॥ ದ್ವಿತೀಯಃ ಸರ್ಗಃ ॥
॥ ಅಕ್ಲೇಶಕೇಶವಃ ॥
ವಿಹರತಿ ವನೇ ರಾಧಾ ಸಾಧಾರಣಪ್ರಣಯೇ ಹರೌ ವಿಗಲಿತನಿಜೋತ್ಕರ್ಷಾದೀರ್ಷ್ಯಾವಶೇನ ಗತಾನ್ಯತಃ ।
ಕ್ವಚಿದಪಿ ಲತಾಕುಂಜೇ ಗುಂಜನ್ಮಧುವ್ರತಮಂಡಲೀ-ಮುಖರಶಿಖರೇ ಲೀನಾ ದೀನಾಪ್ಯುವಾಚ ರಹಃ ಸಖೀಂ ॥ 14 ॥
॥ ಗೀತಂ 5 ॥
ಸಂಚರದಧರಸುಧಾಮಧುರಧ್ವನಿಮುಖರಿತಮೋಹನವಂಶಂ ।
ಚಲಿತದೃಗಂಚಲಚಂಚಲಮೌಲಿಕಪೋಲವಿಲೋಲವತಂಸಂ ॥
ರಾಸೇ ಹರಿಮಿಹ ವಿಹಿತವಿಲಾಸಂ ಸ್ಮರತಿ ಮನೋ ಮಮ ಕೃತಪರಿಹಾಸಂ ॥ 1 ॥
ಚಂದ್ರಕಚಾರುಮಯೂರಶಿಖಂಡಕಮಂಡಲವಲಯಿತಕೇಶಂ ।
ಪ್ರಚುರಪುರಂದರಧನುರನುರಂಜಿತಮೇದುರಮುದಿರಸುವೇಶಂ ॥ 2 ॥
ಗೋಪಕದಂಬನಿತಂಬವತೀಮುಖಚುಂಬನಲಂಭಿತಲೋಭಂ ।
ಬಂಧುಜೀವಮಧುರಾಧರಪಲ್ಲವಮುಲ್ಲಸಿತಸ್ಮಿತಶೋಭಂ ॥ 3 ॥
ವಿಪುಲಪುಲಕಭುಜಪಲ್ಲವವಲಯಿತವಲ್ಲವಯುವತಿಸಹಸ್ರಂ ।
ಕರಚರಣೋರಸಿ ಮಣಿಗಣಭೂಷಣಕಿರಣವಿಭಿನ್ನತಮಿಸ್ರಂ ॥ 4 ॥
ಜಲದಪಟಲವಲದಿಂದುವಿನಂದಕಚಂದನತಿಲಕಲಲಾಟಂ ।
ಪೀನಪಯೋಧರಪರಿಸರಮರ್ದನನಿರ್ದಯಹೃದಯಕವಾಟಂ ॥ 5 ॥
ಮಣಿಮಯಮಕರಮನೋಹರಕುಂಡಲಮಂಡಿತಗಂಡಮುದಾರಂ ।
ಪೀತವಸನಮನುಗತಮುನಿಮನುಜಸುರಾಸುರವರಪರಿವಾರಂ ॥ 6 ॥
ವಿಶದಕದಂಬತಲೇ ಮಿಲಿತಂ ಕಲಿಕಲುಷಭಯಂ ಶಮಯಂತಂ ।
ಮಾಮಪಿ ಕಿಮಪಿ ತರಂಗದನಂಗದೃಶಾ ಮನಸಾ ರಮಯಂತಂ ॥ 7 ॥
ಶ್ರೀಜಯದೇವಭಣಿತಮತಿಸುಂದರಮೋಹನಮಧುರಿಪುರೂಪಂ ।
ಹರಿಚರಣಸ್ಮರಣಂ ಪ್ರತಿ ಸಂಪ್ರತಿ ಪುಣ್ಯವತಾಮನುರೂಪಂ ॥ 8 ॥
ಗಣಯತಿ ಗುಣಗ್ರಾಮಂ ಭಾಮಂ ಭ್ರಮಾದಪಿ ನೇಹತೇ ವಹತಿ ಚ ಪರಿತೋಷಂ ದೋಷಂ ವಿಮುಂಚತಿ ದೂರತಃ ।
ಯುವತಿಷು ವಲಸ್ತೃಷ್ಣೇ ಕೃಷ್ಣೇ ವಿಹಾರಿಣಿ ಮಾಂ ವಿನಾ ಪುನರಪಿ ಮನೋ ವಾಮಂ ಕಾಮಂ ಕರೋತಿ ಕರೋಮಿ ಕಿಂ ॥ 15 ॥
॥ ಗೀತಂ 6 ॥
ನಿಭೃತನಿಕುಂಜಗೃಹಂ ಗತಯಾ ನಿಶಿ ರಹಸಿ ನಿಲೀಯ ವಸಂತಂ ।
ಚಕಿತವಿಲೋಕಿತಸಕಲದಿಶಾ ರತಿರಭಸರಸೇನ ಹಸಂತಂ ॥
ಸಖಿ ಹೇ ಕೇಶಿಮಥನಮುದಾರಂ ರಮಯ ಮಯಾ ಸಹ ಮದನಮನೋರಥಭಾವಿತಯಾ ಸವಿಕಾರಂ ॥ 1 ॥
ಪ್ರಥಮಸಮಾಗಮಲಜ್ಜಿತಯಾ ಪಟುಚಾಟುಶತೈರನುಕೂಲಂ ।
ಮೃದುಮಧುರಸ್ಮಿತಭಾಷಿತಯಾ ಶಿಥಿಲೀಕೃತಜಘನದುಕೂಲಂ ॥ 2 ॥
ಕಿಸಲಯಶಯನನಿವೇಶಿತಯಾ ಚಿರಮುರಸಿ ಮಮೈವ ಶಯಾನಂ ।
ಕೃತಪರಿರಂಭಣಚುಂಬನಯಾ ಪರಿರಭ್ಯ ಕೃತಾಧರಪಾನಂ ॥ 3 ॥
ಅಲಸನಿಮೀಲಿತಲೋಚನಯಾ ಪುಲಕಾವಲಿಲಲಿತಕಪೋಲಂ ।
ಶ್ರಮಜಲಸಕಲಕಲೇವರಯಾ ವರಮದನಮದಾದತಿಲೋಲಂ ॥ 4 ॥
ಕೋಕಿಲಕಲರವಕೂಜಿತಯಾ ಜಿತಮನಸಿಜತಂತ್ರವಿಚಾರಂ ।
ಶ್ಲಥಕುಸುಮಾಕುಲಕುಂತಲಯಾ ನಖಲಿಖಿತಘನಸ್ತನಭಾರಂ ॥ 5 ॥
ಚರಣರಣಿತಮನಿನೂಪುರಯಾ ಪರಿಪೂರಿತಸುರತವಿತಾನಂ ।
ಮುಖರವಿಶೃಂಖಲಮೇಖಲಯಾ ಸಕಚಗ್ರಹಚುಂಬನದಾನಂ ॥ 6 ॥
ರತಿಸುಖಸಮಯರಸಾಲಸಯಾ ದರಮುಕುಲಿತನಯನಸರೋಜಂ ।
ನಿಃಸಹನಿಪತಿತತನುಲತಯಾ ಮಧುಸೂದನಮುದಿತಮನೋಜಂ ॥ 7 ॥
ಶ್ರೀಜಯದೇವಭಣಿತಮಿದಮತಿಶಯಮಧುರಿಪುನಿಧುವನಶೀಲಂ ।
ಸುಖಮುತ್ಕಂಠಿತಗೋಪವಧೂಕಥಿತಂ ವಿತನೋತು ಸಲೀಲಂ ॥ 8 ॥
ಹಸ್ತಸ್ರಸ್ತವಿಲಾಸವಂಶಮನೃಜುಭ್ರೂವಲ್ಲಿಮದ್ಬಲ್ಲವೀ-ವೃಂದೋತ್ಸಾರಿದೃಗಂತವೀಕ್ಷಿತಮತಿಸ್ವೇದಾರ್ದ್ರಗಂಡಸ್ಥಲಂ ।
ಮಾಮುದ್ವೀಕ್ಷ್ಯ ವಿಲಕ್ಷಿತಂ ಸ್ಮಿತಸುಧಾಮುಗ್ಧಾನನಂ ಕಾನನೇ ಗೋವಿಂದಂ ವ್ರಜಸುಂದರೀಗಣವೃತಂ ಪಶ್ಯಾಮಿ ಹೃಷ್ಯಾಮಿ ಚ ॥ 16 ॥
ದುರಾಲೋಕಸ್ತೋಕಸ್ತಬಕನವಕಾಶೋಕಲತಿಕಾ-ವಿಕಾಸಃ ಕಾಸಾರೋಪವನಪವನೋಽಪಿ ವ್ಯಥಯತಿ ।
ಅಪಿ ಭ್ರಾಮ್ಯದ್ಭೃಂಗೀರಣಿತರಮಣೀಯಾ ನ ಮುಕುಲ-ಪ್ರಸೂತಿಶ್ಚೂತಾನಾಂ ಸಖಿ ಶಿಖರಿಣೀಯಂ ಸುಖಯತಿ ॥ 17 ॥
॥ ಇತಿ ಗೀತಗೋವಿಂದೇ ಅಕ್ಲೇಶಕೇಶವೋ ನಾಮ ದ್ವಿತೀಯಃ ಸರ್ಗಃ ॥
Browse Related Categories:
