ಹರಿಃ ಓಮ್ ॥ ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯಂ॑ ಕರವಾವಹೈ । ತೇ॒ಜ॒ಸ್ವಿ ನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥

ಬ್ರ॒ಹ್ಮ॒ವಿದಾ᳚ಪ್ನೋತಿ॒ ಪರಂ᳚ ॥ ತದೇ॒ಷಾಽಭ್ಯು॑ಕ್ತಾ । ಸ॒ತ್ಯಂ ಜ್ಞಾ॒ನಮ॑ನಂ॒ತಂ ಬ್ರಹ್ಮ॑ । ಯೋ ವೇದ॒ ನಿಹಿ॑ತಂ॒ ಗುಹಾ॑ಯಾಂ ಪರ॒ಮೇ ವ್ಯೋ॑ಮನ್ನ್ । ಸೋ᳚ಽಶ್ನು॒ತೇ॒ ಸರ್ವಾ॒ನ್ಕಾಮಾಂ᳚ಥ್ಸ॒ಹ । ಬ್ರಹ್ಮ॑ಣಾ ವಿಪ॒ಶ್ಚಿತೇತಿ॑ ॥ ತಸ್ಮಾ॒ದ್ವಾ ಏ॒ತಸ್ಮಾ॑ದಾ॒ತ್ಮನ॑ ಆಕಾ॒ಶಸ್ಸಂಭೂ॑ತಃ । ಆ॒ಕಾ॒ಶಾದ್ವಾ॒ಯುಃ । ವಾ॒ಯೋರ॒ಗ್ನಿಃ । ಅ॒ಗ್ನೇರಾಪಃ॑ । ಅ॒ದ್ಭ್ಯಃ ಪೃ॑ಥಿ॒ವೀ । ಪೃ॒ಥಿ॒ವ್ಯಾ ಓಷ॑ಧಯಃ । ಓಷ॑ಧೀ॒ಭ್ಯೋನ್ನಂ᳚ । ಅನ್ನಾ॒ತ್ಪುರು॑ಷಃ । ಸ ವಾ ಏಷ ಪುರುಷೋಽನ್ನ॑ರಸ॒ಮಯಃ । ತಸ್ಯೇದ॑ಮೇವ॒ ಶಿರಃ । ಅಯಂ ದಕ್ಷಿ॑ಣಃ ಪ॒ಕ್ಷಃ । ಅಯಮುತ್ತ॑ರಃ ಪ॒ಕ್ಷಃ । ಅಯಮಾತ್ಮಾ᳚ । ಇದಂ ಪುಚ್ಛಂ॑ ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 1 ॥

ಅನ್ನಾ॒ದ್ವೈ ಪ್ರ॒ಜಾಃ ಪ್ರ॒ಜಾಯಂ॑ತೇ । ಯಾಃ ಕಾಶ್ಚ॑ ಪೃಥಿ॒ವೀಗ್ ಶ್ರಿ॒ತಾಃ । ಅಥೋ॒ ಅನ್ನೇ॑ನೈ॒ವ ಜೀ॑ವಂತಿ। ಅಥೈ॑ನ॒ದಪಿ॑ ಯಂತ್ಯಂತ॒ತಃ । ಅನ್ನ॒ಗ್ಂ॒ ಹಿ ಭು॒ತಾನಾಂ॒ ಜ್ಯೇಷ್ಠಂ᳚ । ತಸ್ಮಾ᳚ಥ್ಸರ್ವೌಷ॒ಧಮು॑ಚ್ಯತೇ । ಸರ್ವಂ॒ ವೈ ತೇಽನ್ನ॑ಮಾಪ್ನುವಂತಿ । ಯೇಽನ್ನಂ॒ ಬ್ರಹ್ಮೋ॒ಪಾಸ॑ತೇ । ಅನ್ನ॒ಗ್ಂ॒ ಹಿ ಭು॒ತಾನಾಂ॒ ಜ್ಯೇಷ್ಠಂ᳚ । ತಸ್ಮಾ᳚ಥ್ಸರ್ವೌಷ॒ಧಮು॑ಚ್ಯತೇ । ಅನ್ನಾ᳚ದ್ಭೂ॒ತಾನಿ॒ ಜಾಯಂ॑ತೇ । ಜಾತಾ॒ನ್ಯನ್ನೇನ॑ ವರ್ಧಂತೇ । ಅದ್ಯತೇಽತ್ತಿ ಚ॑ ಭೂತಾ॒ನಿ । ತಸ್ಮಾದನ್ನಂ ತದುಚ್ಯ॑ತ ಇ॒ತಿ । ತಸ್ಮಾದ್ವಾ ಏತಸ್ಮಾದನ್ನ॑ರಸ॒ಮಯಾತ್ । ಅನ್ಯೋಂತರ ಆತ್ಮಾ᳚ ಪ್ರಾಣ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಮ್ । ಅನ್ವಯಂ॑ ಪುರುಷ॒ವಿಧಃ । ತಸ್ಯ ಪ್ರಾಣ॑ ಏವ॒ ಶಿರಃ । ವ್ಯಾನೋ ದಕ್ಷಿ॑ಣಃ ಪ॒ಕ್ಷಃ । ಅಪಾನ ಉತ್ತ॑ರಃ ಪ॒ಕ್ಷಃ । ಆಕಾ॑ಶ ಆ॒ತ್ಮಾ । ಪೃಥಿವೀ ಪುಚ್ಛಂ॑ ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 2 ॥

ಪ್ರಾ॒ಣಂ ದೇ॒ವಾ ಅನು॒ಪ್ರಾಣಂ॑ತಿ । ಮ॒ನು॒ಷ್ಯಾಃ᳚ ಪ॒ಶವ॑ಶ್ಚ॒ ಯೇ । ಪ್ರಾ॒ಣೋ ಹಿ ಭೂ॒ತನಾ॒ಮಾಯುಃ॑ । ತಸ್ಮಾ᳚ಥ್ಸರ್ವಾಯು॒ಷಮು॑ಚ್ಯತೇ । ಸರ್ವ॑ಮೇ॒ವ ತ॒ ಆಯು॑ರ್ಯಂತಿ । ಯೇ ಪ್ರಾ॒ಣಂ ಬ್ರಹ್ಮೋ॒ಪಾಸ॑ತೇ । ಪ್ರಾಣೋ ಹಿ ಭೂತಾ॑ನಾಮಾ॒ಯುಃ । ತಸ್ಮಾಥ್ಸರ್ವಾಯುಷಮುಚ್ಯ॑ತ ಇ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ತಸ್ಮಾದ್ವಾ ಏತಸ್ಮಾ᳚ತ್-ಪ್ರಾಣ॒ಮಯಾತ್ । ಅನ್ಯೋಽಂತರ ಆತ್ಮಾ॑ ಮನೋ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ। ತಸ್ಯ ಪುರು॑ಷವಿ॒ಧತಾಮ್ । ಅನ್ವಯಂ॑ ಪುರುಷ॒ವಿಧಃ । ತಸ್ಯ ಯಜು॑ರೇವ॒ ಶಿರಃ । ಋಗ್-ದಕ್ಷಿ॑ಣಃ ಪ॒ಕ್ಷಃ । ಸಾಮೋತ್ತ॑ರಃ ಪ॒ಕ್ಷಃ । ಆದೇ॑ಶ ಆ॒ತ್ಮಾ । ಅಥರ್ವಾಂಗಿರಸಃ ಪುಚ್ಛಂ॑ ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 3 ॥

ಯತೋ॒ ವಾಚೋ॒ ನಿವ॑ರ್ತಂತೇ । ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ । ಆನಂದಂ ಬ್ರಹ್ಮ॑ಣೋ ವಿ॒ದ್ವಾನ್ । ನ ಬಿಭೇತಿ ಕದಾ॑ಚನೇ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ತಸ್ಮಾದ್ವಾ ಏತಸ್ಮಾ᳚ನ್-ಮನೋ॒ಮಯಾತ್ । ಅನ್ಯೋಽಂತರ ಆತ್ಮಾ ವಿ॑ಜ್ಞಾನ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಮ್ । ಅನ್ವಯಂ॑ ಪುರುಷ॒ವಿಧಃ । ತಸ್ಯ ಶ್ರ॑ದ್ಧೈವ॒ ಶಿರಃ । ಋತಂ ದಕ್ಷಿ॑ಣಃ ಪ॒ಕ್ಷಃ । ಸತ್ಯಮುತ್ತ॑ರಃ ಪ॒ಕ್ಷಃ । ಯೋ॑ಗ ಆ॒ತ್ಮಾ । ಮಹಃ ಪುಚ್ಛಂ॑ ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 4 ॥

ವಿ॒ಜ್ಞಾನಂ॑ ಯ॒ಜ್ಞಂ ತ॑ನುತೇ । ಕರ್ಮಾ॑ಣೀ ತನು॒ತೇಽಪಿ॑ ಚ । ವಿ॒ಜ್ಞಾನಂ॑ ದೇ॒ವಾಸ್ಸರ್ವೇ᳚ । ಬ್ರಹ್ಮ॒ ಜ್ಯೇಷ್ಠ॒ಮುಪಾ॑ಸತೇ । ವಿ॒ಜ್ಞಾನಂ॒ ಬ್ರಹ್ಮ॒ ಚೇದ್ವೇದ॑ । ತಸ್ಮಾ॒ಚ್ಚೇನ್ನ ಪ್ರ॒ಮಾದ್ಯ॑ತಿ । ಶರೀರೇ॑ ಪಾಪ್ಮ॑ನೋ ಹಿ॒ತ್ವಾ । ಸರ್ವಾನ್ ಕಾಮಾಂಥ್ಸಮಶ್ನು॑ತ ಇ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ತಸ್ಮಾದ್ವಾ ಏತಸ್ಮಾದ್ವಿ॑ಜ್ಞಾನ॒ಮಯಾತ್ । ಅನ್ಯೋಽಂತರ ಆತ್ಮಾ॑ಽಽನಂದ॒ಮಯಃ । ತೇನೈ॑ಷ ಪೂ॒ರ್ಣಃ । ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಮ್ । ಅನ್ವಯಂ॑ ಪುರುಷ॒ವಿಧಃ । ತಸ್ಯ ಪ್ರಿಯ॑ಮೇವ॒ ಶಿರಃ । ಮೋದೋ ದಕ್ಷಿ॑ಣಃ ಪ॒ಕ್ಷಃ । ಪ್ರಮೋದ ಉತ್ತ॑ರಃ ಪ॒ಕ್ಷಃ । ಆನಂ॑ದ ಆ॒ತ್ಮಾ । ಬ್ರಹ್ಮ ಪುಚ್ಛಂ॑ ಪ್ರತಿ॒ಷ್ಠಾ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 5 ॥

ಅಸ॑ನ್ನೇ॒ವ ಸ॑ ಭವತಿ । ಅಸ॒ದ್ಬ್ರಹ್ಮೇತಿ॒ ವೇದ॒ ಚೇತ್ । ಅಸ್ತಿ ಬ್ರಹ್ಮೇತಿ॑ ಚೇದ್ವೇ॒ದ । ಸಂತಮೇನಂ ತತೋ ವಿ॑ದುರಿ॒ತಿ । ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ । ಅಥಾತೋ॑ಽನುಪ್ರ॒ಶ್ನಾಃ । ಉ॒ತಾವಿ॒ದ್ವಾನ॒ಮುಂ ಲೋ॒ಕಂ ಪ್ರೇತ್ಯ॑ । ಕಶ್ಚ॒ನ ಗ॑ಚ್ಚ॒ತೀ(3) । ಆಹೋ॑ ವಿ॒ದ್ವಾನ॒ಮುಂ ಲೋ॒ಕಂ ಪ್ರೇತ್ಯ॑ । ಕಸ್ಚಿ॒ಥ್ಸಮ॑ಶ್ನು॒ತಾ(3) ಉ॒ । ಸೋ॑ಽಕಾಮಯತ । ಬ॒ಹು ಸ್ಯಾಂ॒ ಪ್ರಜಾ॑ಯೇ॒ಯೇತಿ॑ । ಸ ತಪೋ॑ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ಇದಗ್ಂ ಸರ್ವ॑ಮಸೃಜತ । ಯದಿ॒ದಂ ಕಿಂಚ॑ । ತಥ್ಸೃ॒ಷ್ಟ್ವಾ । ತದೇ॒ವಾನು॒ಪ್ರಾವಿ॑ಶತ್ । ತದ॑ನುಪ್ರ॒ವಿಶ್ಯ॑ । ಸಚ್ಚ॒ ತ್ಯಚ್ಚಾ॑ಭವತ್ । ನಿ॒ರುಕ್ತಂ॒ ಚಾನಿ॑ರುಕ್ತಂ ಚ । ನಿ॒ಲಯ॑ನಂ॒ ಚಾನಿ॑ಲಯನಂ ಚ । ವಿ॒ಜ್ಞಾನಂ॒ ಚಾವಿ॑ಜ್ಞನಂ ಚ । ಸತ್ಯಂ ಚಾನೃತಂ ಚ ಸ॑ತ್ಯಮ॒ಭವತ್ । ಯದಿ॑ದಂ ಕಿಂ॒ಚ । ತಥ್ಸತ್ಯಮಿ॑ತ್ಯಾಚ॒ಕ್ಷತೇ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 6 ॥

ಅಸ॒ದ್ವಾ ಇ॒ದಮಗ್ರ॑ ಆಸೀತ್ । ತತೋ॒ ವೈ ಸದ॑ಜಾಯತ । ತದಾತ್ಮಾನಗ್ಗ್ ಸ್ವಯ॑ಮಕು॒ರುತ । ತಸ್ಮಾತ್ತಥ್ಸುಕೃತಮುಚ್ಯ॑ತ ಇ॒ತಿ । ಯದ್ವೈ॑ ತಥ್ಸು॒ಕೃತಮ್ । ರ॑ಸೋ ವೈ॒ ಸಃ । ರಸಗ್ಗ್ ಹ್ಯೇವಾಯಂ ಲಬ್ಧ್ವಾಽಽನಂ॑ದೀ ಭ॒ವತಿ । ಕೋ ಹ್ಯೇವಾನ್ಯಾ᳚ತ್ಕಃ ಪ್ರಾ॒ಣ್ಯಾತ್ । ಯದೇಷ ಆಕಾಶ ಆನಂ॑ದೋ ನ॒ ಸ್ಯಾತ್ । ಏಷ ಹ್ಯೇವಾಽಽನಂ॑ದಯಾ॒ತಿ । ಯ॒ದಾ ಹ್ಯೇ॑ವೈಷ॒ ಏತಸ್ಮಿನ್ನದೃಶ್ಯೇಽನಾತ್ಮ್ಯೇಽನಿರುಕ್ತೇಽನಿಲಯನೇಽಭಯಂ ಪ್ರತಿ॑ಷ್ಠಾಂ ವಿಂ॒ದತೇ । ಅಥ ಸೋಽಭಯಂ ಗ॑ತೋ ಭ॒ವತಿ । ಯ॒ದಾ ಹ್ಯೇ॑ವೈಷ॒ ಏತಸ್ಮಿನ್ನುದರಮಂತ॑ರಂ ಕು॒ರುತೇ । ಅಥ ತಸ್ಯ ಭ॑ಯಂ ಭ॒ವತಿ । ತತ್ವೇವ ಭಯಂ ವಿದುಷೋಽಮ॑ನ್ವಾನ॒ಸ್ಯ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 7 ॥

ಭೀ॒ಷಾಽಸ್ಮಾ॒ದ್ವಾತಃ॑ ಪವತೇ । ಭೀ॒ಷೋದೇ॑ತಿ॒ ಸೂರ್ಯಃ॑ । ಭೀ॒ಷಾಽಸ್ಮಾದಗ್ನಿ॑ಶ್ಚೇಂದ್ರ॒ಶ್ಚ । ಮೃತ್ಯುರ್ಧಾವತಿ ಪಂಚ॑ಮ ಇ॒ತಿ । ಸೈಷಾಽಽನಂದಸ್ಯ ಮೀಮಾಗ್ಂ॑ಸಾ ಭ॒ವತಿ । ಯುವಾ ಸ್ಯಾಥ್ಸಾಧುಯು॑ವಾಽಧ್ಯಾ॒ಯಕಃ । ಆಶಿಷ್ಠೋ ದೃಡಿಷ್ಠೋ॑ ಬಲಿ॒ಷ್ಠಃ । ತಸ್ಯೇಯಂ ಪೃಥಿವೀ ಸರ್ವಾ ವಿತ್ತಸ್ಯ॑ ಪೂರ್ಣಾ॒ ಸ್ಯಾತ್ । ಸ ಏಕೋ ಮಾನುಷ॑ ಆನಂ॒ದಃ । ತೇ ಯೇ ಶತಂ ಮಾನುಷಾ॑ ಆನಂ॒ದಾಃ । ಸ ಏಕೋ ಮನುಷ್ಯಗಂಧರ್ವಾಣಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ದೇವಗಂಧರ್ವಾಣಾ॑ಮಾನಂ॒ದಾಃ । ಸ ಏಕಃ ಪಿತೃಣಾಂ ಚಿರಲೋಕಲೋಕಾನಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ಪಿತೃಣಾಂ ಚಿರಲೋಕಲೋಕಾನಾ॑ಮಾನಂ॒ದಾಃ । ಸ ಏಕ ಆಜಾನಜಾನಾಂ ದೇವಾನಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಮಾಜಾನಜಾನಾಂ ದೇವಾನಾ॑ಮಾನಂ॒ದಾಃ । ಸ ಏಕಃ ಕರ್ಮದೇವಾನಾಂ ದೇವಾನಾ॑ಮಾನಂ॒ದಃ । ಯೇ ಕರ್ಮಣಾ ದೇವಾನ॑ಪಿ ಯಂ॒ತಿ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ಕರ್ಮದೇವಾನಾಂ ದೇವಾನಾ॑ಮಾನಂ॒ದಾಃ । ಸ ಏಕೋ ದೇವಾನಾ॑ಮಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ದೇವಾನಾ॑ಮಾನಂ॒ದಾಃ । ಸ ಏಕ ಇಂದ್ರ॑ಸ್ಯಾಽಽನಂಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಮಿಂದ್ರ॑ಸ್ಯಾಽಽನಂ॒ದಾಃ । ಸ ಏಕೋ ಬೃಹಸ್ಪತೇ॑ರಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ಬೃಹಸ್ಪತೇ॑ರಾನಂ॒ದಾಃ । ಸ ಏಕಃ ಪ್ರಜಾಪತೇ॑ರಾನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ಪ್ರಜಾಪತೇ॑ರಾನಂ॒ದಾಃ । ಸ ಏಕೋ ಬ್ರಹ್ಮಣ॑ ಆನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ತೇ ಯೇ ಶತಂ ಪಜಾಪತೇ॑ರಾನಂ॒ದಾಃ । ಸ ಏಕೋ ಬ್ರಹ್ಮಣ॑ ಆನಂ॒ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ । ಸ ಯಶ್ಚಾ॑ಯಂ ಪು॒ರುಷೇ । ಯಶ್ಚಾಸಾ॑ವಾದಿ॒ತ್ಯೇ । ಸ ಏಕಃ॑ । ಸ ಯ॑ ಏವಂ॒ ವಿತ್ । ಅಸ್ಮಾಲ್ಲೋ॑ಕಾತ್ಪ್ರೇ॒ತ್ಯ । ಏತಮನ್ನಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತಂ ಪ್ರಾಣಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತಂ ಮನೋಮಯಮಾತ್ಮಾನಮುಪ॑ಸಂಕ್ರಾ॒ಮತಿ। ಏತಂ ವಿಜ್ಞಾನಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ಏತಮಾನಂದಮಯಮಾತ್ಮಾನಮುಪ॑ಸಂಕ್ರಾ॒ಮತಿ । ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 8 ॥

ಯತೋ॒ ವಾಚೋ॒ ನಿವ॑ರ್ತಂತೇ । ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ । ಆನಂದಂ ಬ್ರಹ್ಮ॑ಣೋ ವಿ॒ದ್ವಾನ್ । ನ ಬಿಭೇತಿ ಕುತ॑ಶ್ಚನೇ॒ತಿ । ಏತಗ್ಂ ಹ ವಾವ॑ ನ ತ॒ಪತಿ । ಕಿಮಹಗ್ಂ ಸಾಧು॑ ನಾಕ॒ರವಮ್ । ಕಿಮಹಂ ಪಾಪಮಕರ॑ವಮಿ॒ತಿ । ಸ ಯ ಏವಂ ವಿದ್ವಾನೇತೇ ಆತ್ಮಾ॑ನಗ್ಗ್ ಸ್ಪೃ॒ಣುತೇ । ಉ॒ಭೇ ಹ್ಯೇ॑ವೈಷ॒ ಏತೇ ಆತ್ಮಾ॑ನಗ್ಗ್ ಸ್ಪೃ॒ಣುತೇ । ಯ ಏ॒ವಂ ವೇದ॑ । ಇತ್ಯು॑ಪ॒ನಿಷ॑ತ್ ॥ 9 ॥

ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯಂ॑ ಕರವಾವಹೈ । ತೇ॒ಜ॒ಸ್ವಿ ನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ । ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ॥

॥ ಹರಿಃ॑ ಓಮ್ ॥
॥ ಶ್ರೀ ಕೃಷ್ಣಾರ್ಪಣಮಸ್ತು ॥