॥ ಏಕಾದಶಃ ಸರ್ಗಃ ॥
॥ ಸಾನಂದದಾಮೋದರಃ ॥
ಸುಚಿರಮನುನಯನೇ ಪ್ರೀಣಯಿತ್ವಾ ಮೃಗಾಕ್ಷೀಂ ಗತವತಿ ಕೃತವೇಶೇ ಕೇಶವೇ ಕುಂಜಶಯ್ಯಾಂ ।
ರಚಿತರುಚಿರಭೂಷಾಂ ದೃಷ್ಟಿಮೋಷೇ ಪ್ರದೋಷೇ ಸ್ಫುರತಿ ನಿರವಸಾದಾಂ ಕಾಪಿ ರಾಧಾಂ ಜಗಾದ ॥ 59 ॥
॥ ಗೀತಂ 20 ॥
ವಿರಚಿತಚಾಟುವಚನರಚನಂ ಚರಣೇ ರಚಿತಪ್ರಣಿಪಾತಂ ।
ಸಂಪ್ರತಿ ಮಂಜುಲವಂಜುಲಸೀಮನಿ ಕೇಲಿಶಯನಮನುಯಾತಂ ॥
ಮುಗ್ಧೇ ಮಧುಮಥನಮನುಗತಮನುಸರ ರಾಧಿಕೇ ॥ 1 ॥
ಘನಜಘನಸ್ತನಭಾರಭರೇ ದರಮಂಥರಚರಣವಿಹಾರಂ ।
ಮುಖರಿತಮಣೀಮಂಜೀರಮುಪೈಹಿ ವಿಧೇಹಿ ಮರಾಲವಿಕಾರಂ ॥ 2 ॥
ಶೃಣು ರಮಣೀಯತರಂ ತರುಣೀಜನಮೋಹನಮಧುಪವಿರಾವಂ ।
ಕುಸುಮಶರಾಸನಶಾಸನಬಂದಿನಿ ಪಿಕನಿಕರೇ ಭಜ ಭಾವಂ ॥ 3 ॥
ಅನಿಲತರಲಕಿಸಲಯನಿಕರೇಣ ಕರೇಣ ಲತಾನಿಕುರಂಬಂ ।
ಪ್ರೇರಣಮಿವ ಕರಭೋರು ಕರೋತಿ ಗತಿಂ ಪ್ರತಿಮುಂಚ ವಿಲಂಬಂ ॥ 4 ॥
ಸ್ಫುರಿತಮನಂಗತರಂಗವಶಾದಿವ ಸೂಚಿತಹರಿಪರಿರಂಭಂ ।
ಪೃಚ್ಛ ಮನೋಹರಹಾರವಿಮಲಜಲಧಾರಮಮುಂ ಕುಚಕುಂಭಂ ॥ 5 ॥
ಅಧಿಗತಮಖಿಲಸಖೀಭಿರಿದಂ ತವ ವಪುರಪಿ ರತಿರಣಸಜ್ಜಂ ।
ಚಂಡಿ ರಸಿತರಶನಾರವಡಿಂಡಿಮಮಭಿಸರ ಸರಸಮಲಜ್ಜಂ ॥ 6 ॥
ಸ್ಮರಶರಸುಭಗನಖೇನ ಕರೇಣ ಸಖೀಮವಲಂಬ್ಯ ಸಲೀಲಂ ।
ಚಲ ವಲಯಕ್ವಣೀತೈರವಬೋಧಯ ಹರಮಪಿ ನಿಜಗತಿಶೀಲಂ ॥ 7 ॥
ಶ್ರೀಜಯದೇವಭಣಿತಮಧರೀಕೃತಹಾರಮುದಾಸಿತವಾಮಂ ।
ಹರಿವಿನಿಹಿತಮನಸಾಮಧಿತಿಷ್ಠತು ಕಂಠತಟೀಮವಿರಾಮಂ ॥ 8 ॥
ಸಾ ಮಾಂ ದ್ರಕ್ಷ್ಯತಿ ವಕ್ಷ್ಯತಿ ಸ್ಮರಕಥಾಂ ಪ್ರತ್ಯಂಗಮಾಲಿಂಗನೈಃ ಪ್ರೀತಿಂ ಯಾಸ್ಯತಿ ರಮ್ಯತೇ ಸಖಿ ಸಮಾಗತ್ಯೇತಿ ಚಿಂತಾಕುಲಃ ।
ಸ ತ್ವಾಂ ಪಶ್ಯತಿ ವೇಪತೇ ಪುಲಕಯತ್ಯಾನಂದತಿ ಸ್ವಿದ್ಯತಿ ಪ್ರತ್ಯುದ್ಗಚ್ಛತಿ ಮೂರ್ಚ್ಛತಿ ಸ್ಥಿರತಮಃಪುಂಜೇ ನಿಕುಂಜೇ ಪ್ರಿಯಃ ॥ 60 ॥
ಅಕ್ಷ್ಣೋರ್ನಿಕ್ಷಿಪದಂಜನಂ ಶ್ರವಣಯೋಸ್ತಾಪಿಚ್ಛಗುಚ್ಛಾವಲೀಂ ಮೂರ್ಧ್ನಿ ಶ್ಯಾಮಸರೋಜದಾಮ ಕುಚಯೋಃ ಕಸ್ತೂರಿಕಾಪಾತ್ರಕಂ ।
ಧೂರ್ತಾನಾಮಭಿಸಾರಸತ್ವರಹೃದಾಂ ವಿಷ್ವಙ್ನಿಕುಂಜೇ ಸಖಿ ಧ್ವಾಂತಂ ನೀಲನಿಚೋಲಚಾರು ಸದೃಶಾಂ ಪ್ರತ್ಯಂಗಮಾಲಿಂಗತಿ ॥ 61 ॥
ಕಾಶ್ಮೀರಗೌರವಪುಷಾಮಭಿಸಾರಿಕಾಣಾಂ ಆಬದ್ಧರೇಖಮಭಿತೋ ರುಚಿಮಂಜರೀಭಿಃ ।
ಏತತ್ತಮಾಲದಲನೀಲತಮಂ ತಮಿಶ್ರಂ ತತ್ಪ್ರೇಮಹೇಮನಿಕಷೋಪಲತಾಂ ತನೋತಿ ॥ 62 ॥
ಹಾರಾವಲೀತರಲಕಾಂಚನಕಾಂಚಿದಾಮ-ಕೇಯೂರಕಂಕಣಮಣಿದ್ಯುತಿದೀಪಿತಸ್ಯ ।
ದ್ವಾರೇ ನಿಕುಂಜನಿಲಯಸ್ಯಹರಿಂ ನಿರೀಕ್ಷ್ಯ ವ್ರೀಡಾವತೀಮಥ ಸಖೀ ನಿಜಗಾಹ ರಾಧಾಂ ॥ 63 ॥
॥ ಗೀತಂ 21 ॥
ಮಂಜುತರಕುಂಜತಲಕೇಲಿಸದನೇ ।
ವಿಲಸ ರತಿರಭಸಹಸಿತವದನೇ ॥
ಪ್ರವಿಶ ರಾಧೇ ಮಾಧವಸಮೀಪಮಿಹ ॥ 1 ॥
ನವಭವದಶೋಕದಲಶಯನಸಾರೇ ।
ವಿಲಸ ಕುಚಕಲಶತರಲಹಾರೇ ॥ 2 ॥
ಕುಸುಮಚಯರಚಿತಶುಚಿವಾಸಗೇಹೇ ।
ವಿಲಸ ಕುಸುಮಸುಕುಮಾರದೇಹೇ ॥ 3 ॥
ಚಲಮಲಯವನಪವನಸುರಭಿಶೀತೇ ।
ವಿಲಸ ರಸವಲಿತಲಲಿತಗೀತೇ ॥ 4 ॥
ಮಧುಮುದಿತಮಧುಪಕುಲಕಲಿತರಾವೇ ।
ವಿಲಸ ಮದನರಸಸರಸಭಾವೇ ॥ 5 ॥
ಮಧುತರಲಪಿಕನಿಕರನಿನದಮುಖರೇ ।
ವಿಲಸ ದಶನರುಚಿರುಚಿರಶಿಖರೇ ॥ 6 ॥
ವಿತತ ಬಹುವಲ್ಲಿನವಪಲ್ಲವಘನೇ ।
ವಿಲಸ ಚಿರಮಲಸಪೀನಜಘನೇ ॥ 7 ॥
ವಿಹಿತಪದ್ಮಾವತೀಸುಖಸಮಾಜೇ ।
ಭಣತಿ ಜಯದೇವಕವಿರಾಜೇ ॥ 8 ॥
ತ್ವಾಂ ಚಿತ್ತೇನ ಚಿರಂ ವಹನ್ನಯಮತಿಶ್ರಾಂತೋ ಭೃಶಂ ತಾಪಿತಃ ಕಂದರ್ಪೇಣ ತು ಪಾತುಮಿಚ್ಛತಿ ಸುಧಾಸಂಬಾಧಬಿಂಬಾಧರಂ ।
ಅಸ್ಯಾಂಗಂ ತದಲಂಕುರು ಕ್ಷಣಮಿಹ ಭ್ರೂಕ್ಷೇಪಲಕ್ಷ್ಮೀಲವ-ಕ್ರೀತೇ ದಾಸ ಇವೋಪಸೇವಿತಪದಾಂಭೋಜೇ ಕುತಃ ಸಂಭ್ರಮಃ ॥ 64 ॥
ಸಾ ಸಸಾಧ್ವಸಸಾನಂದಂ ಗೋವಿಂದೇ ಲೋಲಲೋಚನಾ ।
ಸಿಂಜಾನಮಂಜುಮಂಜೀರಂ ಪ್ರವಿವೇಶ ನಿವೇಶನಂ ॥ 65 ॥
॥ ಗೀತಂ 22 ॥
ರಾಧಾವದನವಿಲೋಕನವಿಕಸಿತವಿವಿಧವಿಕಾರವಿಭಂಗಂ ।
ಜಲನಿಧಿಮಿವ ವಿಧುಮಂಡಲದರ್ಶನತರಲಿತತುಂಗತರಂಗಂ ॥
ಹರಿಮೇಕರಸಂ ಚಿರಮಭಿಲಷಿತವಿಲಾಸಂ ಸಾ ದದಾರ್ಶ ಗುರುಹರ್ಷವಶಂವದವದನಮನಂಗನಿವಾಸಂ ॥ 1 ॥
ಹಾರಮಮಲತರತಾರಮುರಸಿ ದಧತಂ ಪರಿರಭ್ಯ ವಿದೂರಂ ।
ಸ್ಫುಟತರಫೇನಕದಂಬಕರಂಬಿತಮಿವ ಯಮುನಾಜಲಪೂರಂ ॥ 2 ॥
ಶ್ಯಾಮಲಮೃದುಲಕಲೇವರಮಂಡಲಮಧಿಗತಗೌರದುಕೂಲಂ ।
ನೀಲನಲಿನಮಿವ ಪೀತಪರಾಗಪತಲಭರವಲಯಿತಮೂಲಂ ॥ 3 ॥
ತರಲದೃಗಂಚಲಚಲನಮನೋಹರವದನಜನಿತರತಿರಾಗಂ ।
ಸ್ಫುಟಕಮಲೋದರಖೇಲಿತಖಂಜನಯುಗಮಿವ ಶರದಿ ತಡಾಗಂ ॥ 4 ॥
ವದನಕಮಲಪರಿಶೀಲನಮಿಲಿತಮಿಹಿರಸಮಕುಂಡಲಶೋಭಂ ।
ಸ್ಮಿತರುಚಿರುಚಿರಸಮುಲ್ಲಸಿತಾಧರಪಲ್ಲವಕೃತರತಿಲೋಭಂ ॥ 5 ॥
ಶಶಿಕಿರಣಚ್ಛುರಿತೋದರಜಲಧರಸುಂದರಸಕುಸುಮಕೇಶಂ ।
ತಿಮಿರೋದಿತವಿಧುಮಣ್ದಲನಿರ್ಮಲಮಲಯಜತಿಲಕನಿವೇಶಂ ॥ 6 ॥
ವಿಪುಲಪುಲಕಭರದಂತುರಿತಂ ರತಿಕೇಲಿಕಲಾಭಿರಧೀರಂ ।
ಮಣಿಗಣಕಿರಣಸಮೂಹಸಮುಜ್ಜ್ವಲಭೂಷಣಸುಭಗಶರೀರಂ ॥ 7 ॥
ಶ್ರೀಜಯದೇವಭಣಿತವಿಭವದ್ವಿಗುಣೀಕೃತಭೂಷಣಭಾರಂ ।
ಪ್ರಣಮತ ಹೃದಿ ಸುಚಿರಂ ವಿನಿಧಾಯ ಹರಿಂ ಸುಕೃತೋದಯಸಾರಂ ॥ 8 ॥
ಅತಿಕ್ರಮ್ಯಾಪಾಂಗಂ ಶ್ರವಣಪಥಪರ್ಯಂತಗಮನ-ಪ್ರಯಾಸೇನೇವಾಕ್ಷ್ಣೋಸ್ತರಲತರತಾರಂ ಪತಿತಯೋಃ ।
ಇದಾನೀಂ ರಾಧಾಯಾಃ ಪ್ರಿಯತಮಸಮಾಲೋಕಸಮಯೇ ಪಪಾತ ಸ್ವೇದಾಂಬುಪ್ರಸರ ಇವ ಹರ್ಷಾಶ್ರುನಿಕರಃ ॥ 66 ॥
ಭವಂತ್ಯಾಸ್ತಲ್ಪಾಂತಂ ಕೃತಕಪಟಕಂಡೂತಿಪಿಹಿತ-ಸ್ಮಿತಂ ಯಾತೇ ಗೇಹಾದ್ಬಹಿರವಹಿತಾಲೀಪರಿಜನೇ ।
ಪ್ರಿಯಾಸ್ಯಂ ಪಶ್ಯಂತ್ಯಾಃ ಸ್ಮರಶರಸಮಾಕೂಲಸುಭಗಂ ಸಲಜ್ಜಾ ಲಜ್ಜಾಪಿ ವ್ಯಗಮದಿವ ದೂರಂ ಮೃಗದೃಶಃ ॥ 67 ॥
॥ ಇತಿ ಶ್ರೀಗೀತಗೋವಿಂದೇ ರಾಧಿಕಾಮಿಲನೇ ಸಾನಂದದಾಮೋದರೋ ನಾಮೈಕಾದಶಃ ಸರ್ಗಃ ॥
Browse Related Categories:
