॥ ಗೀತಗೋವಿಂದಂ ॥
॥ ಅಷ್ಟಪದೀ ॥
॥ ಶ್ರೀ ಗೋಪಾಲಕ ಧ್ಯಾನಂ ॥
ಯದ್ಗೋಪೀವದನೇಂದುಮಂಡನಮಭೂತ್ಕಸ್ತೂರಿಕಾಪತ್ರಕಂ ಯಲ್ಲಕ್ಷ್ಮೀಕುಚಶಾತಕುಂಭ ಕಲಶೇ ವ್ಯಾಗೋಚಮಿಂದೀವರಂ ।
ಯನ್ನಿರ್ವಾಣವಿಧಾನಸಾಧನವಿಧೌ ಸಿದ್ಧಾಂಜನಂ ಯೋಗಿನಾಂ ತನ್ನಶ್ಯಾಮಳಮಾವಿರಸ್ತು ಹೃದಯೇ ಕೃಷ್ಣಾಭಿಧಾನಂ ಮಹಃ ॥ 1 ॥
॥ ಶ್ರೀ ಜಯದೇವ ಧ್ಯಾನಂ ॥
ರಾಧಾಮನೋರಮರಮಾವರರಾಸಲೀಲ-ಗಾನಾಮೃತೈಕಭಣಿತಂ ಕವಿರಾಜರಾಜಂ ।
ಶ್ರೀಮಾಧವಾರ್ಚ್ಚನವಿಧವನುರಾಗಸದ್ಮ-ಪದ್ಮಾವತೀಪ್ರಿಯತಮಂ ಪ್ರಣತೋಸ್ಮಿ ನಿತ್ಯಂ ॥ 2 ॥
ಶ್ರೀಗೋಪಲವಿಲಾಸಿನೀ ವಲಯಸದ್ರತ್ನಾದಿಮುಗ್ಧಾಕೃತಿ ಶ್ರೀರಾಧಾಪತಿಪಾದಪದ್ಮಭಜನಾನಂದಾಬ್ಧಿಮಗ್ನೋಽನಿಶಂ ॥
ಲೋಕೇ ಸತ್ಕವಿರಾಜರಾಜ ಇತಿ ಯಃ ಖ್ಯಾತೋ ದಯಾಂಭೋನಿಧಿಃ ತಂ ವಂದೇ ಜಯದೇವಸದ್ಗುರುಮಹಂ ಪದ್ಮಾವತೀವಲ್ಲಭಂ ॥ 3 ॥
॥ ಪ್ರಥಮಃ ಸರ್ಗಃ ॥
॥ ಸಾಮೋದದಾಮೋದರಃ ॥
ಮೇಘೈರ್ಮೇದುರಮಂಬರಂ ವನಭುವಃ ಶ್ಯಾಮಾಸ್ತಮಾಲದ್ರುಮೈ-ರ್ನಕ್ತಂ ಭೀರುರಯಂ ತ್ವಮೇವ ತದಿಮಂ ರಾಧೇ ಗೃಹಂ ಪ್ರಾಪಯ ।
ಇತ್ಥಂ ನಂದನಿದೇಶಿತಶ್ಚಲಿತಯೋಃ ಪ್ರತ್ಯಧ್ವಕುಂಜದ್ರುಮಂ ರಾಧಾಮಾಧವಯೋರ್ಜಯಂತಿ ಯಮುನಾಕೂಲೇ ರಹಃಕೇಲಯಃ ॥ 1 ॥
ವಾಗ್ದೇವತಾಚರಿತಚಿತ್ರಿತಚಿತ್ತಸದ್ಮಾ ಪದ್ಮಾವತೀಚರಣಚಾರಣಚಕ್ರವರ್ತೀ ।
ಶ್ರೀವಾಸುದೇವರತಿಕೇಲಿಕಥಾಸಮೇತಂ ಏತಂ ಕರೋತಿ ಜಯದೇವಕವಿಃ ಪ್ರಬಂಧಂ ॥ 2 ॥
ಯದಿ ಹರಿಸ್ಮರಣೇ ಸರಸಂ ಮನೋ ಯದಿ ವಿಲಾಸಕಲಾಸು ಕುತೂಹಲಂ ।
ಮಧುರಕೋಮಲಕಾಂತಪದಾವಲೀಂ ಶೃಣು ತದಾ ಜಯದೇವಸರಸ್ವತೀಂ ॥ 3 ॥
ವಾಚಃ ಪಲ್ಲವಯತ್ಯುಮಾಪತಿಧರಃ ಸಂದರ್ಭಶುದ್ಧಿಂ ಗಿರಾಂ ಜಾನೀತೇ ಜಯದೇವ ಏವ ಶರಣಃ ಶ್ಲಾಘ್ಯೋ ದುರೂಹದ್ರುತೇ ।
ಶೃಂಗಾರೋತ್ತರಸತ್ಪ್ರಮೇಯರಚನೈರಾಚಾರ್ಯಗೋವರ್ಧನ-ಸ್ಪರ್ಧೀ ಕೋಽಪಿ ನ ವಿಶ್ರುತಃ ಶ್ರುತಿಧರೋ ಧೋಯೀ ಕವಿಕ್ಷ್ಮಾಪತಿಃ ॥ 4 ॥
॥ ಗೀತಂ 1 ॥
ಪ್ರಲಯಪಯೋಧಿಜಲೇ ಧೃತವಾನಸಿ ವೇದಂ ।
ವಿಹಿತವಹಿತ್ರಚರಿತ್ರಮಖೇದಂ ॥
ಕೇಶವ ಧೃತಮೀನಶರೀರ ಜಯ ಜಗದೀಶ ಹರೇ ॥ 1 ॥
ಕ್ಷಿತಿರತಿವಿಪುಲತರೇ ತವ ತಿಷ್ಠತಿ ಪೃಷ್ಠೇ ।
ಧರಣಿಧರಣಕಿಣಚಕ್ರಗರಿಷ್ಠೇ ॥
ಕೇಶವ ಧೃತಕಚ್ಛಪರೂಪ ಜಯ ಜಗದೀಶ ಹರೇ ॥ 2 ॥
ವಸತಿ ದಶನಶಿಖರೇ ಧರಣೀ ತವ ಲಗ್ನಾ ।
ಶಶಿನಿ ಕಲಂಕಕಲೇವ ನಿಮಗ್ನಾ ॥
ಕೇಶವ ಧೃತಸೂಕರರೂಪ ಜಯ ಜಗದೀಶ ಹರೇ ॥ 3 ॥
ತವ ಕರಕಮಲವರೇ ನಖಮದ್ಭುತಶೃಂಗಂ ।
ದಲಿತಹಿರಣ್ಯಕಶಿಪುತನುಭೃಂಗಂ ॥
ಕೇಶವ ಧೃತನರಹರಿರೂಪ ಜಯ ಜಗದೀಶ ಹರೇ ॥ 4 ॥
ಛಲಯಸಿ ವಿಕ್ರಮಣೇ ಬಲಿಮದ್ಭುತವಾಮನ ।
ಪದನಖನೀರಜನಿತಜನಪಾವನ ॥
ಕೇಶವ ಧೃತವಾಮನರೂಪ ಜಯ ಜಗದೀಶ ಹರೇ ॥ 5 ॥
ಕ್ಷತ್ರಿಯರುಧಿರಮಯೇ ಜಗದಪಗತಪಾಪಂ ।
ಸ್ನಪಯಸಿ ಪಯಸಿ ಶಮಿತಭವತಾಪಂ ॥
ಕೇಶವ ಧೃತಭೃಘುಪತಿರೂಪ ಜಯ ಜಗದೀಶ ಹರೇ ॥ 6 ॥
ವಿತರಸಿ ದಿಕ್ಷು ರಣೇ ದಿಕ್ಪತಿಕಮನೀಯಂ ।
ದಶಮುಖಮೌಲಿಬಲಿಂ ರಮಣೀಯಂ ॥
ಕೇಶವ ಧೃತರಾಮಶರೀರ ಜಯ ಜಗದೀಶ ಹರೇ ॥ 7 ॥
ವಹಸಿ ವಪುಷಿ ವಿಶದೇ ವಸನಂ ಜಲದಾಭಂ ।
ಹಲಹತಿಭೀತಿಮಿಲಿತಯಮುನಾಭಂ ॥
ಕೇಶವ ಧೃತಹಲಧರರೂಪ ಜಯ ಜಗದೀಶ ಹರೇ ॥ 8 ॥
ನಿಂದಸಿ ಯಜ್ಞವಿಧೇರಹಹ ಶ್ರುತಿಜಾತಂ ।
ಸದಯಹೃದಯದರ್ಶಿತಪಶುಘಾತಂ ॥
ಕೇಶವ ಧೃತಬುದ್ಧಶರೀರ ಜಯ ಜಗದೀಶ ಹರೇ ॥ 9 ॥
ಮ್ಲೇಚ್ಛನಿವಹನಿಧನೇ ಕಲಯಸಿ ಕರವಾಲಂ ।
ಧೂಮಕೇತುಮಿವ ಕಿಮಪಿ ಕರಾಲಂ ॥
ಕೇಶವ ಧೃತಕಲ್ಕಿಶರೀರ ಜಯ ಜಗದೀಶ ಹರೇ ॥ 10 ॥
ಶ್ರೀಜಯದೇವಕವೇರಿದಮುದಿತಮುದಾರಂ ।
ಶೃಣು ಸುಖದಂ ಶುಭದಂ ಭವಸಾರಂ ॥
ಕೇಶವ ಧೃತದಶವಿಧರೂಪ ಜಯ ಜಗದೀಶ ಹರೇ ॥ 11 ॥
ವೇದಾನುದ್ಧರತೇ ಜಗನ್ನಿವಹತೇ ಭೂಗೋಲಮುದ್ಬಿಭ್ರತೇ ದೈತ್ಯಂ ದಾರಯತೇ ಬಲಿಂ ಛಲಯತೇ ಕ್ಷತ್ರಕ್ಷಯಂ ಕುರ್ವತೇ ।
ಪೌಲಸ್ತ್ಯಂ ಜಯತೇ ಹಲಂ ಕಲಯತೇ ಕಾರುಣ್ಯಮಾತನ್ವತೇ ಮ್ಲೇಚ್ಛಾನ್ಮೂರ್ಚ್ಛಯತೇ ದಶಾಕೃತಿಕೃತೇ ಕೃಷ್ಣಾಯ ತುಭ್ಯಂ ನಮಃ ॥ 5 ॥
॥ ಗೀತಂ 2 ॥
ಶ್ರಿತಕಮಲಾಕುಚಮಂಡಲ! ಧೃತಕುಂಡಲ! ।
ಕಲಿತಲಲಿತವನಮಾಲ! ಜಯ, ಜಯ, ದೇವ! ಹರೇ! ॥ 1 ॥
ದಿನಮಣೀಮಂಡಲಮಂಡನ! ಭವಖಂಡನ! ।
ಮುನಿಜನಮಾನಸಹಂಸ! ಜಯ, ಜಯ, ದೇವ! ಹರೇ! ॥ 2 ॥
ಕಾಲಿಯವಿಷಧರಗಂಜನ! ಜನರಂಜನ! ।
ಯದುಕುಲನಲಿನದಿನೇಶ! ಜಯ, ಜಯ, ದೇವ! ಹರೇ! ॥ 3 ॥
ಮಧುಮುರನರಕವಿನಾಶನ! ಗರುಡಾಸನ! ।
ಸುರಕುಲಕೇಲಿನಿದಾನ! ಜಯ, ಜಯ, ದೇವ! ಹರೇ! ॥ 4 ॥
ಅಮಲಕಮಲದಲಲೋಚನ! ಭವಮೋಚನ್! ।
ತ್ರಿಭುವನಭವನನಿಧಾನ! ಜಯ, ಜಯ, ದೇವ! ಹರೇ! ॥ 5 ॥
ಜನಕಸುತಾಕೃತಭೂಷಣ! ಜಿತದೂಷಣ! ।
ಸಮರಶಮಿತದಶಖಂಠ! ಜಯ, ಜಯ, ದೇವ! ಹರೇ! ॥ 6 ॥
ಅಭಿನವಜಲಧರಸುಂದರ! ಧೃತಮಂದರ! ।
ಶ್ರೀಮುಖಚಂದ್ರಚಕೋರ! ಜಯ, ಜಯ, ದೇವ! ಹರೇ! ॥ 7 ॥
ಶ್ರೀಜಯದೇವಕವೇರಿದಂ ಕುರುತೇ ಮುದಂ ।
ಮಂಗಲಮುಜ್ಜ್ವಲಗೀತಂ; ಜಯ, ಜಯ, ದೇವ! ಹರೇ! ॥ 8 ॥
ಪದ್ಮಾಪಯೋಧರತಟೀಪರಿರಂಭಲಗ್ನ-ಕಾಶ್ಮೀರಮುದ್ರಿತಮುರೋ ಮಧುಸೂದನಸ್ಯ ।
ವ್ಯಕ್ತಾನುರಾಗಮಿವ ಖೇಲದನಂಗಖೇದ-ಸ್ವೇದಾಂಬುಪೂರಮನುಪೂರಯತು ಪ್ರಿಯಂ ವಃ ॥ 6 ॥
ವಸಂತೇ ವಾಸಂತೀಕುಸುಮಸುಕುಮಾರೈರವಯವೈ-ರ್ಭ್ರಮಂತೀಂ ಕಾಂತಾರೇ ಬಹುವಿಹಿತಕೃಷ್ಣಾನುಸರಣಾಂ ।
ಅಮಂದಂ ಕಂದರ್ಪಜ್ವರಜನಿತಚಿಂತಾಕುಲತಯಾ ವಲದ್ಬಾಧಾಂ ರಾಧಾಂ ಸರಸಮಿದಮುಚೇ ಸಹಚರೀ ॥ 7 ॥
॥ ಗೀತಂ 3 ॥
ಲಲಿತಲವಂಗಲತಾಪರಿಶೀಲನಕೋಮಲಮಲಯಸಮೀರೇ ।
ಮಧುಕರನಿಕರಕರಂಬಿತಕೋಕಿಲಕೂಜಿತಕುಂಜಕುಟೀರೇ ॥
ವಿಹರತಿ ಹರಿರಿಹ ಸರಸವಸಂತೇ ನೃತ್ಯತಿ ಯುವತಿಜನೇನ ಸಮಂ ಸಖಿ ವಿರಹಿಜನಸ್ಯ ದುರಂತೇ ॥ 1 ॥
ಉನ್ಮದಮದನಮನೋರಥಪಥಿಕವಧೂಜನಜನಿತವಿಲಾಪೇ ।
ಅಲಿಕುಲಸಂಕುಲಕುಸುಮಸಮೂಹನಿರಾಕುಲಬಕುಲಕಲಾಪೇ ॥ 2 ॥
ಮೃಗಮದಸೌರಭರಭಸವಶಂವದನವದಲಮಾಲತಮಾಲೇ ।
ಯುವಜನಹೃದಯವಿದಾರಣಮನಸಿಜನಖರುಚಿಕಿಂಶುಕಜಾಲೇ ॥ 3 ॥
ಮದನಮಹೀಪತಿಕನಕದಂಡರುಚಿಕೇಶರಕುಸುಮವಿಕಾಸೇ ।
ಮಿಲಿತಶಿಲೀಮುಖಪಾಟಲಿಪಟಲಕೃತಸ್ಮರತೂಣವಿಲಾಸೇ ॥ 4 ॥
ವಿಗಲಿತಲಜ್ಜಿತಜಗದವಲೋಕನತರುಣಕರುಣಕೃತಹಾಸೇ ।
ವಿರಹಿನಿಕೃಂತನಕುಂತಮುಖಾಕೃತಿಕೇತಕದಂತುರಿತಾಶೇ ॥ 5 ॥
ಮಾಧವಿಕಾಪರಿಮಲಲಲಿತೇ ನವಮಾಲಿಕಜಾತಿಸುಗಂಧೌ ।
ಮುನಿಮನಸಾಮಪಿ ಮೋಹನಕಾರಿಣಿ ತರುಣಾಕಾರಣಬಂಧೌ ॥ 6 ॥
ಸ್ಫುರದತಿಮುಕ್ತಲತಾಪರಿರಂಭಣಮುಕುಲಿತಪುಲಕಿತಚೂತೇ ।
ಬೃಂದಾವನವಿಪಿನೇ ಪರಿಸರಪರಿಗತಯಮುನಾಜಲಪೂತೇ ॥ 7 ॥
ಶ್ರೀಜಯದೇವಭಣಿತಮಿದಮುದಯತಿ ಹರಿಚರಣಸ್ಮೃತಿಸಾರಂ ।
ಸರಸವಸಂತಸಮಯವನವರ್ಣನಮನುಗತಮದನವಿಕಾರಂ ॥ 8 ॥
ದರವಿದಲಿತಮಲ್ಲೀವಲ್ಲಿಚಂಚತ್ಪರಾಗ-ಪ್ರಕಟಿತಪಟವಾಸೈರ್ವಾಸಯನ್ ಕಾನನಾನಿ ।
ಇಹ ಹಿ ದಹತಿ ಚೇತಃ ಕೇತಕೀಗಂಧಬಂಧುಃ ಪ್ರಸರದಸಮಬಾಣಪ್ರಾಣವದ್ಗಂಧವಾಹಃ ॥ 8 ॥
ಉನ್ಮೀಲನ್ಮಧುಗಂಧಲುಬ್ಧಮಧುಪವ್ಯಾಧೂತಚೂತಾಂಕುರ-ಕ್ರೀಡತ್ಕೋಕಿಲಕಾಕಲೀಕಲಕಲೈರುದ್ಗೀರ್ಣಕರ್ಣಜ್ವರಾಃ ।
ನೀಯಂತೇ ಪಥಿಕೈಃ ಕಥಂಕಥಮಪಿ ಧ್ಯಾನಾವಧಾನಕ್ಷಣ-ಪ್ರಾಪ್ತಪ್ರಾಣಸಮಾಸಮಾಗಮರಸೋಲ್ಲಾಸೈರಮೀ ವಾಸರಾಃ ॥ 9 ॥
ಅನೇಕನಾರೀಪರಿರಂಭಸಂಭ್ರಮ-ಸ್ಫುರನ್ಮನೋಹಾರಿವಿಲಾಸಲಾಲಸಂ ।
ಮುರಾರಿಮಾರಾದುಪದರ್ಶಯಂತ್ಯಸೌ ಸಖೀ ಸಮಕ್ಷಂ ಪುನರಾಹ ರಾಧಿಕಾಂ ॥ 10 ॥
॥ ಗೀತಂ 4 ॥
ಚಂದನಚರ್ಚಿತನೀಲಕಲೇಬರಪೀತವಸನವನಮಾಲೀ ।
ಕೇಲಿಚಲನ್ಮಣಿಕುಂಡಲಮಂಡಿತಗಂಡಯುಗಸ್ಮಿತಶಾಲೀ ॥
ಹರಿರಿಹಮುಗ್ಧವಧೂನಿಕರೇ ವಿಲಾಸಿನಿ ವಿಲಸತಿ ಕೇಲಿಪರೇ ॥ 1 ॥
ಪೀನಪಯೋಧರಭಾರಭರೇಣ ಹರಿಂ ಪರಿರಮ್ಯ ಸರಾಗಂ ।
ಗೋಪವಧೂರನುಗಾಯತಿ ಕಾಚಿದುದಂಚಿತಪಂಚಮರಾಗಂ ॥ 2 ॥
ಕಾಪಿ ವಿಲಾಸವಿಲೋಲವಿಲೋಚನಖೇಲನಜನಿತಮನೋಜಂ ।
ಧ್ಯಾಯತಿ ಮುಗ್ಧವಧೂರಧಿಕಂ ಮಧುಸೂದನವದನಸರೋಜಂ ॥ 3 ॥
ಕಾಪಿ ಕಪೋಲತಲೇ ಮಿಲಿತಾ ಲಪಿತುಂ ಕಿಮಪಿ ಶ್ರುತಿಮೂಲೇ ।
ಚಾರು ಚುಚುಂಬ ನಿತಂಬವತೀ ದಯಿತಂ ಪುಲಕೈರನುಕೂಲೇ ॥ 4 ॥
ಕೇಲಿಕಲಾಕುತುಕೇನ ಚ ಕಾಚಿದಮುಂ ಯಮುನಾಜಲಕೂಲೇ ।
ಮಂಜುಲವಂಜುಲಕುಂಜಗತಂ ವಿಚಕರ್ಷ ಕರೇಣ ದುಕೂಲೇ ॥ 5 ॥
ಕರತಲತಾಲತರಲವಲಯಾವಲಿಕಲಿತಕಲಸ್ವನವಂಶೇ ।
ರಾಸರಸೇ ಸಹನೃತ್ಯಪರಾ ಹರಿಣಾ ಯುವತಿಃ ಪ್ರಶಶಂಸೇ ॥ 6 ॥
ಶ್ಲಿಷ್ಯತಿ ಕಾಮಪಿ ಚುಂಬತಿ ಕಾಮಪಿ ಕಾಮಪಿ ರಮಯತಿ ರಾಮಾಂ ।
ಪಶ್ಯತಿ ಸಸ್ಮಿತಚಾರುಪರಾಮಪರಾಮನುಗಚ್ಛತಿ ವಾಮಾಂ ॥ 7 ॥
ಶ್ರೀಜಯದೇವಕವೇರಿದಮದ್ಭುತಕೇಶವಕೇಲಿರಹಸ್ಯಂ ।
ವೃಂದಾವನವಿಪಿನೇ ಲಲಿತಂ ವಿತನೋತು ಶುಭಾನಿ ಯಶಸ್ಯಂ ॥ 8 ॥
ವಿಶ್ವೇಷಾಮನುರಂಜನೇನ ಜನಯನ್ನಾನಂದಮಿಂದೀವರ-ಶ್ರೇಣೀಶ್ಯಾಮಲಕೋಮಲೈರುಪನಯನ್ನಂಗೈರನಂಗೋತ್ಸವಂ ।
ಸ್ವಚ್ಛಂದಂ ವ್ರಜಸುಂದರೀಭಿರಭಿತಃ ಪ್ರತ್ಯಂಗಮಾಲಿಂಕಿತಃ ಶೃಂಗಾರಃ ಸಖಿ ಮೂರ್ತಿಮಾನಿವ ಮಧೌ ಮುಗ್ಧೋ ಹರಿಃ ಕ್ರೀಡತಿ ॥ 11 ॥
ಅದ್ಯೋತ್ಸಂಗವಸದ್ಭುಜಂಗಕವಲಕ್ಲೇಶಾದಿವೇಶಾಚಲಂ ಪ್ರಾಲೇಯಪ್ಲವನೇಚ್ಛಯಾನುಸರತಿ ಶ್ರೀಖಂಡಶೈಲಾನಿಲಃ ।
ಕಿಂ ಚ ಸ್ನಿಗ್ಧರಸಾಲಮೌಲಿಮುಕುಲಾನ್ಯಾಲೋಕ್ಯ ಹರ್ಷೋದಯಾ-ದುನ್ಮೀಲಂತಿ ಕುಹೂಃ ಕುಹೂರಿತಿ ಕಲೋತ್ತಾಲಾಃ ಪಿಕಾನಾಂ ಗಿರಃ ॥ 12 ॥
ರಾಸೋಲ್ಲಾಸಭರೇಣವಿಭ್ರಮಭೃತಾಮಾಭೀರವಾಮಭ್ರುವಾ-ಮಭ್ಯರ್ಣಂ ಪರಿರಮ್ಯನಿರ್ಭರಮುರಃ ಪ್ರೇಮಾಂಧಯಾ ರಾಧಯಾ ।
ಸಾಧು ತ್ವದ್ವದನಂ ಸುಧಾಮಯಮಿತಿ ವ್ಯಾಹೃತ್ಯ ಗೀತಸ್ತುತಿ-ವ್ಯಾಜಾದುದ್ಭಟಚುಂಬಿತಸ್ಮಿತಮನೋಹರೀ ಹರಿಃ ಪಾತು ವಃ ॥ 13 ॥
॥ ಇತಿ ಶ್ರೀಗೀತಗೋವಿಂದೇ ಸಾಮೋದದಾಮೋದರೋ ನಾಮ ಪ್ರಥಮಃ ಸರ್ಗಃ ॥
Browse Related Categories:
