॥ ಚತುರ್ಥಃ ಸರ್ಗಃ ॥
॥ ಸ್ನಿಗ್ಧಮಧುಸೂದನಃ ॥
ಯಮುನಾತೀರವಾನೀರನಿಕುಂಜೇ ಮಂದಮಾಸ್ಥಿತಂ ।
ಪ್ರಾಹ ಪ್ರೇಮಭರೋದ್ಭ್ರಾಂತಂ ಮಾಧವಂ ರಾಧಿಕಾಸಖೀ ॥ 25 ॥
॥ ಗೀತಂ 8 ॥
ನಿಂದತಿ ಚಂದನಮಿಂದುಕಿರಣಮನು ವಿಂದತಿ ಖೇದಮಧೀರಂ ।
ವ್ಯಾಲನಿಲಯಮಿಲನೇನ ಗರಲಮಿವ ಕಲಯತಿ ಮಲಯಸಮೀರಂ ॥
ಸಾ ವಿರಹೇ ತವ ದೀನಾ ಮಾಧವ ಮನಸಿಜವಿಶಿಖಭಯಾದಿವ ಭಾವನಯಾ ತ್ವಯಿ ಲೀನಾ ॥ 1 ॥
ಅವಿರಲನಿಪತಿತಮದನಶರಾದಿವ ಭವದವನಾಯ ವಿಶಾಲಂ ।
ಸ್ವಹೃದಯರ್ಮಣೀ ವರ್ಮ ಕರೋತಿ ಸಜಲನಲಿನೀದಲಜಾಲಂ ॥ 2 ॥
ಕುಸುಮವಿಶಿಖಶರತಲ್ಪಮನಲ್ಪವಿಲಾಸಕಲಾಕಮನೀಯಂ ।
ವ್ರತಮಿವ ತವ ಪರಿರಂಭಸುಖಾಯ ಕರೋತಿ ಕುಸುಮಶಯನೀಯಂ ॥ 3 ॥
ವಹತಿ ಚ ಗಲಿತವಿಲೋಚನಜಲಭರಮಾನನಕಮಲಮುದಾರಂ ।
ವಿಧುಮಿವ ವಿಕಟವಿಧುಂತುದದಂತದಲನಗಲಿತಾಮೃತಧಾರಂ ॥ 4 ॥
ವಿಲಿಖತಿ ರಹಸಿ ಕುರಂಗಮದೇನ ಭವಂತಮಸಮಶರಭೂತಂ ।
ಪ್ರಣಮತಿ ಮಕರಮಧೋ ವಿನಿಧಾಯ ಕರೇ ಚ ಶರಂ ನವಚೂತಂ ॥ 5 ॥
ಪ್ರತಿಪದಮಿದಮಪಿ ನಿಗತತಿ ಮಾಧವ ತವ ಚರಣೇ ಪತಿತಾಹಂ ।
ತ್ವಯಿ ವಿಮುಖೇ ಮಯಿ ಸಪದಿ ಸುಧಾನಿಧಿರಪಿ ತನುತೇ ತನುದಾಹಂ ॥ 6 ॥
ಧ್ಯಾನಲಯೇನ ಪುರಃ ಪರಿಕಲ್ಪ್ಯ ಭವಂತಮತೀವ ದುರಾಪಂ ।
ವಿಲಪತಿ ಹಸತಿ ವಿಷೀದತಿ ರೋದಿತಿ ಚಂಚತಿ ಮುಂಚತಿ ತಾಪಂ ॥ 7 ॥
ಶ್ರೀಜಯದೇವಭಣಿತಮಿದಮಧಿಕಂ ಯದಿ ಮನಸಾ ನಟನೀಯಂ ।
ಹರಿವಿರಹಾಕುಲಬಲ್ಲವಯುವತಿಸಖೀವಚನಂ ಪಠನೀಯಂ ॥ 8 ॥
ಆವಾಸೋ ವಿಪಿನಾಯತೇ ಪ್ರಿಯಸಖೀಮಾಲಾಪಿ ಜಾಲಾಯತೇ ತಾಪೋಽಪಿ ಶ್ವಸಿತೇನ ದಾವದಹನಜ್ವಾಲಾಕಲಾಪಾಯತೇ ।
ಸಾಪಿ ತ್ವದ್ವಿರಹೇಣ ಹಂತ ಹರಿಣೀರೂಪಾಯತೇ ಹಾ ಕಥಂ ಕಂದರ್ಪೋಽಪಿ ಯಮಾಯತೇ ವಿರಚಯಞ್ಶಾರ್ದೂಲವಿಕ್ರೀಡಿತಂ ॥ 26 ॥
॥ ಗೀತಂ 9 ॥
ಸ್ತನವಿನಿಹಿತಮಪಿ ಹಾರಮುದಾರಂ ।
ಸಾ ಮನುತೇ ಕೃಶತನುರತಿಭಾರಂ ॥
