હરિઃ ઓમ્ ॥ સ॒હ ના॑ વવતુ । સ॒હ નૌ॑ ભુનક્તુ । સ॒હ વી॒ર્યં॑ કરવાવહૈ । તે॒જ॒સ્વિ ના॒વધી॑તમસ્તુ॒ મા વિ॑દ્વિષા॒વહૈ᳚ । ઓં શાંતિઃ॒ શાંતિઃ॒ શાંતિઃ॑ ॥

બ્ર॒હ્મ॒વિદા᳚પ્નોતિ॒ પરમ્᳚ ॥ તદે॒ષાઽભ્યુ॑ક્તા । સ॒ત્યં જ્ઞા॒નમ॑નં॒તં બ્રહ્મ॑ । યો વેદ॒ નિહિ॑તં॒ ગુહા॑યાં પર॒મે વ્યો॑મન્ન્ । સો᳚ઽશ્નુ॒તે॒ સર્વા॒ન્કામાં᳚થ્સ॒હ । બ્રહ્મ॑ણા વિપ॒શ્ચિતેતિ॑ ॥ તસ્મા॒દ્વા એ॒તસ્મા॑દા॒ત્મન॑ આકા॒શસ્સંભૂ॑તઃ । આ॒કા॒શાદ્વા॒યુઃ । વા॒યોર॒ગ્નિઃ । અ॒ગ્નેરાપઃ॑ । અ॒દ્ભ્યઃ પૃ॑થિ॒વી । પૃ॒થિ॒વ્યા ઓષ॑ધયઃ । ઓષ॑ધી॒ભ્યોન્નમ્᳚ । અન્ના॒ત્પુરુ॑ષઃ । સ વા એષ પુરુષોઽન્ન॑રસ॒મયઃ । તસ્યેદ॑મેવ॒ શિરઃ । અયં દક્ષિ॑ણઃ પ॒ક્ષઃ । અયમુત્ત॑રઃ પ॒ક્ષઃ । અયમાત્મા᳚ । ઇદં પુચ્છમ્॑ પ્રતિ॒ષ્ઠા । તદપ્યેષ શ્લો॑કો ભ॒વતિ ॥ 1 ॥

અન્ના॒દ્વૈ પ્ર॒જાઃ પ્ર॒જાયં॑તે । યાઃ કાશ્ચ॑ પૃથિ॒વીગ્ શ્રિ॒તાઃ । અથો॒ અન્ને॑નૈ॒વ જી॑વંતિ। અથૈ॑ન॒દપિ॑ યંત્યંત॒તઃ । અન્ન॒ગ્-મ્॒ હિ ભુ॒તાનાં॒ જ્યેષ્ઠમ્᳚ । તસ્મા᳚થ્સર્વૌષ॒ધમુ॑ચ્યતે । સર્વં॒ વૈ તેઽન્ન॑માપ્નુવંતિ । યેઽન્નં॒ બ્રહ્મો॒પાસ॑તે । અન્ન॒ગ્-મ્॒ હિ ભુ॒તાનાં॒ જ્યેષ્ઠમ્᳚ । તસ્મા᳚થ્સર્વૌષ॒ધમુ॑ચ્યતે । અન્ના᳚દ્ભૂ॒તાનિ॒ જાયં॑તે । જાતા॒ન્યન્નેન॑ વર્ધંતે । અદ્યતેઽત્તિ ચ॑ ભૂતા॒નિ । તસ્માદન્નં તદુચ્ય॑ત ઇ॒તિ । તસ્માદ્વા એતસ્માદન્ન॑રસ॒મયાત્ । અન્યોંતર આત્મા᳚ પ્રાણ॒મયઃ । તેનૈ॑ષ પૂ॒ર્ણઃ । સ વા એષ પુરુષવિ॑ધ એ॒વ । તસ્ય પુરુ॑ષવિ॒ધતામ્ । અન્વયં॑ પુરુષ॒વિધઃ । તસ્ય પ્રાણ॑ એવ॒ શિરઃ । વ્યાનો દક્ષિ॑ણઃ પ॒ક્ષઃ । અપાન ઉત્ત॑રઃ પ॒ક્ષઃ । આકા॑શ આ॒ત્મા । પૃથિવી પુચ્છં॑ પ્રતિ॒ષ્ઠા । તદપ્યેષ શ્લો॑કો ભ॒વતિ ॥ 2 ॥

પ્રા॒ણં દે॒વા અનુ॒પ્રાણં॑તિ । મ॒નુ॒ષ્યાઃ᳚ પ॒શવ॑શ્ચ॒ યે । પ્રા॒ણો હિ ભૂ॒તના॒માયુઃ॑ । તસ્મા᳚થ્સર્વાયુ॒ષમુ॑ચ્યતે । સર્વ॑મે॒વ ત॒ આયુ॑ર્યંતિ । યે પ્રા॒ણં બ્રહ્મો॒પાસ॑તે । પ્રાણો હિ ભૂતા॑નામા॒યુઃ । તસ્માથ્સર્વાયુષમુચ્ય॑ત ઇ॒તિ । તસ્યૈષ એવ શારી॑ર આ॒ત્મા । યઃ॑ પૂર્વ॒સ્ય । તસ્માદ્વા એતસ્મા᳚ત્-પ્રાણ॒મયાત્ । અન્યોઽંતર આત્મા॑ મનો॒મયઃ । તેનૈ॑ષ પૂ॒ર્ણઃ । સ વા એષ પુરુષવિ॑ધ એ॒વ। તસ્ય પુરુ॑ષવિ॒ધતામ્ । અન્વયં॑ પુરુષ॒વિધઃ । તસ્ય યજુ॑રેવ॒ શિરઃ । ઋગ્-દક્ષિ॑ણઃ પ॒ક્ષઃ । સામોત્ત॑રઃ પ॒ક્ષઃ । આદે॑શ આ॒ત્મા । અથર્વાંગિરસઃ પુચ્છં॑ પ્રતિ॒ષ્ઠા । તદપ્યેષ શ્લો॑કો ભ॒વતિ ॥ 3 ॥

યતો॒ વાચો॒ નિવ॑ર્તંતે । અપ્રા᳚પ્ય॒ મન॑સા સ॒હ । આનંદં બ્રહ્મ॑ણો વિ॒દ્વાન્ । ન બિભેતિ કદા॑ચને॒તિ । તસ્યૈષ એવ શારી॑ર આ॒ત્મા । યઃ॑ પૂર્વ॒સ્ય । તસ્માદ્વા એતસ્મા᳚ન્-મનો॒મયાત્ । અન્યોઽંતર આત્મા વિ॑જ્ઞાન॒મયઃ । તેનૈ॑ષ પૂ॒ર્ણઃ । સ વા એષ પુરુષવિ॑ધ એ॒વ । તસ્ય પુરુ॑ષવિ॒ધતામ્ । અન્વયં॑ પુરુષ॒વિધઃ । તસ્ય શ્ર॑દ્ધૈવ॒ શિરઃ । ઋતં દક્ષિ॑ણઃ પ॒ક્ષઃ । સત્યમુત્ત॑રઃ પ॒ક્ષઃ । યો॑ગ આ॒ત્મા । મહઃ પુચ્છં॑ પ્રતિ॒ષ્ઠા । તદપ્યેષ શ્લો॑કો ભ॒વતિ ॥ 4 ॥

વિ॒જ્ઞાનં॑ ય॒જ્ઞં ત॑નુતે । કર્મા॑ણી તનુ॒તેઽપિ॑ ચ । વિ॒જ્ઞાનં॑ દે॒વાસ્સર્વે᳚ । બ્રહ્મ॒ જ્યેષ્ઠ॒મુપા॑સતે । વિ॒જ્ઞાનં॒ બ્રહ્મ॒ ચેદ્વેદ॑ । તસ્મા॒ચ્ચેન્ન પ્ર॒માદ્ય॑તિ । શરીરે॑ પાપ્મ॑નો હિ॒ત્વા । સર્વાન્ કામાંથ્સમશ્નુ॑ત ઇ॒તિ । તસ્યૈષ એવ શારી॑ર આ॒ત્મા । યઃ॑ પૂર્વ॒સ્ય । તસ્માદ્વા એતસ્માદ્વિ॑જ્ઞાન॒મયાત્ । અન્યોઽંતર આત્મા॑ઽઽનંદ॒મયઃ । તેનૈ॑ષ પૂ॒ર્ણઃ । સ વા એષ પુરુષવિ॑ધ એ॒વ । તસ્ય પુરુ॑ષવિ॒ધતામ્ । અન્વયં॑ પુરુષ॒વિધઃ । તસ્ય પ્રિય॑મેવ॒ શિરઃ । મોદો દક્ષિ॑ણઃ પ॒ક્ષઃ । પ્રમોદ ઉત્ત॑રઃ પ॒ક્ષઃ । આનં॑દ આ॒ત્મા । બ્રહ્મ પુચ્છં॑ પ્રતિ॒ષ્ઠા । તદપ્યેષ શ્લો॑કો ભ॒વતિ ॥ 5 ॥

અસ॑ન્ને॒વ સ॑ ભવતિ । અસ॒દ્બ્રહ્મેતિ॒ વેદ॒ ચેત્ । અસ્તિ બ્રહ્મેતિ॑ ચેદ્વે॒દ । સંતમેનં તતો વિ॑દુરિ॒તિ । તસ્યૈષ એવ શારી॑ર આ॒ત્મા । યઃ॑ પૂર્વ॒સ્ય । અથાતો॑ઽનુપ્ર॒શ્નાઃ । ઉ॒તાવિ॒દ્વાન॒મું લો॒કં પ્રેત્ય॑ । કશ્ચ॒ન ગ॑ચ્ચ॒તી(3) । આહો॑ વિ॒દ્વાન॒મું લો॒કં પ્રેત્ય॑ । કસ્ચિ॒થ્સમ॑શ્નુ॒તા(3) ઉ॒ । સો॑ઽકામયત । બ॒હુ સ્યાં॒ પ્રજા॑યે॒યેતિ॑ । સ તપો॑ઽતપ્યત । સ તપ॑સ્ત॒પ્ત્વા । ઇદગ્-મ્ સર્વ॑મસૃજત । યદિ॒દં કિંચ॑ । તથ્સૃ॒ષ્ટ્વા । તદે॒વાનુ॒પ્રાવિ॑શત્ । તદ॑નુપ્ર॒વિશ્ય॑ । સચ્ચ॒ ત્યચ્ચા॑ભવત્ । નિ॒રુક્તં॒ ચાનિ॑રુક્તં ચ । નિ॒લય॑નં॒ ચાનિ॑લયનં ચ । વિ॒જ્ઞાનં॒ ચાવિ॑જ્ઞનં ચ । સત્યં ચાનૃતં ચ સ॑ત્યમ॒ભવત્ । યદિ॑દં કિં॒ચ । તથ્સત્યમિ॑ત્યાચ॒ક્ષતે । તદપ્યેષ શ્લો॑કો ભ॒વતિ ॥ 6 ॥

અસ॒દ્વા ઇ॒દમગ્ર॑ આસીત્ । તતો॒ વૈ સદ॑જાયત । તદાત્માનગ્ગ્ સ્વય॑મકુ॒રુત । તસ્માત્તથ્સુકૃતમુચ્ય॑ત ઇ॒તિ । યદ્વૈ॑ તથ્સુ॒કૃતમ્ । ર॑સો વૈ॒ સઃ । રસગ્ગ્ હ્યેવાયં લબ્ધ્વાઽઽનં॑દી ભ॒વતિ । કો હ્યેવાન્યા᳚ત્કઃ પ્રા॒ણ્યાત્ । યદેષ આકાશ આનં॑દો ન॒ સ્યાત્ । એષ હ્યેવાઽઽનં॑દયા॒તિ । ય॒દા હ્યે॑વૈષ॒ એતસ્મિન્નદૃશ્યેઽનાત્મ્યેઽનિરુક્તેઽનિલયનેઽભયં પ્રતિ॑ષ્ઠાં વિં॒દતે । અથ સોઽભયં ગ॑તો ભ॒વતિ । ય॒દા હ્યે॑વૈષ॒ એતસ્મિન્નુદરમંત॑રં કુ॒રુતે । અથ તસ્ય ભ॑યં ભ॒વતિ । તત્વેવ ભયં વિદુષોઽમ॑ન્વાન॒સ્ય । તદપ્યેષ શ્લો॑કો ભ॒વતિ ॥ 7 ॥

ભી॒ષાઽસ્મા॒દ્વાતઃ॑ પવતે । ભી॒ષોદે॑તિ॒ સૂર્યઃ॑ । ભી॒ષાઽસ્માદગ્નિ॑શ્ચેંદ્ર॒શ્ચ । મૃત્યુર્ધાવતિ પંચ॑મ ઇ॒તિ । સૈષાઽઽનંદસ્ય મીમાગ્-મ્॑સા ભ॒વતિ । યુવા સ્યાથ્સાધુયુ॑વાઽધ્યા॒યકઃ । આશિષ્ઠો દૃડિષ્ઠો॑ બલિ॒ષ્ઠઃ । તસ્યેયં પૃથિવી સર્વા વિત્તસ્ય॑ પૂર્ણા॒ સ્યાત્ । સ એકો માનુષ॑ આનં॒દઃ । તે યે શતં માનુષા॑ આનં॒દાઃ । સ એકો મનુષ્યગંધર્વાણા॑માનં॒દઃ । શ્રોત્રિયસ્ય ચાકામ॑હત॒સ્ય । તે યે શતં દેવગંધર્વાણા॑માનં॒દાઃ । સ એકઃ પિતૃણાં ચિરલોકલોકાના॑માનં॒દઃ । શ્રોત્રિયસ્ય ચાકામ॑હત॒સ્ય । તે યે શતં પિતૃણાં ચિરલોકલોકાના॑માનં॒દાઃ । સ એક આજાનજાનાં દેવાના॑માનં॒દઃ । શ્રોત્રિયસ્ય ચાકામ॑હત॒સ્ય । તે યે શતમાજાનજાનાં દેવાના॑માનં॒દાઃ । સ એકઃ કર્મદેવાનાં દેવાના॑માનં॒દઃ । યે કર્મણા દેવાન॑પિ યં॒તિ । શ્રોત્રિયસ્ય ચાકામ॑હત॒સ્ય । તે યે શતં કર્મદેવાનાં દેવાના॑માનં॒દાઃ । સ એકો દેવાના॑માનં॒દઃ । શ્રોત્રિયસ્ય ચાકામ॑હત॒સ્ય । તે યે શતં દેવાના॑માનં॒દાઃ । સ એક ઇંદ્ર॑સ્યાઽઽનંં॒દઃ । શ્રોત્રિયસ્ય ચાકામ॑હત॒સ્ય । તે યે શતમિંદ્ર॑સ્યાઽઽનં॒દાઃ । સ એકો બૃહસ્પતે॑રાનં॒દઃ । શ્રોત્રિયસ્ય ચાકામ॑હત॒સ્ય । તે યે શતં બૃહસ્પતે॑રાનં॒દાઃ । સ એકઃ પ્રજાપતે॑રાનં॒દઃ । શ્રોત્રિયસ્ય ચાકામ॑હત॒સ્ય । તે યે શતં પ્રજાપતે॑રાનં॒દાઃ । સ એકો બ્રહ્મણ॑ આનં॒દઃ । શ્રોત્રિયસ્ય ચાકામ॑હત॒સ્ય । તે યે શતં પજાપતે॑રાનં॒દાઃ । સ એકો બ્રહ્મણ॑ આનં॒દઃ । શ્રોત્રિયસ્ય ચાકામ॑હત॒સ્ય । સ યશ્ચા॑યં પુ॒રુષે । યશ્ચાસા॑વાદિ॒ત્યે । સ એકઃ॑ । સ ય॑ એવં॒ વિત્ । અસ્માલ્લો॑કાત્પ્રે॒ત્ય । એતમન્નમયમાત્માનમુપ॑સંક્રા॒મતિ । એતં પ્રાણમયમાત્માનમુપ॑સંક્રા॒મતિ । એતં મનોમયમાત્માનમુપ॑સંક્રા॒મતિ। એતં વિજ્ઞાનમયમાત્માનમુપ॑સંક્રા॒મતિ । એતમાનંદમયમાત્માનમુપ॑સંક્રા॒મતિ । તદપ્યેષ શ્લો॑કો ભ॒વતિ ॥ 8 ॥

યતો॒ વાચો॒ નિવ॑ર્તંતે । અપ્રા᳚પ્ય॒ મન॑સા સ॒હ । આનંદં બ્રહ્મ॑ણો વિ॒દ્વાન્ । ન બિભેતિ કુત॑શ્ચને॒તિ । એતગ્-મ્ હ વાવ॑ ન ત॒પતિ । કિમહગ્-મ્ સાધુ॑ નાક॒રવમ્ । કિમહં પાપમકર॑વમિ॒તિ । સ ય એવં વિદ્વાનેતે આત્મા॑નગ્ગ્ સ્પૃ॒ણુતે । ઉ॒ભે હ્યે॑વૈષ॒ એતે આત્મા॑નગ્ગ્ સ્પૃ॒ણુતે । ય એ॒વં વેદ॑ । ઇત્યુ॑પ॒નિષ॑ત્ ॥ 9 ॥

સ॒હ ના॑ વવતુ । સ॒હ નૌ॑ ભુનક્તુ । સ॒હ વી॒ર્યં॑ કરવાવહૈ । તે॒જ॒સ્વિ ના॒વધી॑તમસ્તુ॒ મા વિ॑દ્વિષા॒વહૈ᳚ । ઓં શાંતિઃ॒ શાંતિઃ॒ શાંતિઃ॑ ॥

॥ હરિઃ॑ ઓમ્ ॥
॥ શ્રી કૃષ્ણાર્પણમસ્તુ ॥