॥ ದ್ವಾದಶಃ ಸರ್ಗಃ ॥
॥ ಸುಪ್ರೀತಪೀತಾಂಬರಃ ॥
ಗತವತಿ ಸಖೀವೃಂದೇಽಮಂದತ್ರಪಾಭರನಿರ್ಭರ-ಸ್ಮರಪರವಶಾಕೂತಸ್ಫೀತಸ್ಮಿತಸ್ನಪಿತಾಧರಂ ।
ಸರಸಮನಸಂ ದೃಷ್ಟ್ವಾ ರಾಧಾಂ ಮುಹುರ್ನವಪಲ್ಲವ-ಪ್ರಸವಶಯನೇ ನಿಕ್ಷಿಪ್ತಾಕ್ಷೀಮುವಾಚ ಹರಃ ॥ 68 ॥
॥ ಗೀತಂ 23 ॥
ಕಿಸಲಯಶಯನತಲೇ ಕುರು ಕಾಮಿನಿ ಚರಣನಲಿನವಿನಿವೇಶಂ ।
ತವ ಪದಪಲ್ಲವವೈರಿಪರಾಭವಮಿದಮನುಭವತು ಸುವೇಶಂ ॥
ಕ್ಷಣಮಧುನಾ ನಾರಾಯಣಮನುಗತಮನುಸರ ರಾಧಿಕೇ ॥ 1 ॥
ಕರಕಮಲೇನ ಕರೋಮಿ ಚರಣಮಹಮಾಗಮಿತಾಸಿ ವಿದೂರಂ ।
ಕ್ಷಣಮುಪಕುರು ಶಯನೋಪರಿ ಮಾಮಿವ ನೂಪುರಮನುಗತಿಶೂರಂ ॥ 2 ॥
ವದನಸುಧಾನಿಧಿಗಲಿತಮಮೃತಮಿವ ರಚಯ ವಚನಮನುಕೂಲಂ ।
ವಿರಹಮಿವಾಪನಯಾಮಿ ಪಯೋಧರರೋಧಕಮುರಸಿ ದುಕೂಲಂ ॥ 3 ॥
ಪ್ರಿಯಪರಿರಂಭಣರಭಸವಲಿತಮಿವ ಪುಲಕಿತಮತಿದುರವಾಪಂ ।
ಮದುರಸಿ ಕುಚಕಲಶಂ ವಿನಿವೇಶಯ ಶೋಷಯ ಮನಸಿಜತಾಪಂ ॥ 4 ॥
ಅಧರಸುಧಾರಸಮುಪನಯ ಭಾವಿನಿ ಜೀವಯ ಮೃತಮಿವ ದಾಸಂ ।
ತ್ವಯಿ ವಿನಿಹಿತಮನಸಂ ವಿರಹಾನಲದಗ್ಧವಪುಷಮವಿಲಾಸಂ ॥ 5 ॥
ಶಶಿಮುಖಿ ಮುಖರಯ ಮಣಿರಶನಾಗುಣಮನುಗುಣಕಂಠನಿದಾನಂ ।
ಶ್ರುತಿಯುಗಲೇ ಪಿಕರುತವಿಕಲೇ ಮಮ ಶಮಯ ಚಿರಾದವಸಾದಂ ॥ 6 ॥
ಮಾಮತಿವಿಫಲರುಷಾ ವಿಕಲೀಕೃತಮವಲೋಕಿತಮಧುನೇದಂ ।
ಮೀಲಿತಲಜ್ಜಿತಮಿವ ನಯನಂ ತವ ವಿರಮ ವಿಸೃಜ ರತಿಖೇದಂ ॥ 7 ॥
ಶ್ರೀಜಯದೇವಭಣಿತಮಿದಮನುಪದನಿಗದಿತಮಧುರಿಪುಮೋದಂ ।
ಜನಯತು ರಸಿಕಜನೇಷು ಮನೋರಮತಿರಸಭಾವವಿನೋದಂ ॥ 8 ॥
ಮಾರಂಕೇ ರತಿಕೇಲಿಸಂಕುಲರಣಾರಂಭೇ ತಯಾ ಸಾಹಸ-ಪ್ರಾಯಂ ಕಾಂತಜಯಾಯ ಕಿಂಚಿದುಪರಿ ಪ್ರಾರಂಭಿ ಯತ್ಸಂಭ್ರಮಾತ್ ।
ನಿಷ್ಪಂದಾ ಜಘನಸ್ಥಲೀ ಶಿಥಿಲತಾ ದೋರ್ವಲ್ಲಿರುತ್ಕಂಪಿತಂ ವಕ್ಷೋ ಮೀಲಿತಮಕ್ಷಿ ಪೌರುಷರಸಃ ಸ್ತ್ರೀಣಾಂ ಕುತಃ ಸಿಧ್ಯತಿ ॥ 69 ॥
ಅಥ ಕಾಂತಂ ರತಿಕ್ಲಾಂತಮಪಿ ಮಂಡನವಾಂಛಯಾ ।
ನಿಜಗಾದ ನಿರಾಬಾಧಾ ರಾಧಾ ಸ್ವಾಧೀನಭರ್ತೃಕಾ ॥ 70 ॥
॥ ಗೀತಂ 24 ॥
ಕುರು ಯದುನಂದನ ಚಂದನಶಿಶಿರತರೇಣ ಕರೇಣ ಪಯೋಧರೇ ।
ಮೃಗಮದಪತ್ರಕಮತ್ರ ಮನೋಭವಮಂಗಲಕಲಶಸಹೋದರೇ ।
ನಿಜಗಾದ ಸಾ ಯದುನಂದನೇ ಕ್ರೀಡತಿ ಹೃದಯಾನಂದನೇ ॥ 1 ॥
ಅಲಿಕುಲಗಂಜನಮಂಜನಕಂ ರತಿನಾಯಕಸಾಯಕಮೋಚನೇ ।
ತ್ವದಧರಚುಂಬನಲಂಬಿತಕಜ್ಜಲಮುಜ್ಜ್ವಲಯ ಪ್ರಿಯ ಲೋಚನೇ ॥ 2 ॥
ನಯನಕುರಂಗತರಂಗವಿಕಾಸನಿರಾಸಕರೇ ಶ್ರುತಿಮಂಡಲೇ ।
ಮನಸಿಜಪಾಶವಿಲಾಸಧರೇ ಶುಭವೇಶ ನಿವೇಶಯ ಕುಂಡಲೇ ॥ 3 ॥
ಭ್ರಮರಚಯಂ ರಚಹಯಂತಮುಪರಿ ರುಚಿರಂ ಸುಚಿರಂ ಮಮ ಸಂಮುಖೇ ।
ಜಿತಕಮಲೇ ವಿಮಲೇ ಪರಿಕರ್ಮಯ ನರ್ಮಜನಕಮಲಕಂ ಮುಖೇ ॥ 4 ॥
ಮೃಗಮದರಸವಲಿತಂ ಲಲಿತಂ ಕುರು ತಿಲಕಮಲಿಕರಜನೀಕರೇ ।
ವಿಹಿತಕಲಂಕಕಲಂ ಕಮಲಾನನ ವಿಶ್ರಮಿತಶ್ರಮಶೀಕರೇ ॥ 5 ॥
ಮಮ ರುಚಿರೇ ಚಿಕುರೇ ಕುರು ಮಾನದ ಮಾನಸಜಧ್ವಜಚಾಮರೇ ।
ರತಿಗಲಿತೇ ಲಲಿತೇ ಕುಸುಮಾನಿ ಶಿಖಂಡಿಶಿಖಂಡಕಡಾಮರೇ ॥ 6 ॥
ಸರಸಘನೇ ಜಘನೇ ಮಮ ಶಂಬರದಾರಣವಾರಣಕಂದರೇ ।
ಮಣಿರಶನಾವಸನಾಭರಣಾನಿ ಶುಭಾಶಯ ವಾಸಯ ಸುಂದರೇ ॥ 7 ॥
ಶ್ರೀಜಯದೇವವಚಸಿ ರುಚಿರೇ ಹೃದಯಂ ಸದಯಂ ಕುರು ಮಂಡನೇ ।
ಹರಿಚರಣಸ್ಮರಣಾಮೃತಕೃತಕಲಿಕಲುಷಭವಜ್ವರಖಂಡನೇ ॥ 8 ॥
ರಚಯ ಕುಚಯೋಃ ಪತ್ರಂ ಚಿತ್ರಂ ಕುರುಷ್ವ ಕಪೋಲಯೋ-ರ್ಘಟಯ ಜಘನೇ ಕಾಂಚೀಮಂಚ ಸ್ರಜಾ ಕಬರೀಭರಂ ।
ಕಲಯ ವಲಯಶ್ರೇಣೀಂ ಪಾಣೌ ಪದೇ ಕುರು ನೂಪುರಾ-ವಿತಿ ನಿಗತಿತಃ ಪ್ರೀತಃ ಪೀತಾಂಬರೋಽಪಿ ತಥಾಕರೋತ್ ॥ 71 ॥
ಯದ್ಗಾಂಧ್ಗರ್ವಕಲಾಸು ಕೌಶಲಮನುಧ್ಯಾನಂ ಚ ಯದ್ವೈಷ್ಣವಂ ಯಚ್ಛೃಂಗಾರವಿವೇಕತತ್ವಮಪಿ ಯತ್ಕಾವ್ಯೇಷು ಲೀಲಾಯಿತಂ ।
ತತ್ಸರ್ವಂ ಜಯದೇವಪಂಡಿತಕವೇಃ ಕೃಷ್ಣೈಕತಾನಾತ್ಮನಃ ಸಾನಂದಾಃ ಪರಿಶೋಧಯಂತು ಸುಧಿಯಃ ಶ್ರೀಗೀತಗೋವಿಂದತಃ ॥ 72 ॥
ಶ್ರೀಭೋಜದೇವಪ್ರಭವಸ್ಯ ರಾಮಾದೇವೀಸುತಶ್ರೀಜಯದೇವಕಸ್ಯ ।
ಪರಾಶರಾದಿಪ್ರಿಯವರ್ಗಕಂಠೇ ಶ್ರೀಗೀತಗೋವಿಂದಕವಿತ್ವಮಸ್ತು ॥ 73 ॥
॥ ಇತಿ ಶ್ರೀಜಯದೇವಕೃತೌ ಗೀತಗೋವಿಂದೇ ಸುಪ್ರೀತಪೀತಾಂಬರೋ ನಾಮ ದ್ವಾದಶಃ ಸರ್ಗಃ ॥
॥ ಇತಿ ಗೀತಗೋವಿಂದಂ ಸಮಾಪ್ತಂ ॥
Browse Related Categories:
