হরিঃ ওম্ ॥ স॒হ না॑ ববতু । স॒হ নৌ॑ ভুনক্তু । স॒হ বী॒র্যং॑ করবাবহৈ । তে॒জ॒স্বি না॒বধী॑তমস্তু॒ মা বি॑দ্বিষা॒বহৈ᳚ । ওং শাংতিঃ॒ শাংতিঃ॒ শাংতিঃ॑ ॥

ব্র॒হ্ম॒বিদা᳚প্নোতি॒ পরম্᳚ ॥ তদে॒ষাঽভ্যু॑ক্তা । স॒ত্যং জ্ঞা॒নম॑নং॒তং ব্রহ্ম॑ । যো বেদ॒ নিহি॑তং॒ গুহা॑যাং পর॒মে ব্যো॑মন্ন্ । সো᳚ঽশ্নু॒তে॒ সর্বা॒ন্কামাং᳚থ্স॒হ । ব্রহ্ম॑ণা বিপ॒শ্চিতেতি॑ ॥ তস্মা॒দ্বা এ॒তস্মা॑দা॒ত্মন॑ আকা॒শস্সংভূ॑তঃ । আ॒কা॒শাদ্বা॒যুঃ । বা॒যোর॒গ্নিঃ । অ॒গ্নেরাপঃ॑ । অ॒দ্ভ্যঃ পৃ॑থি॒বী । পৃ॒থি॒ব্যা ওষ॑ধযঃ । ওষ॑ধী॒ভ্যোন্নম্᳚ । অন্না॒ত্পুরু॑ষঃ । স বা এষ পুরুষোঽন্ন॑রস॒মযঃ । তস্যেদ॑মেব॒ শিরঃ । অযং দক্ষি॑ণঃ প॒ক্ষঃ । অযমুত্ত॑রঃ প॒ক্ষঃ । অযমাত্মা᳚ । ইদং পুচ্ছম্॑ প্রতি॒ষ্ঠা । তদপ্যেষ শ্লো॑কো ভ॒বতি ॥ 1 ॥

অন্না॒দ্বৈ প্র॒জাঃ প্র॒জাযং॑তে । যাঃ কাশ্চ॑ পৃথি॒বীগ্ শ্রি॒তাঃ । অথো॒ অন্নে॑নৈ॒ব জী॑বংতি। অথৈ॑ন॒দপি॑ যংত্যংত॒তঃ । অন্ন॒গ্-ম্॒ হি ভু॒তানাং॒ জ্যেষ্ঠম্᳚ । তস্মা᳚থ্সর্বৌষ॒ধমু॑চ্যতে । সর্বং॒ বৈ তেঽন্ন॑মাপ্নুবংতি । যেঽন্নং॒ ব্রহ্মো॒পাস॑তে । অন্ন॒গ্-ম্॒ হি ভু॒তানাং॒ জ্যেষ্ঠম্᳚ । তস্মা᳚থ্সর্বৌষ॒ধমু॑চ্যতে । অন্না᳚দ্ভূ॒তানি॒ জাযং॑তে । জাতা॒ন্যন্নেন॑ বর্ধংতে । অদ্যতেঽত্তি চ॑ ভূতা॒নি । তস্মাদন্নং তদুচ্য॑ত ই॒তি । তস্মাদ্বা এতস্মাদন্ন॑রস॒মযাত্ । অন্যোংতর আত্মা᳚ প্রাণ॒মযঃ । তেনৈ॑ষ পূ॒র্ণঃ । স বা এষ পুরুষবি॑ধ এ॒ব । তস্য পুরু॑ষবি॒ধতাম্ । অন্বযং॑ পুরুষ॒বিধঃ । তস্য প্রাণ॑ এব॒ শিরঃ । ব্যানো দক্ষি॑ণঃ প॒ক্ষঃ । অপান উত্ত॑রঃ প॒ক্ষঃ । আকা॑শ আ॒ত্মা । পৃথিবী পুচ্ছং॑ প্রতি॒ষ্ঠা । তদপ্যেষ শ্লো॑কো ভ॒বতি ॥ 2 ॥

প্রা॒ণং দে॒বা অনু॒প্রাণং॑তি । ম॒নু॒ষ্যাঃ᳚ প॒শব॑শ্চ॒ যে । প্রা॒ণো হি ভূ॒তনা॒মাযুঃ॑ । তস্মা᳚থ্সর্বাযু॒ষমু॑চ্যতে । সর্ব॑মে॒ব ত॒ আযু॑র্যংতি । যে প্রা॒ণং ব্রহ্মো॒পাস॑তে । প্রাণো হি ভূতা॑নামা॒যুঃ । তস্মাথ্সর্বাযুষমুচ্য॑ত ই॒তি । তস্যৈষ এব শারী॑র আ॒ত্মা । যঃ॑ পূর্ব॒স্য । তস্মাদ্বা এতস্মা᳚ত্-প্রাণ॒মযাত্ । অন্যোঽংতর আত্মা॑ মনো॒মযঃ । তেনৈ॑ষ পূ॒র্ণঃ । স বা এষ পুরুষবি॑ধ এ॒ব। তস্য পুরু॑ষবি॒ধতাম্ । অন্বযং॑ পুরুষ॒বিধঃ । তস্য যজু॑রেব॒ শিরঃ । ঋগ্-দক্ষি॑ণঃ প॒ক্ষঃ । সামোত্ত॑রঃ প॒ক্ষঃ । আদে॑শ আ॒ত্মা । অথর্বাংগিরসঃ পুচ্ছং॑ প্রতি॒ষ্ঠা । তদপ্যেষ শ্লো॑কো ভ॒বতি ॥ 3 ॥

যতো॒ বাচো॒ নিব॑র্তংতে । অপ্রা᳚প্য॒ মন॑সা স॒হ । আনংদং ব্রহ্ম॑ণো বি॒দ্বান্ । ন বিভেতি কদা॑চনে॒তি । তস্যৈষ এব শারী॑র আ॒ত্মা । যঃ॑ পূর্ব॒স্য । তস্মাদ্বা এতস্মা᳚ন্-মনো॒মযাত্ । অন্যোঽংতর আত্মা বি॑জ্ঞান॒মযঃ । তেনৈ॑ষ পূ॒র্ণঃ । স বা এষ পুরুষবি॑ধ এ॒ব । তস্য পুরু॑ষবি॒ধতাম্ । অন্বযং॑ পুরুষ॒বিধঃ । তস্য শ্র॑দ্ধৈব॒ শিরঃ । ঋতং দক্ষি॑ণঃ প॒ক্ষঃ । সত্যমুত্ত॑রঃ প॒ক্ষঃ । যো॑গ আ॒ত্মা । মহঃ পুচ্ছং॑ প্রতি॒ষ্ঠা । তদপ্যেষ শ্লো॑কো ভ॒বতি ॥ 4 ॥

বি॒জ্ঞানং॑ য॒জ্ঞং ত॑নুতে । কর্মা॑ণী তনু॒তেঽপি॑ চ । বি॒জ্ঞানং॑ দে॒বাস্সর্বে᳚ । ব্রহ্ম॒ জ্যেষ্ঠ॒মুপা॑সতে । বি॒জ্ঞানং॒ ব্রহ্ম॒ চেদ্বেদ॑ । তস্মা॒চ্চেন্ন প্র॒মাদ্য॑তি । শরীরে॑ পাপ্ম॑নো হি॒ত্বা । সর্বান্ কামাংথ্সমশ্নু॑ত ই॒তি । তস্যৈষ এব শারী॑র আ॒ত্মা । যঃ॑ পূর্ব॒স্য । তস্মাদ্বা এতস্মাদ্বি॑জ্ঞান॒মযাত্ । অন্যোঽংতর আত্মা॑ঽঽনংদ॒মযঃ । তেনৈ॑ষ পূ॒র্ণঃ । স বা এষ পুরুষবি॑ধ এ॒ব । তস্য পুরু॑ষবি॒ধতাম্ । অন্বযং॑ পুরুষ॒বিধঃ । তস্য প্রিয॑মেব॒ শিরঃ । মোদো দক্ষি॑ণঃ প॒ক্ষঃ । প্রমোদ উত্ত॑রঃ প॒ক্ষঃ । আনং॑দ আ॒ত্মা । ব্রহ্ম পুচ্ছং॑ প্রতি॒ষ্ঠা । তদপ্যেষ শ্লো॑কো ভ॒বতি ॥ 5 ॥

অস॑ন্নে॒ব স॑ ভবতি । অস॒দ্ব্রহ্মেতি॒ বেদ॒ চেত্ । অস্তি ব্রহ্মেতি॑ চেদ্বে॒দ । সংতমেনং ততো বি॑দুরি॒তি । তস্যৈষ এব শারী॑র আ॒ত্মা । যঃ॑ পূর্ব॒স্য । অথাতো॑ঽনুপ্র॒শ্নাঃ । উ॒তাবি॒দ্বান॒মুং লো॒কং প্রেত্য॑ । কশ্চ॒ন গ॑চ্চ॒তী(3) । আহো॑ বি॒দ্বান॒মুং লো॒কং প্রেত্য॑ । কস্চি॒থ্সম॑শ্নু॒তা(3) উ॒ । সো॑ঽকামযত । ব॒হু স্যাং॒ প্রজা॑যে॒যেতি॑ । স তপো॑ঽতপ্যত । স তপ॑স্ত॒প্ত্বা । ইদগ্-ম্ সর্ব॑মসৃজত । যদি॒দং কিংচ॑ । তথ্সৃ॒ষ্ট্বা । তদে॒বানু॒প্রাবি॑শত্ । তদ॑নুপ্র॒বিশ্য॑ । সচ্চ॒ ত্যচ্চা॑ভবত্ । নি॒রুক্তং॒ চানি॑রুক্তং চ । নি॒লয॑নং॒ চানি॑লযনং চ । বি॒জ্ঞানং॒ চাবি॑জ্ঞনং চ । সত্যং চানৃতং চ স॑ত্যম॒ভবত্ । যদি॑দং কিং॒চ । তথ্সত্যমি॑ত্যাচ॒ক্ষতে । তদপ্যেষ শ্লো॑কো ভ॒বতি ॥ 6 ॥

অস॒দ্বা ই॒দমগ্র॑ আসীত্ । ততো॒ বৈ সদ॑জাযত । তদাত্মানগ্গ্ স্বয॑মকু॒রুত । তস্মাত্তথ্সুকৃতমুচ্য॑ত ই॒তি । যদ্বৈ॑ তথ্সু॒কৃতম্ । র॑সো বৈ॒ সঃ । রসগ্গ্ হ্যেবাযং লব্ধ্বাঽঽনং॑দী ভ॒বতি । কো হ্যেবান্যা᳚ত্কঃ প্রা॒ণ্যাত্ । যদেষ আকাশ আনং॑দো ন॒ স্যাত্ । এষ হ্যেবাঽঽনং॑দযা॒তি । য॒দা হ্যে॑বৈষ॒ এতস্মিন্নদৃশ্যেঽনাত্ম্যেঽনিরুক্তেঽনিলযনেঽভযং প্রতি॑ষ্ঠাং বিং॒দতে । অথ সোঽভযং গ॑তো ভ॒বতি । য॒দা হ্যে॑বৈষ॒ এতস্মিন্নুদরমংত॑রং কু॒রুতে । অথ তস্য ভ॑যং ভ॒বতি । তত্বেব ভযং বিদুষোঽম॑ন্বান॒স্য । তদপ্যেষ শ্লো॑কো ভ॒বতি ॥ 7 ॥

ভী॒ষাঽস্মা॒দ্বাতঃ॑ পবতে । ভী॒ষোদে॑তি॒ সূর্যঃ॑ । ভী॒ষাঽস্মাদগ্নি॑শ্চেংদ্র॒শ্চ । মৃত্যুর্ধাবতি পংচ॑ম ই॒তি । সৈষাঽঽনংদস্য মীমাগ্-ম্॑সা ভ॒বতি । যুবা স্যাথ্সাধুযু॑বাঽধ্যা॒যকঃ । আশিষ্ঠো দৃডিষ্ঠো॑ বলি॒ষ্ঠঃ । তস্যেযং পৃথিবী সর্বা বিত্তস্য॑ পূর্ণা॒ স্যাত্ । স একো মানুষ॑ আনং॒দঃ । তে যে শতং মানুষা॑ আনং॒দাঃ । স একো মনুষ্যগংধর্বাণা॑মানং॒দঃ । শ্রোত্রিযস্য চাকাম॑হত॒স্য । তে যে শতং দেবগংধর্বাণা॑মানং॒দাঃ । স একঃ পিতৃণাং চিরলোকলোকানা॑মানং॒দঃ । শ্রোত্রিযস্য চাকাম॑হত॒স্য । তে যে শতং পিতৃণাং চিরলোকলোকানা॑মানং॒দাঃ । স এক আজানজানাং দেবানা॑মানং॒দঃ । শ্রোত্রিযস্য চাকাম॑হত॒স্য । তে যে শতমাজানজানাং দেবানা॑মানং॒দাঃ । স একঃ কর্মদেবানাং দেবানা॑মানং॒দঃ । যে কর্মণা দেবান॑পি যং॒তি । শ্রোত্রিযস্য চাকাম॑হত॒স্য । তে যে শতং কর্মদেবানাং দেবানা॑মানং॒দাঃ । স একো দেবানা॑মানং॒দঃ । শ্রোত্রিযস্য চাকাম॑হত॒স্য । তে যে শতং দেবানা॑মানং॒দাঃ । স এক ইংদ্র॑স্যাঽঽনংং॒দঃ । শ্রোত্রিযস্য চাকাম॑হত॒স্য । তে যে শতমিংদ্র॑স্যাঽঽনং॒দাঃ । স একো বৃহস্পতে॑রানং॒দঃ । শ্রোত্রিযস্য চাকাম॑হত॒স্য । তে যে শতং বৃহস্পতে॑রানং॒দাঃ । স একঃ প্রজাপতে॑রানং॒দঃ । শ্রোত্রিযস্য চাকাম॑হত॒স্য । তে যে শতং প্রজাপতে॑রানং॒দাঃ । স একো ব্রহ্মণ॑ আনং॒দঃ । শ্রোত্রিযস্য চাকাম॑হত॒স্য । তে যে শতং পজাপতে॑রানং॒দাঃ । স একো ব্রহ্মণ॑ আনং॒দঃ । শ্রোত্রিযস্য চাকাম॑হত॒স্য । স যশ্চা॑যং পু॒রুষে । যশ্চাসা॑বাদি॒ত্যে । স একঃ॑ । স য॑ এবং॒ বিত্ । অস্মাল্লো॑কাত্প্রে॒ত্য । এতমন্নমযমাত্মানমুপ॑সংক্রা॒মতি । এতং প্রাণমযমাত্মানমুপ॑সংক্রা॒মতি । এতং মনোমযমাত্মানমুপ॑সংক্রা॒মতি। এতং বিজ্ঞানমযমাত্মানমুপ॑সংক্রা॒মতি । এতমানংদমযমাত্মানমুপ॑সংক্রা॒মতি । তদপ্যেষ শ্লো॑কো ভ॒বতি ॥ 8 ॥

যতো॒ বাচো॒ নিব॑র্তংতে । অপ্রা᳚প্য॒ মন॑সা স॒হ । আনংদং ব্রহ্ম॑ণো বি॒দ্বান্ । ন বিভেতি কুত॑শ্চনে॒তি । এতগ্-ম্ হ বাব॑ ন ত॒পতি । কিমহগ্-ম্ সাধু॑ নাক॒রবম্ । কিমহং পাপমকর॑বমি॒তি । স য এবং বিদ্বানেতে আত্মা॑নগ্গ্ স্পৃ॒ণুতে । উ॒ভে হ্যে॑বৈষ॒ এতে আত্মা॑নগ্গ্ স্পৃ॒ণুতে । য এ॒বং বেদ॑ । ইত্যু॑প॒নিষ॑ত্ ॥ 9 ॥

স॒হ না॑ ববতু । স॒হ নৌ॑ ভুনক্তু । স॒হ বী॒র্যং॑ করবাবহৈ । তে॒জ॒স্বি না॒বধী॑তমস্তু॒ মা বি॑দ্বিষা॒বহৈ᳚ । ওং শাংতিঃ॒ শাংতিঃ॒ শাংতিঃ॑ ॥

॥ হরিঃ॑ ওম্ ॥
॥ শ্রী কৃষ্ণার্পণমস্তু ॥