଗାଭିହତଂରୁଷା ॥20॥
ହତଶେଷଂ ତତଃ ସୈନ୍ଯଂ ଦୃଷ୍ଟ୍ଵା ଚଂଡଂ ନିପାତିତମ୍।
ମୁଂଡଂଚ ସୁମହାଵୀର୍ଯଂ ଦିଶୋ ଭେଜେ ଭଯାତୁରମ୍ ॥21॥
ଶିରଶ୍ଚଂଡସ୍ଯ କାଳୀ ଚ ଗୃହୀତ୍ଵା ମୁଂଡ ମେଵ ଚ।
ପ୍ରାହ ପ୍ରଚଂଡାଟ୍ଟହାସମିଶ୍ରମଭ୍ଯେତ୍ଯ ଚଂଡିକାମ୍ ॥22॥
ମଯା ତଵା ତ୍ରୋପହୃତୌ ଚଂଡମୁଂଡୌ ମହାପଶୂ।
ଯୁଦ୍ଧଯଜ୍ଞେ ସ୍ଵଯଂ ଶୁଂଭଂ ନିଶୁଂଭଂ ଚହନିଷ୍ଯସି ॥23॥
ଋଷିରୁଵାଚ॥
ତାଵାନୀତୌ ତତୋ ଦୃଷ୍ଟ୍ଵା ଚଂଡ ମୁଂଡୌ ମହାସୁରୌ।
ଉଵାଚ କାଳୀଂ କଳ୍ଯାଣୀ ଲଲିତଂ ଚଂଡିକା ଵଚଃ ॥24॥
ଯସ୍ମାଚ୍ଚଂଡଂ ଚ ମୁଂଡଂ ଚ ଗୃହୀତ୍ଵା ତ୍ଵମୁପାଗତା।
ଚାମୁଂଡେତି ତତୋ ଲୋକେ ଖ୍ଯାତା ଦେଵୀ ଭଵିଷ୍ଯସି ॥25॥
॥ ଜଯ ଜଯ ଶ୍ରୀ ମାର୍କଂଡେଯ ପୁରାଣେ ସାଵର୍ନିକେ ମନ୍ଵଂତରେ ଦେଵି ମହତ୍ମ୍ଯେ ଚଂଡମୁଂଡ ଵଧୋ ନାମ ସପ୍ତମୋଧ୍ଯାଯ ସମାପ୍ତଂ ॥
ଆହୁତି
ଓଂ କ୍ଲୀଂ ଜଯଂତୀ ସାଂଗାଯୈ ସଶକ୍ତିକାଯୈ ସପରିଵାରାଯୈ ସଵାହନାଯୈ କାଳୀ ଚାମୁଂଡା ଦେଵ୍ଯୈ କର୍ପୂର ବୀଜାଧିଷ୍ଠାଯୈ ମହାହୁତିଂ ସମର୍ପଯାମି ନମଃ ସ୍ଵାହା ॥
Browse Related Categories:
