ಹರಿಃ ಓಮ್ । ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯಂ॑ ಕರವಾವಹೈ । ತೇ॒ಜ॒ಸ್ವಿ ನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ।

ಭ್ರುಗು॒ರ್ವೈ ವಾ॑ರು॒ಣಿಃ । ವರು॑ಣಂ॒ ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಸ್ಮಾ॑ ಏತ॒ತ್ಪ್ರೋ॑ವಾಚ । ಅನ್ನಂ॑ ಪ್ರಾ॒ಣಂ ಚಕ್ಷು॒ಶ್ರೋತ್ರಂ॒ ಮನೋ॒ ವಾಚ॒ಮಿತಿ॑ । ತಗ್ಂ ಹೋ॑ವಾಚ । ಯತೋ॒ ವಾ ಇ॒ಮಾನಿ॒ ಭುತಾ॑ನಿ॒ ಜಾಯಂ॑ತೇ । ಯೇನ॒ ಜಾತಾ॑ನಿ॒ ಜೀವಂ॑ತಿ । ಯತ್ಪ್ರಯಂ॑ತ್ಯಭಿಸಂವಿ॑ಶಂತಿ । ತದ್ವಿಜಿ॑ಜ್ಞಾಸಸ್ವ । ತದ್ಬ್ರಹ್ಮೇತಿ॑ । ಸ ತಪೋ॑ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ॥ 1 ॥

ಅನ್ನಂ॒ ಬ್ರಹ್ಮೇತಿ॒ ವ್ಯ॑ಜಾನಾತ್ । ಅ॒ನ್ನಾಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಅನ್ನೇ॑ನ॒ ಜಾತಾ॑ನಿ॒ ಜೀವಂ॑ತಿ । ಅನ್ನಂ॒ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ॥ 2 ॥

ಪ್ರಾ॒ಣೋ ಬ್ರ॒ಹ್ಮೇತಿ॒ ವ್ಯ॑ಜಾನಾತ್ । ಪ್ರಾ॒ಣಾಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಪ್ರಾ॒ಣೇನ॒ ಜಾತಾ॑ನಿ॒ ಜೀವಂ॑ತಿ । ಪ್ರಾ॒ಣಂ ಪ್ರಯಂ॑ತ್ಯ॒ಭಿ ಸಂವಿ॑ಶಂ॒ತೀತಿ॑ । ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ॥ 3 ॥

ಮನೋ॒ ಬ್ರಹ್ಮೇತಿ॒ ವ್ಯ॑ಜಾನಾತ್। ಮನ॑ಸೋ॒ ಹ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಮನ॑ಸಾ॒ ಜಾತಾ॑ನಿ॒ ಜೀವಂ॑ತಿ । ಮನಃ॒ ಪ್ರಯಂ॑ತ್ಯ॒ಭಿ ಸಂವಿ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ॥ 4 ॥

ವಿ॒ಜ್ಞಾನಂ॒ ಬ್ರಹ್ಮೇತಿ॒ ವ್ಯ॑ಜಾನಾತ್ । ವಿ॒ಜ್ಞಾನಾ॒ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ವಿ॒ಜ್ಞಾನೇ॑ನ॒ ಜಾತಾ॑ನಿ॒ ಜೀವಂ॑ತಿ । ವಿ॒ಜ್ಞಾನಂ॒ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ । ತದ್ವಿ॒ಜ್ಞಾಯ॑ । ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ । ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ । ತಗ್ಂ ಹೋ॑ವಾಚ । ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ । ತಪೋ॒ ಬ್ರಹ್ಮೇತಿ॑ । ಸ ತಪೋ॑ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ॥ 5 ॥

ಆ॒ನಂ॒ದೋ ಬ್ರ॒ಹ್ಮೇತಿ॒ ವ್ಯ॑ಜಾನಾತ್ । ಆ॒ನಂದಾ॒ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ । ಆ॒ನಂ॒ದೇನ॒ ಜಾತಾ॑ನಿ॒ ಜೀವಂ॑ತಿ । ಆ॒ನಂ॒ದಂ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ । ಸೈಷಾ ಭಾ᳚ರ್ಗ॒ವೀ ವಾ॑ರು॒ಣೀ ವಿ॒ದ್ಯಾ । ಪ॒ರ॒ಮೇ ವ್ಯೋ॑ಮ॒ನ್ ಪ್ರತಿ॑ಷ್ಠಿತಾ । ಸ ಯ ಏ॒ವಂ ವೇದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ ಕೀ॒ರ್ತ್ಯಾ । ॥ 6 ॥

ಅನ್ನಂ॒ ನ ನಿಂ॑ದ್ಯಾತ್ । ತದ್-ವ್ರ॒ತಮ್ । ಪ್ರಾ॒ಣೋ ವಾ ಅನ್ನಂ᳚ । ಶರೀ॑ರಮನ್ನಾ॒ದಮ್ । ಪ್ರಾ॒ಣೇ ಶರೀ॑ರಂ॒ ಪ್ರತಿ॑ಷ್ಠಿತಮ್ । ಶರೀ॑ರೇ ಪ್ರಾ॒ಣಃ ಪ್ರತಿ॑ಷ್ಠಿತಃ । ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಟಿತಮ್ । ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒ ವೇದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ ಕೀ॒ರ್ತ್ಯಾ । ॥ 7 ॥

ಅನ್ನಂ॒ ನ ಪರಿ॑ಚಕ್ಷೀತ । ತದ್-ವ್ರ॒ತಮ್ । ಆಪೋ॒ ವಾ ಅನ್ನಂ᳚ । ಜ್ಯೋತಿ॑ರನ್ನಾ॒ದಮ್ । ಅ॒ಪ್ಸು ಜ್ಯೋತಿಃ॒ ಪ್ರತಿ॑ಷ್ಠಿತಮ್ । ಜ್ಯೋತಿ॒ಷ್ಯಾಪಃ॒ ಪ್ರತಿ॑ಷ್ಠಿತಾಃ। ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಮ್ । ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒ ವೇದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ ಕೀ॒ರ್ತ್ಯಾ । ॥ 8 ॥

ಅನ್ನಂ॑ ಬ॒ಹು ಕು॑ರ್ವೀತ । ತದ್-ವ್ರ॒ತಮ್ । ಪೃ॒ಥಿ॒ವೀ ವಾ ಅನ್ನಂ᳚ । ಆ॒ಕಾ॒ಶೋ᳚ಽನ್ನಾ॒ದಃ । ಪೃ॒ಥಿ॒ವ್ಯಾಮಾ॑ಕಾ॒ಶಃ ಪ್ರತಿ॑ಷ್ಠಿತಃ । ಆ॒ಕಾ॒ಶೇ ಪೃ॑ಥಿ॒ವೀ ಪ್ರತಿ॑ಷ್ಠಿತಾ । ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಮ್ । ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒ ವೇದ॒ ಪ್ರತಿ॑ತಿಷ್ಠತಿ । ಅನ್ನ॑ವಾನನ್ನಾ॒ದೋ ಭ॑ವತಿ । ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ । ಮ॒ಹಾನ್ ಕೀ॒ರ್ತ್ಯಾ । ॥ 9 ॥

ನ ಕಂಚನ ವಸತೌ ಪ್ರತ್ಯಾ॑ಚಕ್ಷೀ॒ತ । ತದ್-ವ್ರ॒ತಮ್ । ತಸ್ಮಾದ್ಯಯಾ ಕಯಾ ಚ ವಿಧಯಾ ಬಹ್ವ॑ನ್ನಂ ಪ್ರಾ॒ಪ್ನುಯಾತ್ । ಅರಾಧ್ಯಸ್ಮಾ ಅನ್ನಮಿ॑ತ್ಯಾಚ॒ಕ್ಷತೇ । ಏತದ್ವೈ ಮುಖತೋ᳚ಽನ್ನಗ್ಂ ರಾ॒ದ್ಧಮ್ । ಮುಖತೋಽಸ್ಮಾ ಅ॑ನ್ನಗ್ಂ ರಾ॒ಧ್ಯತೇ । ಏತದ್ವೈ ಮಧ್ಯತೋ᳚ಽನ್ನಗ್ಂ ರಾ॒ದ್ಧಮ್ । ಮಧ್ಯತೋಽಸ್ಮಾ ಅ॑ನ್ನಗ್ಂ ರಾ॒ಧ್ಯತೇ । ಏತದ್ವಾ ಅಂತತೋ᳚ಽನ್ನಗ್ಂ ರಾ॒ದ್ಧಮ್ । ಅಂತತೋಽಸ್ಮಾ ಅ॑ನ್ನಗ್ಂ ರಾ॒ಧ್ಯತೇ । ಯ ಏ॑ವಂ ವೇ॒ದ । ಕ್ಷೇಮ ಇ॑ತಿ ವಾ॒ಚಿ । ಯೋಗಕ್ಷೇಮ ಇತಿ ಪ್ರಾ॑ಣಾಪಾ॒ಣಯೋಃ । ಕರ್ಮೇ॑ತಿ ಹ॒ಸ್ತಯೋಃ । ಗತಿರಿ॑ತಿ ಪಾ॒ದಯೋಃ । ವಿಮುಕ್ತಿರಿ॑ತಿ ಪಾ॒ಯೌ । ಇತಿ ಮಾನುಷೀ᳚ಸ್ಸಮಾ॒ಜ್ಞಾಃ । ಅಥ ದೈ॒ವೀಃ । ತೃಪ್ತಿರಿ॑ತಿ ವೃ॒ಷ್ಟೌ । ಬಲಮಿ॑ತಿ ವಿ॒ದ್ಯುತಿ । ಯಶ ಇ॑ತಿ ಪ॒ಶುಷು । ಜ್ಯೋತಿರಿತಿ ನ॑ಕ್ಷತ್ರೇ॒ಷು । ಪ್ರಜಾತಿರಮೃತಮಾನಂದ ಇ॑ತ್ಯುಪ॒ಸ್ಥೇ । ಸರ್ವಮಿ॑ತ್ಯಾಕಾ॒ಶೇ । ತತ್ಪ್ರತಿಷ್ಠೇತ್ಯು॑ಪಾಸೀ॒ತ। ಪ್ರತಿಷ್ಠಾ॑ವಾನ್ಭ॒ವತಿ । ತನ್ಮಹ ಇತ್ಯು॑ಪಾಸೀ॒ತ । ಮ॑ಹಾನ್ಭ॒ವತಿ । ತನ್ಮನ ಇತ್ಯು॑ಪಾಸೀ॒ತ । ಮಾನ॑ವಾನ್ಭ॒ವತಿ । ತನ್ನಮ ಇತ್ಯು॑ಪಾಸೀ॒ತ । ನಮ್ಯಂತೇ᳚ಽಸ್ಮೈ ಕಾ॒ಮಾಃ । ತದ್ಬ್ರಹ್ಮೇತ್ಯು॑ಪಾಸೀ॒ತ । ಬ್ರಹ್ಮ॑ವಾನ್ಭ॒ವತಿ । ತದ್ಬ್ರಹ್ಮಣಃ ಪರಿಮರ ಇತ್ಯು॑ಪಾಸೀ॒ತ । ಪರ್ಯೇಣಂ ಮ್ರಿಯಂತೇ ದ್ವಿ ಷಂತ॑ಸ್ಸಪ॒ತ್ನಾಃ । ಪರಿ ಯೇ᳚ಽಪ್ರಿಯಾ᳚ ಭ್ರಾತೃ॒ವ್ಯಾಃ । ಸ ಯಶ್ಚಾ॑ಯಂ ಪು॒ರುಷೇ । ಯಶ್ಚಾಸಾ॑ವಾದಿ॒ತ್ಯೇ । ಸ ಏಕಃ॑ । ಸ ಯ॑ ಏವಂ॒ ವಿತ್ । ಅಸ್ಮಾಲ್ಲೋ॑ಕಾತ್ಪ್ರೇ॒ತ್ಯ । ಏತಮನ್ನಮಯಮಾತ್ಮಾನಮುಪ॑ ಸಂಕ್ರ॒ಮ್ಯ ॥ ಏತಂ ಪ್ರಾಣಮಯಮಾತ್ಮಾನಮುಪ॑ ಸಂಕ್ರ॒ಮ್ಯ । ಏತಂ ಮನೋಮಯಮಾತ್ಮಾನಮುಪ॑ ಸಂಕ್ರ॒ಮ್ಯ । ಏತಂ ವಿಜ್ಞಾನಮಯಮಾತ್ಮಾನಮುಪ॑ ಸಂಕ್ರ॒ಮ್ಯ । ಏತಮಾನಂದಮಯಮಾತ್ಮಾನಮುಪ॑ ಸಂಕ್ರ॒ಮ್ಯ । ಇಮಾನ್ ಲೋಕಾನ್ ಕಾಮಾನ್ನೀ ಕಾಮರೂಪ್ಯ॑ನು ಸಂ॒ಚರನ್ನ್ । ಏತಥ್ಸಾಮ ಗಾ॑ಯನ್ನಾ॒ಸ್ತೇ । ಹಾ(3) ವು॒ ಹಾ(3) ವು॒ ಹಾ(3) ವು॑ । ಅ॒ಹಮನ್ನಮ॒ಹಮನ್ನಮ॒ಹಮನ್ನಮ್ । ಅ॒ಹಮನ್ನಾ॒ದೋ(2)ಽ॒ಹಮನ್ನಾ॒ದೋ(2)ಽ॒ಹಮನ್ನಾ॒ದಃ । ಅ॒ಹಗ್ಗ್ ಶ್ಲೋಕ॒ಕೃದ॒ಹಗ್ಗ್ ಶ್ಲೋಕ॒ಕೃದ॒ಹಗ್ಗ್ ಶ್ಲೋಕ॒ಕೃತ್ । ಅ॒ಹಮಸ್ಮಿ ಪ್ರಥಮಜಾ ಋತಾ(3) ಸ್ಯ॒ । ಪೂರ್ವಂ ದೇವೇಭ್ಯೋ ಅಮೃತಸ್ಯ ನಾ(3) ಭಾ॒ಯಿ॒ । ಯೋ ಮಾ ದದಾತಿ ಸ ಇದೇವ ಮಾ(3) ವಾಃ॒ । ಅ॒ಹಮನ್ನ॒ಮನ್ನ॑ಮ॒ದಂತ॒ಮಾ(3) ದ್ಮಿ॒ । ಅಹಂ॒ ವಿಶ್ವಂ॒ ಭುವ॑ನ॒ಮಭ್ಯ॑ಭ॒ವಾಮ್ । ಸುವ॒ರ್ನ ಜ್ಯೋತೀಃ᳚ । ಯ ಏ॒ವಂ ವೇದ॑ । ಇತ್ಯು॑ಪ॒ನಿಷ॑ತ್ । ॥ 10 ॥

ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯಂ॑ ಕರವಾವಹೈ । ತೇ॒ಜ॒ಸ್ವಿ ನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥ ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥

॥ ಹರಿಃ॑ ಓಮ್ ॥
॥ ಶ್ರೀ ಕೃಷ್ಣಾರ್ಪಣಮಸ್ತು ॥