ഹരിഃ ഓമ് ॥ സ॒ഹ നാ॑ വവതു । സ॒ഹ നൌ॑ ഭുനക്തു । സ॒ഹ വീ॒ര്യം॑ കരവാവഹൈ । തേ॒ജ॒സ്വി നാ॒വധീ॑തമസ്തു॒ മാ വി॑ദ്വിഷാ॒വഹൈ᳚ । ഓം ശാംതിഃ॒ ശാംതിഃ॒ ശാംതിഃ॑ ॥

ബ്ര॒ഹ്മ॒വിദാ᳚പ്നോതി॒ പരമ്᳚ ॥ തദേ॒ഷാഽഭ്യു॑ക്താ । സ॒ത്യം ജ്ഞാ॒നമ॑നം॒തം ബ്രഹ്മ॑ । യോ വേദ॒ നിഹി॑തം॒ ഗുഹാ॑യാം പര॒മേ വ്യോ॑മന്ന് । സോ᳚ഽശ്നു॒തേ॒ സര്വാ॒ന്കാമാം᳚ഥ്സ॒ഹ । ബ്രഹ്മ॑ണാ വിപ॒ശ്ചിതേതി॑ ॥ തസ്മാ॒ദ്വാ ഏ॒തസ്മാ॑ദാ॒ത്മന॑ ആകാ॒ശസ്സംഭൂ॑തഃ । ആ॒കാ॒ശാദ്വാ॒യുഃ । വാ॒യോര॒ഗ്നിഃ । അ॒ഗ്നേരാപഃ॑ । അ॒ദ്ഭ്യഃ പൃ॑ഥി॒വീ । പൃ॒ഥി॒വ്യാ ഓഷ॑ധയഃ । ഓഷ॑ധീ॒ഭ്യോന്നമ്᳚ । അന്നാ॒ത്പുരു॑ഷഃ । സ വാ ഏഷ പുരുഷോഽന്ന॑രസ॒മയഃ । തസ്യേദ॑മേവ॒ ശിരഃ । അയം ദക്ഷി॑ണഃ പ॒ക്ഷഃ । അയമുത്ത॑രഃ പ॒ക്ഷഃ । അയമാത്മാ᳚ । ഇദം പുച്ഛമ്॑ പ്രതി॒ഷ്ഠാ । തദപ്യേഷ ശ്ലോ॑കോ ഭ॒വതി ॥ 1 ॥

അന്നാ॒ദ്വൈ പ്ര॒ജാഃ പ്ര॒ജായം॑തേ । യാഃ കാശ്ച॑ പൃഥി॒വീഗ് ശ്രി॒താഃ । അഥോ॒ അന്നേ॑നൈ॒വ ജീ॑വംതി। അഥൈ॑ന॒ദപി॑ യംത്യംത॒തഃ । അന്ന॒ഗ്മ്॒ ഹി ഭു॒താനാം॒ ജ്യേഷ്ഠമ്᳚ । തസ്മാ᳚ഥ്സര്വൌഷ॒ധമു॑ച്യതേ । സര്വം॒ വൈ തേഽന്ന॑മാപ്നുവംതി । യേഽന്നം॒ ബ്രഹ്മോ॒പാസ॑തേ । അന്ന॒ഗ്മ്॒ ഹി ഭു॒താനാം॒ ജ്യേഷ്ഠമ്᳚ । തസ്മാ᳚ഥ്സര്വൌഷ॒ധമു॑ച്യതേ । അന്നാ᳚ദ്ഭൂ॒താനി॒ ജായം॑തേ । ജാതാ॒ന്യന്നേന॑ വര്ധംതേ । അദ്യതേഽത്തി ച॑ ഭൂതാ॒നി । തസ്മാദന്നം തദുച്യ॑ത ഇ॒തി । തസ്മാദ്വാ ഏതസ്മാദന്ന॑രസ॒മയാത് । അന്യോംതര ആത്മാ᳚ പ്രാണ॒മയഃ । തേനൈ॑ഷ പൂ॒ര്ണഃ । സ വാ ഏഷ പുരുഷവി॑ധ ഏ॒വ । തസ്യ പുരു॑ഷവി॒ധതാമ് । അന്വയം॑ പുരുഷ॒വിധഃ । തസ്യ പ്രാണ॑ ഏവ॒ ശിരഃ । വ്യാനോ ദക്ഷി॑ണഃ പ॒ക്ഷഃ । അപാന ഉത്ത॑രഃ പ॒ക്ഷഃ । ആകാ॑ശ ആ॒ത്മാ । പൃഥിവീ പുച്ഛം॑ പ്രതി॒ഷ്ഠാ । തദപ്യേഷ ശ്ലോ॑കോ ഭ॒വതി ॥ 2 ॥

പ്രാ॒ണം ദേ॒വാ അനു॒പ്രാണം॑തി । മ॒നു॒ഷ്യാഃ᳚ പ॒ശവ॑ശ്ച॒ യേ । പ്രാ॒ണോ ഹി ഭൂ॒തനാ॒മായുഃ॑ । തസ്മാ᳚ഥ്സര്വായു॒ഷമു॑ച്യതേ । സര്വ॑മേ॒വ ത॒ ആയു॑ര്യംതി । യേ പ്രാ॒ണം ബ്രഹ്മോ॒പാസ॑തേ । പ്രാണോ ഹി ഭൂതാ॑നാമാ॒യുഃ । തസ്മാഥ്സര്വായുഷമുച്യ॑ത ഇ॒തി । തസ്യൈഷ ഏവ ശാരീ॑ര ആ॒ത്മാ । യഃ॑ പൂര്വ॒സ്യ । തസ്മാദ്വാ ഏതസ്മാ᳚ത്-പ്രാണ॒മയാത് । അന്യോഽംതര ആത്മാ॑ മനോ॒മയഃ । തേനൈ॑ഷ പൂ॒ര്ണഃ । സ വാ ഏഷ പുരുഷവി॑ധ ഏ॒വ। തസ്യ പുരു॑ഷവി॒ധതാമ് । അന്വയം॑ പുരുഷ॒വിധഃ । തസ്യ യജു॑രേവ॒ ശിരഃ । ഋഗ്-ദക്ഷി॑ണഃ പ॒ക്ഷഃ । സാമോത്ത॑രഃ പ॒ക്ഷഃ । ആദേ॑ശ ആ॒ത്മാ । അഥര്വാംഗിരസഃ പുച്ഛം॑ പ്രതി॒ഷ്ഠാ । തദപ്യേഷ ശ്ലോ॑കോ ഭ॒വതി ॥ 3 ॥

യതോ॒ വാചോ॒ നിവ॑ര്തംതേ । അപ്രാ᳚പ്യ॒ മന॑സാ സ॒ഹ । ആനംദം ബ്രഹ്മ॑ണോ വി॒ദ്വാന് । ന ബിഭേതി കദാ॑ചനേ॒തി । തസ്യൈഷ ഏവ ശാരീ॑ര ആ॒ത്മാ । യഃ॑ പൂര്വ॒സ്യ । തസ്മാദ്വാ ഏതസ്മാ᳚ന്-മനോ॒മയാത് । അന്യോഽംതര ആത്മാ വി॑ജ്ഞാന॒മയഃ । തേനൈ॑ഷ പൂ॒ര്ണഃ । സ വാ ഏഷ പുരുഷവി॑ധ ഏ॒വ । തസ്യ പുരു॑ഷവി॒ധതാമ് । അന്വയം॑ പുരുഷ॒വിധഃ । തസ്യ ശ്ര॑ദ്ധൈവ॒ ശിരഃ । ഋതം ദക്ഷി॑ണഃ പ॒ക്ഷഃ । സത്യമുത്ത॑രഃ പ॒ക്ഷഃ । യോ॑ഗ ആ॒ത്മാ । മഹഃ പുച്ഛം॑ പ്രതി॒ഷ്ഠാ । തദപ്യേഷ ശ്ലോ॑കോ ഭ॒വതി ॥ 4 ॥

വി॒ജ്ഞാനം॑ യ॒ജ്ഞം ത॑നുതേ । കര്മാ॑ണീ തനു॒തേഽപി॑ ച । വി॒ജ്ഞാനം॑ ദേ॒വാസ്സര്വേ᳚ । ബ്രഹ്മ॒ ജ്യേഷ്ഠ॒മുപാ॑സതേ । വി॒ജ്ഞാനം॒ ബ്രഹ്മ॒ ചേദ്വേദ॑ । തസ്മാ॒ച്ചേന്ന പ്ര॒മാദ്യ॑തി । ശരീരേ॑ പാപ്മ॑നോ ഹി॒ത്വാ । സര്വാന് കാമാംഥ്സമശ്നു॑ത ഇ॒തി । തസ്യൈഷ ഏവ ശാരീ॑ര ആ॒ത്മാ । യഃ॑ പൂര്വ॒സ്യ । തസ്മാദ്വാ ഏതസ്മാദ്വി॑ജ്ഞാന॒മയാത് । അന്യോഽംതര ആത്മാ॑ഽഽനംദ॒മയഃ । തേനൈ॑ഷ പൂ॒ര്ണഃ । സ വാ ഏഷ പുരുഷവി॑ധ ഏ॒വ । തസ്യ പുരു॑ഷവി॒ധതാമ് । അന്വയം॑ പുരുഷ॒വിധഃ । തസ്യ പ്രിയ॑മേവ॒ ശിരഃ । മോദോ ദക്ഷി॑ണഃ പ॒ക്ഷഃ । പ്രമോദ ഉത്ത॑രഃ പ॒ക്ഷഃ । ആനം॑ദ ആ॒ത്മാ । ബ്രഹ്മ പുച്ഛം॑ പ്രതി॒ഷ്ഠാ । തദപ്യേഷ ശ്ലോ॑കോ ഭ॒വതി ॥ 5 ॥

അസ॑ന്നേ॒വ സ॑ ഭവതി । അസ॒ദ്ബ്രഹ്മേതി॒ വേദ॒ ചേത് । അസ്തി ബ്രഹ്മേതി॑ ചേദ്വേ॒ദ । സംതമേനം തതോ വി॑ദുരി॒തി । തസ്യൈഷ ഏവ ശാരീ॑ര ആ॒ത്മാ । യഃ॑ പൂര്വ॒സ്യ । അഥാതോ॑ഽനുപ്ര॒ശ്നാഃ । ഉ॒താവി॒ദ്വാന॒മും ലോ॒കം പ്രേത്യ॑ । കശ്ച॒ന ഗ॑ച്ച॒തീ(3) । ആഹോ॑ വി॒ദ്വാന॒മും ലോ॒കം പ്രേത്യ॑ । കസ്ചി॒ഥ്സമ॑ശ്നു॒താ(3) ഉ॒ । സോ॑ഽകാമയത । ബ॒ഹു സ്യാം॒ പ്രജാ॑യേ॒യേതി॑ । സ തപോ॑ഽതപ്യത । സ തപ॑സ്ത॒പ്ത്വാ । ഇദഗ്മ് സര്വ॑മസൃജത । യദി॒ദം കിംച॑ । തഥ്സൃ॒ഷ്ട്വാ । തദേ॒വാനു॒പ്രാവി॑ശത് । തദ॑നുപ്ര॒വിശ്യ॑ । സച്ച॒ ത്യച്ചാ॑ഭവത് । നി॒രുക്തം॒ ചാനി॑രുക്തം ച । നി॒ലയ॑നം॒ ചാനി॑ലയനം ച । വി॒ജ്ഞാനം॒ ചാവി॑ജ്ഞനം ച । സത്യം ചാനൃതം ച സ॑ത്യമ॒ഭവത് । യദി॑ദം കിം॒ച । തഥ്സത്യമി॑ത്യാച॒ക്ഷതേ । തദപ്യേഷ ശ്ലോ॑കോ ഭ॒വതി ॥ 6 ॥

അസ॒ദ്വാ ഇ॒ദമഗ്ര॑ ആസീത് । തതോ॒ വൈ സദ॑ജായത । തദാത്മാനഗ്ഗ് സ്വയ॑മകു॒രുത । തസ്മാത്തഥ്സുകൃതമുച്യ॑ത ഇ॒തി । യദ്വൈ॑ തഥ്സു॒കൃതമ് । ര॑സോ വൈ॒ സഃ । രസഗ്ഗ് ഹ്യേവായം ലബ്ധ്വാഽഽനം॑ദീ ഭ॒വതി । കോ ഹ്യേവാന്യാ᳚ത്കഃ പ്രാ॒ണ്യാത് । യദേഷ ആകാശ ആനം॑ദോ ന॒ സ്യാത് । ഏഷ ഹ്യേവാഽഽനം॑ദയാ॒തി । യ॒ദാ ഹ്യേ॑വൈഷ॒ ഏതസ്മിന്നദൃശ്യേഽനാത്മ്യേഽനിരുക്തേഽനിലയനേഽഭയം പ്രതി॑ഷ്ഠാം വിം॒ദതേ । അഥ സോഽഭയം ഗ॑തോ ഭ॒വതി । യ॒ദാ ഹ്യേ॑വൈഷ॒ ഏതസ്മിന്നുദരമംത॑രം കു॒രുതേ । അഥ തസ്യ ഭ॑യം ഭ॒വതി । തത്വേവ ഭയം വിദുഷോഽമ॑ന്വാന॒സ്യ । തദപ്യേഷ ശ്ലോ॑കോ ഭ॒വതി ॥ 7 ॥

ഭീ॒ഷാഽസ്മാ॒ദ്വാതഃ॑ പവതേ । ഭീ॒ഷോദേ॑തി॒ സൂര്യഃ॑ । ഭീ॒ഷാഽസ്മാദഗ്നി॑ശ്ചേംദ്ര॒ശ്ച । മൃത്യുര്ധാവതി പംച॑മ ഇ॒തി । സൈഷാഽഽനംദസ്യ മീമാഗ്മ്॑സാ ഭ॒വതി । യുവാ സ്യാഥ്സാധുയു॑വാഽധ്യാ॒യകഃ । ആശിഷ്ഠോ ദൃഡിഷ്ഠോ॑ ബലി॒ഷ്ഠഃ । തസ്യേയം പൃഥിവീ സര്വാ വിത്തസ്യ॑ പൂര്ണാ॒ സ്യാത് । സ ഏകോ മാനുഷ॑ ആനം॒ദഃ । തേ യേ ശതം മാനുഷാ॑ ആനം॒ദാഃ । സ ഏകോ മനുഷ്യഗംധര്വാണാ॑മാനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതം ദേവഗംധര്വാണാ॑മാനം॒ദാഃ । സ ഏകഃ പിതൃണാം ചിരലോകലോകാനാ॑മാനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതം പിതൃണാം ചിരലോകലോകാനാ॑മാനം॒ദാഃ । സ ഏക ആജാനജാനാം ദേവാനാ॑മാനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതമാജാനജാനാം ദേവാനാ॑മാനം॒ദാഃ । സ ഏകഃ കര്മദേവാനാം ദേവാനാ॑മാനം॒ദഃ । യേ കര്മണാ ദേവാന॑പി യം॒തി । ശ്രോത്രിയസ്യ ചാകാമ॑ഹത॒സ്യ । തേ യേ ശതം കര്മദേവാനാം ദേവാനാ॑മാനം॒ദാഃ । സ ഏകോ ദേവാനാ॑മാനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതം ദേവാനാ॑മാനം॒ദാഃ । സ ഏക ഇംദ്ര॑സ്യാഽഽനംം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതമിംദ്ര॑സ്യാഽഽനം॒ദാഃ । സ ഏകോ ബൃഹസ്പതേ॑രാനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതം ബൃഹസ്പതേ॑രാനം॒ദാഃ । സ ഏകഃ പ്രജാപതേ॑രാനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതം പ്രജാപതേ॑രാനം॒ദാഃ । സ ഏകോ ബ്രഹ്മണ॑ ആനം॒ദഃ । ശ്രോത്രിയസ്യ ചാകാമ॑ഹത॒സ്യ । തേ യേ ശതം പജാപതേ॑രാനം॒ദാഃ । സ ഏകോ ബ്രഹ്മണ॑ ആനം॒ദഃ । ശ്രോത്രിയസ്യ ചാകാമ॑ഹത॒സ്യ । സ യശ്ചാ॑യം പു॒രുഷേ । യശ്ചാസാ॑വാദി॒ത്യേ । സ ഏകഃ॑ । സ യ॑ ഏവം॒ വിത് । അസ്മാല്ലോ॑കാത്പ്രേ॒ത്യ । ഏതമന്നമയമാത്മാനമുപ॑സംക്രാ॒മതി । ഏതം പ്രാണമയമാത്മാനമുപ॑സംക്രാ॒മതി । ഏതം മനോമയമാത്മാനമുപ॑സംക്രാ॒മതി। ഏതം വിജ്ഞാനമയമാത്മാനമുപ॑സംക്രാ॒മതി । ഏതമാനംദമയമാത്മാനമുപ॑സംക്രാ॒മതി । തദപ്യേഷ ശ്ലോ॑കോ ഭ॒വതി ॥ 8 ॥

യതോ॒ വാചോ॒ നിവ॑ര്തംതേ । അപ്രാ᳚പ്യ॒ മന॑സാ സ॒ഹ । ആനംദം ബ്രഹ്മ॑ണോ വി॒ദ്വാന് । ന ബിഭേതി കുത॑ശ്ചനേ॒തി । ഏതഗ്മ് ഹ വാവ॑ ന ത॒പതി । കിമഹഗ്മ് സാധു॑ നാക॒രവമ് । കിമഹം പാപമകര॑വമി॒തി । സ യ ഏവം വിദ്വാനേതേ ആത്മാ॑നഗ്ഗ് സ്പൃ॒ണുതേ । ഉ॒ഭേ ഹ്യേ॑വൈഷ॒ ഏതേ ആത്മാ॑നഗ്ഗ് സ്പൃ॒ണുതേ । യ ഏ॒വം വേദ॑ । ഇത്യു॑പ॒നിഷ॑ത് ॥ 9 ॥

സ॒ഹ നാ॑ വവതു । സ॒ഹ നൌ॑ ഭുനക്തു । സ॒ഹ വീ॒ര്യം॑ കരവാവഹൈ । തേ॒ജ॒സ്വി നാ॒വധീ॑തമസ്തു॒ മാ വി॑ദ്വിഷാ॒വഹൈ᳚ । ഓം ശാംതിഃ॒ ശാംതിഃ॒ ശാംതിഃ॑ ॥

॥ ഹരിഃ॑ ഓമ് ॥
॥ ശ്രീ കൃഷ്ണാര്പണമസ്തു ॥