હરિઃ ઓમ્ । સ॒હ ના॑ વવતુ । સ॒હ નૌ॑ ભુનક્તુ । સ॒હ વી॒ર્યં॑ કરવાવહૈ । તે॒જ॒સ્વિ ના॒વધી॑તમસ્તુ॒ મા વિ॑દ્વિષા॒વહૈ᳚ । ઓં શાંતિઃ॒ શાંતિઃ॒ શાંતિઃ॑ ।

ભ્રુગુ॒ર્વૈ વા॑રુ॒ણિઃ । વરુ॑ણં॒ પિત॑ર॒મુપ॑સસાર । અધી॑હિ ભગવો॒ બ્રહ્મેતિ॑ । તસ્મા॑ એત॒ત્પ્રો॑વાચ । અન્નં॑ પ્રા॒ણં ચક્ષુ॒શ્રોત્રં॒ મનો॒ વાચ॒મિતિ॑ । તગ્-મ્ હો॑વાચ । યતો॒ વા ઇ॒માનિ॒ ભુતા॑નિ॒ જાયં॑તે । યેન॒ જાતા॑નિ॒ જીવં॑તિ । યત્પ્રયં॑ત્યભિસંવિ॑શંતિ । તદ્વિજિ॑જ્ઞાસસ્વ । તદ્બ્રહ્મેતિ॑ । સ તપો॑ઽતપ્યત । સ તપ॑સ્ત॒પ્ત્વા । ॥ 1 ॥

અન્નં॒ બ્રહ્મેતિ॒ વ્ય॑જાનાત્ । અ॒ન્નાધ્યે॑વ ખલ્વિ॒માનિ॒ ભૂતા॑નિ॒ જાયં॑તે । અન્ને॑ન॒ જાતા॑નિ॒ જીવં॑તિ । અન્નં॒ પ્રયં॑ત્ય॒ભિસંવિ॑શં॒તીતિ॑ । તદ્વિ॒જ્ઞાય॑ । પુન॑રે॒વ વરુ॑ણં॒ પિત॑ર॒મુપ॑સસાર । અધી॑હિ ભગવો॒ બ્રહ્મેતિ॑ । તગ્-મ્ હો॑વાચ । તપ॑સા॒ બ્રહ્મ॒ વિજિ॑જ્ઞાસસ્વ । તપો॒ બ્રહ્મેતિ॑ । સ તપો॑ઽતપ્યત । સ તપ॑સ્ત॒પ્ત્વા । ॥ 2 ॥

પ્રા॒ણો બ્ર॒હ્મેતિ॒ વ્ય॑જાનાત્ । પ્રા॒ણાધ્યે॑વ ખલ્વિ॒માનિ॒ ભૂતા॑નિ॒ જાયં॑તે । પ્રા॒ણેન॒ જાતા॑નિ॒ જીવં॑તિ । પ્રા॒ણં પ્રયં॑ત્ય॒ભિ સંવિ॑શં॒તીતિ॑ । પુન॑રે॒વ વરુ॑ણં॒ પિત॑ર॒મુપ॑સસાર । અધી॑હિ ભગવો॒ બ્રહ્મેતિ॑ । તગ્-મ્ હો॑વાચ । તપ॑સા॒ બ્રહ્મ॒ વિજિ॑જ્ઞાસસ્વ । તપો॒ બ્રહ્મેતિ॑ । સ તપો॑ઽતપ્યત । સ તપ॑સ્ત॒પ્ત્વા । ॥ 3 ॥

મનો॒ બ્રહ્મેતિ॒ વ્ય॑જાનાત્। મન॑સો॒ હ્યે॑વ ખલ્વિ॒માનિ॒ ભૂતા॑નિ॒ જાયં॑તે । મન॑સા॒ જાતા॑નિ॒ જીવં॑તિ । મનઃ॒ પ્રયં॑ત્ય॒ભિ સંવિ॑શં॒તીતિ॑ । તદ્વિ॒જ્ઞાય॑ । પુન॑રે॒વ વરુ॑ણં॒ પિત॑ર॒મુપ॑સસાર । અધી॑હિ ભગવો॒ બ્રહ્મેતિ॑ । તગ્-મ્ હો॑વાચ । તપ॑સા॒ બ્રહ્મ॒ વિજિ॑જ્ઞાસસ્વ । તપો॒ બ્રહ્મેતિ॑ । સ તપો॑ઽતપ્યત । સ તપ॑સ્ત॒પ્ત્વા । ॥ 4 ॥

વિ॒જ્ઞાનં॒ બ્રહ્મેતિ॒ વ્ય॑જાનાત્ । વિ॒જ્ઞાના॒ધ્યે॑વ ખલ્વિ॒માનિ॒ ભૂતા॑નિ॒ જાયં॑તે । વિ॒જ્ઞાને॑ન॒ જાતા॑નિ॒ જીવં॑તિ । વિ॒જ્ઞાનં॒ પ્રયં॑ત્ય॒ભિસંવિ॑શં॒તીતિ॑ । તદ્વિ॒જ્ઞાય॑ । પુન॑રે॒વ વરુ॑ણં॒ પિત॑ર॒મુપ॑સસાર । અધી॑હિ ભગવો॒ બ્રહ્મેતિ॑ । તગ્-મ્ હો॑વાચ । તપ॑સા॒ બ્રહ્મ॒ વિજિ॑જ્ઞાસસ્વ । તપો॒ બ્રહ્મેતિ॑ । સ તપો॑ઽતપ્યત । સ તપ॑સ્ત॒પ્ત્વા । ॥ 5 ॥

આ॒નં॒દો બ્ર॒હ્મેતિ॒ વ્ય॑જાનાત્ । આ॒નંદા॒ધ્યે॑વ ખલ્વિ॒માનિ॒ ભૂતા॑નિ॒ જાયં॑તે । આ॒નં॒દેન॒ જાતા॑નિ॒ જીવં॑તિ । આ॒નં॒દં પ્રયં॑ત્ય॒ભિસંવિ॑શં॒તીતિ॑ । સૈષા ભા᳚ર્ગ॒વી વા॑રુ॒ણી વિ॒દ્યા । પ॒ર॒મે વ્યો॑મ॒ન્ પ્રતિ॑ષ્ઠિતા । સ ય એ॒વં વેદ॒ પ્રતિ॑તિષ્ઠતિ । અન્ન॑વાનન્ના॒દો ભ॑વતિ । મ॒હાન્ભ॑વતિ પ્ર॒જયા॑ પ॒શુભિ॑ર્બ્રહ્મવર્ચ॒સેન॑ । મ॒હાન્ કી॒ર્ત્યા । ॥ 6 ॥

અન્નં॒ ન નિં॑દ્યાત્ । તદ્-વ્ર॒તમ્ । પ્રા॒ણો વા અન્નમ્᳚ । શરી॑રમન્ના॒દમ્ । પ્રા॒ણે શરી॑રં॒ પ્રતિ॑ષ્ઠિતમ્ । શરી॑રે પ્રા॒ણઃ પ્રતિ॑ષ્ઠિતઃ । તદે॒તદન્ન॒મન્ને॒ પ્રતિ॑ષ્ટિતમ્ । સ ય એ॒તદન્ન॒મન્ને॒ પ્રતિ॑ષ્ઠિતં॒ વેદ॒ પ્રતિ॑તિષ્ઠતિ । અન્ન॑વાનન્ના॒દો ભ॑વતિ । મ॒હાન્ભ॑વતિ પ્ર॒જયા॑ પ॒શુભિ॑ર્બ્રહ્મવર્ચ॒સેન॑ । મ॒હાન્ કી॒ર્ત્યા । ॥ 7 ॥

અન્નં॒ ન પરિ॑ચક્ષીત । તદ્-વ્ર॒તમ્ । આપો॒ વા અન્નમ્᳚ । જ્યોતિ॑રન્ના॒દમ્ । અ॒પ્સુ જ્યોતિઃ॒ પ્રતિ॑ષ્ઠિતમ્ । જ્યોતિ॒ષ્યાપઃ॒ પ્રતિ॑ષ્ઠિતાઃ। તદે॒તદન્ન॒મન્ને॒ પ્રતિ॑ષ્ઠિતમ્ । સ ય એ॒તદન્ન॒મન્ને॒ પ્રતિ॑ષ્ઠિતં॒ વેદ॒ પ્રતિ॑તિષ્ઠતિ । અન્ન॑વાનન્ના॒દો ભ॑વતિ । મ॒હાન્ભ॑વતિ પ્ર॒જયા॑ પ॒શુભિ॑ર્બ્રહ્મવર્ચ॒સેન॑ । મ॒હાન્ કી॒ર્ત્યા । ॥ 8 ॥

અન્નં॑ બ॒હુ કુ॑ર્વીત । તદ્-વ્ર॒તમ્ । પૃ॒થિ॒વી વા અન્નમ્᳚ । આ॒કા॒શો᳚ઽન્ના॒દઃ । પૃ॒થિ॒વ્યામા॑કા॒શઃ પ્રતિ॑ષ્ઠિતઃ । આ॒કા॒શે પૃ॑થિ॒વી પ્રતિ॑ષ્ઠિતા । તદે॒તદન્ન॒મન્ને॒ પ્રતિ॑ષ્ઠિતમ્ । સ ય એ॒તદન્ન॒મન્ને॒ પ્રતિ॑ષ્ઠિતં॒ વેદ॒ પ્રતિ॑તિષ્ઠતિ । અન્ન॑વાનન્ના॒દો ભ॑વતિ । મ॒હાન્ભ॑વતિ પ્ર॒જયા॑ પ॒શુભિ॑ર્બ્રહ્મવર્ચ॒સેન॑ । મ॒હાન્ કી॒ર્ત્યા । ॥ 9 ॥

ન કંચન વસતૌ પ્રત્યા॑ચક્ષી॒ત । તદ્-વ્ર॒તમ્ । તસ્માદ્યયા કયા ચ વિધયા બહ્વ॑ન્નં પ્રા॒પ્નુયાત્ । અરાધ્યસ્મા અન્નમિ॑ત્યાચ॒ક્ષતે । એતદ્વૈ મુખતો᳚ઽન્નગ્-મ્ રા॒દ્ધમ્ । મુખતોઽસ્મા અ॑ન્નગ્-મ્ રા॒ધ્યતે । એતદ્વૈ મધ્યતો᳚ઽન્નગ્-મ્ રા॒દ્ધમ્ । મધ્યતોઽસ્મા અ॑ન્નગ્-મ્ રા॒ધ્યતે । એતદ્વા અંતતો᳚ઽન્નગ્-મ્ રા॒દ્ધમ્ । અંતતોઽસ્મા અ॑ન્નગ્-મ્ રા॒ધ્યતે । ય એ॑વં વે॒દ । ક્ષેમ ઇ॑તિ વા॒ચિ । યોગક્ષેમ ઇતિ પ્રા॑ણાપા॒ણયોઃ । કર્મે॑તિ હ॒સ્તયોઃ । ગતિરિ॑તિ પા॒દયોઃ । વિમુક્તિરિ॑તિ પા॒યૌ । ઇતિ માનુષી᳚સ્સમા॒જ્ઞાઃ । અથ દૈ॒વીઃ । તૃપ્તિરિ॑તિ વૃ॒ષ્ટૌ । બલમિ॑તિ વિ॒દ્યુતિ । યશ ઇ॑તિ પ॒શુષુ । જ્યોતિરિતિ ન॑ક્ષત્રે॒ષુ । પ્રજાતિરમૃતમાનંદ ઇ॑ત્યુપ॒સ્થે । સર્વમિ॑ત્યાકા॒શે । તત્પ્રતિષ્ઠેત્યુ॑પાસી॒ત। પ્રતિષ્ઠા॑વાન્ભ॒વતિ । તન્મહ ઇત્યુ॑પાસી॒ત । મ॑હાન્ભ॒વતિ । તન્મન ઇત્યુ॑પાસી॒ત । માન॑વાન્ભ॒વતિ । તન્નમ ઇત્યુ॑પાસી॒ત । નમ્યંતે᳚ઽસ્મૈ કા॒માઃ । તદ્બ્રહ્મેત્યુ॑પાસી॒ત । બ્રહ્મ॑વાન્ભ॒વતિ । તદ્બ્રહ્મણઃ પરિમર ઇત્યુ॑પાસી॒ત । પર્યેણં મ્રિયંતે દ્વિ ષંત॑સ્સપ॒ત્નાઃ । પરિ યે᳚ઽપ્રિયા᳚ ભ્રાતૃ॒વ્યાઃ । સ યશ્ચા॑યં પુ॒રુષે । યશ્ચાસા॑વાદિ॒ત્યે । સ એકઃ॑ । સ ય॑ એવં॒ વિત્ । અસ્માલ્લો॑કાત્પ્રે॒ત્ય । એતમન્નમયમાત્માનમુપ॑ સંક્ર॒મ્ય ॥ એતં પ્રાણમયમાત્માનમુપ॑ સંક્ર॒મ્ય । એતં મનોમયમાત્માનમુપ॑ સંક્ર॒મ્ય । એતં વિજ્ઞાનમયમાત્માનમુપ॑ સંક્ર॒મ્ય । એતમાનંદમયમાત્માનમુપ॑ સંક્ર॒મ્ય । ઇમાન્ લોકાન્ કામાન્ની કામરૂપ્ય॑નુ સં॒ચરન્ન્ । એતથ્સામ ગા॑યન્ના॒સ્તે । હા(3) વુ॒ હા(3) વુ॒ હા(3) વુ॑ । અ॒હમન્નમ॒હમન્નમ॒હમન્નમ્ । અ॒હમન્ના॒દો(2)ઽ॒હમન્ના॒દો(2)ઽ॒હમન્ના॒દઃ । અ॒હગ્ગ્ શ્લોક॒કૃદ॒હગ્ગ્ શ્લોક॒કૃદ॒હગ્ગ્ શ્લોક॒કૃત્ । અ॒હમસ્મિ પ્રથમજા ઋતા(3) સ્ય॒ । પૂર્વં દેવેભ્યો અમૃતસ્ય ના(3) ભા॒યિ॒ । યો મા દદાતિ સ ઇદેવ મા(3) વાઃ॒ । અ॒હમન્ન॒મન્ન॑મ॒દંત॒મા(3) દ્મિ॒ । અહં॒ વિશ્વં॒ ભુવ॑ન॒મભ્ય॑ભ॒વામ્ । સુવ॒ર્ન જ્યોતીઃ᳚ । ય એ॒વં વેદ॑ । ઇત્યુ॑પ॒નિષ॑ત્ । ॥ 10 ॥

સ॒હ ના॑ વવતુ । સ॒હ નૌ॑ ભુનક્તુ । સ॒હ વી॒ર્યં॑ કરવાવહૈ । તે॒જ॒સ્વિ ના॒વધી॑તમસ્તુ॒ મા વિ॑દ્વિષા॒વહૈ᳚ ॥ ઓં શાંતિઃ॒ શાંતિઃ॒ શાંતિઃ॑ ॥

॥ હરિઃ॑ ઓમ્ ॥
॥ શ્રી કૃષ્ણાર્પણમસ્તુ ॥