ರಾಧಿಕಾ ವಿರಹೇ ತವ ಕೇಶವ ॥ 1 ॥
ಸರಸಮಸೃಣಮಪಿ ಮಲಯಜಪಂಕಂ ।
ಪಶ್ಯತಿ ವಿಷಮಿವ ವಪುಷಿ ಸಶಂಕಂ ॥ 2 ॥
ಶ್ವಸಿತಪವನಮನುಪಮಪರಿಣಾಹಂ ।
ಮದನದಹನಮಿವ ವಹತಿ ಸದಾಹಂ ॥ 3 ॥
ದಿಶಿ ದಿಶಿ ಕಿರತಿ ಸಜಲಕಣಜಾಲಂ ।
ನಯನನಲಿನಮಿವ ವಿಗಲಿತನಾಲಂ ॥ 4 ॥
ನಯನವಿಷಯಮಪಿ ಕಿಸಲಯತಲ್ಪಂ ।
ಕಲಯತಿ ವಿಹಿತಹುತಾಶವಿಕಲ್ಪಂ ॥ 5 ॥
ತ್ಯಜತಿ ನ ಪಾಣಿತಲೇನ ಕಪೋಲಂ ।
ಬಾಲಶಶಿನಮಿವ ಸಾಯಮಲೋಲಂ ॥ 6 ॥
ಹರಿರಿತಿ ಹರಿರಿತಿ ಜಪತಿ ಸಕಾಮಂ ।
ವಿರಹವಿಹಿತಮರಣೇನ ನಿಕಾಮಂ ॥ 7 ॥
ಶ್ರೀಜಯದೇವಭಣಿತಮಿತಿ ಗೀತಂ ।
ಸುಖಯತು ಕೇಶವಪದಮುಪುನೀತಂ ॥ 8 ॥
ಸಾ ರೋಮಾಂಚತಿ ಸೀತ್ಕರೋತಿ ವಿಲಪತ್ಯುತ್ಕಂಪತೇ ತಾಮ್ಯತಿ ಧ್ಯಾಯತ್ಯುದ್ಭ್ರಮತಿ ಪ್ರಮೀಲತಿ ಪತತ್ಯುದ್ಯಾತಿ ಮೂರ್ಚ್ಛತ್ಯಪಿ ।
ಏತಾವತ್ಯತನುಜ್ವರೇ ವರತನುರ್ಜೀವೇನ್ನ ಕಿಂ ತೇ ರಸಾತ್ ಸ್ವರ್ವೈದ್ಯಪ್ರತಿಮ ಪ್ರಸೀದಸಿ ಯದಿ ತ್ಯಕ್ತೋಽನ್ಯಥಾ ನಾಂತಕಃ ॥ 27 ॥
ಸ್ಮರಾತುರಾಂ ದೈವತವೈದ್ಯಹೃದ್ಯ ತ್ವದಂಗಸಂಗಾಮೃತಮಾತ್ರಸಾಧ್ಯಾಂ ।
ವಿಮುಕ್ತಬಾಧಾಂ ಕುರುಷೇ ನ ರಾಧಾ-ಮುಪೇಂದ್ರ ವಜ್ರಾದಪಿ ದಾರುಣೋಽಸಿ ॥ 28 ॥
ಕಂದರ್ಪಜ್ವರಸಂಜ್ವರಸ್ತುರತನೋರಾಶ್ಚರ್ಯಮಸ್ಯಾಶ್ಚಿರಂ ಚೇತಶ್ಚಂದನಚಂದ್ರಮಃಕಮಲಿನೀಚಿಂತಾಸು ಸಂತಾಮ್ಯತಿ ।
ಕಿಂತು ಕ್ಲಾಂತಿವಶೇನ ಶೀತಲತನುಂ ತ್ವಾಮೇಕಮೇವ ಪ್ರಿಯಂ ಧ್ಯಾಯಂತೀ ರಹಸಿ ಸ್ಥಿತಾ ಕಥಮಪಿ ಕ್ಷೀಣಾ ಕ್ಷಣಂ ಪ್ರಾಣಿತಿ ॥ 29 ॥
ಕ್ಷಣಮಪಿ ವಿರಹಃ ಪುರಾ ನ ಸೇಹೇ ನಯನನಿಮೀಲನಖಿನ್ನಯಾ ಯಯಾ ತೇ ।
ಶ್ವಸಿತಿ ಕಥಮಸೌ ರಸಾಲಶಾಖಾಂ ಚಿರವಿರಹೇಣ ವಿಲೋಕ್ಯ ಪುಷ್ಪಿತಾಗ್ರಾಂ ॥ 30 ॥
॥ ಇತಿ ಗೀತಗೋವಿಂದೇ ಸ್ನಿಗ್ಧಮಾಧವೋ ನಾಮ ಚತುರ್ಥಃ ಸರ್ಗಃ ॥
Browse Related Categories:
