॥ ದಶಮಃ ಸರ್ಗಃ ॥
॥ ಚತುರಚತುರ್ಭುಜಃ ॥
ಅತ್ರಾಂತರೇ ಮಸೃಣರೋಷವಶಾಮಸೀಂ-ನಿಃಶ್ವಾಸನಿಃಸಹಮುಖೀಂ ಸುಮುಖೀಮುಪೇತ್ಯ ।
ಸವ್ರೀಡಮೀಕ್ಷಿತಸಖೀವದನಾಂ ದಿನಾಂತೇ ಸಾನಂದಗದ್ಗದಪದಂ ಹರಿರಿತ್ಯುವಾಚ ॥ 53 ॥
॥ ಗೀತಂ 19 ॥
ವದಸಿ ಯದಿ ಕಿಂಚಿದಪಿ ದಂತರುಚಿಕೌಮುದೀ ಹರತಿ ದರತಿಮಿರಮತಿಘೋರಂ ।
ಸ್ಫುರದಧರಸೀಧವೇ ತವ ವದನಚಂದ್ರಮಾ ರೋಚಯತು ಲೋಚನಚಕೋರಂ ॥
ಪ್ರಿಯೇ ಚಾರುಶೀಲೇ ಮುಂಚ ಮಯಿ ಮಾನಮನಿದಾನಂ ಸಪದಿ ಮದನಾನಲೋ ದಹತಿ ಮಮ ಮಾನಸಂ ದೇಹಿ ಮುಖಕಮಲಮಧುಪಾನಂ ॥ 1 ॥
ಸತ್ಯಮೇವಾಸಿ ಯದಿ ಸುದತಿ ಮಯಿ ಕೋಪಿನೀ ದೇಹಿ ಖರನಖಶರಘಾತಂ ।
ಘಟಯ ಭುಜಬಂಧನಂ ಜನಯ ರದಖಂಡನಂ ಯೇನ ವಾ ಭವತಿ ಸುಖಜಾತಂ ॥ 2 ॥
ತ್ವಮಸಿ ಮಮ ಭೂಷಣಂ ತ್ವಮಸಿ ಮಮ ಜೀವನಂ ತ್ವಮಸಿ ಭವಜಲಧಿರತ್ನಂ ।
ಭವತು ಭವತೀಹ ಮಯಿ ಸತತಮನೋರೋಧಿನಿ ತತ್ರ ಮಮ ಹೃದಯಮತಿರತ್ನಂ ॥ 3 ॥
ನೀಲನಲಿನಾಭಮಪಿ ತನ್ವಿ ತವ ಲೋಚನಂ ಧಾರಯತಿ ಕೋಕನದರೂಪಂ ।
ಕುಸುಮಶರಬಾಣಭಾವೇನ ಯದಿ ರಂಜಯಸಿ ಕೃಷ್ಣಮಿದಮೇತದನುರೂಪಂ ॥ 4 ॥
ಸ್ಫುರತು ಕುಚಕುಂಭಯೋರುಪರಿ ಮಣಿಮಂಜರೀ ರಂಜಯತು ತವ ಹೃದಯದೇಶಂ ।
ರಸತು ರಶನಾಪಿ ತವ ಘನಜಘನಮಂಡಲೇ ಘೋಷಯತು ಮನ್ಮಥನಿದೇಶಂ ॥ 5 ॥
ಸ್ಥಲಕಮಲಗಂಜನಂ ಮಮ ಹೃದಯರಂಜನಂ ಜನಿತರತಿರಂಗಪರಭಾಗಂ ।
ಭಣ ಮಸೃಣವಾಣಿ ಕರವಾಣಿ ಪದಪಂಕಜಂ ಸರಸಲಸದಲಕ್ತಕರಾಗಂ ॥ 6 ॥
ಸ್ಮರಗರಲಖಂಡನಂ ಮಮ ಶಿರಸಿ ಮಂಡನಂ ದೇಹಿ ಪದಪಲ್ಲವಮುದಾರಂ ।
ಜ್ವಲತಿ ಮಯಿ ದಾರುಣೋ ಮದನಕದನಾರುಣೋ ಹರತು ತದುಪಾಹಿತವಿಕಾರಂ ॥ 7 ॥
ಇತಿ ಚಟುಲಚಾಟುಪಟುಚಾರು ಮುರವೈರಿಣೋ ರಾಧಿಕಾಮಧಿ ವಚನಜಾತಂ ।
ಜಯತಿ ಪದ್ಮಾವತೀರಮಣಜಯದೇವಕವಿ-ಭಾರತೀಭಣಿತಮತಿಶಾತಂ ॥ 8 ॥
ಪರಿಹರ ಕೃತಾತಂಕೇ ಶಂಕಾಂ ತ್ವಯಾ ಸತತಂ ಘನ-ಸ್ತನಜಘನಯಾಕ್ರಾಂತೇ ಸ್ವಾಂತೇ ಪರಾನವಕಾಶಿನಿ ।
ವಿಶತಿ ವಿತನೋರನ್ಯೋ ಧನ್ಯೋ ನ ಕೋಽಪಿ ಮಮಾಂತರಂ ಸ್ತನಭರಪರೀರಂಭಾರಂಭೇ ವಿಧೇಹಿ ವಿಧೇಯತಾಂ ॥ 54 ॥
ಮುಗ್ಧೇ ವಿಧೇಹಿ ಮಯಿ ನಿರ್ದಯದಂತದಂಶ-ದೋರ್ವಲ್ಲಿಬಂಧನಿಬಿಡಸ್ತನಪೀಡನಾನಿ ।
ಚಂಡಿ ತ್ವಮೇವ ಮುದಮಂಚ ನ ಪಂಚಬಾಣ-ಚಂಡಾಲಕಾಂಡದಲನಾದಸವಃ ಪ್ರಯಾಂತು ॥ 55 ॥
ವ್ಯಥಯತಿ ವೃಥಾ ಮೌನಂ ತನ್ವಿ ಪ್ರಪಂಚಯ ಪಂಚಮಂ ತರುಣೀ ಮಧುರಾಲಾಪೈಸ್ತಾಪಂ ವಿನೋದಯ ದೃಷ್ಟಿಭಿಃ ।
ಸುಮುಖಿ ವಿಮುಖೀಭಾವಂ ತಾವದ್ವಿಮುಂಚ ನ ಮುಂಚ ಮಾಂ ಸ್ವಯಮತಿಶಯಸ್ನಿಗ್ಧೋ ಮುಗ್ಧೇ ಪ್ರಿಯಿಽಹಮುಪಸ್ಥಿತಃ ॥ 56 ॥
ಬಂಧೂಕದ್ಯುತಿಬಾಂಧವೋಽಯಮಧರಃ ಸ್ನಿಗ್ಧೋ ಮಧೂಕಚ್ಚವಿ-ರ್ಗಂಡಶ್ಚಂಡಿ ಚಕಾಸ್ತಿ ನೀಲನಲಿನಶ್ರೀಮೋಚನಂ ಲೋಚನಂ ।
ನಾಸಾಭ್ಯೇತಿ ತಿಲಪ್ರಸೂನಪದವೀಂ ಕುಂದಾಭದಾಂತಿ ಪ್ರಿಯೇ ಪ್ರಾಯಸ್ತ್ವನ್ಮುಖಸೇವಯಾ ವಿಜಯತೇ ವಿಶ್ವಂ ಸ ಪುಷ್ಪಾಯುಧಃ ॥ 57 ॥
ದೃಶೌ ತವ ಮದಾಲಸೇ ವದನಮಿಂದುಸಂದೀಪಕಂ ಗತಿರ್ಜನಮನೋರಮಾ ವಿಧುತರಂಭಮೂರುದ್ವಯಂ ।
ರತಿಸ್ತವ ಕಲಾವತೀ ರುಚಿರಚಿತ್ರಲೇಖೇ ಭ್ರುವಾ-ವಹೋ ವಿಬುಧಯೌವನಂ ವಹಸಿ ತನ್ವೀ ಪೃಥ್ವೀಗತಾ ॥ 58 ॥
॥ ಇತಿ ಶ್ರೀಗೀತಗೋವಿಂದೇ ಮಾನಿನೀವರ್ಣನೇ ಚತುರಚತುರ್ಭುಜೋ ನಾಮ ದಶಮಃ ಸರ್ಗಃ ॥
Browse Related Categories:
