॥ ಅಷ್ಟಮಃ ಸರ್ಗಃ ॥
॥ ವಿಲಕ್ಷ್ಯಲಕ್ಷ್ಮೀಪತಿಃ ॥
ಅಥ ಕಥಮಪಿ ಯಾಮಿನೀಂ ವಿನೀಯ ಸ್ಮರಶರಜರ್ಜರಿತಾಪಿ ಸಾ ಪ್ರಭಾತೇ ।
ಅನುನಯವಚನಂ ವದಂತಮಗ್ರೇ ಪ್ರಣತಮಪಿ ಪ್ರಿಯಮಾಹ ಸಾಭ್ಯಸೂಯಂ ॥ 49 ॥
॥ ಗೀತಂ 17 ॥
ರಜನಿಜನಿತಗುರುಜಾಗರರಾಗಕಷಾಯಿತಮಲಸನಿವೇಶಂ ।
ವಹತಿ ನಯನಮನುರಾಗಮಿವ ಸ್ಫುಟಮುದಿತರಸಾಭಿನಿವೇಶಂ ॥
ಹರಿಹರಿ ಯಾಹಿ ಮಾಧವ ಯಾಹಿ ಕೇಶವ ಮಾ ವದ ಕೈತವವಾದಂ ತಾಮನುಸರ ಸರಸೀರುಹಲೋಚನ ಯಾ ತವ ಹರತಿ ವಿಷಾದಂ ॥ 50 ॥
ಕಜ್ಜಲಮಲಿನವಿಲೋಚನಚುಂಬನವಿರಚಿತನೀಲಿಮರೂಪಂ ।
ದಶನವಸನಮರುಣಂ ತವ ಕೃಷ್ಣ ತನೋತಿ ತನೋರನುರೂಪಂ ॥ 2 ॥
ವಪುರನುಹರತಿ ತವ ಸ್ಮರಸಂಗರಖರನಖರಕ್ಷತರೇಖಂ ।
ಮರಕತಶಕಲಕಲಿತಕಲಧೌತಲಿಪಿರೇವ ರತಿಜಯಲೇಖಂ ॥ 3 ॥
ಚರಣಕಮಲಗಲದಲಕ್ತಕಸಿಕ್ತಮಿದಂ ತವ ಹೃದಯಮುದಾರಂ ।
ದರ್ಶಯತೀವ ಬಹಿರ್ಮದನದ್ರುಮನವಕಿಸಲಯಪರಿವಾರಂ ॥ 4 ॥
ದಶನಪದಂ ಭವದಧರಗತಂ ಮಮ ಜನಯತಿ ಚೇತಸಿ ಖೇದಂ ।
ಕಥಯತಿ ಕಥಮಧುನಾಪಿ ಮಯಾ ಸಹ ತವ ವಪುರೇತದಭೇದಂ ॥ 5 ॥
ಬಹಿರಿವ ಮಲಿನತರಂ ತವ ಕೃಷ್ಣ ಮನೋಽಪಿ ಭವಿಷ್ಯತಿ ನೂನಂ ।
ಕಥಮಥ ವಂಚಯಸೇ ಜನಮನುಗತಮಸಮಶರಜ್ವರದೂನಂ ॥ 6 ॥
ಭ್ರಮತಿ ಭವಾನಬಲಾಕವಲಾಯ ವನೇಷು ಕಿಮತ್ರ ವಿಚಿತ್ರಂ ।
ಪ್ರಥಯತಿ ಪೂತನಿಕೈವ ವಧೂವಧನಿರ್ದಯಬಾಲಚರಿತ್ರಂ ॥ 7 ॥
ಶ್ರೀಜಯದೇವಭಣಿತರತಿವಂಚಿತಖಂಡಿತಯುವತಿವಿಲಾಪಂ ।
ಶೃಣುತ ಸುಧಾಮಧುರಂ ವಿಬುಧಾ ವಿಬುಧಾಲಯತೋಽಪಿ ದುರಾಪಂ ॥ 8 ॥
ತದೇವಂ ಪಶ್ಯಂತ್ಯಾಃ ಪ್ರಸರದನುರಾಗಂ ಬಹಿರಿವ ಪ್ರಿಯಾಪಾದಾಲಕ್ತಚ್ಛುರಿತಮರುಣಚ್ಛಾಯಹೃದಯಂ ।
ಮಮಾದ್ಯ ಪ್ರಖ್ಯಾತಪ್ರಣಯಭರಭಂಗೇನ ಕಿತವ ತ್ವದಾಲೋಕಃ ಶೋಕಾದಪಿ ಕಿಮಪಿ ಲಜ್ಜಾಂ ಜನಯತಿ ॥ 50 ॥
॥ ಇತಿ ಗೀತಗೋವಿಂದೇ ಖಂಡಿತಾವರ್ಣನೇ ವಿಲಕ್ಷ್ಯಲಕ್ಷ್ಮೀಪತಿರ್ನಾಮ ಅಷ್ಠಮಃ ಸರ್ಗಃ ॥
Browse Related Categories:
